Nirguna Manasa Puja
Aus Yogawiki
Nirguna Manasa Puja: Die Komposition der Verse der Nirguna Manasa Puja wird dem Vedanta-Gelehrten Adi Shankaracharya zugeschrieben. Sie besteht aus 33 Versen, wobei die ersten 8 die verschiedenen Fragen des Schülers darstellen und die Antworten in den restlichen 25 Versen vom Guru gegeben werden. Manasa und Puja können zusammen als Manasapuja (IAST: mānasapūjā; Devanagari: मानसपूजा) geschrieben werden. Mānasapūjā ist ein Sanskrit-Wort, das aus der Kombination von zwei Wörtern gebildet wird, nämlich Manasa (mānasa) und Puja pūjā und bezieht sich auf geistige Verehrung oder Verehrung durch abstrakte Kontemplation und / oder Reflexion.
!!Die Übersetzung der Verse ist derzeit in Arbeit und wird zu gegebener Zeit hier veröffentlicht!!
Nirguna Manasa Puja in IAST:
śiṣya uvāca |
- akhaṇḍe saccidānande nirvikalpaikarūpiṇi |
- sthite advitīyabhāve api kathaṃ pūjā vidhīyate || 1||
- pūrṇasyāvāhanaṃ kutra sarvādhārasya cāsanam. |
- svacchasya pādyamarghyaṃ ca śuddhasyācamanaṃ kutaḥ || 2||
- nirmalasya kutaḥ snānaṃ vāso viśvodarasya ca |
- agotrasya tvavarṇasya kutastasyopavītakam || 3||
- nirlepasya kuto gandhaḥ puṣpaṃ nirvāsanasya ca |
- nirviśeṣasya kā bhūṣā ko alaṅkāro nirākṛteḥ || 4||
- nirañjanasya kiṃ dhūpairdīpairvā sarvasākṣiṇaḥ |
- nijānandaikatṛptasya naivedyaṃ kiṃ bhavediha || 5||
- viśvānandayitustasya kiṃ tāmbūlaṃ prakalpyate |
- svayaṃprakāśacidrūpo yo asāvarkādibhāsakaḥ || 6||
- gīyate śrutibhistasya nīrājanavidhiḥ kutaḥ |
- pradakṣiṇamanantasya praṇāmo advayavastunaḥ || 7||
- vedavācāmavedyasya kiṃ vā stotraṃ vidhīyate |
- antarbahiḥ saṃsthitasyodvāsanavidhiḥ kutaḥ || 8||
gururuvāca |
- ārādhayāmi maṇisaṃnibhamātmaliṅgam
- māyāpurīhṛdayapaṅkajasaṃniviṣṭam |
- śraddhānadīvimalacittajalābhiṣekai\-
- rnityaṃ samādhikusumairnapunarbhavāya || 9||
- ayameko avaśiṣṭo asmītyevamāvāhayecchivam |
- āsanaṃ kalpayetpaścātsvapratiṣṭhātmacintanam || 10||
- puṇyapāparajaḥsaṅgo mama nāstīti vedanam |
- pādyaṃ samarpayedvidvansarvakalmaṣanāśanam || 11||
- anādikalpavidhṛtamūlājñānajalāñjalim |
- visṛjedātmaliṅgasya tadevārghyasamarpaṇam || 12||
- brahmānandābdhikallolakaṇakoṭyaṃśaleśakam |
- pibantīndrādaya iti dhyānamācamanaṃ matam || 13||
- brahmānandajalenaiva lokāḥ sarve pariplutāḥ |
- acchedyo ayamiti dhyānamabhiṣecanamātmanaḥ || 14||
- nirāvaraṇacaitanyaṃ prakāśo asmīti cintanam |
- ātmaliṅgasya sadvastramityevaṃ cintayenmuniḥ || 15||
- triguṇātmāśeṣalokamālikāsūtramasmyaham |
- iti niścayamevātra hyupavītaṃ paraṃ matam || 16||
- anekavāsanāmiśraprapañco ayaṃ dhṛto mayā |
- nānyenetyanusandhānamātmanaścandanaṃ bhavet || 17||
- rajaḥsattvatamovṛttityāgarūpaistilākṣataiḥ |
- ātmaliṅgaṃ yajennityaṃ jīvanmuktiprasiddhaye || 18||
- īśvaro gururātmeti bhedatrayavivarjitaiḥ |
- bilvapatrairadvitīyairātmaliṅgaṃ yajecchivam || 19||
- samastavāsanātyāgaṃ dhūpaṃ tasya vicintayet |
- jyotirmayātmavijñānaṃ dīpaṃ sandarśayedbudhaḥ || 20||
- naivedyamātmaliṅgasya brahmāṇḍākhyaṃ mahodanam |
- pibānandarasaṃ svādu mṛtyurasyopasecanam || 21||
- ajñānocchiṣṭakarasya kṣālanaṃ jñānavāriṇā |
- viśuddhasyātmaliṅgasya hastaprakṣālanaṃ smaret || 22||
- rāgādiguṇaśūnyasya śivasya paramātmanaḥ |
- sarāgaviṣayābhyāsatyāgastāmbūlacarvaṇam || 23||
- ajñānadhvāntavidhvaṃsapracaṇḍamatibhāskaram |
- ātmano brahmatājñānaṃ nīrājanamihātmanaḥ || 24||
- vividhabrahmasaṃdṛṣṭirmālikābhiralaṅkṛtam |
- pūrṇānandātmatādṛṣṭiṃ puṣpāñjalimanusmaret || 25||
- paribhramanti brahmāṇḍasahasrāṇi mayīśvare |
- kūṭasthācalarūpo ahamiti dhyānaṃ pradakṣiṇam || 26||
- viśvavandyo ahamevāsmi nāsti vandyo madanyataḥ |
- ityālocanamevātra svātmaliṅgasya vandanam || 27||
- ātmanaḥ satkriyā proktā kartavyābhāvabhāvanā |
- nāmarūpavyatītātmacintanaṃ nāmakīrtanam || 28||
- śravaṇaṃ tasya devasya śrotavyābhāvacintanam |
- mananaṃ tvātmaliṅgasya mantavyābhāvacintanam || 29||
- dhyātavyābhāvavijñānaṃ nididhyāsanamātmanaḥ |
- samastabhrāntivikṣeparāhityenātmaniṣṭhatā || 30||
- samādhirātmano nāma nānyaccittasya vibhramaḥ |
- tatraiva bahmaṇi sadā cittaviśrāntiriṣyate || 31||
- evaṃ vedāntakalpoktasvātmaliṅgaprapūjanam |
- kurvannāmaraṇaṃ vāpi kṣaṇaṃ vā susamāhitaḥ || 32||
- sarvadurvāsanājālaṃ padapāṃsumiva tyajet |
- vidhūyājñānaduḥkhaughaṃ mokṣānandaṃ samaśnute || 33||
Nirguna Manasa Puja in Devanagari Schrift:
शिष्य उवाच ।
- अखण्डे सच्चिदानन्दे निर्विकल्पैकरूपिणि ।
- स्थिते अद्वितीयभावे अपि कथं पूजा विधीयते ॥ १॥
- पूर्णस्यावाहनं कुत्र सर्वाधारस्य चासनम् ।
- स्वच्छस्य पाद्यमर्घ्यं च शुद्धस्याचमनं कुतः ॥ २॥
- निर्मलस्य कुतः स्नानं वासो विश्वोदरस्य च ।
- अगोत्रस्य त्ववर्णस्य कुतस्तस्योपवीतकम् ॥ ३॥
- निर्लेपस्य कुतो गन्धः पुष्पं निर्वासनस्य च ।
- निर्विशेषस्य का भूषा को अलङ्कारो निराकृतेः ॥ ४॥
- निरञ्जनस्य किं धूपैर्दीपैर्वा सर्वसाक्षिणः ।
- निजानन्दैकतृप्तस्य नैवेद्यं किं भवेदिह ॥ ५॥
- विश्वानन्दयितुस्तस्य किं ताम्बूलं प्रकल्प्यते ।
- स्वयंप्रकाशचिद्रूपो यो असावर्कादिभासकः ॥ ६॥
- गीयते श्रुतिभिस्तस्य नीराजनविधिः कुतः ।
- प्रदक्षिणमनन्तस्य प्रणामो अद्वयवस्तुनः ॥ ७॥
- वेदवाचामवेद्यस्य किं वा स्तोत्रं विधीयते ।
- अन्तर्बहिः संस्थितस्योद्वासनविधिः कुतः ॥ ८॥
- गुरुरुवाच ।
- आराधयामि मणिसंनिभमात्मलिङ्गम्
- मायापुरीहृदयपङ्कजसंनिविष्टम् ।
- श्रद्धानदीविमलचित्तजलाभिषेकै\-
- र्नित्यं समाधिकुसुमैर्नपुनर्भवाय ॥ ९॥
- अयमेको अवशिष्टो अस्मीत्येवमावाहयेच्छिवम् ।
- आसनं कल्पयेत्पश्चात्स्वप्रतिष्ठात्मचिन्तनम् ॥ १०॥
- पुण्यपापरजःसङ्गो मम नास्तीति वेदनम् ।
- पाद्यं समर्पयेद्विद्वन्सर्वकल्मषनाशनम् ॥ ११॥
- अनादिकल्पविधृतमूलाज्ञानजलाञ्जलिम् ।
- विसृजेदात्मलिङ्गस्य तदेवार्घ्यसमर्पणम् ॥ १२॥
- ब्रह्मानन्दाब्धिकल्लोलकणकोट्यंशलेशकम् ।
- पिबन्तीन्द्रादय इति ध्यानमाचमनं मतम् ॥ १३॥
- ब्रह्मानन्दजलेनैव लोकाः सर्वे परिप्लुताः ।
- अच्छेद्यो अयमिति ध्यानमभिषेचनमात्मनः ॥ १४॥
- निरावरणचैतन्यं प्रकाशो अस्मीति चिन्तनम् ।
- आत्मलिङ्गस्य सद्वस्त्रमित्येवं चिन्तयेन्मुनिः ॥ १५॥
- त्रिगुणात्माशेषलोकमालिकासूत्रमस्म्यहम् ।
- इति निश्चयमेवात्र ह्युपवीतं परं मतम् ॥ १६॥
- अनेकवासनामिश्रप्रपञ्चो अयं धृतो मया ।
- नान्येनेत्यनुसन्धानमात्मनश्चन्दनं भवेत् ॥ १७॥
- रजःसत्त्वतमोवृत्तित्यागरूपैस्तिलाक्षतैः ।
- आत्मलिङ्गं यजेन्नित्यं जीवन्मुक्तिप्रसिद्धये ॥ १८॥
- ईश्वरो गुरुरात्मेति भेदत्रयविवर्जितैः ।
- बिल्वपत्रैरद्वितीयैरात्मलिङ्गं यजेच्छिवम् ॥ १९॥
- समस्तवासनात्यागं धूपं तस्य विचिन्तयेत् ।
- ज्योतिर्मयात्मविज्ञानं दीपं सन्दर्शयेद्बुधः ॥ २०॥
- नैवेद्यमात्मलिङ्गस्य ब्रह्माण्डाख्यं महोदनम् ।
- पिबानन्दरसं स्वादु मृत्युरस्योपसेचनम् ॥ २१॥
- अज्ञानोच्छिष्टकरस्य क्षालनं ज्ञानवारिणा ।
- विशुद्धस्यात्मलिङ्गस्य हस्तप्रक्षालनं स्मरेत् ॥ २२॥
- रागादिगुणशून्यस्य शिवस्य परमात्मनः ।
- सरागविषयाभ्यासत्यागस्ताम्बूलचर्वणम् ॥ २३॥
- अज्ञानध्वान्तविध्वंसप्रचण्डमतिभास्करम् ।
- आत्मनो ब्रह्मताज्ञानं नीराजनमिहात्मनः ॥ २४॥
- विविधब्रह्मसंदृष्टिर्मालिकाभिरलङ्कृतम् ।
- पूर्णानन्दात्मतादृष्टिं पुष्पाञ्जलिमनुस्मरेत् ॥ २५॥
- परिभ्रमन्ति ब्रह्माण्डसहस्राणि मयीश्वरे ।
- कूटस्थाचलरूपो अहमिति ध्यानं प्रदक्षिणम् ॥ २६॥
- विश्ववन्द्यो अहमेवास्मि नास्ति वन्द्यो मदन्यतः ।
- इत्यालोचनमेवात्र स्वात्मलिङ्गस्य वन्दनम् ॥ २७॥
- आत्मनः सत्क्रिया प्रोक्ता कर्तव्याभावभावना ।
- नामरूपव्यतीतात्मचिन्तनं नामकीर्तनम् ॥ २८॥
- श्रवणं तस्य देवस्य श्रोतव्याभावचिन्तनम् ।
- मननं त्वात्मलिङ्गस्य मन्तव्याभावचिन्तनम् ॥ २९॥
- ध्यातव्याभावविज्ञानं निदिध्यासनमात्मनः ।
- समस्तभ्रान्तिविक्षेपराहित्येनात्मनिष्ठता ॥ ३०॥
- समाधिरात्मनो नाम नान्यच्चित्तस्य विभ्रमः ।
- तत्रैव बह्मणि सदा चित्तविश्रान्तिरिष्यते ॥ ३१॥
- एवं वेदान्तकल्पोक्तस्वात्मलिङ्गप्रपूजनम् ।
- कुर्वन्नामरणं वापि क्षणं वा सुसमाहितः ॥ ३२॥
- सर्वदुर्वासनाजालं पदपांसुमिव त्यजेत् ।
- विधूयाज्ञानदुःखौघं मोक्षानन्दं समश्नुते ॥ ३३॥
Quelle: Nirguna Manasa Puja Text in ITRANS Schrift von sanskritdocuments.org
Video Link zur Rezitation der Nirguna Manasa Puja Verse:
Hinweis: Der Text im Video ist in der Kannada-Schrift und nicht in Devanagari geschrieben.
