Quelltext der Seite Ajita Agama Sanskrit IAST

'''Ajita Agama Sanskrit IAST''' bietet den Sanskrittext des [[Ajita Agama]] in lateinischer Umschrift mit diakritischen Zeichen. Das Werk gehört zu den [[Agama]]s des [[Shaiva Siddhanta]] und behandelt die Verehrung [[Shiva]]s, die Kraft der [[Mantra]]s, [[Initiation]], innere Sammlung sowie Tempelbau und heilige Rituale.

Der hier wiedergegebene ''Kriyāpāda'', der Abschnitt über das rituelle Handeln, umfasst 103 Kapitel und fünf Anhänge. Er verbindet ausführliche Anweisungen zur [[Puja]] mit Lehren über [[Shiva]] und [[Shakti]], [[Guru]], [[Yoga]] und [[Moksha|Befreiung]].

Die vollständige deutsche Übersetzung mit einer Einführung in Lehre und spirituelle Bedeutung findest du unter '''[[Ajita Agama]]'''. Der Sanskrittext in indischer Schrift steht unter '''[[Ajita Agama Sanskrit Devanagari]]'''. Für die meditative Lektüre bietet '''[[Ajita Agama 108 Verse und Mantras]]''' eine Auswahl deutscher Verse und belegter Rezitationsformeln.

==Hinweise zur Umschrift und Orientierung==

Die Umschrift folgt dem internationalen Standard '''[[IAST]]'''. Seine Zeichen unterscheiden Sanskritlaute genauer als die gewöhnliche lateinische Schreibweise: ā, ī und ū bezeichnen lange Vokale; ś und ṣ unterscheiden zwei verschiedene Zischlaute. Die Umschrift erleichtert das Lesen und das Erlernen der Aussprache auch ohne Kenntnis der [[Devanagari]]-Schrift.

Der Text steht kapitelweise zusammenhängend, ohne eingeschobene Übersetzungen. Die Kennzeichnung '''20.68''' bedeutet „Kapitel 20, Vers 68“ und ermöglicht den direkten Vergleich mit der deutschen Ausgabe. Bei den Anhängen steht beispielsweise '''A3.1''' für „Anhang 3, Vers 1“. Die kursiven Sanskritzeilen am Kapitelanfang nennen die überlieferten Überschriften.

Unregelmäßigkeiten der überlieferten Verszählung bleiben erkennbar; doppelte Nummern werden durch Buchstabenzusätze unterschieden. Nähere Erläuterungen zu diesen Stellen und zur Textüberlieferung stehen im [[Ajita Agama#Hinweise zur Textgrundlage|Hauptartikel]].

==Sanskrittext Ajita Agama in IAST==

===Kapitel 1===

''prathamaḥ paṭalaḥ · tantrāvatāraḥ''

'''1.1''' śrīmadgirivare ramye mandare cārukandare devadānavagandharvadaityadivyāṅganāgaṇaiḥ

'''1.2''' yakṣarākṣasanāgendrabhūtapretapiśācakaiḥ mātṛkiṃpuruṣaiścaiva pramathairvainateyakaiḥ

'''1.3''' vidyādharaiśca vividhaiḥ kinnarairmunibhistathā aṣṭādaśagaṇairetairjuṣṭe tuṣṭiprade sadā

'''1.4''' hṛṣṭapuṣṭānyapuṣṭādyaiḥ pataṅgaiḥ parinādite puṣpabhārāvanamraiśca phalabhārāvanamrakaiḥ

'''1.5''' nānāvṛkṣalatāgulmaiḥ paritaḥ pariśobhite haricandanamandārapārijātaiḥ sakalpakaiḥ

'''1.6''' santānaiśca kṛtodyāne gaṅgāsrotaḥsamākule haṃsakāraṇḍavakrauñcacakravākādisaṃtate

'''1.7''' mattamātaṅgasiṃharkṣamṛgaśākhāmṛgādibhiḥ nānāsattvagaṇairmuktavairabhāvaiḥ samākule

'''1.8''' āsīnamāsane divye dharmādyaiḥ parikalpite umeśaṃ devadeveśaṃ somaṃ somavibhūṣaṇam

'''1.9''' brahmendradhanadārkenduvaruṇāntakavāyubhiḥ vasvādityaiśca rudrādyaiḥ sarvadevairupāsitam

'''1.10''' vinayenācyuto gatvā pṛcchati sma jagadgurum acyuta uvāca bhagavandevadeveśa tripurāntaka śaṃkara

'''1.11''' ajitaṃ nāma yattantraṃ śivātprāptaṃ tvayā purā tanmamācakṣva deveśa tasyotpattipuraḥ saram

'''1.12''' evamukto mahādevaḥ sphuranniṭilalocanaḥ uvāca tantraṃ hṛṣṭātmā girijāpatiravyayaḥ

'''1.13''' yathāśrutaṃ tatsuśivādacyutāya mahātmane maheśvara uvāca śabdabrahmasvarūpam āsītpūrvaṃ hi sargādau vyomarūpāt parācchivāt

'''1.14''' śabdastato’kṣarastasmācchabdarāśiranuttamaḥ navavargasamāyuktaḥ pañcāśadbhedabheditaḥ

'''1.15''' navaparvakramastatra pañcāśadbhedasaṃyutaḥ yonibījātmakaścāpi sa bhedo’tra nigadyate

'''1.16''' a ā i ī u ū caiva ṛ ṝ lṛ lṝ tathaiva ca e ai o au ca aṃ aśca vargo’yaṃ prathamo bhavet

'''1.17''' kakāraśca khakāraśca gaghau ṅaśca dvitīyakaḥ tṛtīyastu cakāraśca chakāro jajhañāstathā

'''1.18''' caturthastu ṭakāraśca ṭhakāraśca ḍakārakaḥ ḍhaṇau caiva tathau caiva dadhau caiva na eva ca

'''1.19''' pañcamaḥ syāttathā ṣaṣṭhaḥ paphau babhau ma eva ca yakāro rephakaścaiva lakāro vaśca saptamaḥ

'''1.20''' śakāraśca ṣakāraśca sakāraścāṣṭamaḥ smṛtaḥ haḷau ca navamo vargo bhavetparvakramo hyayam

'''1.21''' yonibījātmanā bhinno vācāmaṅkurarūpadhṛt akārādivisargāntaṃ bījaṃ ṣoḍaśamucyate

'''1.22''' yoniḥ syāddhi catustriṃśadakṣarāṇi tataḥ param pañcāśadakṣarairetairgrantharāśiḥ samutthitaḥ

'''1.23''' vedādijñānabhedena śivajñānaṃ vibheditam tasmāddhi kāraṇaṃ viṣṇo tārakaṃ jñānasaṃjñakam

'''1.24''' guhyamekākṣaraṃ taddhi praṇavaḥ parikīrtitaḥ triguṇaṃ trijagaccāpi trivedāṃstrisurānapi

'''1.25''' trikalaṃ ca tritattvaṃ ca tamavehi janārdana brahmadvayaṃ samuddiṣṭaṃ śabdabrahma paraṃ ca yat

'''1.26''' paraṃ tacchivamuddiṣṭaṃ brahmaśabdena śabditam śabdabrahmamayaṃ yattatsadāśivamiti smṛtam

'''1.27''' sadāśivatanuḥ sākṣāt praṇavaḥ syājjanārdana sarvakāraṇabhūto’sau devadevaḥ sadāśivaḥ

'''1.28''' tasyāpi kāraṇatvena saṃsthitaḥ sa paraḥ śivaḥ vāṅmano’tītarūpatvāt paratvena sa kathyate

'''1.29''' tasmātkāraṇabhūto yaḥ sa evātra śivaḥ smṛtaḥ sadāśivastu kartā ca bhartā vai parameśvaraḥ

'''1.30''' tasmānmaheśvaro jātastasmādrudro’hameva ca mattastvaṃ bhavataścāpi brahmā lokapitāmahaḥ

'''1.31''' evamasmātsamutpanno mūladevaḥ sanātanaḥ so’nugrāhya maheśādīñjagadīśān sadāśivaḥ

'''1.32''' asmadviśvajagadbhūtimasmābhiḥ kartumudyataḥ pañcavaktradharo bhūtvā pañcabhistairmukhairapi

'''1.33''' vedādigranthajālaṃ yattatsarvamavadatprabhuḥ yadi śabdamayaṃ jyotirdīpyate na jagatsvataḥ

'''1.34''' ajñānenāndhatamasā bhavedastaṃ gataṃ jagat iti saṃcintya deveśaḥ samutpādya daśātmajān

'''1.35''' teṣāṃ jñānaṃ dadau pūrvaṃ daśabhedena bheditam kāmikaṃ praṇavākhyasya sudhākhyasya ca yogajam

'''1.36''' cintyaṃ sudīptasaṃjñasya kāraṇaṃ kāraṇasya ca idaṃ suśivasaṃjñasya dīptamīśasya caiva hi

'''1.37''' sūkṣmatantraṃ tu sūkṣmasya kālasyoktaṃ sahasrakam suprabhedaṃ diśeśasya cāmbunāmnastathāṃśumat

'''1.38''' śivabhedamiti proktaṃ tantrāṇāṃ daśakaṃ hare daśānāṃ punarapyeṣāṃ vakṣyāmyanyaṃ gurukramam

'''1.39''' praṇavāttrikalaḥ prāptaḥ kāmikaṃ trikalāddharaḥ yogajaṃ tu sudhāsaṃjñādbhasmasaṃjñastataḥ prabhuḥ

'''1.40''' cintyaṃ sudīptarudrāttu gopatiśca tato’mbikā kāraṇātkāraṇaṃ śarvastataścāpi prajāpatiḥ

'''1.41''' śivāccedamahaṃ prāpto mattastvaṃ prāptavānasi dīptamīśāttrimūrtiśca tatastasmāddhutāśanaḥ

'''1.42''' sūkṣmādvai śravaṇaḥ prāptastasmāccāpi prabhañjanaḥ kālanāmnaḥ sahasrākhyaṃ bhīmo dharmastato hare

'''1.43''' suprabhedaṃ diśeśāttu vighneśaśca tataḥ śaśī ambusaṃjñādaṃśumantaṃ prāpto hyugrastato raviḥ

'''1.44''' śivabhedaḥ samākhyāto rudrabhedamatha śṛṇu rudrānaṣṭādaśotpādya śivastatsaṃkhyayā punaḥ

'''1.45''' tantrāṇyeṣāṃ dadau tāṃśca śṛṇu vakṣye janārdana rudrasyānādināmnastu vijayaṃ dattavāṅśivaḥ

'''1.46''' śrīrūpasya paraṃ tantraṃ parameśaprabhāṣitam daśārṇasya tu niśvāsaṃ prodgītaṃ śūlinastataḥ

'''1.47''' mukhabimbaṃ tu śāntasya bindoḥ siddhākhyameva hi santānaṃ śivaniṣṭhasya saumyasyoktaṃ nṛsiṃhakam

'''1.48''' candrajñānamanantasya vimalaṃ nikhilātmanaḥ nidhanasya svayaṃbhūtaṃ vīraṃ tattejasaḥ smṛtam

'''1.49''' rauravaṃ brahmaṇeśasya śivasaṃjñasya mākuṭam kiraṇaṃ devatārkṣyasya lalitaṃ cālayasya tu

'''1.50''' analaṃ vyomanāmnastu śivākhyasya ca vātulam ete rudrāḥ śivājjātā labdhatantrāḥ śivājñayā

'''1.51''' ete prāthamikāḥ proktā dvitīyānapyatha śṛṇu saṃprāpto’nādirudrāttu vijayaṃ parameśvaraḥ

'''1.52''' śrīrūpātpārameśaṃ tu saṃprāpto hyuśanā muniḥ niśvāsaṃ tu daśārṇāttu saṃprāptā śailasaṃbhavā

'''1.53''' prodgītaṃ śūlinaḥ prāptaḥ kavaco munisattamaḥ mukhabimbaṃ praśāntāttu dadhīcī munisattamaḥ

'''1.54''' siddhaṃ bindostataḥ prāptastantraṃ caṇḍeśvaro gaṇaḥ santānaṃ śivaniṣṭhācca saṃprāptaḥ śaṃśapāyanaḥ

'''1.55''' saumyāttu nārasiṃhākhyaṃ nṛsiṃhaḥ prāptavānmahat candrajñānamanantāttu prāpto devapurohitaḥ

'''1.56''' nikhilātmanastu vimalaṃ vīrabhadro gaṇādhipaḥ nidhanācca svayaṃbhūtaṃ saṃprāptaḥ padmasaṃbhavaḥ

'''1.57''' tejaso vīrasaṃjñaṃ tu saṃprāptastu prajāpatiḥ brahmaṇeśāttu saṃprāpto rauravaṃ nandikeśvaraḥ

'''1.58''' makuṭaṃ śivasaṃjñāttu mahādevaśca labdhavān kiraṇaṃ devatārkṣyāttu prāptaḥ saṃvartako muniḥ

'''1.59''' lalitaṃ cālayātprāpto rudrabhairavarūpadhṛt analaṃ vyomasaṃjñācca saṃprāptastu hutāśanaḥ

'''1.60''' śivākhyādvātulaṃ tantraṃ mahākālastu labdhavān aṣṭāviṃśatibhedena bhinneṣveteṣu yo hare

'''1.61''' pratitantraṃ śruto bhedo vakṣye tadagranthasaṃkhyayā vaktāraṃ nārasiṃhākhyaṃ bhairavottarasaṃjñakam

'''1.62''' kāmikasya trayo bhedāḥ saṃkhyā tasya parārdhakam vīṇākhyaṃ tārakākhyaṃ ca śivottaramataḥ param

'''1.63''' ātmayogaṃ ca pañcaite śrutāḥ santādinā saha yogajasya tu bhedāḥ syurgranthasaṃkhyā tu lakṣakam

'''1.64''' sucintyaṃ subhagaṃ vāmaṃ pāpanāśaṃ parodbhavam sudhābimbākhyatantraṃ ca ṣaḍbhedāścintyasaṃjñite

'''1.65''' tasyaiva granthasaṃkhyā tu trilakṣamabhidhīyate pāvanaṃ māraṇaṃ daurgaṃ māhendraṃ bhīmasaṃhitā

'''1.66''' vidveṣaṃ kāraṇaṃ caite bhedāḥ saptaiva kāraṇe granthasaṃkhyā ca koṭiḥ syātpārvatīyākhyameva ca

'''1.67''' prabhūtaṃ ca parodbhūtaṃ padmaṃ cetyajitasya tu bhedāścatvāra uddiṣṭā ayutaṃ granthasaṃkhyayā

'''1.68''' amitaujasamānandamadbhutaṃ cābdasaṃjñitam ameyākhyaṃ tathācchādyaṃ mādhavodbhūtameva hi

'''1.69''' asaṃkhyamamṛtaṃ ceti dīptabhedā nava smṛtāḥ granthasaṃkhyā ca niyutaṃ sūkṣmabhedo na vidyate

'''1.70''' granthasaṃkhyā tu padmaṃ syādajitaṃ vibudhaṃ tathā viśuddhamaṅgasaṃjñaṃ ca hastaṃ cāpyatha jātibhāk

'''1.71''' alaṃkāraṃ subodhaṃ ca prabuddhaṃ cāprameyakam daśa bhedāḥ sahasre tu saṃkhyā śaṅkhaṃ tu tadgatā

'''1.72''' vāsavaṃ kāśyapaṃ nīlalohitaṃ bhūtatantrakam vidyāpurāṇamaindraṃ cāpyātmālaṃkārameva ca

'''1.73''' vāsiṣṭhaṃ gautamaṃ brāhmamīśānottarameva ca prakaraṇaṃ cāpi bhedāḥ syurdvādaśāṃśumataḥ smṛtāḥ

'''1.74''' granthasaṃkhyā bhavedviṣṇo pañcalakṣeṇa lakṣitā suprabhede na bhedo’sti saṃkhyā koṭitrayaṃ bhavet

'''1.75''' athodbhavaṃ ca vijayaṃ saumyaṃ vai mṛtyunāśanam aghoraṃ cātha kauberaṃ mahāghoraṃ tathaiva ca

'''1.76''' vimalaṃ ceti bhedāḥ syurvijayaṃ ca trikoṭikam padmaṃ haṃsaṃ ca sāmānyaṃ mātaṅgaṃ yakṣakaṃ tathā

'''1.77''' puṣkalaṃ supriyāyogaṃ pārameśe prakīrtitāḥ bhedāḥ sapta bhavedagrantho lakṣadvādaśasaṃyutaḥ

'''1.78''' niśvāsottaraniśvāse tathā niśvāsakārikā niśvāsanayanaṃ caiva guhyaniśvāsameva ca

'''1.79''' aghoraniśvāsamevātha niśvāsasya mukhodayam sudhāniśvāsamevātha niśvāsaścāṣṭadhā bhavet

'''1.80''' niśvāsasyaiva saṃkhyā tu koṭirityabhidhīyate vāruṇaṃ kavacaṃ caiva pāśabandhaṃ tu piṅgalam

'''1.81''' kuśaṃ vai daṇḍadhāraṃ ca dhanurvedaṃ tathāparam śivajñānaṃ tathā kośaṃ kālajñānaṃ ca gītakam

'''1.82''' bharataṃ sarpabhṛṣṭaṃ cāpyāyurvedaṃ dhanurdharam ātodyamiti bhedāḥ syuḥ prodgīte ṣoḍaśaiva hi

'''1.83''' tasya syādgranthasaṃkhyā tu lakṣatritayasaṃmitā caturvaktraṃ ca saṃstobhaṃ pratibimbamayogajam

'''1.84''' arthālaṃkāramaiśānyaṃ tuṭinīraṃ tu koṭikam kuṭṭimākhyaṃ tulāyogaṃ tulāpratyayameva ca

'''1.85''' mahāvidyā mahāsauraṃ paṭṭaśekharameva ca nairṛtaṃ ceti bhedāḥ syurbimbe pañcadaśaiva hi

'''1.86''' granthasaṃkhyā tu lakṣaṃ syādatra bhedevyavasthitā sārottaramauśanasaṃ śālākhyaṃ śaśimaṇḍalam

'''1.87''' siddhe bhedāstu catvāraḥ saṃkhyā koṭistu sārdhakā liṅgādhyakṣaṃ surādhyakṣaṃ śaṃkaraṃ ca maheśvaram

'''1.88''' asaṃkhyamanalaṃ dvandvaṃ santāne sapta bhedakāḥ granthasaṃkhyā tu lakṣaṃ syātsantāne tu prakīrtitā

'''1.89''' īśānaṃ śivadharmaṃ ca śivadharmottaraṃ tathā divyaproktaṃ kuberākhyamiti bhedasya pañcakam

'''1.90''' nārasiṃhe tu tatsaṃkhyā dvilakṣamiti kīrtitam sthiraṃ sthāṇu mahāntaṃ ca nandīśaṃ nandikeśvaram

'''1.91''' ekapādapurāṇaṃ ca śāṃkaraṃ nīlarudrakam śivaṃ candraṃ kalpabhedaṃ śivaśāsanameva ca

'''1.92''' śivaśekharasaṃjñaṃ ca devyāstu matameva ca caturdaśena bhedena candrajñānaṃ trikoṭikam

'''1.93''' anantaṃ bhogamākrāntaṃ vṛṣaguhyamataḥ param vṛṣabhaṃ vṛṣodaraṃ caiva vyatibhūtaṃ tu raudrakam

'''1.94''' sudantaṃ bhedakaṃ caivāpyārevatamalaṃkṛtam atikrāntāṭṭahāsākhye bhadramacchidrameva ca

'''1.95''' vimale ṣoḍaśoktā hi bhedāḥ koṭitrayānvitam prajāpatimataṃ padmamiti bhedadvayaṃ matam

'''1.96''' svāyaṃbhuve tu tadgranthasaṃkhyā koṭistu sārdhakā prastaraṃ phullamamalaṃ prabodhakamataḥ param

'''1.97''' amohaṃ mohasamayaṃ śākaṭāyitameva ca bhadraṃ vilekhanaṃ vīraṃ halaṃ vai bodhabodhake

'''1.98''' bhedāstrayodaśa proktā vīre niyutasaṃkhyayā kālākhyaṃ kāladahanaṃ rauravaṃ rauravottaram

'''1.99''' mahākālamataṃ caindraṃ ṣaḍbhedā raurave sthitāḥ asmiṃstantrottame proktaṃ granthasaṃkhyārbudāṣṭakam

'''1.100''' makuṭottaraṃ tu makuṭaṃ makuṭaṃ dvividhaṃ smṛtam granthasaṃkhyā tu tasyaiva lakṣamekaṃ prakīrtitam

'''1.101''' gāruḍaṃ nairṛtaṃ nīlaṃ rukṣabhānu yavaṃ tathā dharmākhyaṃ ca kalākhyaṃ ca prabuddhaṃ dhenusaṃjñitam

'''1.102''' nava bhedāḥ samākhyātāḥ kiraṇe koṭipañcakam lalitottaraṃ ca kaumāraṃ dvibhedau lalite smṛtau

'''1.103''' granthasaṃkhyā bhavettatra sahasrāṇāṃ tathāṣṭakam āgneye tu na bhedo’sti granthasaṃkhyāyutatrayam

'''1.104''' vātulottarasaṃjñaṃ ca kālajñānaṃ purohitam sarvaṃ sarvātmakaṃ nityaṃ śreṣṭhaṃ śuddhaṃ mahātmakam

'''1.105''' viśvaṃ viśvātmakaṃ tattvaṃ dvādaśaivātra vātule bhedāstadgranthasaṃkhyā syādekalakṣeṇa lakṣitā

'''1.106''' kāmikaṃ yogajaṃ cintyaṃ kāraṇaṃ cājitaṃ tathā dīptaṃ sūkṣmaṃ sahasrākhyaṃ cāṃśumatsuprabhedakam

'''1.107''' tantrāṇāṃ daśakaṃ hyetadupabhedasamanvitam vedāḥ sāṅgāśca catvāraḥ śivasyordhvamukhodbhavāḥ

'''1.108''' vijayaṃ pārameśaṃ ca niśvāsākhyamataḥ param prodgītaṃ mukhabimbaṃ ca sadyojātamukhodbhavāḥ

'''1.109''' siddhaṃ santānasaṃjñaṃ ca nṛsiṃhaṃ candrabhāsakam vimalaṃ ceti pañcaite vāmadevamukhodbhavāḥ

'''1.110''' svāyaṃbhuvaṃ tathā vīraṃ rauravaṃ tantramuttamam makuṭaṃ kiraṇaṃ caite ghoravaktrasamudbhavāḥ

'''1.111''' lalitaṃ ca tathāgneyaṃ vātulaṃ ceti tattrayam sopabhedaṃ samudbhūtaṃ puruṣākhyamukhāmbuje

'''1.112''' aṣṭāviṃśatibhedena bhinne’smiṃstantrasāgare dadhnīva sarpiḥ saṃvyāptaṃ puruṣārthacatuṣṭayam

'''1.113''' tvayāpi pālakenādya jagatāṃ puruṣottama dharmārthakāmamokṣārthaṃ yatatāṃ dātumuttamam

'''1.114''' laghūpāyaṃ mahārthaṃ tu tantraṃ pṛṣṭo’hamasmi yat taddadāmi śivenoktaṃ śivamuddiśya nirmitam

'''1.115''' tanoti vipulānarthāṃstattvamantrasamāśritān trāṇaṃ ca kurute puṃsāṃ tena tantramiti smṛtam

'''1.116''' śivarūpamidaṃ tantraṃ prathamaṃ vacmi tattvataḥ

===Kapitel 2===

''dvitīyaḥ paṭalaḥ · śivasvarūpakathanam''

'''2.1''' śivaḥ sarvottaraḥ sthāṇuḥ paramātmā maheśvaraḥ saccidānandarūpī yaḥ sadasadvyaktivarjitaḥ

'''2.2''' sa eva sarvagaḥ sadbhirbrahmaśabdena śabditaḥ sthūlaṃ sūkṣmaṃ paraṃ caiva vyaktāvyaktobhayaṃ tathā

'''2.3''' bāhyamābhyantaraṃ caiva bāhyābhyantarameva ca nityaṃ caiva tathānityaṃ nityānityaṃ tathaiva ca

'''2.4''' puṃliṅgaṃ caiva strīliṅgaṃ napuṃliṅgaṃ tṛtīyakam jāgratsvapne  suṣuptiśca bhūtaṃ bhavyaṃ bhaviṣyakam

'''2.5''' adṛśyaṃ ca tathā dṛśyaṃ dṛśyādṛśyaṃ tathaiva ca vācikaṃ mānasaṃ karma mānaṃ mātā ca meyakam

'''2.6''' ātmavidyāśivākhyaṃ ca bhoktā bhojyaṃ ca bhogyakam māyeyamāṇavaṃ karma jñānamajñānameva ca

'''2.7''' prakāśaṃ timiraṃ caiva sthūlaṃ sūkṣmaṃ tathaiva ca antikaṃ ca tathā dūraṃ heyopādeyameva ca

'''2.8''' nityaṃ naimittikaṃ caiva paraṃ cāparameva ca saṃhṛtaṃ ca prakīrṇaṃ ca satyaṃ cāsatyameva ca

'''2.9''' saccāsacca suraśreṣṭha kartṛ bhartṛ tathaiva ca hṛdyaṃ caiva tathāhṛdyaṃ hṛdyāhṛdyaṃ tathaiva ca

'''2.10''' vācyaṃ ca vācakaṃ yattadādhārādheyameva ca śītamuṣṇaṃ ca yatproktaṃ sukhaduḥkhaṃ tathaiva ca

'''2.11''' pavitraṃ cāpavitraṃ ca mṛdu tīkṣṇaṃ tathaiva ca rāgadveṣaṃ ca jantūnāṃ yatnālasyaṃ tathaiva ca

'''2.12''' unnataṃ ca nataṃ caiva saṃpaccāsaṃpadeva ca susthitaṃ duḥsthitaṃ caiva calaṃ cācalameva ca

'''2.13''' sarvametatsa eveśastasmādanyanna vidyate prakṛtiśca mahāṃścaivāpyahaṃkāraka eva ca

'''2.14''' śabdamātraṃ sparśamātraṃ rūpamātraṃ tathā param rasamātraṃ gandhamātraṃ śrotratvakcakṣureva ca

'''2.15''' jihvā ghrāṇaṃ ca vākpāṇipādaṃ pāyurupasthakam manasā ca pṛthivyādipañcakaṃ puruṣeṇa tu

'''2.16''' rāgo māyā ca vidyā ca kalā niyatireva ca vidyeśaścaiva śaktiśca śuddhamāyā tathaiva ca

'''2.17''' śuddhavidyā śuddhakalā sadāśivaśivaṃ viduḥ īśvaraśca sa eva syātsa evāhaṃ bhavāṃstathā

'''2.18''' sa eva devo brahmādikāśyapādyāḥ prajāsṛjaḥ sa eva munayaḥ sapta candrādityau graheśvarau

'''2.19''' sa eva devarājo’pi kuberavaruṇau tathā sa yamo’gniśca nāgeśo nirṛtirvāyureva ca

'''2.20''' īśāno gaṇapāḥ sarve vasavo’ṣṭau tathaiva ca rudrā ekādaśānye’pi devadānavapuṅgavāḥ

'''2.21''' daivamaṣṭavikalpaṃ ca tairyagyonaṃ ca pañcakam mānuṣyaṃ ca jagatkṛtsnaṃ sa eva śiva ucyate

'''2.22''' catvāraśca tathā vedā rahasyena vadanti tam siddhānte bhūtatantre ca vāme srotasi dakṣiṇe

'''2.23''' bhairave ca tathānyeṣu paśupāśupatādiṣu viṣṇutantre ca bauddhe ca tathā dikpāladarśane

'''2.24''' aṣṭādaśapurāṇeṣu ṣaḍaṅgeṣvapareṣu ca yogaśāstreṣu sarveṣu nyāyavaiśeṣikādiṣu

'''2.25''' yairyairyadyatparīkṣyaiva tattvamityucyate budhaiḥ tattatsa eva deveśaḥ śivasaṃjñaḥ sanātanaḥ

'''2.26''' ādimadhyāntanirmuktaḥ svabhāvavimalaḥ prabhuḥ sarvajñaḥ paripūrṇaśca śivo jñeyaḥ śivāgame

'''2.27''' dikkālādyanavacchinno vāṅmano’tītagocaraḥ niṣkalo niṣkriyaścāpi sarvagaḥ sarvadṛksadā

'''2.28''' antaryāgo hi tatpūjā yogināmeva sā bhavet yogābhyāsarataiḥ puṃbhirhṛtkuśeśayamadhyame

'''2.29''' yamādyaṣṭāṅgayogena vimalīkṛtamānasaiḥ pūjyate netaraistasya pūjākṛtyaṃ viśiṣyate

'''2.30''' hitvā tadarcanāṃ nānyaiḥ śreyo bhavati dehinām antaryāgādhikāro’tra kvacitkasyāpi jāyate

'''2.31''' bahiryāgādhikāro’yaṃ kiṃcijjñānāṃ ca jāyate ityavedya sa deveśaḥ śivaḥ sarvāntarasthitaḥ

'''2.32''' lokānugrāhako bhūtvā jantūnāṃ bhuktimuktidaḥ pañcabrahmatanuḥ sākṣāt sa śivo’bhūtsadāśivaḥ

'''2.33''' tasmādīśvara utpannaḥ sarvadevādiravyayaḥ tato’haṃ ca bhavānmattaḥ samutpanno jagadguruḥ

'''2.34''' tvannābhikamalodbhūto hyajo lokapitāmahaḥ śivāśritā bhavedvidyā saiva māyeti kīrtitā

'''2.35''' mūlaprakṛtirityanye sāpi pañcasu mūrtiṣu kāryakāraṇabhāvena sthitā tasyāḥ sthitiṃ śṛṇu

'''2.36''' tasyā manonmanī devī sadāśivasamāśritā tasyāśca gaurī saṃbhūtā maheśvarasamāśritā

'''2.37''' tasyā umā sā saṃjātā madīyā syādbhavapriyā padmā tasyāśca saṃbhūtā bhavantaṃ viṣṇumāśritā

'''2.38''' tasyāścāpi samudbhūtā vāṇī brahmāṇamāśritā pitāmahena sṛṣṭaṃ hi jagatsarvamaśeṣataḥ

'''2.39''' tvayā ca pālitaṃ tadvatsaṃhṛtaṃ ca mayā tathā kāryakāraṇabhāvatvamevamasmāsvavasthitam

'''2.40''' sadāśivādiṣveteṣu tanutā śiva ucyate kevalaṃ kāraṇatvaṃ tu tasminnekaṃ vyavasthitam

'''2.41''' so’yaṃ sadāśivo loke maheśvarapuraḥsaraiḥ asmābhiḥ pūjyate liṅge sarvajantubhiravyayaḥ

===Kapitel 3===

''tṛtīyaḥ paṭalaḥ · liṅgotpattividhiḥ''

'''3.1''' liṅgotpattiṃ tato vakṣye śṛṇu vārijalocana puruṣasya tu yaccihnaṃ puruṣavyaktikāraṇam

'''3.2''' sadāśivasya talliṅgaṃ śivaliṅgamiti smṛtam kūṭasthaśca mahādevaḥ sarvakāraṇakāraṇam

'''3.3''' tvadāderyo mamādistu tasyāpyādiḥ sadāśivaḥ yuvāṃ mohārtamanasau sarvajñāvapi sarvagau

'''3.4''' māṃ vettumasamarthau hi nārāyaṇapitāmahau parasparabalādhikyāddarpamohasamanvitau

'''3.5''' matto’dhiko’nyo nāstīti parasparagaterṣyayā jighāṃsū dvau mitho ruṣṭau pralaye samupasthitau

'''3.6''' tatastu yuvayormohamīdṛgbhūtaṃ sureśayoḥ saṃvīkṣya sarvadevādiḥ śabdabrahmatanuḥ śivaḥ

'''3.7''' bodhārthaṃ yuvayoścāpi jvalanastambharūpadhṛt yo’tiṣṭhatparameśāno madhye tvāścaryasaṃyutaḥ

'''3.8''' yuvāṃ tena paraṃ gatvā vismayaṃ surapuṅgavau kimidaṃ nviti saṃcintya tatparīkṣāsamudyatau

'''3.9''' gatāvūrdhvamadhastāttu liṅgarūpasya tasya hi haṃsakroḍaśarīreṇa tatparyantadidṛkṣayā

'''3.10''' sarvalokeśvarau devau nivṛttāvakṛtārthakau natvā stutvātha deveśaṃ yuvāṃ tatpārśvayoḥ sthitau

'''3.11''' yuvayorbhaktimanvīkṣya sarvadeveśvaraḥ śivaḥ īśvaraṃ tu tadā tatra jñānadaṃ yuvayorapi

'''3.12''' visṛjya so’pi deveśo yuvāṃ caiva sa śaṃkaraḥ yuvāṃ na vettha deveśaṃ sarvakāraṇamavyayam

'''3.13''' sadāśivaṃ mahādevamīśānaṃ suranāyakam ahaṃ rudro yuvāṃ caiva sarve tasya prasādajāḥ

'''3.14''' tasya liṅgamidaṃ tāvadahaṃ rudraśca sarvadā yuvāṃ cedṛśamutpādya nānādravyairyathecchayā

'''3.15''' pūjayāmo’tha deveśaṃ pūjito liṅgamūrdhani jñānaṃ dāsyati sarvajñaḥ sadā mohopaśāntaye

'''3.16''' asmatpūjāvidhiṃ dṛṣṭvā caturdaśavidhiṃ jagat pūjayiṣyati liṅgaṃ tat pūjā śreyo’tha dāsyati

'''3.17''' ityuktvā saha liṅgena tiro’bhūtsapadīśvaraḥ layaṃ gacchanti bhūtāni saṃhāre nikhilāni ca

'''3.18''' nirgacchanti yataścāpi liṅgoktistena hetunā tasminsamararcite liṅge sarve devāḥ samarcitāḥ

'''3.19''' etatkarma tvadīyatvājjñātameva purā tvayā tathāpi kathitaṃ viṣṇo tantrasyātha kramāgatam

===Kapitel 4===

''caturthaḥ paṭalaḥ · liṅgalakṣaṇavidhiḥ''

'''4.1''' ataḥ paramidaṃ vakṣye liṅgalakṣaṇamuttamam liṅgaṃ tu trividhaṃ proktaṃ vyaktāvyaktobhayātmakam

'''4.2''' vyaktaṃ yatpratimāvyaktaṃ śivaliṅgamiti smṛtam mukhaliṅgaṃ bhavedanyattṛtīyamubhayātmakam

'''4.3''' sadāśivaṃ taduddiṣṭamavyaktaṃ liṅgamuttamam aiśvaraṃ mukhaliṅgaṃ syādraudraṃ vyaktamidaṃ bhavet

'''4.4''' madīyamiti tadviddhi vyaktaliṅgaṃ janārdana avyaktaṃ prathama teṣāṃ vadāmi surasattama

'''4.5''' tattatprāsādamānena tanmānāttadbhavedatha prāsādamādau niścitya tadgarbhakarato’pi vā

'''4.6''' dvāramānena vā kuryādekaikaṃ navabhedataḥ sarvārthasādhanaṃ liṅgaṃ brahmaviṣṇuśivātmakam

'''4.7''' prāsādagarbhe śarabhāgabhāge śreṣṭhottamaṃ syādguṇabhāgaliṅgam garbhārdhamānaṃ tvadhamādhamaṃ syādanyāni liṅgāni vadāmi sapta

'''4.8''' yatastataḥ śreṣṭhakaniṣṭhayostatkṛtvāṣṭabhāgaṃ gaganāṃśavṛddhyā antyāntyaliṅgānnavaliṅgaklṛptiṃ śreṣṭhottamāntaṃ vidadhīta vidvān

'''4.9''' hastaikaliṅgaṃ navabhirvidadhyācchreṣṭhottamaṃ hīnakaniṣṭhaliṅgam hastena caikaikakarābhivṛddhyā navaiva liṅgaṃ tu yathākrameṇa

'''4.10''' śreṣṭhottamaṃ dvārasamucchrayeṇa dvāre guṇāṃśe gaganāṃśakena antyāntyaliṅgānnavaliṅgaklṛptirmadhye’ṣṭabhāge sati pūrvavatsyāt

'''4.11''' ratnaṃ śilādhātumahīruhāśca śastā hyamī mṛttikayāpi pañca liṅgārthameṣāmatha vacmi bhedaṃ ratnādikānāṃ śṛṇu tatsamastam

'''4.12''' navaprakāraṃ kathitaṃ tu ratnaṃ śailaṃ caturdhāṣṭavidhaṃ ca dhātu dārūdbhavaṃ syānnavadhā hi liṅgaṃ tatpārthivaṃ ca dvividhaṃ pradiṣṭam

'''4.13''' māṇikyamukte tvatha vajranīlau vairḍūryasaṃjñaṃ haritāśmanā ca puṣyādirāgasphaṭikapravālā navaiva ratnāni bhavantyamūni

'''4.14''' śilā sitā raktanibhā ca pītā kṛṣṇā ca viprādiṣu yojanīyā grāhyānulomeṣu ca sātha kṛṣṇā sarveṣu varṇeṣu ca kalpanīyā

'''4.15''' kalyāṇarūpye tvatha kāṃsyatāmre trapvārakūṭāyasasīsakāni dhātūni liṅgasya vidhāvamūni śuddhāni cāṣṭau kathitāni viṣṇo

'''4.16''' bilvaḥ śamī candanadevadārū liṅgārthamaśvatthakarañjavṛkṣau ariṣṭavṛkṣaḥ khadiro madhūko navātra vṛkṣāḥ kathitāḥ sasārāḥ

'''4.17''' yatpārthivaṃ taddvividhaṃ pradiṣṭaṃ pakvāmabhedena śivasya liṅgam saṃskāramasyāstvatha mṛttikāyā vadāmi yattacchṛṇu dārḍhyakāri

'''4.18''' yā mṛtsitā raktanibhā ca pītā liṅgasya nirmāṇavidhau pradiṣṭā śuddhe tu tāṃ saṃpratigṛhya deśe viśodhya siñcettriphalodakena

'''4.19''' prasecitāyāṃ mṛdi tatra viṣṇo kṣīradrumatvagbhava cūrṇamiśram godhūmamāṣodbhavamājyayuktaṃ payodadhī tailayutaṃ kṣipecca

'''4.20''' sagugguluṃ bilvaphalasya sāraṃ prakṣipya tasyāṃ bahuśo viloḍya liṅgaṃ tayā lakṣaṇato vidadhyānmṛdā tu māsoṣitayā śivasya

'''4.21''' iṣṭena liṅgaṃ kurvīta dravyeṣveteṣu pañcasu calaṃ cācalasaṃjñaṃ ca calaṃ śaivāṃśameva hi

'''4.22''' tālādaṅgulaparyantaṃ talliṅgaṃ calamuttamam acalaṃ yattu talliṅgaṃ prāsādasthāpane hitam

'''4.23''' adhomadhyordhvabhāgaṃ tu brahmaviṣṇuśivātmakam caturaśraṃ bhavedbrāhmamaṣṭāśraṃ vaiṣṇavaṃ bhavet

'''4.24''' vṛttaṃ śaivamiti proktamevaṃ syāttattribhāgakam śailaṃ suvarṇamavyaktamacalaṃ tattribhāgayuk

'''4.25''' uktamānagṛhītā yā sā śilā caturaśrikā āyāmasamanāhaṃ syāttattridhā vibhajetsudhīḥ

'''4.26''' adhobhāgaṃ parityajya tadūrdhve bhāgayordvayoḥ karṇārdhahrāsataḥ kuryādaṣṭāśraṃ tu tayoḥ punaḥ

'''4.27''' śivabhāge vikārāṃśaṃ janayitvātha tatkramāt aśracchedena vṛttaṃ syādevaṃ liṅgasya lakṣaṇam

'''4.28''' kārayeccaturaśrārdhamaṣṭāśrasya tu nāhakam tasyārdhaṃ vṛttanāhaṃ tu bhavedetatsurārcitam

'''4.29''' liṅgāyāmaṃ gṛhītvātha tadardhaṃ cāṣṭadhā bhajet tadbhāgaiḥ pañcabhiḥ kuryādviṣkambhaṃ cottamottamam

'''4.30''' trisaptāṃśe tadāyāme ṣaṭpañcacaturaṃśakaiḥ viṣkambhaṃ tu bhavecchreṣṭhaṃ madhyaṃ hīnamanukramāt

'''4.31''' athavā pañcaviṃśāṃśe nāgadvīparasairapi bhāgaiḥ pūrvavadevokto viṣkambho liṅgasaṃsthitaḥ

'''4.32''' evaṃ caturṇāṃ liṅgānāṃ viṣkambhaḥ parikīrtitaḥ cāturvidhyamatasteṣāṃ krameṇa paripaṭhyate

'''4.33''' ādyaṃ samaṃ bhavati liṅgamatha dvitīyaṃ tadvardhamānamapi cātha śivādhikaṃ ca  | tatsvastikākhyamuditaṃ tu turīyameṣāṃ bhedo’tra bhāgavaśataḥ parikalpanīyaḥ

'''4.34''' ajahariharabhāgaṃ vedavasvaśravṛttaṃ trividhamapi samaṃ syādunnatenādyaliṅge triguṇitavasubhāge tattrayaṃ vardhamānaṃ munivasunavabhāgaṃ brahmaviṣṇvīśvarāṇām

'''4.35''' ucchraye kṛtadaśāṃśake bhavedvahnivāyu sakhavedabhāgikam yatra padmajaharīśvarātmakaṃ liṅgamūrtamiha tacchivādhikam

'''4.36''' ātmāyāme rudrabhāge guṇāṃśo vairiñcaḥ syādvaiṣṇavo vedabhāgaḥ śaivastadvatsvastike’smiṃsturīye liṅge prokto hyevameva krameṇa

'''4.37''' caturṇāmapi varṇānāṃ vardhamānaśivādhike prokte kramavivakṣāyāṃ catvāryapyagrajanmanām

'''4.38''' bhūpānāṃ vardhamānāttu liṅgatrayamudāhṛtam liṅgadvayamiti proktaṃ vaṇijastu śivādhikāt

'''4.39''' antyameva hi śūdrasya svastikaṃ liṅgamucyate atha caiṣāṃ tu liṅgānāṃ śiraso vartanaṃ bhavet

'''4.40''' caturvidhaṃ tu tatproktaṃ tadvidhiṃ śṛṇu sāṃpratam kukkuṭāṇḍasamaṃ caiva chatrākāraṃ tathaiva ca

'''4.41''' khaṇḍendusadṛśākāraṃ trapuṣākārameva ca vedāṃśe tu śirastāre netrabhāgena vartitam

'''4.42''' kukkuṭāṇḍopamaṃ tasminvasubhāgavibhājite vartitaṃ bhāgayugmena cchatrākāraṃ bhavecchiraḥ

'''4.43''' liṅgatāre’gnibhāge tu pakṣabhāgavivartitam ardhacandranibhaṃ vidyāttasminṣaḍbhāgabhājite

'''4.44''' sārdhenaiva dvibhāgena vartitaṃ trapuṣākṛti viprāṇāṃ  trapuṣākāraṃ chatrākāraṃ tu bhūbhṛtām

'''4.45''' khaṇḍenduvattu vaiśyānāṃ śūdrāṇāṃ kukkuṭāṇḍavat chatrākāraṃ tu sarveṣāṃ bhavelliṅgaśiro nṛṇām

'''4.46''' sarvaṃ viprasya nirdiṣṭaṃ chatrākārāttrayaṃ nṛpe viśāṃ khaṇḍendu sadṛśāddvayamevaṃ prakīrtitam

'''4.47''' śūdrāṇāmekamevoktaṃ kukkuṭāṇḍanibhaṃ hare śiraso vartanaṃ proktaṃ dhārāliṅgaṃ tataḥ śṛṇu

'''4.48''' sādhakenāśraliṅgaṃ tu pūjanīyaṃ janārdana sādhako yatphalārthī syāttatphalaṃ liṅgamucyate

'''4.49''' trayāśraṃ varadaṃ jñeyaṃ dvyaśraṃ putravivardhanam vairināśanamekāśraṃ pañcāśraṃ tu dhanapradam

'''4.50''' saptāśraṃ dveṣadaṃ proktamuccāṭāya navāśrakam ekādaśāśraṃ vyādhyarthaṃ śoṣaṇaṃ tridaśāśrakam

'''4.51''' dhanyaṃ pañcadaśāśraṃ tu ṣaḍaśraṃ bhogadaṃ bhavet aṣṭāśraṃ kleśadaṃ proktaṃ dvādaśāśraṃ bhayāvaham

'''4.52''' ṣoḍaśāśraṃ sukhārthaṃ syātsādhakānāṃ viśeṣataḥ evamaśraphalaṃ proktaṃ ratnānāṃ phalamucyate

'''4.53''' māṇikyaṃ śrīpradaṃ proktaṃ yaśase nīlamucyate haritaṃ phaladaṃ proktaṃ doṣamuktyai ca mauktikam

'''4.54''' pravālaṃ vaśadaṃ vidyādvajraṃ rājyapradaṃ bhavet vairḍūryaṃ vairināśārthaṃ saubhāgye puṣyarāgakam

'''4.55''' sarvakāmapradaṃ proktaṃ sphaṭikaṃ tu janārdana uttamaṃ svasvayoni syānmadhyamaṃ svarṇayonikam

'''4.56''' adhamaṃ raupyayoni syāttadabhāve tu tāmrajam tasyāpyabhāve śailaṃ syādratnaliṅgasya pīṭhakam

'''4.57''' calaliṅge viśeṣo’yaṃ kathyate surasattama āyāmasadṛśaṃ nāhaṃ tatsamaṃ pīṭhavistṛtam

'''4.58''' vistārasamamutsedhaṃ pīṭhasyāpi viśeṣataḥ śiraso vartanaṃ kuryātpūrvavacchāstracintakaḥ

'''4.59''' caturaṃśe tu talliṅge tribhāgaṃ dṛśyamucyate bhāgamekaṃ sthitaṃ pīṭhe niścalaṃ tacca kārayet

'''4.60''' calaliṅgamiti proktaṃ kṣaṇikaṃ liṅgamucyate gomayaṃ navanītaṃ ca piṣṭaṃ cānnaṃ phalaṃ tathā

'''4.61''' gulaṃ ca saikataṃ caiva pallavaṃ cāṣṭamaṃ smṛtam kṣaṇikānāṃ tu liṅgānāṃ pīṭhaṃ naivāsti lakṣaṇam

'''4.62''' pūjāvasāne coddhāra eteṣāṃ parikīrtitaḥ gomayaṃ roganāśāya navanītaṃ sukhapradam

'''4.63''' piṣṭaṃ puṣṭipradaṃ vidyādāyuṣe cānnaliṅgakam phalaṃ cābhīṣṭasiddhyarthaṃ gulaṃ prītipradaṃ bhavet

'''4.64''' saikataṃ mukhyatāṃ datte pallavaṃ sadguṇapradam proktaṃ tu kṣaṇikaṃ liṅgaṃ svayamudbhūtamucyate

'''4.65''' chatrākāraṃ bhavedaindramagnerviṣamamastakam yamasya cipiṭaṃ proktaṃ śūlāgraṃ nairṛtaṃ matam

'''4.66''' vāruṇaṃ kalaśākāraṃ vāyavyaṃ dhvajavadbhavet gadākāraṃ tu saumyaṃ syāttriśūlākāramastakam

'''4.67''' īśānasya bhavelliṅgaṃ brahmaṇaḥ padmamastakam vaiṣṇavaṃ śaṅkhaśīrṣaṃ syādvidyādetāni lakṣaṇaiḥ

'''4.68''' anyaiśca devadaityendradānavendraniśācaraiḥ siddhavidyādharādyaiśca tathaivānyairgaṇeśvaraiḥ

'''4.69''' munibhiścāpi yalliṅgaṃ sthāpya vāsthāpya pūjitam svayaṃbhūtaṃ taduddiṣṭaṃ lakṣaṇaṃ yatra no bhavet

'''4.70''' nānācihnasamāyuktaṃ nānāvarṇasamanvitam karkaśaṃ suṣirādyaiśca yutaṃ yadyatra dṛśyate

'''4.71''' nāgeṣu vāpi sarvaṃ tadevameva hi kīrtitam śiraso vartanaṃ tasya sūtravartanameva ca

'''4.72''' nāhotsedhādimānaṃ ca na kadācitpradṛśyate pīṭhaprāsādaklṛptistu liṅgamānādvidhīyate

'''4.73''' svayaṃbhūtamiti proktaṃ sarvaloka sukhāvaham liṅgasya lakṣaṇaṃ proktaṃ sarvakāmārthasādhanam

===Kapitel 5===

''pañcamaḥ paṭalaḥ · śilādigrahaṇavidhiḥ''

'''5.1''' ataḥ paramidaṃ vakṣye śilādigrahaṇaṃ hare ācāryaḥ śilpinā sārdhaṃ yadā gacchecchilāṃ prati

'''5.2''' sumuhūrte nimittāni tadā samupalakṣayet dadhyannaṃ madhu sarpiśca pūrṇakumbhaṃ tathaiva ca

'''5.3''' kāñcanaṃ rajataṃ caiva sarvaratnāni mṛttikām bhūṣaṇāni ca sarvāṇi sāyudhāni saroruham

'''5.4''' sākṣataṃ saphalaṃ caiva rocanāṃ gairikaṃ tathā bhadrapīṭhaṃ ca śaṅkhaṃ ca sitapuṣpaṃ tathaiva ca

'''5.5''' ambarāṇi ca śuklāni matsyaṃ māṃsaṃ tathaiva ca vṛṣendraṃ ca gajendraṃ viprānveśyāśca śobhanāḥ

'''5.6''' kanyāṃ turaṅgaṃ mithunaṃ mayūraṃ cāṣameva ca vyāghraṃ ca nakulaṃ caiva yānaṃ mitrāṇi caiva hi

'''5.7''' gītamaṅgalavādyāni vedaghoṣādikaṃ tathā upaśrutiṃ ca gaccheti dṛṣṭvā śrutvā vrajetsudhīḥ

'''5.8''' kārpāsamauṣadhaṃ sarvaṃ kṛṣṇadhānyaṃ tathaiva ca lavaṇaṃ cātha tailaṃ ca madyaṃ kṣīraṃ tathaiva ca

'''5.9''' paṅkamaṅgārakaṃ caiva gulaṃ carma tathaiva ca śakṛdindhanapāṣāṇatuṣakeśāni caiva hi

'''5.10''' unmattaṃ jaṭilaṃ muṇḍaṃ nagnaṃ kāṣāyiṇaṃ tathā kṣutkṣāmaṃ vikṛtaṃ caiva naravāhaṃ tathaiva ca

'''5.11''' abhyaktaṃ muktakeśaṃ ca rogayuktaṃ tathaiva ca sarpaṃ godhāṃ ca śarabhaṃ varāhaṃ jāhakaṃ tathā

'''5.12''' śaśaṃ ca rodanākrośakalahaṃ śavatūryakam āgaccha viśa tiṣṭheti vacanāni tathaiva ca

'''5.13''' kimarthaṃ gacchasītyevamādiproktaṃ vacastathā dṛṣṭvā śrutvā ca no gaccheduṣitvā tryahamunmanāḥ

'''5.14''' saṃpūjya dīkṣitān viprān śiva vrataparāyaṇān hutvā doṣanivṛttyarthamaghoreṇa śatāhutīḥ

'''5.15''' tato gacchedvanaṃ śailaṃ sanātho deśikaḥ sudhīḥ tatra ramyatare deśe vānaprasthāśramairyute

'''5.16''' nadītaṭākasaṃyukte phalapallavaśobhite puṣpabhārāvanamraiśca taruṣaṇḍairalaṃkṛte

'''5.17''' jighāṃsusattvanirmukte praviśyācāryaśilpinau vṛkṣasaṃgrahaṇaṃ caitaduktaṃ vṛkṣaṃ samāśrayet

'''5.18''' ṛjuṃ vṛttaṃ samaṃ caiva granthirandhravivarjitam satvacaṃ patrapuṣpāḍhyaṃ gṛhṇīyādvṛkṣamuttamam

'''5.19''' gajādibhagnaṃ vajrādidagdhaṃ vakraṃ kṣupaṃ tathā svayaṃ śuṣkaṃ ca mantrajño varjayedbhūruhaṃ tathā

'''5.20''' pūrvarātre tu tadvṛkṣe śilāyāṃ vā samāhitaḥ puṇyāhaṃ vācayitvātha rakṣāsūtraṃ tu bandhayet

'''5.21''' sauvarṇaṃ rājataṃ vātha kṣaumaṃ kārpāsameva vā bandhayeddhṛdayenaiva vṛkṣaṃ vāmena pūjayet

'''5.22''' śilāmaghoramantreṇa tato homaṃ ca kārayet vṛkṣasya ca śilāyāśca pūrve vā cottare’pi vā

'''5.23''' samidājyacarūṇāṃ tu pratyekaṃ tu śatāhutīḥ hutvā spṛṣṭvā ca hastau ca prabhāte chettumārabhet

'''5.24''' madhuplutakuṭhāreṇa chedayetpuruṣeṇa tu prāguttaraprapātastu śubhado vṛkṣajo bhavet

'''5.25''' tathaiva hi śilā grāhyā tasyā lakṣaṇamucyate saritsarastaṭākāditīrajātāṃ ca kañjalaiḥ

'''5.26''' kṣālitāṃ ca drumacchāyāgṛhītāṃ susamāṃ dṛḍhām āyāmapariṇāhāḍhyāṃ śilāṃ liṅgārthamāharet

'''5.27''' prācyāṃ śiraḥ pratīcyāṃ ca mūlaṃ tasyāḥ prakīrtitam udīcyāṃ vā śiro mūlaṃ dakṣiṇāṃ diśamāśritam

'''5.28''' adhobhāge mukhaṃ tasyā lāṅchayitvā samuddharet bālā suyauvanā vṛddhā śilā sā trividhā matā

'''5.29''' dṛṣadbālā samādiṣṭā mandadhvaniyutā ca sā pīvakaṅkābhighātā ca sā bāleti nigadyate

'''5.30''' śītalā dhīraśabdā ca sugandhā cāpi yā bhavet susnigdhā nibiḍāṅgā ca saiva syādyuvatī śilā

'''5.31''' grāhyā liṅgavidhau saiva sarvadoṣavivarjitā rūkṣā bandhūkavatkhaṇḍā niḥśabdā jarjarā ca yā

'''5.32''' sā vṛddhā syācchilānāṃ tu varjayedbālikāmapi rūkṣāṃ kṣārāmbumadhyasthāṃ tyajedupahatāmāpi

'''5.33''' rekhā bindukalaṅkāḍhyāṃ vimalairanvitāṃ tyajet hemaṃ lohaṃ ca kāṃsyākhyaṃ vimalaṃ tattridhā bhavet

'''5.34''' hānirmṛtyuranāvṛṣṭirmaṇḍalānāṃ kramātphalam gairikāviṣakāsīsaiḥ kṣīravṛkṣaistu tāṃ śilām

'''5.35''' parilipyoṣitāṃ kṛtvā hyahorātramatandritaḥ prakṣālya tu punaḥ samyak sa doṣaṃ ca parīkṣayet

'''5.36''' parīkṣya bahudhā paścāttakṣaṇaṃ tu samācaret maṇḍalaṃ takṣaṇe yasyāstāṃ sagarbhāṃ vinirdiśet

'''5.37''' māñjiṣṭhe maṇḍale bheko godhā syātpītavarṇake śubhre sarpaḥ samuddiṣṭaḥ kapile mūṣiko bhavet

'''5.38''' saraṭo raktavarṇe ca gulavarṇe dṛṣadbhavet kapotavarṇe gaulī ca citrābhe vṛścikā tathā

'''5.39''' nistriṃśasadṛśe toyaṃ khadyoto madhusaṃnibhe sikatā bhasmavarṇe tu teṣāṃ phalamatha śṛṇu

'''5.40''' rājanāśapradā godhā paśunāśaṃ tu vṛścikā jvaramārīpradaḥ sarpo marṇḍūkaḥ kabhayapradaḥ

'''5.41''' garbhasraṃso jalātproktaḥ khadyoto’gnibhayapradaḥ pāṣāṇavṛṣṭiḥ pāṣāṇāt kṣayarogastu vālukāt

'''5.42''' saraṭo vyādhidaḥ prokto mūṣiko dhānyanāśakṛt gaulikā śokadā jñeyā tasmādgarbhayutāṃ tyajet

'''5.43''' cihnāni yadi santyatra taccihnānyupalakṣayet padmasvastikacandrārka cakrayonidhvajopamam

'''5.44''' khaḍgacchatramṛgendrābhavṛkṣakacchapamatsyavat hastiśrīdhenuvaccāpi sragjaṭānetravatsthitam

'''5.45''' evaṃ bhūtāni cihnāni kalyāṇāni bhavanti hi gṛdhrakaṅkasamānaṃ ca kākasarpakabandhavat

'''5.46''' śyenolūkasamaṃ caiva vṛṣadantakharopamam gomāyūṣṭropamaṃ caiva piṇḍarekhā ca ninditam

'''5.47''' varṇātmakaṃ tathā cihnaṃ śubhāśubhaphalapradam śṛṇu liṅgeṣu saṃśliṣṭaṃ vakṣyamāṇaṃ mayā hare

'''5.48''' svareṣu ṛ ṝ lṛ lṝ ca e ai o au aśobhanāḥ vargeṣvādyaṃ śubhaṃ jñeyaṃ dvitīyaṃ ninditaṃ bhavet

'''5.49''' tṛtīyaṃ śubhadaṃ jñeyaṃ caturthamubhayātmakam ādyākṣaraṃ ca prāsādamatīva śubhadaṃ bhavet

'''5.50''' anunāsikavisargau ca tyājyāvetau manīṣibhiḥ kūṭo visargayuktyājyaḥ sabinduḥ so’tiśobhanaḥ

'''5.51''' makārokārakau cāpi varṇau śubhaphalapradau śubhacihnayutā grāhyā tyajedanyāmaśobhanām

'''5.52''' evaṃ parīkṣya bahudhā kṣālanaṃ ca punaḥ punaḥ sarvātmasaṃjñamantreṇa saṃprokṣya ca śilāṃ tadā

'''5.53''' juhuyāduttare tasyāḥ samidājyacarūn kramāt pratyekaṃ tu śataṃ vātha tadardhaṃ vā tadardhakam

'''5.54''' brahmaviṣṇuśivānmatvā mūlamantraiḥ pṛthakpṛthak mantrasaṃhitayā paścājjuhuyātsarpiṣā sudhīḥ

'''5.55''' pratyekaṃ pañcabhirmantrairīśānādyairdaśāhutīḥ hutvānte tvapramattastu śilāṃ spṛṣṭvātha deśikaḥ

'''5.56''' pūrṇāhutiṃ śivenaiva dattvā devaṃ visṛjya ca gṛhītvā tāṃ śilāṃ mantrī vyomavyāpi japansadā

<poem>
takṣaṇaṃ śilpinā paścātkṛtahastena kārayet
</poem>

===Kapitel 6===

''ṣaṣṭhaḥ paṭalaḥ · deśanirdeśaḥ''

'''6.1''' atha deśaṃ pravakṣyāmi liṅgasaṃsthāpanocitam merumandarakailāsaśikhareṣu ca sānuṣu

'''6.2''' nīle śvetagirau caiva śṛṇu beragirau tathā niṣadhe hemakūṭākhye himākhye ca mahāgirau

'''6.3''' vindhye ca malaye sahye girau raivatake tathā śrīparvate devagirau mahendre gandhamādane

'''6.4''' giriṣveteṣu sarveṣu puṇyatīrthayuteṣu ca tathābhūteṣvaraṇyeṣu gaṅgātīre tathaiva ca

'''6.5''' yamunāyāḥ sarasvatyā godāvaryāstathaiva ca narmadāsindhuśoṇānāṃ tīrayorubhayorapi

'''6.6''' kaverakanyakātīre sarvāsāṃ madhyame’pi ca nadīnadānāmanyeṣāṃ puṇyānāṃ tīrayorapi

'''6.7''' mānasādisarastīre hradānāṃ mahatāmapi samudratīre sarvatra puṇyakṣetrasamīpataḥ

'''6.8''' sarvakṣetreṣu puṇyeṣu kurukṣetramukheṣu ca avimuktādisarveṣu puṇyasthāneṣu caiva hi

'''6.9''' prākārābhyantare vāpi liṅge pūrvasthite sati udyāneṣu ca ramyeṣu siddhakṣetreṣu vā punaḥ

'''6.10''' munīnāmāśrame ramye vānaprasthāśrame’pi ca vipulakumudapadmaprāntavistīrṇatoyapracuravitatavīcīcakrasaṃśleṣaramye mṛdutarabahuśaṣpāsvādabaddhādarāṇāṃ satatavasatibhūte cotsukānāṃ mṛgāṇām

'''6.11''' aruṇakumudanīlanīrajādyairapi samalaṃkṛtapuṇyatoyasikte phalakusumabharāvanamrasāndraistarunikarairbahubhiḥ sadopagūḍhe

'''6.12''' yatra vṛkṣalatāgulmāḥ puṣpastabakasaṃyutāḥ ślakṣṇacchāyāyutāḥ ślakṣṇaphalapallavaśālinaḥ

'''6.13''' hṛṣṭapuṣṭavihaṅgāśca sadābaddhajanāśrayāḥ

'''6.14''' tatropaviṣṭataruśākhakalānyapuṣṭe phullorukairavadaladyutiśubhrabhṛṅge kūjatkalāpikulaśālini vṛkṣamūle suptaprabuddharurumaṇḍalamaṇḍite ca

'''6.15''' utphullasthalakamale tato manojñe vistīrṇe vitatasarittaṭākakūle ālolanmṛdukuśakāśaśobhavīrutparyantonmukhamṛgagokulaiśca ramye

'''6.16''' āloladvikaca mahotpalāvalīṣūdgāyadbhiḥ patadalibhiḥ kṛtopaśobhe haṃsānāmapi mithunaiśca cakranāmnāṃ saṃkīrṇāmalasalile sasārasānām

'''6.17''' evaṃbhūte sthāpitaṃ cārudeśe kuryānnṝṇāṃ sarvadeṣṭārthasiddhim śaivaṃ liṅgaṃ deśikaiḥ pāpadeśe neṣṭaṃ dadyāttena taṃ vacmi deśam

'''6.18''' yatra dāvāgninā dagdho vṛkṣo vajrahato’pi vā yatra kaṇṭakino vṛkṣāḥ śleṣmātakatarustathā

'''6.19''' pāribhadro viṣataruḥ karañjāṅkolakau tathā pūtīko brahmadaṇḍī ca taṃ deśaṃ parivarjayet

'''6.20''' yatra cāsthikapālāni yatra sarpāśca bhīṣaṇāḥ valmīkā bahavo yatra yatroptaṃ na prarohati

'''6.21''' yatra śuṣkalatā gulmāḥ parikṣīṇā mahīruhaḥ yatra dūrataraṃ khāte’pyadhastoyaṃ na dṛśyate

'''6.22''' pāṣāṇāḥ śarkarāścāpi prabhūtaṃ yatra dṛśyate cirādhyuṣitacaṇḍālapulindādistu yo bhavet

'''6.23''' yo’tinimno’tidarito yo vā drumasamāvṛtaḥ taṃ deśaṃ varjayeddhīmām̐lliṅgasthāpanakarmaṇi

'''6.24''' grāmādīnāṃ tu sarvāsu dikṣu sthāpanamiṣyate brahmasthānasthitaṃ liṅgaṃ brahmakṣatrahitāvaham

'''6.25''' aindre rājyapradaṃ proktaṃ yāmye vṛddhistathāyuṣaḥ ārogyaṃ vāruṇe cāpi saumye vittapradaṃ bhavet

'''6.26''' vahnideśe sukhaṃ dadyādvijayaṃ nairṛte tathā vāyavye saṃpadaṃ dadyānmokṣamīśānagocare

'''6.27''' digvidikṣvevamaṣṭāsu sthāpite vidhinā bhavet antarāleṣu cānyeṣu phalamevaṃ vinirdiśet

===Kapitel 7===

''saptamaḥ paṭalaḥ · karṣaṇavidhiḥ''

'''7.1''' karṣaṇasya vidhiṃ vakṣye bhūparīkṣāpuraḥsaram yatra deśe tu tacchaivaṃ liṅgaṃ saṃsthāpyamiṣyate

'''7.2''' taṃ deśaṃ samanuprāpya praṇamya ca maheśvaram divyāntarikṣabhaumāni nimittānyupalakṣayet

'''7.3''' tacchubhāśubhamālakṣya śubhe bhūmiṃ parīkṣayet aśubheṣu nimitteṣu ghoreṇājyaśatāhutīḥ

'''7.4''' hutvā parīkṣayetpaścāddeśikaḥ śāstravittamaḥ puṇyāhaṃ vācayitvādau sthitvātha prāṅmukhaḥ sudhīḥ

'''7.5''' dakṣiṇena tu pādena kuṭṭayedastramuccaran kuṭṭane yadi sā bhūmirgambhīrā nadati sthirā

'''7.6''' saṃgrāhyā hyathavā tatra khātvā hastamitāṃ budhaḥ pūrayedavaṭaṃ bhūyo nyūne nyūnā same samā

'''7.7''' adhike tūttamā sā vā samā vā śobhanā mahī hīnā sā na bhavedgrāhyā tasyāḥ pāṃsurathāpi vā

'''7.8''' āḍhako yadi ṣaṣṭiḥ syād palānīha ca sā śubhā grāhyā bhūmirvinindyā syānnyūnā liṅgasthitau tadā

'''7.9''' athavā hastavistāre tadvatkhāte mahītale pūrayitvāmbhasā sadyo gacchennavapadaṃ sudhīḥ

'''7.10''' tathāgatya punardṛṣṭe yadi nyūnaṃ jalaṃ bhavet avaṭe syānmahī nindyā viparītā tu vṛddhidā

'''7.11''' evaṃ parīkṣitāyāṃ tu dharāyāṃ karṣaṇaṃ bhavet yājñikaistu halaṃ kṛtvā yugaṃ ca tarubhirnavaiḥ

'''7.12''' vṛṣau caiva sitau puṣṭau yuvānau saṃvigṛhya ca hemaśṛṅgakhurau kṛtvā vastraveṣṭitakandharau

'''7.13''' śucivalkalasaṃbhūtarajjunā trivṛtā vṛṣau yugena saha saṃyojya vṛṣagāyatrimantrataḥ

'''7.14''' halaṃ ca tena saṃyamya prāṅmukho deśikaḥ sthitaḥ navavastrottarīyaśca baddhapañcāṅgabhūṣaṇaḥ

'''7.15''' vṛṣāvabhyarcya tadbījamantreṇaiva samāhitaḥ lāṅgalaṃ vāmahastena gṛhītvā dakṣiṇena tu

'''7.16''' brahmavṛkṣataroḥ śākhāṃ karṣayettāṃ vasundharām vṛṣagāyatrimuccārya huṃkārāntena huṃkṛtim

'''7.17''' kṛtvā pracodayetsadyo vṛṣau pūrvamukhau tadā caturdaṇḍapramāṇena gatvā pūrvottaraṃ sudhīḥ

'''7.18''' āvartayedvṛṣāvevaṃ triḥkṛtvā cottarāyatam tathā vikṛṣya paścācca halairanyaiśca karṣayet

'''7.19''' bījāvāpanayogyāṃ tāṃ kṛtvā bhūmimatandritaḥ tatra samyaktilavrīhimudgānmūlena vāpayet

'''7.20''' saṃsicyātha jalaiḥ paścādrakṣayitvā bhuvaṃ tadā parīkṣayettatastāṃ tu bhuvaṃ deśikasattamaḥ

'''7.21''' trirātrāṅkuritā śreṣṭhā pañcāhānmadhyamā smṛtā nindyānyāṅkuritā bhūmirdeśikaiḥ śāstravittamaiḥ

'''7.22''' śreṣṭhā madhyā ca saṃgrāhyā nindyā yā syānmahī tadā hutvā ghoreṇa mantreṇa śataṃ tāṃ ca samāharet

'''7.23''' aṅkurāṇi ca vakrāṇi dhūmrāṇi viralāni ca śuṣkāṇi tiryagjātāni nindyānīti samādiśet

'''7.24''' taddoṣaśamanārthaṃ tu homayedbahurūpiṇā gate māse’thavā pakṣe tricatuḥpañcasaṃyute

'''7.25''' sasye’smiṃstatsamastaṃ tu gogaṇebhyo nivedayet

'''7.26''' iti kṛṣividhipūtāṃ kārayitvā dharitrīṃ dadhighṛtagulamiśraṃ brāhmaṇān bhojayitvā ajavṛṣamahiṣādīn gogaṇaṃ vāsayitvā punaravanimimāṃ tāṃ prokṣayetpañcagavyaiḥ

===Kapitel 8===

''aṣṭamaḥ paṭalaḥ · vāstupūjāvidhiḥ''

'''8.1''' ataḥ paraṃ pravakṣyāmi vāstupūjāṃ yathākramam purābhūtpuruṣaḥ kaścidbhuvanatrayabhīṣaṇaḥ

'''8.2''' bhuvanāni śarīreṇa cchādayanbhīmavikramaḥ taṃ dṛṣṭvā sarvadevāśca bhītā hyāsanparasparam

'''8.3''' saṃpradhārya tu saṃbhūya gṛhītvā tamadhomukham avaṣṭabhya bhuvaḥ pṛṣṭhe sahasaiva nyapātayan

'''8.4''' sa eva vāsturityuktastasyāṅgāni surāsuraiḥ yatra yena gṛhītāni tatra tasya baliṃ haret

'''8.5''' baliṃ gṛhītvā te sarve prīṇanti suciraṃ surāḥ yadi teṣāṃ tadā pūjā surāṇāṃ na vidhīyate

'''8.6''' tadā devāstadaṅgāni hitvā gacchanti vai dhruvam gateṣu teṣu tadvāstu kṣīyate nātra saṃśayaḥ

'''8.7''' kṣayahetustadaṅgānāṃ vikṣepo’tra bhaviṣyati tasmāttadvāstu dehasthānamarānarcayet sudhīḥ

'''8.8''' īśāne tu śiro vāstoḥ pādau nirṛtigocare kukṣirbrahmaṇi vijñeyamevamaṅgāni kalpayet

'''8.9''' anyeṣvaṅgeṣu ye devāste pūjāyāṃ parāśritāḥ yatra prāsāda anyadvā kriyate tatra deśikaḥ

'''8.10''' bhuvi nimnonnataṃ samyaksamaṃ kṛtvopalipya ca gomayena punaḥ kṛtvā puṇyāhaṃ tatra deśikaḥ

'''8.11''' sitapiṣṭāktasūtreṇa prāsādasamavistṛtam prāṅmukhaṃ daśasūtrāṇi tathodīcyānanāni ca

'''8.12''' āsphālya tatra saṃjāteṣvekāśītipadeṣu ca brahmā navapadaṃ bhuṅke vāstumadhye viśeṣataḥ

'''8.13''' samaryako vivasvāṃśca mitrastu pṛthivīdharaḥ brahmaṇaśca caturdikṣu sthitvā ṣaṭpadabhoginaḥ

'''8.14''' pūrvādyuttaraparyanteṣvatha proktā vidikṣu ca āpaścaivāpavatsaśca savitā sāvitra eva ca

'''8.15''' indra indrajayaścaiva rudro rudrajayastathā ete dvipadabhoktāraścāṣṭau devāḥ prakīrtitāḥ

'''8.16''' āgneyādiṣu koṇeṣu prākpaścimapadāśrayāḥ bāhyavīthīgatāndevānkramaśo’dya vadāmi te

'''8.17''' īśānaścaiva parjanyo jayantaśca mahendrakaḥ ādityaḥ satyakabhraṃśāvantarikṣaśca pūrvagāḥ

'''8.18''' agniḥ pūṣā ca vitatho gṛhakṣatayamau tathā gandharvo bhṛṅgarājaśca mṛgaścaiva tu dakṣiṇe

'''8.19''' paścime pitaraścaiva dauvārikastathaiva ca sugrīvaḥ puṣpadantaśca varuṇaścāsurastathā

'''8.20''' śoṣaśca pāpayakṣmā ca te cāṣṭau kathitāḥ surāḥ uttare ca tathā rogo nāgo mukhyastathaiva ca

'''8.21''' bhallāṭaśca tathā soma ṛgo’ditirditistathā ekaikapadabhoktāro dvātriṃśatparikīrtitāḥ

'''8.22''' brahmāṇaṃ madhyame pūrvaṃ pūjayeddeśikottamaḥ pādyairācamanārghyaiśca gandhapuṣpasudhūpakaiḥ

'''8.23''' dīpaiśca paramānnaṃ tu caruṃ tasya nivedayet samaryakasya śuddhānnaṃ mudgānnaṃ tu vivasvataḥ

'''8.24''' gulānnaṃ mitrasaṃjñasya dadhyannaṃ pṛthivīdhare āpādīnāmathāṣṭānāṃ yavaveṇukulatthakaiḥ

'''8.25''' māṣaniṣpāvagodhūmamasūraśyāmakairapi miśraṃ caruṃ krameṇaiva dadyādrudrajayāntakam

'''8.26''' dvātriṃśānāmatheśānamukhānāṃ ca kramāccarum pṛthakpṛthaksasarpiṣkaṃ dadyātteṣāṃ vadāmi te

'''8.27''' mantrānbrahmādikānāṃ tu krameṇaivāmṛtāśinām oṃkāramāditaḥ kṛtvā hāṃ haṃ hāmiti copari

'''8.28''' vāstoṣpate brahmaṇe ca nama ityantato bhavet anyeṣāmapi sarveṣāṃ svanāmādya tu bījakam

'''8.29''' praṇavena sahoccārya caturthyantaiḥ svanāmabhiḥ pṛthakpṛthagbhavenmantrastaistairmantrairbaliṃ haret

'''8.30''' carakī ca vidārī ca pūtanā pāparākṣasī etāścatasro bāhyasthāḥ śaktayaḥ padavarjitāḥ

'''8.31''' prāgādiṣu kramāttāsāṃ māṃsodanabaliṃ haret baliṃ samāpya paścāttu śalyoddhāraṃ samācaret

'''8.32''' yajamānastadā tvaṅgaṃ saṃspṛśettatra caiva hi vāstvaṅge śalyamastīti niścityātraiva khānayet

'''8.33''' śiraḥsparśe karoṭiḥ syānmukhasparśe’sthi caiva hi bāhusparśe ca dārūṇi kaṇṭhasparśe ca loṣṭakam

'''8.34''' kukṣisparśe tathā lohamūrusparśe dṛṣadbhavet pādasparśe bhavetkhaḍgaṃ padasthāni samuddharet

'''8.35''' evaṃ kṛtvātra śāstrajño homaṃ cāpi prakalpayet samaryakapade tatra homasthānaṃ vidhīyate

'''8.36''' saikataṃ sthaṇḍilaṃ tatra kṛtvā pūrvamatandritaḥ sthaṇḍilādisruvāntānāṃ kṛtvā śuddhiṃ yathāvidhi

'''8.37''' pañcasaṃskāramādau tu kṛtvā tatra havirbhujaḥ brahmāṇaṃ tatra cāvāhya brahmāgniriti cintayet

'''8.38''' pūjayitvātha gandhādyaistato homaṃ samārabhet hutvāgnimukhamādau tu pariṣicya tu pāvakam

'''8.39''' samidājyacarūṇāṃ tu pratyekaṃ tu śatāhutīḥ brahmaṇe prathamaṃ hutvā sarpiṣā sakalaṃ tataḥ

'''8.40''' samaryakādidevānāṃ caturṇāṃ ca yathākramam hutvā daśāhutīsteṣāṃ svāhāntaṃ ca svanāmataḥ

'''8.41''' āpādīnāmathāṣṭānāmaṣṭau pratyekamāhutīḥ īśānapramukhānāṃ tu pratyekaṃ pañcapañcataḥ

'''8.42''' pūrṇāhutiṃ tato dadyādbrahmamantreṇa deśikaḥ ekāhutiprayogeṇa svanāmapadamantrataḥ

'''8.43''' carakīprabhṛtīnāṃ ca juhuyāddeśikottamaḥ pariṣicya tataścāgnimudvāsyātha samāpayet

===Kapitel 9===

''navamaḥ paṭalaḥ · śaṅkusthāpanavidhiḥ''

'''9.1''' śaṅkucchāyāvidhānena vakṣye prācīṃ viniścitām devavipranṛpādīnāṃ gṛhārambhavidheḥ purā

'''9.2''' uttarāyaṇakāle tu śuklapakṣe śubhe dine yajamānānukūlarkṣe śilpinā saha deśikaḥ

'''9.3''' vimale’bhyudayātpūrvaṃ sthāpayecchaṅkumuttamam gṛhītavāstuno madhye daṇḍamātraṃ tu bhūtalam

'''9.4''' samaṃ kṛtvā jalenaiva kṛtvā darpaṇavatsudhīḥ tanmadhye lakṣaṇopetaṃ tasya lakṣaṇamucyate

'''9.5''' caturviṃśāṅgulotsedhaṃ varaṃ tasya prakalpayet ṣaḍaṅgulakṣaye tasminmadhyamotsedha ucyate

'''9.6''' tasmātṣaḍaṅgule hīne kanyasocchraya ucyate āyāmasadṛśaṃ nāhaṃ mūlenāsya prayojayet

'''9.7''' tattribhāgaikabhāgena śironāhaḥ prakīrtitaḥ śaṅkumānena tadbāhye parito maṇḍalaṃ likhet

'''9.8''' maṇḍalatritayaṃ caiva kṛtvā sūtreṇa saṃmitam pūrvāparāhṇayośchāyāṃ praveśe cātha nirgame

'''9.9''' chāyāgrayogavṛtteṣu lakṣayitvātra lāṅchayet pūrvapaścimabhāgeṣu maṇḍalatrayasaṃsthitāḥ

'''9.10''' chāyākārā bhavantyatra tānāśritya ca saṃsthitāḥ pūrvāparāyatā rekhāstisraḥ kuryādyathākramam

'''9.11''' maṇḍalādhyadhike hrāso nyūne vṛddhiryathā bhavet kārayitvā tathā dhīmānmadhyavṛttasya madhyagām

'''9.12''' pūrvāparāyatāmekāṃ rekhāṃ tadanusārataḥ tanmaṇḍalapramāṇena sūtreṇa sumitaṃ tataḥ

'''9.13''' pūrvapaścimaparyantasthitaṃ pārśvakrameṇa tu dakṣiṇottaragaṃ matsyaṃ janayitvā tathā punaḥ

'''9.14''' pārśvayorapi tanmānātpūrvapaścimayorapi matsyadvayaṃ tu tanmadhye pārśvasthabhramaṇena ca

'''9.15''' janayitvā tatastadvaddakṣiṇottaragaṃ budhaḥ kṛtvā matsyadvayaṃ paścātprāṅmukhodaṅmukheṣu ca

'''9.16''' matsyeṣu ṣaṭsu pāścātyanirgatābhirjanārdana rekhābhiratha ṣaḍbhistu janayeccaturaśrakam

'''9.17''' tenaiva caturaśreṇa prāsādaṃ tvatra kārayet

===Kapitel 10===

''daśamaḥ paṭalaḥ · ādyeṣṭakāvidhiḥ''

'''10.1''' vakṣyāmyādyeṣṭakānyāsamatastallakṣaṇānvitam prāsādasya trihastasya bhavedekāṅgulāyatā

'''10.2''' tadardhavistaropetā tadardhaghanasaṃyutā iṣṭakā sarvadhāmnāṃ ca proktā pakveṣṭakātmanām

'''10.3''' śilādhāmni viśeṣo’yaṃ kathyate surasattama uparyupari dhāmnāṃ ca pratihastavivardhanam

'''10.4''' dairghyatāraghaneṣūktamaṅgulārdhatadardhakaiḥ tāsāmagraṃ bhavenmūlaṃ vikārāṃśavihīnakam

'''10.5''' evaṃ kṛtveṣṭakāḥ pañca śilā vā vinyasettadā nandā bhadrā jayā riktā pūrṇā syurnāmataśca tāḥ

'''10.6''' tataḥ prāsādamānena khānayeddharaṇītalam khātaṃ pādapramāṇena bhūpṛṣṭhaṃ tu śubhāvaham

'''10.7''' pādādvedāṃśahīnena khātaṃ madhyamamucyate adhiṣṭhānapramāṇena kanyasaṃ parikīrtitam

'''10.8''' uttamānāṃ vimānānāṃ khananaṃ cottamaṃ bhavet madhyamānāṃ madhyamaṃ tadadhamānāṃ tathā bhavet

'''10.9''' prathamaṃ phalakotsedhaṃ hitvā śvabhroparīritam vālukābhiḥ samāpūrya samaṃkṛtvā samantataḥ

'''10.10''' jalasthitiṃ tu tatraivaṃ kṛtvā ca tridinaṃ sudhīḥ kuṭṭayetsudṛḍhaṃ samyaggajapādaiśca dārujaiḥ

'''10.11''' prāsādagarbhaṃ niścitya sūtreṇa sumitaṃ tathā dvārasya dakṣiṇe pārśve bhittimadhyagataṃ yathā

'''10.12''' vinyasediṣṭakāstasminnavaṭe ca ghanīkṛte gopureṣu tathā proktaṃ prākāreṣvīśagocare

'''10.13''' maṇḍapeṣvatha sarveṣu viśeṣo’yaṃ nidarśitaḥ prācīmukhaistribhiḥ sūtraistathodīcīmukhairapi

'''10.14''' maṇḍalābhyantaraṃ kṛtvā catuṣkeṣu samanvitam caturṣvapi ca koṣṭheṣu vahnervā śāṃkare diśi

'''10.15''' koṇastambhaṃ parityajya stambhamūle tu vinyaset śuddhiṃ kṛtvā tu pañcānāmiṣṭakānāmanukramāt

'''10.16''' puṇyāhaṃ vācayitvādau pañcabhūtātmakāni tu bījāni tāni vinyasya deśikaḥ śāntamānasaḥ

'''10.17''' śilpihaste catasraśca dāpayediṣṭakāstadā tāsāmapyadhivāsaṃ tu tenānyatra prayojayet

'''10.18''' vyomākṣarasamopetāṃ pañcamāmuparīṣṭakām ācāryo maṇṭape ramye niśi pūrve’dhivāsayet

'''10.19''' adhivāsavidhiścātha krameṇa paripaṭhyate bhūtābdhinavahasteṣu maṇḍapeṣu yathākramam

'''10.20''' hīnamadhyottamānāṃ ca vimānānāṃ yathākramam navadhā maṇṭapaṃ kṛtvā madhye kṛtvā ca vedikām

'''10.21''' tālamātra talotsedhāṃ darpaṇodarasaṃnibhām prāgādiṣu padeṣvagneḥ kuryādāyatanāni ca

'''10.22''' caturaśraṃ dhanurvṛttaṃ trikoṇaṃ ca yathākramam aiśānye’ṣṭāśrakaṃ kuṇḍaṃ pradhānamiti kīrtitam

'''10.23''' sthaṇḍilānyathavā kuryātsikatābhiśca tāni vai alābhādekahomārthaṃ prācyāmeva prakalpayet

'''10.24''' gomayenānulipyātha maṇṭapaṃ vedisaṃyutam puṇyāhaṃ vācayitvātha stambhānvastreṇa veṣṭayet

'''10.25''' vitānadhvajasaṃyuktaṃ darbhamālāsamāvṛtam kadalītoraṇairyuktaṃ dvārakumbhasamanvitam

'''10.26''' maṅgalāṣṭakasaṃyuktaṃ maṅgalāṅkuraśobhitam kṛtvā tu vedikāṃ madhye kārayetsthaṇḍilaṃ sudhīḥ

'''10.27''' aṣṭadroṇaistadardhairvā tadardhairvātha śālibhiḥ droṇairvātha ca tanmadhye padmamaṣṭadalaṃ likhet

'''10.28''' taṇḍulaiḥ pūrayedrekhā vikīrya tilalājakān tatra mantritakāyastu gururarghyakarastathā

'''10.29''' soṣṇīṣaḥ sottarīyaśca baddhapañcāṅgabhūṣaṇaḥ karṇikāyāṃ yajetpūrvaṃ gandhādyaistu manonmanīm

'''10.30''' vāmādiśaktīḥ śakrādidaleṣvaṣṭasu pūjayet paścātpratisaraṃ tasyāḥ pūrṇāyāḥ paribandhayet

'''10.31''' karṇikāyāṃ tu tāṃ pūrṇāṃ pūrvāgrāṃ vinyasetsudhīḥ tāṃ tāṃ pidhāya tenaiva vastreṇa susitena ca

'''10.32''' pūrvabhāge nyasetkumbhaṃ ramyaṃ bimbaphalaprabham ṣoḍaśa prasthasaṃpūrṇaṃ sitasūtravicitritam

'''10.33''' gandhatoyasamāpūrṇaṃ sakūrcaṃ vastraveṣṭitam pañcaratnaṃ jale kṣiptvā pidhānamatha pallavam

'''10.34''' ādhāraśaktiṃ tasyāṃ tu dhyātvā devīṃ tato nyaset triṇetrāṃ caturbhujāṃ śubhrāṃ jaṭāmakuṭamaṇḍitām

'''10.35''' śuklābharaṇahṛdyāṅgīṃ śuklagandhānulepanām dukūlavasanāṃ ramyāṃ gandhādyairarcayetsudhīḥ

'''10.36''' daleṣvaṣṭasu cānyāṃśca pūrvādiṣu yathākramam tadardhaparimāṇāṃstu kalaśāṃstādṛśānapi

'''10.37''' vinyasya teṣu dikpālānyathāsthānaṃ samarcayet dikpālānāṃ saśaktīnāṃ haviḥ samyakpṛthakpṛthak

'''10.38''' dattvā homaṃ samanvicchedyathāsthānaṃ gurūttamaḥ hotāraḥ sādhakāste syurabhāvāt putrakāstathā

'''10.39''' sadyādibhiścaturdikṣu yathābhāgaṃ tu homayet aiśānyāmīśamantreṇa samiddhomaṃ prakalpayet

'''10.40''' ājyaṃ tanmūlamantreṇa caruhomaṃ hṛdā tathā lājāṃśra śirasā hutvā yavāṃśca śikhayā tataḥ

'''10.41''' sarvātmanā tilānhutvā pūrṇāṃ prāsādato hunet dravyānte vyāhṛtiṃ hutvā pratidravyaṃ tu tāṃ spṛśet

'''10.42''' tattanmantraistu hotāraḥ spṛśeyustadanantaram tatkāle’dhyayanaṃ kuryāccaturvedaiścaturdiśi

'''10.43''' aiśānyāṃ prāṅmukhāsīno japedastraṃ tu sādhakaḥ ekahomavidhāne tu viśeṣo’yaṃ pradṛśyate

'''10.44''' samiddhomaḥ śivena syātsaṃkhyāṣṭaśatamucyate pañcahome tadardhaṃ vā pādaṃ vātha ca homayet

'''10.45''' evaṃ rātrau sudhīḥ kṛtvā deśikaḥ prātarutthitaḥ kṛtvā nityakriyāḥ sarvāḥ kṛtvā mantratanuṃ nijām

'''10.46''' ādhāraśaktiṃ tasyāṃ tu pūrṇāyāṃ kumbhato nyaset tato’vaṭaṃ samāsādya deśe tatsthāpanocite

'''10.47''' prāgagramudagagraṃ ca kṛtvā rekhācatuṣṭayam pade ca navake tatra parito’ṣṭapadānyapi

'''10.48''' padāni kuryāccatvāri tatkramaścābhidhīyate īśānaśakrage kṛtvā padamekaṃ tathā punaḥ

'''10.49''' vahnikīnāśage kṛtvā rakṣovaruṇage api vāyusomagate tadvat sthāpanārthaṃ vicakṣaṇaḥ

'''10.50''' sumuhūrte sulagne tu nakṣatrakaraṇānvite nandādyāśca catasraśca yajamānādibhiḥ kramāt

'''10.51''' uddhārayitvā mantrajñaḥ sarvātodyasamāyutam pradakṣiṇakrameṇaivāvaṭe samavatārya ca

'''10.52''' upaviśya guruḥ pūrvaṃ dakṣiṇenopaviśya ca paścime prāṅmukhasyātra śilpinaśca tatastadā

'''10.53''' haste nandāṃ gururdattvā spṛśaṃstena nidhāpayet uttarāgrā bhavetpūrvā pūrvāgrā dakṣiṇā bhavet

'''10.54''' paścimā cottarāgrā syātpūrvāgrā cottarā tathā evaṃ kṛte’gramagraṃ ca mūlaṃ mūlaṃ ca saṃyutam

'''10.55''' bhavedīśanirṛtyośca mūlāgrau vahnivāyugau tāsāṃ madhye’vaṭe toyamāvartya kusumānvitam

'''10.56''' tasyāvartaṃ samīkṣyādau deśikaḥ śilpinā saha śubhaṃ vadettadā prājña āvartamatha savyakam

'''10.57''' vāmāvartaṃ vinindyaṃ syāttaddoṣavinivṛttaye paścāddhomaḥ prakartavyaḥ samāptau śāntisaṃjñitaḥ

'''10.58''' madhyāvaṭe tato dhīmānratnāni nava vinyaset tato lohāni dhātūṃśca bījāni kramaśastathā

'''10.59''' pūrayeccūrṇapiṣṭena mṛdā vāpyavaṭaṃ tataḥ tataḥ pūrṇāṃ tatoddhṛtya pañcamāmadhivāsitām

'''10.60''' tāsāmupari vinyasya tasyā mantramanusmaran śaktikumbhaṃ tatastatra samānīya vicakṣaṇaḥ

'''10.61''' kūrcāmbhasā tu saṃprokṣya tathānyaiḥ kalaśaistadā yathāsthānaṃ tadambhobhistattanmantramanusmaran

'''10.62''' prokṣayitvā tatastatra prāsādaṃ parikalpayet

===Kapitel 11===

''ekādaśaḥ paṭalaḥ · upapīṭhavidhiḥ''

'''11.1''' prāsādamaṇṭapādīnāmunnatārthaṃ viśeṣataḥ śobhārthaṃ ca samuddiṣṭamupapīṭhamataḥ śṛṇu

'''11.2''' dviguṇaṃ tadadhiṣṭhānātpādonadviguṇaṃ tu vā pañcāṃśaṃ tryaṃśakaṃ vātha bhavedardhādhikaṃ tu vā

'''11.3''' pādādhikaṃ samaṃ vātha tripādaṃ vāpi kārayet kṛtvotsedhaṃ daśāṃśaṃ cāpyekadvitribhiraṃśakaiḥ

'''11.4''' adhiṣṭhānasamaṃ bāhye nirgamaṃ trividhaṃ smṛtam tridvyekadaṇḍamānaṃ vā nirgamaṃ tattridhā bhavet

'''11.5''' utsedhe dvādaśāṃśe tu dvābhyāṃ pādukamucyate tadūrdhve padmamaṃśena kṣepaṇaṃ cārdhabhāgataḥ

'''11.6''' galaṃ bhūtāṃśakaṃ jñeyaṃ kampamardhāṃśasaṃmitam aṃśena padmamūrdhvaṃ syādvājanaṃ cāṃśakena tu

'''11.7''' kampamaṃśena kartavyamevamaṣṭāṅgasaṃmitam athavā tatsamutsedhe trisaptāṃśasamanvite

'''11.8''' netrāṃśaṃ tadupānaṃ syādguṇāṃśaṃ padmamucyate vyomāṃśaṃ kandharaṃ proktaṃ dvābhyāṃ vājanameva hi

'''11.9''' ekena kampamaṣṭāṃśaiḥ karṇaṃ tatra prakalpayet aṃśena kampamaṃśābhyāṃ vājanaṃ kampamaṃśataḥ

'''11.10''' kṛtvā ṣoḍaśadhodayaṃ dvayamitaṃkuryādupānaṃ tatastanmānaṃ kamalaṃ ca kampamatha tatraikena karṇaṃ tataḥ bhūtāṃśairatha kampamekamupari dvābhyāṃ ca padmaṃ tato dvābhyāmeva hi paṭṭikāṃ tadupari vyomāṃśakaṃ kampakam

'''11.11''' kṛtvā samyagathopapīṭha udayaṃ caikonaviṃśāṃśakaṃ dvābhyāṃ pādukamambujadvayamitaṃ kampaṃ śivāṃśaṃ bhavet vasvaṃśaṃ galamekabhāgamatha tatkampaṃ ca dvidvyaṃśakaṃ padmaṃ paṭṭikayā bhaveduparitaḥ kampaṃ khabhāgānvitam

'''11.12''' kṛtvā vā manubhāgamambujamidaṃ tatpādukaṃ paṅkajaṃ vyomāṃśaṃ tvatha kampamardhamatha ṣaḍbhāgairgalaṃ kampakam ardhaṃ puṣkarabhāgamambujamato dvābhyāṃ bhavetpaṭṭikā kampaṃ copari tasya bhāgasahitaṃ tatropapīṭhaṃ bhavet

'''11.13''' kaṇṭhe bhūtagajavyālasiṃhayuktaṃ yathā bhavet tathā kurvīta matimānpādayuktamathāpi vā

'''11.14''' upapīṭhaṃ samākhyātaṃ sarvadhāmnāṃ samāsataḥ

===Kapitel 12===

''dvādaśaḥ paṭalaḥ · prāsādalakṣaṇavidhiḥ''

'''12.1''' ataḥ paramidaṃ vakṣye prāsādānāṃ tu lakṣaṇam hastena saṃmitaḥ proktaḥ prāsādaḥ syājjanārdana

'''12.2''' tasmāddhastapramāṇo’yamucyate’tra purā mayā jālādivivarāviṣṭe sati gharmāṃśutejasi

'''12.3''' aṇurūpeṇa tatraiva dṛśyate yadrajo naraiḥ tadaṇurnāmataḥ prokto rajo nāma tadaṣṭakam

'''12.4''' tadaṣṭakaṃ tu vālāgraṃ līkṣākhyaṃ tu tadaṣṭakam tadaṣṭakaṃ tu yūkākhyaṃ yavo yūkāṣṭako bhavet

'''12.5''' aṅgulaṃ cāṣṭabhistaistu tanmānāṅgulamucyate saptabhiḥ ṣaḍbhirapyuktaṃ yavairatroktamaṅgulam

'''12.6''' evaṃ trividhamuddiṣṭaṃ mānāṅgulamataḥ param anena hastamānaṃ ca krameṇa paripaṭhyate

'''12.7''' caturviṃśaistu taiḥ proktaḥ kiṣkuhastaḥ suniścitaḥ prājāpatya iti proktaḥ pañcaviṃśāṅgulaistataḥ

'''12.8''' ṣaḍviṃśaistu dhanurmuṣṭiḥ saptaviṃśairdhanurgrahaḥ śibikāsanādikaṃ sarvaṃ kiṣkumānena kārayet

'''12.9''' prāsādamaṇṭapādīni prājāpatyena kārayet rājaveśmapurādīni taṭākadīrghikādikam

'''12.10''' dhanurmuṣṭikareṇaiva nadyadhvādīnyataḥ param dhanurgrahakareṇaiva karabhedaḥ prakīrtitaḥ

'''12.11''' yāgopakaraṇaṃ sarvameva mātrāṅgulena tu mātrāṅgulaṃ ca vividhaṃ tasya lakṣaṇamucyate

'''12.12''' ācāryadakṣiṇe haste madhyamāṅgulimadhyataḥ yatparva tasya dairghyeṇa vistāreṇāpi saṃmitam

'''12.13''' pratimāyāḥ samutsedhe tālagaṇyena bhājite yadaṅgulaṃ bhavettattu dehalabdhāṅgulaṃ bhavet

'''12.14''' pratimāyāstu nirmāṇe viniyogastu dṛśyate evamaṅgulabhedaśca karabhedaśca darśitaḥ

'''12.15''' prāsādastrividhaḥ proktaḥ kanyaso madhyamastathā uttamaścāpi tadbheda idānīṃ vakṣyate mayā

'''12.16''' trikarānnavahastāntaṃ caturhastāddaśāntakam ojoyugmakaraiḥ kuryāddhāmnāmavaramaṣṭakam

'''12.17''' rudrahastaṃ samārabhya yāvadekonaviṃśakam ravihastaṃ samārabhya viṃśaddhastāntameva ca

'''12.18''' ojoyugmakarairdhāmnāṃ daśakaṃ madhyamaṃ smṛtam ekaviṃśatsamārabhya caikonatriṃśakāntakam

'''12.19''' dvāviṃśatkaramārabhya tatastriṃśatkarāntakam ojo yugmakaraiḥ śreṣṭhaṃ daśakaṃ parikīrtitam

'''12.20''' trikarāttriṃśaddhastāntamojoyugmakaraiḥ kramāt devānāmālayaḥ proktaścāṣṭāviṃśatisaṃkhyayā

'''12.21''' tattaddvistāramānena garbhagehaṃ prakalpayet prāṅmukhaiḥ pañcabhiḥ sūtraistathaivodaṅmukhairapi

'''12.22''' prāsādasya tu vistāre vikārāṃśasamanvite madhye yugapadaṃ garbhaṃ śeṣaṃ bhittyarthamucyate

'''12.23''' ṣaḍbhiḥ ṣaḍbhistataḥ sūtraiḥ prāṅmukhodaṅmukhairapi pañcaviṃśatpadaṃ kṛtvā madhye garbhaṃ navāṃśakam

'''12.24''' prāṅmukhairvasubhiḥ sūtraistathaivodaṅmukhairapi saptasaptapadaṃ kṛtvā tanmadhye tu navāṃśakaiḥ

'''12.25''' parito’rdhapadāḥ sapta garbhaṃ bhittistu śeṣakaiḥ yadi pūrvaṃ sthitaṃ liṅgaṃ tanmānādgarbhamucyate

'''12.26''' triguṇaṃ liṅgatārasya pīṭhatāraṃ vidhīyate pīṭhatriguṇitaṃ garbhaṃ bhittiḥ pīṭhasamā bhavet

'''12.27''' athavā dhāmagarbhaṃ tu bhavetpīṭhacaturguṇam garbhārdhamānato bhittirbhaveddhāmnaḥ samantataḥ

'''12.28''' agrato maṇṭapaṃ kuryātprāsādasamamānataḥ athavā tatpramāṇe tu vikārāṃśavibhājite

'''12.29''' ardhādekaikavṛddhyā tu maṇṭapo navadhā bhavet maṇṭapeṣu navasveṣu caikamiṣṭaṃ prakalpayet

'''12.30''' maṇṭapeṣu ca sarveṣu catustridvyekadaṇḍakaiḥ kārayedantarālaṃ vā madhye maṇṭapasadmanoḥ

'''12.31''' samaṃ syādubhayostāraṃ dhāmamaṇṭapayorapi catuḥpañcāṃśakaṃ vāpi dhāmno maṇṭapavistaram

'''12.32''' pārśvayoḥ pṛṣṭhato vāpi prāsādānāṃ viśeṣataḥ tattribhāgaikabhāgena pañcāṃśadvyaṃśakena vā

'''12.33''' madhye bhadraṃ prayuñjīta sārdhadaṇḍapramāṇataḥ daṇḍapramāṇato vāpi bhadraṃ śobhārthamucyate

'''12.34''' bhadraṃ vināpi kartavyaḥ prāsādo lakṣaṇānvitaḥ adhamānāṃ vimānānāmaṣṭānāṃ ca samunnatim

'''12.35''' vistāradviguṇaṃ kuryānmadhyānāmunnatiṃ tataḥ daśānāmapi vistāre saptāṃśena vibhājite

'''12.36''' dvādaśāṃśena kurvīta tataśca śreṣṭhasadbhanām daśānāṃ tu samutsedhaṃ vistāre munibhājite

'''12.37''' rudrabhāgena kurvīta dvārotsedhamathocyate prateruttarasīmāntaṃ dvārotsedhaṃ vidhīyate

'''12.38''' athavāpyucchraye paṅkinandavasvaṃśabhājite ekabhāgaviviktaṃ vā tadvistāramathocyate

'''12.39''' utsedhārdhena vistīrṇamuttamaṃ dvāramucyate tattāre tu daśāṃśaikahīnaṃ madhyamamucyate

'''12.40''' adhamaṃ dvyaṃśahīnaṃ syādathavānya prakārataḥ prāsādagarbhavedāṃśād dvāravistāramucyate

'''12.41''' dviguṇaṃ cocchrayaṃ tasya tacchākhāgatavistaram dvārotsedhacaturbhāgabāhulyaṃ tatturīyataḥ

'''12.42''' śākhodumbaradehalyaḥ samāḥ sarvāśca sarvaśaḥ vicitrapatravallībhiryutāḥ syustadudumbare

'''12.43''' śriyaṃ sarasvatīṃ caiva vighneśaṃ cāpi kārayet śākhayornidhipālau ca śaṅkhapadmayutau tathā

'''12.44''' praticchedavidhānena dvāraṃ caiva prakalpayet ādyaṃ syāttadadhiṣṭhānaṃ dvitīyaṃ pādamucyate

'''12.45''' prastaraṃ tu tṛtīyaṃ syāccaturthaṃ grīvamucyate pañcamaṃ śikharaṃ ṣaṣṭhaṃ stūpirityabhidhīyate

'''12.46''' evaṃ ṣaḍvarga uddiṣṭastalabhedamatha śṛṇu tricatuḥpañcaṣaṭsaptavasunandadaśaiḥ karaiḥ

'''12.47''' vimānaṃ kalpitaṃ yogyaṃ bhavedekatalasya tu pañcaṣaṭsaptabhirhastairvasunandadaśaiḥ karaiḥ

'''12.48''' kalpitaṃ dhāma yogyaṃ syād dvitalasya janārdana saptāṣṭanavahastaiśca daśaikādaśahastakaiḥ

'''12.49''' dvādaśaiśca kṛtaṃ dhāma tritalasya prakīrtitam nandāṃśarudrasūryaiśca trayodaśacaturdaśaiḥ

'''12.50''' kṛtaṃ catustale yogyaṃ rudrasūryatrayodaśaiḥ manupañcadaśaiścaiva ṣoḍaśairdhāmahastakaiḥ

'''12.51''' kṛtaṃ pañcatale yogyaṃ trayodaśacaturdaśaiḥ tithiṣoḍaśahastaiśca tathā saptadaśairapi

'''12.52''' aṣṭādaśakaraiścāpi dhāma syāt ṣaṭtale kṛtam tithiṣoḍaśahastaiśca tathā saptadaśairapi

'''12.53''' aṣṭādaśakaraistadvatkarairekonaviṃśakaiḥ viṃśaiścaiva kṛtaṃ saptatale yogyaṃ bhavedatha

'''12.54''' karaiḥ saptadaśairaṣṭādaśairekonaviṃśakaiḥ viṃśakairekaviṃśaiśca dvāviṃśairaṣṭabhūmike

'''12.55''' ekonaviṃśakairviṃśairekaviṃśakaraistathā dvāviṃśaiśca trayoviṃśaiścaturviṃśaiḥ kṛtaṃ tu yat

'''12.56''' yogyaṃ navatale dhāmni tataścāpyekaviṃśakaiḥ dvāviṃśaiśca trayoviṃśaiścaturviṃśaiḥ karairapi

'''12.57''' pañcaviṃśaiśca ṣaḍviṃśaiḥ kṛtaṃ daśatale bhavet trayoviṃśaiścaturviṃśaiḥ pañcaviṃśaiḥ karairapi

'''12.58''' ṣaḍviṃśaiḥ saptaviṃśaiśca tathā caivāṣṭaviṃśakaiḥ kṛtaṃ dhāma bhavedyogyamekādaśatalasya tu

'''12.59''' pañcaviṃśaiśca ṣaḍviṃśaiḥ saptaviṃśaiḥ karaistathā aṣṭāviṃśaistathā caiva karairekonatriṃśakaiḥ

'''12.60''' triṃśaiścāpi kṛtaṃ dhāma yogyaṃ syāddvādaśe tale evaṃ hastaiḥ kramāddhāmatalaṃ niścitya kārayet

'''12.61''' ekabhūmividhānasya tvadhiṣṭhānādirucyate utsedhe vasubhāge’trādhiṣṭhānaṃ vyomabhāgataḥ

'''12.62''' netrabhāge bhavetpādaṃ prastaraṃ caikabhāgataḥ kaṇṭhamekena kartavyaṃ dvābhyāṃ tu śikharaṃ bhavet

'''12.63''' stūpirekena kartavyā hyathavātra navāṃśake sārdhabhāgaikabhāgena masūraṃ dviguṇaṃ tataḥ

'''12.64''' pādatuṅgaṃ tataścāpi prastaraṃ syānmasūravat grīvamekāṃśasaṃyuktaṃ śikharaṃ syād dviyaṃśakam

'''12.65''' stūpirekāṃśakocchreyā iti ṣaḍvargajo vidhiḥ nāmabhedamalaṅkāraṃ dhāmnāṃ vakṣyāmi tacchṛṇu

'''12.66''' prāsādastrividhaḥ proktastraividhyamapi kathyate nāgaraṃ drāviḍaṃ caiva vesaraṃ ceti nāmataḥ

'''12.67''' bhaumādistūpiparyantaṃ nāgaraṃ caturaśrakam kaṇṭhātprabhṛti cāṣṭāśraṃ drāviḍaṃ parikīrtitam

'''12.68''' kaṇṭhātprabhṛti vṛttaṃ yadvesaraṃ dhāma kathyate sabhadraṃ saviśālaṃ syātkarṇakūṭasamanvitam

'''12.69''' aṣṭāśravedikāyuktamaṣṭapañjarasaṃyutam saubhadraṃ bhogadaṃ proktaṃ dhāma sarvasurocitam

'''12.70''' caturaśrāyataṃ caiva stūpitrayasamanvitam pañjarādivihīnaṃ yatsvastibandhanamucyate

'''12.71''' āyatāśraṃ vinā proktaṃ lakṣaṇena samanvitam āśramāśraśirogrivaṃ vṛttavedikayā yutam

'''12.72''' mahānāsikayā yuktaṃ sarvatomukhamucyate uktālaṅkārasaṃyuktamāyataṃ vṛttameva ca

'''12.73''' karṇakūṭavihīnaṃ ca vṛttāyatagalaṃ tathā dvyaśravṛttamahānāsyāmagre lalāṭasaṃyutam

'''12.74''' pārśvayoḥ pṛṣṭhataścāpi kṣudranāsikayā yutam hastipṛṣṭhavidhānaṃ yatsārvakāmikamucyate

'''12.75''' evaṃ prāsāda uddiṣṭaḥ samāsena janārdana

===Kapitel 13===

''trayodaśaḥ paṭalaḥ · adhiṣṭhānavidhiḥ''

'''13.1''' adhiṣṭhānamatho vakṣye śṛṇu tallakṣaṇaṃ hare upānanirgamaṃ pādād dvidaṇḍena samantataḥ

'''13.2''' pādādhikena vā kuryādathavārdhādhikena ca aṣṭāviṃśatibhāgike tadudaye dvābhyāmupānaṃ tathā pādaṃ kṣudramupānamekamupariṣṭātṣaḍbhirekāmbujam  | ekaṃ kaṇṭhamathābjamekamatha ca tryaṃśaṃ bhavetkairavaṃ padmaṃ caikamadhordhvataśca khamitaṃ kampaṃ tu kaṇṭhaṃ tribhiḥ

'''13.3''' tasyordhve’tha ca kampamekamatha tatpadmaṃ ca tadvadbhavet tasyordhve’pi ca paṭṭikā tribhirataḥ kampaṃ tu bhāgānvitam evaṃ yadracitaṃ masūrakamidaṃ proktaistu bhāgaiḥ kramād asvapnālayayogyamityabhihitaṃ tatpādabandhāhvayam

'''13.4''' gāyatryaṃśamite’ṣṭabhirvasumatī saptāṃśakaiḥ kairavaṃ kampaṃ caikamatho galaṃ tribhiratho kampaṃ punaḥ khāṃśabhāk tasyordhve tribhiraṃśakaiḥ parimitāṃ kuryānmahāpaṭṭikām ekāṃśena tataśca kampamaparaṃ syātpādabandhāhvayam

'''13.5''' aṣṭāviṃśāṃśake’sminnayanaparimitaṃ pādukaṃ syād dvirabjaṃ kṣudropānaḥ khabhāgaṃ jagativasumatī saptabhiḥ kairavaṃ ca aṣṭāśraṃ tadvadūrdhve surapathamidamāliṅgamagnyaṃśamūrdhve kaṇṭhaṃ caikena kampaṃ jalajamapi tathā paṭṭikāgnyaṃśayuktā

'''13.6''' ekatriṃśāṃśake’smindvitayaparimitaṃ pādukaṃ cāpi padmaṃ kṣudropānaṃ tadaṃśaṃ śaramitamavaniḥ padmamekaṃ dṛgekam padmaṃ tadvatsuvṛttaṃ kumudamanalabhāgena padmaṃ tathaikaṃ vyomāṃśaṃ kampamūrdhve galamanalamitaṃ kampamekaṃ ca kuryāt

'''13.7''' tasyordhve pādamekaṃ tribhiratha ca kapotaṃ tu nāsīyutaṃ tad bhāgenāliṅgamūrdhve’ntaritamapi tathā vyālayuktaṃ pratiśca dvābhyāmekena sarvopari bhavati tato vājanaṃ bhāgayuktaṃ nāmnā kāpotabandhaṃ bhavati punaridaṃ devadhāmnāṃ prayojyam

'''13.8''' aṣṭāṃśaṃ jagatī tathaiva kumudaṃ syādekaviṃśāṃśake tvāliṅgāntaritāvubhau nigaditāvekaikabhāgānvitau dvābhyāṃ tu pratirekabhāgamatha tatkampaṃ tu nāmnā bhaved etadvai pratibandhamuktamakhile svargaukasāmālaye

'''13.9''' tithyaṃśe’tha masūrake śaramitā dhātrī tathā kairavaṃ cāliṅgaṃ gaganāṃśamantaritakaṃ tadvadbhavedūrdhvataḥ dvābhyāṃ syātpratirūrdhvatoṃ’śaracitaṃ tadvājanaṃ kalpayed etadbhūsuradevabhūpativiśāṃ vāseṣu yogyaṃ bhavet

'''13.10''' viṃśāṃśe’tha masūrake nayanadṛgvyomāṃśabhūtāṃśakai- rvedaikaikaguṇāmbaraiḥ kramavaśādaṃśairadhaḥpādukam padmaṃ kṣudramupānakaṃ vasumatīṃ kuryāttataḥ kairavaṃ cāliṅgāntaritau pratiṃ tadupari proktaṃ hi tadvājanam

'''13.11''' aṣṭādaśāṃśake tasmindvābhyāṃ pādukamucyate pañcabhiḥ padmamuddiṣṭaṃ kaṇṭhamekena kārayet

'''13.12''' ekabhāgādadhaḥpadmaṃ kumudaṃ tribhirucyate ūrdhvapadmaṃ tathaikenāliṅgamekena kārayet

'''13.13''' ekenāntaritaṃ tatra dvābhyāṃ pratirudāhṛtam padmaṃ vājanamekena padmabandhamidaṃ bhavet

'''13.14''' kairavāntaṃ galāntaṃ vā paṭṭikāntaṃ bhavetsthalam upapīṭhe’thavā kuryātsthalaṃ taddakṣiṇonnatam

'''13.15''' jalanirgamanacchidraṃ prāsādasyottare bhavet aiśānyāṃ vā diśīnānye madhye vā sthalasaṃśritam

'''13.16''' tadardhaṃ nālaśailaṃ syāttasya lakṣaṇamucyate prāsādabhittiviṣkambhamānopari tadāyatam

'''13.17''' pādaviṣkambhamānena triguṇaṃ pādonameva vā caturaśraṃ samaṃ tatsyātpādaviṣkambhavistṛtam

'''13.18''' tadvistāratryaṃśakena madhye kṛtvā jalāyanam tadvatkhātaṃ kramānmūlāt kṛśatāṣṭāṃśavarjanāt

'''13.19''' agre gajādharoṣṭhāṃśaṃ kiṃcidvinamitaṃ sthalāt bhittyantaṃ sthalaṃ pratiṣṭhāpya nālamūrdhvaṃ tu kārayet

'''13.20''' evaṃ kṛtvā masūraṃ tadūrdhve cāṅghriṃ prakalpayet

===Kapitel 14===

''caturdaśaḥ paṭalaḥ · pādādilakṣaṇam''

'''14.1''' pādādīnāmathāṅgānāṃ pañcānāmākṛtiḥ kramāt ākṛtyā nāmabhedaśca pādānāṃ vakṣyate’dhunā

'''14.2''' masūrordhve’ṅghrimūle tu vedikāṃ vā prakalpayet tanmānaṃ tu dvidaṇḍaṃ syānnavabhāgavibhājite

'''14.3''' pādamūleṃ’śataḥ kuryātkampaṃ vedāṃśakairgalam tadūrdhve paṭṭamekaṃ syād dvyaṃśenopari vedikā

'''14.4''' tadūrdhve paṭṭikāṃśā syāttadūrdhve’ṅghriṃ prakalpayet caturaśrāstathāṣṭāśrā vṛttāste trividhāḥ smṛtāḥ

'''14.5''' sakumbhāśca vikumbhāśca kumbhamaṇḍiyutāstathā proktāḥ pādāḥ samāsena tadvidhānamathocyate

'''14.6''' tasyotsedhaṃ tu saptāṣṭanavabhāgavibhājite ekabhāgaṃ bhavettatra dārupādasya vistṛtam

'''14.7''' bhittipādagataṃ tāraṃ vakṣyāmi kramaśo’dhunā trihastabhavanastambho bhavettryaṅgulavistṛtaḥ

'''14.8''' uparyupari dhāmnāṃ tu pādavistāravardhanam aṅgulena bhaveddhāmnāṃ tryaṃśaṃ karamitādiha

'''14.9''' uparyupari pādānāmādvādaśatalādapi mūlapādādbhaveddhrāso dvyaṅguladvyaṅgulakramāt

'''14.10''' athavānyaprakāreṇa vakṣyate pādavistaram caturviṃśatibhāgaṃ tu kṛtvā prāsādavistaram

'''14.11''' pañcaviṃśatibhāgaṃ vā ṣaḍviṃśāṃśamathāpi vā teṣu caikāṃśamuddiṣṭaṃ trividhaṃ pādavistṛtam

'''14.12''' pādavistāramāne’tha vasubhāgavibhājite ekabhāgavihīnaṃ syāttattatpādasya vistaram

'''14.13''' taddaṇḍamiti nirdiṣṭaṃ tena bhāgaṃ prakalpayet vistārasya tribhāgaikaṃ caturbhāgaikameva vā

'''14.14''' stambhānāṃ nirgamaḥ proktaḥ pādānāṃ nāma kathyate brahmakānto viṣṇukānto rudrakānta iti trayaḥ

'''14.15''' pādāḥ syurnāmatasteṣāmākṛtistu nigadyate stambhāyāmaḥ samastastu caturaśraḥ salakṣaṇaḥ

'''14.16''' tryaṃśādbhavediha stambho brahmakāntābhidhānataḥ mūle tatkaṇṭhamānena kṛtvā ca caturaśrakam

'''14.17''' pādādhikaṃ vāpyadhyardhaṃ pādonadviguṇaṃ tu vā dviguṇaṃ vā tadūrdhve tu vṛttamaṣṭāśrameva vā

'''14.18''' kṛtvordhve kumbhamaṇḍībhyāṃ yuktaḥ syādviṣṇukāntakaḥ pūrvavaccaturaśraṃ tatkṛtvordhve ṣoḍaśāśrakam

'''14.19''' tadūrdhve kumbhamaṇḍībhyāṃ saṃyukto rudrakāntakaḥ mūle daṇḍapramāṇena kṛtvā tu caturaśrakam

'''14.20''' tasyādhaḥ pādataḥ pādaṃ tasyordhve ṣoḍaśāśrakam tadūrdhve kumbhamaṇḍībhyāṃ yuktaḥ saumya udāhṛtaḥ

'''14.21''' mūlaprabhṛti vasvaśraḥ kevalaṃ kumbhasaṃyutaḥ vāsantika iti proktastvaśrākāraḥ suvṛttakaḥ

'''14.22''' kevalaṃ kalaśopeto vṛttakānta iti smṛtaḥ mūle’sya vā savarṇena caturaśrastataḥ param

'''14.23''' vṛttaḥ kalaśasaṃyuktaḥ pūrvāgrastambha ucyate sārdhena samapādena daṇḍamānena vāgrataḥ

'''14.24''' caturaśrastathā stambhastadadho daṇḍamānataḥ ṣoḍaśāśraṃ bhavettatra padmaṃ mūlāgrayorapi

'''14.25''' pañcabhāgaikabhāgena tasyādhaścaturaśrakam daṇḍamānena kṛtvātha pūrvavatṣoḍaśāśrakam

'''14.26''' śeṣaṃ vedāśramevoktaṃ evaṃbhūtākṛtistu yaḥ stambhaḥ sa citrakhaṇḍākhyaḥ vajrakhaṇḍaṃ tataḥ śṛṇu

'''14.27''' sa eva madhyavasvaśro vedāśro vajrakhaṇḍakaḥ stambhordhve tu dvidaṇḍena caturaśrīkṛte tataḥ

'''14.28''' tanmānāttadadhaḥ kuryādvedāśraṃ navadhā bhavet vedāśraṃ sarvamāyāmaṃ ramyakhaṇḍaḥ sa nāmataḥ

'''14.29''' stambhāyāmasamaste tu pañcabhāgavibhājite tanmūle caturaśraṃ tu dvibhāgena prakalpayet

'''14.30''' śeṣāṃśe kalaśopetaḥ stambhaḥ syāccārukhaṇḍakaḥ mūle dvidaṇḍamātreṇa padmāsanasamanvitaḥ

'''14.31''' vṛttaṃ vā caturaśraṃ vā kumbhamaṇḍisamanvitaḥ skandakāntākhyapādaḥ syād aṣṭāśraṃ vṛttameva vā

'''14.32''' pādāyāmatribhāgena mūle siṃhasamāyutaḥ siṃhapāda iti proktaḥ kumbhānāṃ lakṣaṇaṃ śṛṇu

'''14.33''' adhyardhamānapādena pādonadviguṇaṃ tu vā dviguṇenāthavā pādakumbhotsedhaṃ vidhīyate

'''14.34''' āptotsedhe navāṃśe tu vyomāṃśena dṛgunnatim kumbhonnataṃ caturbhiḥ syāt kuṇṭhamekena kārayet

'''14.35''' āsyamekena kartavyaṃ padmamekaṃ tato bhavet aṃśena vṛttagrīvā ca dṛkkarṇau pādavistarau

'''14.36''' hīnau tau pādamūlena tulyavistārataḥ smṛtau dviguṇaṃ kumbhavistāramadhyardhaṃ vaktravistaram

'''14.37''' caturdaṇḍaṃ tridaṇḍaṃ vā maṇḍivistāramucyate tasyotsedhaṃ tripādaṃ syāttattriyaṃśairvibhājayet

'''14.38''' tasyotsedhakamaṃśena tatra vetraṃ tadaṃśakam maṇḍikāṃ cāṃśataḥ kuryānmūlādhāraṃ tu pādavat

'''14.39''' tridhā nāgadalābhaṃ vā vīrakāntaṃ tadūrdhvataḥ caturaṃśaṃ daṇḍavistīrṇaṃ tripādenocchritaṃ bhavet

'''14.40''' hīne tattatra daṇḍena skandhordhvaṃ cordhvato’mbujam mūlastambhasya cādhastāddaṇḍenāyatavistaram

'''14.41''' śrīkaraṃ vṛttapādānāṃ sarveṣāṃ ca vidhīyate ṣoḍaśāśraṃ tadaśrāṇāṃ candrakāntamiti smṛtam

'''14.42''' aṣṭāśraṃ caturaśrāṇāṃ saumukhyamiti kīrtitam atibhāreṣu stambheṣu priyadarśanameva hi

'''14.43''' potikā daṇḍavistārā vistārasamamucchritā pañcadaṇḍāyatā śreṣṭhā sarvāṅgastambhasaṃyutā

'''14.44''' caturdaṇḍāyatā caiva tripādotsedhasaṃyutā madhyameti samuddiṣṭā kumbhastambheṣu yojitā

'''14.45''' tridaṇḍāyatasaṃyuktā daṇḍārdhoccasamanvitā kumbhamaṇḍīvihīneṣu yojanīyā viśeṣataḥ

'''14.46''' samaṃ tripādamardhaṃ vā karkarīkaṇṭhanirgatiḥ vistārasya caturbhāge taraṅgaṃ parikalpayet

'''14.47''' gṛhītoccatribhāgena tadūrdhve paṭṭikā bhavet pādavargaḥ samuddiṣṭaḥ prastaraṃ cādhunocyate

'''14.48''' prastaraṃ cottarādi syāttadviṣkambhaṃ tu pādavat utsedhaṃ trividhaṃ proktamuttamaṃ tu samaṃ bhavet

'''14.49''' tripādaṃ madhyamaṃ proktamadhamaṃ cārdhamucyate stambhāgrasyāgnibhāgaikaṃ vedabhāgaikameva vā

'''14.50''' caturaśraṃ samaṃ caiva vājanaṃ cottaropari tadūrdhve daṇḍamānena bhūtamālāṃ prakalpayet

'''14.51''' nirgamaṃ ca tathā proktaṃ tadūrdhve paṭṭikā bhavet tāṃ ca vājanavatkuryāttasyordhve syātkapotakam

'''14.52''' tad dvidaṇḍapramāṇena tridaṇḍenāthavā bhavet tatsamaṃ nirgamaṃ proktaṃ lambanaṃ cārdhadaṇḍataḥ

'''14.53''' śeṣe tu śarabhāgena bhājitāṃśena paṭṭikā ekena kaṇṭhamākhyātaṃ dvābhyāṃ prastarameva hi

'''14.54''' tadūrdhve paṭṭikāṃ kuryādekāṃśena vicakṣaṇaḥ kapota nāsikāyuktaṃ tattārasyārdhadaṇḍataḥ

'''14.55''' dvidaṇḍe navakoṇeṣu patravallīsamāyutam evaṃ prastaramākhyātaṃ devadhāmnāṃ viśeṣataḥ

'''14.56''' athavānyaprakāreṇa prastaraṃ teṣu kalpayet utsedhe tatra viṃśāṃśe bhavedagnyaṃśamuttaram

'''14.57''' vyomāṃśaṃ vājanaṃ proktaṃ triyaṃśaṃ syādvasantakam ūrdhvavājanamaṃśena kapotaṃ saptabhirbhavet

'''14.58''' āliṅgamekabhāgena bhavedantaritaṃ tathā aṃśābhyāṃ tu pratiṃ kuryādvyomāṃśaṃ vājanaṃ tataḥ

'''14.59''' evaṃ vā tatprakartavyaṃ toraṇaṃ vakṣyate’dhunā pārśvayoḥ pṛṣṭhataścāpi paṅkimadhyeṣu vā tataḥ

'''14.60''' prateruttarasīmāntaṃ toraṇocchrayamucyate tadvistāraṃ tadardhaṃ syādāyāme pañcabhājite

'''14.61''' makaraṃ tu triyaṃśena śeṣaṃ pādaṃ prakalpayet pādāntarārdhavistāraṃ toraṇasya prakalpayet

'''14.62''' sarvalakṣaṇasaṃyuktaṃ sarvālaṃkārasaṃyutam kārayettoraṇaṃ dhīmāṃsteṣu devān prakalpayet

'''14.63''' brahmaviṣṇusamāyuktaṃ pṛṣṭhe liṅgasthamīśvaram viṣṇuṃ vā tatra kurvīta śubhaṃ vā paścimānane

'''14.64''' dakṣiṇe dakṣiṇāmūrtiṃ brahmāṇaṃ ca taduttare evaṃ toraṇamuddiṣṭaṃ galaṃ syātprastaropari

'''14.65''' tanmūle vedikāṃ kuryāttasya lakṣaṇamucyate tridaṇḍaṃ vājanaṃ tu syādutsedhaṃ syād dvidaṇḍataḥ

'''14.66''' rudrabhāgayute tatra galaṃ syāttribhiraṃśakaiḥ ekena paṭṭikāṃ kuryātpotikāṃ ca tathaiva hi

'''14.67''' ūrdhve vyomāṃśataḥ kampaṃ śarāṃśe vedivistare vedāṃśaṃ grīvavistāraṃ daṇḍārdhenottaraṃ tataḥ

'''14.68''' vājanaṃ tattribhāgaṃ syādutsedhaṃ syād dvidaṇḍataḥ tadardhaṃ haṃsapādī syādathavā vedivistaram

'''14.69''' prāsādasyāṣṭabhāgaikahīnaṃ vāpi prakalpayet veditāracaturbhāgaṃ galavistṛtamucyate

'''14.70''' veditārarasāṃśaikamagnyaṃśaikamathāpi vā galamūlanāsikāpādanirgamaṃ ca prakalpayet

'''14.71''' niryūhasya samaṃ vātha śaradaṇḍamathāpi vā sārdhacatvāri daṇḍaṃ vā pādayormadhyamaṃ smṛtam

'''14.72''' tridaṇḍaṃ vā dvidaṇḍaṃ vā tadguhāveśamucyate tatpādottuṅgamānaṃ tu haṃsamālāvasānakam

'''14.73''' daṇḍatriyaṃśanetrāṃśaṃ tadvistāraṃ prakīrtitam sarvāṃśaṃ śobhanāyuktaṃ pūrvavatkārayetsudhīḥ

'''14.74''' tatra devāṃścaturdikṣu tatastoraṇamadhyagān pūrve śakraṃ gajārūḍhaṃ skandaṃ vāpi prakalpayet

'''14.75''' īśānaṃ dakṣiṇe kuryāllakulīśvarameva ca paścime rudrarūpaṃ vā nārasiṃhamathāpi ca

'''14.76''' uttare brahmarūpaṃ syādrudrarūpamathāpi vā evaṃ grīvaṃ samākhyātaṃ śikharaṃ cādhunocyate

'''14.77''' śikharasyāpi vistāraṃ tadvadvedī samucyate vedyāstāraṃ tribhāgaikaṃ mahānāsyāstu vistaram

'''14.78''' vistārasya tripādena tasyotsedhaṃ prakalpayet tatpārśvadvayavistāraṃ grīvapādavadiṣyate

'''14.79''' śeṣaṃ syādavagāḍhaṃ tu dvidaṇḍaṃ tu guhā bhavet vistārārdhasamaṃ tasya śiraso mānamiṣyate

'''14.80''' kinnarīvaktrasaṃyuktaṃ nānāvallīvicitritam siṃhavyālagajārūḍhairbhūtādyaistu samanvitam

'''14.81''' paridhiṃ kārayeddhīmānmahānāsyā viśeṣataḥ catasraśca mahānāsyaścaturdikṣu vyavasthitaḥ

'''14.82''' antarāle’thavā kuryādanunāsīcatuṣṭayam śikharaṃ tu tataḥ kuryānnāgarādiṣu yogyakam

'''14.83''' ānupūrvyātkṛśaṃ kuryādyāvatstūpyaṃ tathaiva ca pālimagnyaṃśakaiḥ kuryādveditāre śarāṃśake

'''14.84''' pālitārasya bhūtāṃśe guṇāṃśaṃ padmavistṛtam padmatāratriyaṃśaikaṃ kumbhatāramiti smṛtam

'''14.85''' tadvistāraśarāṃśaikaṃ kandharasya tu vistaram kumbhatāratribhāgaikaṃ pālyāstārasya vistṛtam

'''14.86''' tadvistāraguṇāṃśaikaṃ kaṇṭhatāramiti smṛtam mukulasyāpi vistāraṃ kaṇṭhatāravadiṣyate

'''14.87''' stūpyutsedhaṃ tataḥ kuryāddvātriṃśāṃśavibhājitam abdhyaṃśamambujotsedhamadhyardhaṃ skandhamucyate

'''14.88''' adhyardhādharapaṭṭī syātsaptabhāgaṃ ghaṭocchrayam adhyardhaṃ mūlapadmaṃ syād grīvotsedhaṃ ṣaḍaṃśataḥ

'''14.89''' ardhāṃśaṃ kampanīvraṃ syādvalkamekāṃśato bhavet ṣaḍaṃśaṃ mukulotsedhamānupūrvyātkṛśaṃ bhavet

'''14.90''' sauvarṇaṃ rājataṃ vāpi tāmrajaṃ trapujaṃ tu vā prāsādaśikhare kumbhe vidhānenaiva kārayet

'''14.91''' paittalaṃ vātha saudhaṃ vā mṛṇmayaṃ pakvameva vā prāsāda iti nirdiṣṭaḥ ṣaḍvargeṇa samanvitaḥ

'''14.92''' tricaturvargasaṃyuktaṃ yadanyaddevatāgṛham devadhiṣṇyaṃ taduddiṣṭaṃ devaprāsādavad bhavet

'''14.93''' sabhā nāma tu yaddhāma pañcavargayutaṃ bhavet vistāradviguṇāyāmaṃ pādonadviguṇaṃ tu vā

'''14.94''' ardhādhikaṃ vā kartavyaṃ pādādhikamathāpi vā sakalānāṃ tu tatproktamavyakta ubhayorapi

===Kapitel 15===

''pañcadaśaḥ paṭalaḥ · mūrdheṣṭakāvidhiḥ''

'''15.1''' mūrdheṣṭakāvidhiṃ vakṣye prāsādānāṃ janārdana mūrdheṣṭakāścatasrastu tāsāṃ lakṣaṇamucyate

'''15.2''' śailadhāmni śilā tadvaccaiṣṭake ceṣṭakā bhavet iṣṭakaiva bhavenmiśre śilā syātṣoḍaśāṅgulā

'''15.3''' tadardhatārasaṃyuktā tasyārdhaghanasaṃyutā iṣṭakārkāṅgulāyāmā kauśikāṅgulavistṛtā

'''15.4''' tadardhaghanasaṃyuktā dvayoścārdhāṅgulakṣayāt kārśyamagre prayuñjīta tena jñātvāgramūlakam

'''15.5''' kṣālayitvāmbhasā samyakprokṣayedastramuccaran stūpidaṇḍena saṃyuktamadhivāsaṃ tu kārayet

'''15.6''' stūpidaṇḍocitā vṛkṣāḥ khadirāsanaśiṃśapāḥ padma madhūkavṛkṣau ca tintriṇī ca namerukaḥ

'''15.7''' eteṣvekaṃ samādāya kārayellakṣaṇānvitam prāsādapādatulyoccaṃ tadviṣkambhasamanvitam

'''15.8''' tasya mūle yugāśraṃ syāttattuṅgaguṇabhāgataḥ tadūrdhveṃ’śadvayenāpi vṛttaṃ kuryātkṛśaṃ yathā

'''15.9''' agre vyomāṅgulaṃ nāhamevaṃ kṛtvātha daṇḍakam śikhipāde prayuñjīta tanmūlatriguṇāyate

'''15.10''' vistārārdhaghanopete sudṛḍhaṃ susamaṃ yathā lohena vātha kurvīta stūpidaṇḍaṃ viśeṣataḥ

'''15.11''' taṃ prakṣālyeṣṭakābhiśca vinyasedakṣarāṇi ca yakārādivakārāntaṃ catasṛṣviṣṭakāsvapi

'''15.12''' raktena dhāturāgeṇa piṣṭenaiva sitena vā haṃkāraṃ stūpidaṇḍe tu vinyasettu samāhitaḥ

'''15.13''' puṇyāhaṃ vācayitvā tu bandhayetteṣu kautukam sauvarṇaṃ rājataṃ vāpi kṣaumaṃ kārpāsakaṃ tu vā

'''15.14''' maṇḍapaṃ cādhivāsārthaṃ kārayeddeśikottamaḥ prāsādāgre’tha saumye vā śāṃkare vahnideśake

'''15.15''' ṣoḍaśastambhasaṃyuktaṃ dvādaśastambhameva vā navahastasamopetaṃ saptahastamathāpi vā

'''15.16''' paṅkitrayasamāyuktaṃ paṅkimānasamucchrayam kṛtvā navapadaṃ tatra tanmadhye vedikā bhavet

'''15.17''' tālamātrasamutsedhā darpaṇodarasaṃnibhā vedikāyāścaturdikṣu kuṇḍe vā sthaṇḍile’pi vā

'''15.18''' homaṃ kuryādvidhānena proktalakṣaṇasaṃyute caturaśrāṇi kuṇḍāni sarvāṇi parikalpayet

'''15.19''' vitānenordhvamācchādya darbhamālā samanvitam āśādhvajasamopetaṃ catustoraṇabhūṣitam

'''15.20''' caturdvāra samāyuktamaṣṭamaṅgala saṃyutam maṅgalāṅkurasaṃyuktaṃ mālāpallavaśobhitam

'''15.21''' gomayālepitaṃ kṛtvā maṇḍapaṃ taṃ manoharam sitapuṣpākṣatopetaṃ puṇyāhaṃ vācayettataḥ

'''15.22''' vāstuhomaṃ ca kurvīta śāstradṛṣṭena karmaṇā tanmadhye sthaṇḍilaṃ kṛtvā śālibhirvimalaistataḥ

'''15.23''' padmamaṣṭadalaṃ kṛtvā paristīrya kuśaistataḥ śakticakraṃ samabhyarcya tanmadhye nūtanena tu

'''15.24''' vāsasāsanamāstīrya daṇḍaṃ tasyopari nyaset daṇḍordhve kūrcamābadhya veṣṭayetpuṣpamālayā

'''15.25''' vastreṇācchādayitvātha tatpārśve ceṣṭakāḥ kramāt ūrdhvākṣarā yathā sarvāḥ prāgagrāstā niveśayet

'''15.26''' evaṃ catasro vinyasya devatāstāsu ca kramāt tattadakṣaravācyāstu yajedgandhādibhirbudhaḥ

'''15.27''' iṣṭakāśca tataḥ sarvā vastreṇāveṣṭayetsudhīḥ daṇḍe ceśaṃ samabhyarcya sāntaṃ bījaṃ samuccaran

'''15.28''' sthāpayecca tataḥ kumbhānmadhyādīśāntakaṃ yathā pradhānaghaṭasaṃyuktānsasūtrāṃstoyapūritān

'''15.29''' sakūrcānsāpidhānāṃśca gandhacandanacarcitān veṣṭitānnavavastraistu ratnakāñcanasaṃyutān

'''15.30''' teṣu madhye śivaṃ ceṣṭvā dikpālānparito yajet tato homaḥ prakartavyo dikṣu pūrvādiṣu kramāt

'''15.31''' agnimādhāya sarvatra kṛtvā cāgnimukhaṃ tataḥ puruṣaṃ pūrvakuṇḍe ca dakṣiṇe ghorameva ca

'''15.32''' sadyaṃ paścimakuṇḍe tu vāmadevaṃ tathottare gandhādyaiḥ sarvamabhyarcya tattanmantramanusmaran

'''15.33''' samidājyacarūṃścaiva tilaṃ sarṣapameva ca lājāṃśca taṇḍulāṃścaiva pratyekaṃ tu daśāhutīḥ

'''15.34''' sāṅgena mūlamantreṇa samidādikrameṇa tu hutvā sparśāhutiṃ kīlaṃ spṛṣṭvā spṛṣṭvā tu homayet

'''15.35''' ājyena ghoramantreṇa sarvatrāpi śatāhutīḥ daśāhutyavasāne tu saṃsparśaśca prakīrtitaḥ

'''15.36''' dravyānte vyāhṛtiṃ hutvā havirdadyāttataḥ kramāt tatra kumbhasthitānāṃ tu devatānāṃ viśeṣataḥ

'''15.37''' evaṃ kṛtvādhivāsaṃ tu rātrau prātaḥ samutthitaḥ kṛtanityo gurustatra hotṛbhistantravittamaiḥ

'''15.38''' pūrṇāṃ sarveṣu kuṇḍeṣu vahnimabhyarcya homayet sarvātmānaṃ samuccārya soṣṇīṣaḥ sottarīyakaḥ

'''15.39''' sumuhūrte sulagne tu sarvadoṣavivarjite pūjito yajamānena dhanadhānyādibhiḥ kramāt

'''15.40''' tādṛśairhotṛdaivajñaśilpibhiḥ saha deśikaḥ iṣṭakā kīlakumbhāṃśca pūjayitvā yathākramam

'''15.41''' utthāpyātheṣṭakāḥ samyagyajamānādibhiḥ sudhīḥ śaṅkhadundubhinirghoṣagītanṛttasamanvitam

'''15.42''' pradakṣiṇaṃ tataḥ kṛtvā prāsāde deśikottamaḥ āruhyopari tanmūrdhni randhraṃ nīrandhrakaṃ tathā

'''15.43''' iṣṭakāḥ śilpinā sārdhaṃ tattanmantramanusmaran saṃsthāpyopari ratnāni vinyasenmantravittamaḥ

'''15.44''' madhye vinyasya māṇikyamindranīlaṃ tu pūrvake āgneyyāṃ tu pravālaṃ ca yāmye marakataṃ nyaset

'''15.45''' vairḍūryaṃ nairṛte deśe sphaṭikaṃ paścime tathā muktāṃ tu vāyudigbhāge vajraṃ saumye ca vinyaset

'''15.46''' śāṃkare padmarāgaṃ ca tatasteṣu navasvapi salohāni ca bījāni madhye sarvāṇi vinyaset

'''15.47''' manonmanīṃ tu saṃpūjya vāmādyāśca tato yajet tadūrdhve kīlakaṃ nyasya śikharārdhapramāṇataḥ

'''15.48''' tanmantraṃ tu samuccārya tataḥ kṛtvā tu niścalam sthāpitāṃstu tataḥ kumbhānsamānīya yathākramam

'''15.49''' tatkīle paritaścāpi prokṣayetsvasvamantrataḥ stūpyaṃśamūrdhvato hitvā śeṣaṃ tatra prabandhayet

'''15.50''' evaṃ yaḥ kurute martyaḥ sarvānkāmānavāpnuyāt dehānte gaṇapo bhūtvā śivaloke mahīyate

===Kapitel 16===

''ṣoḍaśaḥ paṭalaḥ · piṇḍikālakṣaṇam''

'''16.1''' piṇḍikālakṣaṇaṃ vakṣye tacchṛṇu tvaṃ samāhitaḥ liṅgāyāmasamaṃ tāraṃ piṇḍikāyā varottamam

'''16.2''' adhamasyādhamaṃ cāpi liṅgotsedhārdhavistṛtam tayormadhye’ṣṭabhāge tu pīṭhavyāsā navoditāḥ

'''16.3''' viṣkambhatriguṇaṃ tāramathavā tatra kalpayet liṅgamūlasthakarṇena dviguṇaṃ kanyasaṃ bhavet

'''16.4''' pādādhikaṃ tu madhyaṃ syācchreṣṭhamardhādhikaṃ bhavet kṛtvā navapadaṃ garbhaṃ pīṭhamekena vā bhavet

'''16.5''' utsedhaṃ vaiṣṇavāṃśena samaṃ pīṭhasya kalpayet bāṇaliṅgādiliṅgānāṃ purāṇānāmathocyate

'''16.6''' pūjāṃśamadhyagaṃ nāhaṃ kṛtvā ṣoḍaśabhāgikam teṣu pañcāṃśakaistasya viṣkambhaṃ tu prakalpayet

'''16.7''' tena kṛtvātha vedāśraṃ tatkaṇṭhaṃ dviguṇaṃ bhavet pīṭhatārasamutsedhaṃ tatsamaṃ parikīrtitam

'''16.8''' athavā dvyaṃśake tasminnekabhāgādhikocchrayam evaṃ vistāramuddiṣṭaṃ pīṭhānāmucchrayaṃ tathā

'''16.9''' caturaśrātha vṛttā ca piṇḍikā dvividhā matā bhadrā yakṣī ca vajrī ca śrīkarā vijayeti ca

'''16.10''' caturaśrasya bhedāḥ syurvṛttabhedamataḥ śṛṇu padmaṃ cakraṃ tathā vedī saumyā ramyā ca pañcamī

'''16.11''' pīṭhotsedhe vikārāṃśe vyomāṃśaṃ pādukaṃ bhavet vedāṃśaṃ jagatī tasya kairavaṃ vahnibhāgaśaḥ

'''16.12''' paṭṭikaikena kartavyā kaṇṭhaṃ tasya guṇāṃśakam tadūrdhve kampamekena tasyordhve paṭṭikā bhavet

'''16.13''' dvābhyāṃ tadūrdhve cāṃśena ghṛtavāri prakalpayet evaṃ bhadraṃ samākhyātam yakṣapīṭhaṃ tataḥ śṛṇu

'''16.14''' utsedhaṃ pūrvavatkṛtvā tvadhyardhaṃ pādukaṃ bhavet jagatyagnyaṃśakairūrdhve padmamardhādhikaṃ trayam

'''16.15''' tadūrdhve kampamekāṃśaṃ dvābhyāṃ kairavamucyate tasyordhve kampamekāṃśamūrdhve padmaṃ tribhirbhavet

'''16.16''' ardhāṃśe paṭṭikābandhamardhāṃśe ghṛtavāriṇam yakṣapīṭhamiti proktam vajrapīṭhamatha śṛṇu

'''16.17''' pīṭhotsedhaṃ tu vibhajetpañcaviṃśatibhāgataḥ ekāṃśaṃ pādukaṃ viddhi padmamekena kārayet

'''16.18''' tadūrdhvaikāṃśataḥ kampaṃ dharaṇīmāśramāṃśakaiḥ ardhādhikatribhāgena padmamūrdhve tu kārayet

'''16.19''' ekena kampamekena padmamūrdhve prakalpayet agnyaṃśaṃ kumudaṃ vṛttaṃ tadūrdhve’mbujamaṃśataḥ

'''16.20''' kampamekena kartavyaṃ kaṇṭhaṃ dvābhyāṃ prakalpayet ekena kampamūrdhve’dhaḥ padmamekāṃśato bhavet

'''16.21''' dvābhyāṃ cātha māhāpaṭṭī tadūrdhvaikāṃśavājanam ardhena ghṛtavāri syādvajrapīṭha prakīrtitam

'''16.22''' trisaptāṃśe tadutsedhe khabhāgaṃ pādukaṃ bhavet jagatīdalaṃ caturbhiḥ syātkaṇṭhamekena kārayet

'''16.23''' tadūrdhve kampamekena kumbhamagnyaṃśakaistathā padmamekaṃ tadūrdhve tu kampamekaṃ tadūrdhvataḥ

'''16.24''' galaṃ tu netrabhāgaṃ syātkampamekāṃśamucyate padmamekena kartavyaṃ mahāpaṭṭī tu dvyaṃśakā

'''16.25''' padmamekāṃśamuddiṣṭaṃ tadūrdhve paṭṭikāṃśataḥ ghṛtavāri tathāṃśena kuryācchrīkaramucyate

'''16.26''' utsedhe ṣoḍaśāṃśe tu tatraikāṃśena pādukam tadūrdhve padmamardhena kampamardhena kārayet

'''16.27''' triyaṃśājjagatīṃ kuryātpadmaṃ bhāgadvayena tu kaṇṭhamardhena kartavyaṃ padmamardhāṃśato bhavet

'''16.28''' kumbhaṃ kuryād dvibhāgena padmamardhāṃśato bhavet kampamardhena kartavyamadhyardhaṃ kaṇṭhamucyate

'''16.29''' ardhena paṭṭikāṃ kuryādardhāṃśaṃ padmameva ca adhyardhena mahāpaṭṭīmaṃśena ghṛtavāriṇam

'''16.30''' evaṃ vijayamākhyātaṃ pañcamaṃ caturaśrake padmapīṭhamatho vakṣye vṛttasya prathamaṃ tu yat

'''16.31''' tadutsedhe vikārāṃśe dvābhyāṃ mūle tu paṭṭikā tadūrdhve pañcabhiḥ padmaṃ vṛttamaṃśadvayena tu

'''16.32''' ūrdhve padmaṃ caturbhāgairdvābhyāmūrdhve tu paṭṭikā tadūrdhve ghṛtavārī ca bhāgenaikena kārayet

'''16.33''' evaṃ padmaṃ samākhyātam cakrapīṭhamataḥ śṛṇu aṣṭādaśāṃśake tasmindvābhyāṃ mūle tu paṭṭikā

'''16.34''' tribhirūrdhve’mbujaṃ kuryātkampamekāṃśato bhavet ṣaḍbhirūrdhve galaṃ kuryāttadūrdhve kampamekataḥ

'''16.35''' ūrdhve padmaṃ tribhiścaiva sārdhenaikena paṭṭikā ardhena ghṛtavārī syād vedipīṭhaṃ tataḥ śṛṇu

'''16.36''' utsedhe tu vikārāṃśe bhāgenopānamucyate padmatuṇḍaṃ dvibhāgena kampamekena kārayet

'''16.37''' saptāṃśaṃ kaṇṭhamuddiṣṭaṃ tadūrdhve kampamaṃśataḥ padmamūrdhveṃ’śataḥ proktamadhyardhena tu paṭṭikā

'''16.38''' tadūrdhve’rdhāṃśataḥ padmaṃ kampamardhena kārayet ardhena ghṛtavārī syāt saumyapīṭhamatha śṛṇu

'''16.39''' utsedhe manubhāge tu dvābhyāṃ mūle tu paṭṭikā kampamekena kartavyaṃ tadūrdhve kaṇṭhamaṣṭabhiḥ

'''16.40''' tadūrdhve kampamardhena sārdhenaikena paṭṭikā tadūrdhve ghṛtavārī ca bhāgenaikena kalpayet

'''16.41''' ramyapīṭhamatho vakṣye ṣoḍaśāṃśe tadunnate ekena pādukaṃ kuryāt padmatuṇḍaṃ dviyaṃśataḥ

'''16.42''' kampamaṃśena kartavyaṃ kaṇṭhaṃ tasya dvibhāgataḥ ardhena kampamardhena padmaṃ vṛttaṃ tadūrdhvataḥ

'''16.43''' kumudaṃ syād dvibhāgena padmamardhāṃśatastataḥ paṭṭikārdhena kartavyā dvābhyāṃ ca galameva hi

'''16.44''' ekāṃśaṃ kampapadme tu hyadhyardhaṃ prastaraṃ tathā āliṅgāntaritāvaṃśād ghṛtavāryardhameva ca

'''16.45''' evaṃ ramyaṃ samākhyātaṃ liṅgasya sakalaṃ vinā sarveṣāmapi pīṭhānāṃ sāmānyaṃ lakṣaṇaṃ śṛṇu

'''16.46''' mūlādagre’ṣṭabhāgaikatārahīnaṃ prakalpayet ukteṣveteṣu pīṭheṣu daśasvapi janārdana

'''16.47''' aṅgānāṃ kalpitānāṃ tu praveśaṃ nirgamaṃ tathā tattadaṃśe tu turyāṃśairardhairvātha triyaṃśakaiḥ

'''16.48''' samairvā kalpayetteṣāṃ kalpayennālamuttare vistārasya tribhāgaikaṃ nālamūlasya vistaram

'''16.49''' tatsamaṃ tasya dairghyaṃ syātkrameṇa kṛśatā bhavet mūlādagrasya vistāraṃ tattribhāgena kalpayet

'''16.50''' tanmadhye jalamārgaḥ syāttadvistāratribhāgataḥ ghṛtavārisamaṃ khātaṃ nirgame kiñcidānatam

'''16.51''' evaṃ lakṣaṇamuddiṣṭaṃ samaṃ śaileṣṭakādiṣu ekayā śilayā kartuṃ pīṭhikā cenna śakyate

'''16.52''' dvābhyāṃ tribhiścaturbhirvā śilārūpaiḥ prakalpayet ūrdhvabhāgena kartavyaḥ sandhistatra kathaṃcana

'''16.53''' bhadrādīnāṃ tu sarveṣāṃ phalabhedamatha śṛṇu bhadrā yogapradā jñeyā yakṣī kṣemaṃkarī tathā

'''16.54''' vajrī puṣṭipradā jñeyā śrīkarā śrīpradā bhavet jayadā vijayā caiva padmaṃ cābhīṣṭasiddhidam

'''16.45b''' cakrā śāntikarī sā syādvedī putrasamṛddhidā āyuḥpradā tathā saumyā ramyārogyapradā smṛtā

'''16.56''' evaṃ phalaviśeṣeṇa kuryātpīṭhaṃ yathecchayā

===Kapitel 17===

''saptadaśaḥ paṭalaḥ · garbhanyāsaḥ''

'''17.1''' atha vakṣyāmi te samyaggarbhanyāsavidhikramam prāsāde maṇṭape vātha gopure vā sabhādiṣu

'''17.2''' vinyasetsaṃpade garbhabhājanaṃ vidhivatsudhīḥ sarvatrādyeṣṭakordhve tu garbhasthānamudāhṛtam

'''17.3''' prāsāde pādukordhve tu paṭṭikopari vinyaset dvārasya dakṣiṇe pārśve stambhamūle’thavā punaḥ

'''17.4''' maṇṭapeṣu ca sarveṣu dakṣiṇe stambhamūlake gopure dvārapārśve tu dakṣiṇe bhittimūlake

'''17.5''' sabhāyāmapi tatpādamūle tu pariyojayet yadyadgarbhasamāyuktaṃ tattatsaṃpatkaraṃ nṛṇām

'''17.6''' tadarthaṃ bhājanaṃ kuryātsarvalakṣaṇasaṃyutam sauvarṇaṃ rājataṃ vāpi tāmrajaṃ kāṃsyajaṃ tu vā

'''17.7''' pādamūlasamaṃ tāraṃ bhājanasya prakalpayet ṣaṭsaptāṣṭāṅgulairvāpi hīnamadhyottamāni tu

'''17.8''' caturaśramaṃ kuryādvistāreṇa samocchrayam caturbhāgaikahīnaṃ vā tribhāgaikavihīnakam

'''17.9''' tattadagnyaṃśamānena pidhānaṃ tasya kalpayet yavamātraṃ tu vistāraṃ tayorbhittigataṃ bhavet

'''17.10''' pañcaviṃśatibhiḥ koṣṭhairnavabhirvā samanvitam koṣṭhabhittisamutsedhaṃ bāhyātpādavihīnakam

'''17.11''' tadvistāraṃ tadardhaṃ syātsarvadoṣavivarjitam kṛtvā prakṣālya tatpaścādabhyukṣya ca kuśāmbhasā

'''17.12''' prāsādāgre’thavā pārśvadvayoḥ kṛtvā tu maṇṭapam pañcaṣaṭsaptahastaistu kanyasādikrameṇa tu

'''17.13''' tanmadhye vedikāṃ kṛtvā ratnimātrasamucchritām caturdikṣu ca kuṇḍāni caturaśrāṇi kalpayet

'''17.14''' ekaṃ vā prāci kartavyaṃ ratnimātrapramāṇataḥ sthaṇḍilaṃ vāpi sarvatra homārthaṃ parikalpayet

'''17.15''' gomayenopalipyātha maṇḍapaṃ vedikuṇḍayuk darbhamālādibhiḥ sarvairalaṃkṛtya yathāvidhi

'''17.16''' puṇyāhaṃ vācayitvātha kalpayedvedikopari śālibhirvimalaistatra sthaṇḍilaṃ tu yathāvidhi

'''17.17''' tatra padmaṃ samālikhya sāṣṭapatraṃ sakarṇikam tanmadhye garbhaphelāṃ ca vinyaseddhṛdayena tu

'''17.18''' teṣu koṣṭheṣu sarveṣu madhye kūṭākṣaraṃ nyaset yakārādihakārāntaṃ parito’ṣṭasu vinyaset

'''17.19''' tadbāhye pūrvataścāpi svarānṣoḍaśa vinyaset tattadakṣaramabhyarcya praṇavādinamo’ntakaiḥ

'''17.20''' mantrairmadhyādi sarvatra gandhapuṣpādibhiḥ kramāt madhye phaṇīndraṃ haimaṃ tu vinyasedatha dikṣu ca

'''17.21''' vajrādiśūlaparyantamastrajālaṃ ca vinyaset māṇikyamatha tanmadhye pūrve marakataṃ nyaset

'''17.22''' indranīlaṃ tu yāmye tu sphaṭikaṃ paścime tathā vajraṃ tu saumyadigbhāge vairḍūryaṃ vahnigocare

'''17.23''' muktāṃ nirṛtidigbhāge puṣyarāgaṃ tu mārute nyasetpravālamaiśānyāṃ punasteṣvapi ca kramāt

'''17.24''' pāradaṃ dhāturāgaṃ ca gairikaṃ ca manaḥśilām añjanaṃ haritālaṃ ca mākṣikaṃ cābhrakaṃ tathā

'''17.25''' saurāṣṭraṃ ca kramānnyasya pūrvavaddeśikottamaḥ kāñcanaṃ rajataṃ tāmramārakūṭaṃ tathā trapum

'''17.26''' kāṃsyaṃ sīsamayaścaiva pittalaṃ ca tathā nyaset evaṃ navasu vinyasya koṣṭheṣvatha ca tadbahiḥ

'''17.27''' śālinīvāravarakapriyaṅgutilasarṣapān yavaveṇukulatthāṃśca niṣpāvaṃ tuvarīṃ tathā

'''17.28''' godhūmamāṣamudgāṃśca śyāmākaṃ ṣaṣṭikaṃ tathā pūrvādiṣu kramānnyasya padmamutpalameva ca

'''17.29''' vidārīṃ musalīṃ caiva mustahrīberameva ca uśīraṃ ca kuśeśaṃ ca dikṣu pūrvādito nyaset

'''17.30''' viṣṇukrāntiṃ sahādevīṃ gokṣuraṃ bilvameva ca śamīpatramapāmārgamindravallīṃ vidikṣu ca

'''17.31''' parvate ca nadītīre valmīke karkaṭāyane vṛṣaśṛṅgakṣate caiva gajadantakṣate tathā

'''17.32''' sasyakṣetre taṭāke vā mṛdaṃ saṃgṛhya ca sthale prāgādiṣvatha bāhyeṣu dikṣu koṣṭheṣu vinyaset

'''17.33''' evaṃ vinyasya saṃpūjya koṣṭhoktaistattadakṣaraiḥ pidhāya ca vidhānena phaṇīndraṃ śeṣamarcayet

'''17.34''' tato homaṃ prakurvīta tataḥ prasthāpitasya tu devasya mūlamantreṇa samiddhomaṃ prakalpayet

'''17.35''' ājyaṃ caruṃ tathā lājaṃ tilaṃ sarṣapameva ca yavāṃśca tattadaṅgaiśca hṛdayādyairanukramāt

'''17.36''' homayecchatamardhaṃ vā tadardhaṃ vāpi mantravit sarvadravyāvasāne tu tattanmantreṇa saṃspṛśet

'''17.37''' garbhabhāṇḍaṃ tataścaiva phaṇīndrāya nivedayet haviḥ sarvopadaṃśāḍhyaṃ pūrṇāṃ mūlena homayet

'''17.38''' sumuhūrte sulagne tu deśikaḥ śāntamānasaḥ sarvātodyasamāyuktaṃ nṛttageyasamāyutam

'''17.39''' garbhabhājanamutthāpya proktadeśe ca gahvare vinyasenmūlamantreṇa tasya saṃvaraṇādikam

'''17.40''' śilpinā kārayetkarma yathā dṛḍhataraṃ bhavet alābhe garbhaphelāyāḥ śaṅkhe vā mauktike śubhe

'''17.41''' daṇḍe vā bhājane sarvaṃ vastu nikṣipya caikataḥ anyatsarvaṃ yathāpūrvaṃ kṛtvā tadvinyasetsudhīḥ

'''17.42''' dakṣiṇāṃ gurave dadyācchilpine ca svaśaktitaḥ evaṃ vinyasya tadgarbhaṃ sarvasiddhimavāpnuyāt

===Kapitel 18===

''aṣṭādaśaḥ paṭalaḥ · liṅgapratiṣṭhāvidhiḥ''

'''18.1''' liṅgapratiṣṭhāṃ vakṣyāmi bhogamokṣapradāṃ nṛṇām ādimadhyāntanirmuktaḥ svabhāvavimalaḥ prabhuḥ

'''18.2''' sarvajñaḥ paripūrṇaśca śivo jñeyaḥ śivāgame dikkālādyanavacchinno vāṅmano’tītagocaraḥ

'''18.3''' niṣkalo’niṣkalaścaiva sarvagaḥ sarvadṛksadā tajjñānādeva muktiḥ syādbhaktānāṃ ca janārdana

'''18.4''' tatpūjāpi dadātyeva phalamindrapadādikam pūjito devadeveśo bhaktiṃ jñānaṃ prayacchati

'''18.5''' jñānena bhaktiyogena vinānyaiḥ karmakoṭibhiḥ prāpyate na kvacinmuktistasmālliṅgārcanaṃ param

'''18.6''' liṅgārcanasamo nāsti dharmo’tra bhuvanatraye pūjā ca triṣu liṅgeṣu vyaktāvyaktobhayātmasu

'''18.7''' sthāpiteṣu bhavetsamyak sthāpanaṃ dvividhaṃ bhavet sthāpanaṃ ca pratiṣṭhā ca sthāpanaṃ śilpisaṃyutam

'''18.8''' pratiṣṭhā tadvihīnā syānmantreṇaiva hi sā bhavet mantrarūpī mahādevaḥ śivaḥ paramakāraṇam

'''18.9''' mantraṃ syātparamaṃ jñānaṃ mantravācyaḥ sadāśivaḥ vācyavācakasaṃbandho mantrasyāsya ca dṛśyate

'''18.10''' vācyasya devadevasya lokānugrāhakasya ca liṅgaṃ cihnaṃ śarīraṃ ca kathyate’tra janārdana

'''18.11''' śarīraṃ mantramevaṃ syācchabdabrahmeti saṃjñitam śarīraṃ prathamaṃ kṛtvā vyaktāvyaktobhayātmakam

'''18.12''' trividhaṃ tatsuraśreṣṭha pūjārthaṃ tasya nityaśaḥ pratiliṅgasthitaṃ mantraṃ pratiṣṭheti prakīrtitam

'''18.13''' tāmimāmadhunā samyaṅ matto nigaditāṃ śṛṇu pratiṣṭhāvidhikālo’yamucyate sāṃprataṃ mayā

'''18.14''' uttarāyaṇakāle tu māghamāsavivarjite śuklapakṣe dvitīyā ca tṛtīyā pañcamī tathā

'''18.15''' ṣaṣṭhī ca saptamī caiva daśamī ca trayodaśī tithayaḥ śubhadāḥ proktā dine pūrvārdhamiṣyate

'''18.16''' śreṣṭhā vārā gurujñenduśukrāṇāṃ parikīrtitāḥ pakṣacchidrāśca parveṇa riktāścāpi vivarjayet

'''18.17''' koṇāṅgāradineśānāṃ vārāṃścaiva vivarjayet prājāpatyaindave tiṣyo maghasvātī punarvasū

'''18.18''' aśvinī revatīhastau cottaratritayaṃ tathā maitraṃ vaiṣṇavasaṃyuktaṃ nakṣatraṃ śubhadaṃ smṛtam

'''18.19''' andhaṃ kāṇaṃ ca varjyaṃ syātkaṇṭakaṃ sthūṇameva ca pāpayuktaṃ tathā dṛṣṭaṃ viddhaṃ kāṅkṣitameva ca

'''18.20''' savyatīpātakaṃ caiva varjanīyaṃ prayatnataḥ carāṇi varjayedbhāni dhanuṣā śubhamanyabham

'''18.21''' drekkāṇāṃśakahorāśca darśanaṃ śubhadaṃ satām hitvā somodayaṃ teṣu devasthāpanakarmaṇi

'''18.22''' triṣaḍāyagatāḥ pāpāḥ śaṃvidadhyusta eva ca lagnagāḥ prāṇasandehaṃ yajamānasya kurvate

'''18.23''' pāpāstvaṣṭamarāśisthāḥ śubhāścāpi vininditāḥ ṣaṭsaptadaśamastho’pi śukro varjya udāhṛtaḥ

'''18.24''' dvitīyaṃ pañcamaṃ hitvā candraḥ śeṣeṣu śobhanaḥ saptadvipañcanavamaṃ hitvā’nyatra tathā guruḥ

'''18.25''' so’pi lagnagataḥ kuryācchakrasya sukhasaṃpadam sūryaḥ śubhakaro yuktaḥ pauṣṇahastatriruttaraiḥ

'''18.26''' mandaśca śubhadaḥ proktaḥ prājāpatyānilarkṣayuk aśvinīhastasaṃyukto budhavārastvaśobhanaḥ

'''18.27''' aryamṇaścārdrabhaṃ cāpi guruvāreṇa varjayet vaiṣṇavaṃ puṣyabhaṃ caiva śukravāreṇa varjayet

'''18.28''' vaiśvadevayutaḥ somo dvitīyā budhasaṃyutā guruvārayutā ṣaṣṭhī candraścaikādaśīyutaḥ

'''18.29''' saptamī pauṣṇayuktā ca varjanīyāḥ prayatnataḥ utpāte durdine vāpi nirghāte tāpase mṛte

'''18.30''' ninditaṃ divasaṃ proktaṃ mṛte janapadeśvare evamādiṣu sarveṣu na kuryālliṅgasaṃsthitim

'''18.31''' evaṃ parīkṣya niścitya pratiṣṭhākālamuttamam sāvakāśe vimāne tu dvārabandhavidheḥ purā

'''18.32''' mūrdheṣṭakāvidhervāpi sthāpanaṃ syānnijecchayā bāṇaliṅgaṃ tathodbhūtamanyadratnādikaṃ tu yat

'''18.33''' tatsarvaṃ dhāmni niṣpanne sthāpanīyaṃ vicakṣaṇaiḥ aṅkurānarpayedbījairyathāvidhipuraḥsaram

'''18.34''' tato’dhivāsakarmārthaṃ maṇṭapaṃ kārayetsudhīḥ trayāṇāṃ jyeṣṭhaliṅgānāṃ dvātriṃśaddhastasaṃmitam

'''18.35''' catuṣṣaṣṭyaṅghribhiryuktaṃ tithitālasamucchrayam madhye hitvā catuṣpādaṃ tatra vedīṃ prakalpayet

'''18.36''' yuktāṃ navapadai ramyāṃ hastamātrasamucchrayām vedāśrayonikhaṇḍendutryaśravṛttaṣaḍaśrakaiḥ

'''18.37''' padmavasvaśrasaṃyuktairaṣṭadikṣvaṣṭakuṇḍakaiḥ śakraśāṃkarayormadhye vṛttena ca samanvitam

'''18.38''' vedāśrakuṇḍaiḥ paritaścaturviṃśaiḥ samanvitam madhyamatrayaliṅgānāṃ maṇṭapaṃ tithihastakam

'''18.39''' ṣaṭtriṃśatstambhasaṃyuktaṃ navatālasamucchritam kṛtvā madhye tu tatrāpi hitvā stambhacatuṣṭayam

'''18.40''' tatra nandapadairvedī bhavettālatrayocchritā tasyāstu paritaḥ kuṇḍamaṣṭadikṣu ca pūrvavat

'''18.41''' vidikṣvaṣṭa ca kuṇḍāni vṛttāni parikalpayet adhamatrayaliṅgānāṃ paṅkihastapravistaram

'''18.42''' paṅkitālasamutsedhaṃ ṣoḍaśastambhasaṃyutam madhye vedikayā yuktamutsedhena dvitālatā

'''18.43''' kuṇḍairāvṛtayā caiva navabhiḥ pūrvavāsitaiḥ evaṃ maṇṭapaklṛptistu liṅge hastamite bhavet

'''18.44''' mānena niścite liṅge prāgudagdvāragarbhayoḥ tanmānadviguṇaṃ vāpi triguṇaṃ vā caturguṇam

'''18.45''' hīnamadhyottamaṃ kuryāccheṣaṃ pūrvavadācaret maṇṭapānāṃ tu sarveṣāṃ tālamātrasthalocchrayam

'''18.46''' vedyāṃ tu paritaḥ kuryāccatustridvyaṅgulaiḥ kramāt śreṣṭhādīnāmupānaṃ ca sarvaṃ pakveṣṭakāmayam

'''18.47''' apakvairvāpi kurvīta darpaṇodarasaṃnibham vedikopari kumbhaṃ tu maṇṭapasya prakalpayet

'''18.48''' asaṃbhaveṣu sarveṣu navakuṇḍeṣu homayet caturdvārasamāyuktaṃ pratidvāraṃ sutoraṇam

'''18.49''' kṛtvā madhyottare bhāge lakṣaṇoddhāramaṇṭapam tattribhāgaikabhāgena kuryādardhena vā punaḥ

'''18.50''' tanmadhye vedikāṃ kuryāttālāvaṭasamanvitām sūtravartanapūrvaṃ tu kṛtaśāṇābhigharṣaṇam

'''18.51''' kṣālitaṃ bahuśo’mbhobhiḥ sugandhairatiśītalaiḥ sthaṇḍile caiva śālāyāṃ śālibhirnihite śubhe

'''18.52''' sthāpya liṅgaṃ kuśāstīrṇe liṅge badhvā tu kautukam sauvarṇaṃ rājataṃ vāpi samācchādyatu vāsasā

'''18.53''' navena śāyayelliṅgaṃ prākśiraścordhvavaktrakam lokapālaghaṭānaṣṭa sasūtrānvāripūritān

'''18.54''' savastrānsāpidhānāṃśca sakūrcānsthāpya pūjayet hitvā rātriṃ tathā liṅgaṃ prabhāte sumuhūrtake

'''18.55''' utthāpya śayanāttasmāt saṃprokṣya kalaśāmbhasā pūrvoktamaṇṭape ramye gomayenopalepite

'''18.56''' savitānadhvaje tasmindarbhamālāsamāyute gītanṛttasamāyukte sarvātodyasamanvite

'''18.57''' tanmadhye vedikāyāṃ tu vinyasetphalakāṃ dṛḍhām tatra liṅgaṃ samānīya sudṛḍhena rathādinā

'''18.58''' sthāpayecchilpinācāryaḥ prāṅmukhaṃ mūlamantrataḥ vyapohya vastraṃ tadbaddhaṃ kautukaṃ ca krameṇa tu

'''18.59''' dattvā puṣpaṃ ca śirasi sūtravartanamārabhet trayīmayaṃ trilokeśaṃ triguṇaṃ tatra daivatam

'''18.60''' liṅgaṃ sadāśivasyaitat triprakārakṛtānyapi sūtrīyante haneneti sūtramityabhidhīyate

'''18.61''' sūtraṃ ca vartayedyatnādvyaktaye mukhapṛṣṭhayoḥ yatra sūtraṃ mukhaṃ tatra pṛṣṭhaṃ cānyatra kalpitam

'''18.62''' liṅgamastakamadhye’ṅkaṃ kṛtvāṣṭāśre’tra madhyame liṅgasya mūlaviṣkambhamadhye cāṅkaṃ tu dhātunā

'''18.63''' kṛtvā tu dhāturāgāktasūkṣmatantuprakalpitam trivṛtsūtraṃ śirasyaṅkānmūlāṅkāntaṃ krameṇa ca

'''18.64''' ālocyāsphālayedvaktre madhyasūtraṃ taducyate tato nālasya vistāraṃ jñātvā samyak tadūrdhvataḥ

'''18.65''' pārśvayormadhyasūtraṃ syātsphālayedvaiṣṇavāṃśataḥ śiro’ntamatha sūtre dve pakṣasūtre tataḥ kramāt

'''18.66''' pārśvayorbandhanaṃ jñātvā yāvatpṛṣṭhāntagocaram vartayitvātha tīkṣṇena haimenaiva tu sūcinā

'''18.67''' kāñcanārcanarūpeṇa śilpivaryeṇa dhīmatā dhṛtapañcāṅgabhūṣeṇa navāmbaradhareṇa ca

'''18.68''' navāmbarottarīyeṇa prokṣitena kuśāmbhasā pradakṣiṇakrameṇaiva kārayetsūtravartanam

'''18.69''' sūtralakṣaṇamapyadya vakṣye’haṃ te janārdana pūjābhāgocchraye sarve ṣaṇṇavatyaṃśabhājite

'''18.70''' ekāṃśārdhaṃ yavaṃ vidyāttatsamaṃ sūtravistaram athavānyaprakāreṇa sūtravistāramucyate

'''18.71''' uttamottamaliṅgasya yavatritayamucyate hastasya sūtravistāramitareṣāṃ krameṇa tu

'''18.72''' ardhārdhahrāsaḥ kartavyo hastaliṅgāntameva hi tārādaṣṭāṃśakaṃ khātaṃ pādākhātamathāpi vā

'''18.73''' pūjābhāgocchrayaṃ sarvaṃ vikārāṃśena bhājayet tatrordhvacaturaṃśaṃ tu dvyaṃśakaṃ cāpyadhastyajet

'''18.74''' ekena kuḍmalaṃ kṛtvā navāṃśairnālamālikhet tannālasya tu vistāramuktāṃśe’gnyaṃśabhājite

'''18.75''' netrāṃśena bhavettasminmukule mūlataḥ kramāt kṛśatāṃ kalpayetpaścāt pakṣasūtradvayaṃ likhet

'''18.76''' tayorbhāgadvayaṃ hitvā pṛṣṭhe saṃgama iṣyate prathamaṃ lakṣaṇaṃ proktaṃ dvitīyaṃ lakṣaṇaṃ śṛṇu

'''18.77''' ṣoḍaśāṃśe punastasmiṃstyajedūrdhve catuṣṭayam adhaścaikaṃ parityajya madhye nālaṃ daśāṃśakam

'''18.78''' vyomāṃśena tadūrdhve tu mukulaṃ cāpi kalpayet pakṣasūtradvayaṃ cāpi nālatāraṃ ca pūrvavat

'''18.79''' dvitīyaṃ lakṣaṇaṃ proktaṃ tṛtīyaṃ lakṣaṇaṃ śṛṇu dvādaśāṃśe’tha pūjāṃśe tyaktvordhveṃ’śadvayaṃ tataḥ

'''18.80''' adhaścaikaṃ parityajya nālaṃ vasvaṃśamucyate vyomāṃśaṃ mukulaṃ tatra pakṣasūtraṃ ca pūrvavat

'''18.81''' tṛtīyaṃ lakṣaṇaṃ proktaṃ turīyaṃ lakṣaṇaṃ śṛṇu ṣodaśāṃśe śivāṃśe tu punaścaitattridhā bhavet

'''18.82''' tryaṃśaikamūrdhvatastyaktvā ṣoḍaśāṃśeṣvadho dvayam tyaktvā madhye tu nālaṃ syānmukulena vivarjitam

'''18.83''' pakṣasūtradvayaṃ cāpi pūrvavatparikalpayet tatrādho bhūtavedāgninetrabhāgāvadhiryathā

'''18.84''' brāhmādikramataḥ kuryāllambanaṃ pakṣasūtrayoḥ viśeṣānnālasūtrābhyāṃ kramātkuryāttayorapi

'''18.85''' śilpinā kārayitvaivaṃ sūtraṃ lakṣaṇasaṃyutam pātreṣu prasthapūrṇeṣu triṣu tāmramayeṣu ca

'''18.86''' madhu sarpiḥ payaścaiva pūrayetpuruṣeṇa tu arghyāmbhasā tu saṃprokṣya nyasya puṣpaṃ ca kāñcanam

'''18.87''' soṣṇīṣaḥ sottarīyaścāpyudagāsyaḥ prasannadhīḥ madhye rekhādvayaṃ paścānmadhunāṃ rudradaivatam

'''18.88''' suvarṇamayyā sūcyā ca sarvātmānamudāharan tarpayeddakṣiṇāṃ rekhāṃ sarpiṣā brahmadaivatām

'''18.89''' piṅgalena tu mantreṇa tato viṣṇvadhidaivatām vāmarekhāṃ tu payasā tato ghorāstramantrataḥ

'''18.90''' tarpayitvā tato mantrī pañcamṛtpañcagavyakaiḥ liṅgaśuddhiṃ tu bahuśaḥ pañcabrahmaśivaiḥ kramāt

'''18.91''' kṛtvā śuddhena toyenāpyabhiṣicyāstramuccaran puṣpaṃ śirasi cārghyeṇa dattvā praṇavamuccaran

'''18.92''' puṇyāhaṃ vācayitvātha prokṣayetpuruṣeṇa tu liṅgasyottarabhāge’tha pīṭhaṃ nyasya ca pūrvavat

'''18.93''' śuddhiṃ kṛtvā tu kūrcena pūjābhāgasamena tu saha liṅgaṃ tu mālābhirāveṣṭyātha ca deśikaḥ

'''18.94''' navena vāsoyugmena liṅgapīṭhamanukramāt āveṣṭya varmaṇābhyukṣya hetinādau śivāmbhasā

'''18.95''' rathādiṣu samāropya nadyādīnāmadūrataḥ jalāśayamanuprāpya stanadaghne jale tataḥ

'''18.96''' ānīya sthāpya yatnena saha caiva rathādinā tanmūle dakṣiṇe pārśve pīṭhaṃ cāpi niveśayet

'''18.97''' parito lokapālāṃśca svasvadikpānsamarcayet liṅgopari prapāṃ kuryādvitānadhvajaśobhitām

'''18.98''' darbhamālāyutāṃ tatra tīre dīpāṃśca vinyaset trirātramekarātraṃ vā dinaṃ vātha dinārdhakam

'''18.99''' adhivāsya jale paścātsnānamaṇṭapamānayet tatrānīya ca talliṅgaṃ sthāpya tadvedikopari

'''18.100''' vastrakūrcādikaṃ sarvamapanīya śivāmbhasā saṃsnāpya liṅgaṃ pīṭhaṃ ca tataḥ puṇyāhamācaret

'''18.101''' pañcagavyābhiṣekaṃ ca śivamantreṇa kārayet sarvātmānaṃ japanpaścācchuddhatoyena secayet

'''18.102''' pīṭhaṃ ca śuddhatoyena devīgāyatrimantrataḥ abhiṣicya tato dadyālliṅgamūrdhnyardhyamuttamam

'''18.103''' puṣpaṃ ca sākṣataṃ dattvā praṇavena samāhitaḥ tato maṇṭapasaṃskāraṃ kuryāttadvidhirucyate

'''18.104''' praviśya maṇṭapaṃ samyakkṛtabrāhmaṇabhojanam navena pariśuddhena gomayenopalepayet

'''18.105''' puṇyāhaṃ vācayitvā tu sitapuṣpākṣatāṃstataḥ samāstīryāstramantreṇa prāṅmukho vāpyudaṅmukhaḥ

'''18.106''' abhyukṣya parito dhīmānmaṇṭapaṃ darbhamālayā vitānenordhvamācchādya stambhānsarvānnavaiḥ sitaiḥ

'''18.107''' vastrairāveṣṭya parito lokapāladhvajānkramāt badhvā tadvarṇasaṃyuktāṃstattadastreṇa lāṅchitān

'''18.108''' vedīprānte tu sarvatra kuryānmālāvalambanam muktādāmāni koṇeṣu sapatākaṃ vilambayet

'''18.109''' nālikeraphalaṃ puṣpaṃ catuṣkoṇeṣu lambayet dvārapārśveṣu sarvatra sitasūtravicitritān

'''18.110''' gandhodapūritānkumbhānpallavāsyāṃśca vinyaset aṣṭamaṅgalarūpāṇi vedikābāhyato nyaset

'''18.111''' vedikopari bāhye vā dīpamālāṃ prayojayet pālikādīṃśca vinyasya tataḥ puṇyāhamācaret

'''18.112''' dīpavarjyāni śeṣāṇi sthaṇḍilopari vinyaset tataśca śivamantreṇa prokṣayecchuddhavāriṇā

'''18.113''' vāstuhomaṃ tataḥ kṛtvā vedyāścāgneyagocare sthaṇḍile saikate homaṃ samāpyāgniṃ visṛjya ca

'''18.114''' vedikāyāṃ tataḥ kuryātsthaṇḍilaṃ vidhivatsudhīḥ daśadroṇairyavādīnāṃ sthaṇḍilaṃ śreṣṭhamucyate

'''18.115''' madhyamaṃ syāttadardhena tadardhenādhamaṃ bhavet tadardhaistaṇḍulaiścaiva tadardhaiśca tilairapi

'''18.116''' bāhyarekhātrayaṃ kṛtvā madhye padmaṃ sakarṇikam sāṣṭapatraṃ likhitvā tu vikiretpuṣpalājakān

'''18.117''' kuśena saṃparistīrya śayanaṃ tatra kalpayet dārujaṃ carmajaṃ caiva romajaṃ tūlajaṃ tathā

'''18.118''' uparyāstaraṇopetaṃ bhavecchayanapañcakam dārujaṃ phalakaṃ jñeyaṃ kṣīravṛkṣasamudbhavam

'''18.119''' carmajaṃ ca varaṃ carma vyāghratvagaiṇameva vā romajaṃ śayanaṃ romakambalaṃ pakṣipakṣajam

'''18.120''' caturthaṃ śālmalītūlasaṃbhavaṃ vā prakalpayet uparyāstaraṇaṃ cāpi kevalaṃ sūkṣmavāsasā

'''18.121''' evaṃ śayanamuddiṣṭamalābhe pañcavastrakaiḥ pṛthivyādīni tattvāni śayaneṣu yajetkramāt

'''18.122''' vedikāyāṃ sumeruṃ ca svanāmapadamantrakaiḥ antaḥstheṣvaṣṭakuṇḍeṣu bhavādīnparito yajet

'''18.123''' pradhāne śivamabhyarcya tadbāhye parito yajet dikpatīnsvasvadikstheṣu kuṇḍeṣvanyeṣu ca kramāt

'''18.124''' vidyeśāṃśca vasūṃścaiva yajeddeśikasattamaḥ madhyamaṇṭapakuṇḍeṣu ṣoḍaśeṣu yathākramam

'''18.125''' bhavādīndikṣu saṃpūjya pradhāne śivamarcayet bhūrādilokāṅśeṣeṣu saptakuṇḍeṣu pūjayet

'''18.126''' kanyase maṇṭape vāpi navakuṇḍeṣu pūjayet vitāne candramabhyarcya digdhvajeṣu tadīśvarān

'''18.127''' vāsukiṃ darbhamālāyāṃ puruṣārthacatuṣṭayam muktādāmasu saṃpūjya tattatstambheṣu pūjayet

'''18.128''' uttame madhyame vāpi yajedvaikartanādikān ādityāndvādaśaivātha maṇṭape tvadhame’pi ca

'''18.129''' dharmādīnparito yaṣṭvā toraṇeṣvatha pūrvataḥ bhadraṃ ca vijayaṃ caiva vijṛmbhaṃ lohitaṃ tathā

'''18.130''' dhūpayeccāgaruṃ yadvā ghṛtāktaṃ tatra guggulum evaṃ maṇṭapasaṃskāraṃ kṛtvā deśikasattamaḥ

'''18.131''' hotṛbhirmūrtipaiḥ sārdhaṃ gacchelliṅgāntikaṃ guruḥ hotāraḥ sādhakāḥ proktā abhāve putrakāśca te

'''18.132''' sarvātodyasamāyuktaṃ svastisūktādimaṅgalaiḥ balavadbhistadā liṅgamāropya ca rathādiṣu

'''18.133''' dvāreṇa paścimenaiva maṇṭapaṃ tu niveśayet prākśiraścordhvavaktraṃ tu śāyayecchayanopari

'''18.134''' pīṭhaṃ ca vinyasetpaścālliṅgamūle tu dakṣiṇe sauvarṇaṃ kautukaṃ tatra liṅge pīṭhe ca bandhayet

'''18.135''' tatra triṣu vibhāgeṣu dattvārghyaṃ puṣpasaṃyutam pīṭhaṃ vāpi tato liṅgaṃ chādayedraktavāsasā

'''18.136''' piṇḍikāṃ ca sitenaiva vāsasā sarvamantrataḥ arghyeṇa gandhapuṣpābhyāṃ dhūpadīpadvayena ca

'''18.137''' rudraviṣṇuviriñcāṃśca vṛtte’ṣṭāśrayugāśrayoḥ tattanmantreṇa saṃpūjya yajetpīṭhe manonmanīm

'''18.138''' evaṃ kṛtvā tato dhīmānkalaśānsthāpayetkramāt sauvarṇaṃ rājataṃ tāmraṃ mṛttikākalaśāndṛḍhān

'''18.139''' akalaṅkānsupakvāṃśca pakvabimbaphaladyutīn droṇārdhapūrṇānacchidrānabhinnāṃścāpyupādadet

'''18.140''' vardhanī tatpramāṇā syācchivakumbhaḥ pramāṇataḥ dviguṇastānsamastāṃśca kṣālayedastramantrataḥ

'''18.141''' tataḥ sarvātmanāveṣṭya sūtreṇa susitena ca yavamātrāntaraṃ tāṃśca gandhodakena pūrayet

'''18.142''' sakūrcānsāpidhānāṃśca pallavāsyānmanoramān candanakṣodasiktāṅgānsākṣatānvastraveṣṭitān

'''18.143''' saṃsādhya sarvāṃstānkumbhāṃsteṣu caikaṃ pragṛhya ca liṅgasya dakṣiṇe pārśve śirodeśe tu vinyaset

'''18.144''' tasyottare tu vinyasya śaktikumbhaṃ manoramam vidyeśvarātmakānkumbhānaṣṭāvaṣṭasu dikṣvapi

'''18.145''' vinyasya teṣu śaiveṣu vinyasedratnapañcakam śeṣeṣvapi ca sarveṣu vinyasetkāñcanaṃ tataḥ

'''18.146''' puṇyāhaṃ vācayitvātha saṃprokṣya ca śivāmbhasā śive sadāśivaṃ tatra yajetkumbhe manonmanīm

'''18.147''' tatkumbhe cāpi saṃpūjya vidyeśāndikṣu pūjayet gandhapuṣpādibhirmantrī tato homaṃ samārabhet

'''18.148''' tato dikṣu ṛgādyaistu vedairadhyayanaṃ bhavet nairṛtyāṃ tu japedastramaiśānyāṃ tu śivaṃ yajet

'''18.149''' kuṇḍāgnyājyasruvādīnāṃ kṛtvā saṃskāramuttamam pratikuṇḍaṃ tataḥ kuryāddhomaṃ yadvā sa deśikaḥ

'''18.150''' pradhānakuṇḍe saṃskāramagneḥ kṛtvā pareṣu ca prakṣipya mūrtipairhomaṃ sarvakuṇḍeṣu kārayet

'''18.151''' homārambhe tu sarvatra jātavedasamarcayet gandhapuṣpādibhirvahnibījamantraṃ samuccaran

'''18.152''' paścātkuṇḍādhipāṃścāpi śivamantraṃ samuccaran tataḥ sarvatra hutvā tu sarpiṣāgnimukhaṃ tataḥ

'''18.153''' samidājyacarūm̐llājānsarṣapāṃśca yavāṃstilān mudgamāṣakulatthāṃśca veṇunīvārakānapi

'''18.154''' etāni homadravyāṇi mūlabrahmāṅgakaiḥ kramāt śataṃ vātha tadardhaṃ vā pratikuṇḍaṃ tu homayet

'''18.155''' pālāśī tu pradhānasya samitsarvatra kīrtitā plakṣodumbarakāśvatthavaṭajāḥ pūrvataḥ kramāt

'''18.156''' āgneyādiṣu śamyarkamāyūrakhadirodbhavāḥ śeṣeṣu samidanyeṣu bāhyastheṣu janārdana

'''18.157''' sarveṣvaudumbarī grāhyā pratidravyāvasānake sarpiṣā vyāhṛtiṃ hutvā sarvatraiva samaṃ kuru

'''18.158''' vyāhṛtyantena mantreṇa tenaiva saha mūrtipaiḥ kūrcahastaḥ spṛśelliṅgaṃ pratikuṇḍaṃ tu homayet

'''18.159''' mūrtipāḥ sarpiṣā teṣāṃ pratyekaṃ tu daśāhutīḥ tataḥ pradhānakuṇḍe tu sarpiṣā mūlamantrataḥ

'''18.160''' hutvā daśāhutīḥ paścātpratyekaṃ brahmabhiḥ kramāt hutvā ca pūrvavatpaścāttasminneva janārdana

'''18.161''' śaktihomaṃ ca kurvīta tatrāvāhya manonmanīm gandhapuṣpādinābhyarcya tanmantreṇāpi homayet

'''18.162''' ājyenaikena sāṅgena mūlākhyena daśāhutīḥ pratyekaṃ tu tataścāpi tairmantraiḥ piṇḍikāṃ spṛśet

'''18.163''' vidyeśānāṃ gaṇeśānāṃ dikpālānāṃ tathaiva ca daśānāmapi śastrāṇāṃ pratyekaṃ sarpiṣāhutim

'''18.164''' pañcāhutyā samāpyātha homamabhyarcya pāvakam pariṣicya tuṣādyaistu vahniṃ teṣvapi rakṣayet

'''18.165''' pūjayitvaivamagniṣṭhaṃ dadyātkumbhe haviḥ kramāt devānāmapi sarveṣāṃ tato rātriṃ tu jāgarāt

'''18.166''' nītvā prātaḥ samutthāya kṛtanityaḥ sa deśikaḥ mūrtipairmaṇṭapaṃ gatvā samārādhya ghaṭasthitān

'''18.167''' devām̐lliṅge ca pīṭhāṃśe pūrvavatpūjayetsudhīḥ tatra paścātsulagne tu vahniṃ kuṇḍeṣu dīpayet

'''18.168''' sarvamūrtīn susaṃpūjya hutvā vyāhṛtibhistataḥ hutvā sviṣṭakṛtaṃ cāpi pūjayitvātha pāvakam

'''18.169''' srucā pūrṇāhutiṃ dadyātsarvātmahṛdayena tu sarvatra mūrtipaiḥ sārdhamathavātra svayaṃ guruḥ

'''18.170''' pūrṇāhutiṃ ca sarvatra juhuyātpūrvataḥ kramāt gato garbhagṛhaṃ prāpya śilpinā saha deśikaḥ

'''18.171''' tatra brahmaśilāmadhye sthāpayellakṣaṇānvitam tatastallakṣaṇaṃ caiva sthānaṃ tatsthāpanocitam

'''18.172''' krameṇa gadato mattaḥ śṛṇu sarvaṃ janārdana uttamā liṅgaviṣkambhadviguṇena tu vistṛtā

'''18.173''' pādonadviguṇā madhyā bhavedardhādhikādhamā vistāreṇa samotsedhā śreṣṭhā madhyā tadardhataḥ

'''18.174''' tatpādena kṛtotsedhā kanyasī sā śilā smṛtā tanmadhye liṅgaviṣkambhamānenaiva susaṃsthitam

'''18.175''' caturaśraṃ samaṃ kuryādgartaṃ tatkhātamucyate brahmāṃśotsedhavasvaṃśe vyomāṃśārdhaṃ tu tadbhavet

'''18.176''' athavāṅgulamānena kalpayetkalpavittamaḥ pañcāṅgulaṃ syāttannimnaṃ liṅge vai cottamottame

'''18.177''' hasteṣvanyeṣu sarveṣu syādardhārdhāṅgulakṣayaḥ navāvaṭāni tanmadhye sūtreṇa sumite sudhīḥ

'''18.178''' padamadhyagatānyevaṃ kuryāt tattattriyaṅgulam tadardhaṃ madhyamaṃ proktaṃ tadardhamadhamaṃ bhavet

'''18.179''' vistārasamanimnāni tāni sarvāṇi kalpayet evaṃ tallakṣaṇaṃ proktaṃ tatsthānaṃ tu nigadyate

'''18.180''' dvāramadhyaṃ viniścitya tasmātsūtreṇa madhyamam garbhasyopari niścitya tanmadhye kaṃ vidhāya ca

'''18.181''' dvāravistāramānaṃ yadantargarbhagṛhe sthitam caturaśraṃ samaṃ kṛtvā garbhagehasya madhyame

'''18.182''' dvāviṃśaiḥ prāggataiḥ sūtraistatsaṃkhyairudagāyataiḥ ekatra piṇḍitaṃ tatra catvāriṃśaccatuḥśatam

'''18.183''' saikaṃ ca jāyate vyūhaṃ padānāṃ teṣu madhyame pade navapadaṃ kuryātsūtreṇa sumitaṃ tataḥ

'''18.184''' āgneyapadamārabhya vāyoḥ pañcapadaṃ tyajet brahmasomeśaśakrāṇāṃ padānāṃ tu catuṣṭaye

'''18.185''' madhyasaṃdhisthasūtre ye prāgudakpravaṇe kṛte āgarbhaṃ samyagāsphālya gairikāktena rajjunā

'''18.186''' sūtrasaṃdhiṃ sphuṭaṃ jñātvā śivasūtraṃ tayorapi prāgāyataṃ bhavedanyatsomasūtramiti smṛtam

'''18.187''' brahmasthānamiti khyātaṃ tatsthāne sthāpayecchilām yadvadbrahmaśilāmadhye sūtrasandhisthitirbhavet

'''18.188''' tadvadbrahmaśilā garbhe sthāpanīyā vicakṣaṇaiḥ sthāpitāyāṃ tatastasyāṃ śilāyāṃ paripālayet

'''18.189''' tato madhyāvaṭe haimaṃ kūrmaṃ tatra vinikṣipet samaṃ dṛḍhataraṃ vṛttaṃ dvārasyābhimukhaṃ yathā

'''18.190''' tato ratnāni dhātūni bījāni ca tataḥ param gandhaṃ lohaṃ ca vallīṃ ca vinyasedavaṭeṣu ca

'''18.191''' māṇikyaṃ madhyame nyasya śakre marakataṃ nyaset indranīlaṃ tu yāmyāyāṃ sphaṭikaṃ vāruṇe tataḥ

'''18.192''' vajraṃ tu saumyadigbhāge vairḍūryaṃ vahnigocare muktāṃ nirṛtidigbhāge padmarāgaṃ tu mārute

'''18.193''' pravālamīśadeśe tu madhye pāradameva ca tato dhātumayaṃ cāpi gairikaṃ ca manaśśilām

'''18.194''' haritālāñjane caiva mākṣikābhrakameva ca sindūraṃ ca krameṇaiva prāgādiṣu vinikṣipet

'''18.195''' atha madhye’vaṭe śālīnyavamudgakulatthakān niṣpāvaṃ ca krameṇaiva mahāśāsu vinikṣipet

'''18.196''' priyaṅgutilanīvārasarṣapāṃśca vidikṣu ca tataścandanaṃ madhye tu kuṣṭhalohalavaṅgakān

'''18.197''' kaccolaṃ ca tathāśāsu jātitakkolakau tathā kāśmīraṃ rocanāṃ caiva vidikṣvapi ca vinyaset

'''18.198''' tataḥ kāñcanaraupye ca tāmraṃ caivārakūṭakam trapusīsāyaḥkāṃsyāni pittalaṃ ca kramānnyaset

'''18.199''' viṣṇukrāntiṃ sahādevīṃ musalīṃ śriyameva ca bhadrāmindralatāṃ dūrvāṃ girikarṇīṃ ca vinyaset

'''18.200''' tatastasyāṃ prasannātmā brahmākhyāyāṃ tu madhyame ādhāraśaktiṃ vinyasya gandhādyairarcayedguruḥ

'''18.201''' tato mantramimaṃ cāpi japedvyaktaṃ kṛtāñjaliḥ tvameva paramā śaktistvamevāsanadhārikā

'''18.202''' śivājñayā tvayā devi sthātavyamiha sarvadā vijñāpyaivaṃ tato liṅgaṃ mūrtipaiḥ saha deśikaḥ

'''18.203''' anyaiśca balavadbhistu samutthāpyāhṛtaṃ tataḥ apanīya śirasyarghyaṃ tadā mūlena dāpayet

'''18.204''' tato rathe samāropya śaṅkhadundubhinisvanaiḥ gītanṛttasamāyuktaṃ kṛtvā dhāmnaḥ pradakṣiṇam

'''18.205''' praviśya garbhagehāntamarghyaṃ śirasi vinyaset tato’vatārayitvā tu rathālliṅgaṃ gatatvaraiḥ

'''18.206''' balavadbhirnaraiḥ paścāddvārasyābhimukhaṃ tathā nyasya brahmaśilāpārśve tato lagne guṇānvite

'''18.207''' putramitrādibhiḥ sārdhaṃ kartrā ca phalakāṅkṣiṇā liṅgasyānupraviṣṭena sthitenāgre praṇamya ca

'''18.208''' prārthyamānaḥ pratiṣṭhārthaṃ śilpinā saha deśikaḥ soṣṇīṣaḥ sottarīyaśca baddhapañcāṅgabhūṣaṇaḥ

'''18.209''' sthāpayedudagāsyaḥ sanmantramīśānamuccaran niḥśabdaṃ niścalaṃ cāpi susthitaṃ sudṛḍhaṃ yathā

'''18.210''' aiśānīṃ diśamākramya sthitaṃ svargāpavargadam lokapuṣṭikaraṃ caiva dhanadhānya sukhāvaham

'''18.211''' tasmātsarvaprayatnena sthāpayedīśadiggatam aindrīṃ caivasvatīmāśāṃ vāruṇīmuttarāmapi

'''18.212''' ākramya susthitaṃ liṅgaṃ brāhmaṇādisukhāvaham tataśca piṇḍikāṃ tasmānmaṇṭapādvastraveṣṭitām

'''18.213''' utthāpya śaktimantreṇa rathe cāropya deśikaḥ ānayelliṅgavadgarbhe rathādapyavatārya ca

'''18.214''' liṅgāgre vinyasetpīṭhaṃ tataḥ pārśvaśilā nyaset catasrastāḥ samuddiṣṭāścaturaśrasamocchrayāḥ

'''18.215''' piṇḍikāṃ lakṣaṇopetāṃ nandyāvartaśilopari udaṅnālaṃ yathā sthāpya viśleṣaṃ liṅgapīṭhayoḥ

'''18.216''' jatugairikasikthaistu sarjaguggulusaṃyutaiḥ gulatailasamāyuktaiḥ śarkarācūrṇamiśritaiḥ

'''18.217''' pākena sāndratāṃ nītairnīrandhraṃ taiḥ prakalpayet yadvā sarjarasacūrṇaṃ śarkarācūrṇasaṃyutam

'''18.218''' māhiṣaṃ navanītaṃ ca samamabhyukṣya deśikaḥ tena cāvartayedvidvānsaṃgatiṃ liṅgapīṭhayoḥ

'''18.219''' dhanadhānyāṃśukādyaistu kartrā tatrāpi toṣitam tataḥ śilpinamudvāsya kṛtakṛtyastadā guruḥ

'''18.220''' mūrtipaiḥ sahitaḥ snātaḥ śivavratatanustadā liṅgapīṭhasthitānāṃ ca śuddhiṃ kṛtvā krameṇa tu

'''18.221''' puṇyāhaṃ vācayitvāntargehaṃ saṃprokṣya sarvataḥ liṅgaṃ tadambhasā prokṣya sarvātmānaṃ samuccaran

'''18.222''' gaurīgāyatrimantreṇa pīṭhaṃ saṃprokṣya mantravit pādyamācamanaṃ cārghyaṃ pañcagavyaṃ yathāvidhi

'''18.223''' saṃsādhya vāgyamī tatra dattvārghyaṃ liṅgamastake tato maṇṭapamāsādya soṣṇīṣaḥ sottarīyakaḥ

'''18.224''' pañcāṅgabhūṣaṇenāpi bhūṣitaḥ śāntamānasaḥ śivaśaktyostathā pūjāṃ kṛtvā kumbhasthayostataḥ

'''18.225''' vidyeśvarāṇāmabhyarcya śāstroktaṃ samyagācaret śaṅkhadundubhinirghoṣairgītanṛttaiśca maṅgalaiḥ

'''18.226''' śaivaṃ svayaṃ samuddhṛtya deśikaḥ so’dhiropya ca vāme dakṣiṇahastena kumbhavaktraṃ vigṛhya ca

'''18.227''' mūrtipaiḥ śaktikumbhādīnvahadbhistadvadeva saḥ anuyāto guruḥ kartrā putrabandhuyutena ca

'''18.228''' pradakṣiṇamupāvṛtya prāsādaṃ praviśettataḥ agre krameṇa saṃsthāpya sthaṇḍilopari tānghaṭān

'''18.229''' uttarābhimukho bhūtvā kṛtvā mantrātmikāṃ tanum utthāya pañcagavyena sarvātmānaṃ samuccaran

'''18.230''' abhiṣicya ca talliṅgaṃ punargandhodakena ca tataścāsanamapyatra liṅgamūle prayojayet

'''18.231''' tatra mūrtiṃ samāvāhya liṅge sādāśivaṃ tathā vidyādehaṃ ca saṃkalpya tataḥ kumbheṣu devatāḥ

'''18.232''' yathākrameṇa saṃpūjya cārghyagandhādibhistathā mūlamantraṃ samuccārya śivakumbhasthitaṃ śivam

'''18.233''' tasmātkumbhātsamādāya mantramūrtiṃ tadambhasā kūrcāgraniḥsṛtenaiva nyaselliṅgasya mūrdhani

'''18.234''' tataḥ kumbhasthatoyena śanaiḥ kālātmanāṇunā abhiṣicya tataścāpi śaktimādhārarūpiṇīm

'''18.235''' tanmantreṇaiva tatkumbhaṃ tathā pīṭhe ca vinyaset tasyā gāyatrīmuccārya tena kumbhena piṇḍikām

'''18.236''' abhiṣicya tato’ṣṭau ca cakravartikrameṇa vai pīṭhe śakrādi saṃyojya svanāmapadamantrakaiḥ

'''18.237''' abhiṣicya tataḥ paścātkuryādgandhāmbunā sudhīḥ abhiṣekaṃ tato dattvā mūrdhasvarghyaṃ ca pañcasu

'''18.238''' tattanmukhāṇubhirmantrī tato mantrānkramānnyaset praṇavaṃ prathamaṃ mūrdhni kālātmānaṃ tato nyaset

'''18.239''' tadaṅgabhūtānmantrāṃśca tattadaṅgeṣu vinyaset īśānādyatha sadyāntaṃ pañcabrahmāṇyanukramāt

'''18.240''' madhye pūrve tato yāmya uttare paścime’pi ca svasvamudrāprayogeṇa vinyasecca kalāstataḥ

'''18.241''' śaktibhiḥ saha liṅgasya sthāneṣūkteṣu vinyaset tathā tatrocchritāṅguṣṭhaṃ muṣṭiṃ badhvā tu vinyaset

'''18.242''' liṅgāgre pīṭhikāyāṃ tu śaktigāyatrimabhyaset tato’ṅguṣṭhaṃ śive kṛtvā śivagāyatrimabhyaset

'''18.243''' evaṃ syānmuktikāmasya śivaśaktyostu saṃgatiḥ viparītavidhānena bhuktikāmasya sā bhavet

'''18.244''' piṇḍikā tu bhavecchaktirliṅgaṃ tu parameśvaraḥ tayoryaḥ kriyate yogaḥ sā pratiṣṭheti kīrtitā

'''18.245''' evaṃ saṃsthāpite liṅge liṅgamudrāṃ tu darśayet tato namaskṛtiṃ badhvā tato liṅgaṃ samarcayet

'''18.246''' pādyamācamanaṃ cārghyaṃ pādavaktraśirassu ca dāpayeddhṛdayenārghyaṃ śeṣe ca brahmapañcakaiḥ

'''18.247''' namaḥsvāhānamo’ntaistu krameṇaivaṃ janārdana gandhādibhistato mantrī śivaliṅgasya mūrdhani

'''18.248''' praṇavenātha mūlena brahmabhiśca sunirgataiḥ kālātmānaṃ tadaṅgaistu pūjayedanupūrvaśaḥ

'''18.249''' karpūrāgarumiśreṇa candanena sapīṭhakam liṅgaṃ paryāptamālipya sadīpena ca dhūpayet

'''18.250''' sugandhamālyavastrādyairhemapaṭṭādibhistataḥ alaṃkṛtya tato dhīmānhaviḥ sājyaṃ nivedayet

'''18.251''' śuddhānnaṃ pāyasaṃ gaulaṃ mudgānnaṃ kṛsarānnakam sarvopadaṃśasaṃyuktaṃ gulakhaṇḍājyasaṃyutam

'''18.252''' dadhisvāduphalopetaṃ pañcavaktreṣu dāpayet kevalaṃ pāyasaṃ vāpi śuddhānnaṃ ca yathāvidhi

'''18.253''' pañcavaktreṣu dattvātha vinā caṇḍaṃ vyapohya ca mukhavāsasamāyuktaṃ tāmbūlaṃ ca nivedayet

'''18.254''' tato vidyeśvarāṃścaiva pūrvādikramato yajet athomādīngaṇeśāṃśca saumyādīnnyasya pūjayet

'''18.255''' tadbāhye lokapālāṃśca pūrvādārabhya pūjayet īśānaśakrayormadhye brahmāṇaṃ nyasya pūjayet

'''18.256''' rakṣovāruṇayormadhye viṣṇuṃ vinyasya pūjayet tadbāhye’tha tadastrāṇi vajrādīni ca pūjayet

'''18.257''' paścimadvāraharmye tu kiñcidbhedo’tra dṛśyate paścimāṃ diśamārabhya vidyeśānabhito yajet

'''18.258''' gaṇeśvarānumādīṃśca saumyādārabhya pūjayet upacārāṇi sarvāṇi sadyojāte prakalpayet

'''18.259''' sadyojātādivaktrāṇāṃ pañcānāṃ janārdana paścimottarayāmyeṣu pūrve cordhve’pyanukramāt

'''18.260''' saṃsthitirniyatā tasmādālaye tu pratiṣṭhite liṅge tu hastapādānāṃ kalpanā dvārasaṃmukhāt

'''18.261''' tasmātsadāśive mūrtirevaṃ syādarcanādiṣu evaṃ saṃpūjya cārghyādyairdīpāntaṃ tu yathākramam

'''18.262''' svaiḥ svaiśca nāmabhirmantraiḥ kṛtvā caivaṃ pradakṣiṇam savyāpasavyamārgeṇa dattvā puṣpāñjaliṃ śive

'''18.263''' mūrdhnā praṇamya deveśaṃ bhūpṛṣṭhapatitena tu prārthayenmūrtipairevaṃ stutvā natvā svadiksthitaiḥ

'''18.264''' sarvamantrādirūpa tvaṃ lokānugrahakāmyayā atra liṅge mahādeva saṃnidhiṃ kuru sarvadā

'''18.265''' yāvaccandraśca sūryaśca yāvattiṣṭhati medinī tāvattvayātra deveśa sthātavyaṃ svecchayā vibho

'''18.266''' jñānato’jñānato vāpi śāstroktaṃ ca kṛtaṃ hi yat tatsarvaṃ pūrṇamevāstu tvatprasādānmaheśvara

'''18.267''' iti vijñāpya deveśaṃ saṃnidhīkṛtya mudrayā saṃnidhāpya tato liṅge śivaṃ niṣṭhurayā kramāt

'''18.268''' nirodhayettadā mantrī saṃnidhiṃ hṛdayāṇunā nirodhanamaghoreṇa kuryādvai śāstracintakaḥ

'''18.269''' yajamānaḥ phalāpekṣī śivāgre saṃsthitastadā sasutabhrātṛbandhuśca natvā devaṃ ca deśikam

'''18.270''' bhūyo bhūyaḥ prasannātmā prārthayecca tato gurum tvatprasādādahaṃ loke jāto’sminhi narottamaḥ

'''18.271''' yattvayādya kṛtaṃ karma liṅgasaṃsthāpanaṃ prati śreyasāṃ paramaṃ śreyo mamāstu phalasādhanam

'''18.272''' anugṛhya prasīdeti natvā natvābhidhāya ca prabhūtāṃ saṃpadaṃ dadyādvittaśāṭhya vivarjitām

'''18.273''' gobhūhiraṇyavastrādyairhastyaśvaśayanāsanaiḥ dāsīdāsagṛhārāmairativistīrṇalakṣaṇām

'''18.274''' dakṣiṇāṃ gurave dadyāt sādhakā yadi mūrtipāḥ yadi vā putrakāsteṣāṃ pādaṃ pādārdhameva hi

'''18.275''' deśikāddakṣiṇā proktā daivajñavedajāpinām pādaṃ cāpi tadardhaṃ ca tadardhaṃ ca kramādbhavet

'''18.276''' tatastāndeśikādīṃstu yajamānaḥ sa bhojayet mṛṣṭānnamatha tāmbūlaṃ dattvā teṣāṃ krameṇa tu

'''18.277''' svayaṃ bhuñjīta paścāttu caturthe’hani deśikaḥ śivāgre sthaṇḍilaṃ kṛtvā vidhinānena homayet

'''18.278''' praṇavenātha mūlena tataḥ saṃvatsarātmanā samidājyacarūṇāṃ tu pratyekaṃ śatasaṃkhyayā

'''18.279''' hutvāhutīstataścāpi kevalājyena deśikaḥ tadaṅgairbrahmabhiścāpi kalāmantraiśca homayet

'''18.280''' pratyekaṃ śatamardhaṃ vā tataḥ śaktestu mūlataḥ tadaṅgaiścāpi kurvīta homaṃ pūrvoktasaṃkhyayā

'''18.281''' evaṃ caturthahomaṃ tu kṛtvā tasmindine sudhīḥ liṅge’tha snapanaṃ kṛtvā sahasrādiṣu saṃbhavam

'''18.282''' caṇḍeśaṃ caṇḍayogena śāṃkare sthāpayedatha alābhe pratimāyāstu pīṭhe vā caṇḍanāyakam

'''18.283''' prabhūtaṃ tu havirdattvā devāyāsmai pradāpayet tasminnevāhanīśasya parito dhāmni kalpayet

'''18.284''' parivārasthitiṃ tatra vidhivaddeśikottamaḥ saptāhamapi pañcāhaṃ tryahamekāhameva vā

'''18.285''' vidhānenotsavaṃ kuryādathavā yantraliṅgataḥ utsavaṃ balidānena vinā tatra prakalpayet

'''18.286''' caturthāhātsamārabhya kuryādastrotsavaṃ kramāt pratiṣṭhādinamārabhya deśikādīṃstu dīkṣitān

'''18.287''' bhojanācchādanādyaistu tatra māheśvarānapi tadā dineṣu sarveṣu yajamānastu toṣayet

'''18.288''' kuryādavabhṛthasnānaṃ sarvapāpapraṇāśanam iti yaḥ kārayenmartyaḥ pratiṣṭhāṃ liṅgapīṭhayoḥ

'''18.289''' tenaiva sthāpitaṃ sarvaṃ jagatsthāvarajaṅgamam sarvadevāśca devyaśca tena samyak pratiṣṭhitāḥ

'''18.290''' sarve yajñāḥ kṛtāstena samagravaradakṣiṇāḥ tena sarvatapodānatīrthānyācaritāni ca

'''18.291''' ekaviṃśatkulopetaḥ paratra ca śive pure kalpakoṭisahasrāṇi kalpakoṭiśatāni ca

'''18.292''' bhuktvā tu vipulānbhogān śivasāyujyamāpnuyāt

===Kapitel 19===

''ekonaviṃśaḥ paṭalaḥ · snānavidhiḥ''

'''19.1''' tataḥ paramidaṃ vakṣye snānaṃ pāpaharaṃ param tacca ṣaḍvidhamuddiṣṭaṃ sarveṣāṃ kāyaśuddhidam

'''19.2''' caturvidhānāṃ śaivānāṃ pūjanaṃ ca viśeṣataḥ vāruṇaṃ prathamaṃ proktamāgneyaṃ tu dvitīyakam

'''19.3''' māhendraṃ tu tṛtīyaṃ syādvāyavyaṃ syāccaturthakam māntraṃ tu pañcamaṃ proktaṃ ṣaṣṭhaṃ mānasamucyate

'''19.4''' tāni saṃkṣepato vakṣye krameṇātra janārdana nadīnadataṭākeṣu palvalaplavaneṣu ca

'''19.5''' dīkṣitasyottamaṃ snānaṃ puṣkariṇyāṃ tu madhyamam kanyasaṃ dīrghikādyāsu gṛhe’śreṣṭhamudāhṛtam

'''19.6''' pratyūṣe tu samutthāya śayanātpūjayetsudhīḥ ātmanyālokayejjyotiḥ paraṃ tacchivarūpiṇaḥ

'''19.7''' namaḥ śivāya śarvāya devāya paramātmane sadaikarūparūpāya vikalparahitāya te

'''19.8''' saṃjapyaivaṃ bahiḥ kuryānnijadhāmnaḥ sahāyavān nirjanaṃ deśamāsādya kaṇṭakena vivarjitam

'''19.9''' channamūrdhopavītaṃ tu kṛtvā karṇe’tha dakṣiṇe uttarābhimukhaḥ svastho rātrau ceddakṣiṇāmukhaḥ

'''19.10''' upaviśyātha tatraiva viṇmūtraṃ tu visarjayet tṛṇādyantarite deśe vāgyamī na nirīkṣayet

'''19.11''' diśo liṅgaṃ malaṃ cāpi na niṣṭhīvanamācaret gobrāhmaṇāgninārīṇāṃ tathā devālayasya ca

'''19.12''' saṃmukhaṃ parihṛtyaiva yatīnāṃ ca viśeṣataḥ kuśabālatṛṇopete gośakṛdbhasmasaṃyute

'''19.13''' ekavṛkṣasamopete kṛṣṭe valmīkasaṃyute mahīpatisamīpe ca garte pretavane tathā

'''19.14''' udyāne ca nadītīre kuryānnāvaśyakaṃ sudhīḥ samyagāvaśyakaṃ kṛtvā tṛṇajūṭyā gudaṃ mṛjet

'''19.15''' loṣṭakenāthavā naitatkāṣṭhapāṣāṇagomayaiḥ tatastyaktamalaścaiva liṅgaṃ vāmena pāṇinā

'''19.16''' saṃgṛhyotthāya gatvātha śuddhadeśaṃ tataḥ sudhīḥ tatra hṛtvā mṛdaṃ śuddhāmupariṣṭādvyapohya ca

'''19.17''' śaucārthaṃ mṛttikāṃ dakṣahastenaiva samādadet setuvalmīkavṛkṣāmbugrāmadhānyotkarasthitām

'''19.18''' niyuktāṃ cānyaśaucāya nādadīta kadācana jalāśayamanuprāpya tatra śaucārthameva hi

'''19.19''' kṣālayetprathamaṃ tīraṃ tatra mṛtsaṃniveśayet tayā śaucaṃ tataḥ kuryāddakṣiṇenoddhṛtāmbunā

'''19.20''' ekadhā mṛttikā meḍhre saptadhāpānadeśake pañcadhā vāmapāṇau ca saptadhā cobhayorapi

'''19.21''' ekaikadhā mṛdaṃ paścātpādayośca dvayorapi punarapyekadhā pāṇau mṛttikāṃ prakṣipedbudhaḥ

'''19.22''' tatacotthāya gatvānyadeśaṃ tatra samācaret ācamya dantakāṣṭhena dantadhāvanamācaret

'''19.23''' dantakāṣṭhamatho vakṣye dantadhāvanasaṃmatam śirīṣabilvakārañjamapāmārgamathārjunam

'''19.24''' khādiraṃ muktaye bhuktyai jambvāmrakakubhodbhavam satvak sārdramṛju śreṣṭhaṃ samacchedamaninditam

'''19.25''' tadaṣṭāṅgulaṃ muktyai ca bhuktyai ca dvādaśāṅgulam dantakāṣṭhamiti proktaṃ dantānāṃ malaśodhanam

'''19.26''' tālapatrādibhiḥ paścāttāluśodhanamācaret kṛtvāsyaśuddhimācamya snānārthaṃ śucideśajām

'''19.27''' mṛttikāmastrataḥ khātvā tyaktvordhve caturaṅgulam adhaḥsthitāṃ tu saṃgṛhya kṣālitāmbhastaṭe tataḥ

'''19.28''' śirasā tāṃ samādāya śikhayā śodhayettataḥ kavacena tridhā bhajya tāsu cāpyekayā mṛdā

'''19.29''' ānābhi kṣālayedguhyamanyayā śastrajaptayā tataḥ sarvāṅgamālipya praviśyāntarjale sthitaḥ

'''19.30''' pidhāyākṣāṇi pāṇibhyāṃ dīprakālānalaprabham astraṃ hṛdi tadā dhyāyan saṃnimajjyopaviśya ca

'''19.31''' snātvottīrya purā brāhmīṃ yajetsaṃdhyāṃ tu bhautikaḥ naiṣṭhikaścedyajetsaṃdhyāṃ kevalaṃ cāstrasaṃjñitām

'''19.32''' prāṇāyāmatrayaṃ kṛtvā śivāstrāṣṭaśataṃ japet sarvātmahṛdayaṃ mantrī namaskārāntamuccaran

'''19.33''' prāñjalistrirupāvṛtya copasthānaṃ samācaret astrasaṃdhyā tu nirdiṣṭā śaivasādhāraṇā hitā

'''19.34''' sā saṃdhyā viśvalokaikavandyā bhavati bhāsvarā sā śaivī śaktirityuktā saṃdhyā sarvaikasākṣiṇī

'''19.35''' prātaḥ sāruṇavarṇā syānmadhyāhne ca sitaprabhā śyāmā sāyāhnakāle tu saṃdhyāvandanakarmaṇi

'''19.36''' saṃdhyākāle kṛtaṃ karma yacchubhaṃ cāśubhaṃ bhavet tatsarvaṃ tannamaskārādvardhate kṣīyate’pi ca

'''19.37''' tasmāttadvandanaṃ kuryādyadīcchecchubhamātmanaḥ tato mṛccheṣamādāya kṛtvā vāmakare sudhīḥ

'''19.38''' praviśyāntarjalaṃ tatra sthito dinamukhaṃstataḥ mṛtpiṇḍaṃ tu tridhā bhajya pūrvamastreṇa mantravit

'''19.39''' dakṣiṇaṃ tu śivenaiva tanutrāṇena cottaram saptakṛtvastato mantrī pratyekamabhimantrayet

'''19.40''' astrajaptaṃ kṣipeddikṣu varmajaptaṃ tanau tataḥ ālipya śirasaḥ paścācchivajaptaṃ jale kṣipet

'''19.41''' tatra bāhughnamātreṇa śivatīrthaṃ prakalpayet hastayoḥ sūryasomau tu dakṣiṇetarayoḥ kramāt

'''19.42''' vinyasya kumbhamudrāṃ tu badhvā mūrdhani secayet pañcabrahmaṣaḍaṅgaiśca smṛtvā devaṃ triyambakam

'''19.43''' saṃnimajjya tato mantrī praṇavaṃ samyaguccaran snātvā rājopacāreṇa sugandhāmalakādibhiḥ

'''19.44''' samuttīrya jalātpaścāttattīrthamupasaṃharet taptena śītalenātha pavitreṇāmbunā śucau

'''19.45''' deśe snānaṃ gṛhe vātha kuryādvai vidhinā sudhīḥ śiraḥprabhṛti conmṛjya mṛdunā śuddhavāsasā

'''19.46''' samantramācamedbhūyaḥ paridhāyāmbaraṃ śuci baddhacūḍotkuṭāsīno jānumadhyakaradvayaḥ

'''19.47''' āveṣṭitaśirāḥ pādau pāṇī prakṣālya vāgyataḥ prāgvaktro vāpyudagvaktraḥ sapavitrakarastadā

'''19.48''' jale caikaṃ padaṃ nyasya sthale caikaṃ padaṃ nyaset kṛtvā gokarṇavaddhastaṃ tenoddhṛtya tato jalam

'''19.49''' prakṛtisthamasattvaṃ ca phenādirahitaṃ śuci māṣamagnapayo mantrairātmavidyāśivāṇubhiḥ

'''19.50''' hṛdgaṃ viprasya nirdiṣṭaṃ kaṇṭhagaṃ syānnṛpasya tu tālugaṃ viṭsavarṇānāṃ krameṇābaśanaṃ bhavet

'''19.51''' triḥ pibedbrahmatīrthena dviroṣṭhau hetinā mṛjet sarvātmanā tato mantrī khāni sarvāṇi saṃspṛśet

'''19.52''' aṅguṣṭhānāmikābhyāṃ tu savyavāmakrameṇa vai netre spṛṣṭvā tato’ṅguṣṭhatarjanībhyāṃ ca nāsikām

'''19.53''' kaniṣṭhāṅguṣṭhayogena madhyamāṅguṣṭhayogataḥ karṇau bāhū ca saṃspṛśya nābhimaṅguṣṭhakena ca

'''19.54''' tarjanīmadhyamānāmākaniṣṭhābhiḥ stanāntaram aṅgulyagraistataḥ sarvaiḥ śiraḥsparśaṃ samācaret

'''19.55''' evamācamanaṃ kṛtvā hitvā caiva pavitrakam anyatkṛtvā pavitraṃ ca kuryādatrāghamarṣaṇam

'''19.56''' vāmahaste jalaṃ sthāpya sravadutkṣipya mastake mantrasaṃhitayā dhīmānmārjanaṃ samyagācaret

'''19.57''' dakṣahastasthitaṃ kṛtvā vāmapāṇestato jalam āghrāya pūrakeṇaiva kṛṣṇaṃ pāpaṃ vicintayet

'''19.58''' recakena punaḥ pāpamastreṇāśu jalasthitam dhyātvā bhūmau kṣipeddhīmāṃstajjalaṃ cāstramantrataḥ

'''19.59''' aghamarṣaṇamevaṃ syāt tatastarpaṇamucyate ācamya vidhivadbhūtvā sapavitrakarastataḥ

'''19.60''' puṣpadarbhatilaiścāpi pṛthagakṣatasaṃyutaiḥ devānṛṣīnpitṝṃścāpi tarpayetkramaśo budhaḥ

'''19.61''' gṛhītvāñjalinā pūrvaṃ sapuṣpaṃ sākṣataṃ jalam devānāṃ vakṣyamāṇānāmaṅgulyagraiśca tarpayet

'''19.62''' brahmaviṣṇū tato rudramīśvaraṃ ca sadāśivam sarasvatīṃ tato lakṣmīmumāṃ gaurīṃ manonmanīm

'''19.63''' bhavādīnaṣṭamūrtīṃśca śaktīrvāmādikāstataḥ rudrānvasūṃstathādityānprajeśaṃ ca vaṣaṭkṛtim

'''19.64''' indrādilokapālāṃśca vajrādīnyāyudhānyapi navagrahāṃstathārkādīṃstarpayetsvasvanāmataḥ

'''19.65''' svāhāntena hṛdā mantrī sadhāreṇa yathākramam mūlamantrādimantrāṃstu sarvānapyatha tarpayet

'''19.66''' tataḥ kaṇṭhopavītī syādṛṣitarpaṇakarmaṇi kṛtvā jalāñjaliṃ teṣāṃ kuśākṣatasamāyutam

'''19.67''' ārṣeṇaiva tu tīrthena ṛṣīṇāṃ tarpaṇaṃ bhavet atriṃ kratuṃ vasiṣṭhaṃ ca viśvāmitramataḥ param

'''19.68''' marīciṃ ca pulastyaṃ ca tathaivāgastyameva ca oṃkārādi svanāmnā tu tarpaṇaṃ syānnamo’ntakam

'''19.69''' apasavyopavītī syāttataśca pitṛtarpaṇe dakṣiṇāgrānkuśān bhūmāvāstīryāgreṣu tarpaṇam

'''19.70''' tilākṣatasamāyuktaṃ kṛtvā teṣāṃ jalāñjalim apasavyena hastena pitṛtīrthena tarpaṇam

'''19.71''' somādikānpitṝnsarvānsvadhā nama iti bruvan tarpayettarpayāmīti pitṛpatnyātmajāṃstathā

'''19.72''' gaṇāṃśca pitṛsaṃbandhīṃstarpayitvā tataḥ kramāt svapitṛnāmagotrābhyāṃ tarpayetpūrvavatsudhīḥ

'''19.73''' pitāmahamataścāpi prapitāmahameva ca pitāmahīṃ tataścāpi tarpayetprapitāmahīm

'''19.74''' tato mātāmahaṃ cāpi mātuścāpi pitāmaham prapitāmahaṃ tataścāpi tarpayenmantravittamaḥ

'''19.75''' jñātīnsakhīṃstathācāryāṃstarpayitvā samāhitaḥ tyaktvā pavitrakaṃ paścādācamya vidhipūrvakam

'''19.76''' pavitrahasto bhūtvātha kṛtvā caiva jalāñjalim ṣaḍakṣareṇa mantreṇa sūryasyāpyudakaṃ dadet

'''19.77''' jalasnānamiti proktaṃ bhasmasnānamathocyate āgneyaṃ tadbhavetsnānaṃ tacca bhasma caturvidham

'''19.78''' cāturvidhyamidaṃ viddhi kalpaṃ cāpyanukalpakam upakalpamakalpaṃ ca prathamāddhīnamucyate

'''19.79''' rogādirahitāyāstu yuvatyā gostu yadbhavet payasvinyāstu saṃgṛhya praṇavenābjapatrake

'''19.80''' palāśapatrake vātha bhūtale patitaṃ tu vā adhaścordhvaṃ parityajya tattathā śuci gomayam

'''19.81''' tena piṇḍāni kurvīta sarvātmānaṃ samuccaran ekānte śoṣayitvā tu nirdahecchivavahninā

'''19.82''' nityāgnau vā śucirdhīmāṅśivamantraṃ samuccaran kalpamevaṃ samuddiṣṭamanukalpamataḥ śṛṇu

'''19.83''' āraṇyaṃ gomayaṃ pūtaṃ cūrṇāyitvā nave ghaṭe prakṣipya pūrvavaddagdhamanukalpamiti smṛtam

'''19.84''' agnidagdhe tu kāntāre govāse vā gṛhādike iṣṭakāmṛdghaṭādīnāmāpāke vātha saṃsthitam

'''19.85''' gṛhītvā bhasma gomūtrātkṛtvā vai baddhapiṇḍitam saṃśoṣya pūrvavaddagdhamupakalpaṃ ca kīrtitam

'''19.86''' strīśūdrādijanairanyairviśuddhe tu mahītale dagdhaṃ yattadakalpaṃ syātteṣu caikaṃ caturṣvapi

'''19.87''' gṛhītvā śuddhapātreṣu tannikṣipya janārdana vastreṇāntaritaṃ kṛtvā sitaṃ keśādivarjitam

'''19.88''' tena praśasyate snānamāgneyamadhikaṃ guṇaiḥ prātarmadhyāhnasāyāhnamadhyarātreṣu suvratī

'''19.89''' jalasnānottaraṃ pūrvamanuttaramathottare na devasaṃnidhau mārge na cāgnigurusaṃnidhau

'''19.90''' urddhūlanaṃ prakartavyaṃ tathāśuddhe mahītale ācamya sukhamāsīnaḥ prāṅmukho vāpyudaṅmukhaḥ

'''19.91''' savyena muṣṭimādāya bhasmanāṃ susamāhitaḥ tisṛbhirdhāraṇābhistu viśodhyaitajjanārdana

'''19.92''' ṣaḍaṅgenābhimantryātha vāmahastatale nyaset urddhūlanaṃ tataḥ kuryāttena kādi samāhitaḥ

'''19.93''' īśenorddhūlayenmantrī mukhe tatpuruṣeṇa tu hṛdaye ghoramantreṇa vāmadevena guhyake

'''19.94''' pādayoḥ sadyamantreṇa pṛṣṭhe sarvātmanāṇunā astreṇorddhūlayetpaścātsavyavāmakrameṇa tu

'''19.95''' sarvāṅgāni samurddhūlya gatvānyatra tato budhaḥ parivartya tato vastraṃ kaupīnaṃ cācametsudhīḥ

'''19.96''' gṛhiṇāṃ vāruṇāṃ snānamāgneyaṃ brahmacāriṇām māhendrādicatuṣkaṃ tu yannaimittikametayoḥ

'''19.97''' urddhūlanavidhirhyevaṃ brāhmaṇasya śivāgame kṣatraviṭchūdrajātīnāṃ paṭṭapuṇḍraṃ lalāṭake

'''19.98''' tripuṇḍraṃ yaccaturṇāṃ ca varṇānāmapi yogyakam ṣaḍaṅgulasuvistīrṇaṃ brāhmaṇānāṃ tripuṇḍrakam

'''19.99''' nṛpāṇāṃ caturaṅgulyaṃ vaiśyānāṃ tu triyaṅgulam śūdrāṇāmapi sarveṣāṃ bhavedvyaṅgulavistṛtam

'''19.100''' savarṇādyanulomānāṃ vaiśyavattu tripuṇḍrakam dvātriṃśatsaṃdhideśeṣu ṣoḍaśasvathavā punaḥ

'''19.101''' kuryādaṣṭasu cāṅgeṣu sitena bhasitena ca sāmbunā prathamaṃ mūrdhni lalāṭe tu tataḥ param

'''19.102''' tataśca hṛdaye nyasya dordvaye’taḥ paraṃ bhavet aṃsayośca tataḥ kuryātkarṇayośca tato bhavet

'''19.103''' galamadhye tataḥ kuryādathaivaṃ pārśvayordvayoḥ vāmetarakrameṇaiva kṛkaṭyāṃ tu tataḥ param

'''19.104''' trikayośca tataḥ kuryātpaścātkūrparayorapi maṇibandhadvaye cātha tataścāpi kaṭidvayoḥ

'''19.105''' nābhau kukṣau tathā pṛṣṭha ūrvorapi tataḥ param jānudvayostataḥ kuryājjaṅghayoḥ pādayorapi

'''19.106''' dvātriṃśatsaṃdhayaḥ proktāḥ ṣoḍaśeṣvatha cocyate ke lalāṭe ca hṛdaye dordvayoḥ kaṇṭhamadhyame

'''19.107''' kṛkaṭyāṃ karṇayoścaiva pārśvayornābhideśake kūrparadvitaye caiva maṇibandhadvaye tathā

'''19.108''' ṣoḍaśasthānamuddiṣṭaṃ sthānāṣṭakamataḥ śṛṇu mūrdhni deśe lalāṭe ca hṛddeśe dordvayostathā

'''19.109''' karṇayorubhayoścaiva galamadhye tataḥ param evaṃ trividha uddiṣṭastripuṇḍrasthānanirṇayaḥ

'''19.110''' eteṣvekatamaṃ kuryādgṛhasthaḥ pāpaśodhanam brahmacārī tvidaṃ kuryādbhasmorddhūlanamuttamam

'''19.111''' gṛhasthasyāpi tatproktaṃ prāyaścittavidhau param snānadvayamidaṃ proktaṃ jalabhasmopalakṣitam

'''19.112''' māhendrādicatuṣkaṃ yatkrameṇa snānamucyate ātape vṛṣṭisaṃyukte prāṅmukhaścordhvabāhukaḥ

'''19.113''' īśānaṃ tu japenmantraṃ gacchecca padasaptakam snānaṃ māhendramityuktaṃ vāyavyamadhunocyate

'''19.114''' vāyunā divi vistīrṇaṃ rajo yadgokṛtaṃ mahat anusṛtya tu tadgacchejjapanpuruṣamuttamam

'''19.115''' yāvacchatapadaṃ tu syātsnānaṃ vāyavyamuttamam sadyādiparipūtena vāriṇābhyukṣaṇaṃ tu yat

'''19.116''' mūrdhni tanmāntramuddiṣṭaṃ mānasaṃ tvadhunocyate praṇavasya japenaiva mānasena prakīrtitam

'''19.117''' aṣṭottaraśatenaiva prāṇāyāmayutena ca mānasaṃ snānamevaṃ syātsnānānyuktāni ṣaṇmayā

'''19.118''' gṛdhravāyasasaṃspṛṣṭe śvakharoṣṭrakapotakaiḥ grāmasūkarasaṃspṛṣṭe grāmakukkuṭakaistathā

'''19.119''' vīrahāvratisaṃspṛṣṭe nirmālyasya tu bhojane rajasvalāntyajapretasūtikāpatitairapi

'''19.120''' anyaiśca liṅgibhiḥ spṛṣṭe vāruṇaṃ snānamācaret viṇmūtraretaḥsaṃsarge durbhuktau vamane tathā

'''19.121''' nābherūrdhvaṃ karau hitvā yadaṅgaṃ tu malādibhiḥ duṣyettatra caretsnānaṃ śeṣaṃ prakṣālya śuddhyati

'''19.122''' suptvā bhuktvā jalaṃ pītvā kṛtvā cāvaśyakaṃ vratī śayyādāvavasāne ca bhasmasnānaṃ samācaret

===Kapitel 20===

''viṃśaḥ paṭalaḥ · arcanāvidhiḥ''

'''20.1''' atha nityārcanaṃ vakṣye sarvasiddhipradaṃ nṛṇām sarvapāpaharaṃ caiva sarvayajñottamottamam

'''20.2''' ātmārthaṃ ca parārthaṃ ca yajanaṃ dvividhaṃ smṛtam dīkṣito guruṇā tena dattaṃ liṅgaṃ calātmakam

'''20.3''' gṛhītvā tatra vānyatra kṣaṇike sthaṇḍile’thavā jale vā pratimāyāṃ vā maṇḍale citrake’pi vā

'''20.4''' paṭe vā hṛdaye vātha bhavedātmārthamarcanam śivaliṅge svayaṃbhūte liṅge bāṇārcite’pi vā

'''20.5''' gāṇape daivike vātha cārṣe vā mānuṣe’pi vā mukhaliṅgeṣu sarveṣu vyakteṣvapi janārdana

'''20.6''' prāsādādiṣu sarvatra sthāpiteṣu bahuṣvapi rājñā vā rājakalpairvā janairjānapadaistu vā

'''20.7''' anubhūya kṛtāṃ vṛttiṃ kriyate yadyadarcanam tatparārthamiti proktamanyeṣāṃ phaladānataḥ

'''20.8''' śivāśritasya tatproktaṃ brāhmaṇasya śivāgame kṣatriyāditrayāṇāṃ ca bāhyānāṃ na parārthakam

'''20.9''' savarṇādyanulomānāṃ proktamātmārthamucyate dvayoḥ parārthayajanaṃ śṛṇu vakṣye janārdana

'''20.10''' bhavedaṣṭaprakāraṃ tatprakārastvadhunocyate uttamatritayenātha madhyamatritayena ca

'''20.11''' adhamadvitayenāpi pūjaiṣā hyaṣṭadhā smṛtā ahni yāmacatuṣke tu pratiyāmaṃ viśeṣataḥ

'''20.12''' niśi yāmacatuṣke ca pratiyāmakṛtārcanā yathoktavidhinā pūjā sā bhaveduttamottamā

'''20.13''' divā yāmacatuṣkeṣu pūjanaṃ ca viśeṣataḥ rātrau ca tritaye kuryādyārcā sottamamadhyamā

'''20.14''' ahni saṃdhicatuṣkeṣu rātrisaṃdhidvaye’pi ca ṣaṭsaṃdhiṣu kṛtā pūjā sā bhaveduttamādhamā

'''20.15''' prātarmadhyāhnasāyeṣu rātrau yāme dvitīyake caturthe ca kṛtā pūjā sā bhavenmadhyamottamā

'''20.16''' ardhayāmārcanāhīnā sā bhavenmadhyamadhyamā prātarmadhyāhnasāyeṣu yā pūjā madhyamādhamā

'''20.17''' prātaḥkāle ca sāye ca yā pūjā sādhamottamā ekadhā tu kṛtā pūjā sā syādadhamamadhyamā

'''20.18''' adhamādhamapūjā ca naiva liṅgeṣu dṛśyate tasmādaṣṭaprakāro’yamiti tantre viniścitaḥ

'''20.19''' śuddhā miśrā ca saṃkīrṇā trividhā sātra kathyate śuddhā haviḥpradānāntā miśrā nityotsavāntakā

'''20.20''' saṃkīrṇā śuddhanṛttāntā tāsu pūjāsu sarvadā prātarmadhyāhnasāyeṣu yā pūjā kriyate janaiḥ

'''20.21''' tāṃ miśrāṃ tu prakurvīta saṃkīrṇāṃ vā viśeṣataḥ saṃpattāvapi sarvāsu copasaṃdhyāsu sarvadā

'''20.22''' miśrasaṃkīrṇayoḥ prāptirneṣyate’tra janārdana tāsu śuddhaiva pūjā syāditi śāstrasya niścayaḥ

'''20.23''' sūryodayātsamārabhya yāvadyāmaṃ tu yā kṛtā pūrvasaṃdhyeti sā proktā mahāsaṃdhyā ca sā bhavet

'''20.24''' tadūrdhve cārdhayāmena yā pūjā tu samarpitā sopasaṃdhyeti vijñeyā madhyāhne yāmataḥ kṛtā

'''20.25''' madhyāhnasaṃdhyā sāpi syānmahāsaṃdhyeti nāmataḥ tadūrdhve cārdhayāmena yā pūjā tu samarpitā

'''20.26''' sāpi syādupasaṃdhyaiva cāhni yāmacatuṣṭaye mahāsaṃdhyādvayaṃ proktamupasaṃdhyādvayaṃ tataḥ

'''20.27''' rātrau cāstaṃ samārabhya yāvadyāmāntamarpitā pūjā sāpi mahāsaṃdhyā hyardhayāmaṃ tato bhavet

'''20.28''' tataścāpyardhayāmena tṛtīyāṃ parikalpayet pañcanāḍikayā paścāccaturthī parikalpayet

'''20.29''' nāḍikāpañcakaṃ proktamudayātpūrvameva hi rātrau mahatī saṃdhyā yā bhavedekā tato hare

'''20.30''' trisaṃdhyāścopasaṃdhyāḥ syurevaṃ pūjākramo bhavet vibhave sati pūjāsu krama eṣa udāhṛtaḥ

'''20.31''' evamaṣṭavidheṣveṣu yajaneṣvekamāśrayet yatra liṅge yathā pūjā kriyate vidhinā purā

'''20.32''' tasmiñjāte tu vaikalye prāyaścittaṃ vidhīyate iti vijñāya yatnena vidhinaiva samarcayet

'''20.33''' prātarutthāya nirvṛttanityasnānādiko’rcakaḥ pradakṣiṇamupāvṛtya praviśyātha śivālayam

'''20.34''' dhautapādaḥ samācāntaḥ prāsādābhyantare’thavā dvārapārśve sthitaḥ puṣpaṃ brahmaṇe’tra vinikṣipet

'''20.35''' tato’nantāsanāyeti namaskārāntamuccaran āsane sukhamāsīna udagāsyaḥ prasannadhīḥ

'''20.36''' smṛtvā prākāramastreṇa śivadhāmnastato’pi tat tanutrāṇena saṃchādya rakṣārthaṃ yajñakarmaṇi

'''20.37''' ātmaśuddhiṃ tataḥ kuryād dvividhā sā prakīrtitā ātmanaśca śarīrasyāpyātmasaṃjñātra kathyate

'''20.38''' tayostu śuddhirityātmaśuddhirevaṃ prakīrtitā pavitrapāṇiḥ saṃsādhya sāmānyārghyaṃ tu pūjakaḥ

'''20.39''' puṣpākṣatasamopetaṃ sāmānyārghyamiti smṛtam abhyukṣya tena toyena svaśiro’straṃ samuccaran

'''20.40''' vidhyuktaṃ ca tataḥ kuryāttripuṇḍraṃ sitabhasmanā prāṇāyāmatrayaṃ paścādrecakādikrameṇa tu

'''20.41''' kṛtvāntaḥsuṣiraṃ dhyāyedāpādatalamastakam suṣumnāmadhyagāṃ tasya bahirantaśca saṃsthitām

'''20.42''' smaredvyomātmikāṃ śaktiṃ punaḥ suṣiramadhyame vidyujjvalantaṃ huṃkāraṃ saṃcintyāyamya cānilam

'''20.43''' tadūrdhvasthe ca huṃkāre cittamāveśya mantravit recakānte tatastena phaḍantena vibhedayet

'''20.44''' granthīnhṛtkaṇṭhayostālu bhrūmadhyabrahmarandhrajān tataḥ pratinivṛttastu caitanyaṃ pūrakeṇa tu

'''20.45''' hṛdi saṃhṛtya tatrasthaṃ sāntabījamayaṃ hṛdā smṛtvā saṃpuṭitaṃ jīvaṃ tanuṃ puryaṣṭakānvitam

'''20.46''' huṃkārasya śikhāntasthaṃ sūkṣmamātmānamavyayam kṛtvā kumbhakamūrdhve taṃ recakena pravartayet

'''20.47''' randhraistaistu purā proktairhuṃkārodghātamantrataḥ tataḥ śive śikhāgre tu śuddhasphaṭikasaṃnibhe

'''20.48''' dvādaśāṅgulamātrasthe tārarūpe niveśayet dhyātvā dehaṃ svakaṃ paścāddahedvai tanuromataḥ

'''20.49''' agnimaṇḍalamadhyasthajvālāmālānusantataiḥ pādāṅguṣṭhaṃ samārabhya mastakāntaṃ ca mantravit

'''20.50''' dagdhaniḥśeṣapāpatvādvimalīkṛtamujjvalam sitabhasmamayaṃ dhyātvā  bhūtaśuddhiṃ samārabhet

'''20.51''' pañcabhūtasamārabdhaṃ śarīraṃ sarvadehinām tasmātteṣu kṛtā śuddhirbhūtaśuddhiriti smṛtā

'''20.52''' bhūtāṃśānāṃ śarīre’sminmiśrabhāvātsthitāvapi vyavacchedasthitiṃ teṣāṃ śuddhyarthaṃ parikalpayet

'''20.53''' śuddhirmantrātmikā yasmāttasmānmantreṇa śodhayet pṛthvyādibhistato bījaiḥ pañcabhiśca janārdana

'''20.54''' hṛdayaṃ ca śiraścaiva śikhā kavacameva ca astraṃ ca kramaśastvetānsaṃyojya susamāhitaḥ

'''20.55''' huṃphaḍantaṃ tatasteṣu pṛthaksarveṣu yojayet śodhayetpañcabhūtāni smṛtvā tanmaṇḍalādikam

'''20.56''' caturaśraṃ haridrābhaṃ kaṭhinaṃ vajralāṅchitam nivṛttyākhyakalārūpaṃ parameṣṭhyadhidaivatam

'''20.57''' ājānu saṃsthitaṃ tacca mantrodghātaiśca pañcabhiḥ viśodhya pārthivāṃśaṃ tamāpyaśuddhirataḥ param

'''20.58''' cāpākāraṃ sitaṃ saumyaṃ padmalāṅchanalāṅchitam pratiṣṭhāśaktirūpaṃ taṃ viṣṇvīśaṃ toyamaṇḍalam

'''20.59''' ānābhi saṃsthitaṃ tacca caturudghātataḥ śuciḥ āgneyamaṇḍalaṃ raktaṃ tryaśraṃ svastikalāṅchitam

'''20.60''' krūraṃ vidyākalārūpaṃ raudramākaṇṭhasaṃsthitam udghātaiḥ śodhanaṃ tasya tribhireva prakīrtitam

'''20.61''' vāyavyaṃ tu ṣaḍaśraṃ syātkṛṣṇaṃ ṣaḍbindulāṅchitam calaṃ śāntikalārūpamaiśvaraṃ ca lalāṭake

'''20.62''' udghātadvitayenātha tasya śuddhirudāhṛtā ākāśamaṇḍalaṃ vṛttaṃ pāṇḍaraṃ śūlalāṅchitam

'''20.63''' nirmalaṃ śāntyatītākhyaṃ sadāśivādhidaivatam lalāṭād dvādaśāṅgulyāmekodghātastataḥ śuciḥ

'''20.64''' viśuddhabhūtajāte’smin dehe dhātūṃśca śodhayet tvaco’sṛṅmāṃsayoścaiva medaso’sthnastataḥ param

'''20.65''' majjāyāḥ śuklakasyāpi śuddhiṃ bhūrādisaptabhiḥ mantraiḥ kuryācchirovaktrakaṇṭhahṛdguhyajānuṣū

'''20.66''' pādayoḥ saṃsthitānmatvā krameṇaiva janārdana evaṃ śuddhaṃ śarīraṃ tat sravatā paramāmṛtāt

'''20.67''' tārarūpācchivādasmādamṛtenātha pūrayet brahmarandhrapraviṣṭena candrabījaṃ samuccaran

'''20.68''' tataśca saṃsmareddehaṃ vimalaṃ bhāsvaraṃ tathā akalaṅko yathā pūrṇaścandro nabhasi nirmale

'''20.69''' īdṛśīmanayoḥ śuddhiṃ kṛtvā dehātmanorapi śivībhūte śarīre’smiṅśivībhūtasya dehinaḥ

'''20.70''' āsanaṃ hṛdi niṣpādya sāṣṭapatraṃ sakarṇikam padmaṃ tatrasthamātmānamanāmayamanākulam

'''20.71''' bījarūpaṃ samānīya prasphuradraśmimaṇḍalam vyomasthāddvādaśāntācca śivarūpaṃ niveśayet

'''20.72''' amṛtenābhiṣicyainaṃ tārarūpaṃ tataḥ śivam vauṣaḍantena mūlena karābhyāṃ vyomasaṃsthitam

'''20.73''' ānīyāmṛtarūpaṃ tamātmatattvopari nyaset karanyāsaṃ tataḥ kuryāttadvidhiścocyate mayā

'''20.74''' talake hastapṛṣṭhe ca gandhacandanalepite parasparāvagharṣeṇa sudhūpena pradhūpite

'''20.75''' śodhayitvāstramantreṇa mūlenaiva ca deśikaḥ hastayoḥ karaśākhāsu parvasvaṅguṣṭhayorapi

'''20.76''' vinyasetpañcamaṃ paścātpuruṣādicatuṣṭayam tarjanyādyāsu vinyasya kaniṣṭhāntāsu ca kramāt

'''20.77''' tataḥ kaniṣṭhikādyāsu pañcasvaṅguliṣu kramāt hṛdādipañcakaṃ nyasya talayornetrameva ca

'''20.78''' sthitinyāsastvayaṃ prokto viparītā tu saṃhṛtiḥ dakṣiṇetarayoḥ paścātsūryasomau ca hastayoḥ

'''20.79''' tattanmantreṇa vinyasya madhyamābhyāṃ parasparam kavacenāvakuṇṭhyātha karakacchapikāṃ tataḥ

'''20.80''' mudrāṃ karābhyāmābadhya karanyāsaṃ samāpya ca aṅganyāsaṃ tataḥ kuryānmantrairetairjanārdana

'''20.81''' mūrdhni vaktre ca hṛddeśe guhyadeśe’tha pādayoḥ īśānādikrameṇaiva vinyasetpiṇḍapañcakam

'''20.82''' aṅguṣṭhāgreṇa mūrdhnīśaṃ vinyasedbaddhamuṣṭinā mukhe tatpuruṣaṃ caiva tarjanyaṅguṣṭhayogataḥ

'''20.83''' madhyamāṅguṣṭhayogena hṛdyaghoraṃ tato nyaset aṅguṣṭhānāmikāyogād guhye vāmaṃ ca vinyaset

'''20.84''' kaniṣṭhāṅguṣṭhayogena sadyojātaṃ tu pādayoḥ piṇḍamantrairayaṃ proktaḥ kalāmantraistathocyate

'''20.85''' kalāḥ pañca catasraśca tato’ṣṭau ca trayodaśa tataścāṣṭau samādiṣṭāḥ kalāśceśāditaḥ kramāt

'''20.86''' śaktayaśca tathaiva syuḥ sthānāni ca tathaiva hi śaśinī cāṅgadā niṣṭhā marīcī jvālinī tathā

'''20.87''' mūrdhni madhye tataḥ pūrve dakṣiṇottarayorapi paścime ca krameṇaiva kalābhiḥ saha vinyaset

'''20.88''' īśānasya kalāḥ pañca vinyasyaivamataḥ param śāntirvidyā pratiṣṭhā ca nivṛttiśca krameṇa vai

'''20.89''' pūrve ca dakṣiṇe vaktre cottare paścime’pi ca evaṃ tatpuruṣasyāpi kalābhiḥ saha vinyaset

'''20.90''' tatpuruṣakalānyāse viśeṣo’tra vidhīyate śāntyatītakalāyuktaṃ praṇavaṃ cordhvavaktrake

'''20.91''' vinyasecchivaliṅge tu na śarīre tadiṣyate tamo mohā kṣudhā nidrā mṛtyurmāyābhayā jarā

'''20.92''' etā ghorakalāśaktirhṛdi kaṇṭheṃ’sayorapi nābhau kukṣau ca pṛṣṭhe ca vakṣasyaṣṭakalāyutāḥ

'''20.93''' vinyasyātha ca vāmasya trayodaśakalā api śaktibhirvinyasettāśca krameṇa kathayāmi te

'''20.94''' rajo rakṣā ratiḥ pālī kāmā saṃyaminī kriyā buddhiḥ kāryā tathā dhātrī bhrāmiṇī mohinī tathā

'''20.95''' etāḥ krameṇa guhye’tha meḍhre corvostathaiva ca jānvośca jaṅghayoścāpi sphicoḥ kaṭyāṃ tathaiva ca

'''20.96''' pārśvayośca kalābhistu vinyasyātha kalāṣṭakam sadyojātasya mantrasya śaktibhiḥ saha vinyaset

'''20.97''' siddhirṛddhirdyutirlakṣmīrmedhā kāntiḥ svadhā dhṛtiḥ śaktayastu samuddiṣṭāḥ sthānāni kramataḥ śṛṇu

'''20.98''' pādau pāṇī ca nāsā ca śiro bāhū tathaiva ca aṣṭatriṃśatkalā hyevaṃ vinyasetsvasvaśaktibhiḥ

'''20.99''' nijayā mudrayā paścādaṅgānyaṅgeṣu vinyaset hṛdayaṃ hṛdi vinyasya śiraḥ śirasi vinyaset

'''20.100''' śikhāyāṃ tu śikhāṃ nyasya kavacaṃ ca tathorasi netraṃ netradvayoścāpi vinyasedakṣarāṇi ca

'''20.101''' akāraṃ mūrdhni vinyasya cākāraṃ tu lalāṭake bhruvorikāramīkāraṃ dakṣiṇetarayoḥ kramāt

'''20.102''' tathaivokāramūkāraṃ netrayoratha vinyaset ṛkāraṃ tasya dīrghaṃ ca nāsikāpuṭayornyaset

'''20.103''' lṛkāradvitayaṃ tadvad dantapaṅkyośca vinyaset uttaroṣṭhe tathaikāramaikāramadharoṣṭhake

'''20.104''' okāraṃ cāpyathaukāraṃ karṇayoḥ syāttataḥ param aṃkārāḥkārakau cāpi gaṇḍayoratha vinyaset

'''20.105''' kavargaṃ dakṣiṇe haste cavargaṃ ca tathottare ṭavargamudaraṃ nyasya tapavargau ca pārśvayoḥ

'''20.106''' yavargaṃ dakṣiṇe pāde śavargaṃ vāmapādake ḷavarṇaṃ hṛdaye nyasya mūlamantraṃ ca vinyaset

'''20.107''' iti mantrākṣaranyāsaiḥ kṛtvā vidyāmayīṃ tanum paramīkaraṇaṃ kṛtvā mahāmudrāprayogataḥ

'''20.108''' prarocya tejasā dehamātmaśuddhiṃ samāpayet tataḥ sthānaviśuddhyarthaṃ nārācāstraprayogataḥ

'''20.109''' digbandhaṃ pūrvamāpādya tatastālatrayeṇa ca paritastālamastreṇa kavacenāvakuṇṭhanam

'''20.110''' kuryādyāgagṛhasyaivaṃ sthānaśuddhirudāhṛtā antaryāgaṃ tataḥ kuryāddhṛdaye ca vidhānataḥ

'''20.111''' nābhau homavidhānena lalāṭe dhyānayogataḥ dravyaśuddhiṃ tataḥ kuryādatha tacchuddhiriṣyate

'''20.112''' prakṣāliteṣu pātreṣu sarveṣvastraprayogataḥ pādyasyācamanīyasya tathārghyasya ca mantravit

'''20.113''' pātrāṇi vastrapūtena pūrayedgandhavāriṇā mantrasaṃhitayā tattaddravyāṇi nikṣipet

'''20.114''' praṇavenābhimantryaitanmudrayeddhenumudrayā avakuṇṭhanameteṣāṃ kavacenātha kalpayet

'''20.115''' gandhapuṣpādikaṃ yattad dravyaṃ saṃprokṣya cāstrataḥ abhyukṣya kavacenātha mantrasaṃhitayālabhet

'''20.116''' dravyaśuddhirvidhātavyā svaśirasyarghyasecanam kṛtvāstreṇātha mūlena puṣpamāropya mūrdhani

'''20.117''' lalāṭe tilakaṃ kṛtvā candanena sugandhinā mantraśuddhiṃ tataḥ kuryāttacchuddhiriha kathyate

'''20.118''' maunī bhūtvā śivaṃ dhyātvā mūlamantrādikānaṇūn oṃkāradīpitānsarvān nādāntān samyaguccaret

'''20.119''' mantraśuddhiṃ vidhāyaivaṃ dvāradevānyajettataḥ sāmānyārghyaṃ gṛhītvātha soṣṇīṣaḥ sottarīyakaḥ

'''20.120''' liṅgāgre tu vṛṣasthāne tasya pūjāṃ samārabhet vṛṣagāyatrimantreṇa sajalenābhiṣicya ca

'''20.121''' arghyaṃ dattvātha śirasi gandhapuṣpādibhiryajet prāsādaṃ saṃviśettasya dakṣiṇe vāmapārśvake

'''20.122''' nandigaṅge mahākālayamune ca kramādyajet dvārordhve vighnarājaṃ ca bhāratīṃ tasya dakṣiṇe

'''20.123''' kavāṭayośca vimalaṃ subāhuṃ dakṣiṇānyayoḥ pūrvaṃ tāraṃ samuccārya tato hṛdbījamuccaran

'''20.124''' tato nāma caturthyantaṃ namaskāreṇa yojayet mantreṇānena sarveṣāṃ kṛtvā yajanamuttamam

'''20.125''' nārācāstraprayogeṇa prāsādāntaḥ praviśya ca puṣpaṃ prakṣipya cāstreṇa pārṣṇighātatrayaṃ tataḥ

'''20.126''' kṛtvā dakṣiṇapādena tenaivāntaḥ praveśanam vāmaśākhāśrayī bhūtvā dehalīmaspṛśaṃstadā

'''20.127''' dehalyāṃ vighnanāśārthaṃ puṣpamastreṇa nikṣipet mahāghaṇṭāṃ tato’bhyarcya hetinā tena tāḍayet

'''20.128''' kṛtvā yavanikāṃ paścāddevābhyāśapraveśane īkṣaṇena tato divyān puṣpakṣepeṇa nābhasān

'''20.129''' bhūmiṣṭhān pārṣṇighātena vighnānutsārayettataḥ tato liṅgāntikaṃ gatvā dattvārghyaṃ liṅgamastake

'''20.130''' sāmānyārghyeṇa tāṃ pūjāṃ pūrvasaṃdhyārcitāṃ tataḥ gāyatryābhyarcya nirmālyaṃ pañcabrahma japedbudhaḥ

'''20.131''' kaniṣṭhānāmikābhyāṃ tu vyapohya śirasi nyaset tarjanīmadhyamābhyāṃ tu gṛhītaṃ kusumaṃ tu yat

'''20.132''' apanīya tu nirmālyaṃ piṇḍikeśānadeśake caṇḍeśāyeti nikṣipya bāhye caṇḍāya dāpayet

'''20.133''' anyadābharaṇaṃ prātarmuktvā dravyeṇa śodhya ca prakṣālyāstreṇa nikṣipya liṅgaśuddhiṃ samācaret

'''20.134''' āvartitajaladroṇyāṃ candanādisuvāsitam mantrasaṃhitayā vātha pavitrairabhimantritam

'''20.135''' suvarṇādyairyathālābhaṃ kṛtena kalaśena tu svaśiraḥpariṇāhena śivārdhapūrakeṇa vā

'''20.136''' niśchidreṇātiśuddhena śodhitenāstramantrataḥ gṛhītvātha jalaṃ tena liṅgaśuddhiṃ samācaret

'''20.137''' kuśośīrādimūlena kṛtena sudṛḍhena tu kūrcena bahuśo liṅgaṃ śodhayitvā sapīṭhakam

'''20.138''' astreṇa kṣālayetsamyagbahuśo’śūnya mastakam yathā tathābhiṣicyātha sthalaśuddhiṃ ca kārayet

'''20.139''' ātmānaṃ ca sthalaṃ dravyaṃ mantraṃ liṅgaṃ ca pañcakam viśodhyaivaṃ tato mantrī yajelliṅge sadāśivam

'''20.140''' pūjārthamāsanaṃ tasya kalpayitvārcayecchivam uttarābhimukhaḥ pārśve samāsīnaḥ sthito’thavā

'''20.141''' kalpayedāsanaṃ pīṭhe bhavedādhāra āsanam ādheyastu śivastatra mūrtimānupari sthitaḥ

'''20.142''' āsanaṃ śabdavatproktamarthavatsyātsadāśivaḥ āsanaṃ binduvattatra nādavacchiva iṣyate

'''20.143''' evaṃ tadavinābhāvaḥ śivaśaktyoḥ pratīyate śaktireva bhaveddivyamāsanaṃ tadvadāmi te

'''20.144''' liṅgamūle yajetpūrvaṃ śaktimādhārarūpiṇīm tadūrdhve’nantamabhyarcya siṃhaṃ tasyordhvato yajet

'''20.145''' dharmaṃ jñānaṃ ca vairāgyamaiśvaryaṃ ca catuṣṭayam āgneyādiṣu koṇeṣu siṃharūpāṇi kalpayet

'''20.146''' śuklaṃ raktaṃ tathā pītaṃ kṛṣṇaṃ tadrūpamucyate viparītamadharmādi mahādikṣu catuṣṭayam

'''20.147''' rājāvartanibhaṃ proktamindrādiṣu yathākramam jñānāgre’dhaśchadaṃ yaṣṭvā yajedūrdhvacchadaṃ tataḥ

'''20.148''' aiśvaryāgre ca tāvetāvadhaścordhve ca kalpayet madhye tamo rajaścaiva sattvaṃ caiva kramānnyaset

'''20.149''' evaṃ siṃhāsanaṃ yaṣṭvā tato yogāsanaṃ yajet avyakto niyatiḥ kālaḥ kalā ceti catuṣṭayam

'''20.150''' pūrvādiṣu yajenmantrī tadvarṇaṃ prathamaṃ sitam kṛṣṇaṃ raktaṃ tathā dhūmraṃ tato vimalamarcayet

'''20.151''' ātmatattvaṃ tadūrdhve tu vidyātattvaṃ tadūrdhvataḥ śivatattvaṃ tadūrdhve’tha yaṣṭvā padmāsanaṃ yajet

'''20.152''' tanmadhye karṇikāṃ yaṣṭvā daleṣvaṣṭasu ca kramāt vāmādiśaktīraṣṭau cāpīndrādiṣu samarcayet

'''20.153''' madhye manonmanīṃ devīṃ tatacopadaleṣu ca sūryamaṇḍalamabhyarcya tadūrdhve maṇḍalādhipam

'''20.154''' brahmāṇaṃ pūjayitvātha kerāgreṣu ca kramāt somamaṇḍalamabhyarcya tadūrdhve maṇḍalādhipam

'''20.155''' viṣṇumabhyarcayeddikṣu catasṛṣveva mantravit madhye’gnimaṇḍalaṃ paścātkarṇikāyāṃ tadūrdhvataḥ

'''20.156''' maṇḍalādhipatiṃ rudraṃ sarvordhve ca śivāsanam svanāmapadamantraistānarghyagandhādibhistathā

'''20.157''' pūjayedāsanībhūtadevānsarvānyathākramam dharādiśuddhavidyāntatattvajātamayaṃ tataḥ

'''20.158''' śivāsanaṃ prakalpyaivaṃ tato mūrtiṃ vicintayet puṣpairañjalimāpūrya sthiradhīḥ saṃyatendriyaḥ

'''20.159''' baddhapadmāsanāṃ divyāṃ śuddhasphaṭikasaṃnibhām pañcavaktraśiroyuktāṃ suprasannāṃ smitānanām

'''20.160''' sūryakoṭipratīkāśāṃ pratyagroddāmayauvanām daśahastāṃ piśaṅgordhvajaṭācūḍavirājitām

'''20.161''' prativaktraṃ lasattāraśaktitritayalocanām jñānacandrakalācūḍāṃ sarvakāraṇakāraṇām

'''20.162''' dakṣiṇairabhayaṃ śūlaṃ paraśuṃ khaḍgameva ca vajraṃ tathetarairhastaiḥ pāśaṃ nāgāṅkuśau tathā

'''20.163''' vahniṃ ghaṇṭāṃ krameṇaiva vahantīṃ pārameśvarīm sarvalakṣaṇasaṃyuktāṃ sarvābharaṇabhūṣitām

'''20.164''' vidyāmbaradharāṃ ramyāṃ divyasraggandhalepanām mūrtiṃ saṃcintya pūrvokte tasminneva śivāsane

'''20.165''' tenaiva puṣpāñjalinā mantreṇānena pūjakaḥ āvāhayettato mūrtimantraṃ śṛṇu janārdana

'''20.166''' tāraṃ pūrvaṃ samuccārya hṛdbījaṃ ca tatastridhā śivamūrtipadaṃ paścāccaturthyantaṃ tato hare

'''20.167''' namaskāreṇa saṃyuktaṃ mūrtimantramudāhṛtam evaṃ mūrtiṃ samāvāhya tataḥ sphaṭikasaṃnibhe

'''20.168''' nyasedīśānamūrdhvāsye karṇikārasamadyutau puruṣe puruṣaṃ caiva bhinnāñjanasamaprabhe

'''20.169''' aghore bahurūpaṃ ca japākusumasaṃnibhe vāme vāmaṃ tato mantrī kundacandrasamadyutau

'''20.170''' paścime vinyasenmantrī sadyojātaṃ samudrayā aṣṭatriṃśatkalānyāsamapi pūrvavadācaret

'''20.171''' vidyāmayīṃ tataḥ kuryāttanuṃ tāṃ pārameśvarīm tadarthaṃ mantramuddiṣṭamidamevaṃ janārdana

'''20.172''' dvādaśāntaṃ samuccārya tato hṛdbījasaṃpuṭam hauṃkāramapi tasyānte vidyādehapadaṃ sudhīḥ

'''20.173''' caturthyantaṃ samāyojya namaskārapadaṃ paṭhet anena mantravaryeṇa datte’rghye śivamastake

'''20.174''' bhavetsarvasurārādhyā tanurvidyāmayī tadā tato’pyañjalimāpūrya puṣpairvikasitaiḥ śubhaiḥ

'''20.175''' tato hṛtpadmasuṣire bindusthānasthitaṃ śivam paramātmābhidhānaṃ taṃ parātparataraṃ prabhum

'''20.176''' dvādaśāntena saṃyojya vācyavācakabhāvataḥ cinmātraṃ sarvabhūtasthaṃ sarvakāraṇakāraṇam

'''20.177''' dhyātvā prāṇapathānīya tato liṅgasya mūrdhani mūlamantraṃ samuccārya sadyojātapuraḥsaram

'''20.178''' tenaiva puṣpāñjalināvāhanyā mudrayā sudhīḥ āvāhya sthāpanādīni tataḥ karmāṇi kārayet

'''20.179''' sarvadā saṃsthitasyāpi śivasyāvāhanakriyā liṅgamūrtau tu yā nityamāvirbhāvāya sā bhavet

'''20.180''' āvirbhūtaṃ tu vāmena sthāpanyā sthāpayettataḥ bahurūpeṇa mantreṇa saṃnidhīkṛtya mudrayā

'''20.181''' saṃnidhānaṃ tataścāpi puruṣeṇa nirodhayet niṣṭhurāṃ darśayitvātha puṣpamīśānamuccaran

'''20.182''' dattvā svāgatamuddiśya tataḥ pādyaṃ tu pādayoḥ mukheṣvācamanaṃ dadyādarghyaṃ śirasi vinyaset

'''20.183''' sadyena bahurūpeṇa pañcamena yathākramam tataśca ghaṇṭāṃ saṃtāḍya hṛtvā yavanikāmapi

'''20.184''' tatastu devadeveśaṃ sarvātmahṛdayena tu mantrasaṃhitayā caiva pavitraiścābhiṣecayet

'''20.185''' pañcagavyavidhānena pañcagavyābhiṣecanam sarvātmahṛdayenaiva kṛtvā paścājjanārdana

'''20.186''' śuddhodenābhiṣicyātha śivagāyatrimuccaran śāligodhūmanīvārayavamāṣādipiṣṭakaiḥ

'''20.187''' liṅgamālipya bahuśaḥ sahavedikayā kramāt rūkṣayitvābhiṣicyeśaṃ śuddhodena punaḥ punaḥ

'''20.188''' lakṣmyāmalakayostadvatkṣodenālipya mantravit abhiṣicyātha toyena tataścāpi haridrayā

'''20.189''' ālipya gandhatoyena pavitrairabhiṣecayet mukheṣvācamanaṃ dadyāttattanmantramudāharan

'''20.190''' sthalaśuddhiṃ tataḥ kuryātkṛtvā yavanikāṃ budhaḥ mahāghaṇṭāprahāreṇa dattvārghyaṃ liṅgamūrdhani

'''20.191''' praṇavena tato mantrī kārpāsamayavāsasā unmṛjyāpanayedvāri lagnaṃ talliṅgapīṭhayoḥ

'''20.192''' dukūlapaṭṭadevāṅgakārpāsādiṣu saṃbhavam vastraṃ pradhūpitaṃ dadyāddhemāmbaramathopari

'''20.193''' candanāgarukarpūraiḥ ślakṣṇapiṣṭaiḥ sakuṅkumaiḥ liṅgaṃ paryāptamālipya kevalaṃ candanena vā

'''20.194''' praṇavena sakṛddattvā śiraḥsvarghyaṃ sapuṣpakam mūlamantreṇa deveśaṃ pūjayelliṅgamūrdhani

'''20.195''' tatraiva pañcamenātha puruṣākhyeṇa pūrvataḥ dakṣiṇe bahurūpeṇa vāmadevena cottare

'''20.196''' sadyojātena mantreṇa paścime’pyatha pūjayet āgneyyāṃ hṛdayaṃ paścādaiśānyāṃ tu śiro yajet

'''20.197''' nairṛtyāṃ tu śikhāṃ yaṣṭvā vāyavyāṃ kavacaṃ yajet dakṣiṇe’straṃ tu saṃpūjya netramīśānagocare

'''20.198''' pūjāyāmarghyadānaṃ syātprathamaṃ tadanantaram gandhaṃ puṣpaṃ ca dhūpaṃ ca dīpaṃ dadyādyathākramam

'''20.199''' sopavītaṃ tato dadyādbhūṣaṇaṃ sarvameva hi sugandhapuṣpamālābhiralaṃkāraṃ prayojayet

'''20.200''' āmantraṇahaviḥ paścāddadyādabhimukhe mukhe ādāya ca mahāghaṇṭāṃ tāḍayitvā śivāgrataḥ

'''20.201''' haviḥpradānakāle’pi dattvā cācamanīyakam hṛdayenātha saṃprokṣya havirastraṃ samuccaran

'''20.202''' nārācāstraprayogeṇa caturdikṣu kṛtena vā prarocya cāmṛtīkṛtya mudrayā dhenusaṃjñayā

'''20.203''' puṣpahasto havirdadyānmūlamantraṃ samuccaran tadanantarato nītvā niśvāsānāṃ tu pañcakam

'''20.204''' dattvā cācamanaṃ tatra hṛdayena tato’rcayet caṇḍeśāya visṛjyātha tāmbūlaṃ tu hṛdā dadet

'''20.205''' tataśca ghaṇṭānādena hṛtvā yavanikāmapi dhūpadīpau tadā dadyāttayorvidhirathocyate

'''20.206''' nirdhūmajvaladaṅgāraṃ dhūpapātrodare hṛtam dahyamānena dhūpena dadyārddhūpaṃ sa ca tridhā

'''20.207''' dhūpaḥ kṛṣṇāgarūdbhūtaḥ karpūreṇa praśasyate śītārirvātra dhūpāya saghṛto vātha gugguluḥ

'''20.208''' dīpastu goghṛtāktena bhavetkarpūravartinā dhūpadīpapradāne tu ghaṇṭāṃ vāmena vādayet

'''20.209''' dhūpamastreṇa saṃprokṣya tanmantreṇa pradāpayet dīpaṃ cāpi tathā dadyāddīpapātreṇa dīpayet

'''20.210''' vyajanaṃ darpaṇaṃ caiva cchatracāmarameva ca hṛnmantreṇa kramāddatvā stotraiḥ stutisamanvitaiḥ

'''20.211''' gītanṛttaiśca sātodyairjayaśabdādimaṅgalaiḥ toṣayeddevadeveśaṃ liṅgasthaṃ bhuvaneśvaram

'''20.212''' tato haviḥpradānaṃ syātpañcavaktreṣu caiva hi īśānake tu śuddhānnaṃ gaulaṃ tatpuruṣe tathā

'''20.213''' kṛsaraṃ dakṣiṇe vaktre mudgānnaṃ ca tathottare paścime pāyasaṃ caiva svasvanāmnā samāhitaḥ

'''20.214''' dāpayetsvasvadigbhāga īśānasyāgrake bhavet alābhe pañcahaviṣāmagre śuddhānnamucyate

'''20.215''' tato balipradānaṃ syād vṛṣendrasya ca nandinaḥ mahākālasya ca dvāri tato bāhye baliṃ kramāt

'''20.216''' parivāravidhau proktā ye devāstu mayā hare teṣāṃ śubhrottarīyeṇa putrakeṇaiva dāpayet

'''20.217''' tāmbūlaṃ ca tato dadyānmukhavāsasamanvitam sāmānyārghyaṃ gṛhītvātha kuryādāvaraṇārcanam

'''20.218''' ananteśaṃ ca sūkṣmaṃ ca śivottamaṃ caikanetrakam ekarudraṃ trimūrtiṃ ca śrīkaṇṭhaṃ ca śikhaṇḍinam

'''20.219''' agrādārabhya saṃpūjya tathomāṃ caṇḍameva ca nandinaṃ ca mahākālaṃ vṛṣaṃ vighneśameva ca

'''20.220''' mahāsenaṃ ca bhṛṅgīśaṃ vāmādārabhya pūjayet athendrāgnī yamaṃ caiva nirṛtiṃ varuṇaṃ tathā

'''20.221''' vāyuṃ somaṃ tatheśānamanantaṃ kamalāsanam pūjayitvātha vajraṃ ca śaktiṃ daṇḍaṃ tathaiva ca

'''20.222''' khaḍgaṃ caiva tathā pāśaṃ sṛṇiṃ paścādgadāmapi triśūlaṃ padmacakre ca svadigbhāge tu pūjayet

'''20.223''' padmamindreśayormadhye brahmabāhye samarcayet rakṣovaruṇayormadhye cakraṃ keśavabāhyataḥ

'''20.224''' evaṃ pīṭhe kramāddevāṃścaturāvaraṇasthitān bāhye bāhye krameṇaiva pūjayitvā tataḥ sudhīḥ

'''20.225''' pūrvoktena svanāmnā tu sarveṣāmarcanaṃ bhavet mahāghaṇṭāninādena hṛtvā yavanikāmapi

'''20.226''' sāmānyārghyakaro bhūtvā praviśya ca mahānasam āgneyyāṃ diśi kuṇḍe tu vedāśre hastasaṃmite

'''20.227''' trimekhalāsamāyukte dakṣiṇe yonisaṃyute pralipedgomayenātha caturbhirviṣṭarairyute

'''20.228''' upaviśyottarāsyastu samiddhaṃ pāvakaṃ tataḥ namaskṛtyārghyamāyojya pariṣicya tataḥ kramāt

'''20.229''' dikpatīnarcayedarghyagandhādyairanupūrvaśaḥ tataḥ śivāsanaṃ cāgnau padmamekaṃ prakalpayet

'''20.230''' padmāsanāyetyuccārya namaskārasamanvitam tatra liṅge yathā devaḥ sadāśiva itīritaḥ

'''20.231''' tathā dhyātvātra taṃ devaṃ pañcabrahmāṅgasaṃyutam āvāhanādikaṃ sarvaṃ kṛtvā homaṃ samārabhet

'''20.232''' saṃskāraṃ sarpiṣaḥ kṛtvā prokṣayitvā samiccarūn vyāhṛtiṃ sarpiṣā hutvā saṃpūjya ca punaḥ śivam

'''20.233''' samidājyacarūṇāṃ tu pratyekaṃ pañcaviṃśakam daśakaṃ vāhutīnāṃ tu mūlena juhuyātkramāt

'''20.234''' pañcabrahmaśivāṅgaistu pratyekaṃ pañcasaṃkhyayā sarpiṣā juhuyātpaścādanantādi yathākramam

'''20.235''' ekaikāmāhutiṃ dadyādathavāstrasamanvitām tilena carubhiḥ kuryādājyena caruṇāpi vā

'''20.236''' tato homaṃ samāpyaivaṃ saṃpūjya pariṣicya ca agnidhāmnastato mantrī praviśyābhyantaraṃ tataḥ

'''20.237''' nityotsavaṃ tataḥ kuryādyathāśāstraviniścitam nityotsavasamāptau tu japaṃ kuryātsvaśaktitaḥ

'''20.238''' trividheṣu japeṣvekaṃ mānasādiṣu pūjakaḥ japaṃ kṛtvā samutthāya kṛtvā ca triḥ pradakṣiṇam

'''20.239''' savyāpasavyamārgeṇa dadyācca culukodakam culukodavidhiṃ vakṣye tacchṛṇu tvaṃ janārdana

'''20.240''' arghyodakaṃ samāpādya dakṣiṇe hastasaṃpuṭe gandhapuṣpākṣatairdevaṃ hṛdi taṃ saṃniveśya ca

'''20.241''' paṭhenmantramimaṃ mantrī tacchṛṇu tvaṃ samāhitaḥ guhyātiguhya goptā tvaṃ gṛhāṇāsmatkṛtaṃ japam

'''20.242''' siddhirbhavatu me yena tvatprasādānmayi sthirā yatkiṃcitkarma he deva sadā sukṛtaduṣkṛtam

'''20.243''' tanme śivapadasthasya bhuṅkṣva kṣapaya śaṃkara śivo dātā śivo bhoktā śivaḥ sarvamidaṃ jagat

'''20.244''' śivo yajati sarvatra yaḥ śivaḥ so’hameva tu evaṃ mantraṃ samuccārya svanāmamūlamantrataḥ

'''20.245''' liṅgamūle samāyojya kṣamasveti visarjayet prātaḥ saṃdhyāṃ samāpyaivamupasaṃdhyāṃ samārabhet

'''20.246''' dvāradevārcanaṃ kṛtvā praviśyāntargṛhaṃ tataḥ tatra śuddhiṣu sarvāsu liṅgaśuddhiṃ samācaret

'''20.247''' āsanāvāhanaṃ mantrairbrahmāṅgaiḥ śivamarcayet atha madhyāhnasaṃdhyāyāṃ viśeṣo’yaṃ ca kathyate

'''20.248''' gavyābhiṣekakāle tu pañcāmṛtavidhirbhavet madhyāhnādūrdhvasaṃdhyāyāṃ dvitīyārcanavadbhavet

'''20.249''' rātrau prathamasaṃdhyāyāṃ dvitīyāyāṃ ca kathyate viśeṣo’yaṃ suraśreṣṭha kuryādārātrikaṃ tayoḥ

'''20.250''' tasyāmeva tu pūjāyāṃ viśeṣo’yamudīritaḥ śaktisthānāttu tāṃ devīṃ sarvālaṃkārasaṃyutām

'''20.251''' gītanṛttādibhiryuktaiḥ śaṅkhadundubhinisvanaiḥ ālayāntargṛhe liṅgavāmapārśve nidhāya ca

'''20.252''' pūjayitvāṣṭapuṣpeṇa devaṃ devīṃ ca pūjakaḥ śivābhyāṃ tu havirdattvā pūjāmevaṃ samāpayet

'''20.253''' athavā pāduke ramye svarṇādibhirvinirmite sthalikāyāṃ tu vinyasya tayordevaṃ samarcayet

'''20.254''' śirasā vāhayitvā te śaṅkhadundubhinisvanaiḥ piṅchacāmarasaṃyukte śaktisthānaṃ samānayet

'''20.255''' śayane nitarāṃ ramye śivayoḥ parikalpite śivayā śivamabhyarcya pāduke vāmamantravit

'''20.256''' śayanābhyāśake nyasya cakravartyupacārataḥ śivayośca havirdattvā tatrāpūpādikaṃ tathā

'''20.257''' gītanṛttādibhiścaiva śaṅkhadundubhinisvanaiḥ evaṃ rātrau dvitīyāyāṃ pūjāṃ samyaksamāpayet

'''20.258''' tṛtīyāmupasaṃdhyāṃ ca pūrvavatparikalpayet caturthāyāṃ tu pūjāyāṃ śaṅkhadundubhinisvanaiḥ

'''20.259''' kuryātprabodhakaṃ śaṃbhorataḥ pūjāṃ samārabhet tatkāle sthalikāyāṃ tu pūrvavatpāduke tathā

'''20.260''' vinyasyātodyasaṃyuktamānīyāntaḥ praviśya ca saṃpūjyodvāsayeddevaṃ liṅge pūjārthamavyayam

'''20.261''' tatkāle cātmaśuddhyādīnpūjakaḥ saṃprayojayet pañcasvapyupasaṃdhyāsu yadi vā snapanādikam

'''20.262''' hitvā dattvāṣṭapuṣpaṃ tu havirdattvā samāpayet mūlena mūrtimantreṇa ṣaḍaṅgairapi ca kramāt

'''20.263''' arghyānantarataḥ puṣpaṃ dattvā syādaṣṭapuṣpikā kālātikramaṇe doṣo naiva hrāse tu vidyate

'''20.264''' tasmātsarvaprayatnena kāle kāle samarcayet śuddhyarthaṃ nāḍikā proktā nādikaikābhiṣecane

'''20.265''' arcane ca tathā proktā tathālaṃkārakarmaṇi haviḥpradāne cārdhā syādbalidāne tathaiva ca

'''20.266''' tathaivāvaraṇārcāyāṃ śeṣaṃ nityotsavaṃ bhavet evaṃ miśre’tha saṃkīrṇe havirādicatuṣṭayam

'''20.267''' kṛtvā nāḍikayānyāni nṛttāntamupakalpayet evaṃ kālavidhiḥ prokto mahāsaṃdhyātrayasya ca

'''20.268''' pañcaśuddhividhau pūrvamarcālaṃkārakarmaṇi haviḥpradāne sarvatra tathā cāvaraṇārcane

'''20.269''' tāmbūlādipradāne ca kuryādyavanikāṃ budhaḥ snāne yavanikoddhāre havirdānāntime tathā

'''20.270''' ārātrike balau tadvannityotsavavidhāvapi kuryādātodyavādyaṃ tu kevalaṃ śaṅkhanisvanam

'''20.271''' havirānayane caiva tāmbūlānayane tathā mālyādyānayane caiva bhakṣyapānīyayostathā

'''20.272''' kārayedyajane nityamācāryaḥ śāstrapāragaḥ parārthā syādiyaṃ pūjā cātmārthaṃ tu janārdana

'''20.273''' ekakāle dvikāle vā trikāle vā vidhīyate na dvārapūjā tatroktā na caṇḍeśanivedanam

'''20.274''' nāmantraṇahavistatra na nityotsavameva hi mahāghaṇṭā ca noddiṣṭā na tiraskariṇīkriyā

'''20.275''' śuddhanṛttavidhirnokto sūryaṃ vighnaṃ guruṃ tathā saṃpūjya yajanaṃ kuryādātmārthaṃ mantravittamaḥ

===Kapitel 21===

''ekaviṃśaḥ paṭalaḥ · agnikāryavidhiḥ''

'''21.1''' agnikāryamatho vakṣye bhogamokṣaikasādhanam haviṣāṃ havanaṃ tvagnāvagnikāryamiti smṛtam

'''21.2''' pūjāṃ gṛhṇāti liṅgastho vahnistho haviṣā hutam eka eva śivastasmādubhayatra samaḥ śivaḥ

'''21.3''' iti saṃcintya yatnena liṅge’gnau ca śivaṃ yajet iṣṭakābhiḥ supakvābhirapakvābhirasaṃbhave

'''21.4''' kuṇḍaṃ kṛtvātha tatkuṇḍe homaṃ kuryādvicakṣaṇaḥ trimekhalaṃ bhavetkuṇḍamekamekhalameva vā

'''21.5''' vistārasamakhātaṃ ca tasya lakṣaṇamucyate śatārdhaśatahome tu muṣṭiratnimitaṃ bhavet

'''21.6''' sahasrāyutahomasya hastaṃ hastadvayaṃ kramāt lakṣe ca daśalakṣe ca caturhastaṃ ca ṣaṭkaram

'''21.7''' koṭihome’ṣṭahastaṃ syāttasmādūrdhvaṃ na kārayet sahasrakoṭiṃ vā tatra homayedaṣṭahastake

'''21.8''' pañcāṅgulaṃ tu muṣṭiḥ syādratnistu tithisaṃkhyayā muṣṭimātrasya kuṇḍasya prathamārdhāṅgulā matā

'''21.9''' ekāṅgulā tadūrdhvasthā tṛtīyā syād dviyaṅgulā ratnimātrasya kuṇḍasya prathamāṅgulasaṃmitā

'''21.10''' mekhalā dvyaṅgulordhvā syāttadūrdhvā tu triyaṅgulā hastamātrasya kuṇḍasya prathamā dvyaṅgulā matā

'''21.11''' dvitīyā tryaṅgulā jñeyā tṛtīyā caturaṅgulā dvikarasya tu kuṇḍasya tricatuṣṣaḍbhiraṅgulaiḥ

'''21.12''' mekhalātritayaṃ kāryaṃ pūrvavatkuṇḍasaṃvidaiḥ caturhastasya kuṇḍasya prathamā caturaṅgulā

'''21.13''' rasāṅgulā dvitīyā syādūrdhvā vasvaṅgulā bhavet ṣaṭkarasyāsya kuṇḍasya bhavedādyā ṣaḍaṅgulā

'''21.14''' aṣṭāṅgulā dvitīyā ca tṛtīyā syāddaśāṅgulā aṣṭahastasya kuṇḍasya mekhalāṣṭāṅgulā matā

'''21.15''' dvitīyā daśāṅgulā jñeyā tṛtīyā dvādaśāṅgulā muṣṭimātrasya kuṇḍasya yonirarkāṅgulāyatā

'''21.16''' vasvaṅgulaviśālā ca tathoṣṭhe’ṅgulavistṛtā śeṣāṇāmaṅgulād vṛddhirvistārāyāmayorapi

'''21.17''' mekhalālakṣaṇaṃ proktaṃ kuṇḍalakṣaṇamucyate caturaśraṃ dhanurvṛttaṃ padmaṃ dikṣu prakalpayet

'''21.18''' yoniṃ trikoṇaṃ ṣaṭkoṇaṃ vasvaśraṃ ca vidikṣu ca caturaśre tu kuṇḍāni sarvāṇyapi bhavanti hi

'''21.19''' pūrvasūtraṃ purā kṛtvā dvitīyaṃ cottarāyatam caturaśraṃ samaṃ kṛtvā pramāṇena viniścitam

'''21.20''' kṣetre daśāṃśake tasmiṃścaturaśreṃ’śamuttare visṛjya dakṣiṇe cāpi bhāgamekaṃ parityajet

'''21.21''' tayormadhye pramāṇe tu sūtreṇa sumite tataḥ uttare’ṅkitasūtre tu nyasyāvaṣṭabhya yatnataḥ

'''21.22''' dakṣiṇe bhrāmayedaṅkāccāpākāraṃ yathā bhavet jyārekhāmuttare kuryād dhanuṣkuṇḍamidaṃ bhavet

'''21.23''' nandāṃśe caturaśre tu hyekāṃśārdhaṃ bahirnayet madhyārdhena pramāṇena vartitaṃ vartulaṃ bhavet

'''21.24''' vartulaṃ tu samākhyātaṃ caturaśre’ṣṭabhājite bhāgaṃ nyasya caturdikṣu pratyekaṃ bāhyataḥ sudhīḥ

'''21.25''' tasmānmadhyaṃ gṛhītvātha sūtreṇa sumitaṃ tataḥ tayormadhye caturdikṣu lāṅchayitvā vicakṣaṇaḥ

'''21.26''' tatrāvaṣṭabhya sūtraṃ tu diśāsu catasṛṣvapi bhrāmayetkuṇḍaparyantaṃ padmakuṇḍaṃ tu tadbhavet

'''21.27''' caturdalamidaṃ padmamathāṣṭadalamucyate caturaśre kṛte tasmiṃścaturviṃśatibhājite

'''21.28''' ekāṃśaṃ paritastyaktvā janayeccaturaśrakam madhyātkoṇaṃ gṛhītvā tu paścāddikṣu ca lāṅchayet

'''21.29''' dikṣvekādaśakaiḥ sūtraiścaturbhiścaturaśrakam aparaṃ janayettatra bhavedaṣṭadalāmbujam

'''21.30''' padmamevaṃ dvidhā proktaṃ yonikuṇḍamathocyate caturaśre same tatra catuṣkoṣṭhasamanvite

'''21.31''' paścāttatkoṣṭhayormadhye sūtreṇa sumitaṃ tataḥ madhyātkoṇaṃ gṛhītvātha bhrāmayedubhayorapi

'''21.32''' kṣetrārdhāvadhikaṃ yāvattatastatkṣetrabāhyake pañcāṃśaṃ prāci vinyasya tasmātpārśvadvayorapi

'''21.33''' sūtreṇa saṃgatiṃ kuryādyonikuṇḍamidaṃ bhavet aśvatthapatravatkāryaṃ tasyāgraṃ cottaraṃ bhavet

'''21.34''' trikoṇamatha vakṣyāmi caturaśre same kṛte tasya kṣetrasya pañcāṃśaṃ dakṣiṇottarayornyaset

'''21.35''' pārśvayostu tato madhyānmānasūtraṃ vigṛhya ca nirṛtau vāyudeśe ca kuryānmatsyadvayaṃ tataḥ

'''21.36''' matsyadvayaviniṣkrāntātsūtrādvai dakṣiṇottarāt dakṣiṇottarayoścāpi pañcabhāgavivardhanāt

'''21.37''' ālikhya paścimāṃ rekhāṃ tanmānenaiva dakṣiṇe uttare cāpi vinyasya sūtraṃ prāgdiśi saṃgatam

'''21.38''' vilikhettena mānena trikoṇaṃ vyajyate sphuṭam kuṇḍaṃ trikoṇamuddiṣṭaṃ ṣaḍaśramadhunocyate

'''21.39''' vasubhāgakṛte kṣetre dakṣiṇottarayorapi ekaikaṃ bhāgamādāya bāhye kuṇḍāvadhestataḥ

'''21.40''' tasmānmadhyaṃ gṛhītvā tu matsyaṃ koṣṭhacatuṣṭaye kṛtvā kṣetreṣu tatteṣu kuryātṣaṭsūtrasaṃgatim

'''21.41''' evaṃ kṛte ṣaḍaśraṃ tu kuṇḍaṃ vyaktamidaṃ bhavet ṣaḍaśraṃ kuṇḍamuddiṣṭamaṣṭāśramadhunocyate

'''21.42''' caturaśre kṛte tasmiṃścaturviṃśatibhāgike ekāṃśaṃ parito nyasya janayeccaturaśrakam

'''21.43''' tasya karṇārdhamānena pratikoṇaṃ sthitena ca koṇānāṃ pārśvayoḥ kuryādaṣṭau cāṅkāni teṣu ca

'''21.44''' aṅkādaṅkagataiḥ sūtraiḥ koṇacchedaṃ tu kārayet evaṃ kṛte’ṣṭakoṇaṃ tatkuṇḍaṃ bhavati hi sphuṭam

'''21.45''' yādṛśaṃ tu bhavetkuṇḍaṃ tādṛśī mekhalā bhavet mekhalopari yoniḥ syāddakṣiṇe paścime’pi vā

'''21.46''' mekhalānāmadhaḥ kuṇḍaparyante tadgalo bhavet sarveṣāmapi tatkāryaṃ parito’ṅguṣṭhamānataḥ

'''21.47''' sudhayā ca prayuñjīta yadi pakveṣṭakāmayam apakveṣṭakayā kuryādyadi mṛttikayā bhavet

'''21.48''' samā dṛḍhatarāḥ kāryā mekhalāstāḥ pramāṇataḥ mekhalānāṃ samutsedhaṃ yatpramāṇaṃ prakīrtitam

'''21.49''' vistāraṃ ca tatastāsāṃ tanmānenaiva kalpayet nityāgnikāryakuṇḍaṃ tu caturaśraṃ prakalpayet

'''21.50''' anyatra kuṇḍaklṛptistu tattatkalpoktamānataḥ yadi vā sthaṇḍile homaṃ kuryādvai saikate śucau

'''21.51''' saikataṃ sthaṇḍilaṃ kāryaṃ hastamātreṇa nānyathā utsedhamaṅgulaṃ tasya samantāccaturaśrakam

'''21.52''' gomayālepanaṃ kṛtvā kuṇḍe vā sthaṇḍile bhavet śivena prokṣaṇaṃ cātha homakarmābhidhāsyate

'''21.53''' homārambheṣu kuṇḍasya vahneḥ sruksruvayorapi ājyasya caiva kurvīta tatsaṃskāraśca kathyate

'''21.54''' asaṃskṛteṣu teṣvagnau hutaṃ bhavati niṣphalam tasmātkuṇḍādisaṃskāraṃ kuryānmantreṇa deśikaḥ

'''21.55''' nirīkṣyāstreṇa tatkuṇḍaṃ saṃprokṣya nayanena ca saṃtāḍya ca punastena hetinābhyukṣayettataḥ

'''21.56''' khananaṃ kavacenaiva tenaivotkīrya deśikaḥ pūrayitvā samīkṛtya hṛnmantreṇātha secayet

'''21.57''' tenaiva kuṭṭayetpaścād vauṣaḍantena mantravit saṃmārjanopalepau ca hetinā tatra kārayet

'''21.58''' kuṇḍārcanaṃ tataḥ kuryātkavacena tu mantravit nivṛttiṃ pūrvadigbhāge pratiṣṭhāṃ dakṣiṇe punaḥ

'''21.59''' vidyāṃ ca paścime caiva śāntimuttaragocare madhye ca śāntyatītāṃ tu kalāṃ vinyasya pūjayet

'''21.60''' tasya kuṇḍasya madhye tu rekhāṃ pūrvāyatāṃ hṛdā kṛtvā rekhātrayaṃ paścāddakṣiṇottarayorapi

'''21.61''' tadvatkṛtvā punarmadhye rekhāṃ tenodagāyatām astreṇa vā samālikhya prokṣayettāṃ śivāmbhasā

'''21.62''' yaccottarāgrāstisrastā rekhāṃ pūrvāyatāmapi vilikhetkuṇḍasaṃskāramevaṃ kṛtvātha mantravit

'''21.63''' tatraiva saṃskṛte kuṇḍe vāgīśīmagnimātaram vāgīśvaraṃ ca pitaramāvāhya sthāpya cārcayet

'''21.64''' hṛnmantreṇaiva gandhādyaistayo rūpamidaṃ śṛṇu vāgīśī sā bhavedgaurī vāgīśaḥ syānmaheśvaraḥ

'''21.65''' trinetraṃ caturbhujaṃ devaṃ padmarāgasamadyutim varadābhayadaṃ caiva śūlapāśadharaṃ karaiḥ

'''21.66''' vāgīśīṃ puṇḍarīkābhāṃ caturhastāṃ ghanastanīm vyākhyānapustakābhyāṃ tu kamaṇḍalvakṣadhāriṇīm

'''21.67''' evaṃ dhyāyīta tau devau saṃskāro’tha nigadyate havirbhujastu sūryāśmabhavaścāraṇijastathā

'''21.68''' vipragehotthitaścāpi śreṣṭho madhyaśca kanyasaḥ mṛtpātre tāmrapātre vā kāṃsye vānīya cānalam

'''21.69''' kuṇḍasya deśe vinyasya nirīkṣyainaṃ hṛdā budhaḥ prokṣya netreṇa saṃtāḍya hetinātha havirbhujam

'''21.70''' varmaṇābhyukṣya tatrāgnau kravyādāṃśaṃ parityajet astreṇa cātha tatraiva mūrtimantraṃ samuccaran

'''21.71''' vahnidvayaikīkaraṇaṃ kṛtvātha brahmapañcakaiḥ abhimantryāvakuṇṭhyātha kavacena havirbhujam

'''21.72''' mudrayā cāmṛtīkṛtya gostanākārayā tataḥ pātreṇa a hṛdoddhṛtya jānubhyāmavanau sthitaḥ

'''21.73''' bhrāmayitvā tridhā kuṇḍamālalāṭātsamuddhṛtam vāgīśīgarbhanāḍyāṃ  tu vahnibījamanusmaran

'''21.74''' kuṇḍamadhye kṣipedagnimātmanaḥ saṃmukhaṃ yathā īśabījamiti smṛtvā dattvā cāmbulavaṃ hṛdā

'''21.75''' garbharakṣārthamagnestu darbhairācchādayettanum ādīpya kavacenāgniṃ sadyojātena pūjitam

'''21.76''' garbhādhānaṃ bhavetpaścādvāmadevena pūjitam bhavetpuṃsavanaṃ paścātsīmante śirasārcanam

'''21.77''' ghoreṇa śirasā vāpi pūjayedvaktraklṛptaye vaktrodghāṭanakarmātha śikhayā niṣkṛtistathā

'''21.78''' jātakarma nareṇātha kavacenāpi pūjanam tataḥ kuṇḍasya paritaḥ secanaṃ hetinācaret

'''21.79''' kuśāstaraṇakarmāpi tatastenaiva mantravit idhmahomaṃ tataḥ kuryādastramantreṇa deśikaḥ

'''21.80''' viṣṭarānparidhīṃścaiva prāgādiṣvatha vinyaset triṃśaddarbhadalairgāḍhaṃ gṛhītā bāhumātrikāḥ

'''21.81''' veṇikā veṣṭikā vāpi viṣṭarāḥ parikīrtitāḥ tanmānā ṛjavaścārdrāḥ satpālāśalatodbhavāḥ

'''21.82''' aṅguṣṭhapariṇāhena yuktāḥ paridhayaḥ smṛtāḥ pūrvādiṣvatha tenaiva viṣṭareṣu yathākramam

'''21.83''' brahmāṇaṃ śaṃkaraṃ viṣṇumanantaṃ cāpi pūjayet svanāmapadamantraistu rakṣārthaṃ hutabhukśiśoḥ

'''21.84''' evaṃ susaṃskṛte vahnau tataḥ pitrorvisarjanam hṛdayena prayuñjīta tataḥ sruksruvayorapi

'''21.85''' lakṣaṇopetayoridhma prakṣālya ca punaḥ punaḥ nirīkṣya hetinā prokṣya netrāṇunā pidhāya ca

'''21.86''' tanutrāṇena cābhyukṣya gṛhītvā hṛdayena ca pratāpyāgnau kuśaiḥ paścāttridhā lekhanamācaret

'''21.87''' kuśamūlena tanmūlaṃ madhyaṃ madhyena yojayet agramagreṇa saṃyojya tato mūlādiṣu kramāt

'''21.88''' ātmavidyāśivākhyaṃ tu nyasettattvatrayaṃ budhaḥ sruci śaktiṃ sruve śaṃbhuṃ vinyasecca krameṇa vai

'''21.89''' kavacenāvakuṇṭhyātha gandhādyaiḥ pūjayeddhṛdā dakṣiṇe svasya bhāge tu kuśopari tataśca tau

'''21.90''' namo’stu śaktiśaṃbhubhyāmityudīrya niveśayet tataḥ kāpilamānīya tāmrapātre sthitaṃ ghṛtam

'''21.91''' nirīkṣyāstreṇa saṃprokṣya netreṇābhyukṣya ca kramāt saṃtāḍyāstreṇa mantrajño gṛhītvā hṛdayena tu

'''21.92''' āgneyyāṃ diśi saṃsthāpya caiśānyāṃ cāpyadhiśrayam kṛtvāgnāvatha sarpistadyonyāmāropayeddhṛdā

'''21.93''' kūrcaṃ tu dvikuśāgreṇa tataḥ prādeśasaṃmitam aṅguṣṭhānāmikābhyāṃ tu gṛhītvobhayapāṇinā

'''21.94''' svāhāntamuccaranmantrī trirutplavanamācaret tataḥ saṃplavanaṃ caiva svāhāntena hṛdā tathā

'''21.95''' agnerabhimukhaṃ pūrvaṃ dvitīyaṃ cātmasaṃmukham tataḥ pavitrīkaraṇaṃ kuśāgrasya niveśanāt

'''21.96''' nīrājanaṃ kuśāgreṇa dīpitenātha vahninā avadyotaṃ tathā tasya sarpiṣaḥ parikalpayet

'''21.97''' śukle kṛṣṇe ca madhye ca hṛdaye parikalpayet agneḥ somasya cāpyaṃśaṃ tayoścāpi tridhā smaret

'''21.98''' tatra sruveṇa hotavyamāhutīnāṃ catuṣṭayam agnaye tvatha somāya prajānāṃ pataye namaḥ

'''21.99''' indrāyeti ca svāhāntaṃ tatastadabhimantraṇam pavitrairaṇubhiḥ kṛtvā’mṛtīkṛtya hṛdā budhaḥ

'''21.100''' kavacenāvakuṇṭhyātha sarpiṣyevaṃ susaṃskṛte sruveṇa ghṛtapūrṇena vahnervaktrābhighāraṇam

'''21.101''' vaktrasaṃdhānakarmātha vaktraikīkaraṇaṃ tataḥ svāhāntena hṛdā hutvā pañcamenāgnimarcayet

'''21.102''' hetinā ca tataścāgnau nāmakarma kṛtaṃ bhavet evaṃ susaṃskṛte pañca saṃskārairjātavedasi

'''21.103''' śivāgnistvamityāmantrya tatrāgnimabhicintayet ekahṛdayaṃ dvivaktraṃ ca dvināsaṃ ca ṣaḍakṣakam

'''21.104''' trimekhalaṃ tripādaṃ ca saptajihvābhirāvṛtam catuḥśṛṅgaṃ sukhāsīnaṃ jaṭāmakuṭamaṇḍitam

'''21.105''' dakṣiṇe ca caturhastaṃ vāme caiva trihastakam sruksruvau śaktimagniṃ ca dakṣiṇe cāparaiḥ karaiḥ

'''21.106''' tomaraṃ vyajanaṃ caiva ghṛtapātraṃ tathaiva ca vahantamabhicintyaivamagnibījena pūjayet

'''21.107''' sadyojātādibhirmantraiḥ pañcabhiḥ ṣaḍbhireva ca hṛdayādyaiḥ pṛthak pañca pañca caivāhutīḥ kramāt

'''21.108''' hutvā mūlena mantreṇa vauṣaḍantena mantravit pūrṇāhutiḥ srucā kāryā yathāvidhipuraḥsaram

'''21.109''' tato’gniṃ pariṣicyātha vyāhṛtyā homayedbudhaḥ sadyojātādibhirmantrairājyenaikena kevalam

'''21.110''' evaṃ niṣpādite vahnau kalpoktaṃ homamācaret homārambhe’gnirūpasya hṛdi devaṃ sadāśivam

'''21.111''' yathā liṅge tathā dhyātvā kṛtvā cāvāhanādikam pūjayitvātha gandhādyairhomakarma samārabhet

'''21.112''' sarpiṣātha samitpūrvātkalpoktaṃ juhuyāttataḥ hiraṇyā kanakā raktā kṛṣṇā caiva tu suprabhā

'''21.113''' atiraktā bahurūpā saptajihvā havirbhujaḥ hiraṇyā vāruṇe jihvā kanakā madhyame sthitā

'''21.114''' raktā vai cottarā jihvā kṛṣṇā yāmyadiśi sthitā suprabhā pūrvajihvā syādatiraktānale sthitā

'''21.115''' bahurūpeśadigbhāge jihvāsthānamudīritam jihveti yātra nirdiṣṭā jvālā sā syāddhavirbhujaḥ

'''21.116''' idhmahomo hiraṇyāyāṃ kanakāyāṃ ghṛtaṃ bhavet rattāyāṃ tu yavādīni kṛṣṇāyāṃ lājapūrvakam

'''21.117''' suprabhāyāṃ tilādīni homayecca yathākramam siddhārthamatiraktāyāmādyāyāṃ patrameva ca

'''21.118''' dadhimadhvādikaṃ tatra caruṃ sarvāsu buddhimān homayetphalabhakṣyādivastujātaṃ ca madhyame

'''21.119''' ājyādyaṃ yad dravadravyaṃ sruvapūrṇapramāṇataḥ annamakṣapramāṇaṃ syāllājā muṣṭimitaṃ bhavet

'''21.120''' tilasarṣapapūrvāṇāṃ śuktimātraṃ vidhīyate akhaṇḍaṃ patrajātīnāṃ phalānāṃ ca yathocitam

'''21.121''' dadhnaśca śuktimātraṃ syātkandamūlādi khaṇḍaśaḥ karpūrādīni gandhāni māṣamātraṃ tu homayet

'''21.122''' indhanāni ca śuṣkāṇi jantuvarjyāni sādhayet kuśāgrān komalānārdrāṅśucideśasamudbhavān

'''21.123''' samitkaniṣṭhikāmātrā dvādaśāṅguladairghyakā rudrasaṃkhyā samacchinnā nirvraṇā tvagyutā tathā

'''21.124''' ārdrā ca sarasacchinnā punaḥ śuṣkā praśasyate evaṃ saṃpādya saṃbhārānhomakarma samārabhet

'''21.125''' homārthaṃ sruksruvau grāhyau tayorlakṣaṇamucyate palāśakhadirāśvatthaplakṣodumbaracandanaiḥ

'''21.126''' vaikaṅkataśamī bilvairmadhūkapanasāmrakaiḥ śreṣṭhamadhyādhamāḥ syuste sruksruvā homakarmaṇi

'''21.127''' ṣaṭtriṃśāṅgulasaṃmitā hṛḍhatarā sruk teṣu netrāṅgulaṃ kumbhaṃ sākṣamarudidvadhāṅgulakṛto daṇḍastato gaṇḍikā  | vedāśrā tvatha vedikā dviguṇitā kaṇṭho’mbarāṃśastato vaktraṃ syātsvarasaṃmitaṃ tadadhare tāratribhāgaikataḥ

'''21.128''' tāraṃ dairghyasamaṃ mukhe yugamitaṃ kaṇṭhe tato vedikā tāreṇa dviguṇāśramānatabilākhātā tadardhārdhataḥ  | tatrāgnyātha ca gaṇḍikā yugamitāsyārdhārdhahīne’pare daṇḍaḥ syādrasabhāganāhasahitaḥ kumbhaṃ ca diṅnāhataḥ

'''21.129''' yuktaṃ tadghanamāśramāṅgulamitaṃ vedyāstu pṛṣṭhaṃ tataḥ samyakpaṅkajapṛṣṭhavadvasudalaṃ kṛtvā bilasyābhitaḥ  | vedāśraṃ yavamātrakonnatavṛtiṃ vetrākṛtiṃ kārayed ājyasyātha bilāttu yāvadadharaṃ mārgaṃ kaniṣṭhāmitam

'''21.130''' vasvaṅgulaistriguṇitaiḥ sruvadairghyamuktamṛtvaṅgulaṃ bhavati tasya tu mūlanāham āsyasya nāhamapi mūlavadeva kuryātkaṇṭhasya nāhamuditaṃ samamardhameva

'''21.131''' nāsāpuṭapratimapuṣkaramāsyanāhaṃ karṣājyapūramanalāṅguladairghyamuktam mūlātkrameṇa kṛśatāmapi tadgalāntaṃ kurvīta sarvahavaneṣu manojñarūpam

'''21.132''' uktaṃ sruksruvayorevaṃ samāsāllakṣaṇaṃ mayā lakṣaṇaṃ yadaraṇyādau tadidānīṃ vivicyate

'''21.133''' śamyaśvatthatarūdbhavā dviguṇitairarkāṅgulairāyatā vistāreṇa tadardhamānasahitā tasyārdhamānocchrayā  | kartavyā hyaraṇiḥ ṣaḍaṅgulatatiṃ vṛttālinīṃ kārayed utpattyai jvalanasya madhyatilakībhūtāṃ tu tanmadhyame

'''21.134''' madhye’rkāṅgulasaṃmito bhavati tannāhastadardhāṅgulaṃ kṛtvā kīlamayomayaṃ dṛḍhataraṃ tanmūrdhni saṃyojayet  | tasyārdhāmaraṇīṃ tu madhyasuṣirāmarkāṅgulairāyatāṃ kuryāduktatarūdbhavāṃ dṛḍhatarāṃ nāhena vasvaṅgulām

'''21.135''' evaṃ trīṇyapi niṣpādya prakṣālya ca punaḥ punaḥ pañcagavyena saṃprokṣya praṇavaṃ samudāharan

'''21.136''' gāyatryā tāṃ samabhyarcya manthānaṃ praṇavena ca hṛnmantreṇa tato vidvānpūjayeduttarāraṇim

'''21.137''' gomayālepite deśe prokṣite’tha śivāmbhasā kuśairāstaraṇaṃ kṛtvā tatra tāmaraṇiṃ nyaset

'''21.138''' prākpaścimagataṃ tasyāṃ manthānaṃ vinyaseddhṛdā tasyordhve yoktramādhāya praṇavena samāhitaḥ

'''21.139''' uttarābhimukho bhūtvā govālakṛtarajjunā trivṛtā valkalotthena śuddhatantubhavena vā

'''21.140''' mathnīyād dṛḍhamākramya sarvātmānaṃ samuccaran jyotirjyotipadenātha saṃjātaṃ jātavedasam

'''21.141''' tāmrapātre śarāve vā saṃgṛhyāgniṃ gṛhe kṣipet araṇīlakṣaṇaṃ proktam

'''21.142''' atha vahneḥ samāsataḥ śubhāśubhaphalaṃ vakṣye nimittairbahubhirguṇaiḥ

'''21.143''' hutabhuji jaladaśaṅkhabheridhvanimanukurvati sarvalokapuṣṭiḥ bhavati satatamūrdhvage’prayatnāduditaśikhe parimaṇḍite tathaiva

'''21.144''' satatamuditabhūripuṇyagandhe jvalitaśikhe ca havīṃṣi lelihāne jagati bhavati hi sadaiva vṛṣṭirhutabhuji bhūsurabhūbhṛtāṃ ca tuṣṭiḥ

'''21.145''' drutakanakanibhe’tha padmarāge muṣitajapāsadṛśe hutāśane tu bhavati hi yajatāṃ sadā samṛddhirbahudhanadhānyakalatraputrabhṛtyaiḥ

'''21.146''' kamalakumudakundacandrahāraiḥ sadṛśaruciḥ śukapicchasaṃnibho vā sakaladuritanāśamāśu kṛtvā janayati vahniraśeṣavāṅchitārtham

'''21.147''' chatracāmarasarojadarpaṇasvastikairatha rathena vai punaḥ ākṛtiṃ dadhati pāvake samāṃ siddhirāśu yajatāṃ pravartate

'''21.148''' pravālalākṣārasacakrato vai gorocanākuṅkumaśakracāpaiḥ mārjārapārāvatanetrakaṇṭhaistulyadyutiḥ siddhida eva vahniḥ

'''21.149''' śrutipathakaṭukadhvaniprakīrṇaḥ prakaṭitavarmavipāṭakadhvanirvā parito durdharaviṣphuliṅgayukto daritakaro yajatāṃ samīrabandhuḥ

'''21.150''' dhūmadurdinitayāgamandire yatnato’pi mahatā kṛtodayaḥ pāpagandhasahito’pi pāvakaḥ kāryanāśakara eva dehinām

'''21.151''' bhṛṅgāñjanāmbudharahetisamānavarṇaḥ sarvaistu kṛṣṇakusumaiḥ samudīptavahniḥ vetālasarpasaramākhararūpabhūtairāhutyaniṣṭamasakṛdyajatāṃ vidhatte

'''21.152''' śuddhaḥ siddhikaraḥ pradakṣiṇaśikhaścordhvaṃ gato pāvakaḥ sahyo bhadramakhaṇḍaśailasadṛśaḥ śrīvardhamānākṛtiḥ  | vāmāvartaśikho lihanvasumatīṃ viśliṣṭakīlo muhu- rmartyānākulayankaroti yajatāmiṣṭārthavighnaṃ sadā

===Kapitel 22===

''dvāviṃśaḥ paṭalaḥ · arcanāṅgavidhiḥ''

'''22.1''' atha vakṣye’rcanāṅgānāṃ dravyāṇāmiha nirṇayam snānodakamukhānāṃ tu tacchṛṇu tvaṃ samāsataḥ

'''22.2''' pañcabhārairjalaiḥ snānamuttamottamamucyate adhamādhamaṃ bhāreṇa bhārārdhahrāsato bhavet

'''22.3''' navaprakāramuddiṣṭaṃ snānāmbhastu janārdana yathoktapañcagavyena tathā pañcāmṛtena ca

'''22.4''' kuśāmbhasā sugandhena krameṇaivābhiṣecanam prātarmadhyāhnasāyeṣu śreṣṭhamityabhidhīyate

'''22.5''' prātarmadhyāhnayostābhyāṃ madhyamaṃ samudāhṛtam prātastu pañcagavyena snānaṃ kanyasamucyate

'''22.6''' gomūtraṃ gomayaṃ kṣīraṃ dadhi sarpiryathākramam ṣaṭcatustridvirekaistu bhāgairyojyaṃ krameṇa vai

'''22.7''' kapilāyāstu gomūtraṃ raktāyā gomayaṃ bhavet kṛṣṇāyāḥ kṣīramuddiṣṭaṃ sitāyā dadhi caiva hi

'''22.8''' dhūmrāyāstu ghṛtaṃ grāhyaṃ pañcagavyopapādane sarvaṃ vā kapilāyāstu nānāvarṇayujo’thavā

'''22.9''' tasya yogaṃ pravakṣyāmi gomayenopalepite śivāgre bhūtale mantrī prokṣayitvā śivāmbhasā

'''22.10''' sthaṇḍilaṃ kārayecchāliṃ pratyekaṃ prasthamācaret tadardhaistaṇḍulairbhūṣya tadardhaiśca tilairapi

'''22.11''' sthāpayetsnapanenaiva sthaṇḍile vrīhinirmite madhyame sarpirādhāya gomūtraṃ gomayaṃ punaḥ

'''22.12''' kṣīraṃ dadhi krameṇaiva prāgādiṣu ca vinyaset īśānādibhirabhyarcya mantrairmadhyādiṣu kramāt

'''22.13''' tattanmukhāṇubhirmadhye yojayettānkramātsudhīḥ praṇavena tadekasthaṃ brahmabhistvabhimantrayet

'''22.14''' mudrayedatha pātrasthaṃ mudrayā cāmṛtākhyayā evaṃ bhāgaiḥ samāyuktamāḍhakaṃ tatprakīrtitam

'''22.15''' pañcāmṛtamatho vakṣye sarvasaṃpatkaraṃ nṛṇām kṣīraṃ dadhi ghṛtaṃ kṣaudraṃ sitā caiveti pañcakam

'''22.16''' pañcāmṛtamiti khyātaṃ pratiprasthaṃ pṛthaṅnyaset pādahīnaṃ tu madhyaṃ syādardhahīnaṃ tu kanyasam

'''22.17''' madhyādi pūrvavannyasya pūrvavatpūjayettataḥ khaṇḍābhāve tu saṃgrāhyaṃ bhavedikṣurasaṃ tathā

'''22.18''' khaṇḍaṃ cāpyabhiṣekāya jalenālolitaṃ bhavet abhiṣekaḥ pṛthak proktastoyasnānāntarāntare

'''22.19''' uśīracandanopetaṃ kuśāgraiśca samanvitam kuśāmbha iti nirdiṣṭaṃ praṇavenābhimantritam

'''22.20''' tilatailena śuddhena vāsitena sugandhinā vāreṣvindubudhārkīṇāṃ śreṣṭhamabhyañjanaṃ smṛtam

'''22.21''' adhamaṃ koṇavāreṣu madhyamaṃ budhakoṇayoḥ yavamāṣaśālipiṣṭaṃ śreṣṭhamadhyetaraṃ bhavet

'''22.22''' sugandhāmalakaṃ lakṣmīrharidrā ca tathaiva ca tribhiretairvaraṃ snānaṃ haridrāmalakadvayāt

'''22.23''' madhyamaṃ snānamuddiṣṭaṃ kanyasaṃ syāddharidrayā candanośīrahrīberaistruṭinā pādyamuttamam

'''22.24''' hrībereṇa vinā madhyamadhamaṃ sośīracandanam uśīracandanopetaṃ lohakarpūrasaṃyutam

'''22.25''' jātītakkolasaṃyuktaṃ śreṣṭhamācamanīyakam karpūralohau hivā tu madhyamaṃ samudāhṛtam

'''22.26''' karpūralohatakkolān hitvā kanyasamucyate arghyaṃ tu yavasiddhārthaśalitaṇḍulasaṃyutam

'''22.27''' kṣīrakṛṣṇatilopetaṃ kuśadūrvāgrasaṃyutam uttamaṃ tviti nirdiṣṭaṃ dvābhyāṃ hīnaṃ tu madhyamam

'''22.28''' adhamaṃ tribhiruddiṣṭamarghyaṃ cāpi tridhā smṛtam sarvadravyasamāyuktaṃ niṣkaṃ niṣkārdhameva vā

'''22.29''' tadardhaṃ vā prayuñjīta śreṣṭhamadhyādhamakramāt candanāgarukarpūrakuṣṭhakuṅkumamuttamam

'''22.30''' vilepanārthamuddiṣṭaṃ kāśmīrāgaruvarjitam madhyamaṃ kevalenaiva candanena tu kanyasam

'''22.31''' kuṅkumāgarukarpūrānyathālābhaṃ prayojayet paladvayaṃ sapādaṃ tu śrīkhaṇḍaṃ cottamottamam

'''22.32''' tataḥ pādakrameṇaiva hrāsedāpādataḥ kramāt kanyasātkanyasaṃ proktaṃ madhye saptavidhaṃ bhavet

'''22.33''' śvetai raktaistathā pītaiḥ kṛṣṇairśca kusumaiḥ śubhaiḥ aparyuṣitaniśchidraiḥ kṛmikeśādivarjitaiḥ

'''22.34''' sarvairetaiḥ kṛtaṃ yacca patraiścaiva tathāvidhaiḥ śreṣṭhamabhyarcanaṃ proktaṃ kṛṣṇaiḥ puṣpairvinā kṛtam

'''22.35''' madhyamaṃ yajanaṃ proktaṃ sitaraktaistu kanyasam puṣpāṇi tāni vakṣyāmi śvetādīni yathākramam

'''22.36''' sitapadmaṃ sitārkaṃ ca mandāraṃ karavīrakam nandyāvartaṃ ca punnāgaṃ mallikā jātireva ca

'''22.37''' mādhavī kuravaṃ caiva droṇaṃ dhuttūrameva ca bakapuṣpaṃ ca bhadrā ca girikarṇī tathaiva ca

'''22.38''' śrīpuṣpaṃ vakulaṃ caiva lodhrapuṣpaṃ tathaiva ca sindhuvāraṃ śamīpuṣpaṃ sitānyuktāni tāni tu

'''22.39''' raktapadmaṃ palāśaṃ ca hayamāraṃ ca pāṭalī raktārkaṃ bṛhatī caiva piṇḍītakamataḥ param

'''22.40''' paṭṭikā cotpalaṃ raktaṃ munipuṣpaṃ tathaiva ca kadambaṃ ceti raktāni pītāni ca tataḥ śṛṇu

'''22.41''' campakaṃ karṇikāraṃ ca tathāragvadhameva ca hemadhuttūrakaṃ caiva kuraṇḍaṃ gokṣuraṃ tathā

'''22.42''' asanaṃ śikhinī caiva pītapuṣpaṃ prakīrtitam nīlotpalaṃ viṣṇukrāntiratasīpuṣpameva ca

'''22.43''' kuraṇḍaṃ kṛṣṇavarṇaṃ ca kṛṣṇapuṣpaṃ prakīrtitam patrāṇyarcanayogyāni samāsācchṛṇu sāmpratam

'''22.44''' bilvaṃ śamī mayūraṃ ca tulasīpatrameva ca haritāṅkolakaṃ caiva dhuttūraṃ karavīrakam

'''22.45''' nandyāvartaṃ ca mallī ca droṇaṃ cāpi tapasvinī sahādevī ca dūrvā ca kuśā bhadrā tathaiva ca

'''22.46''' gokṣuraṃ śaṅkhinī caiva sindhuvāraṃ tathaiva ca vakulāragvadhadrūṇāṃ pallavaṃ cāpyudumbaram

'''22.47''' viṣṇukrāntyekapatraṃ ca dhātakī dāntameva ca yavāṅkurārkapatraṃ ca patramevaṃ hi kīrtitam

'''22.48''' puṣpaiḥ patrairyathālābhaiḥ pūjayetparameśvaram kanakāni kadambāni jātīpuṣpaṃ tathaiva ca

'''22.49''' rātrau dadyācchive śeṣaṃ dadyāddeve divāniśam nandyāvartaṃ bhavetprātarmadhyāhne droṇameva ca

'''22.50''' jātiḥ sāye viśeṣeṇa dātavyā syācchivāya vai nirgandhānyugragandhāni puṣpāṇyanyāni varjayet

'''22.51''' aṅkolanimbavānīrayavadhātryādisaṃbhavaiḥ piśācakṣīravṛkṣotthairvākucīnīlikodbhavaiḥ

'''22.52''' eraṇḍārjunasaṃbhūtaiḥ pallavairnārcayecchivam japākiṃśukabandhūkaiḥ śleṣmātakakarañjakaiḥ

'''22.53''' bhallātapāribhadrotthaiḥ kusumaiśca tathā bhavet puṣpamevaṃ samākhyātaṃ tato dhūpavidhiṃ śṛṇu

'''22.54''' kṛṣṇāgaru sakarpūraṃ śreṣṭhaṃ dhūpārthamucyate candanāgaruniryāsairīṣatkarpūrasaṃyutaiḥ

'''22.55''' madhyamastu bhaverddhūpaḥ kanyaso guggulodbhavaḥ evaṃ dhūpaḥ samākhyātastato dīpavidhiṃ śṛṇu

'''22.56''' goghṛtenottamaṃ dīpaṃ madhyamaṃ cājamāhiṣaiḥ tilatailādibhiḥ snehaiḥ kanyasaṃ dīpamucyate

'''22.57''' aṣṭottaraśataṃ dīpamuttamottamamucyate kramād dvādaśahīne tu dvādaśaṃ kanyasādhamam

'''22.58''' evaṃ navavidhaṃ proktaṃ dīpaṃ tu śivamandire sadā jvalatprayoktavyaṃ yāvadaṣṭottaraṃ śatam

'''22.59''' ekamārabhya dīpaṃ tu yathāvibhavavistaram candanāgarukarpūracūrṇayuktaṃ tu yadbhavet

'''22.60''' kārpāsatūlaṃ tenaiva vartiṃ kṛtvā yugāṅgulām pātrasthayā tayā dadyāddīpaṃ vai goghṛtāktayā

'''22.61''' karpūravartiḥ śreṣṭhā syānmadhyamāgaruvartikā yā tu candanacūrṇena kṛtā sā kanyasā bhavet

'''22.62''' evaṃ dīpaṃ samākhyātaṃ vastrayogyamataḥ śṛṇu devāṅgamuttamaṃ proktaṃ madhyamaṃ kṣaumamucyate

'''22.63''' kārpāsatantujaṃ vastramadhamaṃ parikīrtitam ekavarṇakṛtā mālā śreṣṭheti parikīrtitā

'''22.64''' bahuvarṇaistathā puṣpairmadhyamā parikīrtitā patrapuṣpaiḥ kṛtā mālā kanyaseti prakīrtitā

'''22.65''' lakṣaṇaṃ bhūṣaṇādīnāmatha vakṣye janārdana mūrdhni puṣpaṃ tu kurvīta padmākāraṃ tu śobhanam

'''22.66''' karṇikāṣṭadalopetaṃ dalairvā ṣoḍaśairyutam caturaṅgulamānena svayaṃbhūte ca gāṇape

'''22.67''' daivike cārṣake liṅge mānuṣe cāpi daivavat ekahastādiliṅgānāṃ navānāmapi tadbhavet

'''22.68''' ekāṅgulavivṛddhyā tu karṇapuṣpaistathaiva hi athavā mūrdhni kurvīta jaṭāmakuṭamuttamam

'''22.69''' gaṅgācandrasamāyuktaṃ śironāhena saṃyutam ūrdhvamūrdhni yugāṅgulyaṃ sarvaratnavicitritam

'''22.70''' hāraṃ yajñopavītaṃ ca sottarīyaṃ prakalpayet hāraṃ liṅgocchrayasamaṃ nānāratnavicitritam

'''22.71''' triguṇaṃ tūpavītaṃ syānmauktikaṃ tadvaraṃ bhavet sauvarṇaṃ vāpi kurvīta vedyantaṃ pravilambitam

'''22.72''' uttarīyaṃ tathā proktamardhāṅgulasuvistṛtam ardhāṅgulavivṛddhyā tu pūrvavattatprakalpayet

'''22.73''' caturaṅgulavistāraṃ liṅganāhasamanvitam hastaliṅge’pi paṭṭaṃ syād dvihaste tryaṅgulaṃ bhavet

'''22.74''' evamekaikavṛddhyā tu navahastāntamiṣyate athavānyaprakāreṇa paṭṭalakṣaṇamucyate

'''22.75''' tridvyekāṅgulavistāranāhe ca caturaṃśake tryaṃśakairdvyaṃśakairvāpi kuryājjāmbūnadena tat

'''22.76''' mālādvayaṃ guṇāṅgulyaṃ liṅgocchrāyārdhamāyatam padmabandhaṃ vidhātavyaṃ vistāre’ṅgulavṛddhidam

'''22.77''' pratihastaṃ yathāpūrvaṃ nānāratnavicitritam kaṭisūtraṃ tathā kuryālliṅgamūlagataṃ yathā

'''22.78''' ardhāṅgulaṃ syālliṅgasthaṃ vedyāmagnyaṅgulaṃ bhavet pādāṅgulāṅgulād vṛddhiḥ pūrvavaccāṅgayordvayoḥ

'''22.79''' liṅganāhena tannāhaṃ kalpayeddeśikottamaḥ liṅgatārasamāyāmamaṃśukasya prakīrtitam

'''22.80''' pādādhikaṃ tu madhyaṃ syācchreṣṭhamardhādhikaṃ bhavet pārśvayośca ṣaḍaṅgulyaṃ vistāraṃ ca prakīrtitam

'''22.81''' madhye guṇāṅgulaṃ cāpi vistāraṃ padmamaṇḍitam sarvaratnavicitraṃ ca pārśvayostasya madhyame

'''22.82''' ardhāṅgulena pādena vṛddhiḥ pūrvavadiṣyate evaṃ hemāṃśukaṃ proktaṃ lambāṃśukamathocyate

'''22.83''' vedyardhamānamucchrāyaṃ vistāraṃ caturaṅgulam vistāraśarabhāgaikaṃ madhyabhāgasya vistṛtam

'''22.84''' vistāre’ṅgulavṛddhiṃ ca yathāpūrvaṃ prakalpayet prabhāśobhaṃ ca sauvarṇaṃ yantrārūḍhaṃ tu kārayet

'''22.85''' prabhāyāṃ padmapuṣpaṃ syādutpalaṃ vā hiraṇyajam pārśvayormūrdhni cāsya syādvivaraṃ ca ṣaḍaṅgulam

'''22.86''' madhyordhve tasya kurvīta sauvarṇaṃ cāmrapallavam adhobhāge tu kurvīta muktālambamanoharam

'''22.87''' śubhaṃ pañcaguṇaṃ kuryāttriguṇaṃ vā caturguṇam śirasparśi bhavedyadvattathā liṅgasya kārayet

'''22.88''' sauvarṇaṃ tāṃ prabhāṃ kuryādathavā toraṇātmikām liṅgavadgolakāṃ kuryācchuddhajāmbūnadena tu

'''22.89''' liṅgasya paritastasyā vivaraṃ dviyavaṃ bhavet liṅgordhve vivaraṃ cāpi kuryādaṅgulamānataḥ

'''22.90''' pūrve ca dakṣiṇe tasyāḥ paścime cottare tathā ūrdhve ca bandhayedratnaṃ puruṣādimukheṣu vai

'''22.91''' pūrve māṇikyamevoktaṃ mahānīlaṃ tu dakṣiṇe muktāphalamadhaścāpi sadyojāte tu bandhayet

'''22.92''' pravālamuttare viṣṇo sphaṭikaṃ cordhvadeśataḥ piṇḍikāyāṃ  ca kurvīta golakāṃ rajatena vai

'''22.93''' agrabhāge’thavā kuryādyathāpīṭhavyavasthitam evamābharaṇaṃ proktaṃ haviratra nigadyate

'''22.94''' godhūmo gandhaśālī ca yavaḥ kalasa eva ca vrīhayastu sitāścānye kramācchreṣṭhā udāhṛtāḥ

'''22.95''' vrīhīṇāṃ pañcaviṃśadbhiḥ śatadvayasamāyutaiḥ pūritaṃ śuktirityuktaṃ mānaṃ tenaiva kalpayet

'''22.96''' taddvayaṃ talamityuktaṃ prakuñcaḥ syāttaladvayam prasṛtistaddvayaṃ proktaṃ kuḍavaṃ prasṛtidvayam

'''22.97''' añjalistaddvayaṃ proktaṃ prasthaḥ syādañjalidvayam caru prasthadvayaṃ proktamāḍhakaṃ taddvayaṃ bhavet

'''22.98''' taddvayaṃ śivamityuktaṃ droṇaṃ vidyācchivadvayam droṇadvayaṃ bhavetkhārī bhāraṃ khārītrayaṃ bhavet

'''22.99''' uttamottamamityuktaṃ haviraṣṭottaraiḥ śataiḥ prasthairādvādaśāntaṃ syād dvādaśairdvādaśaiḥ kramāt

'''22.100''' hrāse tu kalpite tatra navadhā dṛśyate haviḥ abhāve’nyaprakāreṇa havirevaṃ prakalpayet

'''22.101''' āḍhakaṃ tu samārabhya yāvatsyāttannavāḍhakam āḍhakāḍhakavṛddhyā tu navadhā parikalpayet

'''22.102''' na bhavedāḍhakāddhīnaṃ havirliṅgasya keśava caru prasthadvayaṃ tacca homakarmaṇi kalpayet

'''22.103''' adhamaṃ tadbhaveddhome dviguṇaṃ madhyamaṃ bhavet triguṇaṃ cottamaṃ proktaṃ navapātre prakalpitam

'''22.104''' prasthaṃ kuḍavasaṃyuktaṃ piśācādyeṣu dāpayet śuddhānnaṃ pāyasaṃ gaulaṃ mudgānnaṃ kṛsaraṃ tathā

'''22.105''' havīṃṣi pañcavarṇāni teṣāṃ lakṣaṇamucyate śuddhānnaṃ tu haviḥ śuddhaistaṇḍulaireva kalpitam

'''22.106''' taṇḍulena same kṣīre pācitaṃ pāyasaṃ bhavet taṇḍulārdhena payasā tadardhena gulena ca

'''22.107''' pācitaṃ gaulamākhyātaṃ mudgānnamadhunocyate taṇḍulena samairvārdhairmudgairmudgānnamucyate

'''22.108''' śuddhānne pūrvavatsiddhe tilasarṣapayoḥ kṣipet dagdhaṃ yatsūkṣmacūrṇaṃ tu taṇḍulātṣoḍaśāṃśayoḥ

'''22.109''' tayoḥ pādamitaṃ tatra marīcaṃ jīrakeṇa yuk tadardhaṃ rajanīcūrṇaṃ pākānte tu vinikṣipet

'''22.110''' kṛsarānnamiti proktamucyante vyañjanāni ca taṇḍulātṣoḍaśāṃśaṃ tu maudgaṃ śreṣṭhamudāhṛtam

'''22.111''' tasmātpādārdhahīnaṃ tu madhyamantyaṃ ca kalpayet kṛṣṇamudgakulatthaṃ ca masūraṃ tuvarī tathā

'''22.112''' satuṣaṃ vituṣaṃ cāpi pūrvavatparikalpayet kadalīṃ bṛhatīṃ cāpi kūṣmāṇḍorvārukaṃ tathā

'''22.113''' alābūṃ karkarīṃ caiva panasaṃ nālikerakam tintriṇīṃ cāmrakaṃ caiva kāravallīdvayaṃ tathā

'''22.114''' kṣudrāṃ vyāghrīṃ ca niṣpāvaṃ yathālābhaṃ samāharet kandāni bhakṣyaparṇāni vyañjanāni prakalpayet

'''22.115''' uttamaṃ tu pratiprasthaṃ vyañjanaṃ syātpalatrayam dvipalaṃ madhyamaṃ proktaṃ palaṃ kanyasamucyate

'''22.116''' catvāriṃśatpalānāṃ tu kuḍavaṃ lavaṇaṃ kṣipet kuḍavaṃ marīcakaṃ cāpi śreṣṭhakaṃ tu palaṃ smṛtam

'''22.117''' tadardhaṃ madhyamaṃ proktaṃ tadardhamadhamaṃ bhavet tadardhaṃ jīrakaṃ proktamājyamānamataḥ śṛṇu

'''22.118''' dvātriṃśadaṃśakaṃ sarpistaṇḍulasyottamaṃ bhavet tadardhaṃ madhyamaṃ proktaṃ tadardhamadhamaṃ bhavet

'''22.119''' āḍhakasya palaṃ śreṣṭhaṃ tadardhaṃ madhyamaṃ bhavet gulaṃ tadardhamadhamaṃ yathālābhaṃ sitā bhavet

'''22.120''' ardhāṃśaṃ taṇḍulācchreṣṭhaṃ dadhi madhyaṃ tadardhataḥ tadardhamadhamaṃ proktaṃ naivedyaṃ parikalpitam

'''22.121''' kadalīpanasāmrāṇāṃ yathālābhaṃ phalāni ca vyañjanāni pavitrāṇi jantuvarjyāni kalpayet

'''22.122''' uktānyetāni sarvāṇi śuṣkāṇyārdrāṇi cāharet upadaṃśāni ramyāṇi śivāya paramātmane

'''22.123''' bhaktyātha mūlaśākādyaṃ svādu bhakṣyaṃ ca śobhanam dadyātsusaṃskṛtaṃ samyaṅ naivedyena samanvitam

'''22.124''' sarvadoṣavinirmuktāṃstaṇḍulāṅśuddhapātragān bhāṇḍeṣu prakṣipetteṣu pratimānāṃ pṛthakpṛthak

'''22.125''' āḍhakaṃ tu śivaṃ vāpi droṇaṃ vā prokṣya pātrakam pañcadhā vā caturdhā vā tridhā vā kṣālanaṃ bhavet

'''22.126''' astreṇa kṣālanaṃ kuryātsadyena prakṣipejjalam taṇḍulena samaṃ paścādvāmadevena coddharet

'''22.127''' ghoreṇa cullīmāropya hetinā cendhanaṃ kṣipet ghoreṇāgniṃ ca saṃdīpya pācayitvā nareṇa tu

'''22.128''' avatārya mṛjetsarvānastreṇaivārdrapāṇinā mṛdbhāṇḍāni navānyeva haviṣāṃ pūjitāni hi

'''22.129''' lohapātramapi śreṣṭhamayaḥpittalavarjitam mṛdbhāṇḍamadhamaṃ proktamasakṛtpātratāṃ gatam

'''22.130''' māsi māsi tyajedbhāṇḍaṃ mārttikaṃ sarvameva hi nirmālyasaṃkarādau tu sadya eva parityajet

'''22.131''' evaṃ haviḥ samāpādya tato devāntikaṃ nayet paricārastu tatkāle baddhoṣṇīṣaḥ sadā bhavet

'''22.132''' tasyānayanakāle tu paṭādyācchāditaṃ tu tat abhyukṣya purataḥ kṛtvā śaṅkhadhvanisamāyutam

'''22.133''' hemādinirmite pātre proktadravyaistu śodhite prokṣite tu śivāstreṇa nikṣipetpraṇavaṃ smaran

'''22.134''' sarvopadaṃśasaṃyuktaṃ yathoktaṃ tannivedayet havirbhāṇḍeṣvadhobhāge caturbhāgaikabhāgakam

'''22.135''' nyasya balipradānāya tatra kiṃcitsamāharet śeṣaṃ tu paricārāṇāṃ bhojanāya prakalpayet

'''22.136''' tato devāya tāmbūlaṃ dadyāttallakṣaṇaṃ śṛṇu pratiprasthaṃ tu gṛhṇīyātkramukasya phaladvayam

'''22.137''' ekaṃ vāpi tadardhaṃ vā parṇānāṃ ca catuṣṭayam tritayaṃ madhyamaṃ proktaṃ dvitayaṃ tvadhamaṃ bhavet

'''22.138''' lavaṅgatruṭijātīnāṃ cūrṇaṃ takkolajaṃ tathā karpūreṇa samāyuktaṃ pañca saugandhikaṃ smṛtam

'''22.139''' mukhavāsaṃ tu tacchreṣṭhaṃ karpūreṇaiva madhyamam lavaṅgenādhamaṃ proktamevaṃ saugandhikaṃ tridhā

'''22.140''' mātuluṅgaphalaṃ pakvaṃ nālikeraphalaṃ tathā saṃskṛtya samyak tāmbūlasahitaṃ tannivedayet

'''22.141''' cūrṇaṃ prāṇyaṅgajaṃ vāpi tāmbūle na tu dūṣyate yathā prāṇyaṅgajaṃ muktāśaṅkhādi śuci dṛśyate

'''22.142''' annācchataguṇaṃ śreṣṭhaṃ piṣṭaṃ tu ghṛtapācitam gulakhaṇḍena saṃmiśraṃ tasmāttacca nivedayet

'''22.143''' phalāni ca supakvāni bhakṣyāṇi vividhāni ca haviḥpradānādūrdhvaṃ tu purā nityotsavasya tu

'''22.144''' haviṣā saha vā nityaṃ pṛthakpātre nivedayet yathālābhaṃ tataścāpi tāmbūlaṃ dāpayecchive

===Kapitel 23===

''trayoviṃśaḥ paṭalaḥ · ārātrikavidhiḥ''

'''23.1''' ārātrikaṃ tato vakṣye sarvadoṣapraśāntaye navadīpayutaṃ śreṣṭhaṃ pañcadīpaistu madhyamam

'''23.2''' kanyasaṃ tvekadīpena yutaṃ pātraṃ kramāccaret dīpādhārāṇi lohāni kārayetpiṣṭajāni vā

'''23.3''' dīpādhāreṣu sarveṣu goghṛtāktāṃ tu vinyaset vartimanyeṣu pātreṣu nimbapatraṃ ca sarṣapam

'''23.4''' kārpāsabījaṃ lavaṇaṃ catuṣpalaṃ ca vinyaset gaurīdhāmnastu tatsarvaṃ yāgamaṇṭapato’pi vā

'''23.5''' puṣpamaṇṭapato vāpi samāhṛtya samānayet maṇṭapābhyantare vātha tatsarvaṃ parikalpayet

'''23.6''' rudrāyatanayoṣidbhirathavā paricārakaiḥ tāni sarvāṇi pātrāṇi vāhayitvā śiropari

'''23.7''' samānīya śivasyāgre kṛtvā tadvartidīpanam tripādyāṃ tu śivasyāgre vinyasetpātrapañcakam

'''23.8''' śivasyācamanaṃ dattvā saṃpūjya śivamantrataḥ tato dīpārcanaṃ kuryādgandhapuṣpādibhiḥ kramāt

'''23.9''' navagrahā navānāṃ tu pañcānāṃ bhūtapañcakam ekasya vahnirevokto dīpānāmadhidevatāḥ

'''23.10''' navadīpeṣu sūryaṃ tu madhye dikṣu samantataḥ guruśukrajñacandrāṃstu bhaumamarkasutaṃ tathā

'''23.11''' rāhuṃ ketuṃ ca saṃpūjya vidikṣu kramaśastathā pañcasvagniṃ yajenmadhye prāgādiṣu yathākramam

'''23.12''' ākāśaṃ ca tathā vāyumapaṃ pṛthvīṃ ca pūjayet vahnimevaikadīpe tu prokṣayeccāstramantrataḥ

'''23.13''' nārācāstraprayogeṇa dikṣu cāstraṃ prayojayet badhvā tu surabhiṃ paścāddīpasyopari darśayet

'''23.14''' uddhṛtyopari devasya triḥ paribhrāmayeddhṛdā anyāni dravyapātrāṇi bhrāmayecca pṛthak pṛthak

'''23.15''' athavā teṣu pātreṣu kiṃcitkiṃcidvigṛhya ca tattaddravyaṃ samastaṃ tu gṛhītvā dakṣamuṣṭinā

'''23.16''' astreṇa bhrāmayitvā tu nikṣipeddīpapātrake tato bhasma susaṃgṛhya karpūrādisugandhitam

'''23.17''' gṛhītvā mudrayā mṛgyā bhrāmya liṅgopari tridhā prakṣipeddīpapātre tu tato liṅgasya mūrdhani

'''23.18''' astreṇa vinyaseddikṣu dakṣiṇetarayostataḥ pārśvayorhṛdaye caiva vinyasedbhasma mantravit

'''23.19''' athavā dravyavarjaṃ tu dīpameva prayojayet tatkāle tu prayuñjīta stotramaṅgalavādanam

'''23.20''' jayaśabdaṃ saśaṅkhaṃ ca vedadhvanisamāyutam visarjayettataḥ sarvaṃ dīpādidravyasaṃcayam

'''23.21''' visarjanaṃ mahāpīṭhe liṅge vātha prakalpayet evamārātrikaṃ dattvā dadyādācamanīyakam

'''23.22''' tāmbūlaṃ dāpayenmantrī mukhavāsasamanvitam

===Kapitel 24===

''caturviṃśaḥ paṭalaḥ · nīrājanavidhiḥ''

'''24.1''' nīrājanavidhiṃ vakṣye kāmyaṃ naimittikaṃ ca tat ātmajakṣetravittādi kāmyamatra prakīrtitam

'''24.2''' utpātaparacakrādi nimittaṃ syājjanārdana pūrvavatkalpite pātre dīpādhāre suśobhane

'''24.3''' hemarūpyādisaṃsiddhe kuṣṭhacandanajena vai kṣodena śaligodhūmayavamāṣodbhavena vā

'''24.4''' piṣṭena kuryātsuvyaktaṃ dīpasya paritaḥ kramāt triśūlavajraśaṅkhābjaśrīvatsasvastikān kramāt

'''24.5''' chatracāmara saṃyuktānaṣṭadikṣu krameṇa vai gomayaṃ śvetasiddhārthaṃ yavaṃ kṛṣṇatilaṃ tathā

'''24.6''' dadhi gorocanāṃ bilvavaṭapippalasaṃbhavān pravālānvikiretpātre sugandhikusumāni ca

'''24.7''' goghṛtāktāṃ tato vartiṃ dīpādhāreṣu yojayet karpūrāgarucūrṇena yuktā vartiḥ praśasyate

'''24.8''' navadīpamidaṃ proktaṃ nīrājanavidhiṃ prati iti saṃpāditaṃ pātraṃ śivāgre sthaṇḍilopari

'''24.9''' padmamaṣṭadalaṃ kṛtvā tatra pātraṃ nidhāya ca puṇyāhaṃ vācayitvā tu dīpānāropya tatra vai

'''24.10''' pūrvavatpūjayitvātha śaṅkhadundubhinisvanaiḥ snānakāle prayuñjīta śivasyopari pūrvavat

'''24.11''' bhasmādikaṃ tathānyacca tatra tatparito yajet visarjanaṃ ca tasyāpi pūrvavatparikalpayet

'''24.12''' aṣṭamyāṃ ca caturdaśyāṃ pañcadaśyāṃ ca pakṣayoḥ ārdrāyāmarkavāre ca yojayetkāmyasiddhaye

'''24.13''' adbhutādiṣu sarveṣu dṛṣṭamātreṣu yojayet

===Kapitel 25===

''pañcaviṃśaḥ paṭalaḥ · nityotsavavidhiḥ''

'''25.1''' atha nityotsavaṃ vakṣye sarvāriṣṭanivāraṇam lokapuṣṭipradaṃ samyaṅ nityārcāṅgaṃ tathaiva ca

'''25.2''' tasmānnityotsavaṃ śāstre traisaṃdhyamiti kīrtitam navaprakārametatsyāt tatprakāramataḥ śṛṇu

'''25.3''' vināyakaṃ tato devaṃ devīṃ pāśupateśvaram balipātrasthitaṃ cāstraṃ golakāṃ liṅgameva vā

'''25.4''' pāduke vṛṣarājaṃ ca caṇḍeśaṃ ca yathākramam śirasā vāhayitvā tu kriyate yatra nityaśaḥ

'''25.5''' navabhiḥ prathamaṃ cāhuruttamottamasaṃjñitam caṇḍaṃ hitvāṣṭabhirdevairbhaveduttamamadhyamam

'''25.6''' caṇḍaṃ pāśupateśaṃ ca hitvā syāduttamādhamam caṇḍapāśupatābhyāṃ tu hitvā vighneśameva hi

'''25.7''' tadbhavenmadhyamaśreṣṭhaṃ tribhistairgolakāṃ vinā madhyamadhyamidaṃ jñeyaṃ taiścaturbhiśca pāduke

'''25.8''' hitvā yatkriyate tattu madhyamādhamamiṣyate pūrvoktaistairvṛṣaṃ hitvā kṛtaṃ syātkanyasottamam

'''25.9''' pūrvoktaistairumāṃ hitvā bhavetkanyasamadhyamam umāmaheśvarābhyāṃ vā kuryādadhamamadhyamam

'''25.10''' ekāsanasthayorbhedaḥ śivayoratra neṣyate pūrvoktaistairmaheśaṃ ca hitvā kevalamastrataḥ

'''25.11''' adhamādhamamevaṃ tu proktaṃ navavidhotsavam agnikārye kṛte kuryānnityotsavamatandritaḥ

'''25.12''' hitvā vā nityahomaṃ tu nityotsavamathācaret mahotsavaṃ tu kurvīta vinā vā nityamutsavam

'''25.13''' ato’rcanakramo hyeṣāṃ sarveṣāmabhidhāsyate pūjakaḥ kṛtahomastu praviśyābhyantaraṃ tataḥ

'''25.14''' gandhapuṣpādibhiḥ samyag devānvighneśvarādikān krameṇa pūjayenmantrī sarvāṃśca svasvamantrataḥ

'''25.15''' sthalikākarṇikāmadhye yajetpāśupatāstrakam trinetraṃ caturbhujaṃ caiva ślakṣṇapiṅgordhvakeśakam

'''25.16''' varadābhayahastaṃ ca vāmasavyākṣaśūladhṛt evaṃ pāśupataṃ dhyātvā baliliṅge samarcayet

'''25.17''' pūrvāhne puṣpaliṅgaṃ syānmadhyāhne cānnaliṅgakam sāyāhne’kṣataliṅgaṃ syādāḍhakārdhaprakalpitam

'''25.18''' puṣpaliṅgaṃ tu vā proktaṃ rātrāvapi tadutsave golakāyāṃ bhavedevaṃ pādukādvitaye yajet

'''25.19''' dharmayajñau tu saṃpūjya mahāghaṇṭāṃ tu tāḍayet putrakaistu tato devāṅśucibhiḥ susitāmbaraiḥ

'''25.20''' soṣṇīṣaiḥ sottarīyaiśca sapavitrakaraistadā kṛtatripuṇḍrakaiścaiva mālādibhiralaṃkṛtaiḥ

'''25.21''' vāhayecca tato devānkrameṇānena deśikaḥ pūrvaṃ vināyakaṃ cāgre devaṃ tadanu vāhayet

'''25.22''' devīṃ tadvāmabhāge tu tataḥ pāśupateśvaram tato’straṃ balipātrasthaṃ vitānena samanvitam

'''25.23''' gṛhītvā vāhayeddhaste dakṣiṇe hastasaṃmitam vaiṇavaṃ vetrajaṃ vāpi daṇḍaṃ khaṇḍādivarjitam

'''25.24''' golakāmānayetpaścātpāduke ca tato nayet vṛṣaṃ tadanu tasyānu caṇḍeśaṃ ca samānayet

'''25.25''' śaṅkhadundubhinirghoṣairdhūpadīpasamākulam chatracāmarasaṃyuktaṃ piṅchadhvajasamāyutam

'''25.26''' gītanṛttasamāyuktaṃ maṅgiṇītālasaṃyutam ādyaṃ pradakṣiṇaṃ kṛtvā viniṣkramya bahistataḥ

'''25.27''' niḥśabdaṃ gopure kṛtvā tato bāhye pradakṣiṇam gatvā bāhyamahāpīṭhaṃ kṛtvā tatra pradakṣiṇam

'''25.28''' kārayettrayamekaṃ vā yātudhānādigītaye tataḥ praviśya niḥśabdaṃ dvāri kṛtvā punaḥ kramāt

'''25.29''' antaḥ pradakṣiṇaṃ kuryāttālairetaiḥ samanvitam indrasya samatālaṃ syādagnau baddhāvaṇaṃ bhavet

'''25.30''' yamasya bhṛṅgiṇītālaṃ nairṛtyāṃ mallitālakam vāruṇyāṃ navatālaṃ tu vāyośca balitālakam

'''25.31''' some tu koṭiśikharamaiśānyāṃ ṭaṅkarī tathā etānaṣṭau tadā tālāndikṣu sarvāsu vādayet

'''25.32''' tataḥ praveśayeddevānvṛṣatālasamanvitam vāhanānāṃ tu sarveṣāṃ pādaṃ prakṣālayettadā

'''25.33''' praviṣṭeṣu ca deveṣu pūrvavatpūjayetsudhīḥ astraṃ ca balipātrasthamabhyarcyādāya mantrataḥ

'''25.34''' liṅgasya dakṣiṇe pārśve yojayettena mantrataḥ āsāre mahati prāpte prāpte vā caṇḍamārute

'''25.35''' paracakrabhayādau ca kevalāstreṇa cotsavam kārayeddeśiko dhīmānantargarbhagṛhe’pi vā

'''25.36''' pādukābhyāṃ vinābhūte tasminnityotsave sudhīḥ antaḥ praviṣṭe deve tu pūrvābhimukhasaṃsthite

'''25.37''' gomayālepite deśe tasyāgre pāduke nyaset tatra devaṃ samabhyarcya pūrvoktaṃ mantravittamaḥ

'''25.38''' devaṃ pādyādibhiryaṣṭvā praviśyāntargṛhaṃ tataḥ upaveśyāsane devaṃ devāgre pāduke nyaset

===Kapitel 26===

''ṣaḍviṃśaḥ paṭalaḥ · mudrālakṣaṇavidhiḥ''

'''26.1''' mudrāyā lakṣaṇaṃ vakṣye tayā sarvārthasiddhaye yayā sidhyati mantrāṇāṃ phalaṃ sarvamabhīpsitam

'''26.2''' mudraṃ dadāti devānāṃ drāvayatyasurānapi modadrāvaṇadharmitvaṃ mudrāśabdena kathyate

'''26.3''' śodhanī kālakarṇī ca mukulī śaśakarṇikā niṣṭhurā padmamudrā ca namaskārā manoramā

'''26.4''' śāntā ca liṅgamudrā ca dhvajā cāvāhanī tathā sthāpanī rodhinī caiva saṃnidhīkaraṇī tathā

'''26.5''' gāyatrī ca tathā netrā cāstrā caiva tathāparā sudhā pañcamukhī caiva saṃhārākhyā tathaiva ca

'''26.6''' vajrākhyā śaktimudrā ca daṇḍā khaḍgā tathaiva ca pāśamudrāṅkuśākhyā ca gadā śūlā tathaiva ca

'''26.7''' padmākhyā cakramudrā ca dravyākhyā karakacchapī nārācāstrā mṛgī caiva mahāmudrā tathāparā

'''26.8''' śaṅkhamudrā tālamudrā vārāhī trāsinī tathā śivayāge samuddiṣṭāścatvāriṃśadimāḥ kramāt

'''26.9''' maṇibandhau tu saṃlagnau pāṇī kṛtvā janārdana hṛddeśe tvatha vinyasya tāḍayecca parasparam

'''26.10''' śodhanī tu bhavedeṣā mudrā śodhanakarmaṇi karābhyāṃ muṣṭimābadhya yojayenmaṇibandhakau

'''26.11''' muṣṭī kṛtvā tatottāne tato nāṅguli yojayet aṅguṣṭhāgrau ca saṃlagnau kṛtvā syātkālakarṇikā

'''26.12''' kālakarṇī prayoktavyā dravyalakṣaṇakarmaṇi karābhyāmañjaliṃ kṛtvā madhye tu suṣiraṃ nayet

'''26.13''' sarojamukulākārā mukulī dravyasaṃcaye tarjanyau kuñcite kṛtvā tvaṅguṣṭhābhyāṃ samākramet

'''26.14''' śeṣā ṛjvīrghanāḥ kṛtvā maṇibandhe niyojayet śaśakarṇīti vijñeyā sarveṣāmṛddhikāriṇī

'''26.15''' maṇibandhe ca saṃviṣṭau karau kṛtvā tatastayoḥ aṅguṣṭhau garbhagau kṛtvā muṣṭibandhe kṛte sati

'''26.16''' niṣṭhureyaṃ bhavenmudrā sarveṣāṃ tu nirodhane pūrvoktamukulī yā tu sā hṛddeśe niveśitā

'''26.17''' vyākocakamalākārā viśliṣṭaprasṛtāṅguliḥ padmamudrā bhavedeṣā proktā hyāsanakalpane

'''26.18''' hastābhyāmañjaliṃ kṛtvā hṛddeśe tu samāśritām aṅguṣṭhena tu savyena vāmāṅguṣṭhaṃ tu pīḍayet

'''26.19''' namaskārā bhavedeṣā sarveṣāṃ vandanocitā aṅgulīvalanaṃ kṛtvā hastayorubhayorapi

'''26.20''' kaniṣṭhike tu saṃyukte kṛtottāne tathā bahiḥ vāme kṛtvā tale lagnaṃ kṛtvā cānāmikādvayam

'''26.21''' madhyame prasṛte yukte kṛtvā taddeśinīdvayam aṅguṣṭhamūlaparvasthaṃ kṛtvāṅguṣṭhadvayaṃ tathā

'''26.22''' anāmikāpṛṣṭhalagnaṃ kṛtvā kuryānmanoramām pūjakena prayoktavyā śivasāyujyakarmaṇi

'''26.23''' kuryādaṅguṣṭhalagnāgrāṃ tarjanīṃ hastayordvayoḥ eṣā śānteti vikhyātā mantrasthāpanakarmaṇi

'''26.24''' śithilaṃ dakṣiṇāṃ muṣṭiṃ badhvā tasyodare kṣipet vāmāṅguṣṭhaṃ tato’ṅguṣṭhaṃ dakṣiṇaṃ cocchritaṃ nayet

'''26.25''' vāmahastāṅgulībhiśca savyamuṣṭiṃ ca veṣṭayet liṅgamudrā bhavedeṣā liṅgasthāpanakarmaṇi

'''26.26''' vāmahastatale hastatalamanyaṃ prayojayet vāmahastāṅgulībhistu tatpṛṣṭhamabhiveṣṭayet

'''26.27''' aṅguṣṭhaṃ vāmahastasya dakṣiṇenātha pīḍayet dakṣiṇasyāṅgulīranyāḥ śliṣṭāstiryagavasthitāḥ

'''26.28''' cālayed dhvajasaṃjñaiṣā mudrā vāyoḥ priyāvahā hastābhyāmañjaliṃ kṛtvā saṃmukhaṃ tu tayoḥ punaḥ

'''26.29''' kaniṣṭhāmūlage tattadaṅguṣṭhāgre ca kārayet āvāhanī bhavedeṣā mudrāvāhanakarmaṇi

'''26.30''' sthāpanī saiva nirdiṣṭā prayuktādhomukhaṃ yathā śodhinī niṣṭhureva syātsarveṣāṃ tu nirodhinī

'''26.31''' śodhinī saiva saṃśliṣṭocchritāṅguṣṭhā yadā bhavet saiva syātsaṃnidhānī ca saṃnidhīkaraṇocitā

'''26.32''' karayoḥ suṣiropetā muṣṭibandhe kṛte sati gāyatrīyaṃ bhavenmudrā gāyatryāṃ tāṃ prayojayet

'''26.33''' yā śānteti purā proktā saiva netrā tvadhomukhī darśane tu prayoktavyā sarveṣāṃ tu janārdana

'''26.34''' karayoḥ śithilāṃ muṣṭiṃ kṛtvāṅgulyaḥ prasāritāḥ sahasā tu bhavedeṣā mudrāstrā cāstrakarmaṇi

'''26.35''' dvayostu valitāḥ kṛtvāṅgulīḥ sarvāḥ parasparam kaniṣṭhānāmike ūrdhvaṃ deśinī madhyame tathā

'''26.36''' aṅguṣṭhau madhyagau kṛtvā mudreyaṃ dhenusaṃjñitā amṛtikaraṇe yogyā dravyāṇāṃ yajñakarmaṇi

'''26.37''' valitāḥ pṛṣṭhataḥ sarvāścāṅgulyastu parasparam aṅguṣṭhābhyāṃ kaniṣṭhāgrātsaṃkrāme madhyame tathā

'''26.38''' tarjanībhyāṃ samākramyānāmike cocchrite ubhe eṣā pañcamukhī khyātā vaktraklṛptau prayojitā

'''26.39''' viśliṣṭāṅgulike haste kramādaṅguṣṭhamūlagāḥ kaniṣṭhānāmikāmadhyātarjanyaḥ saṃhṛtirbhavet

'''26.40''' visarjane tu sarveṣāṃ yoktavyā mantravittamaiḥ kaniṣṭhāṃ karayostattadaṅguṣṭhābhyāṃ samākramet

'''26.41''' śeṣāścaiva sthirāḥ śliṣṭāḥ kṛtvā tanmaṇibandhakau vāmetarāvadhordhvasthau tiryaksthau ca prakalpayet

'''26.42''' vajramudrā bhavedeṣā vajraklṛptau prayojitā saivoktāṅguliviśleṣācchaktimudrā prakīrtitā

'''26.43''' śaktimudrā bhavedeṣā vahneḥ prītikarī sadā udgate dakṣiṇe muṣṭau tarjanyantarite kṛte

'''26.44''' daṇḍākhyā sā yamasyaiṣā sadā prītikarī smṛtā pāṇī parasparaṃ śliṣṭau kṛtvā sarvāṅgulīyutau

'''26.45''' dakṣiṇasyonnataśliṣṭau tarjanīmadhyame ubhe khaḍgamudrā bhavedeṣā chedane nirṛtipriyā

'''26.46''' hastayostarjanīyugmamaṅguṣṭhābhyāṃ tu veṣṭayet śeṣāḥ prasārayetsarvā viśliṣṭāḥ pāśasaṃjñitā

'''26.47''' bandhane tu prayoktavyā varuṇaprītidā sadā muṣṭibandhe kṛte haste dakṣiṇe tu samuddhṛte

'''26.48''' visṛjyordhvasthite kṛtvā tarjanī madhyame ubhe śliṣṭābhyāṃ kuñcayettābhyāṃ tarjanīmaṅkuśā bhavet

'''26.49''' eṣā hyākarṣaṇe proktā vāyuprītikarā sadā uchrite dakṣiṇe haste muṣṭibandhe kṛte sati

'''26.50''' tiryakcalanasaṃyogānmuṣṭermudrā gadā bhavet somaprītikarī mudrā sarvāpyāyanakarmaṇi

'''26.51''' hastābhyāmañjaliṃ kṛtvā kuñcite’tha kaniṣṭhake vāmāṅguṣṭhaṃ samākramya dakṣiṇenetarāḥ samāḥ

'''26.52''' tarjanyanāmikāmadhyāḥ saṃyuktāstu parasparam viśliṣṭāḥ śūlamudreyaṃ sarvaduṣṭabhayaṃkarī

'''26.53''' badhvā tau padmavatpāṇī cakrā syādbhramaṇāttayoḥ senāstambhe prayoktavyā viṣṇuprītikarī sadā

'''26.54''' padmamudreti yā proktā padmākhyā saiva kīrtitā sṛṣṭikarmaṇi nirdiṣṭā brahmaprītikarī sadā

'''26.55''' anāmikāmūlaparve kṛtvā cāṅguṣṭhasaṃgatim darvyamudrā bhavedeṣā hīnadravyasya pūraṇī

'''26.56''' vāmapāṇitalordhve tu dakṣahastaṃ tu yojayet tiryaksthaṃ saṃpuṭaṃ kṛtvā sarvāṅgulyaḥ susaṃgatāḥ

'''26.57''' karaśuddhau vidhātavyā karakacchapikā sadā kṛtvā dakṣiṇahastena muṣṭiṃ dṛḍhataraṃ tathā

'''26.58''' aṅguṣṭhāgreṇa tarjanyāḥ samyagagraṃ nipīḍya ca prokṣipettarjanīṃ bhede yathā śabdodayo bhavet

'''26.59''' nārācāstrasamākhyeyaṃ mudrā digbandhakarmaṇi dakṣiṇāṅguṣṭhaśirasi madhyamānāmike ubhe

'''26.60''' saṃyojya darśayenmudrā mṛgī govṛddhikāriṇī adhomukhābhyāṃ pāṇibhyāmāpādānmastakāntakam

'''26.61''' kramātsaṃsparśanādeṣā mahāmudrā prakīrtitā apasavyaṃ puṭaṃ kṛtvā dakṣiṇasya karasya tu

'''26.62''' deśinyantaṃ kaniṣṭhāyāṃ yojayennimnamaṅgulīḥ śaṅkhamudrā bhavedeṣā tvabhiṣekavidhau parā

'''26.63''' dakṣiṇāṅgulibhirvāmahastasya talatāḍanāt aṅguṣṭhavarjitābhiḥ syāt tālamudrā tu śuddhidā

'''26.64''' madhyānāmikayoragre dakṣiṇasya karasya tu aṅguṣṭhodaramāyojyaṃ tarjanīṃ ca kaniṣṭhikām

'''26.65''' unnamecca varāhākhyā mudreyaṃ śuddhikarmaṇi tarjanīmadhyamābhyāṃ tu śliṣṭābhyāṃ dakṣiṇasya tu

'''26.66''' vāmahastatale kuryāttāḍanaṃ sakṛdeva hi trāsinī syādiyaṃ mudrā trāsane pariyojitā

===Kapitel 27===

''saptaviṃśaḥ paṭalaḥ · mahotsavavidhiḥ''

'''27.1''' athotsavavidhiṃ vakṣye sarvalokahitāvaham savaḥ kalyāṇamityuktaṃ sarvajantusukhāvaham

'''27.2''' udbhūtastu savo yasmāttasmādutsava ucyate navaprakārastasyāyaṃ kramādbhedo vidhīyate

'''27.3''' śaivo gauṇo’tha bhautaśca prathamatritayaṃ bhavet bhauvanaśca caturthaśca śāktaḥ pañcama eva ca

'''27.4''' raudraḥ ṣaṣṭhastathā sauraḥ saptamaḥ parikīrtitaḥ aṣṭamo mānavaḥ prokto navamaḥ pakṣa eva hi

'''27.5''' ekāhastu bhavecchaivastriyaho gauṇa ucyate pañcāho bhauta uddiṣṭaḥ saptāho bhauvanaḥ smṛtaḥ

'''27.6''' navāhaḥ śākta ityukto raudra ekādaśāhakaḥ dvādaśāhastu sauraḥ syānmānavaḥ syāccaturdaśa

'''27.7''' pakṣaḥ pañcadaśāhastu nāmānyetani yogataḥ tīrthārthamutsavārambhastasmāttīrtharkṣamucyate

'''27.8''' caitre tvāṣṭrabhamuddiṣṭaṃ vaiśākhe śūrpamucyate jyeṣṭhe mūlamathāṣāḍhe vaiśvadevamiti smṛtam

'''27.9''' śrāvaṇe tu śraviṣṭhā syātproṣṭhapade tvajaikapād aśvinī cāśvayuṅmāse kārtike māsi kṛttikā

'''27.10''' mārgaśīrṣe tathā māse raudranakṣatramucyate bārhaspatyaṃ bhavetpuṣye māghe paitramiti smṛtam

'''27.11''' phālgune māsi cāryamṇo nakṣatraṃ tīrthabhaṃ bhavet māsarkṣāṇyevamuktāni tīthārthaṃ tu janārdana

'''27.12''' pūrṇamāsīyutānyeva nakṣatrāṇi bhavanti hi viyukteṣvapi bheṣveṣu nadyādau tīrthamucyate

'''27.13''' yukte vātha viyukte vā māsarkṣeṇa tu parvaṇi samudratīrthamuddiṣṭaṃ sarvapāpapraṇāśanam

'''27.14''' caitrādisarvamāseṣu raudrarkṣaṃ tīrthabhaṃ bhavet ṣaṣṭhī māghe tathā jyeṣṭhe cāṣṭamī kṛṣṇapakṣake

'''27.15''' tīrthārthe tu tithī prokte sarvakāmaphalaprade ubhayoḥ pakṣayoścāpi parvaṃ tadvaccaturdaśīm

'''27.16''' sarvamāseṣu tīrthārthaṃ kalpayetkalpavittamaḥ yajamānasya janmarkṣaṃ grāmādīnāṃ tathaiva ca

'''27.17''' liṅgasthāpananakṣatraṃ tathā caivāyanadvayam viṣuvadvayaṃ janmarkṣaṃ bhūpatīnāṃ viśeṣataḥ

'''27.18''' nakṣatratīrthaṃ saṃkalpya tithyādiṣu na kārayet nakṣatraṃ mukhyamevaṃ syāttithyādi gauṇameva ca

'''27.19''' tamānnakṣatrasaṃkalpe tithyāditīrthakaṃ na hi yadi mohācca kurvīta tatkartuḥ sarvadoṣakṛt

'''27.20''' tīrtharkṣadvayasaṃprāptau caikamāse parasparam dhvajārohāditīrthāntamekamāse praśasyate

'''27.21''' yāgārambhādi madhyaṃ syādanyatīrthācca kevalam utsaveṣu navasveṣu śaivādyaistu bhavettribhiḥ

'''27.22''' adhamatritayaṃ paścādbhauvanādyaistribhistathā madhyamatritayaṃ proktamatha saurādibhistribhiḥ

'''27.23''' uttamatritayaṃ teṣu prathamatritayasya tu na dhvajārohaṇaṃ proktamanyayoreva kalpyate

'''27.24''' prathamatritayasyāpi pañcāhatriyahotsavam madhyamatritayasyāpi saptāhaṃ vā navāhakam

'''27.25''' aṅkurānarpayitvādau bherīṃ saṃtāḍya cārabhet ekāhamārabheddhīmānbherītāḍanapūrvakam

'''27.26''' bhauvanātpakṣaparyantaṃ ye syuratra mahotsavāḥ dhvajārohaṇapūrvāśca bherītāḍanapūrvakāḥ

'''27.27''' aṅkurārpaṇapūrvāśca trividhāste bhavanti hi traividhyaṃ teṣu yatproktaṃ tadidānīṃ vivicyate

'''27.28''' ṣaṇṇāmapyutsavānāṃ tu proktānāṃ tīrthabhaṃ tu yat vigaṇayya tataḥ pūrve triguṇe’hani niścite

'''27.29''' dhvajamāropya tadrātrau kṛtvā bheryāditāḍanam tataḥ prāptadine rātrāvutsavārambha ucyate

'''27.30''' dhvajārohaṇapūrvo’yaṃ prokto’tha vidhirucyate bherītāḍanapūrvasya pūrvavanniścite sati

'''27.31''' dviguṇīkṛtya divasaṃ tadrātrau tāḍanaṃ purā bheryāḥ kṛtvā dhvajārohaṃ kārayettadanantaram

'''27.32''' tataḥ prāptadine rātryāmutsavārambha ucyate bherītāḍanapūrvaśca prokta evaṃ janārdana

'''27.33''' aṅkurārpaṇapūrve tu proktāhasyādime niśi aṅkurānarpayitvātha dhvajamāropya tāḍya ca

'''27.34''' bherīṃ sadevatāhvānamārabhedutsavaṃ tataḥ aṅkurārpaṇapūrvaśca prokta eva vidhirmayā

'''27.35''' dhvajasyotthāpanaṃ bheryāstāḍanaṃ cāṅkurārpaṇam sarveṣāmutsavānāṃ syādvyatyāso’tra vivakṣitaḥ

'''27.36''' ekāhasyādime rātrau triyahasya caturthake pañcāhasyotsavasyāpi niśi ṣaṣṭhe janārdana

'''27.37''' bhauvanasyāṣṭame rātrau śāktasya daśame niśi raudrasya dvādaśāhe tu saurasyāpi trayodaśe

'''27.38''' caturdaśasya tatpūrve niśi pañcadaśe bhavet pakṣasya ṣoḍaśāhe tu niśyārambha udāhṛtaḥ

'''27.39''' rātrāvevotsavārambho divāvabhṛtha ucyate pakṣe triṃśadbaliḥ prokto mānave cāṣṭaviṃśatiḥ

'''27.40''' saure baliścaturviṃśo raudre dvāviṃśa eva hi śākte’ṣṭādaśa uddiṣṭā bhauvane syuścaturdaśa

'''27.41''' bhaute daśabaliṃ viddhi gauṇe ṣaḍbalirucyate śaive balidvayaṃ caiva niśi cāhni prakalpayet

'''27.42''' evaṃ traividhyamatroktam dhvajādividhirucyate uttamaṃ daśahastaṃ syānmadhyamaṃ navahastakam

'''27.43''' adhamaṃ cāṣṭahastaṃ syādvastraṃ proktaṃ dhvajāya vai catuḥpañcaṣaḍaṃśaikavistāraṃ syātsudairghyakāt

'''27.44''' śreṣṭhamadhyakaniṣṭhaṃ tadvistārārdhaṃ śiro bhavet pārśvayostu śiromānātkalpayeta bhujadvayam

'''27.45''' vistāreṇa samaṃ pādaṃ tripādaṃ cārdhameva vā jayadaṃ śāntidaṃ caiva puṣṭidaṃ ca kramādbhavet

'''27.46''' pādayordvitayaṃ kuryāttritayaṃ vā yathecchayā kārpāsasūtraniṣpannaṃ suślakṣṇaṃ sudṛḍhaṃ sitam

'''27.47''' nātisthūlaṃ nātisūkṣmaṃ keśavaivarṇyavarjitam evaṃ niṣpādya vastraṃ tanmadhye ca vilikhed vṛṣam

'''27.48''' kalāṅgulasamutsedhamuttamottamamucyate aṅgulatritayahrāsādyāvanmanvaṅgule kṛte

'''27.49''' adhamādhamamuktaṃ syādutsedhaṃ navadhā vṛṣe kakudmantamatiśvetaṃ vidhinā kārayettataḥ

'''27.50''' āsyaṃ śṛṅge khurāḥ karṇau sāsnā ca vṛṣaṇāvapi oṣṭhau ca sarve raktā syuḥ śvetakṛṣṇe ca locane

'''27.51''' vālaḥ pītanibhaḥ prokto raktapītanibhaṃ gudam kṣudraghaṇṭāmayīṃ mālāṃ pītāmasya prakalpayet

'''27.52''' chatracāmarasaṃyuktaṃ padmaviṣṭaramāsthitam śāntyai śayānaṃ puṣṭyarthaṃ sthitaṃ dīpadvayānvitam

'''27.53''' pūrṇakumbhasamāyuktaṃ mālādibhiralaṃkṛtam kṛtākṣimīlanaṃ cāpi vidhinā vṛṣabheśvaram

'''27.54''' tamānīya śivasyāgre dakṣiṇe cottare’pi vā maṇṭape’laṃkṛte ramye vidhinā sthaṇḍile kṛte

'''27.55''' tanmadhye vinyasetkumbhaṃ vṛṣadaivatamuttamam ṣoḍaśaprasthasaṃpūrṇaṃ pakvabimbaphalaprabham

'''27.56''' śodhitaṃ kṣālitaṃ caiva sitasūtravicitritam gandhodapūritaṃ samyak sahiraṇyaṃ savastrakam

'''27.57''' sakūrcaṃ sāpidhānaṃ ca tadardhaparimāṇakān tādṛśānkalaśānaṣṭa dalāgreṣvabhito nyaset

'''27.58''' tadagre sthaṇḍilaṃ kṛtvā dhvajaṃ tatraiva vinyaset tadagre saikataṃ kṛtvā sthaṇḍilaṃ muṣṭimātrakam

'''27.59''' tatra vahniṃ samādhāya śāstradṛṣṭena karmaṇā puṇyāhaṃ vācayitvādau vṛṣakumbhe vṛṣaṃ yajet

'''27.60''' parito lokapālāṃśca yathāsthānaṃ samarcayet mudgānnaṃ tu vṛṣendrāya dattvā kumbhasthitāya tu

'''27.61''' vṛṣamūlena mantreṇa sarvaṃ tasya prakalpayet vṛṣagāyatrimantreṇa dhvajaṃ cātha samarcayet

'''27.62''' homayettu tato mantrī vidhinā tatra pāvake samidājyacarūm̐llājānmudgamāṣakulatthakān

'''27.63''' tilāṃśca sarṣapānmantrī pratyekaṃ juhuyācchatam tadardhaṃ vā tadardhaṃ vā vṛṣamūlena deśikaḥ

'''27.64''' samidājyacarūnvāpi homayettānathāpi vā sarpiṣā ca tato mantrī vṛṣagāyatrimantrataḥ

'''27.65''' homaṃ kṛtvātha mūlena dadyātpūrṇāhutiṃ sudhīḥ tato vṛṣendramagrasthamacalaṃ calameva ca

'''27.66''' saṃsnāpyābhyarcya gandhādyairhavistasyāpi dāpayet tataḥ pratisaraṃ bere śūle vāpi prayojayet

'''27.67''' viśeṣādarcanaṃ cātha tayorliṅge ca kārayet dhvajādhivāsanaṃ kṛtvā rātrau tasyotsavaṃ tataḥ

'''27.68''' prabhāte vimale dhīman vidhirevaṃ pradṛśyate mālābharaṇavastrādyairalaṃkṛtya dhvajaṃ tataḥ

'''27.69''' arcayitvātha gandhādyairutsavārthamatandritaḥ rathe vā śibikāyāṃ vā samāropyānayetsudhīḥ

'''27.70''' athavānayanaṃ proktaṃ kevalaṃ paricārakaiḥ śūlamagre nayettatra sarvālaṃkārasaṃyutam

'''27.71''' balidānayutaṃ vātha tasyānu dhvajamānayet dhvajasyānūtsaveśaṃ ca sarvālaṃkārasaṃyutam

'''27.72''' ānayedvātha caṇḍeśaṃ grāmādiṣu yathākramam gītanṛttasamāyuktaṃ sarvātodyasamanvitam

'''27.73''' saṃpraviśyālayaṃ paścāddhvajamāropayettataḥ ārohaṇavidhiścāpi vakṣyate kramaśo’dhunā

'''27.74''' sālastamālaḥ kramuko madhūkaḥ sacampakaścaiva saveṇukaśca aśokapunnāgaśirīṣabilvā daśāpyamī syurdhvajadaṇḍayogyāḥ

'''27.75''' vakrāśca duṣṭāḥ kṛmikoṭarādyairduḥsthānajātā svayameva śuṣkāḥ vajrādibhagnāḥ pravidāritāśca vṛkṣāstu sarve parivarjanīyāḥ

'''27.76''' prāsādasamadairghyaṃ vā śikharāvadhikaṃ tu vā nāsikāvadhikaṃ cāpi gopurāvadhikaṃ tu vā prastarāntaṃ galāntaṃ vā dhvajadaṇḍaṃ prakalpayet

'''27.77''' digrudrasūryairdhvajadaṇḍamānaṃ hastaiḥ kramātkanyasapūrvamuktam dvāviṃśadaṅgulyamamuṣya nāhaṃ mūle’dhame madhyavariṣṭhayośca

'''27.78''' dvidvyaṅgulād vṛddhirathāgranāhaṃ tattattriyaṃśena mitaṃ vidadhyāt tatropadaṇḍaṃ dṛḍhaveṇujātaṃ skandhatrayaṃ saṃpratiyojayecca

'''27.79''' dhvajadaṇḍocchraye tasmiṃścatuḥpañcaṣaḍaṃśakaiḥ ekāṃśenopadaṇḍaṃ tu kalpayetkalpavittamaḥ

'''27.80''' saptaṣaṭpañcamātraṃ syādupadaṇḍasya nāhakam tattribhāgaikabhāgena nāhamagre prakalpayet

'''27.81''' aśvatthacūtaprabhavaṃ tu tasya skandhatrayaṃ cāpi madhūkajaṃ vā daṇḍopadaṇḍapratibandhanāya nyagrodhajaṃ vā panasodbhavaṃ vā

'''27.82''' skandhatrayasya cāyāmaṃ viṃśadaṅgulamuttamam aṅgulāṅgulahāniḥ syānmadhyame cādhame’pi ca

'''27.83''' vistāraṃ tu bhavettasya cāyāme vahnibhāgakam netrabhāgena tasyāpi ghanaṃ netrāṅgulaṃ bhavet

'''27.84''' sarojamukulākāraṃ skandhatrayamudīritam suṣiraṃ daṇḍamānaṃ syāddaṇḍordhve tatsthitiḥ samā

'''27.85''' daṇḍapārśve’pyadhaḥskandhe’pyupadaṇḍasthitirbhavet śeṣayostatpraveśārthaṃ suṣiraṃ tatpramāṇataḥ

'''27.86''' upadaṇḍāgradeśe tu hitvā vasvaṅgulaṃ dṛḍham āyase valaye baddhe yantrarajjuṃ praveśayet

'''27.87''' dhvajadaṇḍāgradeśe syādathādho valayasthitiḥ valayaṃ sudṛḍhaṃ kāryamupadaṇḍāgranāhataḥ

'''27.88''' kārpāsatantujo rajjurbhaved dṛḍhataraḥ samaḥ taddaṇḍadviguṇāyāmatrivṛdgranthivivarjitaḥ

'''27.89''' kaniṣṭhānāmikāṅguṣṭhanāhātso’pi tridhā smṛtaḥ pradakṣiṇakrameṇaiva veṣṭitaṃ darbhamālayā

'''27.90''' mālāpallavasaṃyuktaṃ yantrarajjusamanvitam dhvajadaṇḍaṃ tu saṃpādya sarvalakṣaṇasaṃyutam

'''27.91''' prāsādāgre tato dhīmānprākārābhyantare’pi vā pīṭhāgre gopurāgre vā vṛṣāgre vṛṣapṛṣṭhake

'''27.92''' pīṭhagopurayormadhye vṛṣagopurayostu vā maryādimadhyame vāpi mahāmaryādimadhyame

'''27.93''' catustālamitaṃ khātvā tasminkūrmaṃ vṛṣaṃ tu vā hemodbhūtaṃ hṛdā nyasya daṇḍaṃ tasyopari kramāt

'''27.94''' sthāpayedbalavadbhistu devābhimukhasaṃsthitam tanmūle vedikāṃ kuryāccatustālapramāṇataḥ

'''27.95''' sā bhavedadhamā paścād ṣaḍṣaḍaṅgulavṛddhitaḥ madhyamāmuttamāṃ caiva kuryātpakveṣṭakāmayīm

'''27.96''' apakvābhiralābhe syādiṣṭakābhistu vedikā vistārārdhasamucchrāyāṃ tattribhāgābjamaṇḍitām

'''27.97''' śailajāṃ vā sthirāṃ kṛtvā tasyāṃ vā daṇḍasaṃsthitiḥ gomayenopalipyātha puṇyāhaṃ tatra kārayet

'''27.98''' tadagre sthaṇḍilaṃ kṛtvā śālibhirvimalaistataḥ paristīrya kuśaiḥ paścād dhvajaṃ tatraiva vinyaset

'''27.99''' dhvajapīṭhasamīpasthe sthaṇḍile vinyased budhaḥ pūrvādhivāsitaṃ kumbhaṃ vṛṣarājādhidaivatam

'''27.100''' karṇikāyāṃ tu vinyasya paritaḥ kalaśānnyaset ubhayatrāpi saṃpūjya pūrvavaddeśikottamaḥ

'''27.101''' kūrcāmbhasā ghaṭasthena vṛṣamūlamanusmaran vṛṣendre prāṇabhūtaṃ taṃ vṛṣamantraṃ prayojayet

'''27.102''' tasyāṅgāni yathāsthānaṃ mantrarūpāṇi kalpayet tato dhvajaṃ samuddhṛtya bandhayedyantrarajjunā

'''27.103''' kṣudraghaṇṭāsamāyuktaṃ vṛṣagāyatrimuccaran sumuhūrte sulagne tu sarvātodyasamanvitam

'''27.104''' āropayed dhvajaṃ samyaggītanṛttasamanvitam tataḥ pradakṣiṇenaiva rajjunā veṣṭayetsudhīḥ

'''27.105''' āropitaṃ ca saṃpūjya sarvātmahṛdayena tu namaskṛtvā mahādevaṃ vṛṣendraṃ kalaśe tataḥ

'''27.106''' kūrcāmbhasā tu saṃprokṣya dhvajadaṇḍasya mūlake digīśakalaśādbhistu mantrānsthāneṣu yojayet

'''27.107''' athavā dhvajamūle tu caṇḍāṣṭavasudevatān kalaśānpūrvavatsthāpya saṃpūjyātha ca mantravit

'''27.108''' daṇḍamūle ca parito vinyasedanupūrvaśaḥ caṇḍeśaṃ daṇḍamūle tu daṇḍamadhye dhruvaṃ tathā

'''27.109''' skandheṣu sūryasomāgnīnupadaṇḍe’nilaṃ tathā dhvaje ca vṛṣabhendraṃ tamarcayitvā krameṇa tu

'''27.110''' mudgānnaṃ pāyasānnaṃ vā vṛṣendrāya nivedayet yanniveditamannaṃ tad vandhyastrīṇāṃ pradāpayet

'''27.111''' athavā dhvajadaṇḍena badhvā saṃsthāpya pūjayet evamāropayitvāhni rātrau bherīṃ tu tāḍayet

'''27.112''' prāsādāgre tato dhīmānmaṇṭape’laṃkṛte’thavā dhvajamūle tu saṃlipte gomayena yathāvidhi

'''27.113''' sthaṇḍiladvitayaṃ kṛtvā śālibhirvimalaistataḥ liṅgasyābhimukhaṃ tatra dhvajasyābhimukhaṃ tu vā

'''27.114''' astrarājaṃ samādhāya bherīṃ tasyāgrato nyaset veṣṭayennavavastreṇa bherīṃ sthaṇḍilasaṃsthitām

'''27.115''' puṇyāhaṃ vācayitvātha prokṣayettena vāriṇā tataḥ śūlāstrapūjā syātsāpīdānīṃ nigadyate

'''27.116''' śūlasya madhyame patre pūjayettu maheśvaram brahmāṇaṃ dakṣiṇe patre vāme viṣṇuṃ samarcayet

'''27.117''' pālikāyāṃ bhavānīṃ ca kumbhe vighneśameva ca daṇḍāgre ṣaṇmukhaṃ tatra daṇḍamadhye raviṃ tathā

'''27.118''' daṇḍamūle śaśāṅkaṃ ca tadadhaścaṇḍameva hi lokapālānyathāsthānaṃ śūlapīṭhe samarcayet

'''27.119''' evaṃ gandhādibhiḥ śūlaṃ samabhyarcya vidhānataḥ naivedyaṃ cāpi tāmbūlaṃ dattvā devasya madhyame

'''27.120''' bheryāśca svārcanaṃ paścāttadvidhiśca nigadyate nandinaṃ madhyame pūjya dakṣiṇetarapārśvayoḥ

'''27.121''' sūryācandramasau pūjya bheryāṃ tatra yathāvidhi koṇe caṇḍaṃ samabhyarcya dikpālānparito yajet

'''27.122''' naivedyaṃ dāpayettatra nandine tu viśeṣataḥ tāmbūlaṃ ca tato dadyād devāhvānaṃ tato bhavet

'''27.123''' śivādisarvadevāṃśca sāṣṭādaśagaṇānapi nakṣatrādīnnadīścāpi samudrānparvatānapi

'''27.124''' dvīpām̐llokānsapātālān samāhūya viśeṣataḥ utsavāvabhṛthau paścācchrāvayetsakalaṃ janam

'''27.125''' vādyakaṃ ca samāhūya prokṣayitvā tvanantaram tasya haste tu salilaṃ kusumaṃ cāpi dāpayet

'''27.126''' so’pi puṣpaṃ vinikṣipya bherīmuddhṛtya vādayet vādayitvātra diktālāngānanṛttasamanvitam

'''27.127''' vṛṣatālaṃ tataścānte sarveṣāmapi vādayet nṛttaṃ caivāṣṭadigbhāge saṃsthitābhirbhavediha

'''27.128''' śivāyatanayoṣidbhiḥ sarvātodyasamanvitam caturvidhaṃ bhave dadyādātodyamiti kīrtitam

'''27.129''' tataṃ ca vitataṃ caiva ghanaṃ suṣirameva ca tataṃ vīṇādikaṃ proktaṃ vitataṃ murajādikam

'''27.130''' ghanaṃ ca kāṃsyatālādyaṃ vaṃśādi suṣiraṃ smṛtam etaiścaturbhiḥ saṃyuktairgītaiḥ śabdaistu tacchṛtaḥ

'''27.131''' sa hi pañcamahāśabdaḥ śivapriyakaraḥ sadā trisaṃdhyaṃ kārayettena cotsaveṣu śivālaye

'''27.132''' bherīmevaṃ tu saṃtāḍya grāmādiṣvatha deśikaḥ balipradānaṃ kurvīta triśūlena samanvitam

'''27.133''' bereṇa sahitaṃ vāpi baddhapratisareṇa hi annaliṅgayutaṃ vāpi sarvālaṃkārasaṃyutam

'''27.134''' brahmādīśānaparyantadikpālebhyo baliṃ dadet tāṃścāpi svasvadigbhāge sthitvā tu stutipūrvakam

'''27.135''' āhūya tīrthadivasaṃ śrāvayitvā janārdana svasvanāmapadopetairmantrairdadyādbaliṃ tataḥ

'''27.136''' atha caikaṃ baliṃ dattvā dikpālāhvānavarjitam devālaye prayuñjīta proktā hyevaṃ balikriyā

'''27.137''' utsavārambhakālasya sāyāhne tu viśeṣataḥ vighneśaṃ sarvavighnānāṃ śāntyarthamabhipūjya ca

'''27.138''' mālābharaṇavastrādyairbhūṣayitvā vināyakam rathe vā śibikāyāṃ vā samāropya ca bhaktitaḥ

'''27.139''' grāmādāvutsavaṃ kuryātsarvālaṃkārasaṃyutam tadagre śūlamastreśamutsaveśaṃ ca pṛṣṭhataḥ

'''27.140''' ānayedvā sacaṇḍeśaṃ kevalaṃ vā vināyakam vināyakānu mudgādibījadravyāṇi cānayet

'''27.141''' aṅkurārthaṃ mṛdaṃ gṛhya caṇḍeśaṃ tadanu kramāt mṛtsaṃgrahaṇakaṃ vakṣye tacchṛṇu tvaṃ janārdana

'''27.142''' samudrasaritāṃ tīre taṭākasya ca tīrake puṣkariṇyāstaṭe vāpi vane vodyānake’pi vā

'''27.143''' śuddhasthānamanuprāpya śuddhiṃ kṛtvātha bhūtalam saṃprokṣyāstreṇa mantreṇa bhūmiṃ yaṣṭvā svanāmataḥ

'''27.144''' khātvā ca punarastreṇa khanitreṇokṣitena ca kuśena ca paristīrya prāṅmukho vāpyudaṅmukhaḥ

'''27.145''' mṛttikāṃ vālukāṃ vāpi pāṇibhyāṃ puruṣeṇa tu sthālyāṃ kuśoparīśena mantreṇāhṛtya nikṣipet

'''27.146''' punaḥ prokṣya hṛdā mantrī puṣpaṃ tasyāṃ tu vinyaset śaṅkhadundubhinirghoṣairgītavādyasamākulaiḥ

'''27.147''' evaṃ mṛdgrahaṇaṃ kṛtvā tathā cotsavamācaret athavā mṛttikāmenāmutsavānte samāharet

'''27.148''' praviśya bhavanaṃ paścād bhakṣyādyaistu vināyakam saṃpūjya cāṅkurārthaṃ tu bījāvāpanamācaret

'''27.149''' tīrthārthamaṅkuraṃ kuryāttatsthānaṃ yāgamaṇṭape śivāgre maṇṭape vā syāddakṣiṇe vātha cottare

'''27.150''' tadvidhiproktamārgeṇa kuryātsarvamatandritaḥ tato’dhivāsanaṃ kuryācchivayajñāya maṇṭape

'''27.151''' aiśānyāmagnideśe vā pārśvayorubhayostu vā uttamaṃ daśahastaṃ syānmadhyamaṃ saptahastakam

'''27.152''' adhamaṃ pañcahastaṃ tu caturaśraṃ manoramam caturdvārasamāyuktaṃ catustoraṇabhūṣitam

'''27.153''' ṣoḍaśastambhasaṃyuktaṃ dvādaśastambhakaṃ tu vā paṅkitrayasamāyuktaṃ paṅkimānasamucchrayam

'''27.154''' tanmadhye vedikāṃ kuryānnavabhāgaikabhāgataḥ vistārārdhasamutsedhāṃ darpaṇodarasaṃnibhām

'''27.155''' paritaścāṣṭakuṇḍāni caturaśrāṇi dikṣu vai vidikṣu vṛttarūpāṇi padmakuṇḍaṃ pradhānakam

'''27.156''' īśānaśakrayormadhye tasya deśa udāhṛtaḥ uttamatritayasyaivaṃ hyutsavasya viśeṣataḥ

'''27.157''' madhyamatritayasyāpi pañcāgnividhirucyate dikṣu catvāri kuṇḍāni padmamīśe pradhānakam

'''27.158''' adhamatritayasyātha kuṇḍamekaṃ vidhīyate yatheṣṭadeśe kartavyamāśāsu catasṛṣvapi

'''27.159''' utsavānāṃ tu sarveṣāmeko vā homa ucyate gomayenopalipyātha maṇḍapaṃ vedikuṇḍayuk

'''27.160''' vitānāśādhvajairyuktaṃ darbhamālābhiveṣṭitam muktādāmasamāyuktaṃ phalapallavaśobhitam

'''27.161''' maṅgalāṅkurasaṃyuktaṃ maṅgalāṣṭakaśobhitam dvārakumbhasamāyuktaṃ dvāraśobhāsamanvitam

'''27.162''' stambhaveṣṭanasaṃyuktaṃ kṛtvā tanmaṇḍapaṃ sudhīḥ puṇyāhaṃ vācayitvādau kṛtvā vai vāstuhomakam

'''27.163''' vedikāyāṃ tataḥ kuryātsthaṇḍilaṃ śālibhiḥ samam aṣṭadroṇairbhavecchreṣṭhaṃ tadardhairmadhyamaṃ bhavet

'''27.164''' tadardhairadhamaṃ cāpi tanmadhye padmamālikhet karṇikāṣṭadalopetaṃ taṇḍulaiḥ samalaṃkṛtam

'''27.165''' tilairlājaiḥ kuśaiścāpi śobhitaṃ sumanoharam karṇikāyāṃ tu saṃpūjya gandhādyaistu manonmanīm

'''27.166''' vāmādiśaktīḥ śakrādidaleṣvaṣṭasu pūjayet antastambhacatuṣke tu dharmādīnparito yajet

'''27.167''' vedikāyāṃ bhuvaṃ pūjya paritaścāṣṭamaṅgalam pūrvādidikṣu saṃpūjya svanāmnā deśikottamaḥ

'''27.168''' dvārakumbheṣu pūrvādi vasūnaṣṭau tu pūjayet kuṇḍeṣu paritaścātha prāgādiṣu yathākramam

'''27.169''' bhavādikāṃstu saṃpūjya pradhāne tu śivaṃ yajet pañcahomavidhāne tu pañcabrahmāṇyanukramāt

'''27.170''' puruṣaṃ pūrvakuṇḍe tu dakṣiṇe’ghorameva ca sadyaṃ paścimakuṇḍe tu vāmadevaṃ tathottare

'''27.171''' īśānaṃ ca pradhāne ca pūjayettu vidhānataḥ ekahomavidhāne tu śivamekatra pūjayet

'''27.172''' bhadrākhyaṃ vijayaṃ caiva vijṛṃbhaṃ lohitaṃ tathā pūrvādi toraṇeṣvetānarcayettu yathākramam

'''27.173''' vaikartanādikānbāhye yajetstambheṣu pūrvataḥ vitāne candramabhyarcya lokapālāndhvajeṣvatha

'''27.174''' vāsukiṃ darbhamālāyāṃ saṃpūjya ca vidhānataḥ evamabhyarcya devāṃstu kalaśasthāpanaṃ tataḥ

'''27.175''' sauvarṇānrājatānvāpi tāmrajānmṛṇmayāṃstu vā nirdoṣānsarvato ramyān kalaśāṃstu samāharet

'''27.176''' ṣoḍaśaprasthasaṃpūrṇaṃ śivākhyaṃ kalaśaṃ smṛtam tadardhaparimāṇaḥ syācchaktikumbho janārdana

'''27.177''' śeṣāśca tatsamā jñeyāste ca vidyeśvarātmakāḥ kṣālitāṅśodhitāṃścaiva prokṣitānkuśavāriṇā

'''27.178''' sūtreṇa veṣṭitānsamyak punarabhyukṣitānhṛdā gandhodaparipūrṇāṃśca sahiraṇyānsavastrakān

'''27.179''' sakūrcānsāpidhānāṃśca gandhacandanacarcitān sarvānekatra saṃsādhya sarvātmānaṃ samuccaran

'''27.180''' śivakumbhaṃ nyasenmadhye śaktikumbhaṃ ca dakṣiṇe daleṣvaṣṭasu pūrvādi vidyeśakalaśānnyaset

'''27.181''' evaṃ vinyasya kumbhāṃstu tato devānsamarcayet paścimābhimukhaṃ sthāpya vedīmadhye viśeṣataḥ

'''27.182''' dhyātvā sadāśivaṃ devaṃ śivakumbhe samarcayet ādiśaktiṃ ca tatkumbhe vidyeśānparito yajet

'''27.183''' gandhādibhiḥ samabhyarcya naivedyāntaṃ viśeṣataḥ lokapālānyathāsthāne sāstrānsarvānsamarcayet

'''27.184''' tato’gniṃ vidhivatsthāpya deśikaḥ śāntamānasaḥ sarvakuṇḍeṣu homārthaṃ mūrtipānādiśettataḥ

'''27.185''' soṣṇīṣaḥ sottarīyaśca navavāso vasaṅchuciḥ deśikastādṛśāḥ sarve sādhakā vātra putrakāḥ

'''27.186''' aṣṭau vā caturo vātha hotāraste bhavanti hi pradhāne svayameva syādekahomavidhāvapi

'''27.187''' adhyetṛbhiścaturbhiśca prāgādikramayogataḥ ṛgādisāmaparyantaṃ kuryādadhyayanaṃ tataḥ

'''27.188''' homayecca tato dhīmānmūrtipaiḥ sādhakaiḥ saha agnikāryavidhiproktaṃ kṛtvā karmākhilaṃ budhaḥ

'''27.189''' samidājyacarūm̐llājānsarṣapāṃśca yavāṃstilān mudgaśalisamāyuktānveṇumāṣāṃśca homayet

'''27.190''' aśvatthodumbaraplakṣavaṭāḥ pūrvāditaḥ kramāt śamībilvakhadirārkā vidikṣu parikalpitāḥ

'''27.191''' samidarthe palāśastu pradhānasya prakīrtitaḥ taistaiḥ paridhayaḥ proktāścatvāro viṣṭarāḥ samāḥ

'''27.192''' sarvatraudumbarī vātra samid grāhyā vicakṣaṇaiḥ pañcabrahmaṣaḍaṅgaistu samidādīnkrameṇa tu

'''27.193''' īśānadiśiro’ntaṃ syātsaptadravyahutaṃ kramāt sadyādi hetiparyantairhomayenmantravittamaḥ

'''27.194''' pratidravyāvasāne tu vyāhṛtyā juhuyāttataḥ sahasraṃ vā tadardhaṃ vā tadardhārdhamathāpi vā

'''27.195''' aṣṭottaraśataṃ vāpi tadardhaṃ vāpi homayet uttamatritaye sarvaiḥ saptabhirmadhyamatraye

'''27.196''' adhamatritaye ṣaḍbhirdravyairhomo’tra kathyate uttame brahmamūlāṅgairhomaṃ kuryādvicakṣaṇaḥ

'''27.197''' madhyame mūlapūrvaistu homamagre prakalpayet kanyase brahmabhistadvatsamidādikrameṇa tu

'''27.198''' tataḥ pūrṇāhutiṃ dadyācchivamantreṇa deśikaḥ tato vahniṃ samabhyarcya pariṣicya samāpayet

'''27.199''' tataḥ śūlaṃ samānīya śāṃkare vātha mārute sthaṇḍile sthāpya taṃ devaṃ pūjya gandhādibhistadā

'''27.200''' bandhayetkautukaṃ mantrī vidhistasya ca kathyate śūlāpre sthaṇḍilaṃ kṛtvā śālibhirvimalaistathā

'''27.201''' tanmadhye padmamālikhya sthālīṃ tatraiva vinyaset pūrayitvā tataḥ sthālīṃ taṇḍulairāḍhakaistataḥ

'''27.202''' tatra padmaṃ samālikhya haimaṃ vā rājataṃ tu vā kārpāsatantujaṃ vāpi sūtraṃ tatraiva vinyaset

'''27.203''' bhasma cāpi tatastatra vinyaseddeśikottamaḥ puṇyāhaṃ vācayitvātha śūlaṃ saṃpūjya pūrvavat

'''27.204''' kautukaṃ ca hṛdābhyarcya sarvātmānamudāharan astramadhyamapatrasya mūle tadbandhayetsudhīḥ

'''27.205''' asti cetpratimā tatra taddhaste dakṣiṇe bhavet bhasma cāpyastramantreṇa bandhite kautuke nyaset

'''27.206''' utsavapratimāyāṃ ca tadvadevaṃ prabandhayet viśeṣeṣvapi bereṣu yadā yenotsavaṃ bhavet

'''27.207''' tasmiṃstasmiṃstadā bere pūrvameva prabandhayet devīnāṃ gaurigāyatryā bhavetkautukabandhanam

'''27.208''' lavaṇopari tāsāṃ vinyasedvātha kautukam anyeṣāṃ svasvanāmnaiva proktaḥ pratisare vidhiḥ

'''27.209''' bandhanānte ca sarveṣāṃ vidhinā balirucyate tato balipradānaṃ syāttadvidhiścātra kathyate

'''27.210''' astrarājādiśastrāṇi seśvarāṇi yajetkramāt tattaddiśottamāṅgasthānyathavā kevalāni ca

'''27.211''' lohāni vā savṛkṣāṇi tāni kṛtvā yathāvidhi balyarcayāpi vā sārdhaṃ kuryāttāṃ ca balikriyām

'''27.212''' tataścāpyannaliṅgaṃ tu kārayettu vicakṣaṇaḥ annena śālisiddhena dadhyājyābhyāṃ plutena ca

'''27.213''' uktalakṣaṇasaṃyuktaṃ sthalikāmadhyasaṃsthitam dvādaśāṅgulavistīrṇamuttamaṃ tadbhavediha

'''27.214''' aṅgulāṅgulahānyā tu madhyamaṃ cādhamaṃ bhavet vistāreṇa samotsedhaṃ mūlādagre kramātkṛśam

'''27.215''' tatra pāśupataṃ devaṃ sarvadoṣanikṛntanam trinetraṃ caturbhujākāraṃ śikhākoṭisamujjvalam

'''27.216''' varadābhayahastaṃ ca vāmasavyākṣaśūladhṛt evaṃ dhyātvā samabhyarcya gandhapuṣpādibhiḥ kramāt

'''27.217''' arcitāṃstu tato devānsarvāṃstānparicārakaiḥ soṣṇīṣaiḥ sottarīyaiśca sapavitrakaraistathā

'''27.218''' dhṛtatripuṇḍrakaiścāpi vāhayitvā krameṇa tu soṣṇīṣaḥ sottarīyaśca balidānāya sādhakaḥ

'''27.219''' astrasya purato gacchedarghyahastaḥ samāhitaḥ vajrādyaiḥ sāstradevaistu paritaśca kramāttataḥ

'''27.220''' teṣāṃ pṛṣṭhe’nnaliṅgaṃ ca proktalakṣaṇalakṣitam vitānadhvajasaṃyuktaṃ piṅchacāmarasaṃyutam

'''27.221''' dhūpadīpasamāyuktaṃ sarvātodyasamanvitam ānayedbalidānārthaṃ balyannamapi vakṣyate

'''27.222''' śuddhataṇḍulasaṃsiddhaṃ śivaṃ vāpi tadardhakam hemarūpyādipātrasthamuktadravyasamanvitam

'''27.223''' pidhāya tadvidhānena vastreṇa susitena ca sādhakastu samāhṛtya gandhapuṣpādisaṃyutam

'''27.224''' pārśve samānataṃ tasya so’pi maunavratasthitaḥ tato baliṃ purā dadyānnityavanmantravittamaḥ

'''27.225''' tattaddiśādhipānāṃ ca mahāpīṭhe baliṃ kṣipet gandhapuṣpādibhiḥ samyak kukkuṭāṇḍapramāṇataḥ

'''27.226''' athavā taddineśānāṃ samāptau vā balikriyām grāmādiṣu tato dadyād brahmādīśāntameva ca

'''27.227''' balipīṭhe’thavā śuddhe bhūpṛṣṭhe vā balikriyām balidānavidhau tatra ye devā vīthipārśvagāḥ

'''27.228''' teṣāmagre baliṃ dadyāt svanāmapadamantrataḥ athavā vīthimadhye tu tānuddiśya pradāpayet

'''27.229''' catuṣpathe piśācebhyastripathe rakṣasāṃ bhavet sabhāsthāne sarasvatyai jyeṣṭhāyāstu jalāśaye

'''27.230''' nyagrodhe kṣetrapālasya vighneśasyāpi pippale caityavṛkṣe guhasyāpi kūpe kumbhodarasya ca

'''27.231''' gosthāne caṇḍarudrasya bhīmarudrasya gopure evaṃ balividhiḥ prokto dineśānapyatha śṛṇu

'''27.232''' ekāhasya śivo devo brahmaviṣṇumaheśvarāḥ triyahasyātha pañcāhe mūrtayaḥ pañca caiva hi

'''27.233''' utsavānāṃ tathānyeṣāṃ vakṣye devāndineśvarān sarveṣu prathamāhastu vighneśasya prakīrtitaḥ

'''27.234''' antimastu śivasya syāttatpūrvo rakṣaso bhavet utsavasya tu nirdiṣṭo bhauvanasya janārdana

'''27.235''' dvitīyāhastu vairiñcastṛtīyo bhauta ucyate gāndharvastu caturthaśca pañcamaḥ śākra ucyate

'''27.236''' bhauvane devatāḥ proktāḥ śākte cātha mahotsave ṣaṣṭhasya saptamasyāpi munayo viṣṇureva ca

'''27.237''' pūrvoktaiḥ saha nirdiṣṭā dinānāmadhipāḥ kramāt raudrasyāpyādhike cāhni cāṣṭame navame’pi vā

'''27.238''' vasavo marutaścaiva kramāddevāḥ prakīrtitāḥ saure cāpyadhike cāhni candro deva udāhṛtaḥ

'''27.239''' mānavasyotsavasyātha yau dināvadhikau tu tau ekādaśadvādaśayo rudrā ravaya eva ca

'''27.240''' tataḥ pañcadaśāhasya yo dinastvadhiko bhavet trayodaśāhastasyāpi pitaro devatāḥ smṛtāḥ

'''27.241''' evaṃ dinādhipā devāḥ krameṇa parikīrtitāḥ ekāhasya tu śaivasya śuddhamannaṃ tataḥ param

'''27.242''' hāridraṃ kṛsarānnaṃ ca gauṇe yavabhavaṃ tathā mudgamāṣakulatthānnaṃ veṇuniṣpāvajaṃ tathā

'''27.243''' bhautotsavasya nirdiṣṭaṃ krameṇa dinapañcake apūpayavagodhūmatilakhaṇḍājyameva ca

'''27.244''' āḍhakī ca kramād dravyaṃ bhauvanāheṣu saptasu priyaṅguvarakau cāpi śāktasyāpyadhikau matau

'''27.245''' raudrasya gulanīvārāvadhikau tu tataḥ param saktuḥ saure’dhikaḥ proktastataḥ panasalājakau

'''27.246''' mānave’pyadhike dravye pakṣe syācca payo’dhikam śuddhataṇḍulasaṃsiddhe sarpiṣānne pariplute

'''27.247''' yadyaddravyaṃ dineṣūktaṃ tattannikṣipya dāpayet sāyaṃ prātarbaliṃ dadyādathavāpi madhuplutam

'''27.248''' evaṃ dravyaṃ samākhyātamutsavakrama ucyate grāmādau yatra devānāṃ dīyate balikarma tat

'''27.249''' tatraivotsavayānaṃ syātsarvālaṃkārasaṃyutam vīthīnāṃ śodhanaṃ pūrvaṃ mārjanaṃ cāpi kārayet

'''27.250''' śuddhatoyena sarvāpi vīthīḥ sarvatra secayet gṛhaśreṇyāṃ ca sarvatra badhnīyādvividhān dhvajān

'''27.251''' sabhāsthāne’pi vidhinā badhnīyādvā vṛṣadhvajān pūrṇakumbhaṃ pratidvāraṃ maṅgalāṅkurasaṃyutam

'''27.252''' dīpayuktaṃ samāyojya darbhamālāvalambanaiḥ rathe vā śibikāyāṃ vā pratimāṃ baddhakautukām

'''27.253''' sarvābharaṇasaṃyuktāṃ citrahṛdyāṃśukairyutām mālāpuṣpaprabhāyuktāṃ sarvālaṃkārasaṃyutām

'''27.254''' chatracāmarasaṃyuktaṃ piṅchadhvajasamanvitam dhūpadīpasamāyuktaṃ sarvātodyasamanvitam

'''27.255''' gītanṛttasamāyuktaṃ grāmādāvānayecchanaiḥ caṇḍeśaṃ ca tathābhūtaṃ tasyāścānu samānayet

'''27.256''' ḍolādīni ca yantrāṇi vṛṣāśvagajayantrakān gāyakānnartakāṃścaiva tathā vandijanānapi

'''27.257''' mālābharaṇahṛdyāṅgaśivāyatanayoṣitaḥ śaivāṃścaturvidhāṃścāpi deśikādīṃstathaiva ca

'''27.258''' brāhmaṇāṃśca svakarmasthānkṣatriyādīṃstathaiva ca bhaktānanyānbahūṃścāpi sevārthaṃ tatra kalpayet

'''27.259''' utsavānte praviśyāntaḥ saṃsthāpyāsthānamaṇṭape vitānadhvajasaṃyukte stambhaveṣṭanasaṃyute

'''27.260''' pādyamācamanaṃ cārghyaṃ hṛcchiraścūlikāṇubhiḥ dattvā devasya devyāśca tataḥ snapanamācaret

'''27.261''' śaṅkhadundubhinirghoṣairjayaśabdādimaṅgalaiḥ tataḥ siṃhāsanādau tu devamāropya bhaktitaḥ

'''27.262''' pādyādīnpūrvavaddattvā gandhādyairarcayeddhṛdā vastrābharaṇamālyādīṃstena mantreṇa dāpayet

'''27.263''' prabhūtaṃ ca havirdattvā mukhavāsasamanvitam tāmbūlaṃ ca tato dattvā śaṅkhadhvanisamanvitam

'''27.264''' pracchādanapaṭaṃ cātha devāgre prerayettadā gītanṛttādibhiḥ paścādvinodaṃ samyagācaret

'''27.265''' deśikaḥ savyabhāge tu svāsīno vāmake nṛpaḥ tayoḥ pṛṣṭhapradeśe tu śiṣyā bhṛtyāśca saṃsthitāḥ

'''27.266''' mṛdaṅgādyā mahāśabdā devasya purataḥ sthitāḥ padmapatravadākāraṃ śuddhakāṃsyamayena tu

'''27.267''' tālamadhye’vaṭaṃ kuryātsuṣire rajjuyojanam granthipucchayutā rajjuścaivaṃ tāladvayaṃ kuru

'''27.268''' tālahastayuto vāmabhāge gāndharvasaṃsthiteḥ maddalaṃ ca mṛdaṅgaṃ vā savye pārśva iti smṛtam

'''27.269''' nṛttaṃ geyasamāyuktaṃ bimbāgre bharatoktavat uccairyaṣṭipradīpaistu rātryutsavamathācaret

'''27.270''' ārātrikaṃ ca kurvīta rātrāvāsthānamaṇṭape sarveṣveṣu dineṣvevaṃ kṛtvā balyutsavakriyām

'''27.271''' tīrtharkṣādahni pūrve tu mṛgayātrā bhavettataḥ tatpūrve’hni ca deveśaṃ nṛttarūpaṃ maheśvaram

'''27.272''' kṛṣṇagandhaṃ samālipya kārayecca mahotsavam vyatyāsenāthavā caite kalpayetkalpavittamaḥ

'''27.273''' tīrthārthaṃ kautukaṃ śūle pratimāyāṃ yathāvidhi bandhayetpūrvamutsṛjya tīrtharkṣasyādime niśi

'''27.274''' pratyūṣe ca tato dhīmānkuryāttīrthasya saṃgraham yāgadhāmni śivāgre vā jalatīre’thavā sudhīḥ

'''27.275''' sthaṇḍiladvitayaṃ kṛtvā śālibhirvimalaistayoḥ padmamaṣṭadalaṃ kṛtvā taṇḍulairupaśobhitam

'''27.276''' paristīrya kuśaistatra śūlamekatra vinyaset tadagre kalaśānsodānsarvalakṣaṇalakṣitān

'''27.277''' madhyātprabhṛti vinyasya nava teṣu samarcayet navaśaktīstu saṃpūjya gandhapuṣpādibhiḥ kramāt

'''27.278''' triśūlaṃ cātha saṃpūjya pūrvavaddeśikottamaḥ tatastaiḥ kalaśaiḥ śūlamabhiṣicya yathākramam

'''27.279''' avagāhya jale paścācchūlamabhyarcya deśikaḥ sarvāstrairvā samopetaḥ saṃnimajya yathāvidhi

'''27.280''' praviśya yāgagehaṃ taṃ śūlaṃ saṃsthāpya pūjayet tīrthārthaṃ kautuke baddhe tatra vā kalaśāṃstu tān

'''27.281''' śūle’bhiṣicya kṛtvā tu dhāma cātha pradakṣiṇam yāgadhāmni tataḥ śūlaṃ sthāpya samyaksamarcayet

'''27.282''' evaṃ kautukatīrthaṃ tadvaikalpikamudāhṛtam prabhāte divase kṛtvā pūjāhomabalikriyām

'''27.283''' utsavaṃ ca samāpyaivaṃ cūrṇotsavamathācaret suśuṣkāṃ rajanīṃ śuddhāṃ śuddhapātre vigṛhya ca

'''27.284''' āsthānamaṇṭape tatra śivāgre vātha maṇṭape sthaṇḍiladvitayaṃ kṛtvā vidhinā tatra vinyaset

'''27.285''' śūlaṃ tadagre vinyasyolūkhalaṃ musalena yuk āveṣṭyāhatavastreṇa śūlaṃ saṃpūjya pūrvavat

'''27.286''' lūkhalaṃ musalaṃ caiva hetinā samyagarcayet lūkhale rajanīṃ tatra nikṣipeddhṛdayena tu

'''27.287''' cūrṇayenmusalenaiva ghoramantraṃ samuccaran yajamānādibhiḥ paścāccūrṇayedrajanīṃ tadā

'''27.288''' tataścūrṇīkṛtaṃ sarvaṃ pātre svarṇādinirmite nikṣipyāstreṇa mantreṇa tatastacca tridhā bhajet

'''27.289''' śivaliṅgābhiṣekārthaṃ tathārcāśūlayorapi janānāmapi sarveṣāṃ bhāgamekaṃ prakalpayet

'''27.290''' athavā rajanīcūrṇaṃ tailena ca samanvitam tīrthakāle prayoktavyaṃ pratimāśūlayorapi

'''27.291''' janānāmapi sarveṣāṃ tasminkāle prayojayet āsthānamaṇṭape ramye śivāgre vātha maṇṭape

'''27.292''' jalatīre’tha śuddhe ca nimnonnatavivarjite gomayālepite ramye śālibhiḥ sthaṇḍiladvayam

'''27.293''' kṛtvā tatra triśūlaṃ tu sthāpyaikatra tadagrake sthaṇḍile kalaśān ramyānpūrvavatsaṃskṛtānapi

'''27.294''' navasaṃkhyānsamādāya madhyādīśāntameva ca tatastriśūlamabhyarcya gandhapuṣpādibhiḥ kramāt

'''27.295''' kalaśeṣvatha sarveṣu gaṅgādyāstīrthadevatāḥ pūjayenmadhyamārabhya tāsāṃ nāmābhidhīyate

'''27.296''' gaṅgā ca yamunā caiva narmadā ca sarasvatī sindhurgodā ca kāverī śoṇā puṣkarameva ca

'''27.297''' praṇavādicaturthyantasvanāmapadamantrakaiḥ devatāhvānamapyatra kuryādvā pūrvavatsudhīḥ

'''27.298''' tataḥ snānocitaṃ dravyaṃ sarvaṃ śūlāya dāpayet dantakāṣṭhaṃ ca dattvāsya hṛnmantreṇa vicakṣaṇaḥ

'''27.299''' sumuhūrte sulagne tu kalaśairmadhyamakramāt abhiṣicyāstrarājānaṃ tatastīrthe’vagāhya ca

'''27.300''' astrarājaṃ samabhyarcya gandhapuṣpādibhiḥ kramāt sāstrāndigīśvarānvāpi paritastatra pūjayet

'''27.301''' ācāryo majjanaṃ kuryāttriśūlena samāhitaḥ ye tatra saha majjanti janā bhaktisamanvitāḥ

'''27.302''' brahmahatyādibhiḥ sarvairmucyante pāparāśibhiḥ samuttīrya jalātpaścāt kṛtvā dhāmapradakṣiṇam

'''27.303''' tato yāgagṛhaṃ gatvā dadyātpūrṇāhutiṃ tadā pūrṇāhutividhiṃ vakṣye tataḥ śṛṇu janārdana

'''27.304''' abhyukṣya srucamastreṇa sarpiṣāpūrya tadbilam praṇavena tataḥ puṣpaṃ sākṣataṃ sakuśaṃ sruci

'''27.305''' vinyasya sruvamāropya tanmadhye cāpyadhomukham daṇḍamūlāgrayoḥ paścādgṛhītvā sruksruvau ca tau

'''27.306''' savyetarābhyāṃ pāṇibhyāṃ vinyasyāsyaṃ tu śaṅkhavat ṛjukāyaḥ samutthāya sthitaḥ samapadānvitaḥ

'''27.307''' nābhidaghnaṃ tayoḥ kṛtvā mūlaṃ tu karayostataḥ dakṣiṇetarayoḥ kuryādunnatyavanatiṃ tayoḥ

'''27.308''' yathā dhārāgnimadhye tu patatītyekadhā sudhīḥ pūrṇāhutiṃ tu mūlena samyakpaścātsamāpayet

'''27.309''' homānte tu purā dadyādanena vidhinā guruḥ śivayoḥ kumbhamuddhṛtya kalaśānitarānapi

'''27.310''' skandhe saṃvāhayitvātha prāsāde tu pradakṣiṇam upāvṛttya praviśyātha śivamantramanusmaran

'''27.311''' śaivena śivaliṅgaṃ tu kumbhenaivābhiṣecayet śaktikumbhena pīṭhaṃ tu tadgāyatrīmudāharan

'''27.312''' vedisthaiḥ kalaśaiḥ paścāt kuryālliṅge’bhiṣecanam athavā tānanuddhṛtya yojayitvā śive ghaṭe

'''27.313''' śivayoḥ kalaśāveva samuddhṛtyābhiṣecayet tataśca snapanaṃ kuryātsahasrādiṣu saṃbhavaiḥ

'''27.314''' kalaśaistu vidhānena tato naivedyamuttamam dattvā devasya sarveṣāṃ sakalānāṃ ca deśikaḥ

'''27.315''' snapanaṃ ca pṛthak kṛtvā naivedyaṃ ca pradāpayet utsaveṣveṣu sarveṣu kuryātsarvadineṣvapi

'''27.316''' sāyaṃ prātarviśeṣeṇa śivaliṅge janārdana sakalānāṃ ca sarveṣāṃ yathāvittānusārataḥ

'''27.317''' tasminniśi  tṛtīye vā pañcame vātha saptame dhvajāvarohaṇaṃ kuryāccaṇḍayāgasamanvitam

'''27.318''' caṇḍayāgamatho vakṣye sarvakāmārthasādhanam gaṇānāmapi sarveṣāṃ caṇḍānāṃ nāyakastu yaḥ

'''27.319''' caṇḍeśastu bhavetso’yaṃ tasya pūjāprakalpanā caṇḍayāgaḥ smṛtaḥ so’tra samāsenābhidhāsyate

'''27.320''' dhāmni caṇḍeśvarasyārcāmabhiṣicya samāhitaḥ gandhodakena tasyāgre kalaśānsthaṇḍile’tha vā

'''27.321''' pūrvavatsthāpayitvā’tha teṣu madhye yajetsudhīḥ caṇḍeśamatha śeṣeṣu vasūnaṣṭa yajetkramāt

'''27.322''' gandhādibhiḥ samabhyarcya taiścaṇḍamabhiṣecayet havirdattvātha tāmbūlaṃ dadyāccaṇḍe samāhitaḥ

'''27.323''' dhvajāntikaṃ tato gatvā tanmūle sthaṇḍilaṃ tataḥ śālibhirvidhinā kṛtvā tatra saṃsthāpayennava

'''27.324''' kalaśāṃsteṣu madhyasthe vṛṣendraṃ devamarcayet parito lokapālāṃśca dhvaje vāpi vṛṣaṃ yajet

'''27.325''' tatastaiḥ kalaśaiḥ sarvairdaṇḍamūle’bhiṣecayet tato vṛṣabhadevasya mudgānnaṃ tu nivedayet

'''27.326''' tataścaṇḍeśvaraṃ caiva dhvajasthaṃ vṛṣabheśvaram sūryasomāgnikāṃścaiva krameṇaiva janārdana

'''27.327''' pūjayitvātha gandhādyaistattatsthānādvisarjayet dhvajāvarohaṇaṃ kuryādastramantraṃ samuccaran

'''27.328''' tataścāpi triśūlena sarvātodyasamanvitam grāmādiṣu baliṃ dadyātsaṃdhidevānvisarjayet

'''27.329''' prāsāde vā baliṃ dattvā vinā śūlaṃ visarjayet śivotsaveṣu mātṝṇāṃ balyutsavavidhiṃ sudhīḥ

'''27.330''' varjayedanyadevānāṃ balyutsavavidhāvapi yaugapadyaṃ tu śaivena bhavettatra dine dine

'''27.331''' śaivaṃ prādhānikaṃ kuryāddeśikaḥ śāstracintakaḥ devatāhvānakāle tu śrutvā tīrthadinaṃ janaḥ

'''27.332''' yastīrthasevāṃ no kuryāttasyādhivyādhisaṃbhavaḥ kalyāṇaṃ devakalyāṇe na kurvīta tathā bhavet

'''27.333''' tasmāttau parihartavyau nareṇa hitamicchatā evaṃ śivotsave samyaṅ nirvṛtte vidhinā tataḥ

'''27.334''' dakṣiṇāṃ deśikasyāpi vibhavasyānurūpataḥ hotṝṇāṃ jāpināṃ caiva dadyādvastrādibhistadā

'''27.335''' śivabhaktāṃśca saṃpūjya prīyatāṃ me sadāśivaḥ ityuktvā praṇamedbhūyo bhūyo devaṃ sadāśivam

'''27.336''' iti yaḥ kārayenmartyaḥ śivotsavamanuttamam sarvayajñaphalaṃ prāpya śivena saha modate

===Kapitel 28===

''aṣṭāviṃśaḥ paṭalaḥ · ḍolotsavavidhiḥ''

'''28.1''' ḍolotsavavidhiṃ vakṣye śṛṇu samyagjanārdana āyurārogyadhanadaṃ rājarāṣṭravivardhanam

'''28.2''' grāmaśāntikaraṃ puṇyaṃ sarvapāpaharaṃ śubham maṅgalārthaṃ jayārthaṃ ca rājñāṃ prītikaraṃ śubham

'''28.3''' nityamārogyaphaladaṃ putrapautravivardhanam dharmārthakāmamokṣārthaṃ kuryānmantrī yathāvidhi

'''28.4''' dhanurmāse mahāviṣṇo ḍolānāṃ karma cottamam ārdrānakṣatramuddiśya tatpūrve vratamutsavam

'''28.5''' puṣye vā kumbhamāse vā jhaṣe tvāṣṭre vṛṣe’thavā yāmye vātha śucau viṣṇo kurvīta śravaṇe’pi vā

'''28.6''' kuryātprokteṣu māseṣu tattanmāsarkṣakāntakam pūrṇimāyāmathāntaṃ vā bhūtāṣṭamyantameva vā

'''28.7''' rājñāṃ trijanmanakṣatre yajamānadine’pi vā proktā maṅgaladāḥ kālā ḍolārohaṇakarmaṇi

'''28.8''' guṇasaṃkhye bhūtasaṃkhye ṛṣisaṃkhyadine’pi vā navāhe kevale raudre kartavyo madhusūdana

'''28.9''' pañcadhā ca samākhyāto ḍolāroho janārdana ekatripañcadivase cotsave tu vinā dhvajam

'''28.10''' saptāhe ca navāhe ca dhvajayuktaṃ tu kārayet aṅkurārpaṇapūrvaṃ ca bherītāḍanapūrvakam

'''28.11''' dhvajārohaṇapūrvaṃ tu kuryācchāstroktavartmanā utsavārambhakālasya sāyāhne tu viśeṣataḥ

'''28.12''' vighneśaṃ sarvavighnānāṃ śāntyarthaṃ cārcayed budhaḥ āvāhanārghyapādyādyaiḥ ṣoḍaśairupacārakaiḥ

'''28.13''' vighneśaṃ pūjayenmantrī yathāśāstraṃ janārdana vighneśvarasya pūjānte mūlaliṅgasya saṃnidhau

'''28.14''' saṃkalpaṃ caiva puṇyāhaṃ tato vijñāpya pūjanam sāmānyārghyaṃ tu saṃkalpya sakakīkṛtavigrahaḥ

'''28.15''' aṣṭapuṣpārcanānte tu prārthayetparameśvaram bhagavan devadeveśa sarvedevavaraprada

'''28.16''' ḍolotsavavidhau samyaganujñāṃ kuru śaṃkara prārthayetparameśānaṃ tato mṛtsaṃgrahāya vai

'''28.17''' vighneśaṃ cāstrarājānaṃ caṇḍeśaṃ cārcayed guruḥ vastrābharaṇamālyādyairbhūṣayitvā vināyakam

'''28.18''' dhūpaṃ dīpaṃ ca naivedyaṃ tāmbūlaṃ ca pradāpayet chatracāmarasaṃyuktaṃ dhvajapiṅchasamanvitam

'''28.19''' nṛttagītasamāyuktaṃ gaṇikāsaṃghasaṃyutam śaṅkhakāhalasaṃnādabherīghoṣasamanvitam

'''28.20''' udyāne vā nadītīre puṣkariṇyāstaṭe’pi vā bilvamūle ca mandāre tathā tulasimūlake

'''28.21''' pippale rājavṛkṣe vā palāśe yajñavṛkṣake tattadvṛkṣasamīpe tu puṇyāhaprokṣaṇaṃ hare

'''28.22''' hastamātrapravistāraṃ nimnonnatavivarjitam sthaṇḍilaṃ kalpayeddhīmānaṣṭapatraṃ kuśeśayam

'''28.23''' tatopari paristīrya caturdiśi janārdana madhye brahmāṇamabhyarcyānantaṃ vai pūrvadiggatam

'''28.24''' vijayaṃ cāgnideśe tu bhadraṃ yāmyapradeśake jayantaṃ nairṛte bhāge bhramaraṃ vāruṇe tathā

'''28.25''' vāyavye prasthitaṃ caiva jṛmbhakaṃ somadeśake īśānaṃ śūlinaṃ caiva brahmādyādi prapūjayet

'''28.26''' śuddhaudanabaliṃ dadyāttattannāmapuraḥsaram tāmbūlaṃ dāpayetpaścārddhūpadīpaṃ janārdana

'''28.27''' baliṃ visarjayeddhīmāṃstattaddiśi samarcayet punaḥ prokṣya hṛdā mantrī kuśagomayavāriṇā

'''28.28''' āvāhayettato bhūmiṃ gandhādyairarcayettataḥ diśāṃ patīṃstataścāṣṭau pūjayetpuruṣottama

'''28.29''' pūjitena khanitreṇa haimapātre trirāharet śvabhre hṛdāharenmṛdbhiḥ pūrayettu vicakṣaṇaḥ

'''28.30''' punaḥ prokṣya hṛdā mantrī puṣpakūrcaṃ tu nikṣipet pūrvavarddhūpadīpaṃ ca saṃchādya kṣaumavāsasā

'''28.31''' mālāṃ tadupari nyasya śiṣyahaste pradāpayet gajasyopari yānasya dhārayecchiṣya eva ca

'''28.32''' gītavādyaistathā dīpaiśchatracāmaratūryakaiḥ vāstupradakṣiṇaṃ kṛtvā niśāyāmaṅkurārpaṇam

'''28.33''' devāgre sthaṇḍilaṃ kṛtvā cāṣṭapatraṃ sakarṇikam ukṣaṃ ca gopatiṃ caiva śṛṅgiṇaṃ nandinaṃ tathā

'''28.34''' paśupatiṃ gandhavāhaṃ śaṅkukarṇaṃ mahodaram vṛṣendraṃ navakumbheṣu pūrvādiṣu dale nyaset

'''28.35''' sadyo vṛṣādhivāsasya gavyena prokṣaṇaṃ kuru maṇṭapaṃ pūjayetpaścātpaṭasyārādhanaṃ hare

'''28.36''' nayanonmīlanaṃ paścājjalādhivāsanaṃ tathā vidadhyātpañcaśayanaṃ beraśodhanakarma ca

'''28.37''' vṛṣasya sthāpitasyaivaṃ śṛṅge pratisaraṃ kuru tato homaṃ ca naivedyaṃ devatāvāhanaṃ tathā

'''28.38''' bherīṃ saṃpūjya vidhivattattāḍanaṃ samācaret dhvajamuddhṛtya deveśamastrarājasamanvitam

'''28.39''' grāmapradakṣiṇaṃ kṛtvā saṃdhidevānsamāhvayet daṇḍamūlaṃ tato gatvā puṇyāhaprokṣaṇaṃ kuru

'''28.40''' daṇḍamūle’bhiṣicyātha saparyāṃ ca narottama kūrcāmbhasā ghaṭasthena paṭasya prokṣaṇaṃ caret

'''28.41''' deśikaḥ suprasannātmā nṛpaterdakṣiṇāṃ dadet tato dhvajaṃ samuddhṛtya ropayeddeśikottamaḥ

'''28.42''' daṇḍe savyakrameṇaiva mūle rajjuṃ subandhayet diśīśakalaśānaṣṭau daṇḍamūle’bhiṣecayet

'''28.43''' bhavādikāṣṭamūrtīnāṃ dalāgreṣu baliṃ kṣipet dhūpadīpaṃ dadetpaścāddeśiko mantrapuṣpakaiḥ

'''28.44''' tato nīrājanaṃ kṛtvā devadeve śivālaye tato yāgagṛhaṃ gatvā maṇṭapaṃ samalaṃkuru

'''28.45''' pūrvavatkalpayetkuṇḍaṃ yathāvidhi janārdana puṇyāhaṃ vācayitvā tu kṛtvā vai vāstupūjanam

'''28.46''' utsavāṅkurārpaṇaṃ ca tathā tīrthāṅkurārpaṇam pūrvavacchālimānena nalinaṃ vedikāṃ likhet

'''28.47''' tilataṇḍularekhāśca lājaiḥ puṣpaiḥ paristaret madhyame śivakumbhaṃ tu vardhanīṃ vāmapārśvake

'''28.48''' sakūrcānpallavopetānsavastrānsāpidhānakān madhyame hemaniṣkaṃ tu vardhanyāṃ vā tadardhakam

'''28.49''' aṣṭavidyeśvarānkumbhān prāgdalādiṣu pūjayet dvārādikalaśānsthāpya pūrvādiṣu yathākramam

'''28.50''' pañca caikacatustrīṇi bhūtadṛk ca catustrayaḥ śāntinandimahākālā balārātiśca pūrvake

'''28.51''' indrāgnyorantare bhānurāgneyyāmagnipūjanam vidyāṃ bhṛṅgigaṇeśau ca yamaṃ yāmye prapūjayet

'''28.52''' vidikṣu nirṛtau viṣṇo vāstubrahma nyasetkramāt nivṛttiṃ vṛṣabhaṃ skandhaṃ vāruṇe ca haripriyām

'''28.53''' pavanaṃ ca gaṇeśaṃ ca paścimottaradikṣu vai pratiṣṭhāṃ gauricaṇḍeśau dhanadaṃ saumyadeśake

'''28.54''' aiśānyāmīśalokeśagurupaṅkiṃ nyasetkramāt prāgādīśānaparyantamastrarājaṃ kramānnyaset

'''28.55''' naivedyaṃ dāpayetpaścādghaṭasthāya nivedayet pañcāgnirvātha kartavya ekāgniṃ vāpi kārayet

'''28.56''' tato homaṃ prakurvīta yathāvidhipuraḥsaram utsaveśaṃ ca saṃpūjya hemaniṣkasakautukam

'''28.57''' naivedyaṃ dāpayeddhīmānapūpādisamanvitam tāmbūlaṃ dāpayeddhīmāndhūpadīpapuraḥsaram

'''28.58''' yāgavīkṣāṃ prakurvīta yathāvidhi janārdana grāmapradakṣiṇaṃ kṛtvāsthānamaṇḍapasaṃsthite

'''28.59''' utsaveśvaramāropya tataḥ siṃhāsane kuru vinodadarśanaṃ caiva snāpayedutsaveśvaram

'''28.60''' vastrābharaṇamālyādyairalaṃkṛtya janārdana citrānnāpūpanaivedyaṃ tāmbūlaṃ ca pradāpayet

'''28.61''' dhūpadīpādibhiścaiva pādyādyairupacārakaiḥ sāyāhne syāddhomakarmāpyastradevaṃ vicintayet

'''28.62''' vāhanādi yathādevaṃ tattaddevān supūjayet homānte yāgavīkṣāyāṃ ḍolāmaṇṭapasaṃnidhau

'''28.63''' maṇṭapaṃ kārayeddhīmānāyatāśraṃ tu kalpayet dvitrihastaṃ samārabhya ṣaṭṣaṅgustavivardhanāt

'''28.64''' syātpañcadaśahastāntamāyādiśodhanaṃ kuru ṣaḍvistāraṃ caturbhāga ekāṃśaṃ tu dharātalam

'''28.65''' tatsamaṃ tu tripādaṃ vāpyadhastāt somapīṭhakam stambhoccasya vidhiḥ samyagadhiṣṭhānatriyaṃśakaḥ

'''28.66''' adhiṣṭānatribhāge tu pañcabhāgena caiva hi ḍolāstambhasya cotsedhaṃ kalpayeccaiva keśava

'''28.67''' stambhoccasyāṣṭame bhāga ekabhāgena vistṛtam vistārāddaśahīnaṃ tu stambhāgrasya viśālakam

'''28.68''' ekāṃśamuttarotsedhaṃ prapālaṃkṛtaṃ mādhava tatstambhapañcabhāge tu tribhāgaṃ toraṇodayam

'''28.69''' vyālahaṃsādisaṃyuktaṃ nāsikāyāṃ tu toraṇam svarṇaṃ vā rajataṃ vāpi tāmraṃ vāpyatha kalpayet

'''28.70''' nānālaṃkārasaṃyuktaṃ ḍolānāṃ madhusūdana tanmaṇṭapamalaṃkṛtya vitānadhvajacāmaraiḥ

'''28.71''' nānāpiṅchasamāyuktaṃ nānā chatrasamanvitam pāṭalaiḥ karṇikāraiśca campakaiḥ kesaraistathā

'''28.72''' bhūpadīśivamālyaistu punnāgamallikai stathā māgadhīkaravīraiśca hemadhuttūrakaistathā

'''28.73''' kuśeśayapratīhāsai rudrapuṣpakaṭīmuraiḥ pūgīphalādirambhāmranāraṅgalikucaistathā

'''28.74''' tanmaṇṭapamalaṃkṛtya cāṣṭadroṇaiśca śālibhiḥ śālyardhataṇḍulānnyasya taṇḍulārdhatilānnyaset

'''28.75''' tilārdhalājā evoktā darbhaiḥ puṣpaiḥ paristaret tatra vighneśapūjāṃ ca saṃkalpaṃ caiva buddhimān

'''28.76''' puṇyāhaprokṣaṇaṃ kṛtvā ḍolāmastreṇa deśikaḥ tasyāmabhyarcayeccaivaṃ yathāvidhi janārdana

'''28.77''' dharmaṃ jñānaṃ ca vairāgyamaiśvaryaṃ cārcayed guruḥ pinākaṃ viṣṭare’bhyarcya valaye kuṇḍalīṃ tathā

'''28.78''' jñānaśaktiṃ kriyāśaktimicchāśaktiṃ tathaiva ca ḍolāyāṃ valaye caivābhyarcya kuṇḍalinīṃ tadā

'''28.79''' śṛṅkhalāyāṃ vṛṣaṃ caiva binduṃ tadvalaye nyaset śuddhavidyāṃ manonmanyā phalakāyāṃ nyasetkramāt

'''28.80''' utsaveśvaramāropya ḍolordhve tu dṛḍhaṃ tathā vāme śaktiṃ samāropya dhūpadīpādinārcayet

'''28.81''' ārātrikaṃ tato dadyādvedavijñāpanaṃ kuru stotradhvanisamāyuktaṃ śaṅkhadhvanisamanvitam

'''28.82''' gītavādyaiśca nṛttaiśca vijñāpya toṣayecchivam mahāhavirnivedyātha dhūpadīpādikaṃ dadet

'''28.83''' grāmapradakṣiṇaṃ kṛtvā nītvā devaṃ śivālayam devaṃ saṃsnāpya saṃpūjya naivedyādīnnivedayet

'''28.84''' mantrapuṣpaṃ tato dadyādudakena daded budhaḥ evaṃ pratidinaṃ kuryātsāyaṃ prātastu cotsavam

'''28.85''' tīrthāhātpūrvadivase naṭeśasnapanaṃ kuru kautukaṃ kṛṣṇagandhaiśca tattatsthāne nyasetkramāt

'''28.86''' naivedyaṃ dhūpadīpaṃ ca tato dhāmapradakṣiṇam pradakṣiṇāya sāge tu devadeve śivālaye

'''28.87''' taddoṣaśamanārthāya karpūrālepanaṃ hare madhyahāre niveśaśca vedagītādibhiḥ saha

'''28.88''' dhūpadīpaṃ ca naivedyaṃ devyā saha niveśanam pratyūṣe kautukaṃ tīrthamastrarājasya deśikaḥ

'''28.89''' aruṇodayavelāyāṃ naṭeśabhramaṇaṃ hare devasya darśanaṃ vīthyāṃ devyāḥ krodhasamanvitam

'''28.90''' rambhādaṇḍaiśca krodhena bhaktānāṃ praharastathā devyāśca krodhaśāntiḥ syāddevayośca pradakṣiṇam

'''28.91''' ārātrikaṃ vidhānena praviśya bhavanaṃ kuru homānte caiva kartavyaṃ pūrvaṃ vā balimārabhet

'''28.92''' somāskandeśvaraṃ devamastreṇa saha deśikaḥ tato bhaktajanaiḥ sārdhaṃ nadyādau snānamācaret

'''28.93''' tīre samatalaṃ kṛtvā prapāyāmutsaveśvaram snapanaiḥ pañcagavyaiścāpyutsaveśvarapūjanam

'''28.94''' snānānte caiva kartavyaṃ kautukaṃ mucya deśikaḥ vastrābharaṇamālyādyairalaṃkṛtya janārdana

'''28.95''' dhūpadīpaṃ nivedyātha tato grāmapradakṣiṇam praviśya bhavanaṃ paścāttato yāgagṛhaṃ gataḥ

'''28.96''' yāgādikumbhānutsṛjya pūrṇāhutimathācaret pādaprakṣālanaṃ kṛtvā paścādācāryamarcayet

'''28.97''' hārakeyūrakaṭakairhemayajñopavītakaiḥ gandhapuṣpaiśca dhūpaiśca yajamāno’rcayed gurum

'''28.98''' vedyūrdhve sthāpitānkumbhānparicārakamūrdhani dhāmapradakṣiṇaṃ kṛtvā śuddhavādyasamanvitam

'''28.99''' ardhamaṇṭape saṃsthāpya tripādyupari tānghaṭān sāmānyārghyaṃ tu saṃkalpya puṇyāhaprokṣaṇaṃ kuru

'''28.100''' mūlaliṅge’bhiṣicyātha snapanādyairviśeṣataḥ mahāhavirnivedyātha pādyādyairupacārakaiḥ

'''28.101''' dhāmni caṇḍeśvare proktanaivedyādīni dāpayet dhvajadaṇḍāntikaṃ gatvā caṇḍeśāstrasamanvitam

'''28.102''' dhvajāvarohaṇaṃ kṛtvā cāstramantraṃ samuccaran avatārya paṭasthaṃ ca yojayed vṛṣabhaṃ vṛṣe

'''28.103''' caṇḍeśaṃ cāstrarājānaṃ grāmādiṣu baliṃ kṣipet baliṃ visarjayeddhīmām̐llokapālānvisarjayet

'''28.104''' praviśya bhavanaṃ paścādbalipīṭhe baliṃ kṣipet pādaprakṣālanaṃ kṛtvā praviśedālayaṃ prati

'''28.105''' iti yaḥ kārayenmartyo ḍolotsavamanuttamam sarvayajñaphalaṃ prāpya śivena saha modate

===Kapitel 29===

''ekonatriṃśaḥ paṭalaḥ · snapanavidhiḥ''

'''29.1''' ataḥ paraṃ pravakṣyāmi śivasya snapanaṃ hare akālamṛtyuśamanaṃ sarvarogabhayāpaham

'''29.2''' sarvapāpapraśamanaṃ śokamohavināśanam sarvābhīṣṭapradaṃ puṃsāṃ sarvāriṣṭanivāraṇam

'''29.3''' āyuḥśrīkīrtijayadaṃ tuṣṭipuṣṭipradaṃ sadā avagrahaharaṃ loke sarvopadravanāśanam

'''29.4''' viṣuvāyanakāleṣu tathā viṣṇupadīṣu ca ṣaḍaśītimukhādyeṣu sūryendugrahaṇe tathā

'''29.5''' aṣṭamyāṃ ca caturdaśyāṃ pañcadaśyāṃ ca pakṣayoḥ ārdrāyāmarkavāre ca tīrtharkṣeṣūtsaveṣu ca

'''29.6''' pratiṣṭhānte pavitre ca kṛttikādīparohaṇe navanaivedyakāle tu ghṛtasnānottare tathā

'''29.7''' ghṛtakambalake caiva vasantotsavakarmaṇi prāyaścitteṣu sarveṣu jīrṇoddhāravidhau tathā

'''29.8''' divyāntarikṣabhaumānāmadbhutānāṃ ca darśane avagrahe ca jantūnāṃ jvaramāryādivartane

'''29.9''' paracakrādbhayotpattau yajñārambhe dvijanmanām vidyārambhe vivāhe ca rājñāṃ caivābhiṣecane

'''29.10''' yuddhārambhe purārambhe kṛṣivāṇijyayostathā śatābhiṣekakāle ca gavāṃ rogapradarśane

'''29.11''' yauvarājyābhiṣeke ca puṣyasnāne ca bhūbhujām gajāśvarogasaṃbhūtāvidaṃ snapanamārabhet

'''29.12''' kalaśasthāpanārthāya maṇṭapaṃ kārayetpurā trayodaśakaraiḥ śreṣṭhaṃ madhyaṃ saptakarairapi

'''29.13''' adhamaṃ pañcahastaiśca catuṣṣaṣṭyaṅghrisaṃyutam prathamaṃ madhyamantyaṃ ca dvādaśastambhasaṃyutam

'''29.14''' rudratālocchrayāḥ stambhāḥ prathamasya prakīrtitāḥ śeṣayornava tāloccā maṇṭapānāṃ talocchrayam

'''29.15''' ṣoḍaśāṅgulamānaṃ syāddarpaṇodarasaṃnibham kalaśasthāpane yogyaḥ prāsādāgre tu no bhavet

'''29.16''' maṇṭapo yadi tatrāsau maṇṭapānāṃ vidhirbhavet gomayālepite ramye savitāne sadigdhvaje

'''29.17''' yajñavṛkṣaiścaturdikṣu dvārasthāpitatoraṇe maṅgalāṣṭakasaṃyukte darbhamālābhiveṣṭite

'''29.18''' maṅgalāṅkurasaṃyukte prokṣayitvā śivāmbhasā trivṛtsūtreṇa tatraiva piṣṭāktena pramāṇataḥ

'''29.19''' puṇyāhaṃ vācayitvādau sūtrapātaṃ prakalpayet navaprakāraṃ tatproktaṃ kalaśaiḥ snapanaṃ hare

'''29.20''' aṣṭādhikasahasraistu kalaśairuttamottamam sāṣṭādhikasahasrārdhairuttame madhyamaṃ bhavet

'''29.21''' ṣoḍaśadviśataiḥ proktamuttamasyādhamaṃ tu yat madhyamottamamuddiṣṭamaṣṭādhikaśatairapi

'''29.22''' aṣṭottaracatvāriṃśanmadhyamadhyamamucyate caturviṃśatibhiścaiva madhyamasyādhamaṃ bhavet

'''29.23''' ṣoḍaśairadhame śreṣṭhamaṣṭabhirhīnamadhyamam caturbhiradhamaṃ hīne kalaśaiḥ snapanaṃ bhavet

'''29.24''' śivayoḥ kalaśāvetau sarvatrāpyadhikau matau navānāmapi caiteṣāṃ snapanānāṃ janārdana

'''29.25''' traividhyamiha nirdiṣṭaṃ kalaśasthāpanaṃ kramāt uttamānāṃ trayāṇāṃ syādvyaheṣu sthāpanaṃ kramāt

'''29.26''' padeṣu madhyamānāṃ ca trayāṇāṃ parikīrtitam trayāṇāmapi cānyānāṃ bhavetpadmadaleṣu ca

'''29.27''' sarveṣāṃ sthāpanaṃ vakṣye śṛṇu tattvaṃ janārdana sauvarṇā rājatā vātha tāmrajā mṛṇmayāstu vā

'''29.28''' vedāgninayanaprasthaiḥ saṃpūrṇāḥ syuryathākramam śreṣṭhamadhyakaniṣṭhāstu kalaśāḥ snapanocitāḥ

'''29.29''' sarveṣāṃ kalaśānāṃ tu śivakumbhaścaturguṇaḥ śaktikumbhaśca kalaśadviguṇaḥ syātpramāṇataḥ

'''29.30''' śivayoḥ kumbhakau yatra sauvarṇau rājatāḥ smṛtāḥ kalaśā yadi tau syātāṃ rājatau tāmrajāḥ pare

'''29.31''' tāmrajau yadi tau tatra kalaśā mṛṇmayāstadā sarve vātha śivomābhyāṃ kumbhābhyāmekavastunā

'''29.32''' mṛṇmayāstu viśeṣeṇa kalaṅkarahitāḥ śubhāḥ pakvabimbopamāḥ sarve kṣālayettānviśeṣataḥ

'''29.33''' astrajaptena toyena sūtreṇāpyatha veṣṭayet nirdoṣeṇa sitenaiva samena kṣālitena ca

'''29.34''' triguṇadviguṇaikena śivomārudrakumbhakān darbhopari tataḥ sarvānvinyasyādhomukhānsudhīḥ

'''29.35''' prokṣayeddhṛdayenātha pūrayedgandhavāriṇā navamṛdbhāṇḍapūrṇena śītalena sugandhinā

'''29.36''' nādeyenātha kaupena śucinā svacchavāriṇā uśīratruṭihīberacandanāgarukoṣṭhajaiḥ

'''29.37''' jāti takkolajaiścāpi nirdoṣairjantuvarjitaiḥ cūrṇairālolitaṃ sarvaṃ gandhodamiti saṃjñitam

'''29.38''' kalaśasthāpanārthaṃ tu sthaṇḍilaṃ śālibhirbhavet nirdoṣaiḥ susitaiścāpi dhānyaiḥ kṛṣṇavivarjitaiḥ

'''29.39''' pratyekaṃ kalaśānāṃ tu dviprasthena kṛtaṃ param sthaṇḍilaṃ madhyamuddiṣṭaṃ sārdhaprasthena nirmitam

'''29.40''' prasthenaivādhamaṃ proktaṃ śivākhyasya janārdana sthaṇḍilaṃ dviguṇaṃ cāpi triguṇaṃ ca caturguṇam

'''29.41''' kanyasaṃ madhyamaṃ śreṣṭhaṃ tattadardhamumātmake tattatturyāṃśakaiścāpi taṇḍulaiḥ ṣodaśāṃśakaiḥ

'''29.42''' tilaiścāpi samāyuktaṃ śubhralājasamanvitam darbhairvikīrṇaṃ sarvatra tithisaṃkhyaiḥ kuśairatha

'''29.43''' kūrcaṃ syācchivakumbhasya pañcaviṃśāṅgulāyataiḥ daśabhirmadhyamaṃ tadvatsaptabhiścādhamaṃ bhavet

'''29.44''' navabhiḥ saptabhiścaiva pañcabhiśca yathākramam gaurīkumbhasya kūrcaṃ syācchreṣṭhamadhyakanīyasam

'''29.45''' saptabhiḥ pañcabhiścaiva tribhiścāpi krameṇa tu pūrvavatkūrcamuddiṣṭaṃ kalaśānāṃ janārdana

'''29.46''' viṃśāṅgulaṃ syācchaktestu śeṣaṃ tithyaṅgulaṃ bhavet caturaṅgulapramāṇena pidhānaṃ syāccharāvakam

'''29.47''' saptaṣaṭpañcahastaṃ syātkumbhaveṣṭanavastrakam pañcabhāgaikavistīrṇaṃ nīromaṃ susitaṃ bhavet

'''29.48''' śreṣṭhamadhyakaniṣṭhaṃ ca krameṇa parikīrtitam śivakumbhasya ratnāmbupañcakaṃ śreṣṭhamucyate

'''29.49''' catvāri trīṇi ratnāni madhyamādhamayorapi māṇikyaṃ muktā vairḍūryamindranīlaṃ pravālakam

'''29.50''' pañcaratnamiti proktaṃ gaurīkumbhe tu kāñcanam adhamaṃ māṣamātraṃ syād dviguṇaṃ madhyamaṃ bhavet

'''29.51''' triguṇaṃ śreṣṭhamityuktaṃ śeṣeṣu dravyameva hi sarvasādhāraṇaṃ caiva sādhanaṃ parikīrtitam

'''29.52''' atho navaprakārāṇāṃ vakṣyāmi sthāpanaṃ kramāt pūrvoktamaṇṭape samyak sūtrapātaṃ tu kārayet

'''29.53''' aṣṭabhirdviguṇaiḥ sūtraiḥ prāṅmukhairvyūhasaptakam udaṅmukhaistathā sūtrairvyūhasaptakameva hi

'''29.54''' vyūhapramāṇaṃ prādeśaiḥ pañcabhiḥ samamucyate sūtrātsūtrāntaraṃ cāpi dviprādeśapramāṇataḥ

'''29.55''' sūtradvayāntaraṃ sarvaṃ lepayedgomayāmbunā sūtrāṇi ca suluptāni vīthayo’tra bhavanti hi

'''29.56''' prāṅmukhā vīthayaścāpi cāṣṭa codaṅmukhā api vīthīnāṃ saṃgamasthāne madhyastambhasthitirbhavet

'''29.57''' vyūhānyekonapañcāśad vīthīmadhyagatāni vai evamāsphālite sūtre tato mantrī śivāmbunā

'''29.58''' prokṣayitvā padavyūhān sthaṇḍilāṃsteṣu kārayet kalaśaṃ prati pūrvoktaiḥ śālibhistaṇḍulaistilaiḥ

'''29.59''' madhyātpratipadavyūhaṃ sthaṇḍilaṃ tu yathākramam teṣu madhye tataḥ kuryātpadmamaṣṭadalānvitam

'''29.60''' tadbāhyāvaraṇe dikṣu catasṛṣvapi saikatam homārthaṃ sthaṇḍilaṃ kuryādvidikṣu catasṛṣvapi

'''29.61''' kuryādadhyayanaṃ viprairhomakāle viśeṣataḥ prokṣayitvā śivāstreṇa vilikhedakṣarāṇi tu

'''29.62''' padmamadhye likhetkūṭaṃ makārākṣarasaṃyutam prathamāvaraṇe dikṣu yakārādicatuṣṭayam

'''29.63''' śakārādihakārāntānvidikṣu catasṛṣvapi svaraṣoḍaśakaṃ paścād dvitīyāvaraṇe nyaset

'''29.64''' tṛtīyāvaraṇe caiva kavargaṃ pūrvapañcake cavargaṃ dakṣiṇe cāpi ṭavargaṃ paścime bhavet

'''29.65''' tavargamuttare nyasya pakāraṃ vahnigocare phakāraṃ nairṛte deśe bakāraṃ mārute tathā

'''29.66''' bhakāraṃ vinyasedaiśe vyūhe mantrī gatatvaraḥ kalaśasthāpanaṃ kuryātteṣu paścādatandritaḥ

'''29.67''' vastreṇa śodhayetpūrvaṃ gandhacūrṇayutaṃ jalam tenaiva pūrayitvādau śivakumbhaṃ ca vardhanīm

'''29.68''' sakūrcau ratnahemāḍhyau gandhacandanacarcitau vastreṇāveṣṭitagrīvau sāpidhānau ca sākṣatau

'''29.69''' mālāpallavasaṃyuktau śivayoḥ kumbhakāvubhau astreṇa prokṣayitvābjaṃ karṇikāyāṃ śivena tu

'''29.70''' gaurīmantreṇa jāpyau tu sthāpayetsthāpakottamaḥ śivakumbhottare bhāge vardhanyāḥ sthānamucyate

'''29.71''' uttarābhimukhāṃ tasyā nāsikāṃ parikalpayet pādyamācamanaṃ cārghyaṃ pañcagavyaṃ kuśodakam

'''29.72''' kṣīraṃ dadhi ghṛtaṃ caiva dalāgreṣu ca vinyaset catvāriṃśatsu cānyeṣu vyūheṣu purataḥ kramāt

'''29.73''' prativyūhaṃ śatārdhārdhānkalaśānsthāpayetsudhīḥ kṣaudramikṣurasaṃ caiva yavaṃ darbhodakaṃ tathā

'''29.74''' tilaṃ kadalikāyāstu phalaṃ sarṣapameva ca nālikeraphalaṃ rātrirajo vai mātuluṅgakam

'''29.75''' lāmajjaṃ dāḍimīṃ lājacūrṇaṃ panasameva ca bhasma cāmraphalaṃ caiva ṣoḍaśaitānkrameṇa hi

'''29.76''' pūrvādi vinyasedviṣṇo svarāvaraṇamadhyame teṣāmetattathaiveha prathamāvaraṇasya ca

'''29.77''' dravyāṇi kramaśo vakṣye tāni saṃkṣepataḥ śṛṇu kāśmīraṃ rocanā kuṣṭhaṃ karpūraṃ ca lavaṅgakam

'''29.78''' elā jātīphalaṃ cānyatpatramaṣṭamamucyate prathamāvaraṇasyoktaṃ dvitīyasyādhunocyate

'''29.79''' sahā dūrvā tathā lakṣmīrbhadrā viṣṇuvadhūyutā indravallī tathā kāśaṃ vārāhī śṛṅgameva ca

'''29.80''' gokṣuraṃ ca śamīpatraṃ tathaivāñjalikārikā apāmārgadvayaṃ caiva girikarṇīdvayaṃ tathā

'''29.81''' ṣoḍaśaitāni vastūni dvitīyeṣūdake nyaset dvitīyāvaraṇeṣvevaṃ svarāṇāṃ parikīrtitam

'''29.82''' bāhyasyāpi tṛtīyasya madhyasthaṃ vakṣyate’dhunā padmaṃ nīlotpalaṃ caiva raktamutpalameva ca

'''29.83''' etaistribhiḥ samāyuktaṃ kakāre puṣpavāri tat tulasībilvadhuttūrapatraiḥ patrodakaṃ khake

'''29.84''' palāśāśvatthayoścāpi kapitthasya ca valkalaiḥ valkalodakamuddiṣṭaṃ gakārapadamadhyame

'''29.85''' āmrāśvatthapalāśānāṃ pallavaiḥ pallavodakam ghakāre vinyasettadvaddhīberośīramustakaiḥ

'''29.86''' mūlodakaṃ ṅakārasthaṃ taduktaṃ pūrvapañcakam nāraṅgalikucāmrāṇāṃ phalairyuktaṃ phalodakam

'''29.87''' cakāre vinyasecchālinīvārābhyāṃ priyaṅgunā bījodakaṃ chakārasthaṃ vidāryutpalapadmakaiḥ

'''29.88''' kandaiḥ kandodakaṃ tacca jakāre vinyasedbudhaḥ candanāgarukarpūrairyuktaṃ gandhodakaṃ tathā

'''29.89''' jhakāre vinyaseddhīmāngandhodakamiti smṛtam ñakāre tilasiddhārthayavaiḥ siddhodakaṃ tathā

'''29.90''' evaṃ yāmyagataṃ proktaṃ vyūhānāṃ pañcakaṃ padam māṇikyamuktāvairḍūryaiṣṭakāre ratnavāri tat

'''29.91''' tāmrarūpyasuvarṇaistu yuktaṃ lohodakaṃ bhavet ṭhakāre vinyasetpaścāḍḍakāre kāntavāri ca

'''29.92''' sūryakāntamayaskāntaṃ candrakāntamiti tribhiḥ mākṣikatrayasaṃyuktaṃ mākṣikāmbho ḍhakārake

'''29.93''' abhrakāmbho ṇakāre tu yuktaṃ tattribhirabhrakaiḥ saurāṣṭrāñjanatārkṣyaistu takāre kṣāravāri tat

'''29.94''' dhātūdakaṃ thakāre syāddhātusindūragairikaiḥ raktacandanasaṃyuktaṃ haritālasamanvitam

'''29.95''' manaśśilāyutaṃ cāpi dakāre raktavāri tat saritpatisarittīrakṣetrasaṃbhavayā mṛdā

'''29.96''' yuktaṃ mṛdambha ityuktaṃ dhakāre tatsamādiśet triphalāsaṃyutaṃ vāri kaṣāyodaṃ nakārake

'''29.97''' pakāre vinyasetkṣīraṃ phakāre dadhi vinyaset bakāre vinyasetsarpirbhakāre tailamucyate

'''29.98''' bāhyastheṣu padeṣvevamuktadravyaṃ tu madhyame tadanantaramaṣṭānāṃ kathyate’tra samāsataḥ

'''29.99''' phenaṃ ca devadāruśca māṃsī tālīsapatrakam kuṣṭhaṃ vaktraṃ tathā rāsnā nāgakesarameva ca

'''29.100''' prathamāvaraṇasyaitānpūrvādikramaśo nyaset campakaṃ jāti punnāgamallikākaravīrakam

'''29.101''' śvetārkaṃ vakulaṃ caiva caturaṅgulasaṃyutam mādhavī kuravaṃ caiva ketakī pāṭalī tathā

'''29.102''' nandyāvartaṃ ca bandhūkajapāhemākhyameva ca prāgādikramaśo dravyaṃ ṣoḍaśeṣvapi vinyaset

'''29.103''' evaṃ dravyaṃ samākhyātaṃ śṛṇu devānataḥ param dravyanyāsāvasāne tu devatānyāsa ucyate

'''29.104''' puṇyāhaṃ vācayitvā tu prokṣayecchivamantrataḥ paritaḥ śivakumbhasya sthaṇḍile tu vidhānataḥ

'''29.105''' samidājyacarūm̐llājāṃstilāṃśca brahmapañcakaiḥ pratyekaṃ śatamardhaṃ vā tadardhaṃ vātha homayet

'''29.106''' pūrṇāhutiṃ tu mūlena sarvatra juhuyāttataḥ hotāraścaiva catvāraḥ samakālaṃ samutthitāḥ

'''29.107''' spṛśeyurdakṣahastena śivakumbhaṃ mukhāṇubhiḥ tataḥ śaivapadābhyāśe samāsīno gurūttamaḥ

'''29.108''' dakṣiṇe mantravinyāsamudagvaktraḥ prayojayet śvetaṃ trilocanaṃ śambhuṃ jaṭāmakuṭasaṃyutam

'''29.109''' candrāvayavalakṣmāṇaṃ sarvābharaṇabhūṣitam caturbhujaṃ prasannāsyaṃ varadābhayahastakam

'''29.110''' kṛṣṇāparaśusaṃyuktaṃ dhyātvā cāvāhanādibhiḥ pūjayedgandhapuṣpādyairnaivedyāntaṃ svamantrataḥ

'''29.111''' hemavarṇāṃ dvinetrāṃ ca pūrṇacandranibhānanām dvibhujāṃ sarvahṛdyāṅgīṃ sarvābharaṇabhūṣitām

'''29.112''' vardhanyāṃ tu yajedgaurīṃ svanāmapadamantrataḥ kalakarṇīṃ tato mudrāṃ śivayoḥ kumbhayorapi

'''29.113''' liṅgamudrāṃ śive cātha vardhanyāṃ ca manoramām ubhayoḥ surabhīmudrāṃ darśayeddeśikottamaḥ

'''29.114''' pādyādiṣu tato’ṣṭau ca vidyeśāṃśca prapūjayet svanāmapadamantraistān svarasthāṃstu tato’rcayet

'''29.115''' akāravyūhamadhye tu śambhuṃ gandhādibhiryajet devadevaṃ mahādīptaṃ variṣṭhaṃ parameṣṭhinam

'''29.116''' satyarūpamanantaṃ ca parānandamanindakam prathamāvaraṇe tasya kalaśeṣvabhito yajet

'''29.117''' dvitīye kāmadaṃ kālanāśanaṃ kapilāmbaram kapardinaṃ purārātiṃ khagaṃ khaḍgadharaṃ vibhum

'''29.118''' vibudhaṃ vibudhādhīśaṃ jñānaṃ vijñānalocanam śrīkaṇṭhamanaghaṃ vaidyaṃ vedādyamiti ṣoḍaśa

'''29.119''' tadbāhye ṣoḍaśasvetānpūrvādārabhya pūjayet rudraṃ cātha mahādevaṃ vāmadevaṃ haraṃ śivam

'''29.120''' īśānaṃ giriśaṃ śarvaṃ sarvajñamamarādhipam kapardinaṃ karālākṣaṃ kālanāśanamavyayam

'''29.121''' trinetraṃ ca yajeddhīmānākārādiṣu madhyame akārāvaraṇe proktā ye rudrāstāṃstathaiva ca

'''29.122''' vyūheṣveteṣu sarveṣu tvakārādikramādyajet tṛtīyāvaraṇe paścātpūrvādikramato yajet

'''29.123''' manojavaṃ yajenmadhye tato’ṣṭasu yathākramam anantamatiriktaṃ ca viraktaṃ vedalocanam

'''29.124''' vedāntasārasandohaṃ vimalaṃ viśvabhāvanam viśveśaṃ caiva pūrvādikramādrudrānsamarcayet

'''29.125''' dvitīyāvaraṇe paścāt ṣoḍaśasvabhitaḥ kramāt sthāṇuṃ sahasrabāhuṃ ca dhūrjaṭiṃ jvalanadyutim

'''29.126''' vidyutpiṅgajaṭaṃ bhānuṃ parameśvaramuddhatam garbhaṃ bhīmaṃ himābhaṃ ca sarvagaṃ ca vibhīṣaṇam

'''29.127''' kṛttivāsaṃ samārādhyaṃ pūrvagaṃ ca kramādyajet tataḥ khakāravyūhācca kramādrudrānsamarcayet

'''29.128''' tattanmadhyagatānetāṃstacchṛṇu tvaṃ samāhitaḥ mahākāyaṃ gakāre tu śūlinaṃ tu ghakārake

'''29.129''' ṅakāre pūjayedbhīmaṃ cakāre’yugrameva ca chakāre vyagranāmānaṃ jakāre ceśvaraṃ tathā

'''29.130''' jhakāre puranāśaṃ ca purāṇaṃ tu ñakārake lokasākṣī ṭakāre syāḍhakāre tryambako bhavet

'''29.131''' gaṅgādharaṃ ḍakāre tu ḍhakāre cendumardanam ṇakāre sarvagaḥ pūjyaḥ sarvadastu takārake

'''29.132''' thakāre sadgamaścaiva dakāre śaṃkaro bhavet dhakāre śānta ityuktaḥ śarmadastu nakārake

'''29.133''' śāśvataḥ syāt pakāre tu phakāre śucirucyate bakāre bhasitaprītaṃ bhakāre varadaṃ tathā

'''29.134''' khakāre vṛṣavāhaṃ ca pūjyā rudrāḥ prakīrtitāḥ teṣāmanantarāṣṭāsu ṣoḍaśasvatha tadbahiḥ

'''29.135''' pūrvoktakramato rudrān pūrvoktānpūrvavadyajet sarvatra vyūhamadhyasthakalaśānapi deśikaḥ

'''29.136''' vastreṇa veṣṭayitvā tu tato yajanamārabhet evaṃ rudrānsamārādhya kalaśānāṃ sahasrake

'''29.137''' vedaghoṣasamāyuktaṃ śaṅkhadundubhinisvanaiḥ śivakumbhaṃ samuddhṛtya vardhanyā saha deśikaḥ

'''29.138''' abhiṣicya śivaṃ mantrī sarvātmānaṃ samuccaran vardhanīṃ piṇḍikāyāṃ tu tadgāyatryābhiṣecayet

'''29.139''' śivayoḥ kumbhayoḥ paścādvidyeśādyānyajetkramāt tataḥ sahasramapi tat kramāduddhṛtya secayet

'''29.140''' nyasyaivaṃ kalaśe mantrān rudrāṇāmapi keśava abhiṣekaṃ taireva kārayetkramaśaḥ puraḥ

'''29.141''' saṃvatsarātmakaṃ mantramuccaranvābhiṣecayet catvāriṃśatsu vyūheṣu bāhyastheṣu yathākramam

'''29.142''' sthāpitāḥ kalaśā ye syuḥ pañcaviṃśatisaṃkhyayā teṣāmuddharaṇaṃ caiva pūrvādikramayogataḥ

'''29.143''' pañcaviṃśeṣu madhyasthaṃ kalaśaṃ pūrvamuddharet tataścāṣṭa samuddhṛtya tataḥ ṣoḍaśa coddharet

'''29.144''' svarāvaraṇamuddhṛtya vargāvaraṇamuddharet uddhāre kalaśānāṃ tu pramādātpatanādike

'''29.145''' tatrānyaṃ kalaśaṃ pūjya samuddhṛtyābhiṣecayet abhiṣekasamāptau tu kṛtvā śuddhodasecanam

'''29.146''' śālipiṣṭena vā liṅgaṃ māṣacūrṇena vā punaḥ ālipyodvartanaṃ kṛtvā bahuśaśca sapīṭhakam

'''29.147''' śuddhiṃ prakṣālanātkṛtvā gandhodairabhiṣecayet arcanoktaṃ samabhyarcya yathāvibhavavistaram

'''29.148''' prabhūtaṃ ca havirdattvā bhāramānasamanvitam mukhavāsasamāyuktaṃ tāmbūlamatha dāpayet

'''29.149''' tataḥ pradakṣiṇaṃ kṛtvā namaskṛtvā punaḥ punaḥ kṣamasveti samuccārya nirgacchettadanantaram

'''29.150''' dāpayeddeśikādīnāṃ dakṣiṇāṃ śraddhayā saha ityevaṃ snapanaṃ proktamaṣṭādhikasahasrakaiḥ

'''29.151''' aṣṭādhikasahasrārdhasnapanaṃ procyate’dhunā tadarthaṃ sūtrapātaṃ tu kuryānmaṇṭapamadhyame

'''29.152''' ṣaṭsūtrairdviguṇaiścaiva prāgagrairvyūhapañcakam udagagraistathā kuryād vyūhapañcakameva ca

'''29.153''' vīthīvyūhapramāṇaṃ tu pūrvavatparikalpayet evaṃ kṛte tu vyūhānāṃ bhavetpañcakapañcakam

'''29.154''' teṣāṃ madhye śivavyūho vidyeśānāṃ tathāṣṭakam samantātṣoḍaśa vyūhāḥ svarāṇāṃ parikīrtitāḥ

'''29.155''' sthaṇḍilaṃ teṣu kartavyaṃ pūrvavacca yathākramam pañcaviṃśeṣu vyūheṣu bāhye dikṣu vyavasthitam

'''29.156''' catuṣṭayaṃ tu vyūhānāṃ homārthaṃ parikalpayet teṣu ca sthaṇḍilaṃ kuryātsikatābhirvicakṣaṇaḥ

'''29.157''' śaivavyūhe kṛtābje tu prāsādaṃ mantramālikhet bāhyeṣvaṣṭasu mantrāṃstu vidyeśānāṃ samālikhet

'''29.158''' tadbāhye ṣoḍaśavyūheṣvakārādīni vinyaset bindunādayutānyeva sarvāṇyapi samālikhet

'''29.159''' pūjayecca tataḥ sarvaṃ praṇavādi namo’ntakam tataḥ sthāpanameteṣu vyūheṣu kramaśo bhavet

'''29.160''' śivomārudrakumbhāṃstu sarvānapi ca keśava pūrvavatsaṃskṛtānsamyaggandhatoyena pūrayet

'''29.161''' sarveṣāṃ madhyame kumbhaṃ śaivaṃ tatraiva vinyaset sakūrcaṃ sāpidhānaṃ ca pañcaratnasamāyutam

'''29.162''' vastrayugmāvṛtaṃ caiva tasya kumbhasya cottare gaurībījaṃ tathābhūtaṃ vinyasenmantravittamaḥ

'''29.163''' paritaśca tayoḥ paścātpūrvādikramayogataḥ pādyamācamanaṃ cārghyaṃ pañcagavyaṃ kuśodakam

'''29.164''' kṣīraṃ dadhi ghṛtaṃ caiva śivavyūhe tu vinyaset tato vidyeśvarāṇāṃ tu vyūheṣvaṣṭasvapi kramāt

'''29.165''' madhye madhu punarlājaṃ lājacūrṇaṃ tataḥ sudhīḥ niśācūrṇaṃ tathā bhasma tataścekṣurasaṃ bhavet

'''29.166''' tilaṃ ca sarṣapaṃ caiva nyasya paścātsvareṣvapi ākāre candanāmbhaḥ syādikāre lavajaṃ tathā

'''29.167''' īkāre kuṣṭhatoyaṃ svādūkāre rocanodakam ṛkāre navanītāmbha ṝkāre patratoyakam

'''29.168''' lṝkāre triphalātoyamekāre tu phalodakam aikāre dhātutoyaṃ syādaukāre cābhratoyakam

'''29.169''' aṃkāre puṣpatoyaṃ syād aḥkāre kuśatoyakam evaṃ pradhānakalaśe sarvatrāpi kramānnyaset

'''29.170''' yavaṃ siddhārthakaṃ caiva tilaṃ kṛṣṇaṃ tathaiva ca nīvāraṃ beṇubījaṃ ca godhūmaṃ śyāmameva ca

'''29.171''' priyaṅguṃkrameṇa pūrvādi vidyeśāvaraṇe nyaset ṣoḍaśeṣvatha tadbāhye mallikāṃ campakaṃ tathā

'''29.172''' jātīvakulapunnāgamarkaṃ śvetaṃ ca dhātakīm kuravaṃ karṇikāraṃ ca caturaṅgulameva ca

'''29.173''' dhuttūraṃ droṇapuṣpaṃ ca nandyāvartaṃ ca mādhavīm mālatīṃ yūthikāṃ cāpi sarvatra parito nyaset

'''29.174''' tadbāhye ca svarākhye ca rocanaṃ kuṅkumaṃ tathā drākṣāṃ dārvīṃ tato dūrvāṃ jyotiṣmatīṃ ca sallakīm

'''29.175''' vaktraṃ cāvaraṇe’ntasthe kalaśeṣvaṣṭasu nyaset ṣoḍaśeṣvapi tadbāhye bilvamārīcamācikāḥ

'''29.176''' dūrvāṃ calaṃ ca gokarṇamindravallīṃ ca vaiṣṇavīm tulasīṃ vaṭaśuṅgaṃ ca jambvapāmārgakau tathā

'''29.177''' girikarṇīdvayaṃ cātha kapitthodumbarāvapi evaṃ dravyaṃ samākhyātaṃ vyūhānāṃ kalaśeṣvapi

'''29.178''' śivavyūhe’ṣṭakaṃ proktaṃ kalaśānāṃ tu tadbahiḥ vidyeśāvaraṇe vyūheṣvaṣṭāsvapi tato bahiḥ

'''29.179''' svarāvaraṇavyūhe ca dvādaśasvabhito bhavet prativyūhaṃ tu sarvatra pañcaviṃśakamucyate

'''29.180''' teṣu madhye sthitaṃ caikaṃ vastreṇopari veṣṭayet evaṃ saṃsthāpya kalaśānsahasrārdhāṃstathāṣṭakān

'''29.181''' tato devaṃ ca devīṃ ca śivayoḥ kumbhayoryajet parito bhavādikānaṣṭau śivavyūhe tu deśikaḥ

'''29.182''' parito madhyame paścād vidyeśānapi pūjayet vidyeśāvaraṇāntastha kalaśeṣvaṣṭasu kramāt

'''29.183''' sarvatra pūjayenmantrī lokapālānyathākramam bāhyeṣu kalaśeṣvetānarcayetṣoḍaśānapi

'''29.184''' pramatheśaṃ maheśaṃ ca kapilaṃ kapilāmbakam kālamūrtiṃ kalāmūrtiṃ khaṭvāṅgadharamuddhatam

'''29.185''' bhṛkuṭībhīṣaṇaṃ bhīmaṃ mahābhairavarūpiṇam mahābhujaṃ mahādaṃṣṭramanavadyamaninditam

'''29.186''' asahyaṃ ceti rudrāṃśca ṣoḍaśānkramaśo yajet svarāvaraṇamadhye tu kalaśeṣu yathākramam

'''29.187''' ādityāndvādaśābhyarcya tadanantaramaṣṭake vasūnaṣṭa samabhyarcya tadbāhye ṣoḍaśeṣvapi

'''29.188''' vidyujjihvaṃ viśālākṣaṃ vidrumaprabhamunmukham vettāraṃ vibudhādhyakṣaṃ vīraṃ vīreśvaraṃ param

'''29.189''' kumbhodaraṃ nikumbhaṃ ca bhūtalaṃ bhūtibhūṣaṇam vyālayajñopavītaṃ ca ṭaṅkahastaṃ jaṭādharam

'''29.190''' evaṃ devānsamabhyarcya tataḥ snapanamārabhet aṣṭādhikasahasrārdhairuktaṃ snapanamuttamam

'''29.191''' ṣoḍaśadviśatairvakṣye kalaśaiḥ snapanaṃ param prāgagrairdviguṇaiḥ sūtraiścaturbhiśca tathāparaiḥ

'''29.192''' udaṅmukhaistathābhūtairvyūhānāṃ navakaṃ bhavet sūtradvayāntarālaṃ tu vyūhamānaṃ ca pūrvavat

'''29.193''' vyūheṣveteṣu navasu śaivaṃ madhyamamucyate prāgādyāstvaparavyūhā dikpālānāṃ bhavanti hi

'''29.194''' sthaṇḍilaṃ teṣu kartavyaṃ pūrvavallakṣaṇānvitam madhye padmaṃ samālikhya vikāradalasaṃyutam

'''29.195''' atha tatkarṇikāmadhye praṇavaṃ vinyasedbudhaḥ indrādīśānaparyantaṃ tattadbījaṃ samālikhet

'''29.196''' gandhapuṣpādibhistatra pūjayedakṣarāṇi ca śivomārudrakumbhāṃstu pūrvavatsaṃskṛtāṅśubhān

'''29.197''' sthāpayetkramaśo vidvānsarvalakṣaṇasaṃyutān śivayoḥ kumbhakau sthāpya dalāgreṣvabhitaḥ kramāt

'''29.198''' pādyamācamanaṃ cārghyaṃ pañcagavyaṃ kuśodakam kṣīraṃ dadhi ghṛtaṃ caiva digdalāṣṭasu vinyaset

'''29.199''' madhutailekṣusārāṇi khaṇḍaṃ panasameva ca kadalīphalamāmraṃ ca mātuluṅgaṃ yathākramam

'''29.200''' daleṣvanyeṣu vinyasya tataścendrādiṣu kramāt yavasarṣapalājāṃśca lājacūrṇaṃ tatastilam

'''29.201''' niśāgodhūmacūrṇau ca bhasma caiva kramānnyaset anyān gandhodakaiḥ pūrṇānkalaśānsthāpayettataḥ

'''29.202''' teṣu śātakratavyādimahādikṣu yathākramam prathamāvaraṇastheṣu kalaśeṣvaṣṭasu kramāt

'''29.203''' candanaṃ laghu kuṣṭhaṃ ca truṭikarpūrameva ca phalatrayaṃ ca vinyasya tadbāhye ṣoḍaśasvatha

'''29.204''' dārvīṃ dūrvāṃ tathā drākṣāṃ nāgakesarameva ca hrīberaṃ guggulaṃ caiva mañjiṣṭhāṃ lodhrameva ca

'''29.205''' añjanaṃ rocanāṃ caiva turuṣkaṃ kuṅkumaṃ tathā viḍaṅgaṃ gairikaṃ caiva rāsnāṃ caiva manaśśilām

'''29.206''' vinyasya ca vidikṣveṣu cānyeṣu ca padeṣu ca prathamāvaraṇe lakṣmīṃ viṣṇukrāntiṃ sahāṃ tathā

'''29.207''' bilvadūrvāśamīpatrāṇyapāmārgadvayaṃ tathā vinyasya paritaḥ paścātṣoḍaśeṣvapi vinyaset

'''29.208''' śvetapadmaṃ ca kumudaṃ dhuttūraṃ caiva mallikām karavīraṃ pāṭalīpuṣpaṃ punnāgaṃ raktapaṅkajam

'''29.209''' āragvadhaṃ ca śvetārkaṃ raktārkaṃ bṛhatīṃ tathā campakaṃ kuravaṃ caiva droṇapuṣpaṃ ca yūthikām

'''29.210''' evameteṣu sarveṣu nyasya dravyāṇi mantravit vyūhānāṃ parito homaṃ caturdikṣu prakalpayet

'''29.211''' śivakumbhe śivaṃ pūjya vardhanyāṃ śaktimeva ca parito dikṣu vidyeśānvidikṣu ca bhavādikān

'''29.212''' bāhyastheṣu ca dikpalānmadhyasthakalaśeṣu ca saṃpūjya dikṣu pūrvādicatasṛṣvapi keśava

'''29.213''' mātṛvṛtaṃ ca piṅgākṣaṃ bhūtapālaṃ balipriyam sarvavidyeśvaraṃ caiva dhātāraṃ duḥkhanāśanam

'''29.214''' sukhadaṃ caiva vinyasya rudrānaṣṭasu pūjayet tadbāhye ṣoḍaśasvetān rudrāṃścaiva kramānnyaset

'''29.215''' jaṭādharaṃ ratnadharaṃ nidhīśaṃ rūpiṇaṃ tathā dhanyaṃ saumyaṃ prakāśaṃ ca pramardanamataḥ param

'''29.216''' suprasādaṃ sulakṣmāṇaṃ kāmarūpaṃ tathā param śvetaṃ ca jayabhadraṃ ca dīrghabāhuṃ balāntakam

'''29.217''' āgneyādiṣu koṇeṣu rudrānetānsamarcayet vaḍavāmukhaṃ subhīmaṃ ca nairṛtaṃ māraṇaṃ tathā

'''29.218''' hantāraṃ krūradṛṣṭiṃ ca bhayānakamataḥ param ūrdhvakeśaṃ ca sarveṣu prathamāvaraṇe kramāt

'''29.219''' dvitīyāvaraṇe paścārddhūmraṃ lohitadaṃṣṭrakam yāmyaṃ mṛtyuharaṃ caiva kartāraṃ dharmanāyakam

'''29.220''' yoktāraṃ jvalanaṃ bhānuṃ babhruṃ bhasmavibhūṣitam kṣayāntakaṃ kapālīśamajaṃ buddhaṃ ca vajriṇam

'''29.221''' kramādvinyasya saṃpūjya tataḥ snapanamārabhet ṣoḍaśadviśatairevaṃ snapanaṃ parikīrtitam

'''29.222''' evaṃ vyūhakramātproktamuttamasnapanatrayam padakrameṇa vakṣyāmi snapanaṃ madhyamatrayam

'''29.223''' aṣṭottaraśatairvakṣye kalaśaiḥ snapanaṃ param prāgagraṃ manusūtraṃ syādudagagraṃ tathaiva ca

'''29.224''' navaṣaṣṭiśataṃ samyak padamekatra susthitam padapramāṇaṃ sarvatra tālamātramiti smṛtam

'''29.225''' tatra madhye navapadaṃ padmārthaṃ parilopayet bāhye tu ṣoḍaśapadaiḥ prathamāvaraṇaṃ bhavet

'''29.226''' paritaśca tato vīthī padapaṅkyaikayā bhavet aṣṭa dvārāṇi vīthyagre koṇapārśveṣu kalpayet

'''29.227''' tribhistribhiḥ padairevaṃ kṛte tatra bhavanti hi padaprāntāstu madhyādi navasakhyā janārdana

'''29.228''' teṣu pūrvādisaṃstheṣu prānteṣvatha caturṣvapi tithisaṃkhyāpadeṣvantarvīthīpārśveṣu madhyamam

'''29.229''' padamekaṃ parityajya sthaṇḍilaṃ teṣu kalpayet evaṃ kṛte mahādikṣu caturdaśapadaṃ bhavet

'''29.230''' koṇeṣvapi nava proktāstataḥ sthāpanamārabhet prokṣayitvāstrajaptena vāriṇā deśikastataḥ

'''29.231''' teṣu sarveṣu madhyeṣu sthaṇḍilaṃ pūrvavadbhavet tataḥ śivākhyakalaśaṃ pūrvavatkalpitaṃ sudhīḥ

'''29.232''' karṇikāyāṃ tu vinyasya vardhanīṃ tasya cottare tataścāvaraṇe tvādye pūrvādikramayogataḥ

'''29.233''' pādyamācamanaṃ cārghyaṃ pañcagavyaṃ kuśodakam kṣīraṃ dadhi ghṛtaṃ caiva dikṣu cānyeṣu vinyaset

'''29.234''' madhu bhasmekṣusāraṃ ca lājacūrṇamataḥ param lājaṃ ca rajanīcūrṇaṃ tilaṃ sarṣapameva ca

'''29.235''' vinyasyātha ca sarveṣu śeṣeṣvāvaraṇakramāt gandhodapūritān paścātkalaśāṃsteṣu vinyaset

'''29.236''' dvitīyāvaraṇe tvetānvakṣyamāṇānyathākramam panasaṃ mātuluṅgaṃ ca dāḍimaṃ cāmrameva ca

'''29.237''' nālikeramataścāpi nāraṅgadvayameva ca kadalīṃ cāsitāṃ caiva jambūphalamataḥ param

'''29.238''' drākṣāṃ ca navanītaṃ ca hrīberaṃ mustakaṃ tataḥ vakraṃ rāsnāṃ nataṃ cāpi dāntakaṃ ca murāṃ tṛṇam

'''29.239''' jyotiṣmatīṃ dvitīyeṣu viṃśeṣu kalaśeṣu ca śālinīvārakau caiva priyaṅguyavaveṇujam

'''29.240''' rocanāṃ kuṅkumaṃ caiva gairikaṃ ca manaḥśilām tālamañjanakaṃ śyāmaṃ raktacandanameva ca

'''29.241''' śrīveṣṭakaṃ gandharasaṃ sallakīṃ ca tataḥ kramāt turuṣkaṃ ca viḍaṅgaṃ ca tataścendrayavāhvayam

'''29.242''' cavyaṃ siddhārthakaṃ caiva jīrakadvayameva ca mañjiṣṭhāṃ ca tathā māṃsīṃ tālīsaṃ cāpyaveṇuje

'''29.243''' karpūraṃ phalinīṃ loghrāṃ mākṣikaṃ ca tataḥ param tṛtīyāvaraṇe nyasya tadbāhye tu janārdana

'''29.244''' padmaṃ nīlotpalaṃ caiva raktamutpalameva ca campakaṃ jātipunnāgavakulaṃ caturaṅgulam

'''29.245''' karavīraṃ tathā droṇaṃ nandyāvartaṃ ca mallikām dhuttūraṃ caiva bandhūkaṃ japākusumameva ca

'''29.246''' karṇikāraṃ śamīṃ caiva sahāṃ viṣṇuvadhūṃ tathā dūrvāṃ ca bhṛṅgarājaṃ ca cakravallīṃ varāhikām

'''29.247''' bhadrāṃ lakṣmīṃ ca pāṣāṇaṃ girikarṇīdvayaṃ tathā apāmārgadvayaṃ caiva gokṣuraṃ tulasīṃ tathā

'''29.248''' nāgapuṣpaṃ ca takkolamuśīraṃ patrameva ca truṭiṃ cailāphalaṃ caiva tvagaruṃ candanaṃ tathā

'''29.249''' evaṃ dravyāṇi vinyasya caturthāvaraṇe kramāt śivaṃ gaurīṃ tayoryaṣṭvā kumbhayostadanukramāt

'''29.250''' prathamāvaraṇe dikṣu lokapālānsamarcayet anyeṣvaṣṭasu vidyeśānpadeṣu kramaśo yajet

'''29.251''' vaikartanaṃ vivasvantaṃ bhavaṃ śarvamataḥ param mārtāṇḍaṃ bhāskaraṃ caiva raviṃ rudraṃ tathaiva ca

'''29.252''' udbījamugranāmānaṃ lokabhāsakameva ca lokasākṣiṇamapyanyaṃ mahāntaṃ bhīmameva ca

'''29.253''' trivikramaṃ tathādityaṃ sūryamaṃśumatā saha divākaraṃ tathaiśānaṃ dvitīyāvaraṇe kramāt

'''29.254''' tṛtīyāvaraṇe bāhye pūjayedīśagocare varadaṃ vīrabhadraṃ ca vimalaṃ viśvagocaram

'''29.255''' vedaniṣṭhaṃ parānandaṃ parameśaṃ mahādyutim mahoraskaṃ guruṃ ramyamabheyamanaghaṃ śucim

'''29.256''' trilocanamanaupamyaṃ ṭaṅkapāṇiṃ mahāgatim śūlapāṇiṃ mahotsāhaṃ mahābhairavarūpiṇam

'''29.257''' daṃṣṭrālaṃ ca durādharṣaṃ hārabhūtiṃ ca vajriṇam daṇḍinaṃ śipiviṣṭaṃ ca vyāghracarmadharaṃ haram

'''29.258''' analāsyamalakṣyaṃ ca sarvalakṣaṇalakṣitam duḥsahaṃ ca trayīrūpaṃ devārimathanaṃ tathā

'''29.259''' gaṇeśaṃ ca sureśaṃ ca vyālayajñopavītinam durgaṃ ca surasenādyaṃ pūjayetkramaśaḥ surān

'''29.260''' ityabhyarcya tato devānkramām̐lliṅge’bhiṣecayet evamaṣṭaśataiḥ proktaṃ kalaśaiḥ snapanaṃ hare

'''29.261''' athāṣṭacatvāriṃśadbhiḥ kalaśairvakṣyate’dhunā prāgagrairdaśabhiḥ sūtrairudagagraistathaiva ca

'''29.262''' ekāśītipadaṃ kṛtvā madhye navapadaṃ punaḥ ekīkṛtya tu padmārthaṃ tadbāhye ṣoḍaśaiḥ padaiḥ

'''29.263''' vīthīṃ kṛtvā tu vīthyagre dvārāṇyaṣṭau prakalpayet evaṃ kṛte padānyatra ṣaṭ ṣaṭ dikṣu bhavanti hi

'''29.264''' koṇeṣvapi ca catvāri sthaṇḍilaṃ pūrvavadbhavet madhye padmaṃ samālikhya sāṣṭapatraṃ sakarṇikam

'''29.265''' śivakumbhaṃ vardhanīṃ ca pūrvavadvinyasetsudhīḥ pādyamācamanaṃ cārghyaṃ pañcagavyaṃ kuśodakam

'''29.266''' kṣīraṃ dadhi ghṛtaṃ caiva daleṣvaṣṭasu vinyaset madhulājaśakṛccūrṇaṃ lājacūrṇaṃ haridrakam

'''29.267''' bhasma cekṣurasaṃ caiva kadalīphalameva ca tilaṃ vai sarṣapaṃ caiva panasaṃ nālikerakam

'''29.268''' nāraṅgasya dvayaṃ caiva mātuluṅgaṃ ca dāḍimam ṣoḍaśaitāni vinyasya dvitīyāvaraṇe tathā

'''29.269''' tṛtīyāvaraṇe paścādgandhodaparipūritān kalaśānabhito nyasya teṣu dravyāṇi nikṣipet

'''29.270''' candanaṃ laghu kuṣṭhaṃ ca kaccolapuṣpapatrakam karpūraṃ kuṅkumaṃ caiva dikṣu cānyeṣvapi kramāt

'''29.271''' campakaṃ tulasīṃ caiva punnāgaṃ bilvameva ca mallikāmapyapāmārgaṃ jātiṃ caiva śamīṃ tathā

'''29.272''' vakulaṃ viṣṇukrāntiṃ ca mādhavīṃ ca tapasvinīm dhuttūraṃ girikarṇīṃ ca śaṅkhinīṃ padmameva ca

'''29.273''' evaṃ dravyāṇi vinyasya devānabhyarcayettataḥ śivayoḥ kumbhayoścaiva pūjayettāvubhāvapi

'''29.274''' vidyeśānprathame yaṣṭvā dvitīyāvaraṇe tataḥ lokapālānsvadiksaṃsthāṃstatpārśvasthānbhavādikān

'''29.275''' tṛtīyāvaraṇe cāpi vajrādīn dikpadāśritān vasūṃśca marutaścāṣṭa kalaśeṣvapi pūjayet

'''29.276''' evaṃ saṃpūjya vidhivatpaścātsnapanamācaret aṣṭādhikaiścatvāriṃśaiḥ snapanaṃ kalaśairyutam

'''29.277''' caturviṃśaiśca kalaśaiḥ pravakṣyāmyadhunā param prāgagrairvasubhiḥ sūtrairudagagraistathaiva ca

'''29.278''' padānyekonapañcāśatpiṇḍitāni bhavanti hi teṣāṃ madhye navapadaṃ padmārthaṃ parilopayet

'''29.279''' padasya dvitayaṃ tasya dikṣu sthāpya vidikṣu ca sthāpya catvāri catvāri śeṣānṣoḍaśa lopayet

'''29.280''' pūrvavatsthaṇḍilaṃ kṛtvā madhye’ṣṭadalamālikhet ambujaṃ karṇikāyuktaṃ tatra śaivaṃ tu vinyaset

'''29.281''' pūrvoktalakṣaṇopetaṃ kumbhaṃ tasyātha cottare gaurīkumbhaṃ tu vinyasya paritaśca kramānnyaset

'''29.282''' pādyamācamanaṃ cārghyaṃ pañcagavyaṃ kuśodakam kṣīraṃ dadhi ghṛtaṃ caiva prathamāvaraṇe nyaset

'''29.283''' madhu cekṣurasaṃ caiva gośakṛccūrṇameva ca haridrācūrṇaṃ lājaṃ ca tilaṃ sarṣapameva ca

'''29.284''' lājacūrṇaṃ tataścātha dikṣvaṣṭasvapi vinyaset kadalīṃ mātuluṅgaṃ ca dāḍimīṃ panasaṃ tathā

'''29.285''' padmaṃ nīlotpalaṃ caiva tulasīṃ bilvapatrakam koṇapārśveṣu sarveṣu vahnyādiṣu ca vinyaset

'''29.286''' evaṃ dravyāṇi vinyasya devānabhyarcayettataḥ maheśvaraṃ mahādevīṃ kumbhayostu tayoryajet

'''29.287''' prathamāvaraṇe caiva vidyeśānparito yajet lokapālāndvitīye tu yathāsthānaṃ samarcayet

'''29.288''' bhavādikāṃstu paritaḥ koṇapārśve tu pūjayet evaṃ padakramātproktaṃ snapanaṃ madhyamatrayam

'''29.289''' dalakrameṇa vakṣyāmi snapanaṃ kanyasatrayam tatra ṣoḍaśabhiḥ śreṣṭhaṃ kalaśaiḥ snapanaṃ bhavet

'''29.290''' pūrvoktamaṇṭape kuryātsthaṇḍilaṃ parimaṇḍalam madhye padmaṃ samālikhya vikāradalasaṃyutam

'''29.291''' karṇikākesarairyuktaṃ tilataṇḍulasaṃyutam karṇikāyāṃ tato madhye likhetkūṭākṣaraṃ budhaḥ

'''29.292''' svarāṇi ca dalāgreṣu pūrvādi parito nyaset śivayoḥ kalaśau tatra karṇikāyāṃ tu pūrvavat

'''29.293''' saṃsthāpyātha dalāgreṣu pūrvādi paritaḥ kramāt pādyamācamanaṃ cārghyaṃ pañcagavyaṃ kuśodakam

'''29.294''' kṣīraṃ dadhi ghṛtaṃ caiva vinyasettadanukramāt gandhodapūritānaṣṭa śeṣeṣu kalaśānnyaset

'''29.295''' evaṃ saṃsthāpya devāṃśca yajetpaścātkrameṇa tu devaṃ devīṃ samārabhya tattatkumbhe ca pūjayet

'''29.296''' lokapālānbhavādīṃśca yajetpūrvāditaḥ kramāt lokapālānsvadiksthāṃśca bhavādīnitarasthitān

'''29.297''' evaṃ saṃpūjya vidhivattataḥ snapanamācaret aṣṭābhiḥ kalaśairvakṣye snapanaṃ tatra maṇṭape

'''29.298''' catustālamitaṃ kṛtvā sthaṇḍilaṃ tu suvṛttakam karṇikāṣṭadalopetaṃ tatra padmaṃ samālikhet

'''29.299''' kūṭākṣaraṃ likhenmadhye daleṣvaṣṭasu ca kramāt yakārādi vakārāntaṃ śakārāddhāntameva ca

'''29.300''' digvidikṣvakṣarāṇyaṣṭa likhetpūrvāditaḥ sudhīḥ śivayoḥ kalaśau madhye pūrvavatsthāpya tadbahiḥ

'''29.301''' dalāgreṣu kramātsthāpya pādyādīnāṃ tadaṣṭakam athavā gandhatoyena pūrṇāṃśca kalaśānnyaset

'''29.302''' evaṃ vinyasya kalaśāndevaṃ ca pūrvavat saṃpūjya paritaḥ paścādaṣṭa vidyeśvarānnyaset

'''29.303''' tataḥ krameṇa kurvīta snapanaṃ deśikottamaḥ evamaṣṭabhiruddiṣṭaṃ caturbhiratha kathyate

'''29.304''' pūrvavatsthaṇḍilaṃ kṛtvā tatra padmaṃ caturdalam ālikhya karṇikāmadhye vyomākṣaramathālikhet

'''29.305''' pṛthivyādīni varṇāni pūrvādikramaśo bhavet pūrvavacchivakumbhaṃ tu vardhanyā saha deśikaḥ

'''29.306''' vinyasyātha ghṛtakṣīradadhikṣaudrāṇi ca kramāt pūrvādiṣu daleṣvetānvinyasedathavāmbunā

'''29.307''' pūritānvā nyasenmantrī tato yajanamārabhet śivayoḥ kumbhayostau ca pūrvavatsamyagarcayet

'''29.308''' dharmādīṃśca caturṣvanyeṣvarcayecca vidhānataḥ evamabhyarcya tānpaścāttaiḥ kuryātsnapanaṃ param

'''29.309''' evaṃ navavidhaṃ proktaṃ snapanaṃ bhogamokṣadam eṣāmekatamaṃ kuryādvibhavasyānurūpataḥ

'''29.310''' sakaleṣvapi sarveṣu snapanaṃ kārayedbudhaḥ uttamatrayavarjyaṃ tu yasya syātsnapanaṃ hare

'''29.311''' kriyate tatra taddevaṃ madhyakumbhe samarcayet sakalaṃ śaktiyuktaṃ cedvardhanyā saha vinyaset

'''29.312''' anyatsarvaṃ yathāpūrvaṃ vidhinā kārayetsudhīḥ nitye pravartamāne tu kāle prāptaṃ yadā bhavet

'''29.313''' snapanaṃ caiva tatkāle tasminnārabhya tatsudhīḥ nityātikramaṇaṃ tatra yathā na bhavati dhruvam

'''29.314''' tathā tatsnapanaṃ kāryamanyathā naiva kārayet nityāvasāne prāptaṃ ceddvārapūjādi pūrvavat

'''29.315''' snapanaṃ kārayedvidvān yathāśāstraviniścitam iti yaḥ kārayenmartyaḥ snapanaṃ vidhipūrvakam

'''29.316''' sarvayajñaphalaṃ prāpya śivena saha modate

===Kapitel 30===

''triṃśaḥ paṭalaḥ · viśeṣārcanavidhiḥ''

'''30.1''' viśeṣādarcanaṃ vakṣye tacchṛṇu tvaṃ janārdana akālamṛtyuśamanaṃ sarvavyādhivināśanam

'''30.2''' śokamohaharaṃ puṃsāmaśeṣādhivināśanam apasmāragrahādīnāṃ śamanaṃ sarvaśāntidam

'''30.3''' viṣaśatrupraśamanaṃ sarvavighnanivāraṇam parasenāstambhanaṃ ca svasenārakṣaṇaṃ tathā

'''30.4''' jayadaṃ puṣṭidaṃ loke durbhikṣabhayanāśanam avagrahaharaṃ caiva sarvasasyavivardhanam

'''30.5''' sūryādigrahadoṣāṇāṃ śamanaṃ kālavañcanam sarvapāpaharaṃ puṃsāṃ dhanadhānyavivardhanam

'''30.6''' aṣṭamyāṃ ca caturdaśyāṃ pakṣayoḥ parvaṇorapi saṃkrāntau grahaṇe cāpi rājñāṃ janmadine’pi ca

'''30.7''' rājajanmadine vāpi vipadi pratyare tathā karmānte ca tathārdrāyāmarkavāre ca kārayet

'''30.8''' śivaliṅge’thavārcāyāṃ kartavyaṃ tadvidhānataḥ arcāyāṃ yajane tasmālliṅgārcāyāṃ phalaṃ tu yat

'''30.9''' bhavecchataguṇaṃ tattu liṅgeṣvapi yathākramam mānuṣaṃ cārṣakaṃ divyaṃ gāṇapaṃ ca caturvidham

'''30.10''' svayaṃbhūtaṃ tathānyacca liṅgaṃ pañcamamucyate teṣu cādyātphalaṃ cāpi bhaveddaśaguṇottaram

'''30.11''' sarvayajñatapodānatīrthādiṣu ca yatphalam tatphalaṃ labhate martyaḥ sakṛlliṅgārcanena tu

'''30.12''' mānuṣasya tu liṅgasya phalametadudāhṛtam tasmātsarvaprayatnena śivaliṅgaṃ samarcayet

'''30.13''' liṅgārcanasamaṃ nāsti puṇyaṃ lokatraye hare yathā vyomnaḥ parasyāsya kvacidantaṃ na dṛśyate

'''30.14''' tathā liṅgārcanodbhūtapuṇyasyāntaṃ na vidyate bhogamokṣapradaṃ puṃsāmidameva hi kathyate

'''30.15''' śivasya paripūrṇasya liṅgārcanavidherbalāt devadevatvamāpannā brahmaviṣṇupurogamāḥ

'''30.16''' muktānāṃ puruṣāṇāṃ tu na hi saṃkhyā pradṛśyate sa ślāghyastu bhavenmartyaḥ sa kulīnaḥ sa buddhimān

'''30.17''' sa śūraḥ sa ca vikrānto yo liṅgaṃ sakṛdarcayet liṅge devo mahādevaḥ sākṣādeva pratiṣṭhitaḥ

'''30.18''' anugrahāya lokānāṃ tasmālliṅgaṃ samarcayet liṅgaṃ yatra bhavedrāṣṭre pūjāhīnaṃ cirāya vai

'''30.19''' tatra vyādhiśca dubhikṣamanāvṛṣṭiśca jāyate pravāsī pathi dṛṣṭvā tu puṣpahīnaṃ tu mastakam

'''30.20''' śivaliṅgasya gaccheccetsarvapāpanidhirbhavet tasmātpūjāvihīnaṃ tu liṅgaṃ dṛṣṭvā pathi sthitam

'''30.21''' snāpya puṣpaṃ ca patraṃ vā śivasyādhārya yo vrajet aśvamedhasahasrasya vājapeyaśatasya ca

'''30.22''' sa puṇyaṃ labhate martyo nātra kāryā vicāraṇā dūraṃ gatvā tu yo liṅgamanāthaṃ pūjayetsakṛt

'''30.23''' sarvayajñaphalaṃ tasya dadyālliṅge’rcite śivaḥ abhipretārthasiddhyarthaṃ viśeṣādarcanaṃ bhavet

'''30.24''' pūrvāhne śāntikaṃ tatsyānmadhyāhne puṣṭidaṃ bhavet sayāhne tu jayārthaṃ syādardhayāme tu sarvadam

'''30.25''' sādhakaḥ śāntacittastu kṛtanityaḥ śucistadā soṣṇīṣaḥ sottarīyaśca navavastreṇa veṣṭitaḥ

'''30.26''' pañcaśuddhiṃ purā kṛtvā pūrvavatpūjayecchivam snānodakaṃ tu nādeyaṃ navakumbheṣu pūritam

'''30.27''' ekarātroṣitaṃ śuddhaṃ vastrapūtaṃ suśītalam uśīreṇa samāyuktaṃ truṭicandanakoṣṭhajaiḥ

'''30.28''' cūrṇaiḥ karpūrasaṃyuktairlolitaṃ puṣpagandhitam snānārthamāharettatra pañcagavyakameva ca

'''30.29''' saṃvatsarātmanā pūrvamudakenābhiṣecayet pañcagavyābhiṣekaṃ tu pañcabrahma samuccaran

'''30.30''' pañcāmṛtaṃ sagandhodaṃ ṣaḍaṅgairabhiṣecayet kadalīpanasāmrāṇāṃ phalasārasamanvitam

'''30.31''' nālikeraphalodenāpyabhiṣekaṃ hṛdā bhavet tatastailena śuddhena karpūrāgarugandhinā

'''30.32''' liṅgamālipya sarvatra sapīṭhaṃ tu śivāstrataḥ māṣeṇa yavacūrṇena samudvartanameva ca

'''30.33''' śālipiṣṭena vā kuryādastramantraṃ samuccaran pañcabrahmoccaranpaścātkṣālayecchuddhavāriṇā

'''30.34''' tato gandhodakenāpi vatsareṇābhiṣecayet snapanaṃ cātra kurvīta sahasrādiṣu saṃbhavaiḥ

'''30.35''' nityoktamarcanaṃ kuryātpādyamācamanārghyakam candanāgarukāśmīraiḥ ślakṣṇapiṣṭaiḥ parārghakaiḥ

'''30.36''' karpūrakṣodamiśraistu śivaliṅgaṃ sapīṭhakam kramātparyāptamālipya sarvātmānaṃ samuccaran

'''30.37''' siddhārthakāṃstilānkṛṣṇānbilvapatrasamāyutān prāsādena tu mantreṇa nikṣipelliṅgamūrdhani

'''30.38''' campakotpalajātyādisatpuṣpaiśca samarcayet taireva mālyairācchādya liṅgaṃ mūlāttataḥ śanaiḥ

'''30.39''' mastakāntaṃ pavitraistu prādakṣiṇyakrameṇa tu veṣṭayitvā tu tanmūrdhni svarṇapuṣpaṃ tu vinyaset

'''30.40''' dhūpaṃ kṛṣṇāgarubhavaṃ karpūreṇa ca dāpayet dīpamālāṃ tataḥ pūrṇāṃ karpūrāgaruvartinā

'''30.41''' goghṛtena śivābhyāśe dāpayettau hṛdārpayet śuddhānnaṃ pāyasaṃ gaulaṃ mudgānnaṃ kṛsaraṃ tathā

'''30.42''' sarvopadaṃśasaṃyuktaṃ gulakhaṇḍājyasaṃyutam nivedayettu devāya phalaiḥ svādubhiranvitam

'''30.43''' īśānādiṣu vaktreṣu pañcasvapi yathā purā gulakhaṇḍayutāpūpaṃ dāpayettu tathā punaḥ

'''30.44''' tāmbūlaṃ dāpayetpaścātpañcasaugandhikānvitam mātuluṅgaphalaiścāpi nālikeraphalairapi

'''30.45''' dāpayetpañcavaktreṣu tattanmantreṇa mantravit nīrājanaṃ tataḥ kuryācchāstradṛṣṭena karmaṇā

'''30.46''' nānāsugandhakusumaiḥ kṛtvā mālāḥ suśobhanāḥ nānāvarṇasamāyuktāstābhirūrdhve manoramam

'''30.47''' liṅgasya maṇṭapaṃ kuryānmālālambanaśobhitam vīṇāveṇumṛdaṅgādyaiḥ śrāvyairvādyaviśeṣakaiḥ

'''30.48''' gītanṛttastutistotrairjayaśabdādimaṅgalaiḥ praṇāmairdaṇḍavadbhūmau devadevaṃ samarcayet

'''30.49''' tataścāgarudhūpena prāsādābhyantaraṃ sudhīḥ dhūpayitvātha saṃtāḍya ghaṇṭāmastreṇa mantravit

'''30.50''' pracchādanapaṭaṃ kṛtvā kavāṭāvatha bandhayet pradakṣiṇatrayaṃ kṛtvā natvā caiva punaḥ punaḥ

'''30.51''' prasīda devadeveti prārthayitvā samāpayet pūjā vaiśeṣikī caiṣā pavitrādyantayorapi

'''30.52''' vasante cāpi naivedye nave cāpi viśeṣataḥ kṛttikādīpakāle ca ghṛtakambalake tathā

'''30.53''' saṃprayojyā vidhijñaistu kevalotsavasaṃyutā dhvajabheryaṅkurairhīno balidānādivarjitaḥ

'''30.54''' ekāhaśca divārātraṃ bereṇeṣṭena vā na vā kevalotsava ityukto bhaktyā bhaktaiḥ prakalpitaḥ

'''30.55''' evaṃ yaḥ kurute martyaḥ sakṛdvā liṅgapūjanam trisaptakulasaṃyuktaḥ śivaloke mahīyate

'''30.56''' modate cākṣayaṃ kālamiti śāstrasya niścayaḥ

===Kapitel 31===

''ekatriṃśaḥ paṭalaḥ · kṣīrābhiṣekavidhiḥ''

'''31.1''' kṣīrābhiṣekaṃ vakṣyāmi vāṅchitārthapradaṃ śubham akālamṛtyumathanamāyurārogyavardhanam

'''31.2''' śrīkaraṃ jayadaṃ caiva sarvasasyavivṛddhidam avagrahaharaṃ liṅge vidhinā tatsamācaret

'''31.3''' sauvarṇānrājatānvāpi tāmrajānmṛṇmayāṃstu vā kalaśānpañca niṣpādya śivārdhaparipūritān

'''31.4''' nirdoṣān pariśuddhāṃśca sitasūtravicitritān sarvātmanaiva mantreṇa saṃkṣālya prokṣya tānsudhīḥ

'''31.5''' teṣu gavyaṃ payaḥ samyagāpūryaṃ praṇavena tu sitapuṣpāṇi kūrcaṃ ca kuśodaṃ tatra nikṣipet

'''31.6''' pidhāya ca pidhānena śivamantreṇa deśikaḥ śivāgre gomayālipte sthaṇḍilaṃ vrīhibhistatam

'''31.7''' vidhānātkalpayitvātha padmaṃ tatra prakalpayet caturdalasamāyuktaṃ karṇikāśobhitaṃ ca tat

'''31.8''' tadrekhāṃ pūrayitvātha taṇḍulaistu tilaistataḥ pṛthivyādīni tattvāni pradīpena samarcayet

'''31.9''' madhyādīni svanāmnaiva karṇikāyāṃ tato nyaset kalaśāṃstāramuccārya tadādyāṃścāpi deśikaḥ

'''31.10''' pūrvādi vinyasettena caturaḥ kalaśānapi madhyasthaṃ śuddhavastreṇa veṣṭayitvā samāhitaḥ

'''31.11''' teṣu hṛnmantramuccārya gandhapuṣpādinārcayet pradhānakalaśaṃ teṣu pañcamenābhimantrayet

'''31.12''' puruṣeṇendradiksaṃsthamaghoreṇa tu yāmyagam vāmenottaradiksaṃsthaṃ paścimaṃ sadyamantrataḥ

'''31.13''' evaṃ tānabhimantryātha dhenuṃ teṣu pradarśayet tatprācyāṃ diśi devāgre śāntihomaṃ samārabhet

'''31.14''' kuṇḍe vā caturaśre tu sthaṇḍile saikate’pi vā samidājyacarūṇāṃ tu pratyekaṃ tu śatāhutīḥ

'''31.15''' juhuyāttilasaṃmiśrataṇḍulaṃ ca tathā bhavet ājyāhutiśataṃ paścājjuhuyāddeśikottamaḥ

'''31.16''' samidho hṛdayenātha cājyaṃ tu śikhayā hunet aghoreṇa caruṃ caiva tilamastreṇa homayet

'''31.17''' sarvātmanā punaḥ sarpirevaṃ kṛtvā samāhitaḥ abhiṣekaṃ tu tatkāle taistairmantraiḥ samarpayet

'''31.18''' pratyekaṃ dhūpamutkṣipya toyasnānāntarāntaram śaṅkhabheryādinirghoṣaiḥ stotrādhyayanamaṅgalaiḥ

'''31.19''' nṛttagītasamāyuktamabhiṣekaṃ samācaret candanāgarukarpūrairliṅgamālipya sarvataḥ

'''31.20''' naivedyaṃ tu tato dadyāttāmbūlaṃ ca nivedayet navāhamuttamaṃ proktaṃ saptāhaṃ madhyamaṃ bhavet

'''31.21''' pañcāhamadhamaṃ caiva proktaṃ kṣīrābhiṣekataḥ deśikaṃ sādhakaṃ cāpi stotrādhyayanapāṭhakān

'''31.22''' toṣayeddhemavastrādyairyathāvibhavavistaram athavānyaprakāreṇa vakṣye kṣīrābhiṣecanam

'''31.23''' gāḥ śivāgre samānīya prokṣayitvā śivāmbhasā mārttike navapātre vā kāñcanādivinirmite

'''31.24''' kṣālite prokṣite’streṇa dohayitvātha satvaram dhāroṣṇena tatastena vatsareṇābhiṣecayet

'''31.25''' pūrvoktena prakāreṇa pañcabhiḥ kalaśaistu vā dadhyājyamapi saṃsthāpya pūrvavaddhomasaṃyutam

'''31.26''' tadvadevābhiṣicyaivaṃ sarvayajñaphalaṃ labhet gobhyaḥ pavitraṃ loke’sminna kiṃcidapi vidyate

'''31.27''' gavāmūdhasi gaṅgādyā vedayajñāḥ samantrakāḥ saṃsthitāḥ sarvadevāśca tāsāmaṅgāni saṃśritāḥ

'''31.28''' tasmādgodehajaiḥ ṣaḍbhirmūtrādyai rocanāntakaiḥ śivapriyairviśeṣeṇa śivapūjāṃ samācaret

'''31.29''' pañcagavyavidhānena pañcabhirvā pṛthakpṛthak pūrvāhne caiva madhyāhne liṅge kṛtvābhiṣecanam

'''31.30''' gorocanāmathābhyarcya candanakṣodamiśritām śivaliṅge tu yo bhaktyā sakṛdvāpi samarcayet

'''31.31''' so’nantaphalamāpnoti śaivaṃ dhāma gamiṣyati

'''31.32''' jalaṃ payo dadhyapi sarpiranyalliṅge sakṛdvā vidhinā prayuktam enāṃsi puṃsaḥ kramaśaḥ śatārdhaiḥ śatottaraṃ saṃharatīti viddhi

'''31.33''' yaḥ pañcagavyena sakṛtkaroti liṅge’bhiṣekaṃ śucirapramattaḥ sa saptajanmaprabhavaiśca pāpairvimucyate nātra hi saṃśayo’sti

'''31.34''' tasmācca godehabhavaiśca ṣaḍbhirbhaktyā ca yatnena śivaṃ sakṛdvā samarcayedyo vidhivanmanuṣyastasyāpi ca syātsaphalaṃ tu janma

'''31.35''' idaṃ sarveṣu kartavyaṃ sakṛdvā vidhivannaraiḥ aṣṭamyāṃ ca caturdaśyāṃ kṛṣṇe parvaṇi cādarāt

===Kapitel 32===

''dvātriṃśaḥ paṭalaḥ · liṅgapūraṇavidhiḥ''

'''32.1''' liṅgapūravidhiṃ vakṣye sarvakāmārthasādhanam yatra rāṣṭre tu vidhinā kriyate liṅgapūraṇam

'''32.2''' tatra mṛṣṭānnapānādīm̐llabhante satataṃ prajāḥ śālinīvāragodhūmayavādyannaṃ susaṃskṛtam

'''32.3''' navamṛtpātrasaṃsiddhaṃ dadhyājyābhyāṃ pariplutam saṃpādya tena kurvīta tathā vai taṇḍulairnavaiḥ

'''32.4''' tilaiḥ kṛṣṇaiśca siddhārthaiḥ kṣālitaiḥ śodhitaistataḥ gavyena navanītena sarvagandhamayena vā

'''32.5''' kṣodena pañcagandhaiśca puṣpairnānāvidhairapi phalaiḥ svādutaraiścāpi patrairbilvādibhistataḥ

'''32.6''' nityāvasāne cāpyahni sahasrādiṣu saṃbhavaiḥ kalaśairabhiṣicyeśaṃ kṛtvā pūjāṃ viśeṣataḥ

'''32.7''' mūrtihomaṃ diśāhomaṃ śāntihomamathāpi vā kārayitvā havirdattvā paramānnaṃ ghṛtaplutam

'''32.8''' prabhūtaṃ cātha tāmbūlaṃ mukhavāsasamanvitam dattvā devasya pārśve tu taddravyaiḥ pūraṇaṃ bhavet

'''32.9''' tāni pātreṣu saṃgṛhya prokṣayitvā śivāmbhasā puṇyāhaṃ vācayitvātha cālabhyāstreṇa mantravit

'''32.10''' sthalaśuddhiṃ tataḥ kṛtvābhyukṣya gandhodakena ca campakotpalajātyādinānā puṣpābhirāmayā

'''32.11''' mālayā veṣṭayelliṅgamabhitaḥ sarvataḥ samam veṣṭayitvā tathā pīṭhaṃ paścāddattvārghyamuttamam

'''32.12''' dattvā cācamanaṃ tatra tataḥ pūraṇamācaret pūrayedgarbhagehaṃ tu yathā liṅgaṃ na dṛśyate

'''32.13''' savedikaṃ tataścāpi mālābhiḥ pariveṣṭayet saṃvatsarātmakaṃ mantraṃ tataḥ sarvātmasaṃjñakam

'''32.14''' paṭhenmantraṃ tadā mantrī namaskṛtvā muhurmuhuḥ stotramaṅgalavādyaistu gītanṛttasamākulaiḥ

'''32.15''' śaṅkhabheryādinirghoṣaistatkāle’dhyayanaṃ bhavet kavāṭayogaṃ kṛtvātha kṛtvā caiva pradakṣiṇam

'''32.16''' patitvā daṇḍavadbhūmau nirgaccheddeśikottamaḥ aṣṭamyāṃ ca caturdaśyāṃ pañcadaśyāṃ sitetare

'''32.17''' ārdrāyāmarkavāre cāpyevaṃ kurvansakṛnnaraḥ sarvayajñatapodānatīrthavedeṣu yatphalam

'''32.18''' tatphalaṃ sakalaṃ labdhvā śivena saha modate phalapūrapradāne tu phalaṃ daśaguṇottaram

'''32.19''' bhaktyā vittānusāreṇa calaliṅge’thavācale tulyameva hi tatproktaṃ phalamāḍhyadaridrayoḥ

===Kapitel 33===

''trayastriṃśaḥ paṭalaḥ · ghṛtasnānavidhiḥ''

'''33.1''' ghṛtasnānamatho vakṣye sarvaśāntikaraṃ param iṣorjayostu pūrṇāyāṃ sahassāhasyayostathā

'''33.2''' ārdrāyāmarkavāre ca karturjanmadine’pi ca nūtanaṃ tu ghṛtaṃ gavyaṃ sarvadoṣavivarjitam

'''33.3''' mārgaśīrṣakamāse tu hyārdrāyāṃ ca viśeṣataḥ sahasraprasthamardhaṃ vā śataprasthamathāpi vā

'''33.4''' saṃgṛhya snāpayet kṛṣṇe caturdaśyāṃ tu deśikaḥ uttamaṃ madhyamaṃ cānyattrividhaṃ tatprakīrtitam

'''33.5''' sauvarṇādiṣu saṃsthāpya kalaśeṣu vidhānataḥ snapanaṃ tu tataḥ kuryātsthāpanaṃ cādhunocyate

'''33.6''' pūrvoktamaṇṭape samyaggomayenānulepite prāṅmukhairmanusūtraistu tathaivodaṅmukhairapi

'''33.7''' padāni śālipiṣṭāktasūtreṇa parikalpayet tālamātrapramāṇāni piṇḍitāni ca teṣvapi

'''33.8''' pañcaviṃśatpadaṃ madhye kuryādekapadaṃ tataḥ tadbāhye parito vīthīṃ mahādikṣu ca madhyame

'''33.9''' dvārārthamapi tatraiva padenaikena kalpayet koṇapārśve’tha vīthyagre dvārāṇi parikalpayet

'''33.10''' sthaṇḍilaṃ pūrvavatkṛtvā śālibhirvimalaistataḥ sarveṣāṃ madhyame randhrapade padmārthamatra tu

'''33.11''' saṃlupya sthaṇḍilaṃ kṛtvā karṇikākaisarairyutam caturdalasamāyuktamabjamālikhya śobhanam

'''33.12''' prokṣayitvā śivāstreṇa tataḥ sthāpanamārabhet śivayoḥ kalaśau dvau tu droṇadroṇārdhapūritau

'''33.13''' tathānye kalaśāḥ sarve daśaprasthena pūritāḥ nirdoṣāḥ susamā grāhyāḥ kṣālayettāṅśivāmbhasā

'''33.14''' sitasūtreṇa tānsarvānsamāveṣṭya samantataḥ prokṣayitvātha tānsarvāṅśivayoḥ kalaśau tataḥ

'''33.15''' pañcagavyena yuktena yathāvidhi janārdana āpūrya ca tato ratnaṃ kāñcanaṃ cāpi nikṣipet

'''33.16''' kūrcāvapi pidhāyaitau vastrayugmena veṣṭayet tataśca rudrakalaśāndaśaprasthājyapūritān

'''33.17''' sarvānapi samānīya prokṣayitvā śivāmbhasā sthāpayetkarṇikāmadhye śivakumbhaṃ ca vardhanīm

'''33.18''' tayorbāhye ca caturaḥ kalaśāṃstu daleṣu ca sthāpayecca tataḥ sarvānpūrvādyāvaraṇakramāt

'''33.19''' puṇyāhaṃ vācayitvātha prokṣya ghorāstramantrataḥ śivākhye pūrvavadyaṣṭvā śivaṃ devīṃ tathottare

'''33.20''' tayorbāhye yajedetān rudrānmantrī śateṣvapi śambhuṃ vibhuṃ gaṇādhyakṣaṃ triyakṣaṃ ca caturṣvapi

'''33.21''' pūrvādidalasaṃstheṣu rudrānkumbheṣu pūjayet dvitīyāvaraṇe cātha prāgādiṣu samarcayet

'''33.22''' devavandyaṃ ca saṃvāhaṃ vivāhaṃ ca nabholiham vicakṣaṇamanantaṃ ca pāvakaṃ dhīrameva ca

'''33.23''' pātālādhipatiṃ cāpi vṛṣaṃ vṛṣabhameva ca ugranāsaṃ ca śubhraṃ ca lohitaṃ sarvatomukham

'''33.24''' vidyādhipaṃ jñānabhujaṃ sarvajñaṃ vedapāragam mātṛvṛtaṃ piṅgalākṣaṃ bhūtapālaṃ balipriyam

'''33.25''' sarvavidyādhipaṃ cāpi pūjayetkramaśastathā tṛtīye cāpi dhātāraṃ sarvaduḥkhaharaṃ tathā

'''33.26''' śīghraṃ laghuṃ vāyuvegaṃ sūkṣmaṃ tīkṣṇaṃ kṣayāntakam pañcānanaṃ pañcaśikhaṃ kapardimeghavāhanau

'''33.27''' balaṃ cātibalaṃ caiva pāśahastaṃ mahābalam śvetaṃ ca śvetarūpaṃ ca śvetavāsaṃ jalāntakam

'''33.28''' vaḍavāmukhaṃ ca bhīmaṃ ca bhūtidaṃ bhūtibhūṣaṇam hantāraṃ krūradṛṣṭiṃ ca bhavamantakameva ca

'''33.29''' ūrdhvakeśaṃ virūpākṣaṃ dhūmraṃ lohitameva ca pūrvavatpūjayedetān prāgādiṣu yathākramam

'''33.30''' caturthāvaraṇe cāpi yamaṃ mṛtyuharaṃ tathā dhātāraṃ ca vidhātāraṃ kartāraṃ kālameva ca

'''33.31''' dharmamīśaṃ tathā khyātaṃ saṃyoktāraṃ yamapriyam agniṃ rudraṃ hutāśaṃ ca piṅgalaṃ khādakaṃ gurum

'''33.32''' jvalanaṃ dahanaṃ babhruṃ bhasmāntaṃ ca bhayāntakam kapālīśamajaṃ buddhaṃ vajradehaṃ purārdanam

'''33.33''' jaṭāmakuṭayuktaṃ ca nānāratnadharaṃ tathā nidhīśaṃ rūpavantaṃ ca dhanyaṃ saumyaṃ pramardanam

'''33.34''' suprasādaṃ prasādaṃ ca lakṣmīśaṃ bāndhavaṃ tathā kāmarūpaṃ sudaṃṣṭraṃ ca pūjayetkramaśaḥ punaḥ

'''33.35''' evaṃ saṃpūjya gandhādyaiḥ svanāmapadamantrakaiḥ snāpayeddevadeveśaṃ kalaśaistairyathākramam

'''33.36''' ājyaṃ sarvaṃ tadādāya bahiragnau vinikṣipet tadardhaiḥ snapanaṃ kuryātprasthaiḥ pañcaśatairapi

'''33.37''' madhyamaṃ tu samuddiṣṭaṃ tasya ca sthāpanakramaḥ pūrvavaddevapūjā ca viśeṣo’yaṃ pradṛśyate

'''33.38''' tatsaṃkhyāḥ kalaśāḥ sarve tadardhaparimāṇakāḥ śeṣaṃ sarvaṃ samaṃ viddhi kanyasaṃ yatprakīrtitam

'''33.39''' śataprasthairghṛtaistasya sthāpanaṃ cādhunocyate prāgagraiḥ kauśikaiḥ sūtrairudagagraistathaiva ca

'''33.40''' pañcaviṃśatpadaṃ kṛtvā paritaḥ ṣoḍaśaṃ vinā madhye navapadairekapadaṃ kṛtvā tataḥ sudhīḥ

'''33.41''' sthaṇḍilaṃ pūrvavatkṛtvā yathāvidhipuraḥsaram śivayoḥ kumbhayoryugmaṃ pañcagavyena pūrṇayoḥ

'''33.42''' ratnahemāḍhyayoścāpi kūrcayoḥ sāpidhānayoḥ vastraveṣṭitayoścāpi pūrvavadvinyasetsudhīḥ

'''33.43''' tato bāhye dalāgreṣu prāgādiṣu caturṣvapi pūrvapramāṇānkalaśāṃścaturo vinyasetsudhīḥ

'''33.44''' ṣoḍaśeṣvatha tadbāhye padeṣu ca tathāvidhān kalaśānṣoḍaśanyasya tataḥ pūjāṃ samārabhet

'''33.45''' śivau pūrvavadabhyarcya kumbhayostu caturṣvatha dharmādīnpūrvato’bhyarcya tato vidyeśvarānapi

'''33.46''' dikṣu saṃpūjayetpaścādvidikṣu ca bhavādikān evamabhyarcya devāṃstu tataḥ snapanamācaret

'''33.47''' trayāṇāmapi caiteṣāṃ śāntihomaṃ tu kārayet evameva vidhiḥ prokto madhunaścāpi keśava

'''33.48''' snāpayecca tato dhīmānghṛtasnānādanantaram kalaśairapi pūrvoktaiḥ sahasrādiṣu saṃbhavaiḥ

'''33.49''' tato māṣādicūrṇena sugandhāmalakena ca udvartya bahuśo liṅgaṃ śuddhaṃ kṛtvā sapīṭhakam

'''33.50''' sugandheneṣaduṣṇena vāriṇā cābhiṣicya ca tato haridrayā vāpi samālipyārdrayā śivam

'''33.51''' gandhodenābhiṣiñcecca śītalena samāhitaḥ uśīrabilvapatrādyairvighṛṣya bahuśaḥ sudhīḥ

'''33.52''' uṣṇāmbunā samantācca pīṭhaṃ ca kṣālayetsthalam evaṃ karmaṇi nirvṛtte nityavatpūjayecchivam

'''33.53''' candanāgarukarpūrakuṅkumai rocanāyutaiḥ liṅgaṃ paryāptamālipya dhūpadīpe gurustataḥ

'''33.54''' pāyasaṃ ca havirdattvā kṣamasveti samāpayet adhamaṃ vā ghṛtasnānaṃ yaḥ sakṛdvāpi kārayet

'''33.55''' kalpakoṭisahasraṃ tu śivaloke mahīyate ghṛtakambalakaṃ cāpi yaḥ śivāya nivedayet

'''33.56''' ghṛtasnānaphalaṃ tasya jāyate tadvidhiṃ śṛṇu sahassahasyamāse tu kṛṣṇapakṣe viśeṣataḥ

'''33.57''' caturdaśyāmamāvāsyāṃ ghṛtakambalamācaret navanītaṃ viśuddhaṃ tu gavyaṃ saṃgṛhya deśikaḥ

'''33.58''' samyaguttejayitvātha gandhayukte suśītale jvaladagnisamoṣṇaṃ tatprakṣipecca vicakṣaṇaḥ

'''33.59''' tasmādanye tataścāpi pātre toye suśītale punaḥ prakṣipya tasmācca punastadvattathāpare

'''33.60''' prakṣipya bahuśastatra nikṣipya ca ghṛtaṃ tathā kṛtvā kambalavattena liṅgamācchādya sarvataḥ

'''33.61''' nityavatpūjayitveśaṃ paramānnaṃ havistadā dattvā ca mukhavāsena tāmbūlamatha dāpayet

'''33.62''' evaṃ kṛtvā tato devaṃ natvā pūjāṃ samāpayet tataḥ saṃdhyantare prāpte visṛjya ghṛtakambalam

'''33.63''' prakṣipedagnimadhye tu bahirgartapradīpite tataḥ snāpya ca deveśaṃ sahasrādiṣu saṃbhavaiḥ

'''33.63a''' kalaśaistu havirdattvā prabhūtamukhavāsayuk tāmbūlaṃ ca tato dattvā kṣamasveti samāpayet

===Kapitel 34===

''catustriṃśaḥ paṭalaḥ · śītakumbhavidhiḥ''

'''34.1''' śītakumbhavidhiṃ vakṣye śṛṇu devārisūdana divyāntakṣibhaumānāmadbhutānāṃ viśānam

'''34.2''' jvaramārīpraśamanamanāvṛṣṭiharaṃ param yājñikaṃ vṛkṣamādāya tripādīṃ kārayetsudhīḥ

'''34.3''' liṅgasyopari tasyāḥ syāducchrayaṃ hastamātrakam dakṣiṇetarapṛṣṭheṣu pādāstasyāstrayaḥ smṛtāḥ

'''34.4''' dvādaśāṅgulakaṃ nāhaṃ pādeṣu parikīrtitam trikoṇaphalakā tatra gāyatryaṅgulasaṃmitā

'''34.5''' suṣiraṃ tālamātraṃ syādghanamakṣyaṅgulaṃ bhavet evaṃ saṃpādya tāṃ samyak kṣālayitvā śivāmbhasā

'''34.6''' tripādīṃ garbhagehaṃ tu vinyasedastramuccaran liṅgordhve phalakārandhraṃ yathā madhyasthitaṃ tathā

'''34.7''' tatpādaphalakāścāpi navavastreṇa veṣṭayet dvātriṃśatprasthasaṃpūrnau kumbhau bimbaphalaprabhau

'''34.8''' veṣṭayitvātha sūtreṇa tayorekasya pṛṣṭhataḥ kṛtvā chidraṃ sumadhyasthaṃ tatra nālaṃ praropayet

'''34.9''' tacca sauvarṇameva syād dhuttūrakusumopamam tasya dvyaṅgulakaṃ dairghyaṃ tasya vaktre ca vistaram

'''34.10''' tatpramāṇaṃ ca tanmūle govālāgramitaṃ bhavet sanālaṃ tu tataḥ kumbhaṃ prakṣālyāstraṃ samuccaran

'''34.11''' sarvātmajapapūrvaṃ tu tripādyūrdhve tu vinyaset kumbhamanyamathaiśānye sthaṇḍile śālinirmite

'''34.12''' ālikhyāṣṭadalaṃ padmaṃ karṇikākesarānvitam taṇḍulaiḥ satilairlājairavakīrya samantataḥ

'''34.13''' kuśaiśca saṃparistīrya vāmādyāstu dale yajet manonmanīṃ yajenmadhye tatra taṃ cāpi vinyaset

'''34.14''' gandhatoyena taṃ mantrī pūrayedbrahmapañcakaiḥ elālavaṅgakarpūracandanāgarukuṅkumaiḥ

'''34.15''' peṣitairlohitaṃ toyaṃ gandhapuṣpādhivāsitam punaśca vastrapūtaṃ tadgandhatoyamiti smṛtam

'''34.16''' kumbhāmbhasi kṣipeddhaimaṃ padmamapyakṣarānvitam kūrcaṃ prakṣipya tatraiva pidhānena pidhāya ca

'''34.17''' vastreṇa veṣṭya taṃ mantrī gandhapuṣpādinārcayet hṛnmantreṇa tato hastaṃ dakṣiṇaṃ tanmukhe sudhīḥ

'''34.18''' nyasya mantraṃ japet samyak saṃvatsaramayaṃ samam tato’pi pañcabrahmāṇi ceśānādi paṭhetsakṛt

'''34.19''' tatastatkumbhapūrvādicaturdikṣu ṛgādibhiḥ sārdhamadhyayanairdhīmān diśāhomaṃ tu kārayet

'''34.20''' śāntihomaṃ tu vā kuryādaiśe’stranavasaṃyutam tatkāle snapanaṃ cāpi sahasrādiṣu saṃbhavaiḥ

'''34.21''' vidhivatkalaśaiḥ kuryāddeśikaḥ śāstracintakaḥ pratikumbhe tato vāri samādāya suśītalam

'''34.22''' kumbhe devopari nyaste pūrayedvatsareṇa tu sarvātmamantrapūrvaṃ tu pidhānena pidhāya ca

'''34.23''' vastreṇa veṣṭayetpaścātpuṣpaṃ tasyordhvato nyaset puṇyāhapūrvakaṃ sarvakarma kuryādvicakṣaṇaḥ

'''34.24''' karma kṛtvā tu pūrvāhne madhyāhne tajjalaṃ kṣipet evaṃ pratidinaṃ kuryādyāvatsaptadināntakam

'''34.25''' havanaṃ snapanaṃ caiva jalasyāvartanaṃ tathā havirnivedayennityaṃ prabhūtaṃ sarvaśāntaye

'''34.26''' samāptau snapanaṃ pūjāṃ viśeṣeṇa prakalpayet devasya pūjakādīnāṃ dakṣiṇāṃ dāpayettadā

'''34.27''' māheśvarāṃstu viprendrānbhojayetsarvaśāntaye

===Kapitel 35===

''pañcatriṃśaḥ paṭalaḥ · aṅkurārpaṇavidhiḥ''

'''35.1''' athāṅkuravidhiṃ vakṣye śṛṇu devārisūdana śivayajñeṣu sarveṣu karṣaṇādiṣu deśikaiḥ

'''35.2''' maṅgalārthaṃ prayoktavyaṃ vidhinā maṅgalāṅkuram uttamaṃ madhyamaṃ cānyaditi traividhyasaṃyutam

'''35.3''' pālikā ghaṭikāścaiva śarāvāstrividhāḥ smṛtāḥ sauvarṇā rājatā vāpi tāmrajā mṛṇmayāstu vā

'''35.4''' bhaveyuraṅkurādhārāḥ sarvalakṣaṇalakṣitāḥ śivamuddiśya yatkarma yatra vai kriyate janaiḥ

'''35.5''' tasmātpūrve prayuñjīta navame saptame’pi vā pañcame vā tryahe vāpi kuryāttadbījavāpanam

'''35.6''' uktānāṃ divasānāṃ tu niśi pūrve prayojayet pratyekamaṣṭabhistvetaiḥ pālikādyairvaraṃ bhavet

'''35.7''' pālikābhirathāṣṭābhiścaturbhirghaṭikāhvayaiḥ śarāvaiścāpi tatsaṃkhyairmadhyamaṃ parikīrtitam

'''35.8''' catasraḥ pālikāścaiva catasro ghaṭikāstathā śarāvāśca tathaiva syuḥ kanyase cāṅkurārpaṇe

'''35.9''' sarveṣāṃ sthāpanaṃ teṣāṃ bhavedyāgagṛhe’thavā devāgre pārśvayoścāpi gomayenānulepite

'''35.10''' kuṭṭime sthaṇḍilaṃ kuryātsaptatālasuvistṛtam ṣaṭtālaṃ madhyamaṃ proktaṃ pañcatālaṃ tu kanyasam

'''35.11''' śālibhirvimalaistvatra dvātriṃśatprasthasaṃmitaiḥ prasthairvātha caturviṃśaiḥ ṣoḍaśairvāpi tatra ca

'''35.12''' padmamaṣṭadalaṃ kuryātkarṇikākesarānvitam karṇikāyāṃ yajetpūrvamādiśaktiṃ manonmanīm

'''35.13''' prāgādiṣu daleṣvatha vāmādyaḥ parito yajet karṇikāyāṃ nyasetkumbhaṃ kāñcanādyaistu nirmitam

'''35.14''' kṣālitaṃ śodhitaṃ caiva droṇapūrṇaṃ manoramam sitasūtravicitraṃ ca gandhodaparipūritam

'''35.15''' sakūrcaṃ sāpidhānaṃ ca sahemaṃ vastraveṣṭitam tatastaddalamūleṣu nyasedaṣṭa śarāvakān

'''35.16''' dalamadhye nyasettadvatkrameṇa ghaṭikāṣṭakam dalāgreṣu tataścāṣṭa pālikāḥ parito nyaset

'''35.17''' śuddhamṛttikayā pūrṇā gośakṛccūrṇayuktayā evaṃ śreṣṭhaprakāraṃ syānmadhyamaṃ tvadhunocyate

'''35.18''' pūrvavatpālikāḥ sthāpya dalamadhye tataḥ kramāt vinyasedghaṭikā dikṣu śarāvāṃśca vidikṣu vai

'''35.19''' evaṃ madhye kramaḥ proktaḥ kanyasaṃ tvadhunocyate pālikā digdalāgreṣu caturṣvapi ca vinyaset

'''35.20''' vidikṣu ghaṭikāstadvaddalamūle śarāvakān caturdikṣu nyasenmantrī paristīrya kuśāṃstataḥ

'''35.21''' puṇyāhaṃ vācayitvātha prokṣayeddhṛdayena tu somarājaṃ tataḥ kumbhe gandhādyairarcayetkramāt

'''35.22''' svanāmapadamantreṇa havirdadyāttato budhaḥ mudgamāṣakulatthaṃ ca tilasarṣapakau tathā

'''35.23''' niṣpāvaśālyapāmārgaṃ śimbo vrīhistathaiva ca āḍhakī ca tathā śyāmā godhūmayavavaiṇavam

'''35.24''' sarvairuttamametaistu daśabhirmadhyamaṃ bhavet pañcabhiḥ kanyasaṃ proktaṃ bījairmudgādibhiḥ kramāt

'''35.25''' prakṣālya payasā bījān prokṣayeddhṛdayena tu śaṅkhadundubhinirghoṣairgītanṛttasamākulam

'''35.26''' pañcabrahma samuccārya vāpayetpālikādiṣu somakumbhajalenaiva pālikādiṣu secayet

'''35.27''' dalāgrastheṣu sarveṣu lokapālānsamarcayet maruto dalamadhye tu dalamūle vasūnapi

'''35.28''' pūjayeduttame proktānmadhyame tu vasūnapi nyasya samarcayeccheṣānadhame cāpi taiḥ saha

'''35.29''' marutaścāpi varjyāḥ syurdalamūlasthiteṣvapi caturṣvapi ca dharmādīnprāgādikramato yajet

'''35.30''' evaṃ tadā samabhyarcya svastimaṅgalavācakaiḥ pidhāya ca pidhānaiśca suṣṭhu gupte nidhāpayet

'''35.31''' alābhe coktadeśasya śucau rakṣāsamanvite deśe’ṅkurārpaṇaṃ kuryādgomayenānulepite

'''35.32''' evamarcanamuddiṣṭaṃ yāvaduddhāraṇāntakam pratyahaṃ secanaṃ caiva kumbhe cāmbhaḥpraveśanam

'''35.33''' madhyāhne kārayeddhīmānaṅkurāṇi ca lakṣayet avakrāṇi ca śubhrāṇi sarvasaṃpatkarāṇi ca

'''35.34''' dhūmrāṇi cātha kubjāni śreyovighnakarāṇi ca evaṃ jñātvāśubhaṃ tatra śāntihomaṃ tu kārayet

===Kapitel 36===

''ṣaṭtriṃśaḥ paṭalaḥ · pratimālakṣaṇavidhiḥ''

'''36.1''' pratimālakṣaṇaṃ vakṣye śṛṇu tvaṃ hi janārdana yatra yā sthāpyate dhāmni pratimā tatra garbhataḥ

'''36.2''' dvārataḥ pādato vāpi mānāttāṃ parikalpayet tribhāge garbhavistāre dvibhāgenottamā bhavet

'''36.3''' śarabhāgayute garbhe guṇabhāgena madhyamā netrabhāgayute garbhe vyomabhāgena cādhamā

'''36.4''' nandabhāgayute garbhe vyomāṃśenādhamādhamā navabhiścottamaśreṣṭhā pratimeti nigadyate

'''36.5''' tayormadhyapramāṇānāṃ saptamaṃ saṃprayojayet garbhamānamiti proktaṃ dvāramānamataḥ śṛṇu

'''36.6''' śuddhadvāragataṃ mānaṃ kṛtvā tu vasubhāgikam ekabhāgaṃ parityajya śeṣairaṃśaistu saptabhiḥ

'''36.7''' yā bhavet kalpitocchrāyā kanyasā pratimā bhavet dvārotsedhe’tha nandāṃśe vyomāṃśaṃ teṣvapohya ca

'''36.8''' śeṣaistulyā tu madhyā syāduttamā tatsamā bhavet dvāramānamiti proktaṃ stambhamānamataḥ śṛṇu

'''36.9''' stambhotsedhasamottuṅgapratimā cottamā bhavet navāṃśahīnā madhyā syādadhamāṣṭāṃśahīnakā

'''36.10''' pādamānamiti proktaṃ hastamānamataḥ śṛṇu uttamā tithihastā syātpaṅkihastātha madhyamā

'''36.11''' śarahastādhamā proktā svatantre syādayaṃ vidhiḥ śivaliṅgaṃ samuddiśya pratimā yatra kalpyate

'''36.12''' pādādilakṣaṇaṃ tasyāstacchṛṇu tvaṃ janārdana liṅgasyottuṅgamāne tu vikārāṃśavibhājite

'''36.13''' tairaṃśairagnibhirbāṇairmunibhirnandakaiḥ kramāt rudraiścāpi bhavedvṛddhyā pramāṇānāṃ tu pañcakam

'''36.14''' berāṇāṃ tu samuddiṣṭametairaiva punaḥ kramāt liṅgamānātkṣayeṇāpi bhavetpañcapramāṇakam

'''36.15''' vṛddhyā pañca pramāṇāni kṣayātpañca tathaiva ca liṅgottuṅgasamaṃ caivamevamekādaśocchrayam

'''36.16''' pramāṇāni ca liṅgasya kathitāni vaśātpunaḥ vistāre kalpayeddhīmānnāhe cāpi prakalpayet

'''36.17''' tasmālliṅgavaśānmānaṃ trayastriṃśadudāhṛtam berotsedhe guṇāṃśe tu vyomāṃśamitamāsanam

'''36.18''' āsīnasya samuddiṣṭaṃ saṃsthitasya yugāṃśakam bhūtāṃśādvā sapadmaṃ tadāsanaṃ parikalpayet

'''36.19''' evaṃ mānaṃ samuddiṣṭaṃ pratimāpīṭhayoridam labdhaṃ bereṣu yanmānaṃ tālagaṇyaṃ tu tadbhavet

'''36.20''' aṅgulaṃ dehalabdhaṃ tu tattālaṃ dvādaśāṅgulam kalpitaṃ syātsuraśreṣṭha tairbereṣvaṅgakalpanā

'''36.21''' aṅgulaikādipādāntaṃ mānonmānādibhirbhavet daśatālaṃ navatālamaṣṭatālamataḥ param

'''36.22''' saptatālaṃ ca ṣaṭtālaṃ pañcatālamataḥ param catustālaṃ tritālaṃ ca tālamaṣṭavidhaṃ bhavet

'''36.23''' ravyaṅgulamidaṃ tālamiti śāstrasya niścayaḥ traividhyaṃ daśatālasya navatālasya caiva hi

'''36.24''' uttamaṃ madhyamāntaṃ ca teṣāṃ bhedo vidhīyate uttamaṃ daśatālaṃ tu caturviṃśacchatāṅgulam

'''36.25''' caturaṅgulahīnaṃ taddaśatālaṃ tu madhyamam tasmāccādhamamityuktaṃ hīnaṃ yaccaturaṅgulaiḥ

'''36.26''' navatālottamaṃ jñeyaṃ śataṃ sadvādaśāṅgulam hīnaṃ tasmācca madhyaṃ syādaṅgulānāṃ catuṣṭayāt

'''36.27''' tataśca pūrvavaddhīnaṃ navatālādhamaṃ bhavet daśatālottamājjñeyā brahmaviṣṇumaheśvarāḥ

'''36.28''' umā kātyāyanī lakṣmīścāmuṇḍā ca sarasvatī māheśī vaiṣṇavī brāhmī daśatālasya madhyamāt

'''36.29''' skandamindraṃ tathādityaṃ vīrabhadraṃ tathaiva ca kṣetrapālaṃ śacīṃ devīmuṣāṃ bhūmiṃ tathaiva ca

'''36.30''' vārāhīṃ ca tathendrāṇīṃ kaumārīṃ ca tathāśvinau daśatālādhame kuryād vahniṃ kinnarameva ca

'''36.31''' nirṛtiṃ yādasāṃ nāthaṃ vāyuṃ vaiśravaṇaṃ tathā īśānaṃ ca ṛṣīnsarvāṅśāstāraṃ madanaṃ tathā

'''36.32''' eteṣāmapi patnīśca tathaivāpsarasāṃ gaṇam mahāmoṭīṃ ca vidyeśāṃstārkṣyagandharvayakṣakān

'''36.33''' siddhacāraṇanāgendrānvidyādharagaṇānapi rudrānekādaśādityāndvādaśāṣṭa vasūnapi

'''36.34''' navatālottamenaiva kārayeddeśikottamaḥ rākṣasānasurāṃścaiva kinnarānapi kārayet

'''36.35''' navatālena madhyena navatālādhamena ca śeṣāndevagaṇān devīraṣṭatālena mānavāḥ

'''36.36''' piśācāḥ saptatālāḥ syuḥ ṣaṭtālāḥ kubjakāstathā pañcatālo gajāsyaḥ syāccatustālācca vāmanaḥ

'''36.37''' bhūtāḥ sarve tritālāḥ syurvṛṣendrasya tathaiva hi evaṃ tālakramaḥ prokto berāṇāṃ parikalpane

'''36.38''' tālajasyāṅgulasyāsya yavo’ṣṭāṃśa udāhṛtaḥ aṅgulaṃ mātramaṃśaśca śabdāḥ paryāyavācakāḥ

'''36.39''' dvyaṅgulaṃ kolakaṃ jñeyaṃ tryaṅgulaṃ tu kalā bhavet bhāgaṃ syāccaturaṅgulyaṃ yāvakaṃ taddvayaṃ bhavet

'''36.40''' bhāgaṃ yāvakasaṃyuktaṃ mukhametatprakīrtitam mukhaṃ tālamiti proktaṃ dvādaśāṅgulasaṃyutam

'''36.41''' mānaṃ pramāṇamunmānaṃ lambamānopamānake evaṃ pañcapramāṇena vyaktaliṅgaṃ tu kārayet

'''36.42''' mānaṃ syātpratimotsedhaṃ tadvistāraṃ tu yadbhavet tatpramāṇamiti jñeyamunmānaṃ tasya nāhakam

'''36.43''' lambamānaṃ tu sūtreṇa mitaṃ yattadudīritam taddvyantarapramāṇaṃ yadupamānaṃ taducyate

'''36.44''' mānaiḥ pañcabhiretaistu nyūnādhikavivarjitaiḥ nirmitā pratimā yā syātsā sarvābhīṣṭasiddhidā

'''36.45''' labdhe tu pratimotsedhe caturviṃśacchatāṅgule keśāntātpādaparyantamaṅgamānamataḥ śṛṇu

'''36.46''' uṣṇīṣamaṅgulaṃ jñeyaṃ keśāntaṃ syātkalāṅgulam trayodaśāṅgulaṃ sārdhaṃ mukhamānamiti smṛtam

'''36.47''' teṣu vedāṅgulaṃ sārdhaṃ keśāntādakṣisūtrakam nāsāpuṭāntaṃ tatsūtrāttatpramāṇamiti smṛtam

'''36.48''' puṭāntāddhanuparyantaṃ pūrvavatparikīrtitam tasyādho’rdhāṅgulenaiva galavṛddhiṃ prakalpayet

'''36.49''' kaṇṭhamānamiti jñeyaṃ tacca hikkāntamucyate tasmācca hṛdayāntaṃ tu sārdhatrayodaśāṅgulam

'''36.50''' tasmācca nābhiparyantaṃ mānaṃ tadvadudāhṛtam nābheśca meḍhraparyantaṃ trayodaśāṅgulamucyate

'''36.51''' jānvantaṃ ca tato meḍhrātsaptaviṃśāṅgulaṃ bhavet kolakadvitayaṃ jānu jaṅghā gulphāntamūruvat

'''36.52''' bhāgaṃ pādatalotsedhaṃ kāyamānamiti smṛtam dvādaśāṅgulatāreṇa mitaṃ kuryāttadānanam

'''36.53''' uṣṇīṣātpūrvakeśāntaṃ nandāṅgulamiti smṛtam uṣṇīṣātpṛṣṭhakeśāntaṃ ravyaṅgulamiti smṛtam

'''36.54''' uṣṇīṣātpārśvakeśāntaṃ pratyekaṃ tu daśāṅgulam karṇayorantaraṃ vaktre viṃśamātramiti smṛtam

'''36.55''' nāsāgrātkarṇaparyantaṃ pratyekaṃ dvādaśāṅgulam karṇayorantaraṃ pṛṣṭhe sārdhaṃ syād dvādaśāṅgulam

'''36.56''' kolakaṃ karṇatāraṃ syātkarṇadairghyaṃ ca kolakam karṇayorapare tāramaṅgulaṃ sārdhamucyate

'''36.57''' dviyavaṃ karṇapālī syāttatsamaṃ karṇapaṭṭikā mātrārdhaṃ karṇapaṭṭaṃ syādaṅgulaṃ karṇanālakam

'''36.58''' bhāgānnālāyataṃ caiva hyadhyardhāṅgulavistṛtam apāṅgātkarṇamūlāntaṃ saptamātramiti smṛtam

'''36.59''' bhrūsūtrena samaṃ tīrya karṇordhvaṃ tu prakalpayet dvimātraṃ dviyavādhikyaṃ netrāyāmaṃ vidhīyate

'''36.60''' ṣaḍyavaṃ netravistāramāyāmaṃ tu tridhā bhavet kṛṣṇamaṇḍalamekaṃ syānmadhye pārśvadvayaṃ sitam

'''36.61''' kṛṣṇamaṇḍalamadhye tu dṛṣṭiryūkapramāṇataḥ karavīraṃ yavaṃ raktaṃ nayanaṃ syāttu mūlake

'''36.62''' navatiḥ pakṣmaromāṇi netrayośca pṛthakpṛthak bhrūrekhā pakṣmarekhā ca kolakaṃ pādasaṃyutam

'''36.63''' bhrūrekhā cordhvakeśāntā tatsamā tu prakīrtitā ūrdhvavarmaviśālaṃ yatpañcabhiśca yavairmitam

'''36.64''' adhovarma yavaṃ vidyādbhrūdīrghaṃ syādrasāṅgulam tadvistāraṃ yavaṃ vidyāccāpākāraṃ prakalpayet

'''36.65''' netrayorantaraṃ cāpi dvimātraṃ parikīrtitam mūlanāsārdhamātrā syādagrā sayavamātrakā

'''36.66''' ardhamātrapramāṇena puṭayorantaraṃ bhavet tayoḥ pañcayavaṃ tuṅgaṃ suṣiraṃ triyavaṃ bhavet

'''36.67''' tadbāhye parito vidyādyavārdhaṃ ghanameva hi puṭāntaraṃ ca triyavaṃ gojimānaṃ caturyavam

'''36.68''' gojyāśca nāsikātuṅgaṃ kolakaṃ dviyavādhikam vaṃśasyeva tu vistāramaṅgulaṃ ceti kīrtitam

'''36.69''' puṣkaraṃ yavamātraṃ syātpurastāt ṣaḍyavaṃ tataḥ tilapuṣpasamākāraṃ nāsāgrapuṭayordvayoḥ

'''36.70''' puṭāntādadharoṣṭhāntaṃ kolakaṃ dviyavādhikam dviyavaṃ dantavistāramutsedhaṃ tatsamaṃ bhavet

'''36.71''' daṃṣṭrāyāmaṃ yavādhikyaṃ sadṛśaṃ mukulākṛteḥ ūrdhve dviraṣṭadantāstu tāvadevāpyadhaḥ sthitāḥ

'''36.72''' jihvāyāmaṃ tu ṣaṇmātraṃ vistāraṃ syāttadardhataḥ adharoṣṭhasya vistāramaṅgulaṃ syādyavādhikam

'''36.73''' adharoṣṭhaṃ raktavarṇaṃ tārātsaptayavaṃ bhavet tadāyāmaṃ dvimātraṃ syādāsyatāraṃ dvikolakam

'''36.74''' uttaroṣṭhasya tāraṃ ca triyavaṃ parikīrtitam hanuḥ syāddvyaṅgulāyāmamūrdhvanimnaṃ yavaṃ bhavet

'''36.75''' saptayavoccamadharāttrimātraṃ hanuvardhanam triyavaṃ connataṃ viddhi kalārdhaṃ cibunirgatiḥ

'''36.76''' pūrṇacandrākṛtiṃ vaktramuktalakṣaṇasaṃyutam kārayetsuprasannaṃ tu smeraramyamaninditam

'''36.77''' kṛkaṭīpṛṣṭhagrīvaṃ ca bhāgāyāmamiti smṛtam bhāgāyāmamadhastasya śūrpākāraṃ prakalpayet

'''36.78''' kakudaḥ kaṭisaṃdhyantaṃ triṃśadaṅgulamucyate tatsamaṃ kakṣayormadhyaṃ kaṭisaṃdhyaṃ ca pṛṣṭhataḥ

'''36.79''' kalābhiḥ saptabhiḥ proktaṃ vasumātrārdhasaṃmitam grīvāgravistaraṃ proktaṃ bhāgadvitayasaṃyutam

'''36.80''' tattārānmūlatāraṃ yattadbhavedaṅgulādhikam grīvā suvṛttā nirdiṣṭā rekhādvitayaveṣṭitā

'''36.81''' hikkāsūtrādadho bāhū saptaviṃśāṅgulāyatau prakoṣṭhau ca pṛthak syātāmekaviṃśāṅgulāyatau

'''36.82''' saptāṅgulau pāṇitalau madhyame’rdhāṃśahīnake tarjanyanāmike syātāṃ yavadvayavihīnake

'''36.83''' aṅguṣṭhaṃ ca caturmātraṃ kaniṣṭhā ca tathā bhavet hikkāsūtrāttu kakṣāntaṃ navamātrārdhamucyate

'''36.84''' hikkāsūtropari skandhau galapārśve dvikolakam kolakārdhaṃ tadardhaṃ ca madhyaparyantayorbhavet

'''36.85''' bāhumūlasya vistāraṃ navamātraṃ tu sārdhakam bāhumadhyagataṃ tāramaṣṭamātraṃ yavādhikam

'''36.86''' kūrparasya tu vistāraṃ munimātramiti smṛtam prakoṣṭhamūlagaṃ tāraṃ ṣaṇmātraṃ yavahīnakam

'''36.87''' koṣṭhamadhyamavistāraṃ pañcāṅgulaṃ yavādhikam maṇibandhasya vistāraṃ trimātraṃ ṣaḍyavādhikam

'''36.88''' talasya tiryaṅmānaṃ tu pāṇyorāyāmavadbhavet ekādaśayavaṃ tāramaṅguṣṭhasya prakīrtitam

'''36.89''' tarjanyā vistaraṃ tatra yavāṣṭakamudāhṛtam yavādhikaṃ tataścāpi madhyamāṃ parikalpayet

'''36.90''' tarjanīvadanāmā ca pañcabhistaiḥ kaniṣṭhikā saptārdhaṃ caturyavārdhaṃ ca pañcārdhaṃ caturardhakam

'''36.91''' triyavārdhaṃ ca vistāramaṅguṣṭhādinakhasya tu svavistārādyavādhikyaṃ nakhānāṃ dīrghamucyate

'''36.92''' aṅguṣṭhaṃ tu dviparvaṃ syāccheṣāḥ parvatrayānvitāḥ sarvāsāṃ mūlavistārādagramaṣṭāṃśahīnakam

'''36.93''' rekhātrayayutaṃ kuryāttalaṃ pāṇyorjanārdana kakṣayorantaraṃ cātha trayoviṃśāṅgulaṃ bhavet

'''36.94''' hikkāstanāntare tāramardhādhikatrayodaśam stanayorantaraṃ tadvat stanayormaṇḍale’pi ca

'''36.95''' dvidvyaṅgulaṃ bhavettāraṃ tanmadhye cāpi cūcukam yavadvitayavistāraṃ yavotsedhayutaṃ bhavet

'''36.96''' vakṣasaścāpi vistāraṃ sārdhamaṣṭādaśāṅgulam udarasya tu vistāraṃ tithyaṅgulaṃ tu sārdhakam

'''36.97''' nābhiḥ pradakṣiṇāvartastadvistāraṃ tu ṣaḍyavam nimnaṃ yavadvayaṃ vidyāttāraṃ śroṇīgataṃ tu yat

'''36.98''' taccāpyardhādhikaireva bhavetsaptadaśāṅgulaiḥ kaṭipradeśavistāraṃ navabhiśca  daśāṅgulam

'''36.99''' bhūtāṅgulaṃ yavādhikyaṃ meḍhrāyāmamihocyate muṣkaśca caturaṅgulyo vistārāyāmataḥ samaḥ

'''36.100''' kolakaṃ tu yavādhikyaṃ tanmeḍhrasya tu vistaram ūrumūlasya vistāraṃ trayodaśāṅgulaṃ bhavet

'''36.101''' adhastādūruvistāraṃ dvādaśāṅgulakaṃ bhavet janumadhyasya vistāraṃ navamātramudāhṛtam

'''36.102''' jaṅghāmūlasya vistāraṃ jānuvatparikīrtitam jaṅghāmadhyamavistāraṃ saptāṅgulaṃ yavādhikam

'''36.103''' nalakasya tu vistāraṃ vedāṅgulaṃ ca sārdhakam pañcāṅgulayavādhikyaṃ tāraṃ pādatalasya tu

'''36.104''' pādāṅguṣṭhāyataṃ caiva dvikolakamiti smṛtam tasmādyavādhikā proktā deśinī madhyamātha ca

'''36.105''' dvyardhamātrayutā proktā dairghyamevamudīritam trayodaśayavaṃ vidyādaṅguṣṭhasya tu vistaram

'''36.106''' anantarā nandayavā madhyā vasuyavā smṛtā tasmādardhavihīnānyā tasmādanyārdhahīnakā

'''36.107''' evamaṅgulivistāraṃ krameṇa parikīrtitam aṅguṣṭhādyaṅgulīnāṃ tu nakhavistāramucyate

'''36.108''' sārdhapañcayavaṃ paścāt sārdhaṃ cāpi caturyavam caturyavaṃ tataḥ sārdhaṃ triyavaṃ dviyavaṃ kramāt

'''36.109''' vistāreṇa samaṃ dairghyaṃ nakhānāṃ parikīrtitam vistāratriguṇaṃ nāhaṃ sarveṣu parikalpayet

'''36.110''' daśatālottamenaivaṃ pratimāṃ parikalpayet madhyamadaśatālena kartavyā yāstu devatāḥ

'''36.111''' tāsāṃ mānādi vakṣye’hamaṅgulaistattadudbhavaiḥ devamānavaśānmānaṃ devīnāṃ parikalpayet

'''36.112''' karṇāntaṃ karṇanālāntaṃ hanvanataṃ vāpi kārayet bāhvantaṃ vāpi devīnāṃ devamānātprakalpayet

'''36.113''' labdhotsedhena yanmānaṃ kuryādviṃśacchatāṅgulam uṣṇīṣātkeśaparyantaṃ vedāṅgulamiti smṛtam

'''36.114''' tasmānnetrāntamuddiṣṭaṃ pañcāṃśaṃ pādahīnakam tato nāsāpuṭāntaṃ syādardhahīnaśarāṅgulam

'''36.115''' nāsāpuṭācca hanvantaṃ śrutyaṃśaṃ pādahīnakam hanoḥ kaṇṭhācca bhāgaṃ syātkaṇṭhācca hṛdayāntataḥ

'''36.116''' trayodaśāṅgulaṃ jñeyaṃ tasmānnābhyantakaṃ tathā tasmācca yoniparyantaṃ tathaiva parikalpayet

'''36.117''' tasmācca jānuparyantaṃ ṣaḍviṃśāṅgulamucyate caturaṃśaṃ bhavejjānu jaṅghā coruvaducyate

'''36.118''' bhāgaṃ pādatalotsedhaṃ tasyāyāmamathocyate vikārāṃśaṃ tadāyāmaṃ bhāgamaṅguṣṭhadairghyakam

'''36.119''' tarjanī tatsamā jñeyā hīnārdhārdhāṅgulāḥ parāḥ ravinandayavairaṣṭasaptabhiḥ ṣaḍbhireva ca

'''36.120''' aṅguṣṭhādikaniṣṭhāntamaṅgulīnāṃ tu vistṛtam tattattārārdhamānena nakhavistāramucyate

'''36.121''' pādāgramadhyapārṣṇīnāṃ ṣaṭpañcacaturaṅgulam vistāraṃ gulphavistāraṃ bhūtāṅgulamiti smṛtam

'''36.122''' nalakāvistāraṃ cāpi vedāṅgulamiti smṛtam jaṅghāmadhyamavistāraṃ ṣaṇmātramiti kīrtitam

'''36.123''' jānu saptāṃśavistāraṃ mukhamūruviśālakam caturviṃśatimātraṃ tu kaṭivistāramucyate

'''36.124''' śroṇīlalāṭaṃ teṣveva ṣaṇmātramiti kīrtitam aśvatthapatravadyonirvistāraṃ caturaṅgulam

'''36.125''' śroṇīvistāramānaṃ tu viṃśadaṅgulamucyate nābhiḥ pradakṣiṇāvartā gambhīraṃ ṣaḍyavaṃ bhavet

'''36.126''' vistāraṃ ca tathaiva syānnābhideśasya vistaram ekādaśāṅgulaṃ jñeyaṃ tadūrdhve codarasya tu

'''36.127''' trayodaśāṅgulaṃ tāraṃ stanādhastātprakalpayet stanatāraṃ navāṅgulyaṃ cūcukaṃ tryaṅgulaṃ bhavet

'''36.128''' vistārārdhaṃ stanotsedhaṃ tasya pañcāṅgulārdhakam tadunnataṃ yavaṃ vidyātkakṣayorantaraṃ tataḥ

'''36.129''' bhavetsaptadaśāṅgulyaṃ bāhubhyāṃ ca tadūrdhvataḥ ekaviṃśāṅgulaṃ tāraṃ hikkāsūtraṃ tato bhavet

'''36.130''' bāhudīrghaṃ ca ṣaḍviṃśamaṅgulaṃ kūrparaṃ tataḥ netrāṅgulaṃ bhavetpaścādaṣṭādhikadaśāṅgulam

'''36.131''' prakoṣṭhaṃ tu talaṃ cāpi saptāṅgulamitīritam ṣaḍaṃśaṃ madhyamādairghyaṃ pañcāṃśā tarjanī bhavet

'''36.132''' tathaivānāmikādairghyaṃ kaniṣṭhā caturaṅgulā tathaivāṅguṣṭhadairghyaṃ syādvistāraṃ tadgataṃ punaḥ

'''36.133''' navasaptāṣṭasaptartuyavairaṅguṣṭhapūrvakam mūlādagre kṣayaṃ cāpi tattadaṣṭāṃśamucyate

'''36.134''' munivedaśarairvedarandhrairapi yavaiḥ kramāt aṅguṣṭhādinakhānāṃ tu tāramagniyavaṃ tataḥ

'''36.135''' kaniṣṭhāyāṃ tu kurvīta tattaddairghyaṃ yavādhikam kaniṣṭhānāmikāmadhyādeśinyaśca triparvakāḥ

'''36.136''' aṅguṣṭhaṃ tu dviparvaṃ syāttale tāraṃ ṣaḍaṅgulam maṇivandhasya vistāraṃ vahnyaṅgulamudīritam

'''36.137''' kūrparaṃ tu śarāṅgulyaṃ bāhumadhyaṃ ṣaḍaṅgulam saptāṅgulaṃ bhavedbāhumūlaṃ caiva krameṇa vai

'''36.138''' saptāṅgulaṃ bhavetkaṇṭhe vistāraṃ tu tato mukhe rudrāṅgulaṃ tu vistāramevaṃ tāraṃ prakīrtitam

'''36.139''' daśatālena madhyena strīmānamiti kīrtitam adhame daśatāle tu bhājite ṣoḍaśādhikaiḥ

'''36.140''' aṅgulānāṃ śataistaistairaṅgakalpanamucyate uṣṇīṣakaṇṭhajānūnāṃ talasyāpi samucchrayam

'''36.141''' caturaṅgulamuddiṣṭaṃ pratyekaṃ tu viśeṣataḥ sārdhaṃ ravyaṅgulaṃ vaktraṃ tadvadvakṣastathodaram

'''36.142''' tadvanmeḍhraṃ samuddiṣṭaṃ pañcaviṃśāṅgulaṃ tataḥ ūrumānaṃ tathā jaṅghā śeṣaṃ pūrvavadācaret

'''36.143''' kanyase daśatāle tu devānevaṃ prakalpayet navatālottamaṃ cāpi tālagaṇyamathocyate

'''36.144''' mūrdhni keśāntamānaṃ tu caturaṅgulamucyate keśāntādakṣisūtrāntaṃ tasmāccaiva puṭāntakam

'''36.145''' puṭāntāddhanuparyantaṃ pratyekaṃ caturaṅgulam ardhāṅgulaṃ gale vṛddhiḥ kaṇṭhaṃ sārdhaguṇāṅgulam

'''36.146''' kaṇṭhāddhṛddeśaparyantaṃ tasmānnābhyantameva ca nābhermeḍhrāntakaṃ cāpi pratyekaṃ dvādaśāṅgulam

'''36.147''' ūrū dvitālamānena jānū vedāṅgulau smṛtau jaṅghā dvitālamānena talau ca caturaṅgulau

'''36.148''' navatālottamaṃ proktaṃ gaṇyamānavaśāddhare vedāṅgulavihīnaṃ syānnavatālasya madhyamam

'''36.149''' navatālottamāttasmāddhrāsasthānamathocyate jaṅghāyāmaṅgulaṃ proktamūrāvaṅgulameva hi

'''36.150''' meḍhradeśe’ṅgulaṃ caiva vaktre cāpyaṅgulaṃ bhavet evaṃ madhyamatālaṃ syād adhame navatālake

'''36.151''' hikkānābhyantare hīnaṃ netrāṅgulamudīritam ūrāvekāṅgulaṃ tadvajjaṅghāyāmaṃ prakīrtitam

'''36.152''' navatālādhamaṃ proktamaṣṭatālamathocyate dvimātraṃ tu śiro jñeyaṃ mukhamekādaśāṅgulam

'''36.153''' kaṇṭhāyāmaṃ trimātraṃ syāt kaṇṭhāddhṛdayameva ca hṛddeśānnābhiparyantaṃ mukhāyāmavadiṣyate

'''36.154''' nābhestu meḍhraparyantaṃ paṅkyaṅgulamudīritam ekaviṃśāṅgulaṃ caivamūrvoścāpi prakalpayet

'''36.155''' jānu trimātramuddiṣṭaṃ jaṅghā coruvaducyate trimātraṃ syāttalotsedhamuktaṃ syādvasutālakam

'''36.156''' munitālamatho vakṣye tālagaṇyāṅgulena tu uṣṇīṣamaṅgulaṃ jñeyaṃ vaktraṃ rudrāṅgulaṃ bhavet

'''36.157''' kaṇṭhaṃ triyaṅgulaṃ jñeyaṃ kaṇṭhānnābhyantakaṃ tataḥ aṣṭādaśāṅgulaṃ sārdhaṃ nābhermeḍhramataḥ param

'''36.158''' sārdhaṃ vasvaṅgulaṃ jñeyamūruścaikonaviṃśakaḥ jānū triyaṅgulau jñeyau jaṅghā coruvadiṣyate

'''36.159''' tataḥ pādatalotsedhaṃ jānuvatparikalpayet saptatālamiti proktaṃ ṣaṭtālamadhunocyate

'''36.160''' uṣṇīṣamaṅgulaṃ jñeyaṃ vaktraṃ rudrāṅgulaṃ bhavet kaṇṭhaṃ ca tryaṅgulaṃ tatra kaṇṭhānmeḍhrāntameva ca

'''36.161''' ekonaviṃśadaṅgulyamūrumadhyāṅgulaṃ bhavet sārdhaṃ jānu trimātraṃ syājjaṅghā coruvadiṣyate

'''36.162''' jānuvatsyāttalotsedhaṃ ṣaṭtālamiti kīrtitam pañcatālamatho vakṣye tālagaṇyena bhājite

'''36.163''' uṣṇīṣamaṅgulaṃ jñeyaṃ mukhaṃ nandāṅgulaṃ bhavet grīvā tu dvyaṅgulocchreyā tasmānmeḍhrāntameva hi

'''36.164''' ekaviṃśāṅgulaṃ jñeyamūruḥ syāddvādaśāṅgulaḥ dvyaṅgulaṃ tu bhavejjānu jaṅghā rudrāṅgulaṃ bhavet

'''36.165''' dvyaṅgulaṃ tu talotsedhamuktaṃ syātpañcatālakam catustālamatho vakṣye tatra labdhāṅgulaiḥ kramāt

'''36.166''' aṅgulaṃ syāttaduṣṇīṣaṃ vaktramarkāṅgulaṃ bhavet kaṇṭhaṃ dvyaṅgulamānaṃ syāt kaṇṭhātsaptāṅgulaṃ tataḥ

'''36.167''' hṛdayāntaṃ samuddiṣṭaṃ hṛdayānnābhistathaiva ca tasmācca meḍhraparyantaṃ ṣaḍaṅgulamudīritam

'''36.168''' ūruḥ pañcāṅgulotsedho jānu syādaṅguladvayam jaṅghā vedāṅgulā jñeyā talotsedhaṃ tu jānuvat

'''36.169''' catustālamiti proktaṃ guṇatālamataḥ śṛṇu uṣṇīṣamaṅgulaṃ proktaṃ vaktramaṣṭāṅgulaṃ bhavet

'''36.170''' kaṇṭhaṃ netrāṅgulaṃ jñeyaṃ kaṇṭhānmeḍhrāntameva ca manvaṅgulaṃ tu vijñeyamūrurvedāṅgulo bhavet

'''36.171''' jānu ca dvyaṅgulaṃ jñeyaṃ jaṅghā ca tryaṅgulā smṛtā talaṃ jānuvaduddiṣṭamevamuktaṃ tritālakam

'''36.172''' evaṃ mānaṃ samuddiṣṭaṃ samāsāttālaniścitam pramāṇādanyamānāni yathāyuktyā prakalpayet

'''36.173''' sarveṣveteṣu tāleṣu taistālairuktakṣaṇaiḥ yāḥ kriyante surāṇāṃ tu pratimā devasattama

'''36.174''' tāsāṃ sāmānyataḥ proktaṃ sarvāsāṃ lakṣaṇaṃ mayā viśeṣalakṣaṇaṃ vakṣye tacchṛṇu tvaṃ janārdana

'''36.175''' pūrvaṃ liṅgodbhavaṃ rūpaṃ sukhāsīnaṃ dvitīyakam tṛtīyaṃ gaurisahitamunmattaṃ syāccaturthakam

'''36.176''' pañcamaṃ tu bhavedrūpaṃ kaṅkāladharameva ca nṛttarūpaṃ tu ṣaṣṭhaṃ syāttrimūrti saptamaṃ bhavet

'''36.177''' cakraprasādarūpaṃ syādaṣṭamaṃ navamaḥ tataḥ candraśekharamuddiṣṭaṃ devyardhaṃ daśamaṃ bhavet

'''36.178''' evaṃ māheśvaraṃ proktaṃ rūpāṇāṃ daśakaṃ mayā atha raudraṃ pravakṣyāmi rūpaṃ nānāvidhaṃ bhavet

'''36.179''' prathamaṃ dakṣiṇāmūrti dvitīyaṃ kāmanāśanam tṛtīyaṃ kālanāśaṃ syādvaivāhyaṃ syāttataḥ param skandomāsahitaṃ paścātpañcamaṃ parikīrtitam jalaṃdharavadhaṃ ṣaṣṭhaṃ haryardhaṃ saptamaṃ bhavet

'''36.180''' aṣṭamaṃ tu vṛṣārūḍhaṃ navamaṃ tripurāntakam viṣasaṃharaṇaṃ paścāddaśamaṃ parikīrtitam

'''36.181''' yadyadrūpaṃ bhavettattat sarvaṃ raudrāṃśameva hi trividhaṃ tatsamuddiṣṭaṃ sarvarūpaṃ janārdana

'''36.182''' acalaṃ ca calaṃ cāpi tritayaṃ syāccalācalam acalaṃ mṛṇmayaṃ proktaṃ śūlasthāpanapūrvakam

'''36.183''' calaṃ lohamayaṃ proktaṃ sikthakarmapuraḥsaram śilādārumayaṃ sarvaṃ calācalamiti smṛtam

'''36.184''' mṛṇmaye lohaje vāpi saṃskāro dārusikthayoḥ pūrvedyureva kartavyastadvidhānaṃ tathocyate

'''36.185''' asanakhadiracandanāḥ samārāḥ suratarusaptadalau ca rājavṛkṣaḥ vakulapanasaveṇuvṛkṣā daśa kathitāḥ pratimāsu śūlayogyāḥ

'''36.186''' jaṅghorudaṇḍau kaṭidaṇḍayuktau brahmākhyamanyaṃ pratimānurūpam vakṣobhavaṃ bāhubhavaṃ prakoṣṭhaṃ kṛtvoktavṛkṣairadhivāsayettān

'''36.187''' yatra yatpratimārūpaṃ prāsāde sthāpyate hare tasyāgre sthaṇḍilaṃ kṛtvā śālibhirvimalaistataḥ

'''36.188''' padmamaṣṭadalaṃ tatra karṇikākesarairyutam ālikhya tatra vinyasya śūlaṃ sikthamathāpi vā

'''36.189''' kṣālitaṃ śoṣitaṃ caiva sarvātmahṛdayena tu puṇyāhaṃ vācayitvātha tasyāgre homamācaret

'''36.190''' tadarthaṃ sthaṇḍilaṃ kṛtvā saikataṃ vidhivattataḥ agnimādhāya vidhivattatraiva juhuyātsudhīḥ

'''36.191''' samidājyacarūṇāṃ tu pratyekaṃ tu daśāhutiḥ tattadgāyatrimantreṇa samiddhomaṃ samācaret

'''36.192''' mūlenājyaṃ tato hutvā hṛdā vai homayeccarum dravyānte vyāhṛtiṃ hutvā pratidravyaṃ spṛśedguruḥ

'''36.193''' tattanmūlena mantreṇa pūrṇāṃ hutvā samāpayet evaṃ kṛtvādhivāsaṃ tu śūlamuddhṛtya deśikaḥ

'''36.194''' sumuhūrte sulagne tu sthāpanaṃ śilpinā bhavet sthāpanātparamevāntaḥ praviśya bhavanodaram

'''36.195''' garbhe kṛtvā navapadaṃ catvāriṃśatpadottaram teṣāṃ brahmapadaṃ madhye bhavedekaṃ tu bāhyake

'''36.196''' daivikādipadānyaṣṭau tadbāhye cāpi mānuṣam padaṣoḍaśakaṃ bāhye paiśācaṃ paritaḥ sthitam

'''36.197''' tatraiva mānuṣapade śūlasya sthāpanaṃ hṛdā ratnādīni ca vinyasya reṇūstatra ca lopayet

'''36.198''' nālikerabhavaiḥ kośakulaiḥ kṛtvā dṛḍhaṃ yathā rajjuṃ tenaiva tacchūlamāpādatalamastakam

'''36.199''' veṣṭayitvā mṛdā hyaṅgaṃ kuryātsaṃskṛtayā tataḥ tatsaṃskāraḥ puraivoktastataścārcāṃ śanaiḥ śanaiḥ

'''36.200''' kalpayet kalpavaryaistu sarvakarmasu kovidaiḥ tasya mṛtpratimāyāścāpyābhāsaṃ pratidāpayet

'''36.201''' lakṣaṇena samopetā sarvā karatalāṅguliḥ bere śilāmaye tatra varṇaśobhā vidhīyate

'''36.202''' tatraikaṃ kalaśaṃ sthāpyaṃ śeṣaṃ mṛṇmayavadbhavet pratimā lohajā yā syāt sthāpyāmarapade hi sā

'''36.203''' śailā yogyā tu sāmrājye sthāpyā divyapade’pi vā ratnalohaśilādyaistu vyaktaliṅgaprakalpane

'''36.204''' strīpuṃvibhāgastatraiva neṣṭastatraiva saṃkaraḥ avyaktobhayayoriṣṭau liṅgayorvastusaṃkarau

'''36.205''' lohe tu pratimārūpe kuryātsikthamayaṃ purā yaduktaḥ pratimābhedastadvidhānamathocyate

'''36.206''' liṅgamadhyasthitaṃ devaṃ trinetraṃ tu caturbhujam raktavarṇaṃ prasannāsyaṃ sarvābharaṇabhūṣitam

'''36.207''' taṭāmakuṭasaṃyuktaṃ dakṣiṇottarayoḥ kramāt candragaṅgāsamāyuktaṃ vyāladhuttūrasaṃyutam

'''36.208''' vāmadakṣiṇayoścāpi liṅgamadhye prakalpayet adhonapādyathā dṛśyaṃ maulirūrdhvaṃ tathaiva ca

'''36.209''' tattriyaṃśaṃ ca dṛśyaṃ syādagre mūle ca kārayet brahmāṇaṃ haṃsarūpaṃ tu viṣṇuṃ potrimukhaṃ tathā

'''36.210''' brahmaviṣṇū ca kartavyau kṛtāñjalipuṭau sthitau dakṣiṇetarayoścāpi liṅgasya vimalaṃ tataḥ

'''36.211''' sukhāsīnaṃ ca kartavyamāsanaṃ paṅkajāsanam kuñcitaṃ dakṣiṇaṃ pādaṃ vāmapādaṃ pralambitam

'''36.212''' caturbhujaṃ trinetraṃ ca sarvābharaṇabhūṣitam śeṣaṃ pūrvavaduddiṣṭaṃ tasya pārśve’tha vāmake

'''36.213''' karaṇḍamakuṭopetāṃ gaurīṃ kuryādidvabāhukām śyāmavarṇāṃ trinetrāṃ ca kiṃcitprasmitasaṃyutām

'''36.214''' kuñcitālambitau tasyāḥ pādau dakṣiṇavāmakau vāmahastatalaṃ pīṭhe nyasya kundaṃ tu dakṣiṇe

'''36.215''' kaṭakāmukhamābadhya karamekāsanasthitām āsīnaṃ prathamaṃ proktaṃ dvitīyamadhunocyate

'''36.216''' pūrvavatkalpitasyāṅke vāme gaurīṃ prakalpayet devasya vāmahastaṃ tu devyāśca makuṭe sthitam

'''36.217''' kṛtvā devasya cāpyaṅke devyāśca dakṣiṇaṃ karam devyāvṛttaṃ kārayeduktamāsīnaṃ ca dvitīyakam

'''36.218''' saṃsthitaṃ ca dvidhā kāryamāsīnoktaprakārataḥ aṅkāropaṇamadhyasyedekāsanagataṃ bhavet

'''36.219''' śeṣaṃ pūrvavaduddiṣṭam unmanastvadhunocyate rasaśvetaṃ prasannāsyaṃ kuñcitākīrṇamūrdhajam

'''36.220''' pādukopari vinyastapādayugmasaroruham tayorvāmetaraṃ kuryātkṣipyamāṇasupādukam

'''36.221''' susthitaṃ vāmapādena samabhaṅgasamanvitam dakṣiṇaṃ hariṇālīḍhamanyaḍḍamarukaṃ dadhat

'''36.222''' bhikṣāpātraṃ ca piṅchaṃ ca vāmabhāge vahatkare nāgamekhalasaṃyuktaṃ gaṇanāthena caiva hi

'''36.223''' gāyatā vahatā bhikṣāpātraṃ vāme tu dhāvinā evaṃ bhikṣāṭanaṃ proktaṃ kaṅkālamadhunocyate

'''36.224''' śvetavarṇaṃ prasannāsyaṃ jaṭāmakuṭasaṃyutam nāgakaṅkaṇasaṃyuktaṃ nāgamekhalasaṃyutam

'''36.225''' divyāmbaradharaṃ devaṃ pūrvavatpādukāṅghrikam dakṣiṇaṃ hariṇālīḍhaṃ vāme kaṅkālakaṃ tathā

'''36.226''' karābhyāmitarābhyāṃ ca ḍhakkāvādanatatparam vahatā śirasā bhikṣāpātramanyena gāyatā

'''36.227''' chatraṃ ca vahatānyena vṛṣamānayatāpi ca gaṇenānugataṃ devamanekena mahaujasā

'''36.228''' strīgaṇairanuyātaṃ ca bahubhiḥ kāmamohitaiḥ kaṅkālarūpamuddiṣṭaṃ nṛttarūpamathocyate

'''36.229''' śvetavarṇaṃ prasannāsyaṃ dvipacarmakṛtāmbaram kiṅkiṇīkṛtanāgendraṃ bakapicchadharaṃ tathā

'''36.230''' viprakīrṇajaṭābhāramapasmāropari sthitam dakṣiṇena tu pādena kuñcitenetareṇa tu

'''36.231''' bānvantamuddhṛtenāpi pāṇyantaṃ lambitena ca virājantaṃ caturhastamabhayaṃ dakṣiṇe dadhat

'''36.232''' dundubhiṃ cānyabhāge tu vahnimekena cāparam prasāritakaraṃ tiryaggītanṛttaṃ janārdana

'''36.233''' bhujaṅgatrāsamityuktaṃ vāme gaurīsamanvitam ekāsanasthayā vāpi saṃdhyānṛttamathocyate

'''36.234''' dakṣiṇaṃ susthitaṃ pādaṃ vāmapādaṃ tu kuñcitam dakṣiṇe’bhayaṭaṅkau ca pāśanāgau ca vāmake

'''36.235''' dadhaccaturbhirhastaiśca jaṭāmakuṭasaṃyutam idamanyannṛttarūpaṃ tṛtīyamadhunocyate

'''36.236''' vāmaṃ tu kuñcitaṃ kiñcidapasmāropari sthitam anyapādaṃ śirodeśe cordhve daṇḍavaduddhṛtam

'''36.237''' viṃśaddhastasamopetaṃ śūlādyāyudhasaṃyutam vīṇādivādyasaṃyuktaṃ daṇḍapādamiti smṛtam

'''36.238''' nṛttarūpaṃ tridhā bhinnaṃ bhavedevaṃ janārdana mūrtirūpamidaṃ vakṣye raktavarṇaṃ trinetrakam

'''36.239''' varadābhayahastaṃ ca kṛṣṇāparaśusaṃyutam jaṭāmakuṭasaṃyuktamekapādaṃ susaṃsthitam

'''36.240''' dakṣiṇetarayoścāpi pārśvayorubhayorapi kaṭipradeśe cordhve tu brahmaviṣṇvardhakāyayuk

'''36.241''' strīmānavattayormānaṃ brahmaviṣṇvostu kalpayet kṛtāñjalipuṭāvetau sarvalakṣaṇalakṣitau

'''36.242''' athavā tau pṛthaksaṃsthau sarvāvayavasaṃyutau devasya pārśvayoḥ kuryādetadviṣṭaramāsthitau

'''36.243''' mūrtirūpamidaṃ proktaṃ cakradānamathocyate gaurīsamanvitaṃ devaṃ kṛtvā tasyaiva dakṣiṇe

'''36.244''' viṣṇurūpaṃ ca kṛtvātha kṛtāñjalipuṭaṃ sthitam tasya haste dadaccakraṃ rūpaṃ taccakradaṃ bhavet

'''36.245''' cakraprasādamuddiṣṭaṃ candraśekharamucyate trinetraṃ caturbhujaṃ caiva jaṭāmakuṭasaṃyutam

'''36.246''' candrāvayavalakṣmāṇaṃ gaurīyuktamṛju sthitam kṛṣṇāparaśusaṃyuktaṃ varadābhayahastakam

'''36.247''' candraśekharamuddiṣṭaṃ devyardhamadhunocyate dakṣiṇetarayo rūpaṃ śivayoḥ parikalpayet

'''36.248''' dakṣiṇe tu dvihastaṃ syādvāme caikakareṇa tu abhayaṃ paraśuṃ dakṣe vāme syātkaṭakāmukham

'''36.249''' kiṃcidbhaṅgasamāyuktaṃ lalāṭe cārdhanetrayuk karaṇḍamakuṭopetaṃ devīdeveśayorbhavet

'''36.250''' dakṣiṇe raktavarṇaṃ tu vāme śyāmanibhaṃ bhavet bhūṣaṇai rucirairyuktamubhayorapi pārśvayoḥ

'''36.251''' urodeśe ca devyaṃśe ghanastanasusaṃyutam pṛṣṭhe vṛṣendrasaṃyuktaṃ vṛṣahīnamathāpi vā

'''36.252''' evaṃ devyardhamuddiṣṭaṃ dakṣiṇāmūrtirucyate trinetraṃ caturbhujaṃ caiva kiñcitkuñcitamūrdhajam

'''36.253''' vāmorūparivinyastadakṣiṇāṅghriṃ sitadyutim lambitaṃ vāmapādaṃ syāddakṣiṇetarayorapi

'''36.254''' saṃdaṃśamakṣamālāṃ ca varadaṃ cānalaṃ tathā dadhatkarāgrairmunibhirnānāgotraiḥ susaṃyutam

'''36.255''' dakṣiṇāmūrtirūpaṃ tu procyate’nyajjanārdana lambitaṃ dakṣiṇaṃ pādaṃ vāmapādaṃ prakuñcitam

'''36.256''' tasya jānūparinyastavāmahastaprakoṣṭhakam śeṣaṃ pūrvavaduddiṣṭaṃ kāmāreridameva hi

'''36.257''' rūpamagre sthitaṃ kāmaṃ dahannetrotthavahninā kāmārirūpamuddiṣṭaṃ kālanāśanamucyate

'''36.258''' trinetraṃ caturbhujaṃ caiva jaṭāmakuṭasaṃyutam dakṣiṇe śūlaṭaṅkau ca sūcyāsyaṃ pāśameva ca

'''36.259''' vāme vahatpuraḥ kālaṃ pātayacca padena tu devyā ca sahitaṃ raudraṃ sarvalakṣaṇalakṣyayā

'''36.260''' kālanāśanarūpaṃ syād vaivāhyamadhunocyate trinetraṃ caturbhujaṃ raktaṃ jaṭāmakuṭamaṇḍitam

'''36.261''' kṛṣṇāparaśusaṃyuktaṃ varadaṃ vāmapārśvake dakṣiṇenādyahastena dakṣiṇasthāmumāṃ vadhūm

'''36.262''' śyāmavarṇāṃ dvinetrāṃ ca karaṇḍamakuṭānvitām kaṭakāmukhahastāṃ tu vāmato dakṣiṇe kare

'''36.263''' gṛhītvā kramamāṇaṃ ca kṛtvā tasyaiva vāmataḥ śaṅkhacakradharaṃ rūpaṃ kuryādviṣṇoścaturbhujam

'''36.264''' lājapātrakaraṃ vāpi bhṛṅgārakarameva vā brahmāṇamagrato devaṃ caturvaktraṃ caturbhujam

'''36.265''' akṣamālāṃ sruvaṃ pārśve dakṣiṇe tu tathottare kamaṇḍaluṃ jalaṃ caiva vahantaṃ devavāmake

'''36.266''' āsīnaṃ hemavarṇābhaṃ prasannaṃ kārayettataḥ lakṣmīmumānugāṃ kuryāttāṃ pṛṣṭhe śliṣya saṃsthitām

'''36.267''' agre havirbhujaṃ cāpi jvālārūpaṃ prakalpayet ekāsanagatānsarvānevamevaṃ prakalpayet

'''36.268''' evaṃ vaivāhyarūpaṃ syāt skandomāsahitaṃ śṛṇu umārudrātmake rūpe sukhāsīne prakalpayet

'''36.269''' kṛṣṇāparaśuhastaṃ ca varadābhayadaṃ tathā kuñcitālambite pāde vāmadakṣiṇayoḥ kramāt

'''36.270''' devyā rūpaṃ ca kartavyaṃ dakṣiṇe kaṭakāmukham vāmaṃ pīṭhopari nyastaṃ hastayoḥ parikalpayet

'''36.271''' pādayorlambitaṃ vāmaṃ dakṣiṇaṃ syātprakuñcitam tayormadhye guhaṃ kuryāddevotsedhāṣṭabhāgike

'''36.272''' ekabhāgaṃ tadutsedhaṃ sārdhenaikena vā bhavet dvinetraṃ caturbhujaṃ raktaṃ bālarūpamaninditam

'''36.273''' skandomāsahitaṃ proktaṃ jalaṃdharavadhaṃ śṛṇu vikīrṇamūrdhvajaṃ śāntaṃ dakṣiṇetarayoḥ kramāt

'''36.274''' analamakṣasūtraṃ ca vahantamapareṇa tu dakṣiṇena tu tarjanyā darśayantaṃ jalaṃdharam

'''36.275''' vāmajānuni vāmaṃ ca bāhuṃ nyasyotkuṭāsanam paryaṅkabandhasaṃyuktaṃ somaṃ somavibhūṣaṇam

'''36.276''' agre jalaṃdharaṃ kruddhaṃ cakreṇa vinipātitam kuryāddaivamidaṃ rūpaṃ haryardhamadhunocyate

'''36.277''' dakṣiṇetarayoścāpi rudranārāyaṇātmakam raktaṃ kṛṣṇaṃ tathā rūpamekaśaṅkhavahaṃ tathā

'''36.278''' abhayaṃ varadaṃ caiva lalāṭe cordhvalocanam dakṣiṇe mūrdhniṃ candraṃ ca vāmorasi ca kaustubham

'''36.279''' haryardhamiti nirdiṣṭaṃ vṛṣārūḍhamihocyate caturbhujaṃ trinetraṃ ca jaṭāmakuṭasaṃyutam

'''36.280''' kṛṣṇāparaśusaṃyuktaṃ varadābhayapāṇinam somaṃ vṛṣāśritaṃ cāpi kuryādvai vṛṣavāhanam

'''36.281''' athavā dvibhujaṃ kuryājjaṭāmakuṭasaṃyutam kūrparaṃ dakṣiṇaṃ caiva vṛṣamūrdhni niveśitam

'''36.282''' anyaṃ kaṭyāśritaṃ hastaṃ pādayordakṣiṇāṅghrikam vāmāṅghrerupari nyastaṃ kiṃcidbhaṅgasamanvitam

'''36.283''' vṛṣavāhaṃ dvidhā proktaṃ tripurāntakamucyate jaṭāmakuṭasaṃyuktaṃ kṛṣṇāparaśusaṃyutam

'''36.284''' dhanurbāṇasamāyuktaṃ kiṃcidbhaṅgasamanvitam pārvatyā ca samopetaṃ dvibhujaṃ vā prakalpayet

'''36.285''' vāmadakṣiṇayoścāpi śaraṃ cāpadharaṃ dadhat rathasya nābhyāṃ kurvīta saguhaṃ savināyakam

'''36.286''' tripuraghnaṃ samuddiṣṭaṃ viṣasaṃharaṇaṃ śṛṇu pārvatyā sahitaṃ caiva sukhāsīnaṃ varāsane

'''36.287''' kṛṣṇāparaśusaṃyuktamabhayaṃ ca dadhatkaraiḥ dakṣiṇe garalaṃ cānye sarvadevanamaskṛtam

'''36.288''' kuryādrūpamidaṃ saumyaṃ viṣasaṃharaṇātmakam māheśvaraṃ tathā raudraṃ rūpāṇāṃ viṃśakaṃ kramāt

'''36.289''' proktamevamayo vakṣye rūpaṃ vai vaiṣṇavādikam kirīṭamakutopetaṃ śyāmavarṇaṃ dvinetrakam

'''36.290''' śaṅkhacakradharaṃ caiva śrīvatsāṅkitavakṣasam daṇḍābhayadharaṃ devaṃ pītāmbarasamanvitam

'''36.291''' śrībhūmisahitaṃ caiva sukhāsīnaṃ sthitaṃ tu vā śayānaṃ vāpi tadrūpaṃ kalpayetkalpavittamaḥ

'''36.292''' nṛsiṃharūpaṃ vā kuryācchaṅkhacakradharaṃ tathā kukkuṭāsanamāsīnamāttaparyaṅkabandhanam

'''36.293''' jānudvayoparinyastakūrparadvayamujjvalam susitaṃ sagaṇaṃ caiva kārayetpīṭhalocanam

'''36.294''' brāhmaṃ caturbhujaṃ rūpaṃ jaṭāmakuṭasaṃyutam caturvaktraṃ prasannāsyaṃ sarvābharaṇabhūṣitam

'''36.295''' baddhaṇḍātakaṃ caiva prodbhinnanavayauvanam pīnonnatakucaṃ cāru viśālajaghanasthalam

'''36.296''' śūlaṃ pāśaṃ patākaṃ ca kaṭakāmukhameva ca dakṣiṇetarayoścaiva hastayoḥ parikalpayet

'''36.297''' āsīnaṃ saṃsthitaṃ cāpi paṅkajāsanamadhyame athavānyaprakāreṇa tadīyaṃ rūpamucyate

'''36.298''' ekavaktraṃ prasannāsyaṃ karaṇḍamakuṭānvitam dvinetraṃ dvibhujaṃ caiva śyāmapītanibhaṃ tathā

'''36.299''' tadīyaṃ dakṣiṇaṃ hastaṃ kaṭakāmukhamucyate vāmapāṇitalaṃ cāpi kārayedviṣṭarāśritam

'''36.300''' kuñcitaṃ vāmapādaṃ tu dakṣiṇaṃ syādvilambitam atha vāmoruvinyastamasya vāmakaraṃ sthitam

'''36.301''' pūrvavaddakṣiṇaṃ hastaṃ sarvābharaṇabhūṣitam evaṃ śaktidvirūpaṃ syād vaināyakamataḥ śṛṇu

'''36.302''' trinetraṃ gajavaktraṃ ca karaṇḍamakuṭānvitam ṭaṅkapāśadharaṃ cāpi dantalaḍḍukadhāri ca

'''36.303''' ekadantaṃ pralamboṣṭhaṃ nāgayajñopavītadhṛk raktāmbaraṃ raktanibhamāsīnaṃ saṃsthitaṃ tu vā

'''36.304''' nṛttaṃ vāpi prakartavyaṃ skandarūpamataḥ śṛṇu ṣaṇmukhaṃ dvādaśakaraṃ dvādaśākṣaṃ tathaiva ca

'''36.305''' mayūravāhanaṃ caiva dakṣiṇe tvabhayaṃ tathā śaraṃ khaḍgaṃ ca śaktiṃ ca vajraṃ daṇḍaṃ vahatkaraiḥ

'''36.306''' itaraiḥ varacāpau ca carma pāśaṃ tathāṅkuśam triśūlaṃ ca vahaddhastairathavāpi caturbhujam

'''36.307''' varadābhayahastaṃ ca vajraśaktidharaṃ tathā ekavaktraṃ prasannāsyaṃ raktavarṇaṃ trinetrakam

'''36.308''' āsīnaṃ saṃsthitaṃ vāpi karaṇḍamakuṭānvitam dvibhujaṃ vāpi kartavyaṃ muṇḍaṃ daṇḍadharaṃ tathā

'''36.309''' vāmahastaṃ tu tasyaiva vāmakaṭyāśritaṃ bhavet skandarūpaṃ tridhā proktaṃ saurarūpaṃ sanātanam

'''36.310''' prabhāmaṇḍalasaṃyuktaṃ dvinetraṃ ca dvibāhukam raktarūpadharaṃ raktavāsasā ca samanvitam

'''36.311''' padmoṣari sthitaṃ padmahastamārjavasaṃsthitam daurgaṃ rūpaṃ trinetraṃ ca karaṇḍamakuṭānvitam

'''36.312''' aṣṭahastaṃ tathā śyāmaṃ pīnonnatapayodharam dakṣiṇe’bhayavajraṃ ca khaḍgacakraṃ vahatkaraiḥ

'''36.313''' śārikāśaṅkhacarmāṇi dhanuścāpi tathetaraiḥ māhiṣe śirasi nyastacaraṇāruṇapaṅkajam

'''36.314''' baddhacaṇḍātakaṃ caiva kiṃcidbhaṅgasamanvitam evaṃ daurgaṃ samuddiṣṭaṃ kṣetreśasya trilocanam

'''36.315''' nagnamaṣṭabhujaṃ caiva kiṅkiṇīmālayā yutam unmukhaṃ pātakaṃ caiva dadhanmūrdhni bhayaṃkaram

'''36.316''' daṃṣṭrākarālavadanamūrdhvakeśaṃ ghanadyuti dakṣiṇe śūlakhaḍgaṃ ca pāśaṃ ḍamarukaṃ vahat

'''36.317''' vāme kapālamastraṃ tu ghaṇṭāṃ cāpaṃ ca kārmukam ṛjvāyataṃ sthitaṃ rūpaṃ nū pureṇa samanvitam

'''36.318''' caturbhujaṃ vā kurvīta śūlaṃ ḍamarukaṃ vahat dakṣiṇe’nye kapālaṃ ca pāśaṃ cāpi surārcitam

'''36.319''' caṇḍeśasyātha rūpaṃ tu caturhastaṃ trinetrakam vikīrṇamūrdhajaṃ śūlaṃ pāśaṃ cāpi vahatkaraiḥ

'''36.320''' kṛtāñjalipuṭaṃ kuryādāsīnaṃ saṃsthitaṃ tu vā athavā dvibhujaṃ kuryāddvinetraṃ ca kṛtāñjalim

'''36.321''' kūrpare kṛtaṭaṅkaṃ vā sthitamāsīnameva vā athavā dakṣiṇe haste gṛhītvā ṭaṅkamudyatam

'''36.322''' vāmajānūparinyastavāmahastaṃ varāsane āsīnaṃ caṇḍarūpaṃ tu kuryādvāpi yathecchayā

'''36.323''' caṇḍarūpamiti proktaṃ moṭyā rūpaṃ dvilocanam bimbāṃśukaṃ prasannāsyaṃ lambitāṅghridvayaṃ bhavet

'''36.324''' dakṣiṇe kaṭakāhastaṃ vāmamapyāsanāśritam jyeṣṭhārūpaṃ tathā kāryaṃ dakṣiṇetarapārśvayoḥ

'''36.325''' puṃstrīrūpakamanyatsyātpuṃrūpaṃ vṛṣavaktradhṛk kākadhvajasamopetamatha śāstuḥ suyauvanam

'''36.326''' śyāmavarṇaṃ dvinetraṃ ca dvibāhuṃ kīrṇamūrdhajam dakṣiṇe daṇḍabhṛddhaste vāmahastaṃ pralambitam

'''36.327''' āsīnaṃ saṃsthitaṃ vāpi kārayedatha dikpatīn indraṃ śyāmaṃ yamaṃ kṛṣṇaṃ varuṇaṃ sphaṭikaprabham

'''36.328''' hemavarṇaṃ kuberaṃ ca raktaṃ dhūmraṃ ca kṛṣṇakam śvetaṃ ca kramaśo vahniṃ nirṛtiṃ vāyumīśakam

'''36.329''' dvinetrā dvibhujāḥ sarve nijāyudhasamanvitāḥ indraḥ kirīṭasaṃyukto vahnirūrdhvajvalacchikhaḥ

'''36.330''' jaṭāmakuṭasaṃyukta īśānaḥ syāttrilocanaḥ karaṇḍamakuṭopetā anye sarve prakīrtitāḥ

'''36.331''' evaṃ dikpālarūpaṃ syād mātṛrūpamataḥ śṛṇu brāhmī brahmavaduddiṣṭā māheśī ca maheśavat

'''36.332''' kaumārī guhavajjñeyā vaiṣṇavī viṣṇurūpiṇī vārāhī potrivaktrā syādindrāṇī cendravadbhavet

'''36.333''' sarvāḥ prasannavadanāḥ pīnonnatapayodharāḥ cāmuṇḍā tu prakartavyā trinetrā ca caturbhujā

'''36.334''' baddhacaṇḍātakā caiva bhrukuṭīkuṭilānanā stanadvayoparikrāntaphaṇīndraphaṇabhīṣaṇā

'''36.335''' ghaṇṭānū purasaṃyuktā vikīrṇordhvaśiroruhā puṃmuṇḍaṃ phaṇirājaṃ ca lalāṭordhve tu bibhratī

'''36.336''' triśūlaṃ padapārśve tu dakṣiṇe ca tathottare kapālapāśasaṃyuktaṃ dadhatī bhīmavikramā

'''36.337''' aṣṭahastāpi vā sā syācchūlakhaḍgau ca dundubhim kṣurikāṃ dadhatī savyaiḥ karairanyaiḥ kapālayuk

'''36.338''' ghaṇṭāṃ ca sarpapāśaṃ ca sarvalokabhayaṃkarī vīrabhadro gaṇeśaśca kīrṇakuñcitamūrdhajaḥ

'''36.339''' caturbhujastrinetraśca kṛṣṇāparaśusaṃyutaḥ sukhāsīnastu kartavyo vīrāsanayutastu vā

'''36.340''' mātarastu sukhāsīnāḥ sarvāstāḥ parikīrtitāḥ tāsāṃ tu kuñcitaṃ pādaṃ vāmaṃ savyaṃ tu lambitam

'''36.341''' sagaṇānāṃ tu mātṝṇāṃ rūpamevamudāhṛtam trinetrāścaturbhujāḥ sarve rudrāḥ paraśunā mṛgam

'''36.342''' sāravantaśca kartavyā jaṭāmakuṭasaṃyutāḥ ādityāśca prakartavyāḥ sarve mārtāṇḍarūpiṇaḥ

'''36.343''' dvibhujā vasavaḥ sarve khaḍgacarmadharāstathā karaṇḍamakuṭopetā netradvayasamanvitāḥ

'''36.344''' trinetrāścaturbhujāścaiva varadābhayapāṇayaḥ śūlākṣamālāhastāśca vidyeśāśca prakīrtitāḥ

'''36.345''' bhavādidevatāścāṣṭau trinetrāśca caturbhujāḥ śūlapāśadharāḥ sarve varadābhayapāṇayaḥ

'''36.346''' dvāre nandimahākālau dvibhujau ca catuṣkarau kartavyau daṇḍahastau ca pratyālīḍhena saṃsthitau

'''36.347''' daṃṣṭrākarālavadanau bhrukuṭīkuṭilānanau tarjayantau dviṣaḥ kruddhau trinetrau lokabhītidau

'''36.348''' śailādistu prakartavyastrinetraśca caturbhujaḥ jaṭāmakuṭasaṃyuktaḥ śūlābhayakarānvitaḥ

'''36.349''' vāme daṇḍākṣamālābhyāmalaṃkṛtakarastathā daṃṣṭrākarālavadano harivaktro’thavā bhavet

'''36.350''' śrīrūpaṃ tu prakartavyaṃ paṅkajāsanasaṃsthitam karaṇḍamakuṭopetaṃ padmodbhāsikaradvayam

'''36.351''' pītavarṇaṃ viśālākṣaṃ pīnonnatapayodharam sārasvatamato rūpaṃ caturhastaṃ trilocanam

'''36.352''' vyākhyānamakṣamālāṃ ca pustakaṃ ca kamaṇḍalum dakṣiṇetarayoścāpi dadhacchvetābjamadhyagam

'''36.353''' susthitaṃ dvibhujaṃ cāpi dvinetraṃ tatprakalpayet yajñopavītasaṃyuktaṃ kumbhayoniṃ ca kārayet

'''36.354''' jaṭāmakuṭasaṃyuktaṃ lambaśmaśrudvibāhukam saṃdaṃśakuṇḍikāhastaṃ bṛhatkukṣiṃ ca vāmanam

'''36.355''' vīṇāhastaṃ ca kurvīta nāradaṃ munisattamam aṣṭādaśagaṇāṃścaiva dvibhujāṃśca dvinetrakān

'''36.356''' sarveṣāṃ makuṭaṃ kuryād dvādaśāṅgulamāyatam bhṛṅgīśaṃ tu trihastaṃ ca tripādaṃ ca trilocanam

'''36.357''' tvagasthiśeṣadehaṃ ca nṛtyantaṃ saṃprakalpayet anyāngaṇeśvarāṃścāpi vāmanāñjaṭilānbahūn

'''36.358''' bhīṣaṇānsuprasannāṃśca hrasvagrīvānmahodarān mahākāyānmahānāsānmahākarṇāṃstathāparān

'''36.359''' siṃhāsyāndvipavaktrāṃśca nānāvarṇākṛtīṃstathā kārayetpratimārūpaṃ sarvaṃ syādupavītadhṛt

'''36.360''' śivākhye paraśuṃ kuryādaṅgavyaktiṃ tu sarvataḥ purobhāgagatāmeva parabhāge tu varjitām

'''36.361''' ye sārūpyaṃ narāḥ prāptāste proktā rudrakiṃkarāḥ teṣāṃ tu rūpaṃ kartavyaṃ madīyaṃ cihnamāśritam

'''36.362''' ye bhaktāstu narā loke viśiṣṭaguṇasaṃyutāḥ teṣāṃ rūpaṃ prakartavyaṃ nṛtyadvāyacca vā punaḥ

'''36.363''' praṇamadvā yathākāmaṃ loke’sminsurapuṅgava vṛṣasya lakṣaṇaṃ cāpi samāsācchṛṇu sāṃpratam

'''36.364''' dvāramānena vā kuryāddvārotsedhanavāṃśake ekāṃśenādhamādyantaṃ sarvaiścāpyuttamottamam

'''36.365''' madhye sapta pramāṇāni kalpayetkalpavittamaḥ dvārātpādādhikaṃ mānamardhādhikamathāpi vā

'''36.366''' pādonadviguṇaṃ vātha dviguṇaṃ vā prakalpayet lāṅgūlamūlāttanmānaṃ mastakāntaṃ prakalpayet

'''36.367''' tiraścāṃ tiryaṅmānaṃ syādaśvādīnāṃ ca kalpayet khurādi mūrdhaparyantamucchrāyaṃ ca tathā bhavet

'''36.368''' dvyaṅgulaṃ locanaṃ proktaṃ vistāraṃ tu tadardhakam tadardhādudayaṃ kāryaṃ mukhaṃ syātṣoḍaśāṅgulam

'''36.369''' pādahīnā tu nāsā syācchṛṅgayoścaturaṅgulam mūlaṃ syācca tayormadhyamaṣṭāṅgulamudīritam

'''36.370''' śṛṅgocchrayo dvinetraṃ syādakṣikarṇāntaraṃ tathā tryaṅgulaṃ tu khuraṃ tasya jaṅghāsya tu śarāstathā

'''36.371''' kapālacakramānaṃ syādadhoruḥ ṣaṭkalā bhavet tasyātha purajāṅghorumabhi mānaṃ tathaiva ca

'''36.372''' vālaṃ syādaṅghrimūlāntaṃ tadvistāraṃ yugāṅgulam ekāṅgulapravistāraṃ tasyāgre tu prakalpayet

'''36.373''' tanmūlaṃ netravistāraṃ śeṣaṃ yuktyā prakalpayet lohe sthitaṃ śayānaṃ vā vṛṣendraṃ parikalpayet

'''36.374''' śailaṃ ca mārtikaṃ rūpaṃ śayānaṃ parikalpayet gale ghaṇṭāsamāyuktaṃ sakuśaṃ vā prakalpayet

'''36.375''' vṛṣasya lakṣaṇaṃ proktamāyādividhirucyate āyo vyayastathā yonirnakṣatraṃ vāramaṃśakaḥ

'''36.376''' ṣaḍete kalpanīyāstu sarvavastuṣu deśikaiḥ āyo dravyāyatiḥ prokto vyayo dravyavyayo bhavet

'''36.377''' yonirdhvajaśca dhūmaśca siṃhakukkurakāstathā vṛṣabhaḥ kharanāgau ca kākaścātha prakīrtitaḥ

'''36.378''' aśvinyādi ca nakṣatraṃ vāraḥ sūryādirucyate aṃśako’yaṃ bhaveccoro bhuktiśaktidhanaṃ nṛpaḥ

'''36.379''' klībo’bhayaṃ vipaccānte ṛddhirityabhidhīyate trividhaṃ yattu liṅgaṃ tu meyaṃ mānāṅgulena tu

'''36.380''' śibikārathakhaṭvādi sarvaṃ tālena mīyate prāptādamaṇṭapādīni hastamānena caiva hi

'''36.381''' gṛhītavastuno māne tvaṅgulyādivibhājite vardhite vasubhistasmin gṛhītamiṣṭamāyatam

'''36.382''' navabhirvardhite tasmin hṛte digbhirvyayaṃ bhavet guṇena vardhite bhūyo vasubhirvihṛte sati

'''36.383''' yoniḥ śiṣṭa iti prokto vasubhirvardhite punaḥ bhagaṇena hṛte tasmiṅśiṣṭamaśvādibhaṃ bhavet

'''36.384''' navabhirguṇite cātha munibhirvihṛte sati śiṣṭaṃ vāramiti proktaṃ bhūyo vedaiśca vardhite

'''36.385''' navabhirvihṛte śiṣṭamaṃśakaṃ taskarādikam āyādhikaṃ bhavedgrāhyamagrāhyaṃ syādvyayādhikam

'''36.386''' yoniṣu dhvajasiṃhebhavṛṣāḥ proktāḥ śubhāvahāḥ nakṣatreṣvatha caitāṃstu vipatpratyaranaidhanān

'''36.387''' tathā candrāṣṭamarkṣaṃ ca vaināśikamataḥ param nṛpagrāmādi nakṣatrādvarjayettānprayatnataḥ

'''36.388''' vāreṣu guruśukrajñacandrāḥ śubhakarāḥ smṛtāḥ aṃśakeṣvatha bhuktiśca nṛpaśaktidhanaṃ tathā

'''36.389''' abhayaṃ ca tathā ṛddhiḥ ṣaḍete śobhanāḥ smṛtāḥ ardhottaraṃ śubhaṃ grāhyamagrāhyamaśubhottaram

'''36.390''' evaṃ parīkṣya liṅgādīnkalpayetkalpavittamaḥ

<poem>
ityājitākhye mahātantre kriyāpāde pratimālakṣaṇavidhiḥ ṣaṭtriṃśaḥ
paṭalaḥ
</poem>

===Kapitel 37===

''saptatriṃśaḥ paṭalaḥ''

'''37.1''' lakṣaṇaṃ maṇṭapānāṃ tu vakṣye tacchṛṇu sāṃpratam hastatritayamārabhya karairojoyutaiḥ kramāt

'''37.2''' bhavanti maṇṭapāstvekatriṃśaddhastamitāstu te ekonatriṃśatsaṃkhyātāsteṣāṃ lakṣaṇamucyate

'''37.3''' caturaśrāḥ samāḥ sarve maṇṭapāḥ parikīrtitāḥ stambhotsedhamatho vakṣye hastena pramitaṃ kramāt

'''37.4''' sārdhadvihastamārabhya tritryaṅgulavivardhanāt navahastāntakaṃ yāvattāvatstambhāḥ pramāṇataḥ

'''37.5''' trayaḥpañcāśadityuktā maṇṭapānāṃ viśeṣataḥ stambhotsedhe tu vasvaṃśe nandāṃśe vā daśāṃśake

'''37.6''' vyomāṃśaṃ tasya viṣkambhaṃ maṇṭapeṣu prakalpayet bhittipādagataṃ tāraṃ tadardhaṃ vā tripādataḥ

'''37.8''' stambhānāmākṛtiḥ proktā pūrvaṃ prāsādalakṣaṇe stambhāyāmamiti proktaṃ paṅkimānamatha śṛṇu sapādahastamārabhya ṣaṭṣaḍaṅgulavardhanāt śarahastāntamuktāni paṅkimānāni ṣoḍaśa

'''37.10''' athavā stambhamānena kartavyaṃ paṅkivistṛtam paṅkipādasamāyogaṃ yathāyuktyā prakalpayet ekapaṅkyā catuṣpādaḥ śrīkarākhyaśca maṇṭapaḥ paṅkitrayādvikārāṅghriḥ śrībhadra iti kīrtitaḥ

'''37.11''' āyāmaṃ tu bhaveddhīna svasvastambhacatuṣṭayāt śrīviśāla iti proktaḥ pañcapaṅkiyutastataḥ

'''37.12''' ṣaṭtriṃśatpādasaṃyuktaḥ pūrvavallabdhapādakaḥ tadbahiścārkapādaistu saṃyuktastadbahiḥ punaḥ

'''37.13''' viṃśatpādaparītaśca śrībhoga iti kīrtitaḥ saptapaṅkisamāyuktaścatuṣṣaṣṭyaṅghrisaṃyutaḥ

'''37.14''' pūrvavaddhīnapādaśca śrīkūṭa iti kīrtitaḥ navapaṅkisamāyuktaḥ śatapādasamanvitaḥ

'''37.15''' pūrvavatklṛptapādaśca tadbāhye’rkapadānvitaḥ catvāriṃśatpadairbāhye sāṣṭabhiśca visarjitaḥ

'''37.16''' tadbāhye’tha ca ṣaṭtriṃśadgātrairyuktaḥ samantataḥ athavā madhyame tyaktvā vedapādāṃstu tadbahiḥ

'''37.17''' ravipādayuto bāhye hīnaviṃśatpado’pi yaḥ sarvatomukha ityukto maṇṭapo’yaṃ janārdana

'''37.18''' mukhāyāmamatho vakṣye maṇṭapānāṃ kramoditam vistāradviguṇāyāmo yāvadbhavati maṇṭapaḥ

'''37.19''' paṅkyāvṛtistu tāvatsyādvṛddhirekaikadhā kramāt mukhāyāme padānāṃ tu lopaṃ yupatyā prakalpayet

'''37.20''' stambhaviṣkambhamānasya triguṇaṃ bhittivistaram sārdhaṃ ca dviguṇaṃ vāpi sārdhatriguṇameva vā

'''37.21''' bhittistambhasya niṣkrāntiścaturaśrasya tattateḥ caturbhāgaikabhāgaṃ syādvṛttatāre’rdhato bhavet

'''37.22''' maṇṭapasyābhito vāraṃ paṅkyā vā saṃprakalpayet vārapādocchrayaṃ mūlapādārdhaṃ saṃprakalpayet

'''37.23''' tripādato vā kurvīta stambhākāraṃ tu mūlavat maṇṭapasya caturdikṣu nirgamaṃ saṃprakalpayet

'''37.24''' athavā triṣu deśeṣu dvayorvaikatra vā bhavet ekapaṅkiviniṣkrāntamāyāmena tripaṅkim

'''37.25''' athavā tadbhavettatra vistārāyāmataḥ samam hastihastadvayopetaṃ sopānaṃ tatra kalpayet

'''37.26''' pārśvayoragrato vāpi tejaḥsaṃkhyāsamāyutam sopānaṃ nirgamādbāhye kartavyaṃ vā salakṣaṇam

'''37.27''' maṇṭapānāṃ tu sarveṣāmadhiṣṭhānamathocyate pādotsedhārdhamānaṃ tatpañcāṃśaṃ dvyaṃśakaṃ tu vā

'''37.28''' tattattryaṃśaikabhāgaṃ vāpyadhiṣṭhānocchrayaṃ bhavet sopapīṭhaṃ tu vā kuryātkevalaṃ vopapīṭhakam

'''37.29''' sapādabodhikāṃ kuryāttasyā lakṣaṇamucyate pādamūlasamaṃ tasyā vistāraṃ parikīrtitam

'''37.30''' pañcadaṇḍaṃ caturdaṇḍaṃ tridaṇḍaṃ vāpi dairghyakam vistārārdhaṃ samāṃśaṃ vā bhavettasyāḥ samucchrayam

'''37.31''' bodhikālakṣaṇaṃ proktamatha prastaramucyate pādārdhaṃ tattribhāgaṃ vā prastarasyocchrayaṃ bhavet

'''37.32''' prastarasyāṃśaklṛptiṃ ca pūrvavatparikalpayet evaṃ prastaramānaṃ syādantarmānaṃ tataḥ śṛṇu

'''37.33''' uttarotsedhamuddiṣṭaṃ daṇḍaṃ vā pādahīnakam daṇḍārdhaṃ vātha kartavyaṃ tatturyāṃśaṃ tu vājanam

'''37.34''' vājanāddviguṇaṃ vātha triguṇaṃ vā caturguṇam tulāvistāramuddiṣṭaṃ tulyaṃ tadghanamucyate

'''37.35''' pādahīnaṃ ghanaṃ proktamardhahīnamathāpi vā tasmādardhatripādaṃ vā jayantyāstāramucyate

'''37.36''' tadardhamanumārgaṃ syāttadūrdhve ceṣṭakādibhiḥ chādayitvā tadūrdhve tu chatrākāraṃ ghanaṃ tataḥ

'''37.37''' devāgre maṇṭapaṃ sarvaṃ sāntarālaṃ prakalpayet ekadvitricatuḥ paṅkimāneṣvapi ca kārayet

'''37.38''' maṇṭapena samaṃ tāraṃ paṅkihīnamathāpi vā dvitridaṇḍādhikaṃ vāpi caturdaṇḍādhikaṃ tu vā

'''37.39''' antarālasya mānaṃ syātpraveśaṃ vā dvidaṇḍakam devāgre maṇṭapaṃ sarvaṃ masūreṇāṅghribhistathā

'''37.40''' prastareṇa ca tulyaṃ tu prāsādena prakalpayet anyatra maṇṭapānāṃ tu catasṛṣvapi ceṣyate

'''37.41''' mukhaṃ dikṣu yathāyuktyā nirgameṇa samanvitam sarvaśobhāsamāyuktaṃ sarvalakṣaṇalakṣitam

<poem>
kārayenmaṇṭapaṃ sarvaṃ śilādārviṣṭakāmayam
</poem>

===Kapitel 38===

''aṣṭatriṃśaḥ paṭalaḥ · prākāralakṣaṇavidhiḥ''

'''38.1''' prākāralakṣaṇaṃ vakṣye tacchṛṇu tvaṃ samāhitaḥ prāsādasya tu vistāraṃ mānaṃ daṇḍaṃ prakalpayet

'''38.2''' traividhyaṃ tasya daṇḍasya vakṣyate kramaśo’dhunā upānānmānataḥ śreṣṭhaṃ kairavānmadhyamaṃ smṛtam

'''38.3''' pādāntādadhamaṃ caiva teṣu ceṣṭaṃ pragṛhya ca tanmānenaiva sālāṃstu kalpayetkalpavittamaḥ

'''38.4''' antarmaṇḍalakaṃ pūrvamantarhāraṃ dvitīyakam madhyahāraṃ tṛtīyaṃ tu turyaṃ maryādibhittikam

'''38.5''' mahāmaryādibhittiṃ ca pañcamaṃ parikalpayet antarmaṇḍalakaṃ yattadbhaveddaṇḍārdhasaṃmitam

'''38.6''' antarhāraṃ tu daṇḍena dvidaṇḍena tṛtīyakam caturdaṇḍapramāṇena kuryānmaryādi bhittikam

'''38.7''' mahāmaryādibhittiṃ ca saptadaṇḍapramāṇataḥ kalpayedathavā hastairdeśikaḥ sālapañcakam

'''38.8''' hastasaptamitaṃ kuryādantarmaṇḍalasaṃjñitam vasuhastamitaṃ bāhye’pyantarhāraṃ tu kalpayet

'''38.9''' daśatrimadhyahāraṃ tu tato maryādibhittikam vikārahastaiḥ kurvīta viṃśaddhastairataḥ param

'''38.10''' mahāmaryādibhittiṃ tu proktaṃ prākārapañcakam  | ādyaṃ sālāṅkaṇāntaṃ tatigatamathavā vahnibāṇābdhinandai rudrairhastaiḥ kramoccaiḥ parimitamadhamādyādyamānaṃ vidheyam  | pratyekaṃ hastavṛddhyā navakamiha bhaveduttamādyuktamānaṃ catvāriṃśatpramāṇaṃ bhavati taditareṣveṣu pañcādhikaṃ ca

'''38.11''' antarmaṇḍalagaṃ mānamupānātparikalpayet tadbahiścāpi sarvatra mānasūtrādbahirbahiḥ

'''38.12''' kalpayeduktamānāni catuḥ pañca yathākramam evamādhikyasālaṃ tu nyūnaṃ vakṣye yathākramam

'''38.13''' tannyūnamagnisālaṃ tu tasmānnyūnaṃ dvisālakam ekasālānvitaṃ harmyamābhāsaṃ tu vidhīyate

'''38.14''' prāsādasya tu rakṣārthaṃ śobhārthaṃ ca prakalpayet antarmaṇḍalamānaṃ vā tripādaṃ vā tadardhakam

'''38.15''' prākārāṇāṃ tu sarveṣāmuttare vā viśālatā agninetrāmbaraistatra hastairvā syādviśālatā

'''38.16''' mukhāyāmaṃ tataḥ proktaṃ pādādhikasamanvitam ardhādhikaṃ vā kurvīta tripādenādhikaṃ tu vā

'''38.17''' dviguṇaṃ triguṇaṃ vāpi caturguṇamathāpi vā mukhāyāmamiti proktaṃ prākārāṇāṃ janārdana

'''38.18''' mānasūtrādbahirbhittirantarvāpi prakalpayet bhittimadhyagataṃ vātha mānasūtraṃ prakalpayet

'''38.19''' bhittivistāramantye tu gāyatryaṅgulamucyate dvitryaṅgulavivṛddhyātha bāhyasālānyathākramam

'''38.20''' kārayeccaturaścāpi teṣāmutsedhamucyate prāsādasamatuṅgaṃ syātpādādhikamathāpi vā

'''38.21''' ardhādhikaṃvā kurvīta kṣudradhāmasu sālakam anyeṣvapi ca pādāntaṃ prastarāntamathāpi vā

'''38.22''' grīvāntaṃ vāpi kurvīta śikharocchrāyakaṃ tu vā ṣaṭsaptāṣṭakarottuṅgamathavā sālamucyate

'''38.23''' kūṭapaṅjaraśālābhiryuktaṃ toraṇasaṃyutam sarvāṅgāṅghrisamāyuktaṃ sarvaśobhāsamanvitam

'''38.24''' ūrdhve vṛṣendrasaṃyuktaṃ nānācitrasamāyutam kārayetkevalaṃ vātha mālikākārameva vā

'''38.25''' bhittyantaṃ mālikāyāstu paṅkikātrayamuttamam dvitayaṃ madhyamaṃ proktamekaṃ kanyasamucyate

'''38.26''' paṅkipādamasūrāṇāṃ kalpanaṃ pūrvavadbhavet dvitalaikatalaṃ vāpi mālikāntaṃ prakalpayet

'''38.27''' jalamārgavihīnaṃ vā śālākāraṃ prakalpayet ekasālavidhau hitvā prathamaṃ pañcamaṃ tathā

'''38.28''' anyeṣu triṣu kurvīta sālasthānopapattitaḥ vedikādyaṃ tu sālānāṃ kalpayettu yathecchayā

'''38.29''' sālakalpanamuddiṣṭaṃ prāsādānāṃ samantataḥ antarmaṇḍalake dvāramekaṃ mukhagataṃ bhavet

'''38.30''' sāleṣvanyeṣu sarveṣu caturdvāraṃ vidhīyate ubhayorvātha kurvīta dvāraṃ tu mukhapṛṣṭhayoḥ

'''38.31''' gopuraṃ syātpratidvāraṃ kevalaṃ dvārameva vā gopuraṃ teṣu kartavyamuktalakṣaṇasaṃyutam

'''38.32''' mahāmaryādibhittau tu mahāgopuramiṣyate tasya vistāramānaṃ syāttithihastena cottamam

'''38.33''' trayodaśakarairmadhyamadhamaṃ rudrahastakaiḥ maryādibhittivistāramadhamaṃ navahastakam

'''38.34''' madhyamaṃ rudrahastaṃ tu śreṣṭhaṃ tatra trayodaśaiḥ gopuraṃ madhyahāre ca rudrahastena cottamam

'''38.35''' madhyamaṃ navahastaṃ syādadhamaṃ saptahastakam antarhāre’pi tacchreṣṭhaṃ navahastaistu vistṛtam

'''38.36''' madhyamaṃ saptahastaiḥ syādadhamaṃ pañcahastakaiḥ antarmaṇḍalake vāpi dvāragopuravistaram

'''38.37''' munihastakṛtaṃ śreṣṭhaṃ pañcahastaṃ tu madhyamam adhamaṃ guṇahastaṃ syātteṣāmutsedhamucyate

'''38.38''' prāsādasya samaṃ vāpi śikharāntamathāpi vā athavā tasya vistārādadhyardhaṃ tuṅgamucyate

'''38.39''' pādonadviguṇaṃ vāpi dviguṇaṃ vā viśeṣataḥ teṣu pañcamamādyaṃ ca gopurākāramucyate

'''38.40''' śeṣeṣu harmyavadvāpi kuryācchobhāsamanvitam dvārotsedhamatho vakṣye gopurāṇāṃ viśeṣataḥ

'''38.41''' upānāduttarāntaṃ tu tadardhaṃ tasya vistaram athavā navatālaṃ syātkanyasaṃ dvāramucyate

'''38.42''' madhyamaṃ daśatālaṃ syādrudratālamathottamam utsedhātpādahīnaṃ tu dvāravistāramucyate

'''38.43''' evaṃ prākāramuddiṣṭaṃ prākārāśritamucyate āgneyyāṃ pacanasthānaṃ catuḥśālāsamanvitam

'''38.44''' śakrapāvakayormadhye vyañjanālayamucyate yāmyapāvakayormadhye snānāmbhaḥsthānamucyate

'''38.45''' yāmyanairṛtayormadhye puṣpaśālā prakīrtitā rakṣovaruṇayormadhye puṣpaśālāthavā bhavet

'''38.46''' nairṛte dhanadhānyānāṃ sthānaṃ tu parikalpayet rakṣovaruṇayormadhye dharmaśravaṇamaṇṭapam

'''38.47''' marudvaruṇayormadhye vidyāsthānaṃ prakīrtitam vāyavye śastraśālā syādvastraśālāsamanvitam

'''38.48''' vāyucandramasormadhye śayanasthānamiṣyate somaśaṃkarayormadhye chatrādīnāṃ niveśanam

'''38.49''' aiśānyāṃ diśi kurvīta yāgamaṇṭapamuttamam kūpasthānaṃ ca tatrāntaraṅkaṇe parikīrtitam

'''38.50''' īśānaśakrayormadhye dhānyasthānaṃ vidhīyate uktānyetāni sarvāṇi sthānāni ca surottama

'''38.51''' antarmaṇḍalakaṃ hitvā mahāmaryādibhittikam madhyastheṣu prayuñjīta triṣu bhittisamāśritam

'''38.52''' sarveṣāṃ vyaktaliṅgānāṃ sthānaṃ sālasamāśritam kārayetparito dhīmān mūlaprāsādasaṃmukham

'''38.53''' bhittiṃ hitvāṅgaṇe vāpi kārayeddeśikottamaḥ

===Kapitel 39===

''ekonacatvāriṃśaḥ paṭalaḥ · parivārālayavidhiḥ''

'''39.1''' parivārālayaṃ vakṣye tacchṛṇu tvaṃ samāhitaḥ prāsādānāṃ tu tatproktaṃ prākāreṣu samantataḥ

'''39.2''' antarmaṇḍalake pūrvaṃ parivārāṣṭakaṃ bhavet antarhārāgrataḥ kuryāddviraṣṭaparivārakam

'''39.3''' madhyahāre prayuñjīta dvātriṃśatparivārakam teṣāṃ bhittyāśritaṃ vātha madhyame vā prakalpayet

'''39.4''' parivārālayaṃ sarvaṃ tanmānamadhunocyate mūlaprāsādagarbhe tu śarabhāgavibhājite

'''39.5''' vyomabhāgādhikaṃ dhāma netrabhāgādhikaṃ tu vā kuryādvai parivārāṇāṃ hīnaṃ tadvadathāpi vā

'''39.6''' tatsamaṃ ca pramāṇānāṃ pañcakaṃ parikīrtitam mūladhāmamukhaṃ teṣāṃ dvāraṃ ca parikalpayet

'''39.7''' lakṣaṇaṃ pratimādīnāṃ pūrvavatparikīrtitam agre vṛṣālayaṃ kuryānmaṇṭapaprāntasaṃsthitam

'''39.8''' āgneyyāṃ brahmaṇaḥ kuryādyāmye mātṛgaṇasya tu vināyakasya nairṛtyāṃ prāgdvāraṃ tatprakalpayet

'''39.9''' vāruṇyāṃ skandadhāmasyājjyeṣṭhāyā vāyugocare kauśikyāścottare tatra viṣṇorvāpi prakalpayet

'''39.10''' mūladhāmavadasyāpi dvāraṃ ca parikalpayet aiśānyāṃ tu raveḥ kuryātpaścimadvārameva hi

'''39.11''' caṇḍeśālayamavyaktaṃ maṇḍale tu prakalpayet aiśānyāṃ dakṣiṇadvāraṃ mukhamaṇṭapasaṃyutam

'''39.12''' vṛṣālayaṃ caturdvāraṃ maṇṭapākāramucyate brahmaṇaścaturaśraṃ tu mātṝṇāṃ gopurākṛtiḥ

'''39.13''' vistāradviguṇaṃ tasya cāyāmaṃ parikalpayet hastipṛṣṭhaṃ gaṇeśasya niveśaḥ syādguhasya tu

'''39.14''' jyeṣṭhāyā nāgaraṃ cāpi durgāyāśca tathā bhavet viṣṇordrāviḍamityuktamarkasyāpi vidhānavat

'''39.15''' parivārālayaṃ sarvaṃ kuryādekatalānvitam evamālayamuddiṣṭamadhunā pīṭhamucyate

'''39.16''' antarmaṇḍalamadhye tu bhittyāśritamathāpi vā balipīṭhaṃ prakartavyaṃ kauśikāṅgulasaṃmitam

'''39.17''' adhamaṃ dviguṇaṃ madhyaṃ triguṇaṃ cottamaṃ bhavet vedāśramathavā vṛttaṃ sarvapīṭhaṃ prakalpayet

'''39.18''' vistārasamatuṅgaṃ syāttripādaṃ cārdhameva vā trimekhalaṃ tu kurvīta dvimekhalamathāpi vā

'''39.19''' ekamekhalayā yuktamūrdhve padmasamanvitam padmapīṭhaṃ tu kurvīta padmākāraṃ sakarṇikam

'''39.20''' mātṝṇāṃ navapīṭhaṃ syājjyeṣṭhāyāḥ pīṭhakatrayam anyeṣāmevamekaṃ syāccaṇḍeśasya tathaiva hi

'''39.21''' beraṃ saṃtyajya pīṭhaṃ syādekaṃ caṇḍeśvaraṃ vinā aṣṭakaṃ parivārāṇāmuddiṣṭamatha ṣoḍaśam

'''39.22''' paścimadvāraharmye tu vṛṣasthāne guho bhavet guhasthāne vṛṣaścāpi śeṣaṃ pūrvavadeva hi

'''39.23''' dvitīyaṃ parivārāṇāṃ ṣoḍaśaṃ kathyate’dhunā prāgādiṣu yathāsthānaṃ lokapālānprakalpayet

'''39.24''' arkacandramasoḥ sthānaṃ śakradakṣiṇavāmayoḥ nāradāgastyayoścāpi kīnāśasya tathā bhavet

'''39.25''' śriyaṃ sarasvatīṃ cāpi varuṇasya tathaiva hi vyāsavāgīśayoḥ sthānaṃ kuberasya tathā bhavet

'''39.26''' evaṃ ṣoḍaśakaṃ proktaṃ parivāradvitīyakam dvātriṃśatparivāraṃ tu tṛtīyamadhunocyate

'''39.27''' dharo dhruvaśca somaścāpyāpaścaivānilo’nalaḥ pratyūṣaśca prabhāsaśca vasavo’ṣṭau digāśritāḥ

'''39.28''' gaganaḥ sparśano vāyuranilo mārutastathā prāṇaḥ prāṇeśajīveśau maruto’ṣṭau prakīrtitāḥ

'''39.29''' vasūnāmantarāleṣu prāgādiṣu ca saṃsthitāḥ ananto vāsukiścaiva takṣaḥ kārkoṭakastathā

'''39.30''' gulikaḥ śaṅkhapālaśca mahāpadmaśca padmakaḥ ete cāṣṭau mahānāgā marutāṃ dakṣiṇe sthitāḥ

'''39.31''' eteṣāmūrdhvakāyaṃ tu kalpayetpuruṣākṛtim kṛkaṭyāṃ tu śiraḥpārśve phaṇena parimaṇḍitam

'''39.32''' sarpākāramadhaḥkāyaṃ sarveṣāṃ parikalpayet vikṛto vivṛtāsyaśca pavano gaṇapāvanaḥ

'''39.33''' pramatho mathakāriśca mārutaśca mahendrakaḥ ete tu pramathāścāṣṭau marutāṃ vāmapārśvagāḥ

'''39.34''' antarhāragataṃ kuryādaiśānyāṃ kṣetrapālakam berābhāve tu pīṭhasthaṃ sthāpayetsthāpakottamaḥ

'''39.35''' uktasthāne yadi dvāraṃ sarvaṃ tasya prayojayet parivāratraye’pyasminyadiṣṭaṃ tatprakalpayet

'''39.36''' dvayaṃ vāpi trayaṃ vātha yathāsthānopapattikam parivārabaliṃ tatra cāgrādārabhya dāpayet

'''39.37''' pradakṣiṇakrameṇaiva gandhapuṣpādibhiryutam svanāmamantrasaṃyuktaṃ baliṃ dadyādviśeṣataḥ

'''39.38''' nirmālyalaṅghane doṣo somasūtre na vidyate savyāpasavyamārgaṃ cedrājarāṣṭraṃ vinaśyati

'''39.39''' tasmātsarvaprayatnena savyamārge baliṃ kṣipet sālamaṇṭapayuktaṃ cedantasthaṃ parivārakam

'''39.40''' bāhye pīṭhaṃ tu saṃsthāpya taddevānāṃ baliṃ kṣipet maṇṭapāvṛtadevānāṃ pūrvavadbalimācaret

'''39.41''' mahāpīṭhadvayaṃ kuryādbāhyābhyantarayorapi gopurasyāgrasaṃsthasya cābhyantarasya cāvadhau

'''39.42''' guṇahastādi tatsthānamathavā tithihastakam mahāpīṭhasya nirdiṣṭaṃ tallakṣaṇamathocyate

'''39.43''' tālatrayaṃ samārabhya ṣaṭṣaḍaṅgulavṛddhitaḥ munitālāntakaṃ yāvanmānāni parikalpayet

'''39.44''' teṣu caikena mānena gṛhītvā tena kārayet vistārasamamutsedhaṃ pīṭhasya parikalpayet

'''39.45''' vikārabhāge tattuṅge vyomāṃśaṃ pādukaṃ bhavet vedāṃśaṃ jagatīṃ kuryātkairavaṃ vahnibhāgataḥ

'''39.46''' vyomāṃśaṃ paṭṭikā tatra galaṃ vahnyaṃśakaṃ bhavet tadūrdhve paṭṭikāṃ kuryādbhāgenaikena buddhimān

'''39.47''' netrāṃśaṃ syānmahāpaṭṭī śivāṃśaṃ cordhvapaṭṭikā tadūrdhve kamalaṃ kuryāttattārārdhasamunnatam

'''39.48''' tattryaṃśakaikabhāgena tadūrdhve karṇikā bhavet dvyaṃśena taddalaṃ proktamevaṃ pīṭhaṃ prakalpayet

'''39.49''' pīṭhakoṇeṣu kurvīta vṛṣendrāṃścaturaḥ samān athavānyaprakāreṇa triḥsaptāṃśe vibhājite

'''39.50''' vyomāṃśopānapadme ca kaṇṭhaṃ padmaṃ ca paṭṭikā pañcabhāgenopapīṭhaṃ śeṣaṃ pūrvavadācaret

'''39.51''' mahābhūtādiyuktaṃ tu kuryātkoṇacatuṣṭaye pīṭhavyāsāṣṭabhāgaikamupapīṭhocchrayaṃ bhavet

'''39.52''' sopapīṭhaṃ tu vā kuryātpīṭhaṃ sopānasaṃyutam bāhyābhyantarataḥ pīṭhavistṛtaṃ saṃprakalpayet

'''39.53''' pīṭhalakṣaṇamuddiṣṭaṃ tayordevānataḥ śṛṇu ādye gaṇeśvaraṃ viddhi dvitīye’ṣṭagaṇāḥ smṛtāḥ

'''39.54''' tayostebhyo baliṃ dadyānnitye naimittike’pi ca evaṃ śailena kartavyaṃ sudhāpakveṣṭakāmayam

===Kapitel 40===

''catvāriṃśaḥ paṭalaḥ · pratimāsthāpanavidhiḥ''

'''40.1''' pratimāsthāpanaṃ vakṣye tacchṛṇu tvaṃ samāhitaḥ kevalaṃ somakaṃ caiva sāmbikāguhameva ca

'''40.2''' sabrahmakeśavaṃ caiva somaśrīviṣṇupadmajam saviṣṇvardhaṃ sagauryardhamiti saptaprakārajam

'''40.3''' kevalaṃ prathamaṃ teṣāṃ vadāmi surapuṅgava kevalaṃ kevalasyaiva śivasya sthāpanaṃ bhavet

'''40.4''' sarveṣāṃ sthāpanārthāya maṇṭapaṃ cādhunocyate prāsādāgre’thavā tasya dakṣiṇetarayostu vā

'''40.5''' śāṃkare vāpi kurvīta sarvalakṣaṇasaṃyutam pañcaviṃśatihastaistu daśapañcakaraistu vā

'''40.6''' daśahaste’thavā bere ṣoḍaśaiḥ parikalpayet pañcahaste tu hastaistu tithisaṃkhyaiḥ kramādbhavet

'''40.7''' ṣaṭtriṃśatstambhasaṃyukte prokte’sminmaṇṭapatraye varjayeddeśiko dhīmānmadhye stambhacatuṣṭayam

'''40.8''' vedyarthamathavānyeṣāṃ berāṇāṃ maṇṭapaṃ budhaḥ uttamaṃ ravihastaṃ tu madhyamaṃ saptahastakam

'''40.9''' adhamaṃ pañcahastaṃ tu ṣoḍaśastambhasaṃyutam kuryātsarve ca te proktā ravitālasamuchrayāḥ

'''40.10''' tālamātratalotsedhadvitālotsedhavedikā tatra kuṇḍāni pūrvādi lakṣaṇenaiva kārayet

'''40.11''' vedāśraṃ yonikhaṇḍendutryaśrāṇi ca suvṛttakam ṣaḍaśraṃ padmakuṇḍaṃ ca vasvaśraṃ ca prakalpayet

'''40.12''' īśānaśakrayormadhye pradhānaṃ ca suvṛttakam gomayenopalipyātha maṇṭapaṃ kuṇḍavediyuk

'''40.13''' brāhmaṇānbhojayitvātra gomayenānulepayet puṇyāhaṃ vācayitvātha vāstuhomaṃ ca kārayet

'''40.14''' sthāpanasyātra yatpūrvaṃ karma taccābhidhīyate netronmīlanavarjaṃ tu nirvṛtte śilpikarmaṇi

'''40.15''' vedāśrakuṭṭime tatra gomayenānulepite sitapuṣpākṣatopete sthaṇḍile śālinirmite

'''40.16''' pīṭhaṃ tatra samādāya prokṣayitvāsināmbhasā vinyasyābhyarcya cānantamāsane tatra madhyame

'''40.17''' ratnāni vinyaseddhīmānmadhyādīśāntadeśake māṇikyaṃ vinyasenmadhye śakre marakataṃ nyaset

'''40.18''' vairḍūryaṃ vahnideśe tu nīlaṃ yāmye’tha nairṛte mauktikaṃ sphaṭikaṃ vāḥpadiśi vāyau ca puṣyakam

'''40.19''' vajraṃ tu somadigbhāge pravālaṃ śāṃkare tathā vinyasya navabījaistu tatastatropari nyaset

'''40.20''' pratimāṃ sthāpya niṣkampāṃ saṃśleṣaṃ kārayeddṛḍham śilpinā karmadakṣeṇa netronmīlanameva ca

'''40.21''' vidhinā kārayetpaścāttadvidhānamathocyate anyatra sthaṇḍilaṃ kṛtvā tatra deśe tu vinyaset

'''40.22''' tataśca hemasūcyā tu śilpinā dṛṣṭimaṇḍalam vartayitvā tataḥ kṛṣṇajyotiścātha ca vartayet

'''40.23''' visṛjya śilpinaṃ paścādyajamānena satkṛtam puṇyāhaṃ vācayitvātha beraśuddhipuraḥsaram

'''40.24''' pañcamṛtpañcagavyaistu tasya śuddhirudāhṛtā śuddhiṃ kṛtvā madhuprasthaṃ ghṛtaprasthaṃ tathaiva ca

'''40.25''' payasaśca tataḥ prasthaṃ lohapātre vinikṣipet sauvarṇakamalaṃ teṣu madhvādiṣu vinikṣipet

'''40.26''' sthaṇḍilaṃ śālibhiḥ kṛtvā sāṣṭapatraṃ sakarṇikam padmaṃ tatra samālikhya tatra devaṃ niveśayet

'''40.27''' tasyāgre sthaṇḍile tatra madhvādīnapi vinyaset beramabhyarcya gandhādyaiḥ praṇavaṃ samudāharan

'''40.28''' madhvādīṃścātha saṃprokṣya hṛdayena kuśāmbhasā dakṣiṇādūrdhvagāntaṃ tu nayanānāṃ krameṇa vai

'''40.29''' madhu dugdhaṃ ghṛtaṃ cāpi mudritaṃ dhenumudrayā hṛdayena pradarśyātha dūrvayā haimayā tataḥ

'''40.30''' sūryenduvahnibījaistu krameṇa parikalpayet tāni netreṣu sarveṣu suvarṇanakhasaṃyutaiḥ

'''40.31''' tarjanyanāmikāmadhyānakhaiḥ spṛṣṭvā tu vinyaset tato yavanikāṃ tatra vyapohyātodyavādyakaiḥ

'''40.32''' brāhmaṇāṃśca savatsāṃ gāṃ gāyatryā saṃpradarśayet tato’bhiṣicya deveśaṃ gandhatoyena deśikaḥ

'''40.33''' sarvālaṃkārasaṃyuktaṃ nītvā grāmapradakṣiṇam jalatīre same sthāpya jalaistairabhiṣicya ca

'''40.34''' pañcaviṃśaiḥ kuśaiḥ kṛtvā kūrcagranthiṃ tu mūrdhani nyasyātha paritaḥ pādālambitaistu kuśaiḥ saha

'''40.35''' beraṃ mūrdhādipādāntaṃ navavastreṇa veṣṭayet puṇyāhaṃ vācayitvātha nadyādau tajjale tataḥ

'''40.36''' nābhidaghne’tha gāyatryā phalakāyāṃ samāhitaḥ śāyayeddeśiko dhīmānprākśiraścordhvavaktrakam

'''40.37''' tato digastrāṇyabhyarcya sādhipāni yathākramam ṣaṣṭikā nāḍikānāṃ tu tadardhaṃ vā tadardhakam

'''40.38''' nītvā praharakaṃ vāpi tata utthāpya deśikaḥ pratimāṃ tāṃ rathe vātha śibikāyāmathāpi vā

'''40.39''' sādhakaiḥ putrakairvāpi samāropyānayettataḥ pratiṣṭhāmaṇṭapādbāhye kalpite snānamaṇṭape

'''40.40''' vedikātulyavistāre someśānadigāsthite nālāvaṭasamāyukte vedikopari vinyaset

'''40.41''' tatra vastraṃ sakūrcaṃ tu vyapanīya yathāpuram yathoktaśuddhipūrvaṃ tu pratimāmabhiṣecayet

'''40.42''' jalādhivāsanaṃ yatra kriyate tu vivarjitam śataśaḥ praṇavenātra kambukenābhiṣecayet

'''40.43''' tato maṇṭapasaṃskāraṃ kuryātpuṇyāhapūrvakam vitānaṃ bandhayedūrdhve digdhvajānaṣṭadikṣu ca

'''40.44''' parito darbhamālāṃ ca mālāpallavasaṃyutām muktādāmāni koṇeṣu mālāṃ sarvatra lambayet

'''40.45''' vinyasedvediparyante sāṅkuraṃ cāṣṭamaṅgalam toraṇaṃ cāpi pūrvādi vinyasetkṣīravṛkṣajam

'''40.46''' vedyāṃ bhūmiṃ samabhyarcya vitāne candramarcayet vāsukiṃ darbhamālāyāṃ vajrādi digdhvajeṣu ca

'''40.47''' antastambhacatuṣke tu dharmādīnparito yajet āgneyādiṣu koṇeṣu bāhyeṣu ca ravīṃstathā

'''40.48''' stambheṣvatha samabhyarcya bhadraṃ ca vijayaṃ kramāt vijṛmbhaṃ lohitaṃ caiva toraṇeṣu caturṣvapi

'''40.49''' tatra vedyāṃ prakartavyaṃ sthaṇḍilaṃ tu manoharam yavagodhūmaśālyādyairaṣṭadroṇairvaraṃ bhavet

'''40.50''' tadardhairmadhyamaṃ proktaṃ tadardhairadhamaṃ bhavet susitaistaṇḍulaiḥ kṛṣṇaistilaiścāpi vikīrya ca

'''40.51''' padmamaṣṭadalaṃ kṛtvā śayanaṃ tatra kalpayet dārujaṃ carmajaṃ caiva romajaṃ pakṣajaṃ tathā

'''40.52''' uparyāstaraṇopetaṃ śayanaṃ pañcadhā bhavet dārujaṃ phalakaṃ jñeyaṃ kṣīravṛkṣasamudbhavam

'''40.53''' carmajaṃ śayanaṃ carma vaiyāghraṃ caiṇameva vā romajaṃ śayanaṃ romakambalaṃ pakṣipakṣajam

'''40.54''' caturthaṃ śālmalītūlasaṃbhavaṃ vā prakalpayet uparyāstaraṇaṃ cāpi kevalaṃ sūkṣmavāsasā

'''40.55''' carmakambalatūlānāmabhāve vastramucyate dārujādibhirapyetairuparyupari kalpayet

'''40.56''' kalpite śayane tasminkuśānpūrvottarāgrakān paristīrya tilānkṛṣṇām̐llājāṅśubhrāṃśca deśikaḥ

'''40.57''' vikirecca tato madhye śayane’tha manonmanīm saṃpūjya śāyayettatra pratimāṃ praṇavena tu

'''40.58''' prākśiraścordhvavaktrāṃ tāṃ pūrvavadbaddhakūrcakām pracchādayetsuraktena vāsasā baddhakautukām

'''40.59''' sugandhaṃ sākṣataṃ tatra puṣpadūrvāsamāyutam praṇavenaiva mantreṇa pratimopari vinyaset

'''40.60''' tato devādhivāsārthaṃ kumbhānbimbaphalaprabhān droṇārdhatoyasaṃpūrṇānsupakvāndoṣavarjitān

'''40.61''' aṣṭau saṃgṛhya vaidyeśāṅśaivamekaṃ tathāvidham droṇapūrṇaṃ tu saṃśodhya prakṣālya hṛdayena tu

'''40.62''' āveṣṭya tantunā samyak samena susitena ca nādeyenātha kaupena vāriṇā śītalena ca

'''40.63''' candanośīrajaiścūrṇairlavaṅgatruṭisaṃbhavaiḥ puṣpaiḥ sagandhibhiścaiva vāsitena prapūrayet

'''40.64''' vastrapūtena gāyatrīṃ śaivīṃ samyagudāharan teṣu śaive kṣipetpañcaratnamanyeṣu kāñcanam

'''40.65''' sarveṣu kūrcaṃ vinyasya pidhānaistu pidhāya ca vastrayugmena śaivākhyamāveṣṭyānyān pṛthak pṛthak

'''40.66''' saṃveṣṭyaikena vastreṇa tataḥ śaivaṃ tu vinyaset pratimāyāḥ śirobhāge dakṣiṇe tānapi kramāt

'''40.67''' pūrvādiṣu ca vinyasya ghaṭānvidyeśvarātmakān caturdikṣu paristīrya triṃśaddarbhaiḥ krameṇa vai

'''40.68''' puṇyāhaṃ vācayitvā tu prokṣayitvāstramuccaran pādyādyaiḥ pūjayeddevāṅchivādīndeśikottamaḥ

'''40.69''' suprasannamanā bhūtvā tadvidhānamihocyate kṛtavidyātanurmantrī prāṅmukho vāpyudaṅmukhaḥ

'''40.70''' pādyādīnsamyagāpādya prokṣayitvā śivāmbhasā brahmabhiḥ pañcabhiḥ sarvānabhimantrya yathākramam

'''40.71''' mudrāṃ ca darśayitvātha surabhiṃ teṣu vastuṣu prāṇavṛttinirodhena dhyātvā devaṃ yathāvidhi

'''40.72''' puṣpairañjalimāpūrya tasya mūlaṃ samuccaran praṇavādi namo’ntaṃ tu sākṣānmantratanuṃ śivam

'''40.73''' āvāhya kumbhatoye tu pradhāne madhyasaṃsthite āvāhanyā tataścāpi sthāpanyā sthāpanaṃ bhavet

'''40.74''' saṃnidhiḥ saṃnidhānyā syānnirodhinyā nirodhanam tato namaskṛtiṃ badhvā darśayecca tadagrataḥ

'''40.75''' ṣaḍaṅgāni hṛdādīni pāvakādicaturṣvapi koṇeṣu tatra vinyasya taddikṣvastraṃ ca deśikaḥ

'''40.76''' mṛgyaiva mudrayā nyasya netramīśānagocare śāntāṃ manoramāṃ caiva mukulīṃ śaśakarṇikām

'''40.77''' padmāṃ ca kālakarṇyākhyāṃ ṣaḍaṅgānāṃ pradarśayet tataḥ pādyādibhirdevamarcayenmūlamantrataḥ

'''40.78''' aṅgairaṅgāni cābhyarcya tattatsthāneṣu mantravit vidyeśāṃśca kramāddhyātvā kuryādāvāhanādikam

'''40.79''' teṣāṃ vajrādimudrāśca darśayenmantravittamaḥ pādyamācamanaṃ cārghyaṃ gandhaṃ puṣpaṃ ca dhūpakam

'''40.80''' dīpaṃ ca kramaśo dadyāt sarveṣāṃ svasvamūlataḥ tato homaḥ prakartavyastadvidhānamathocyate

'''40.81''' teṣu kuṇḍeṣu sarveṣu kṛtvā saṃskāramuttamam adhidevānyajetpaścātprāgādiṣu yathākramam

'''40.82''' adhidevāstviti proktā vidyeśāśca samantataḥ pradhāne śiva eva syādarcanaṃ syātsvanāmabhiḥ

'''40.83''' agnyādhānādikaṃ sarvamagnikāryoktamācaret tataścāgnimukhaṃ hutvā homayeddravyasaṃcayam

'''40.84''' samidājyacarūm̐llājāṃstilān sarṣapakānyavān plakṣodumbarakāśvatthavaṭavahnisamudbhavāḥ

'''40.85''' apāmārgārkajāścaiva khādirāśca samidbhavet pālāśī syātpradhānasya tattatparidhisaṃyutā

'''40.86''' yathoktālābhe sarvatra palāśodumbarāvubhau samiddhomaṃ tu mūlena sarvatra parikalpayet

'''40.87''' ājyādīnyatha śeṣāṇi cāṅgairhṛdayapūrvakaiḥ astrāntairjuhuyānmantrī krameṇaiva hutāśane

'''40.88''' ācāryo mūrtipaiḥ sārdhaṃ samakāle tu homayet dravyānte vyāhṛtiṃ hutvā deśikaḥ pratimāṃ tathā

'''40.89''' mūrdhādipādaparyantaṃ mūlamantreṇa saṃspṛśet tataḥ prāgādihotāraḥ spṛśeyuḥ kramaśastadā

'''40.90''' tathaiva ṣaḍbhiraṅgaiśca tattadaṅgeṣu saṃspṛśet sarvadravyāvasāneṣu sarvakuṇḍeṣu caiva hi

'''40.91''' mūrtīnāṃ kuṇḍasaṃsthānāṃ pratyekaṃ tu śatāhutim ājyena hutvā sarvatra pariṣicya yathāvidhi

'''40.92''' vidyeśamūrtibhedena sthitaṃ pāvakamarcayet homakāle prayuñjīta ṛgyajuḥsāmātharvaṇaiḥ

'''40.93''' vedairadhyayanaṃ dikṣu prāgādiṣu yathākramam aiśānyāṃ diśi tatraiva sādhako’straṃ japettadā

'''40.94''' tataḥ kumbhagatānāṃ tu havirdattvā yathākramam adhivāsanakarmaivaṃ samāpya guruṇā saha

'''40.95''' hotāraḥ sarva evātra rātriśeṣaṃ tu jāgarāt nītvā prātaḥ samutthāya kṛtanityakriyāstu te

'''40.96''' deśikena samāviśya sumuhūrte sulagnake ddevānabhyarcya kumbhasthānprajvālyāgniṃ samantataḥ

'''40.97''' vyāhṛtyantaṃ tu sarvatra mūrtimantrairdaśāhutim hutvā sarvātmanā paścātsrucā pūrṇāṃ pradāpayet

'''40.98''' pariṣicya tato mūrtimudvāsyānalasaṃśrayām paridhīnviṣṭarāṃścāpi gṛhītvābhyukṣya ca kramāt

'''40.99''' vahnau vinikṣipeddhīmāṃstata utthāya deśikaḥ navavastrottarīyaṃ ca navoṣṇīṣāmbaraṃ dadhat

'''40.100''' pañcāṅgabhūṣaṇopetaḥ sapavitrakaro guruḥ devamutthāpayedvedyāḥ praṇavaṃ samudāharan

'''40.101''' vastrakūrcādikaṃ sarvamapanīya ca hotṛbhiḥ tasminnadhyetṛbhiścaiva kāle svastyādivācakaiḥ

'''40.102''' sātodyavādyairanyaiśca maṅgalaistu samanvitaiḥ maṇṭape snānavedyāṃ tu beraṃ pīṭhe tu vinyaset

'''40.103''' upaviśyottarāsyaṃ tu bhadrapīṭhe nirākulaḥ kṛtavidyātanurmantrī śodhayetpratimāṃ tadā

'''40.104''' haridrādyaistataḥ pañcagavyena hṛdayena ca abhiṣicya tataḥ śuddhiṃ bhasitena sitena ca

'''40.105''' śuddhodakena saṃsnāpya brahmapañcakamuccaran abhiṣicya tato dattvā vaktreṇācamanīyakam

'''40.106''' praṇavena śivasyārghyaṃ dattvā puṣpaṃ ca mantravit sthāpitaṃ tu tataḥ kumbhaṃ pradhānaṃ deśikaḥ svayam

'''40.107''' uddhṛtyodvāhayitvātha śeṣānkumbhāṃśca hotṛbhiḥ krameṇa svasvadiksaṃsthaiḥ kṛtvārcāṃ ca pradakṣiṇam

'''40.108''' agre tu sthaṇḍile tasyāḥ sthāpayitvā yathā purā kṛtavidyātanurdevānarcayitvā yathākramam

'''40.109''' kumbhasthāṃstāṃstato devān dhyāyeddhṛdi samāhitaḥ prāṇavṛttinirodhena tamevātha ghaṭe jale

'''40.110''' mantraṃ prāṇasthitiṃ matvā tasmānmūlaṃ samuccaran tatkumbhāmbhastu kūrcena gṛhītvā pratimāhṛdi

'''40.111''' srāvayetkarmaṇā tena sa devaḥ syātpratiṣṭhitaḥ tata uddhṛtya tatkumbhaṃ vatsareṇābhiṣecayet

'''40.112''' vidyeśānāṃ tu kumbhebhyaḥ pūrvavatparitaḥ kramāt tattanmantrāṃstu vinyasya tatra tairabhiṣecayet

'''40.113''' tataḥ sapraṇavaṃ mūlaṃ hṛdaye vinyasettataḥ aṅgāni hṛdayādīni hṛdayādiṣu vinyaset

'''40.114''' astraṃ haste tu vinyasya tāraṃ śirasi vinyaset gāyatrīṃ vaktradeśe tu mātṛkāśca tato nyaset

'''40.115''' akāraṃ mūrdhni cākāraṃ lalāṭe netrayostataḥ ikāraṃ karṇayoścāpi īkāraṃ vinyasettataḥ

'''40.116''' ukāraṃ gaṇḍayornyasya ūkāraṃ nāsikāpuṭe oṣṭhayośca tathā ṛ ṝ dantapaṅkidvayoḥ punaḥ

'''40.117''' lṛ lṝ ca vinyasetkaṇṭhe ekāraṃ cāṃsayordvayoḥ aikāraṃ ca tato jatrudvayorokārameva ca

'''40.118''' aukāraṃ stanamadhye tu aṃkāraṃ jaṭhare tathā aḥkāraṃ meḍhradeśe tu kacavargau ca pārśvayoḥ

'''40.119''' ṭavargaṃ pṛṣṭhadeśe tu tavargaṃ kaṭideśake ūrvośca payavargau ca jaṅghayoḥ śahavargakau

'''40.120''' vinyasenmudrayā mṛgyā sarvāṇyetāni deśikaḥ evaṃ mantratanuṃ kṛtvā tataścāpyabhiṣecayet

'''40.121''' gāyatryā gandhatoyena pādyamācamanārghyakam gandhapuṣpaṃ tathā dhūpaṃ vastrābharaṇameva ca

'''40.122''' mālāṃ naivedyakaṃ cāpi hṛnmantreṇa pradāpayet evaṃ beraṃ pratiṣṭhāpya calaṃ cedutsavaṃ tataḥ

'''40.123''' tenaiva kuryāttadrātrau samārabhya tu bhauvanam calānāmacalānāṃ tu tathā caivobhayātmanām

'''40.124''' samānā syātpratiṣṭheyaṃ viśeṣaḥ kathyate’dhunā jalādhivāsanaṃ noktaṃ mṛṇmaye tu kathaṃcana

'''40.125''' śayane cādhivāsaśca śeṣaṃ sarvaṃ samaṃ bhavet śūlasthāpanakāle tu ratnanyāsavidhirbhavet

'''40.126''' acalasyāpi śailasya viśeṣo’yaṃ nidarśitaḥ adhivāsya prabhāte tu mantranyāsavidheḥ purā

'''40.127''' ratnanyāsastu kartavyastataḥ sthāpanamācaret citrābhāseṣu sarveṣu ratnanyāsastu no bhavet

'''40.128''' jalādhivāsanaṃ tadvacchayanaṃ na tathā bhavet acaleṣveva kartavyo ratnanyāsaścaleṣvapi

'''40.129''' kuryādvā sarvabereṣu nayanonmīlanaṃ bhavet mantranyāsavidhau mantrī mṛṇmaye bhitticitrake

'''40.130''' kevalenaiva kūrcena mantranyāsaṃ tu kalpayet acale mṛṇmaye bere varṇayukte śilāmaye

'''40.131''' mantrakarma jalopetaṃ tasyāgre parikalpite pīṭhe sarvaṃ prayuñjīta tālamātrasamanvite

'''40.132''' prabhā vā pīṭhikā vāpi yatra bere pṛthakkṛtā kṛtvā śuddhiṃ tayoḥ kuryātpañcamṛtpañcagavyakaiḥ

===Kapitel 41===

''ekacatvāriṃśaḥ paṭalaḥ · sāmbikasthāpanavidhiḥ sambikāguhasthāpanavidhiśca''

'''41.1''' sāmbikasyātha devasya sthāpanaṃ vakṣyate’dhunā ratnanyāsavidhiḥ kāryo gomayālepite śubhe

'''41.2''' deśe tatkarmaśālāyāṃ kṛtvā vai sthaṇḍiladvayam śālibhirvimalaiḥ padmaṃ tayoḥ samyaksuśobhanam

'''41.3''' devaṃ devīṃ tayoścāpi prāṅmukhaṃ saṃniveśya ca tattadagre tayoḥ pīṭhaṃ sthaṇḍile vinyasettataḥ

'''41.4''' prokṣayitvāmbhasā pīṭhaṃ sarvātmānaṃ samuccaran māṇikyavajravairḍūryaharitālendranīlakān

'''41.5''' sphaṭikaṃ mauktikaṃ caiva puṣyarāgaṃ pravālakam madhyādīśānaparyantaṃ śaktibījaiḥ kramānnyaset

'''41.6''' devyāḥ pīṭhe ca ratnāni pañca vā vinyasetkramāt śaktibījaistu tatrāpi devyāḥ pīṭhe ca vinyaset

'''41.7''' tayorāsanayoḥ paścāt saṃśleṣaṃ sudṛḍhaṃ tathā kārayecchilpinā karmadakṣeṇa śucinā tataḥ

'''41.8''' tataśca devayormūrdhni kusumaṃ saṃniveśayet ratnanyāsaṃ samāpyaivaṃ netronmīlanamārabhet

'''41.9''' tadarthaṃ sthaṇḍilaṃ kuryādanyatraiva yathā purā tatrāpi devaṃ devīṃ ca vinyasetsthaṇḍilopari

'''41.10''' tato vai haimayā sūcyā pakṣmarekhāṃ tu śilpinā jyotirmaṇḍalamālikhya kṛṣṇamaṇḍalamālikhet

'''41.11''' unmīlya ca visarjyainaṃ śilpinaṃ kṛtakṛtyakam anyatra devau saṃsthāpya pūrvavatsthaṇḍile kṛte

'''41.12''' tayoragre madhuprasthaṃ ghṛtaprasthaṃ tathaiva ca dugdhaprasthaṃ ca saṃgṛhya lohapātrasthitaṃ śuci

'''41.13''' teṣu haimaṃ vinikṣipya kamalaṃ praṇavena tu sarvātmanā tu saṃprokṣya nyasya ca sthaṇḍilopari

'''41.14''' haimayā dūrvayā kṣaudraṃ tarpayeddakṣiṇākṣakam ūrdhve ca sarpiṣā tadvadvāme dugdhena caiva hi

'''41.15''' sūryāgnisomabījaistu tarpaṇaṃ samyagācaret hiraṇyanakhasaṃprotāṃ deśinīṃ madhyamāṃ tathā

'''41.16''' anāmikāṃ ca kṛtvātha deśinyā dakṣiṇe spṛśet sūryabījaṃ samuccārya tato lalāṭalocane

'''41.17''' agnibījamanusmṛtya madhyānāmikayā spṛśet somabījamanusmṛtya tato devyāśca locane

'''41.18''' somasūryātmane kuryānmadhunā payasā tataḥ agninetraṃ ghṛtenaiva pūrvavaddhaimadūrvayā

'''41.19''' tatastiraskariṇyāstu nirāsaṃ tatra kārayet tato dhenuṃ tato viprāṃstataḥ kanyāśca darśayet

'''41.20''' devadevyośca gāyatrīmuccarandeśikaḥ sudhīḥ pañcamṛtpañcagavyaistu tataḥ śuddhiṃ samācaret

'''41.21''' pāśupatena cāstreṇa tayoḥ śuddhirudāhṛtā mālābharaṇavastrādyaiḥ kṛtvālaṃkāramuttamam

'''41.22''' pradakṣiṇaṃ tataścāpi kuryādgrāmapurādiṣu jalādhivāsanaṃ kuryānnadyādiṣu tataḥ sudhīḥ

'''41.23''' jalatīraṃ tato nītvā pratime tatra vinyaset abhiṣicya tatastoyaiḥ kṛtvā puṇyāhamuttamam

'''41.24''' devaṃ devīṃ ca kūrcābhyāṃ vastrābhyāṃ cāpi veṣṭayet tataḥ śirasi cāpyarghyaṃ praṇavenaiva vinyaset

'''41.25''' nābhidaghne jale paścātprākśiraścordhvavaktrakam śāyayetpratime tatra dikpālāstraṃ yathādiśam

'''41.26''' arcayedevamuktaḥ syādadhivāso jalāśritaḥ kālo’sya ca purā prokto maṇṭapaṃ cāpi pūrvavat

'''41.27''' kalpayedatha tatraiva koṇeṣvapi caturṣvapi yonyākārāṇi kuṇḍāni tatra caiva susaṃskṛte

'''41.28''' snānamaṇṭapamadhyaṃ tu nītvā devau ca yatnataḥ snānavedyāṃ tu vinyasya śuddhiṃ kṛtvā yathāvidhi

'''41.29''' abhiṣicya tato devau gandhatoyena mantravit sarvātmanā śivaṃ devīṃ gāyatryā cābhiṣecayet

'''41.30''' haimaiḥ pratisaraṃ badhvā hṛdayena tayostataḥ kūrcadvayena vastrābhyāṃ devaṃ devīṃ ca veṣṭayet

'''41.31''' tataḥ kṛtvā ca puṇyāhaṃ kalpite śayane śubhe śāyayetpratime samyak sarvātmānaṃ samuccaran

'''41.32''' tato bhavānīṃ raktena vāsasā veṣṭayetsudhīḥ pūrvavatkalaśānāṃ tu sthāpanaṃ samyagācaret

'''41.33''' śaktikumbhaṃ śirodeśe devyāścāpi prakalpayet vardhanī śaktikumbhaḥ syādvastrahemādisaṃyutā

'''41.34''' devaṃ devīṃ ca gāyatryā gandhādyaiḥ pūjayettataḥ devaṃ devīṃ yathārūpaṃ dhyātvā deśikasattamaḥ

'''41.35''' āvāhanādikaṃ karma kumbhayoḥ śivayoryajet pūrvavaccātha vidyeśānkalaśeṣu samarcayet

'''41.36''' tato homaṃ prakurvīta kuṇḍeṣu vidhinā tataḥ puruṣaḥ pūrvakuṇḍe syāddakṣiṇe ghora ucyate

'''41.37''' paścime cāpi sadyastu vāmadevastathottare īśānastu pradhāne syānmūrtayaḥ pañca eva hi

'''41.38''' āgneyādiṣu koṇeṣu catasro mūrtayaḥ smṛtāḥ nivṛttiśca pratiṣṭhā ca vidyā śāntiśca tāḥ smṛtāḥ

'''41.39''' digvidikṣu sthitāstāstā devadevyośca mūrtayaḥ teṣvagniṃ vidhinādhāya śivahomastu pūrvavat

'''41.40''' pradhānakuṇḍe kartavyo devahomādanantaram devyā homo vidhātavyo tadvidhānamihocyate

'''41.41''' devīṃ tatra samāvāhya pūjayitvā yathāvidhi pūrvoktairakhilairdravyairdevyaṅgairmūlapūrvakaiḥ

'''41.42''' tenaiva kramayogena juhuyānmantravittamaḥ devahome tu devasya kuryāttanmūrtipaiḥ saha

'''41.43''' devyāśca tadvaddhomaṃ tu mūrtipaiḥ saha mantravit dravyānte vyāhṛtiṃ hutvā pratidravyaṃ spṛśedguruḥ

'''41.44''' tasyānantaramevātra spṛśeyuḥ kramaśo’dhunā devahomasthitā devaṃ devīhomasthitāśca tām

'''41.45''' mūrdhādipādaparyantaṃ tanmūlaiḥ sparśa iṣyate hṛdayādibhiraṅgaistu tattadaṅgāni saṃspṛśet

'''41.46''' sarvadravyāvasāne tu mūrtīnāṃ tu daśāhutīḥ pratikuṇḍaṃ tato hutvā saṃpūjya pariṣicya ca

'''41.47''' kumbhasthānāṃ tu devānāṃ dattvā caiva haviḥ kramāt rātriśeṣaṃ tato nītvā jāgareṇa samanvitaḥ

'''41.48''' prabhāte deśiko dhīmānmūrtipaiḥ saha sādhakaiḥ kṛtanityakriyo bhūtvā hotṛbhiśca samanvitaḥ

'''41.49''' praviśya maṇṭapaṃ tatra sakalīkṛtavigrahaḥ navāmbaradharo bhūtvā navavastrottarīyakaḥ

'''41.50''' gandhacandanaliptāṅgaḥ pañcāṅgabhūṣaṇairyutaḥ devānpūrvavadabhyarcya sumuhūrte sulagnake

'''41.51''' devadevyoḥ pradhāne tu tattanmūlaṃ samuccaran pūrṇāhutiṃ kramāddhutvā śeṣeṣvaṣṭasu ca kramāt

'''41.52''' devakuṇḍeṣu devasya devyāścāpi tathā sudhīḥ hutvā pūrṇāhutiṃ paścāddevamutthāpayecchanaiḥ

'''41.53''' sumuhūrte sulagne tu sarvadoṣavivarjite snānavedyāṃ tu saṃsthāpya prāṅmukhau praṇavena tau

'''41.54''' vastrakūrcādikaṃ tyaktvā dattvā cārghyaṃ dvayorapi tattaddhṛdayamantreṇa tataḥ snāpya ca mantravit

'''41.55''' gandhodakena mantreṇa devaṃ saṃvatsarātmanā devīṃ gāyatriyā caiva tayostu kalaśau tataḥ

'''41.56''' uddhṛtya kṛtvā vaidyeśaiḥ prāsādaṃ tu pradakṣiṇam kalaśau devadevyośca puratastānyathā purā

'''41.57''' saṃsthāpya devaṃ devīṃ ca gandhādyaiśca samarcayet svasvamūlena mantreṇa tataḥ kūrcāmbhasā tayoḥ

'''41.58''' mantranyāsaśca kartavyo devadevyostu pūrvavat tābhyāṃ ca kalaśābhyāṃ tau dvayorgāyatrimuccaran

'''41.59''' abhiṣicya tato devaṃ mantrānpūrvoktavannyaset devyāśca mūlamantraṃ ca vinyasyātha ca mūrdhani

'''41.60''' tāraṃ vinyasya vaktre tu gāyatrīmātṛkāstataḥ yathā deve tathā nyasya sarvavarmatayā sudhīḥ

'''41.61''' malābharaṇavastrādyairgāyatryā tau samarcayet prabhūtaṃ ca havirdattvā tataścotsavamācaret

'''41.62''' evaṃ sāmbikamuddiṣṭaṃ sāmbikāguhamapyatha sthāpanaṃ śṛṇu deveśa tatrāpi ca viśeṣataḥ

'''41.63''' kriyākāryamaśeṣaṃ yattadidānīṃ pravakṣyate ratnanyāsaṃ tu vā kuryānnetronmīlanakarma ca

'''41.64''' jalādhivāsanaṃ cāpi skandagāyatrimuccaran adhivāsādikarmāṇi skandamūlena kārayet

'''41.65''' homaṃ ca skandamūlāṅgaiḥ pradhāne samidādibhiḥ uktairdravyaistataḥ kuṇḍe juhuyātpūrvasaṃkhyayā

'''41.66''' mantranyāsaśca kartavyo guhe pitroranantaram skandamūlena mantreṇa tato’ṅgāni ca vinyaset

'''41.67''' pūjāṃ ca skandagāyatryā kṛtvā dattvā haviḥ kramāt tataḥ sahotsavaṃ kuryātsarvalokahitāvaham

'''41.68''' evaṃ yaḥ kārayetkartā sarvānkāmānavāpya saḥ modate rudrasāmīpyaṃ labdhvānte rudrasadmani

===Kapitel 42===

''dvicatvāriṃśaḥ paṭalaḥ · sabrahmakeśavaśambhusthāpanavidhiḥ''

'''42.1''' sabrahmakeśavaṃ śambhoḥ sthāpanaṃ śṛṇu sāṃpratam devasya pūrvavatkuryādratnanāsaṃ vidhānataḥ

'''42.2''' brahmaṇaśca tathā viṣṇoḥ pañca ratnāni vinyaset pañcabhūtākṣarairdhīmānnetronmīlanakarmaṇi

'''42.3''' kṛte tu śilpinā paścātsthitvā tu sthaṇḍilopare devasya pūrvavatkṛtvā brahmaviṣṇvoranantaram

'''42.4''' tayośca vinyasennetre sūryasomau yathā purā tarpaṇaṃ madhudugdhābhyāṃ netrayoḥ parikalpayet

'''42.5''' pūrvavadberaśuddhiṃ ca kuryāttatra hṛdā sudhīḥ jalādhivāsanaṃ cāpi trayāṇāṃ parikalpayet

'''42.6''' kevaloktaprakāraṃ syānmaṇṭapaṃ kuṇḍavediyuk śayanatritayaṃ kuryāddārujādyaiḥ krameṇa tu

'''42.7''' jalādhivāsitāndevānānayetsnānamaṇṭapam snānavedyāṃ samānīya hitvā kūrcāmbarasrajaḥ

'''42.8''' gandhāmbunābhiṣicyātha kṛtvā puṇyāhameva ca teṣāṃ pratisaraṃ badhvā tattanmantramanusmaran

'''42.9''' kūrcena saha saṃveṣṭya vastrairdevānanukramāt arghyaṃ dattvā tato mūrdhni teṣāṃ hṛdayamuccaran

'''42.10''' ānīya vedyāmātodyairdevaghoṣaiḥ samāyutaḥ śāyayenmadhyame śambhuṃ prāviśaraścordhvavaktrakam

'''42.11''' brahmāṇaṃ dakṣiṇe caiva vāme viṣṇuṃ tathaiva ca arcayitvā tathā mantraistanmantratrayamuccaran

'''42.12''' kumbhāvapyadhipau tatra brahmanārāyaṇātmakau dakṣiṇottarayornyasya śivakumbhasya deśikaḥ

'''42.13''' abhitaḥ kalaśānaṣṭau vaidyeśānvinyasettataḥ pūrvoktalakṣaṇopetānsarvāṃstānparikalpayet

'''42.14''' brahmaviṣṇumaheśāṃstu kumbheṣu triṣu pūrvavat āvāhanādikaṃ kṛtvā gandhapuṣpādibhiḥ kramāt

'''42.15''' saṃpūjya ca kramāttāṃśca homayettadanantaram kṛtvā kevalavaddhomaṃ devasya tadanantaram

'''42.16''' tatsaṃkhyayāpi homaṃ ca kṛtvā pūrvoktavatkramāt pradhānakuṇḍe mūlena brahmaviṣṇvoryathākramam

'''42.17''' aṅgairapi tathā ṣaḍbhiḥ kṛtvā sparśāhutiṃ tayoḥ samāpyetthaṃ ca kumbheṣu devānāṃ ca haviḥ kramāt

'''42.18''' dattvā tu rātriśeṣaṃ tu nītvā prātaḥ samāhitaḥ kṛtanityo guruḥ sārdhaṃ sādhakairatha hotṛbhiḥ

'''42.19''' navānbarottarīyaśca baddhapañcāṅgabhūṣaṇaḥ kṛtavidyātanurmantrī devānpūrvavadarcayet

'''42.20''' pūrṇāhutiṃ trimūrtīnāṃ mūlamantrairyathākramam anyeṣvapi ca kuṇḍeṣu pūrṇā sarvātmanā bhavet

'''42.21''' tato devānsamutthāpya snānavedyāṃ tu vinyaset tataḥ kūrcādikaṃ tyaktvā tattaddhṛdayamuccaran

'''42.22''' śuddhiṃ kṛtvātha devānāmuktairdravyairviśeṣataḥ gandhodakena saṃsnāpya tattaddhṛdayamuccaran

'''42.23''' mantranyāsaṃ tataḥ kuryātkumbhānānīya pūrvataḥ prathamaṃ tu śive kuryādbrahmaviṣṇvoranantaram

'''42.24''' sarveṣāṃ hṛdi mūlaṃ tadaṅgānyaṅgeṣu vinyaset krameṇa kumbhaistāndevān snāpayedbrahmapañcakaiḥ

'''42.25''' vaidyeśaiśca tataḥ kumbhairdevadeve’bhiṣecayet devasya pūrvavanmantrānnyasyātha brahmakṛṣṇayoḥ

'''42.26''' mūlamaṅgāni gāyatrīṃ mātṛkāścāpi pūrvavat vinyasya gandhatoyena sarvānapyabhiṣecayet

'''42.27''' vastrābharaṇamālādīṃstattanmūlena dāpayet prabhūtaṃ ca havirdattvā tāmbūlaṃ ca nivedayet

'''42.28''' sabrahmakeśavasyaivaṃ devasya sthāpanaṃ bhavet ekatra ratnanyāsaṃ tu śayanaṃ caikameva hi

'''42.29''' liṅgodbhavapratiṣṭhāyāmapi tadvadvidhīyate evaṃ sthāpya sureśānaṃ pratyahaṃ samamarcayet

'''42.30''' sarvānkāmānsa saṃprāpya gacchecchivapuraṃ sudhīḥ

===Kapitel 43===

''tricatvāriṃśaḥ paṭalaḥ · somāśrīviṣṇupadmajasthāpanavidhiḥ''

'''43.1''' atha vakṣye viśeṣeṇa somāśrīviṣṇupadmajam sthāpanaṃ tu maheśasya sarvakāmārthasādhanam

'''43.2''' ratnanyāsaḥ prakartavyaḥ sarveṣāṃ kārayetpṛthak śivayoḥ pūrvavatkuryāttayorviṣṇuviriñcayoḥ

'''43.3''' pañcaratnāni madhyādi vinyaseduttarāntakam māṇikyaṃ muktā vairḍūryamindranīlaṃ pravālakam

'''43.4''' pañcaratnamiti proktaṃ madhyasthaṃ vyomabījakam pṛthivyādyaistu bījāni prāgādiṣu ca vinyaset

'''43.5''' tathaiva syācchriyaścāpi netronmīlanamapyatha haimayā śilpinā sūcyā vartayitvākṣimaṇḍalam

'''43.6''' śivādisarvadevānāṃ sthitānāṃ sthaṇḍilopari udvāsya śilpinaṃ paścātsthaṇḍile’nye niveśya tān

'''43.7''' śivayoḥ pūrvavatkṛtvā tato viṣṇuviriñcayoḥ śriyaścāpi nyasenmantrī dakṣiṇetaranetrayoḥ

'''43.8''' suryasomāvajasyātra nyāsaḥ pratimukhaṃ smṛtaḥ sarveṣāṃ svasvagāyatryā madhunā payasāpi ca

'''43.9''' suvarṇadūrvayā kuryāttarpaṇaṃ dṛṣṭimaṇḍale pṛthagyavanikāpāye sarveṣāṃ brāhmaṇāṃśca gām

'''43.10''' svasvagāyatrimantreṇa darśayeddeśikottamaḥ pañcamṛtpañcagavyena sarveṣāṃ śuddhirucyate

'''43.11''' tattadgāyatrimantreṇa secayedgandhavāriṇā sahaiva pūrvavatkuryādgrāmādīnāṃ pradakṣiṇam

'''43.12''' jalādhivāsanaṃ kuryānnadyādiṣu viśeṣataḥ tīre samatale devānprāṅmukhānsthāpya deśikaḥ

'''43.13''' puṇyāhaṃ vācayitvādau tattoyairabhiṣecayet praṇavena śirasyarghyaṃ dattvā devasya mantravit

'''43.14''' devīṃ ca tadvatsaṃcintya tadvatkūrcāmbhasā nyaset arghyaṃ devyāśca dattvātha darśayettu manoramām

'''43.15''' tato viṣṇuṃ tataḥ sthāpya cakramudrāṃ pradarśayet lakṣmīṃ caiva tathā sthāpya darśayecchaśakarṇikām

'''43.16''' brahmāṇaṃ ca tathā sthāpya padmamudrāṃ pradarśayet pāvakaṃ ca pratiṣṭhāpya śaktimudrāṃ pradarśayet

'''43.17''' evaṃ devānpratiṣṭhāpya yathāsvaiḥ kalaśaiśca taiḥ svasvagāyatrimuccārya śivādīnabhiṣecayet

'''43.18''' vaidyeśaiḥ snāpya deveśaṃ tato mantrānkramānnyaset praṇavaṃ mūrdhni vinyasya gāyatrīṃ vadane nyaset

'''43.19''' mūlamantraṃ hṛdi nyasya cāṅgānyaṅgeṣu vinyaset astraṃ ca dordvaye nyasya mātṛkāḥ pūrvavanyaset

'''43.20''' evamevānyadevānāṃ svasvamūlāṅgamantrayuk praṇavena ca gāyatryā vinyasenmātṛkāstataḥ

'''43.21''' tato’bhiṣicya sarvāṃstāngandhacandanavāriṇā pādyamācamanaṃ cārghyaṃ gandhaṃ puṣpaṃ ca dhūpakam

'''43.22''' dīpaṃ caiva nivedyaṃ ca svasvamūlena mantravit prabhūtaṃ ca havirdadyāt sarveṣāṃ ca yathākramam

===Kapitel 44===

''catuścatvāriṃśaḥ paṭalaḥ · haryardhapratiṣṭhāvidhiḥ''

'''44.1''' viṣṇvardhasya maheśasya pratiṣṭhāmadhunā śṛṇu pūrvoktalakṣaṇopetāṃ rudranārāyaṇātmikām

'''44.2''' pratimāṃ pūrvamāpādya gomayenopalepite kuṭṭime sthaṇḍilaṃ kṛtvā prāṅmukhaṃ tu niveśayet

'''44.3''' tatra pīṭhaṃ samādāya prokṣayitvā śivāmbhasā ratnāni nava vā pañca vinyasetpūrvavatsudhīḥ

'''44.4''' devaṃ tadūrdhve saṃsthāpya suśliṣṭaṃ kārayetsudhīḥ netronmīlanamapyasya kuryāttadvidhirucyate

'''44.5''' śilpikarmaṇi nirvṛtte netreṣu ca yathā purā anyatra sthaṇḍilaṃ kṛtvā śālibhirvimalaistataḥ

'''44.6''' tatra devaṃ samānīya tasyāgre vinyasenmadhu sarpiṣā payasā caiva pṛthakpātrasthitaṃ tathā

'''44.7''' teṣu haimaṃ vinikṣipya kamalaṃ svarṇadūrvayā sthaṇḍile sthāpya tatpārśve netrayordakṣiṇānyayoḥ

'''44.8''' madhunā payasā caiva tarpayetsomasūryayoḥ mantramuccārayanmantrī lalāṭe sarpiṣā tataḥ

'''44.9''' vahnibījamanusmṛtya pūrvavatsvarṇadūrvayā evaṃ kṛtvāpanīyātra sadyo yavanikāṃ sudhīḥ

'''44.10''' gobrāhmaṇāṃśca śaivādīndarśayeddeśikaḥ svayam pañcamṛtpañcagavyaiśca śuddhiṃ kuryāttato budhaḥ

'''44.11''' praṇavenaiva mantreṇa tataḥ śuddhodakena ca abhiṣicya tato nītvā grāmādau vā pradakṣiṇam

'''44.12''' tato jalādhivāsāya jalatīre niveśayet prāṅmukhāṃ pratimāṃ tatra kuryātpuṇyāhameva ca

'''44.13''' tatastattīrthatoyena devaṃ samabhiṣecayet kūrcena navavastreṇa veṣṭayetpratimāṃ śanaiḥ

'''44.14''' prākśirastūrdhvavaktraṃ tu śāyayetpūrvavatsudhīḥ paritastu digastrāṇi sādhipāni samarcayet

'''44.15''' uktaṃ kālaṃ tu tatraiva nītvā tasmājjalāśayāt snānamaṇṭapamānīya madhyame saṃniveśayet

'''44.16''' prāṅmukhāṃ pratimāṃ mantrī tatra vastrādikaṃ tyajet tato gandhāmbunā devamabhiṣicya harīśayoḥ

'''44.17''' gāyatryābhyarcanaṃ cāpi puṇyāhaṃ tatra kārayet badhvā pratisaraṃ haimaṃ savyahaste hṛdā tadā

'''44.18''' tataśca kūrcavastrābhyāṃ veṣṭayetpratimāṃ sudhīḥ kevaloktaprakāre tu maṇṭape saṃskṛte sudhīḥ

'''44.19''' madhyame vedikāyāstu sthaṇḍile lakṣaṇānvite śayane pūrvavatklṛpte prokṣite tu śivāmbhasā

'''44.20''' śāyayetprākśiraskāṃ tāṃ pratimāmūrdhvavaktrakām tataḥ pītāmbareṇāpi raktenāpyatha veṣṭayet

'''44.21''' śivagāyatrimuccārya viṣṇugāyatrimeva ca pūjayedgandhapuṣpādyaiḥ kalaśānvinyasettataḥ

'''44.22''' pūrvoktalakṣaṇopetānhemaratnādisaṃyutān pratimāyāḥ śirobhāge rudranārāyaṇātmakam

'''44.23''' kumbhamekaṃ nyasetpaścātparito’ṣṭau ghaṭānapi vidyeśvarasamāyuktānnyasya puṇyāhamārabhet

'''44.24''' tataśca pūjayedhīmāndevatādhyānasaṃyutam āvāhanādibhirmantrairmūlamantraṃ samuccaran

'''44.25''' pradhānakumbhe paścāttu vidyeśānabhito yajet cakravartīnanantāntaṃ tato homaṃ samārabhet

'''44.26''' kuṇḍānāṃ saṃsthitiṃ tatra kalpayetkevale yathā kuṇḍeṣu mūrtidravyāṇi tadvadeva prakalpayet

'''44.27''' pradhānakuṇḍe tadrūpaṃ rudranārāyaṇātmakam dhyātvā saṃpūjya gandhādyaistatra homaṃ prakalpayet

'''44.28''' tato mūlena cāṅgaiśca pūrvavaddhomamācaret dravyānte vyāhṛtiṃ hutvā pratidravyamatandritaḥ

'''44.29''' pratimāṃ hotṛbhiḥ sārdhaṃ hṛdayādisu saṃspṛśet tattadaṅgaiḥ krameṇaiva tato homaṃ samācaret

'''44.30''' homakāle prayuñjīta caturdikṣu ṛgādibhiḥ vedairadhyayanaṃ cāstrajapamīśānagocare

'''44.31''' tataḥ kumbhagatānāṃ tu devānāṃ ca yathāvidhi havirdattvādhivāsaṃ taṃ samāpyaivaṃ puroktavat

'''44.32''' prabhāte hotṛbhiḥ sārdhaṃ kṛtanityakriyastadā praviśya maṇṭapaṃ tatra kuṇḍasthānarcayetkramāt

'''44.33''' kṛtavidyātanurmantrī tataḥ pūrṇāṃ sruvāhutim sarvatra mūlamuccārya dāpayeddeśikottamaḥ

'''44.34''' sumuhūrte sulagne tu nakṣatrakaraṇānvite devamutthāpya saṃsthāpya snānavedyāṃ samāhitaḥ

'''44.35''' vastrakūrcādikaṃ sarvamastramantreṇa cotsṛjet pañcagavyena tāṃ paścātpratimāmabhiṣecayet

'''44.36''' tataḥ śuddhodakenāpi praṇavenaiva mantravit tataḥ kumbhānsamuddhṛtya kṛtvā dhāmapradakṣiṇam

'''44.37''' pratimāgre samānīya saṃsthāpya ca yathā purā tadrūpaṃ hṛdi kṛtvātha tataḥ kumbhāmbhasi sthitam

'''44.38''' kṛtvā kūrcāmbhasā mantrī tayormūlamanusmaran pratimāyāstu hṛddeśe mantrarūpaṃ nyasetsudhīḥ

'''44.39''' kumbhāmbhasā ca saṃsnāpya krameṇa svasvamantrataḥ tato bere nyasenmantrī mantrānetānanukramāt

'''44.40''' praṇavaṃ mūrdhni vinyasya gāyatrīṃ vadane nyaset mūlamantraṃ hṛdi nyasya cāṅgānyaṅgeṣu ca kramāt

'''44.41''' astraṃ ca dordvayornyasya mātṛkāḥ pūrvavannyaset tataḥ śuddhodakenāpi praṇavenābhiṣecayet

'''44.42''' mālābharaṇavastrādyaiḥ kṛtvā pūjāmanukramāt prabhūtaṃ cca havirdattvā tāmbūlaṃ ca pradāpayet

'''44.43''' utsavaṃ ca tataḥ kuryādgrāmādiṣu yathāvidhi

===Kapitel 45===

''pañcacatvāriṃśaḥ paṭalaḥ · ardhanārīśvarapratiṣṭhāvidhiḥ''

'''45.1''' gauryardhasya maheśasya pratiṣṭhāvidhimapyatha śṛṇu sarvaṃ samāsena vakṣyamāṇaṃ mahādhunā

'''45.2''' pūrvoktalakṣaṇopetāṃ pratimāṃ kāñcanādibhiḥ vidhāya ratnanyāsaṃ tu pūrvavatparikalpayet

'''45.3''' nayanonmīlanaṃ paścātkuryāttadvidhirucyate śilpikarmavinirmukte tannetre ca yathā purā

'''45.4''' anyatra sthaṇḍilaṃ kṛtvā vidhivattasya madhyame saṃsthāpya prāṅmukhaṃ paścāttasyāgre tu ghṛtaṃ madhu

'''45.5''' payaśca pātre nikṣipya pṛthakpṛthagatandritaḥ abhyukṣaṇaṃ tato mantrī tarpayetsvarṇadūrvayā

'''45.6''' dakṣiṇetarayorakṣṇormadhu dugdhamathordhvake netre tu sarpirmantrāntaiḥ somasūryāgnipakṣakaiḥ

'''45.7''' pūrvavadbrāhmaṇādīṃśca darśayetpraṇavena tu pañcamṛtpañcagavyaistu kṛtvā śuddhiṃ ca pūrvavat

'''45.8''' puṇyāhaṃ vācayitvātra nītvā grāmapradakṣiṇam jalādhivāsanaṃ tatra kuryāttadvidhirucyate

'''45.9''' jalatīre samādāya pratimāṃ prāṅmukhāṃ sudhīḥ puṇyāhaṃ vācayitvātha tañjalairabhiṣecayet

'''45.10''' arghyaṃ tanmūrdhni vinyasya praṇavaṃ samudāharan saṃveṣṭya kūrcavastrābhyāṃ pratimāṃ hṛdayāṇunā

'''45.11''' pūrvavajjalamadhye tu śāyayetphalakopari tatroktamapi taṃ kālaṃ nītvā deśikasattamaḥ

'''45.12''' pūrvoktalakṣaṇopete maṇṭape saṃskṛte śubhe snānavedyāṃ samānīya pratimāṃ sthāpya mantravit

'''45.13''' vyapohya vastrakūrcaṃ ca dattvārghyaṃ praṇavena tu pañcagavyaistato’rcāṃ tāmabhiṣicya tathā budhaḥ

'''45.14''' gandhatoyena paścāttu brahmapañcakamuccaran abhiṣicya tataścāpi veṣṭayennavavāsasā

'''45.15''' sakūrcena śivābhyāṃ tu tataḥ kṛtvā namaskṛtim puṇyāhaṃ vācayitvātha bandhayetkautukaṃ hṛdā

'''45.16''' devasya dakṣiṇe haste pūrvavatparikalpayet śayane śāyayedarcāṃ pūrvavaddeśikottamaḥ

'''45.17''' tataḥ kumbhāṃśca tatraiva sthāpayecca yathā purā pūrvoktalakṣaṇopetān gandhodaparipūritān

'''45.18''' sakūrcānhemavastrāḍhyānpallavāḍhyānmanoramān gauryardhadevaṃ pūrvoktaṃ dhyātvāvāhya yathāvidhi

'''45.19''' sthāpayenmadhyame kumbhe tanmūlaṃ samanusmaran gandhādyaiśca tato’bhyarcya vidyeśānaṣṭadikṣvapi

'''45.20''' pūrvādiṣu kramāddevānarcayeddeśikaḥ sudhīḥ tato homaṃ ca kurvīta kevaloktaprakārataḥ

'''45.21''' pradhāne śivayoraṅgaiḥ samūlairhomamācaret śeṣakarma tathā sarvaṃ kevaloktavadācaret

'''45.22''' prabhāte vimale paścātkṛtanityakriyo guruḥ mūrtipaiḥ hotṛbhiḥ sārdhaṃ maṇṭapaṃ saṃpraviśya ca

'''45.23''' devān gandhādibhiḥ pūjya sumuhūrte sulagnake sarvatra mūlamantraistaiḥ pūrṇāṃ kṛtvā vicakṣaṇaḥ

'''45.24''' tataścārcāṃ samutthāpya sarvātodyasamanvitam snānavedyāṃ samādhāya vastrakūrcādikaṃ hṛdā

'''45.25''' vyapanīya śirasyarghyaṃ dattvā tāraṃ samuccaran puṇyāhaṃ vācayitvātha kumbhānutthāpya mantravit

'''45.26''' evaṃ pradakṣiṇaṃ kṛtvā devāgre saṃniveśya ca kṛtavidyātanurmantrī tadrūpadhyānapūrvakam

'''45.27''' kumbhāntasthaṃ tato devaṃ kūrcāgroddhṛtavāriṇā tanmantroccāraṇapūrvaṃ pratimāhṛdi vinyaset

'''45.28''' abhiṣicyātha kumbhena sarvātmānaṃ samuccaran pādyādyairarcayitvātha dīpāntaṃ mūlamuccaran

'''45.29''' prabhūtaṃ ca havirdattvā tāmbūlaṃ ca nivedayet utsavaṃ ca tataḥ kuryānnavasvekaṃ vidhānataḥ

'''45.30''' evaṃ yaḥ kārayenmartyo devyardhasthāpanaṃ param trisaptakulasaṃyuktaḥ śivaloke mahīyate

'''45.31''' dakṣiṇāntā kriyā sarvā saphalatvamavāpnuyāt kriyā śarīramityuktaṃ dakṣiṇā jīva ucyate

'''45.32''' kriyā dakṣiṇayā hīnā nirjīvā niṣphalā bhavet kriyāṇāṃ sarvaphaladāṃ dakṣiṇāṃ dāpayettataḥ

'''45.33''' āḍhyo’pi dakṣiṇāṃ dattvā kṣudrāṃ haste daridravat so’pyanyo ḍāmbhiko naiva yathoktaphalamāpnuyāt

'''45.34''' adhamā pañcaniṣkā syādācāryāya tu dakṣiṇā triguṇā madhyamā proktā ṣaḍguṇā cottamā bhavet

'''45.35''' tasmāddaśāṃśaṃ hotṝṇāmadhyetṝṇāṃ tadardhataḥ jāpināṃ hotṛvattasya daivajñe triguṇaṃ bhavet

'''45.36''' sakalasya pratiṣṭhāyāṃ dakṣiṇā saṃprakīrtitā niṣkalasya pratiṣṭhāyāṃ tasmāttriguṇitā bhavet

===Kapitel 46===

''ṣaṭcatvāriṃśaḥ paṭalaḥ · vṛṣendrapratiṣṭhāvidhiḥ''

'''46.1''' utpattau tau tadā devau vāhanatvamupāgatau evamutpattiruddiṣṭā mantraṃ tatsthāpanocitam

'''46.2''' mūlakhyaṃ saṣaḍaṅgaṃ ca vakṣye gāyatriyānvitam saptamasvarasaṃyuktalakārāntaṃ janārdana

'''46.3''' bindunādasamāyuktaṃ mūlabījaṃ ca kathyate vṛṣabhāya namaścānte tāraṃ tatsthasya tasya tu

'''46.4''' yojayenmūlamantrasya tato’ṅgāni ca pūrvavat vakāreṇa samāyuktahṛdayādīni kalpayet

'''46.5''' tīkṣṇaśṛṅgāya vidmahe vedapādāya dhīmahi tanno vṛṣaḥ pracodayāditi gāyatrimuccaret

'''46.6''' evaṃ mantrāḥ samuddiṣṭāḥ sthāpanaṃ tu tataḥ śṛṇu ratnanyāsaṃ purā kuryātsthaṇḍile śālinirmite

'''46.7''' tanmadhye pīṭhamādāya sthāpayeddhṛdinā tataḥ māṇikyādīni navakaṃ madhyādiṣvapi vinyaset

'''46.8''' pīṭhe tu navaśaktīnāṃ mantraistatra vṛṣaṃ tataḥ samyagāropya nīrandhraṃ kṛtvā pīṭhasamanvitam

'''46.9''' vṛṣendramūlamantreṇa prokṣayedgandhavāriṇā ratnanyāsa iti prokto netronmīlanamucyate

'''46.10''' tādṛśe sthaṇḍile devaṃ saṃsthāpya śivasaṃnidhau deśikaḥ śilpinā tatra kārayennetramaṇḍalam

'''46.11''' tasya karmasamāptau tu netrayordeśikaḥ sudhīḥ vinyasya somasūryābhyāṃ netrayostu punaḥ punaḥ

'''46.12''' sarpirdugdhaṃ ca saṃtarpya dakṣiṇetarayoḥ kramāt svarṇadūrvāṅkurābhyāṃ tu vṛṣagāyatrimantrataḥ

'''46.13''' pracchannapaṭamāvarjya brāhmaṇāngāṃ ca darśayet śuddhiṃ kṛtvā tato mantrī pañcamṛtpañcagavyakaiḥ

'''46.14''' vṛṣagāyatrimantreṇa gandhatoyena secayet tatra tasyocitairdravyaiḥ śuddhiṃ kṛtvā punaḥ punaḥ

'''46.15''' alaṃkāraṃ vṛṣe kṛtvā nītvā grāmapradakṣiṇam jale’dhivāsayetpaścādvṛṣaṃ saṃveṣṭya vāsasā

'''46.16''' mālākūrcasamāyuktaṃ vṛṣagāyatrimantrataḥ tatastasmātsamānīya snānamaṇṭapamadhyame

'''46.17''' pañcagavyādinā snāpya vṛṣagāyatrimuccaran sauvarṇaṃ kautukaṃ tasya savyaśṛṅge tu bandhayet

'''46.18''' veṣṭayetkūrcavastrābhyāṃ tanutrāṇaṃ samuccaran pūrvoktalakṣaṇopetamaṇṭapādiṣu kalpayet

'''46.19''' kuṇḍāni paritastatra caturaśrārdhacandrake vṛttaṃ trikoṇakaṃ caiva śāṃkare padmameva ca

'''46.20''' gomayenopalipyātha puṇyāhaṃ ca prayojayet sthaṇḍilaṃ vidhinā kṛtvā padmamālikhya tatra vai

'''46.21''' śayanaṃ pūrvavatkṛtvā yathāpūrvavadarcayet sarvātmanāṇunābhyukṣya vṛṣendraṃ tatra śāyayet

'''46.22''' pratyagdvārā samānīya śayane puṣpakīrṇake śaṅkhadundubhinirghoṣaiḥ sāmavedasamīraṇaiḥ

'''46.23''' pūrvoktalakṣaṇopetaṃ pradhānaṃ toyapūritam hemakūrcasuvastrāḍhyaṃ gandhacandanacarcitam

'''46.24''' kakutpārśve nyaseddhīmānvṛṣagāyatrimantrataḥ tataśca paritaḥ paścādaṣṭau kumbhāṃśca bhājitān

'''46.25''' tadardhaparimāṇāṃśca nyaseddikṣu vidikṣu ca teṣu cāṣṭau diśādhīśāḥ śakrādyāḥ saṃsthitāḥ kramāt

'''46.26''' tatastu deśikaḥ śānto navāmbaradharaḥ śuciḥ dhṛtapañcāṅgabhūṣaśca soṣṇīṣaḥ sottarīyakaḥ

'''46.27''' maunī dehaṃ śivīkṛtya prasannaḥ priyadarśanaḥ vṛṣendrarūpaṃ smṛtvā tu hṛdi paṅkajagahvare

'''46.28''' prāṇāyāmasamāyuktaṃ hṛdayāgresaraṃ vṛṣam puṣpairañjalimāpūrya kumbhāmbhasi manorame

'''46.29''' āvāhanādikaṃ sarvaṃ kṛtvā pūrvoktavatsudhīḥ mūlamantraṃ nyasetsāṅgaṃ prathame vṛṣamarcayet

'''46.30''' gandhapuṣpādibhiḥ sarvairlokapālāṃśca pūjayet vṛṣendrasya tu mudgānnamanyeṣāṃ śuddhamucyate

'''46.31''' tato homaṃ prakurvīta deśikaḥ sādhakaiḥ saha agnikāryoktamārgeṇa sthāpya kuṇḍeṣu pāvakam

'''46.32''' pūrvādiṣvindrakīnāśapāśisomānkrameṇa tu pradhāne vṛṣabhendraṃ ca samāvāhyārcayettataḥ

'''46.33''' samidājyacarūm̐llājāṃstilaniṣpāvamudgakān sāṅgena mūlamantreṇa juhuyātkramaśaḥ punaḥ

'''46.34''' plakṣodumbarakāśvatthavaṭāḥ pūrvāditaḥ kramāt pradhāne tu palāśaśca samiditthaṃ prakalpayet

'''46.35''' dravyānte vyāhṛtiṃ hutvā tattanmantraiḥ spṛśedvṛṣam vṛṣagāyatrimantreṇa pratikuṇḍaṃ ca sarpiṣā

'''46.36''' daśāhutiṃ tato hutvā pariṣicya samāpayet homakāle prayuñjīta dikṣvadhyayanamuttamam

'''46.37''' śāṃkare’strajapaḥ kāryaḥ sarvātodyasamanvitam evaṃ kṛtvādhivāsaṃ tu tyaktvā rātriṃ tu jāgarāt

'''46.38''' prabhāte vidhivatsnātvā nityakarma samāpya ca praviśya maṇṭapaṃ tatra kumbhasthānarcayetsurān

'''46.39''' pūrṇāhutiṃ ca mūlena sarvatra juhuyātkramāt sumuhūrte sulagne tu mantranyāsaṃ samācaret

'''46.40''' tadardhaṃ vṛṣamutthāpya snānavedyāṃ tu vinyaset vastrakūrcādikaṃ sarvamapanīya vicakṣaṇaḥ

'''46.41''' arghyaṃ dattvā vṛṣendrasya mūlamantreṇa mūrdhani vṛṣagāyatrimantreṇa gandhodamabhiṣecayet

'''46.42''' tataḥ kumbhānsamādāya kṛtvā dhāmni pradakṣiṇam vṛṣāgre sthaṇḍilaṃ kṛtvā pūrvavatpūjayettataḥ

'''46.43''' pradhānakumbhasaṃsthaṃ ca dhyātvā ca vṛṣabheśvaram tasmātkūrcāmbhasā mūrdhni sravatā mūlamuccaran

'''46.44''' vṛṣendramantradehaṃ tu vinyasecchāntamānasaḥ aṅgāni ca tadaṅgeṣu hṛdayādīni vinyaset

'''46.45''' lokapālaghaṭaiścāpi tatrasthairabhiṣecayet arghyādibhiśca saṃpūjya naivedyāntairyathākramam

'''46.46''' mālābharaṇavastrādyairalaṃkṛtya vṛṣeśvaram calaṃ cetsthāpayedagre divyaliṅgasya deśikaḥ

'''46.47''' acale sthāpitasyaiva mantranyāsaṃ samācaret vṛṣastiṣṭhati vā yatra devena saha viṣṭare

'''46.48''' sahākṣyunmīlanādīni kṛtvā karmāṇi mantravit pradhānakuṇḍe tasyāpi homaṃ mūlena kārayet

'''46.49''' aṅgaiścādyairnavaikena pratyekaṃ tu śatāhutim kumbhanyāsaśca kartavyo devakumbhasamīpake

'''46.50''' śeṣaṃ karma ca kurvīta devadevyoranantaram evaṃ saṃsthāpya vidhivadvṛṣendraṃ putravṛddhidam

'''46.51''' sarvānkāmāṃśca saṃprāpya dehānte tu śivaṃ vrajet

===Kapitel 47===

''saptacatvāriṃśaḥ paṭalaḥ · brahmapratiṣṭhāvidhiḥ''

'''47.1''' pratiṣṭhāṃ brahmaṇo vakṣye dharmakāmārthamokṣadām maṇṭape pūrvavatklṛpte pūrvādicatasṛṣvapi

'''47.2''' dikṣu kuṇḍāni kurvīta caturaśrārdhacandrake vṛttaṃ trikoṇakaṃ caiva padmamīśānagocare

'''47.3''' sarvakarma tataḥ kuryāttasya saṃskārapūrvakam brāhmamarcāṃ tataḥ kuryānnītvā ca snānamaṇṭapam

'''47.4''' netronmīlanakarmādyāḥ pūrvavatparikalpayet caturṣvapi mukheṣveṣu nayaneṣvaṣṭasu kramāt

'''47.5''' pūrvavanmadhusarpirbhyāṃ tarpayenmantravittamaḥ netrayoḥ prativaktraṃ tu sūryasomāṇumuccaran

'''47.6''' pūrvavaccheṣakarmāṇi tatra kuryādvicakṣaṇaḥ tatastāṃ pratimāṃ mṛdbhiḥ pañcabhiḥ pañcagavyakaiḥ

'''47.7''' śodhayetkṣālayetpaścādbrahmagāyatrimuccaran puṇyāhaṃ vācayitvātra mālākūrcasamāvṛtam

'''47.8''' beraṃ navāmbareṇaiva veṣṭayitvā jalāśayam nītvā tajjalamadhye tu nābhidaghne jale sudhīḥ

'''47.9''' prākchiraskāṃ tu tāṃ tatra śāyayetpratimāṃ tataḥ tatrāpi pūrvavannītvā kālaṃ beraṃ samānayet

'''47.10''' snānamaṇṭapamadhye tu nālāvaṭasamanvite vedikāyāṃ tu tāṃ nyasya tyaktvā kūrcādikaṃ tataḥ

'''47.11''' gāyatryā praṇavenāpi gandhodenābhiṣecayet puṇyāhaṃ vācayitvātra bandhayetkautukaṃ hṛdā

'''47.12''' mālābhirlambakūrcena veṣṭayetpratimāṃ tataḥ tato maṇṭapavedyāṃ tu sthaṇḍilaṃ tatra kalpayet

'''47.13''' pūrvavacchayanaṃ cāpi puṇyāhaṃ tatra kārayet vāstuhomādikaṃ sarvaṃ pūrvavatparikalpayet

'''47.14''' tato devaṃ samānīya paścimenottareṇa vā dvāreṇa tatra śayyāyāṃ śāyayetpraṇavena tu

'''47.15''' tato beraṃ samācchādya pītenāhatavāsasā arghyaṃ dattvātha śirasi praṇavaṃ samudāharan

'''47.16''' brahmakumbhaṃ tadā tatra droṇapūraṃ manoramam veṣṭitaṃ sitasūtreṇa gandhodaparipūritam

'''47.17''' hiraṇyapadmasaṃyuktaṃ sakūrcaṃ sāpidhānakam āveṣṭyāhatavastrābhyāṃ sthāpayedvedimadhyame

'''47.18''' paritaśca tataḥ kumbhāṃstādṛśānapi vinyaset tadardhaparimāṇāṃśca tadartheṣu yajetkramāt

'''47.19''' caturbhujaṃ caturvaktramāsīnaṃ kamalāsane baddhapadmāsanaṃ devaṃ hemābhaṃ śubhravāsasam

'''47.20''' varadābhayahastaṃ ca kamaṇḍalvakṣadhāriṇam dhyātvā kumbhāmbhasi sthāpya mūlamantraṃ samuccaran

'''47.21''' āvāhanādikaṃ kṛtvā gandhapuṣpādibhiryajet lokapālānyathāsthānaṃ tattanmantraiḥ samarcayet

'''47.22''' tato homaṃ prakurvīta kuṇḍeṣu paritaḥ kramāt agnikāryoktamārgeṇa sthāpya kuṇḍeṣu pāvakam

'''47.23''' tattadāśādhipānkumbheṣvabhitaḥ pūjayettataḥ brahmāṇaṃ tu pradhāne’tra sāṅgaṃ saṃpūjayettataḥ

'''47.24''' samidājyacarūṃścāpi tilaveṇuyavānapi māṣaṃ tu kramato mantrairaṅgairmūlādibhirbudhaḥ

'''47.25''' juhuyācchatamardhaṃ vā tadardhaṃ vā pṛthakpṛthak pukṣodumbarakāśvatthavaṭāḥ pūrvaditaḥ kramāt

'''47.26''' palāśastu pradhānasya samiditthaṃ prakalpayet evaṃ kṛtvā tu sarveṣu gāyatryā homamācaret

'''47.27''' ājyenaikena tatsaṃkhyāṃ pūrvavatparikalpayet tato homaṃ samāpyaivaṃ pariṣicya ca pāvakam

'''47.28''' dadyātkumbhasthitānāṃ tu havistatra divaukasām rātriśeṣaṃ tato nītvā prātarutthāya deśikaḥ

'''47.29''' kṛtanityakriyaḥ śānto mūrtipaiḥ saha mantravit praviśya maṇṭapaṃ tatra dhṛtapañcāṅgabhūṣaṇaḥ

'''47.30''' soṣṇīṣaḥ sottarīyaśca kṛtvā mantrātmikāṃ tanum devānsaṃpūjya tatrasthān sa pūrṇāṃ tatra dāpayet

'''47.31''' vyāhṛtyantena mūlena pariṣicya ca pāvakam utthāpya śayanāddevaṃ nītvā dhāmni pradakṣiṇam

'''47.32''' rathādibhiḥ praviśyānto dattvārghyaṃ pratimāhṛdi navaratnādi vinyasya pūrvavatpīṭhikāvaṭe

'''47.33''' tatra vāgīśvarīṃ pūjya pīṭhapārśve rathāttataḥ avatīrṇāṃ tadā tatra pratimāṃ sthāpayetsudhīḥ

'''47.34''' mūlamantraṃ samuccārya mūlasyābhimukhaṃ tathā pūrvavatpīṭhaviśleṣasaṃdhiṃ kṛtvā vicakṣaṇaḥ

'''47.35''' śilpikarmāṇi niṣpādya visṛjyainaṃ saparyayā kṛtasnānastato mantrī kṛtvā mantrātmikāṃ tanum

'''47.36''' devānkumbheṣu saṃpūjya samuddhṛtyātha tānkramāt pradakṣiṇakramādantarbhavanaṃ saṃpraviśya ca

'''47.37''' yathāsthānaṃ ghaṭānagre sthaṇḍile sthāpya pūjayet gandhapuṣpādibhiḥ paścādarcāṃ śuddhodakena ca

'''47.38''' pañcamṛtpañcagavyaiśca śodhayitvābhiṣicya ca puṇyāhaṃ vācayitvā tu mantranyāsaṃ samarcayet

'''47.39''' uttarābhimukhaḥ samyagāsīnaḥ sukhamāsane hṛdayādīni cāṅgāni vinyaseddhastayordvayoḥ

'''47.40''' aṅguṣṭhādikaniṣṭhānte netrāntaṃ tu taladvayoḥ astraṃ vinyasya cāṅgeṣu hṛdayādi hṛdādiṣu

'''47.41''' vinyasetkramaśo mantrī mūlaṃ hṛnmadhyame nyaset evaṃ mantrātmikāṃ kṛtvā tanuṃ devaṃ vicintayet

'''47.42''' tataḥ kumbhārcitaṃ devaṃ mūlamantraṃ samuccaran pratimāhṛdi vinyasya pūrvavanmantravittamaḥ

'''47.43''' aṅgeṣvaṅgāni cāpyasya vinyaseddhṛdayādiṣu tato mūlaṃ samuccārya gandhapuṣpādibhiryajet

'''47.44''' prabhūtaṃ ca havirdattvā tāmbūlaṃ ca pradāpayet

===Kapitel 48===

''aṣṭacatvāraṃśiḥ paṭalaḥ · mātṛkāsthāpanavidhiḥ''

'''48.1''' mātṝṇāṃ sagaṇānāṃ tu sthāpanaṃ kathyate’dhunā śivālayeṣu yāmye syādgrāmādiṣvīśagocare

'''48.2''' saumye vā tatpraśastaṃ syānnadyādīnāṃ ca tīrake udyāne ca vane ramye parvate vā manorame

'''48.3''' vijane yatra kutrāpi sthāpayeddeśikottamaḥ śivālayeṣu grāmādau sthāpyā madhye tu vaiṣṇavī

'''48.4''' anyatra madhye cāmuṇḍāṃ sthāpayedvidhinā pumān mātaro lokarakṣārthaṃ brāhmyādyā nirmitāḥ purā

'''48.5''' brahmāṇī brahmaṇā sṛṣṭā maheśena maheśvarī kaumārī ṣaṇmukhenaiva vaiṣṇavī viṣṇunā tathā

'''48.6''' vārāhī yajñavārāheṇendrāṇīndreṇa cāsṛjat kālarātrimumā caiva rūpavāhanacihnakaiḥ

'''48.7''' taistairdevaiḥ samāḥ sarvāścāmuṇḍā cātibhīṣaṇā bhrukuṭīkuṭilā sā ca samastāriṣṭamardanī

'''48.8''' triṇetrā caturbhujā caiva piśācadhvajavāhanā māturutpattiruddiṣṭā śṛṇu mantrānataḥ param

'''48.9''' yakārādisakārāntān brāhmyādīnāṃ tu kalpayet bindunādasamāyuktānmūlamantrānataḥ param

'''48.10''' tattannāma caturthyantaṃ namaskāreṇa yojayet hakāraṃ vīrabhadrasya gaṇeśasya gakārakam

'''48.11''' evaṃ mūlāṃśca saṃkalpya cāṅgānyebhyaśca kalpayet pūrvavaddhṛdayādīni pratiṣṭhāvidhirucyate

'''48.12''' tadarthaṃ maṇṭapaṃ kuryātpūrvoktavidhinā saha tanmadhye vedikāṃ cāpi parito’gniniketanam

'''48.13''' yonyākāraṃ tu sarvāsu dikṣu kuṇḍaṃ prakalpayet īśānaśakragau kuṇḍau vṛttavedāśrakau matau

'''48.14''' śakraśaṃkarayormadhye padmakuṇḍaṃ prakalpayet maṇṭapasyātha saṃskāramalaṃkāraṃ ca pūrvavat

'''48.15''' netronmīlanakarmāṇi pṛthageva prakalpayet śilpinātha gurustāsāṃ madhu dugdhaṃ ca netrayoḥ

'''48.16''' tattannayanamantreṇa dakṣiṇetarayorapi kalpayeddhaimayā samyagdūrvayā kalpavittamaḥ

'''48.17''' netratrayayutānāṃ tu locane tu lalāṭake sarpiṣā tarpayetpaścādagnibījaṃ samuccaran

'''48.18''' hiraṇyanakhasaṃprotairaṅgulyagraistribhistataḥ tattannetreṣu sūryenduvahnibījāni vinyaset

'''48.19''' anyāsāṃ somasūryau ca vinyasellocanadvaye tataśca pañcagavyena tattaddhṛdayamuccaran

'''48.20''' abhiṣicyātha mṛdbhiśca pañcabhistāśca śodhayet gandhatoyena paścāttu pañcabrahmajapena tu

'''48.21''' abhiṣicya pṛthak paścātpuṇyāhaṃ vācayetsudhīḥ tatastāḥ pratimāḥ sarvāḥ kūrcamālābhiveṣṭitāḥ

'''48.22''' veṣṭayedvāsasā mantrī viśuddhena navena ca pṛthakpṛthak tato mantrī tāsāmarghyaṃ śirassu ca

'''48.23''' tattaddhṛdayamuccārya dadyātpaścādrathādibhiḥ grāmādi parito nītvā gatvā caiva jalāśayam

'''48.24''' sthāpanakramataḥ sarvā jalamadhye tu śāyayet parito dikpatīṃścāstrān gandhādyairarcayettataḥ

'''48.25''' jalādhivāsakālastu pūrvameva pradarśitaḥ tatastāḥ pratimāḥ sarvā vighnādyantāḥ krameṇa vai

'''48.26''' uddhṛtyāropya sāye tu syandanādīṃstathaiva ca snānamaṇṭapamānīya snānavedyāṃ tu vinyaset

'''48.27''' krameṇa vastrakūrcādīnapanīya ca deśikaḥ pañcamṛtpañcagavyaiśca śuddhiṃ pūrvavadācaret

'''48.28''' tataḥ puṇyāhamādau tu kṛtvā tāsāṃ śirassu ca arghyaṃ dattvā krameṇaiva pūrvavanmantravittamaḥ

'''48.29''' kautukaṃ bandhayettāsāṃ bījena hṛdayena tu vedikāyāṃ yathāpūrvaṃ kalpite sthaṇḍile sudhīḥ

'''48.30''' śayane pṛthagāstīrṇe pratimāstā yathākramam vīrādivighnaparyantāḥ śāyayedaṣṭadikṣu ca

'''48.31''' yā vātra madhye saṃsthāpyā tāṃ tanmadhye niveśayet prākśiraścordhvavaktrāstāḥ sarvāśca parikīrtitāḥ

'''48.32''' tāsāmupari kūrcaṃ tu puṣpavastrasamanvitam kuśān gandhaṃ nyasenmantrī tattaddhṛdayamuccaran

'''48.33''' vastrairāveṣṭya sadyastāstataḥ kumbhānniveśayet droṇapūrṇāndṛḍhāndravyaiḥ kāñcanādyaiśca nirmitān

'''48.34''' sitasūtravicitrāṃstān gandhodaparipūritān sakūrcānvastrahemāḍhyān gandhacandanacarcitān

'''48.35''' sitavastraiḥ susaṃveṣṭya pihitāṃśca pidhānakaiḥ śirasi dakṣiṇe tāsāṃ madhyātprabhṛti vinyaset

'''48.36''' puṇyāhaṃ vācayitvātra prokṣayedbrahmapañcakaiḥ tatastānpūjayetsarvān pūjāvidhirathocyate

'''48.37''' vedyā dakṣiṇapārśve tu sukhāsīna udaṅmukhaḥ prāṇāyāmatrayaṃ kṛtvā recakādikrameṇa tu

'''48.38''' dahanaṃ plāvanaṃ tatra bhūtaśuddhiṃ ca kalpayet madhyasthāyāṃ ca mūle tu karaśākhāsu vinyaset

'''48.39''' hṛdayādyastraparyantaṃ kaniṣṭhāṅguṣṭhakāntakam netraṃ hastatale nyasya mūlaṃ sarvāsu vinyaset

'''48.40''' evaṃ kṛtvā karanyāsamaṅganyāsamathācaret hṛdayādiṣaḍaṅgāni yathāsthānaṃ prayojayet

'''48.41''' tato madhyasthitāṃ devīṃ dhyātvā hṛtpadmamadhyame tāṃ ghaṭasthāṃ ghaṭe devīṃ mūlamantraṃ samuccaran

'''48.42''' āvāhya śeṣitaṃ karma sarvaṃ pūrvavadācaret tattadaṅgāni vinyasya yathāsthānaṃ samarcayet

'''48.43''' evaṃ krameṇa pūrvādi nyasya dhyātvā tu pūjayet tato homaṃ tu kurvīta tadvidhānamathocyate

'''48.44''' agnikāryoktamārgeṇa sthāpya kuṇḍeṣu pāvakam pradhānakuṇḍe tāṃ devīṃ madhyāstrāntaṃ pṛthagyajet

'''48.45''' prāgādiṣu tataḥ śeṣā vīrādyāśca kramādyajet deśikaḥ syātpradhānasya hotā śeṣeṣu cāṣṭasu

'''48.46''' kuṇḍeṣu sādhakāḥ proktā hotāraḥ putrakāstu vā palāśaudumbarāśvatthavaṭaplakṣamayūrakāḥ

'''48.47''' śamīkhadirabilvāśca vīrādīnāṃ yathākramam samidvṛkṣāḥ samuddiṣṭāḥ śeṣadravyamathocyate

'''48.48''' ājyaṃ caruṃ tathā lājatilasarṣapameva ca etāni sarvakuṇḍeṣu homayeddhṛdayādibhiḥ

'''48.49''' tanmūlena samiddhomaṃ sarvatra prathamaṃ haret tattadaṅgairyathāhomaṃ tattatkuṇḍeṣu homayet

'''48.50''' pratidravyāvasāne tu vyāhṛtyante spṛśedguruḥ tattadaṅgeṣu tanmantraṃ sarvāsāṃ hotṛbhiḥ saha

'''48.51''' evaṃ home tu nirvṛtte devatāstāḥ samarcayet pariṣicya tatasteṣu kuṇḍeṣvagniṃ yathāvidhi

'''48.52''' devatānāṃ haviḥ paścāddadyātsamyagyathāvidhi nītvā rātriṃ ca taccheṣāṃ prabhāte hotṛbhiḥ saha

'''48.53''' kṛtvā nityakriyāṃ sarvāṃ saṃpraviśyātha maṇṭapam kumbhasthā devatāḥ sarvāḥ samabhyarcya yathāvidhi

'''48.54''' kuṇḍeṣu tāstathā yaṣṭvā tattanmūlena dāpayet pūrṇāhutiṃ tatastatra pratimāstāḥ samarcayet

'''48.55''' tata uddhṛtya tāḥ sarvāḥ krameṇa pratimāḥ śanaiḥ apanīya ca vastrādyaṃ tattaddhṛdayamuccaran

'''48.56''' tattacchirasi dattvārghyaṃ madhyamāṃ pratimāṃ tataḥ pradakṣiṇaṃ samānīya prāsādāntaḥ praviśya ca

'''48.57''' ratnāni vidhivannyasya bījāni sahṛdāni ca abhyarcya devīṃ tatraiva mūlamantreṇa tacchiraḥ

'''48.58''' saṃspṛśya sthāpayeddevīṃ śilpivaryasamanvitaḥ śeṣāśca sagaṇāḥ sarvā mātṝsteṣvapi teṣu ca

'''48.59''' pṛthagratnādiyukteṣu savyavāmakrameṇa tu sthāpayetpūrvavaddhīmān sarvāśca svasvamūlataḥ

'''48.60''' uttarābhimukhāḥ sarvā vīreśaḥ paścimonmukhaḥ vighneśaḥ prāṅmukhastatra sthāpane tu prakīrtitāḥ

'''48.61''' tataḥ snātvā gururdhāmni puṇyāhaṃ tatra vācayet pañcabrahmabhirabhyukṣya bahirniṣkramya deśikaḥ

'''48.62''' sumuhūrte sulagne tu kumbhānuddhṛtya tānkramāt pradakṣiṇamupāvṛtya prāsādāntaḥ praviśya ca

'''48.63''' tattadagreṣu tānkumbhān sthaṇḍilopari vinyaset pūrvavanmantritāṅgastu dhṛtapañcāṅgabhūṣaṇaḥ

'''48.64''' soṣṇīṣaḥ sottarīyaśca tattatkumbhānpuroktavat mantranyāsaṃ tataḥ kuryātsthāpanakramaśo budhaḥ

'''48.65''' pṛthakpṛthak samabhyarcya kalaśairabhiṣecayet teṣu madhyasthitāṃ tasyā vāmādyāḥ paritaḥ sthitāḥ

'''48.66''' tataścandanagandhodakarpūrāgarugandhinā ālipya pratimāḥ sarvā vastrābharaṇabhūṣitāḥ

'''48.67''' prabhūtaṃ ca havirdattvā pṛthak tāsāṃ yathāvidhi tāmbūlaṃ mukhavāsena dadyāttāsāṃ pṛthak pṛthak

'''48.68''' acalasthāpanaṃ hyevaṃ mṛcchilā mṛṇmayāstu vā citrābhāsāśca yāstāsāṃ ratnanyāsādikāḥ kriyāḥ

'''48.69''' yathāyuktyā prayuñjīta caleṣvapi tathā nayet ābhāsamṛṇmayānāṃ tu pīṭhamagre tu kalpayet

'''48.70''' tāsāṃ pūjāvidhiṃ kuryādanyatraiva śivālaye mātṛtantroktamārgeṇa mātṛmantrakṛtāgnike

===Kapitel 49===

''ekonapañcāśaḥ paṭalaḥ · vināyakasthāpanavidhiḥ''

'''49.1''' vināyakasya vakṣyāmi tadutpattipurassaram sthāpanaṃ tasya mantraṃ ca śṛṇu mattaḥ samāsataḥ

'''49.2''' purā mamomayā sārdhaṃ krīḍataḥ sarasastaṭe mānasasya gajāndṛṣṭvā kariṇīvarasaṃyutān

'''49.3''' krīḍataśca yathākāmaṃ taṭe tasminmanorame tato ramyamṛge caiva vāme’pyatra jalāśaye

'''49.4''' gajarūpadharau bhūtvā prītyarthaṃ putramuttamam gajāsyaṃ tu samutpādya manasā saha tena ca

'''49.5''' krīḍāvo’tha yathākāmamityukto’haṃ ca yattadā yaduktaṃ karma tatsarvaṃ kṣaṇena kṛtavānaham

'''49.6''' tataścirādgajakrīḍāṃ kṛtvā viramitastadā devakāryaṃ vicintyeha jagatāṃ ca hitecchayā

'''49.7''' devārisūdanaṃ putramumayā jagatastadā caturdaśavidhasyāsya kṛtavānagranāyakam

'''49.8''' tenaiva tasya nāmāpi vināyaka iti śrutam dattavānasmi tasyāhamaṣṭādaśagaṇeśatām

'''49.9''' vighnānāmīśvaratvaṃ ca svasvāmitvamatulyatām tatastaṃ sarvadevāśca purandarapurogamāḥ

'''49.10''' svaprayojanasiddhyarthaṃ karmārambheṣvapūjayan evamutpattiruddiṣṭā tasya mantramatha śṛṇu

'''49.11''' prathamasvarasaṃyuktaḥ khaparo mūlamucyate bindunādasamāyuktaścaturthyantagaṇeśayuk

'''49.12''' namaskārāntasaṃyuktaḥ sarvasiddhiprado bhavet hṛdayādīni cāṅgāni pūrvavatparikalpayet

'''49.13''' gāyatrī ca bhavedeṣā sarvakāmaphalapradā gaṇeśvarāya vidmahe hastivaktrāya dhīmahi

'''49.14''' tanno dantī pracodayāditi gāyatrimuccaret evaṃ sāṅgaḥ sagāyatrīmantra eṣa udīritaḥ

'''49.15''' tasya pratiṣṭhāyogyaṃ yatsthānaṃ devālayeṣu ca grāmādau paścime bhāge dakṣiṇe vā prakalpayet

'''49.16''' liṅgasthāpanayogyaṃ yatsthānaṃ pūrvamudāhṛtam tatrāpi sthāpanaṃ kuryānmaṇṭapaṃ caturaśrakam

'''49.17''' dakṣiṇe cottare vāpi tatpūrvaṃ maṇṭapaṃ bhavet kuṇḍāni parito dikṣu vidikṣu paritaḥ sudhīḥ

'''49.18''' caturaśraṃ dhanurvṛttaṃ trikoṇaṃ ca yathākramam vidikṣu caturaśrāṇi kuṇḍāni parikalpayet

'''49.19''' śakraśāṃkarayormadhye pradhānaṃ padmameva hi saṃpattau navabhirhomairalābhe pañcabhirbhavet

'''49.20''' sthāpanaṃ pañcahome syādaiśānyāṃ tatpradhānakam maṇṭape pūrvavatsarvaṃ saṃskāraṃ saṃprakalpayet

'''49.21''' tato’kṣyunmīlanaṃ kuryānmaṇṭape samalaṃkṛte maṇṭape sthaṇḍile sthāpya prāṅmukhaṃ śilpinā tataḥ

'''49.22''' pracchannapaṭamāveṣṭya navavastreṇa veṣṭayet bhrūrekhāṃ pakṣmarekhāṃ ca kṛṣṇamaṇḍalameva ca

'''49.23''' dṛṣṭiṃ ca kṛtahastena kārayellakṣaṇānvitam svarṇasūcyā tato mantrī dūrvayā svarṇabhūtayā

'''49.24''' madhyājyadugdhaiḥ pātrasthaiḥ suvarṇakalaśāñcitaiḥ prokṣitairastramantreṇa locaneṣu yathākramam

'''49.25''' tarpayetpūrvavanmantrī tato dhenuṃ pradarśayet pañcamṛtpañcagavyaiśca śuddhiṃ kṛtvāstramuccaran

'''49.26''' pradakṣiṇaṃ tato nītvā grāmādau ca jalāśayam tataḥ praviśya tattīre sthāpya devaṃ vināyakam

'''49.27''' puṇyāhaprokṣaṇaṃ kṛtvā sakūrcaṃ mālayā saha āveṣṭyāhatavastreṇa cāvagāhya jalaṃ tataḥ

'''49.28''' pūrvavacchāyayedādau nītvā kālaṃ ca pūrvavat ānīya ca tataḥ snānamaṇṭape vedikopari

'''49.29''' saṃsthāpya prāṅmukhaṃ devaṃ pañcagavyena secayet gāyatryā gandhatoyena tataḥ praṇavamuccaran

'''49.30''' abhiṣicya tato mantrī badhvā pratisaraṃ budhaḥ kūrcena vā susaṃveṣṭya vastreṇa susitena ca

'''49.31''' pūrvavanmaṇṭape kṛtvā sthaṇḍilaṃ śayanāni ca pūrvavattatra devāṃśca pūjayitvā yathākramam

'''49.32''' tato devaṃ samānīya prākśiraścordhvavaktrakam śāyayecchayane mantrī mūlamantraṃ samuccaran

'''49.33''' tataḥ kumbhaṃ tu hemādinirmitaṃ toyapūritam pūrvavatsaṃskṛtaṃ tatra śirobhāge’tha dakṣiṇe

'''49.34''' vinyasya paritaḥ kumbhānaṣṭau cāpyatha tādṛśān saṃsthāpya teṣu madhyādi devāṃścātha samarcayet

'''49.35''' vedyāstu dakṣiṇe pārśve prāṅmukho vāpyudaṅmukhaḥ āsane sukhamāsīno deśikaḥ kalpayettanum

'''49.36''' tathā mantrātmikāṃ tatra vidhirasya nigadyate aṅgāni karaśākhāsu hṛdayādīni vinyaset

'''49.37''' aṅguṣṭhādikaniṣṭhāntamastraṃ hastatale nyaset punaścaiva ṣaḍaṅgāni yathāsthānaṃ gurustataḥ

'''49.38''' evaṃ mantratanurbhūtvā gaṇeśaṃ hṛdi vinyaset prāṇāyāmatrayaṃ kṛtvā hṛtkuśeśayamadhyagam

'''49.39''' trinetraṃ caturbhujaṃ dhyātvā raktaṃ raktāmbarojjvalam ekadantaṃ pralamboṣṭhaṃ nāgayajñopavītinam

'''49.40''' ṭaṅkadantau dadhatsavye phalapāśau tathāpare taruṇādityasaṃkāśaṃ gajavaktraṃ vicintayet

'''49.41''' tato vaināyake deve gandhacandanacarcite gandhamālyāvṛte gandhapuṣpadhūpādibhiḥ kramāt

'''49.42''' pūjite taddhṛdā tasmin sudhāmudrāprarocite hṛdayāntaṃ samāvāhya gaṇeśaṃ mudrayā tathā

'''49.43''' sthāpinyātha ca saṃsthāpya nirodhinyā nirudhya ca saṃnidhīkṛtya cāpyenaṃ saṃnidhānyā gajānanam

'''49.44''' pūjayenmūlamantreṇa mantramūrtiṃ gaṇeśvaram gandhapuṣpādibhiḥ samyak sarvabhakṣyasamanvitam

'''49.45''' vedadhvanisamāyuktaṃ sarvātodyasamāyutam tataśca varadaṃ vīraṃ vighneśaṃ ca gajānanam

'''49.46''' bhakṣyapriyaṃ gajakarṇaṃ lamboṣṭhaṃ vighnanāśanam pūrvādiṣvabhitaḥstheṣu ghaṭeṣvaṣṭasu vinyaset

'''49.47''' arcayedgandhapuṣpādyaiḥ svanāmapadamantrakaiḥ tatotthāyārghyahastastu homakuṇḍāntare kṣipet

'''49.48''' ācāryo hotṛbhiḥ sārdhaṃ sādhakaiḥ putrakaistu vā kuṇḍasaṃskārapūrvāṇi kṛtvā karmāṇi śāstrataḥ

'''49.49''' homayeyuḥ kramāccaiva dravyāṇyetāni mantrataḥ samidājyacarūm̐llājānsaktukāṃśca yavāṃstilān

'''49.50''' ṣaḍaṅgairmūlamantraiśca juhuyātkramaśaḥ samam bhakṣyāṇi ca phalānyatra svādūni ca bahūni ca

'''49.51''' homayeyuśca mūlena yathālābhaṃ surottama gaṇānāṃ ceti mantreṇa sarpiṣā tu śatāhutīḥ

'''49.52''' gāyatryā ca śataṃ hutvā sarvakuṇḍeṣu mantravit dravyānte vyāhṛtiṃ hutvā samutthāya hotṛbhiḥ

'''49.53''' tattaddravyāvasāne tu tattanmantramanusmaran tattadaṅgāni saṃspṛśya spaśayeddhotṛbhiḥ saha

'''49.54''' yathāsthānaṃ tu kuṇḍeṣu varadādīnsamarcayet pradhāne gaṇeśvaraṃ devaṃ taistairmantrairdaśāhutīḥ

'''49.55''' sarpiṣā juhuyātteṣāṃ homānteṣu yathākramam plakṣodumbarakāśvatthavaṭāḥ pūrvāditaḥ kramāt

'''49.56''' śamyapāmārgakhadirāḥ koṇeṣvarko’pyudāhṛtaḥ palāśastu pradhānasya samiddoṣavivarjitā

'''49.57''' homakāle yathāsthānaṃ sthitairadhyayanaṃ bhavet homānte sarvadevānāṃ kumbhasthānāṃ dadeddhaviḥ

'''49.58''' rātrāvevaṃ kriyāṃ kṛtvā prabhāte sthāpayedbudhaḥ ācāryo mūrtipaiḥ sārdhaṃ snātvā kṛtvā ca naityakam

'''49.59''' praviśya maṇṭapaṃ tatra devānabhyarcya pūrvavat pūrṇāhutiṃ tu mūlena sarvatrāpi pradāpayet

'''49.60''' utthāpya śayanāddevaṃ prāsādaṃ tu pradakṣiṇam samānīya praviśyāntaḥsthānaṃ deśikasattamaḥ

'''49.61''' sthāpayecchilpinā sārdhaṃ gaṇeśaṃ garbhaveśmani yathoktasthānato nyasya pīṭhasya padamadhyame

'''49.62''' ratnāni lohadhātūni gandhādyoṣadhisaṃyutam bījāni ca gururnyasya sthāpayettatra devatām

'''49.63''' śliṣṭaṃ kṛtvā tato mantrī puṇyāhaṃ tatra vācayet snātvācamya śucirbhūtvā śāntacittastvatandritaḥ

'''49.64''' tato maṇṭapamāsādya kṛtamantratanurguruḥ pūrvavatpūjayetkumbhāngandhapuṣpādibhiḥ kramāt

'''49.65''' tato gaṇeśakumbhaṃ tamutthāpya śayanāttadā pradakṣiṇaṃ parigrāhya praviśyāgre nidhāya ca

'''49.66''' sumuhūrte sulagne tu daivavitsaṃpradarśite dehaśuddhiṃ punaḥ kṛtvā mantrairmantrī prasannadhīḥ

'''49.67''' soṣṇīṣaḥ sottarīyaśca śvetavāsodharo mṛduḥ prasannaṃ tatra vinyasya mantradehaṃ gaṇeśvaram

'''49.68''' beradehe’tisūkṣmaṃ taṃ sthūlakūrcāmbhasā nyaset prāṇamūlaṃ tato vidvānkramādaṅgāni vinyaset

'''49.69''' sāṅgamūlaṃ tamabhyarcya gandhapuṣpādibhiḥ kramāt tato mūlaṃ tu tanmūrdhni lalāṭamukhayorapi

'''49.70''' galeṃ’sayośca bāhvośca karayorjaṭhare tathā nābhāvūrvośca jānvośca jaṅghayorgulphayorapi

'''49.71''' vinyasya prathamaṃ mantrī gandhapuṣpādibhiryajet tato’ṣṭau varadādīṃśca prāgādiparito nyaset

'''49.72''' nyasya tadvattathā teṣāṃ kumbhānkuryādyathākramam abhiṣicya tataḥ kumbhaistato devaṃ gaṇeśvaram

'''49.73''' vastrābharaṇamālādyairbhūṣayitvātha pāyasam apūpaṃ ghṛtasaṃyuktaṃ dattvā hṛdayamuccaran

'''49.74''' tāmbūlaṃ mukhavāsaṃ ca gaṇeśāya nivedayet lohadārusudhādīnāṃ berāṇāmapi devapa

'''49.75''' karmavyatyāsamapyatra ratnanyāsāntakaṃ tu yat saṃmataṃ sarvameva syātsarveṣāṃ sthāpaneṣvapi

'''49.76''' evaṃ gauṇaṃ samākhyātaṃ gaṇeśasthāpanaṃ param mukhye tu sthāpane viṣṇo viśeṣo’yaṃ nigadyate

'''49.77''' sarvatrāpi gaṇeśasya dhāma prāgdvāramiṣyate supraveśaḥ suvṛttaśca vāmanaḥ śaṅkhapālakaḥ

'''49.78''' mahāvīro bhairavaśca vīreśaścograrūpakaḥ ete’ṣṭau syurgaṇeśasya parivārā janārdana

'''49.79''' tāṃśca vedyāṃ tu paritaḥ pūrvādārabhya vinyaset kumbhasthāṃśca tathā dvārapālāvetau ca vinyaset

'''49.80''' dvārapārśvagatau vīramahāvīrau sudaṃṣṭriṇau agre cāsyaṃ tathā nyasya gaṇarājasya vāhanam

'''49.81''' sarvānetānnyasenmantrī svasvanāmapadānvitān etānapyadhivāsyaivaṃ pratiṣṭhānte yathāsthiti

'''49.82''' pīṭheṣu sthāpayenmantrī devāgrādi yathākramam evaṃ saṃsthāpito devaḥ sarvānkāmānprayacchati

'''49.83''' viśeṣātputrakāmastu sthāpayettaṃ gaṇeśvaram

===Kapitel 50===

''pañcāśaḥ paṭalaḥ · skandasthāpanavidhiḥ''

'''50.1''' skandasya sthāpanaṃ vakṣye tasyotpattipuraḥsaram tanmantraṃ tatsamāsena śṛṇu sarvaṃ surādhipa

'''50.2''' skando madaṅgasaṃbhūto madvīryo matparākramaḥ mayaiva hi purā sṛṣṭa umaputro jagaddhitaḥ

'''50.3''' agnibhūtaḥ sa caiveti tasyāgneyatvamucyate ayonijanmasaṃprāptaye tatsuravareṣvaham

'''50.4''' vaiśvānaramukhe pūrvaṃ madvīryaṃ tu nyaṣikta yat so’pi soḍhumaśaktastatpraviśya śaradhānakam

'''50.5''' sasarja tatra tadvīryaṃ tattu kālavaśātpunaḥ vyaktāṅgo’bhūtsurastatra dīptakālānalaprabhaḥ

'''50.6''' tenāgneyaḥ samuddiṣṭaḥ śarajanmā ca tena vai skandaḥ kumāraḥ senānīḥ subrahmaṇyo gurustathā

'''50.7''' etairanyaiśca bahubhirnāmabhiḥ samudīritaḥ skandayetsarvapāpebhya iti skandatvamasya vai

'''50.8''' kutsitānmārayatyeṣa kumāratvena kīrtitaḥ senānītvaṃ ca tasyāpi devasenābhirakṣaṇāt

'''50.9''' tasya pratiṣṭhā pūjā ca mantreṇaiva hi sādhyate tasmānmantraṃ pravakṣyāmi caturvargaphalapradam

'''50.10''' aṣṭamasya dvitīyānto dvitīyādyena saṃyutaḥ bījena prathamādyena saṃyukto mūlamucyate

'''50.11''' bindunādasamāyuktaścaturthyantena tena vai abhidhānena saṃyukto namaskārāntayojitaḥ

'''50.12''' aṅgāni hṛdayādīni pūrvavatparikalpayet subrahmaṇyāya vidmahe śaktihastāya dhīmahi

'''50.13''' tannaḥ skandaḥ pracodayāditi gāyatrimuccaran gāyatrī ca bhavettasya tatpratiṣṭhātra kathyate

'''50.14''' liṅgasthāpanayogyeṣu sthāpane sthāpanaṃ bhavet uktasthāneṣu saṃsthāpyo grāmādau ca śivālaye

'''50.15''' kalpite dhāmni tasyāgre pārśvayorubhayostataḥ pūrvavanmaṇṭapaṃ kṛtvā kuṇḍavedisamanvitam

'''50.16''' viśeṣo’yaṃ bhavettatra pradhānaṃ syātṣaḍaśrakam gomayālepite tasminpūrvavatsaṃskṛte tataḥ

'''50.17''' netronmīlanakarmāsya kuryādvai snānamaṇṭape ṣaḍvaktraikamukhā cāpi svatantrapratimā bhavet

'''50.18''' gauṇe tu pratimā sthāpyā bhavedekamukhā hare pratimāṃ sthaṇḍile sthāpya pūrvasya pūrvavatkṛte

'''50.19''' vartayennayanaṃ cātra hemasūcyā ca śilpinā tasya karmaṇi nirvṛtte prokṣayitvā kuśāmbhasā

'''50.20''' skandagāyatriyā paścāddvādaśākṣi kṣipetkramāt dakṣiṇetarayoścāpi nyasyārkendvoraṇū kramāt

'''50.21''' madhu dugdhaṃ ca hemādipātrasthaṃ prasthasaṃmitam tasyāgre sthaṇḍile sthāpya prokṣayitvā śivāmbhasā

'''50.22''' mudrayā cāmṛtīkṛtya tatrātho dhenusaṃjñayā haimayā dūrvayā mantrī dakṣiṇetarayorapi

'''50.23''' madhunā payasā caiva tarpayennetramuccaran trinetrāya dadettacca lalāṭe locane sudhīḥ

'''50.24''' agnimantraṃ tu vinyasya tarpayetsarpiṣā tathā tato yavanikāṃ tatra visṛjya yatibhūsurān

'''50.25''' gāṃ ca gāyatrimantreṇa darśayeddeśikottamaḥ pañcamṛtpañcagavyaiśca pratimāśuddhimādiśet

'''50.26''' tataśca gandhatoyena skandagāyatrimuccaran abhiṣicya tato nītvā grāmādau ca pradakṣiṇam

'''50.27''' tato jalāśayaṃ nītvā tattīre sthāpya deśikaḥ abhiṣicya tato vastrakūrcamālābhiratra tu

'''50.28''' pratimāṃ samyagāveṣṭya dattvārghyaṃ tasya mūrdhani niveśayejjalasyāntaḥ pūrvoktavidhinā sudhīḥ

'''50.29''' nītvā jalāntatastatra snānamaṇṭapamānayet tatraiva snānavedyāṃ tu sthāpyārcāṃ prāṅmukhāṃ tataḥ

'''50.30''' vastrakūrcādikaṃ nyasya skandagāyatrimuccaran abhiṣicyāmbunā kuryātpuṇyāhaṃ vidhivatsudhīḥ

'''50.31''' tataśca kautukaṃ haimaṃ bandhayeddhṛdayaṃ smaran pūrvavaccābhiveṣṭyārcāṃ kūrcavastrādibhiḥ kramāt

'''50.32''' maṇṭape sthaṇḍile vedyāṃ śayanaṃ cāpi pūrvavat saṃsthāpyātha ca saṃprokṣya devānabhyarcya deśikaḥ

'''50.33''' ānayetpratimāṃ tatra śayane śāyayettataḥ prākśiraskordhvavaktrāṃ tāṃ tato raktena vāsasā

'''50.34''' ācchādya ca tataḥ kumbhānsthāpayettacchiro’ntake hemādinirmitaṃ ramyaṃ droṇapūraṃ manoramam

'''50.35''' sitasūtravicitraṃ ca gandhatoyena pūritam pañcaratnasamāyuktaṃ sakūrcaṃ sāpidhānakam

'''50.36''' vastreṇa veṣṭitagrīvaṃ mālāpallavaśobhitam paricchadaghaṭānaṣṭau tadardhaparimāṇakān

'''50.37''' tādṛśānsthāpayenmantrī prāgādiṣu samantataḥ vedyā dakṣiṇapārśve’tha samānīya hyudaṅmukhaḥ

'''50.38''' prāṇāyāmatrayaṃ kṛtvā kuryānmantrātmikāṃ tanum aṅganyāsakaranyāsaṃ tanmantreṇaiva kārayet

'''50.39''' yathā bahiḥ sthitaṃ rūpaṃ dhyātvā tasya guhasya tu tataḥ pradhānakumbhe tamevaṃ prāṇapathā sudhīḥ

'''50.40''' āvāhya sthāpayettatra saṃnidhīkṛtya rodhayet mūlamantreṇa tatsarvaṃ kuryāttantroktamudrayā

'''50.41''' tato gandhādibhiścāpi guhaṃ samyak samarcayet deśeṣu digvidikstheṣu pūrvādikalaśeṣu ca

'''50.42''' vidyeśāngandhapuṣpādyairyajetsarvaṃ pradarśayet havirnivedanaṃ paścātsarveṣāmapi kārayet

'''50.43''' tato homaṃ tu kuṇḍeṣu deśiko mūrtipaiḥ saha āsanaṃ tatra kurvīta kuṇḍasaṃskārapūrvakam

'''50.44''' hotāraḥ sādhakāḥ proktāḥ putrakāstadalābhake tataḥ śāntamanāḥ kuṇḍe guhadevaṃ pradhānake

'''50.45''' skandaṃ sarvāmareśānaṃ pūjayetpūrvavatsudhīḥ śeṣeṣvapi ca vidyeśānkuṇḍeṣu parito yajet

'''50.46''' pañcahome tathā proktāḥ koṇasaṃsthā vivarjitāḥ samidājyacarūm̐llājānsarṣapāṃśca yavāṃstilān

'''50.47''' śatamardhaṃ tadardhaṃ vā homadravyaṃ ca sarvakam sarvatraiva samiddhomaṃ mūlamantreṇa kārayet

'''50.48''' ājyādiṣaṭ ṣaḍaṅgaistu homayeddhotṛbhiḥ saha dravyānte vyāhṛtiṃ hutvā pratidravyaṃ ca saṃspṛśet

'''50.49''' tattadaṅgāni devasya tattadaṅgaṃ samuccaran tatastu mūlamantreṇa phalabhakṣyāṇi homayet

'''50.50''' tato gāyatrimuccārya ghṛtenaiva daśāhutīḥ sarve hutvā tu kuṇḍeṣu rātrau homaṃ samāpayet

'''50.51''' plakṣodumbarakāśvatthavaṭāḥ pūrvāditaḥ kramāt śamyarkakhadirāścaiva hyapāmārgo vidikṣu ca

'''50.52''' palāśastu pradhānasya taireva paridhirbhavet homakāle vadeddikṣu vedādhyayanamuttamam

'''50.53''' śāṃkare’strajapaḥ kāryaḥ sādhakena samanvitaḥ evaṃ sarvaṃ gururnītvā rātriṃ jāgaratastataḥ

'''50.54''' prabhāte mūrtipaiḥ sārdhaṃ snānaṃ kṛtvā ca naityakam praviśya maṇṭapaṃ tatra devānabhyarcya pūrvavat

'''50.55''' pūrṇāṃ ca mūlamantreṇa sarvatrāpi pradāpayet ācāryaḥ śilpinā sārdhaṃ sthāpayecchivalagnake

'''50.56''' skandagāyatrimuccārya devamutthāpya yatnataḥ pradakṣiṇaṃ samānīya prāsādaṃ saṃpraviśya ca

'''50.57''' ratnalohādikānsarvām̐lliṅgasya sthāpane yathā pīṭhāvaṭe tathā nyasya śakticakraṃ yajettataḥ

'''50.58''' pratimāṃ niścalāṃ sthāpya suśliṣṭaṃ kārayettataḥ snātvācamya śucirbhūtvā deśikaḥ śāntamānasaḥ

'''50.59''' mantritāmbhastato nītvā gatvā maṇṭapamadhyamam tatra puṇyāhamārabhya praviśya bhavanaṃ guruḥ

'''50.60''' prokṣayitvā gṛhaṃ mantrī brahmabhiḥ pañcabhiḥ kramāt pratimāṃ bahuśastoyaiḥ śuddhiṃ kṛtvā tu deśikaḥ

'''50.61''' gandhacandanaliptāṅgo baddhapañcāṅgabhūṣaṇaḥ sasadvāsāḥ sthitaḥ sūkṣmamuttarīyaṃ dadhattadā

'''50.62''' uṣṇīṣaṃ ca tathaivānyatprasannaḥ priyadarśanaḥ mūrtipaiḥ sottarīyaiśca jāpibhiśca tathāvidhaiḥ

'''50.63''' kṛtamantratanustatra pradhānaṃ kumbhamudvahan skandasya taṃ viśeṣāttu prāsādaṃ tu pradakṣiṇam

'''50.64''' berāgre vinyasetkumbhaṃ devāgre skandamāśritam vidyeśāṃścaiva parito hotāraḥ kalaśāṣṭakam

'''50.65''' kumbhakūrcāmbhasā mantrī vinyasetpratimāhṛdi sthūlādisūkṣmaparyantaṃ mantrarūpaṃ janārdana

'''50.66''' snāpayetsthāpakastatra tato’ṅgāni ca vinyaset vidyeśānkalaśāṃścāpi kramāttatrābhiṣecayet

'''50.67''' avargaṃ mūrdhni vinyasya kavargaṃ dakṣiṇe nyaset cavargaṃ vāmahaste tu ṭavargaṃ hṛdaye nyaset

'''50.68''' tavargaṃ kukṣipradeśe tu pavargaṃ pṛṣṭhato nyaset yavargaṃ dakṣiṇe pāde śavargaṃ vāmake nyaset

'''50.69''' ḷakāraṃ meḍhradeśe tu kūṭaṃ ca hṛdaye nyaset tāraṃ sarvatramapyasya skandagāyatrimuccaran

'''50.70''' sarvavargeṣu vinyasya putramūlaṃ hṛdi nyaset aṅgāni cāṅgeṣvādhāya snapanoktavidhānataḥ

'''50.71''' abhiṣicya punaḥ śuddhiṃ kṛtvā mantrānpuroktavat vinyasya skandadevasya śubhasyāgre mahātmanaḥ

'''50.72''' arghyaṃ ca mūrdhni vinyasya gandhapuṣpādibhiḥ śubhaiḥ mūlamantraiḥ samaṃ pūjya candanenānulipya ca

'''50.73''' mālābharaṇavastraiśca yatnenaiva samarcayet havirnivedayetpaścād mahadvyañjanasaṃyutam

'''50.74''' śaivāṃścaturvidhāṃstatra brāhmaṇānbhojayettataḥ prāguktācca viśeṣo’yaṃ pradhāne tūpadiśyate

'''50.75''' prāsādasya bhaveddvāraṃ paścimābhimukhaṃ tathā prāṅmukhaṃ vā parīvārām̐llokapālānpravartayet

'''50.76''' viśākhanaigameyau ca dakṣiṇetarayorapi pārśvayordvārapālau ca mayūraṃ vāhanaṃ tathā

'''50.77''' yathāsthānaṃ pratiṣṭhāpya kalaśeṣvabhito nyaset vedikāyāstu parito bhūmau saṃsthāpya mantravit

'''50.78''' svasvanāmapadairmantrairarcayitvā yathākramam evaṃ yo vidhinā devaguhasthāpanato naraḥ

'''50.79''' putrārthī putramāpnoti jayārthī jayabhāgbhavet vidyārthī labhate vidyāṃ so’nte sāyujyamāpnuyāt

===Kapitel 51===

''ekapañcāśaḥ paṭalaḥ''

'''51.1''' athedaṃ sthāpanaṃ vakṣye caṇḍeśasya janārdana utpattiṃ mantrapūrvāṃ tu samāsācchṛṇu sāṃpratam

'''51.2''' caṇḍaḥ svabhāvātsanpūrvaṃ śivārcanaparāyaṇaḥ yakṣarakṣaḥpiśācādyā gaṇatvaṃ ca purā gatāḥ

'''51.3''' śivājñayā hi caṇḍatve tiṣṭhanto duḥsahā suraiḥ viriñcendramukhaiścāpi durdharṣāścaṇḍavikramāḥ

'''51.4''' caṇḍasvabhāvasteṣāṃ yo nāśako’bhūcchivājñayā caṇḍeśvarāya vidmahe ṭaṅkahastāya dhīmahi

'''51.5''' tannaścaṇḍaḥ pracodayāditi gāyatrimuccaret gāyatrīyaṃ bhavettasya mantrāḥ sarve’pyudāhṛtāḥ

'''51.6''' pratiṣṭhāvidhirapyasya kathyate’dya samāsataḥ śivālayeśadigbhāge dakṣiṇadvārasaṃyute

'''51.7''' prāsāde sthāpanīyo’yamanyatra na hi kutracit prāsādasyāgrake vātha pārśvayorubhayostu vā

'''51.8''' maṇṭapaṃ vidhinā kṛtvā tasminkuṇḍāni kalpayet āśāsu caturaśrāṇi vṛttānyagnyādiṣu kramāt

'''51.9''' śakraśāṃkarayormadhye vṛttaṃ prādhānyamucyate pañcahome tu padmaṃ tu śāṃkare parikalpayet

'''51.10''' hitvā vṛttāni sarvāṇi saṃskārādi yathā purā maṇṭapasya prayuñjīta tato’kṣyunmīlanakriyām

'''51.11''' maṇṭapasya tu pārśvasthe kuryādvai snānamaṇṭape sthaṇḍilaṃ śālibhiḥ kṛtvā tanmadhye sthāpya deśikaḥ

'''51.12''' pratimāṃ prāṅmukhāmatra parito’bhyarcya dikpatīn sāstrānmūlena saṃprokṣya śilpinā vartayettataḥ

'''51.13''' sūcyā tu haimayā sarvā rekhā netratrayeṣu ca śilpikarmaṇi nirvṛtte madhu sarpiḥ payaḥ kramāt

'''51.14''' saṃgṛhya pūrvavatpātre berāgre sthāpayettataḥ sauvarṇaṃ kamalaṃ teṣu nyasya pātreṣu deśikaḥ

'''51.15''' astramantraṃ samuccārya prokṣayettānpṛthak pṛthak haimayā dūrvayā paścānmadhu netre tu dakṣiṇe

'''51.16''' sarpirvāme lalāṭe ca dugdhaṃ cāpyatha tarpayet netramantraṃ gṛṇanmantrī tataḥ svarṇanakhānvitaiḥ

'''51.17''' aṅgulyagraistribhiścāpi netramantraṃ triṣu nyaset pañcamṛtpañcagavyaiśca kṛtvā śuddhiṃ tataḥ sudhīḥ

'''51.18''' puṇyāhaṃ vācayitvā tu brāhmaṇāngāśca darśayet tato jalādhivāsāya jalatīraṃ samānayet

'''51.19''' tatra sthāpya tathā devaṃ snāpya gāyatrimuccaran āveṣṭya kūrcavastrābhyāmastramantraṃ samuccaran

'''51.20''' praṇavena śirasyarghyaṃ dattvā tajjalamadhyame pūrvavacchāyayenmantrī caṇḍamūlamanusmaran

'''51.21''' parito dikpatīnsāstrānarcayecca yathākramam uktakāle’pyatīte’tha snānamaṇṭapamānayet

'''51.22''' śaṅkhabheryādinirghoṣaiḥ pratimāṃ vedikopari tataḥ saṃsthāpya tadvastraṃ kūrcaṃ cāpi parityajet

'''51.23''' tataḥ śuddhodakenaiva pratimāmagniṣecayet tasya gāyatrimuccārya gandhodenābhiṣecayet

'''51.24''' kautukaṃ ca hṛdā badhvā veṣṭayetpratimāṃ tataḥ kūrcena vāsasā caiva tato’rghyaṃ śirasi nyaset

'''51.25''' tato maṇṭapavedyāṃ tu pūrvavatkalpite śubhe sthaṇḍile śayanaṃ cāpi pūrvavatparikalpayet

'''51.26''' śāyayetpratimāṃ mantrī prākśiraścordhvavaktrakām mūlamantraṃ samuccārya sarvātodyasamanvitam

'''51.27''' tataścaṇḍeśvaraṃ devaṃ chādayetpītavāsasā tataścaṇḍādhipaṃ kumbhaṃ sarvalakṣaṇasaṃyutam

'''51.28''' hemaṭaṅkasamopetaṃ gandhodaparipūritam vastrakūrcāpidhānāḍhyaṃ śirobhāge’tha vinyaset

'''51.29''' paritaśca ghaṭānaṣṭau tapasvī tādṛśānnyaset mantrātmikāṃ tanuṃ paścātpūrvavatkārayetsudhīḥ

'''51.30''' āvāhayettataścaṇḍaṃ dhyātvā hṛdi samāhitaḥ yathā bahiḥ sthitaṃ rūpaṃ kumbhe tasminprasannadhīḥ

'''51.31''' āvāhanādibhiḥ paścānmūlamantraṃ samuccaran gandhapuṣpādibhirmantraiḥ pūjayetparitaḥ sthitān

'''51.32''' tatrasthānapi devāṃstu pūrvādi parito yajet tato homaṃ prakurvīta kṛtvā kuṇḍeṣu ca kramāt

'''51.33''' kuṇḍasaṃskārapūrvaṃ tu vahniṃ saṃsthāpya pūrvavat kuṇḍeṣu kumbhavaddevānsaṃsthāpyābhyarcayettataḥ

'''51.34''' yukto vāhādibhirmantrī homaṃ sarvatra kārayet samidājyacarūṇāṃ tu tilasarṣapayostathā

'''51.35''' mudgamāṣayavānāṃ ca pratyekaṃ tu śatāhutīḥ tadardhaṃ vā kramānmūlamantrāṅgaiśca yathākramam

'''51.36''' gāyatryā saha kuryāttu pratidravyaṃ tu sarpiṣā hutvā vyāhṛtimantraistu deśiko hotṛbhiḥ saha

'''51.37''' tattadaṅgaṃ spṛśenmantrī berasya puṣpapāṇinā sarvadravyāvasāne tu kuṇḍeśānāṃ daśāhutīḥ

'''51.38''' sarpiṣā juhuyātpaścātpariṣicya samācaret tato haviśca devānāṃ kumbhasthānāṃ pradāpayet

'''51.39''' tāmbūlaṃ ca tato dattvā nītvā rātriṃ tu deśikaḥ prabhāte kṛtanityastu maṇṭapaṃ saṃpraviśya ca

'''51.40''' mantrātmikāṃ tanuṃ kṛtvā puṣpairdevāṃśca pūjayet sarvakuṇḍeṣu saṃpūjya devānvyāhṛtipūrvakam

'''51.41''' srucā pūrṇāhutiṃ dadyānmūlamantraṃ samuccaran pariṣicya tato devānkuṇḍe’bhyarcya vivarjayet

'''51.42''' paridhīnviṣṭarāṃścaiva saṃprokṣyāgnau vinikṣipet tato garbhagṛhaṃ gatvā brāhme divye’thavā pade

'''51.43''' sthāpyādhāraśilāṃ tatra ratnādi vidhivannyaset tato maṇṭapamāgamya beramuddhṛtya mūlataḥ

'''51.44''' vastrādikaṃ samutsṛjya dattvārghyaṃ śirasi kramāt rathādiṣu samāropya kṛtvā dhāmapradakṣiṇam

'''51.45''' nītvā garbhagṛhaṃ tatra sthāpayetsaṃspṛśaṅchiraḥ mūlavidyāṃ bhaṇanmantrī śilpinā saha deśikaḥ

'''51.46''' śilpikarmaṇi nirvṛtte tamudvāsyātha śilpinam snātvā vidyātmakaṃ dehaṃ kṛtvā puṇyāhamatra tu

'''51.47''' garbhagehe tato beraṃ pañcamṛtpañcagavyakaiḥ śodhayitvā hṛdā mantrī gandhodenābhiṣicya ca

'''51.48''' tatastānmaṇṭape kumbhānyathāpūrvaṃ samānayet berāgre sthaṇḍile tāṃśca  yathāpūrvaṃ tu vinyaset

'''51.49''' tatrodaṅmukhamāviśya pūrvavatsakalīkṛtaḥ dhyātvā devaṃ tu kumbhasthaṃ yathāpūrvaṃ tu deśikaḥ

'''51.50''' mūlavidyāṃ samuccārya tataḥ kūrcasṛtāmbhasā pratimāhṛdi kumbhasthadevaṃ vinyasya pūjayet

'''51.51''' gandhādibhistu mūlena tato’ṅgāni yathāsthiti aṅgeṣu teṣu vinyasya tataścābhyarcayecchanaiḥ

'''51.52''' tato hārādikaṃ nyasya pūrvādārabhya vinyaset caṇḍeśamabhiṣicyātha punarmantrāṃśca vinyaset

'''51.53''' praṇavaṃ mūrdhni vinyasya mūlaṃ vaktre’tha vinyaset punaśca hṛdaye tāraṃ gāyatrīṃ kukṣideśake

'''51.54''' pādayorubhayoścāpi caṇḍabījaṃ tato nyaset gandhādibhiḥ samabhyarcya kṛtvā pūjāṃ viśeṣataḥ

'''51.55''' liṅge nivedayitvātha pāyasaṃ ghṛtasaṃyutam tatastaccaṇḍamūlena caṇḍeśāya pradāpayet

'''51.56''' tāmbūlaṃ ca tato dadyāddadyānmālādikaṃ tataḥ evaṃ pratidinaṃ dadyācchivaliṅge niveditam

'''51.57''' evaṃ vai sthāpayenmartyaścaṇḍeśaṃ tu śivālaye sarvapāpavinirmuktaḥ śivalokamavāpnuyāt

===Kapitel 52===

''dvipañcāśaḥ paṭalaḥ''

'''52.1''' jyeṣṭhāyāḥ sthāpanaṃ vakṣye tadutpattipuraḥsaram tanmantraṃ ca samāsena śṛṇu sarvaṃ janārdana

'''52.2''' ādiśakteḥ samutpannā paścādudadhisaṃbhavā udadhau mathyamāne sā cotthitā surasattama

'''52.3''' tadutpattiriti proktā mantrāṃstasyā vadāmi te tṛtīyasya tṛtīyaṃ tatsaptamādyena saṃyutam

'''52.4''' prathamaikādaśenāpi tanmūlaṃ bindunādayuk tāramādau samuccārya tato mūlamudīrya ca

'''52.5''' jyeṣṭhāpadaṃ caturthyantamante cāpi namaḥpadam saṃyojyoccārayenmantraṃ mūlamantramiti smṛtam

'''52.6''' jakāreṇaiva cāṅgāni hṛdayādīni kalpayet phalapradāyai vidmahe pāpahantryai ca dhīmahi

'''52.7''' tanno jyeṣṭhā pracodayādgāyatrīyaṃ prakīrtitā svanāmādyakṣaraṃ caiva bindunādasamanvitam

'''52.8''' praṇavādinamo’ntaṃ cāpyanyeṣāṃ mantramucyate evaṃ mantrāḥ samuddiṣṭāḥ pratiṣṭhāvidhirucyate

'''52.9''' liṅgasthāpanayogyeṣu sthāneṣvapi śivālaye grāmādiṣvapi cokteṣu sthāneṣvenāṃ prakalpayet

'''52.10''' tadagre maṇṭapaṃ kuryātpūrvavatpārśvayostathā tatra vedyāstu paritaḥ kuryātkuṇḍacatuṣṭayam

'''52.11''' yonyākāraṃ pradhānaṃ syāccheṣaṃ pūrvavadācaret netronmīlanakarmārthaṃ pratimāstāḥ samānayet

'''52.12''' snānamaṇṭapamadhye tu sthaṇḍilaṃ parikalpayet vinyasya pratimāstāsāṃ netronmīlanakarma ca

'''52.13''' śilpinā kārayitvātha madhvājyābhyāṃ ca pūrvavat tarpayitvākṣimantreṇa tattannetreṣu deśikaḥ

'''52.14''' pūrvavatpratimāśuddhiṃ kṛtvā gatvā jalāśayam tattīre tāśca vinyasya kṛtvā puṇyāhamapyatha

'''52.15''' abhiṣicya pratimāstāḥ kūrcamālāṃśukaistathā āveṣṭyābhyarcya tā mantrī jalasyāntaḥ praviśya ca

'''52.16''' tatrādhivāsya cārcāstāḥ kālaṃ nītvā tu pūrvavat snānamaṇṭapamānīya vastrakūrcādikaṃ tyajet

'''52.17''' mūlena tu śirasyarghyaṃ tāsāṃ dattvā krameṇa tu abhiṣicya punargandhatoyena susamāhitaḥ

'''52.18''' kūrcamālādikaiḥ paścādveṣṭanaṃ kautuke kṛte kṛtvā puṇyāhapūrvaṃ tu vedyāṃ tatra prakalpite

'''52.19''' sthaṇḍile śayane viṣṇo ramye pūrvavadāstṛte śāyayetpratimāḥ sarvāḥ prākśiraścordhvavaktrakāḥ

'''52.20''' tāsāṃ mūrdhapradeśe tu vinyasetkalaśatrayam pūrvoktalakṣaṇopetānparito’ṣṭau ca vinyaset

'''52.21''' teṣu madhye yajejjyeṣṭhāṃ vṛṣamānye ca pārśvayoḥ dakṣiṇetarayoryaṣṭvā paritaḥ kalaśeṣvapi

'''52.22''' tamā mohā kṣudhā nidrā mṛtyurmāyā jarā bhayā vinyasya pūjayetsarvā gandhapuṣpādibhiḥ kramāt

'''52.23''' homayecca tato mantrī hotṛbhiḥ saha pūrvavat kṛtvā kuṇḍāgnisaṃskāraṃ pūrvādiṣvatha pūjayet

'''52.24''' kuṇḍeṣu vāmāṃ raudrīṃ ca kālīṃ kalavikaraṇīmapi balavikaraṇīṃ devīṃ jyeṣṭhāṃ yaṣṭvā pradhānake

'''52.25''' vṛṣamānyāsamāyuktāṃ tato homaṃ samārabhet samidājyacarūm̐llājānsaktvapūpatilāṃstathā

'''52.26''' mūlādihetiparyantairaṇubhiḥ saptabhiḥ kramāt hutvā gāyatriyā caiva juhuyātsarpiṣā tataḥ

'''52.27''' śatamardhaṃ tadardhaṃ vā pradhāne vṛṣamānyayoḥ sarvadravyaiśca juhuyāttattanmantreṇa deśikaḥ

'''52.28''' pratidravyāvasāne tu vyāhṛtyante spṛśedguruḥ mūrtipaiḥ saha mantraistu tattadaṅgāni ca kramāt

'''52.29''' plakṣodumbaramaśvatthaṃ vaṭaṃ pūrvādiṣu kramāt samidarthaṃ palāśaṃ tu pradhānasya samācaret

'''52.30''' homakāle caturdikṣu vedādhyayanamucyate kuṇḍasthānāṃ tu devānāṃ havistatra nivedayet

'''52.31''' evaṃ kṛtvā tu taddhomaṃ nītvā rātriṃ tu jāgarāt jyeṣṭhāmūlena mantreṇa tataḥ sthāpanamārabhet

'''52.32''' prabhāte kṛtanityastu deśiko mūrtipaiḥ saha praviśya maṇṭapaṃ tatra kṛtamantratanustadā

'''52.33''' saṃpūjya devatāḥ sarvāḥ pūrṇāṃ sarvatra homayet pratimāstāḥ samutthāpya tyaktvā vastrādikaṃ tataḥ

'''52.34''' rathādiṣu samāropya kṛtvā dhāmni pradakṣiṇam garbhagehaṃ praviśyātha ratnādīni ca pūrvavat

'''52.35''' vinyasya sthāpayettatra pratimāstāḥ krameṇa vai bhinnarūpāstvathaikatra madhye dakṣiṇavāmayoḥ

'''52.36''' tattanmūlaṃ samuccārya śiraḥ saṃsthāpakaḥ spṛśet śilpikarmaṇi nirvṛtte tamudvāsya tato guruḥ

'''52.37''' snātvācamya tataḥ kṛtvā puṇyāhaṃ tatra dhāmani pañcagavyena saṃsnāpya tattadgāyatrimantrataḥ

'''52.38''' kumbhānsarvānsamutthāpya vahitvāṃse tathā guruḥ mūrtipaiḥ saha taddhāmni kṛtvā dhāmapradakṣiṇam

'''52.39''' antaḥ praviśya vedyagre sthāpya ca sthaṇḍilopari vinyasenmantrarūpaṃ tu dhyātvā kumbhāṃśca devatāḥ

'''52.40''' tattatkūrcasthitenaiva toyena pratimāhṛdi tato’ṅgāni ca tasyāstu yathāsthānaṃ tu vinyaset

'''52.41''' mātṛkāśca tato nyasya tataśca vṛṣamānyayoḥ mantraṃ pūrvavadādhāya tataśca paritastataḥ

'''52.42''' abhiṣicya tu taiḥ kumbhairnaivedyāntaṃ samarcayet gauṇapradhānayorevamuktaḥ sādhāraṇo vidhiḥ

'''52.43''' pradhāne’pi viśeṣo’yaṃ kathyate’tra janārdana vidyujjihvāṃ viśālākṣīṃ dakṣiṇetarayorapi

'''52.44''' pārśvayostu pratihāre rakṣārthaṃ pūrvavannyaset karālīṃ kapilākṣīṃ ca vimalāṃ vibhujāmapi

'''52.45''' bhāsvarāṃ vitatāṃ caiva kīkasāṃ kadrumeva ca pūrvādiṣu ghaṭeṣvaṣṭāvaṣṭasu kramato nyaset

'''52.46''' kākāmatre ca tadvedyāṃ ghaṭe vinyasya pūjayet evaṃ kāle’dhivāsyaitāḥ śaktīrvāhanasaṃyutāḥ

'''52.47''' pratiṣṭhānantaraṃ vāpi vinyasetparito guruḥ evaṃ saṃsthāpayejjyeṣṭhāṃ sadyo’lakṣmīrvimuñcati

'''52.48''' dhanadhānyādikaṃ sarvaṃ putrapautrādikaṃ tathā vardhate tasya deveśa nātra kāryā vicāraṇā

===Kapitel 53===

''tripañcāśaḥ paṭalaḥ · durgāsthāpanavidhiḥ''

'''53.1''' durgāyāḥ sthāpanaṃ vakṣye tadutpattipurassaram tanmantraṃ ca samāsena śṛṇu sarvaṃ surottama

'''53.2''' purā kālīti sā diṣṭā mayā rahasi māninī cukopomā vaco mahyaṃ prayuktaṃ ninditaṃ tviti

'''53.3''' tataśca sāntvanaiścāpi madīyairneṣyate śamam uvācomā mahāvarṇaṃ mahyamicchāmyaheyavat

'''53.4''' ityukto’haṃ tayā tasyā varṇaṃ nirmātumudyataḥ tanustannecchatī devī tapasā taptumudyatā

'''53.5''' tapastepe tatastasyā umāyāḥ kamalāsanaḥ anujñāto mayā varṇaṃ dattavāniṣṭamuttamam

'''53.6''' tadā brahmābhyavocattāṃ yadi muñcestu śobhane varṇametajjaganmātarjagadrakṣārthamavyaye

'''53.7''' varṇaṃ tatkośavadbhitvā tvacchaktyā parayā yutām vikramāṃ hariṇā devīṃ kauśikīṃ hara mānayeḥ

'''53.8''' ityuktā sā tadā devī brahmaṇā tadadhātkare tasmāddevī ca śaktiṃ ca svāyudhāni bahūni ca

'''53.9''' dattvācodbhāsitā sarvaśatrūṇāṃ jayakāṅkṣayā sā durgā kauśikī caṇḍī bhavānī ca nigadyate

'''53.10''' tadutpattiriti proktā mantraṃ tasyā vadāmi te pañcamasya tṛtīyaṃ yatpañcamasvarasaṃyutam

'''53.11''' bindunādasamāyuktaṃ durgāmūlamiti smṛtam tāramādau samuccārya tato mūlamudīrya ca

'''53.12''' durgāpadaṃ caturthyantamante cāpi namaḥpadam saṃyojyoccārayenmantraṃ daurgaṃ siddhaṃ sanātanam

'''53.13''' dakāreṇaiva cāṅgāni hṛdayādīni kalpayet kanyārūpapadaṃ pūrvaṃ caturthyantaṃ samuccaret

'''53.14''' vidmahe ca tataścoktaṃ śūlahastāpadaṃ tataḥ caturthyantaṃ samuccārya dhīmahīti padaṃ tataḥ

'''53.15''' tanno durgetyathoccārya pracodayāttadanantaram gāyatrīyaṃ bhaveddevyā durgāyā mantramuttamam

'''53.16''' evaṃ mantrāḥ samuddiṣṭāḥ pratiṣṭhāvidhirucyate liṅgasthāpanayogyeṣu sthāneṣvapi śivālaye

'''53.17''' grāmādāvapi cokteṣu sthāneṣvasyāḥ prakalpayet prāsādaṃ hi tataḥ pūrvadvāraṃ bhuktipradaṃ nṛṇām

'''53.18''' muktidaṃ paścimadvāraṃ pūrvadvāraṃ jayāvaham tadagre maṇṭapaṃ kuryātpūrvavatpārśvayostathā

'''53.19''' tatra vedyāstu paritaḥ kuṇḍāni parikalpayet āśāsu caturaśrāṇi vidikṣu catasṛṣvapi

'''53.20''' yonyākārāṇi kuṇḍāni padmaṃ ca tvīśaśakrayoḥ madhyasthāne tatastasya maṇṭapasya tu pūrvavat

'''53.21''' saṃskārādi prayuñjīta netronmīlanamapyataḥ kuryāttasya vidhiścāpi vakṣyate kramato’dhunā

'''53.22''' snānamaṇṭapamadhye tu devīmānīya kauśikīm sthaṇḍile tatra tāṃ devīṃ prāṅmukhāṃ saṃniveśayet

'''53.23''' netronmīlanakarmāṇi kārayecchilpinā tadā haimasūcyā tataścāpi rekhālekhanapūrvakam

'''53.24''' sādhite pūrvavaccaiva trinetreṣu ca tarpayet dūrvayā haimayā pūrvaṃ dakṣiṇe madhu vāmake

'''53.25''' payaścātha lalāṭasthe locane madhu caiva hi sūryasomāgnimantraistu tattatsthāneṣu vinyaset

'''53.26''' hiraṇyanakhasaṃprotaistarjanyādyaṅgulaistribhiḥ tatastu darśayedviprāngāśca gāyatrimuccaran

'''53.27''' tatastāṃ pañcagavyaiśca pañcamṛdbhiśca śodhayet tasyā gāyatrimuccārya gandhodenābhiṣecayet

'''53.28''' puṇyāhaṃ vācayitvātra prokṣayedbrahmapañcakaiḥ grāma pradakṣiṇaṃ kṛtvā jalatīraṃ samānayet

'''53.29''' pratimāṃ kaṇṭhadaghne tu cale caivādhivāsayet tasyā bāhye tu vidyeśānaṣṭau kumbhāṃstu vinyaset

'''53.30''' saptarātraṃ pañcarātraṃ trirātraṃ caikarātrakam jalāduttīrya pūrvedyuḥ pañcagavyena snāpayet

'''53.31''' tataḥ praveśya deveśīṃ śayanaṃ tatra kalpayet vedimadhye tu deveśyāḥ śālinā vikirettataḥ

'''53.32''' pañcabhiḥ kambalaiścaiva śālyā paryupavinyaset mūlamantreṇa deveśīpratimāṃ kambalopari

'''53.33''' vardhanyaṣṭakamādāya pūrvādīśāntakaṃ nyaset vāmādiśaktayo’ṣṭau tu manonmanīmīśadeśataḥ

'''53.34''' gandhapuṣpādibhiścaiva haviṣā pūjayettataḥ tato homaṃ prakurvīta lakṣaṇena samanvitam

'''53.35''' caturdikṣu caturvedaiḥ kuryādadhyayanaṃ tataḥ durgābījena mantreṇa brahmairaṅgaiśca mantrakaiḥ

'''53.36''' homaṃ kuryādviśeṣeṇa yathāvibhavavistaram samidājyacarūm̐llājānsarṣapāṃśca hunedbudhaḥ

'''53.37''' śatamardhaṃ tadardhaṃ vā pālāśī tu samidbhavet tataḥ prabhāte vimale muhūrtaṃ tu nirīkṣayet

'''53.38''' ācāryapūjanaṃ kṛtvā ṛtvijaḥ pūjayettataḥ pratiṣṭhākumbhamādāya śirasā dhārya buddhimān

'''53.39''' antaḥ praviśya vedyagre sthāpya ca sthaṇḍilopari berāgre vinyasetkumbhaṃ pradhānaṃ cāvṛtaiḥ saha

'''53.40''' tataśca deśiko mantrī dhyātvā devīṃ yathāsthitām kumbhasthitāṃ tu tāṃ tena kūmbhakūrcayutena ca

'''53.41''' ambhasārcāhṛdi nyāsaṃ kuryāttanmūlamuccaran aṅgānyaṅgeṣu vinyasya gāyatrīṃ hṛdaye nyaset

'''53.42''' mātṛkāṃ pūrvavannyasya gandhādyairarcayettataḥ anyaiḥ kumbhaiśca sarvaistairabhiṣicya krameṇa vai

'''53.43''' tattanmantraṃ samuccārya gandhādyaiḥ punararcayet prabhūtaṃ tu havirdattvā phalabhakṣyādisaṃyutam

'''53.44''' mukhavāsasamāyuktaṃ tāmbūlaṃ ca nivedayet gauṇapradhānayorevaṃ proktaṃ sarvaṃ samaṃ hare

'''53.45''' pradhāne tu viśeṣo’yaṃ kathyate’dya samāsataḥ ulkāmukhīṃ vijihvāṃ ca kalpayeddvāradevate

'''53.46''' mṛgendraṃ vāhanaṃ tasyā agrataḥ parikalpayet parito’ṣṭāvimāstasyāḥ parivārāḥ prakīrtitāḥ

'''53.47''' agre bhūmiṃ samārabhya jyeṣṭhāṃ bhūmiṃ tathaiva ca moṭiṃ ca mohinīṃ caiva prakṛtiṃ vikṛtiṃ tathā

'''53.48''' niyatiṃ ca nivṛttiṃ ca sarvāstāḥ pūrvavatsudhīḥ kalaśeṣvadhivāsāya sthāpayetsthāpakottamaḥ

'''53.49''' bāhyasthe ca mahāpīṭhe sthāpayetpūtanāgaṇam mantranyāsottare kāle sthāpayetparivārakam

'''53.50''' trisaṃdhyāsvarcane kāle parivārāṃśca pūjayet vahannityotsavaṃ caiva trisaṃdhyamapi kārayet

'''53.51''' ekāhaṃ triyahaṃ cāpi bhūtāhaṃ munyahaṃ tu vā pratisaṃvatsaraṃ kuryāddaurge vā madhumādhave

'''53.52''' kṛttikāntaṃ tu vidhinā kārayecca mahotsavam evaṃ yaḥ kurute martyaḥ kauśikyāḥ sthāpanaṃ param

'''53.53''' ādhivyādhivinirmuktaḥ sarvasaṃpatsamanvitaḥ nirmitaṃ khalu vairiñcaṃ hṛtvā tatpratyajāyate

'''53.54''' sarvadevādibhirvandyaḥ sa balāririvāparaḥ

===Kapitel 54===

''catuḥpañcāśaḥ paṭalaḥ · sūryasthāpanavidhiḥ''

'''54.1''' sūryasya sthāpanaṃ vakṣye tasyotpattipuraḥsaram mantreṇa saha sarvaṃ tanmatto nigadataḥ śṛṇu

'''54.2''' aṣṭamūrteḥ śivasyaitanmūrtayo’ṣṭau prakīrtitāḥ sūryācandramasāvātmā mahābhūtāni pañca ca

'''54.3''' etāsvaṣṭasu sūryo’yamagrimā mūrtirucyate sūryamūrtyā śivo lokān sṛjatyavati dīptayā

'''54.4''' punaḥ saṃharatīśānastanmūrtyā sa śivasya ca utpattirevamuktā ca mantraścādya nigadyate

'''54.5''' sāntaṃ yāntasamāyuktaṃ ṣaṣṭhasvarasamanvitam bindunādayutaṃ cāpi mūlaṃ vidyādraveriti

'''54.6''' tasmādeva ṣaḍaṅgāni sāntavahniyutāni ca hṛdayaṃ ca śiraścaiva śikhā kavacameva ca

'''54.7''' astraṃ netraṃ ṣaḍaṅgāni jātiṣaṭkayutāni ca jāyamānā bhavedvidyā tasyaivādyā ṣaḍakṣarā

'''54.8''' hvāṃ hvīṃ sa iti coccārya sūryāyeti padaṃ tataḥ sarvarogaharaṃ vidyājjapatāmimamuttamam

'''54.9''' padmahastāya vidmahe rathārūḍhāya dhīmahi tannaḥ sūryaḥ pracodayāditi paścādvadetsudhīḥ

'''54.10''' iti gāyatriruddiṣṭā sarvaśāntikarī tadā evaṃ mantrāḥ samuddiṣṭāḥ pratiṣṭhāvidhirucyate

'''54.11''' liṅgasthāpanayogyāni kathitānyatra yāni tu teṣu sarveṣu cāsyāpi sthāpanaṃ sarvasiddhidam

'''54.12''' grāmādau pūrvadigbhāge śaive dhāmni ca gocare prāsādaṃ paścimadvāraṃ kṛtvā pūrvavidhānataḥ

'''54.13''' tasyāgre pārśvayorvāpi maṇṭape vidhinā kṛte caturaśrāṇi kuṇḍāni kṛtvā pūrvāditaḥ kramāt

'''54.14''' śakraśaṃkarayormadhye paṅkajaṃ syātpradhānakam pañcahomavidhāne tu koṇakuṇḍāni varjayet

'''54.15''' aiśānyāṃ kalpayetkuṇḍaṃ pradhānaṃ padmameva tat maṇṭape pūrvavatsarvaṃ saṃskārādi prakalpayet

'''54.16''' tatra vedyāṃ samānīya pratimāṃ deśikaḥ sudhīḥ ṣaḍakṣareṇa saṃprokṣya dṛṣṭyunmīlanamārabhet

'''54.17''' netradvayayute carkṣe madhyāhne tu sunirmale sulagne kārayetkarma śilpinā tadyathocitam

'''54.18''' svarṇasūcyā tathā paścādvilikhedakṣimaṇḍalam śilpinaṃ vastrahemādyavastubhistu sutoṣayet

'''54.19''' ācāryo mantratastāṃ ca toyena kṣālayetsudhīḥ ṣaḍakṣareṇa mantreṇa tatastāṃ pratimāṃ sudhīḥ

'''54.20''' paścimābhimukhaṃ nyasya kṛtvāgre sthaṇḍile tataḥ madhusarpiḥsusaṃpūrṇaṃ kāṃsyaṃ vā tāmrajaṃ tu vā

'''54.21''' pātradvayaṃ samādhāya sthaṇḍile mūlamuccaran tatastu hemakamalaṃ vinyasyābhyarcayeddhṛdā

'''54.22''' tataste haimayā dhīmāndakṣiṇetarayoḥ kramāt netrayornetramantreṇa tarpayerddūrvayā budhaḥ

'''54.23''' vahnicandramasorbījaṃ dakṣiṇetarayoḥ kramāt tarjanyanāmikābhyāṃ tu kāñcanena nakhena ca

'''54.24''' yuktābhyāṃ vinyasedakṣṇostato yavanikāṃ tadā saṃvarjya darśayeddhenuṃ brāhmaṇāṃśca susaṃyatān

'''54.25''' gāyatrīmantramuccārya tato devaṃ rathādiṣu āropya vastramālādyaiḥ kṛtvālaṃkāramuttamam

'''54.26''' grāmādau ca samānīya pradakṣiṇamatandritaḥ jalāśayasamīpāya nītvā tīre nidhāya ca

'''54.27''' puṇyāhaṃ vidhivatkṛtvā prokṣayedbrahmapañcakaiḥ abhiṣicya ca toyena ṣaḍakṣaramudāharan

'''54.28''' gāyatrīmuccarankūrcavastramālābhirveṣṭayet tato jalāśayāntastāṃ pūrvavacchāyayecchanaiḥ

'''54.29''' tato dikṣu diśāmīśānsāstrānsaṃpūjya deśikaḥ tatrātha pūrvavannītvā kālaṃ beraṃ tato jalāt

'''54.30''' snānamaṇṭapamānīya tatra vinyasya pūrvavat vastrakūrcādikaṃ tyaktvā pañcagavyābhiṣecanam

'''54.31''' ṣaḍakṣareṇa kṛtvā tu pañcamṛdbhiśca śodhayet bahuśaḥ śodhayitvā tu gandhodenābhiṣecayet

'''54.32''' tataśca kṛtvā puṇyāhaṃ bandhayetkautukaṃ hṛdā tataḥ kūrcena vastreṇa chādayetpratimāṃ tataḥ

'''54.33''' dattvārghyaṃ cāpi śirasā mūlavidyāṃ samuccaran maṇṭape vedikāyāṃ tu vidhivatsthaṇḍile kṛte

'''54.34''' pūrvavatkalpite talpe sarvātodyasamanvitam ānīya pratimāṃ tatra śāyayetpūrvavaddhṛdā

'''54.35''' atiraktena sūkṣmeṇa vastreṇācchādayettataḥ pūrvoktalakṣaṇopetaṃ hemāmbujasamanvitam

'''54.36''' vastrakūrcasamāyuktaṃ kumbhaṃ sauraṃ śiro’ntike saṃsthāpya paritaścāpi ghaṭānaṣṭau tathāvidhān

'''54.37''' vinyasyābhyarcayenmantrī tadvidhiḥ kathyate’dhunā dakṣiṇe vedikāyāstu prāṅmukho vāpyudaṅmukhaḥ

'''54.38''' upaviśyāsane dhīmānmūlavidyāṃ samuccaran prāṇāyāmatrayaṃ kṛtvā dahanaplāvanādikam

'''54.39''' bhūtaśuddhiṃ ca nirvartya karanyāsaṃ tu kārayet aṅgāni hṛdayādīni nyasedaṅguṣṭhakādiṣu

'''54.40''' astraṃ hastatale nyasya mūlaṃ sarvāṅgulīṣvapi aṅgeṣu tattadaṅgāni kavacaṃ vakṣasi nyaset

'''54.41''' astraṃ dikṣu ca vinyasya praṇavaṃ mūrdhni vinyaset mūlavidyāṅgule caiva pādayostu ṣaḍakṣaram

'''54.42''' tataḥ sahasrakiraṇaṃ prabhāmaṇḍalamaṇḍitam puṇḍarīkasthitaṃ śāntaṃ raktavarṇaṃ dvilocanam

'''54.43''' raktāmbaraparīdhānaṃ sarvābharaṇabhūṣitam puṇḍarīkadvayavyāpi karapaṅkeruhadvayam

'''54.44''' dhyātvā sūryaṃ tadā devaṃ mūlamantraṃ samuccaran āvāhanādibhiḥ kumbhe pūjayeddarśayettataḥ

'''54.45''' bimbamudrāṃ ca padmaṃ ca tato dikṣu samarcayet kumbheṣu somamaṅgāraṃ budhaṃ devaguruṃ tathā

'''54.46''' śukraṃ śanaiścaraṃ caiva rāhuṃ ketuṃ yathākramam prāgādiṣu samantācca svanāmapadamantrakaiḥ

'''54.47''' sarveṣāṃ ca havirdattvā tato homaṃ samārabhet kuṇḍasaṃskārapūrvāṇi kṛtvā karmāṇi deśikaḥ

'''54.48''' sādhakairhotṛbhiḥ sārdhaṃ pradhāne sūryamarcayet anyeṣvaṣṭasu kuṇḍeṣu somādīṃśca kramānnyaset

'''54.49''' samidājyacarūm̐llājān yavasarṣapakāṃstilān sāṅgena mūlamantreṇa kuṇḍe ca juhuyātsudhīḥ

'''54.50''' śatamaṣṭottaraṃ vāpi tadardhaṃ vā tadardhakam plakṣodumbaramaśvatthavaṭau pūrvāditaḥ kramāt

'''54.51''' palāśaṃ khadiraṃ bilvamapāmārgaṃ vidikṣu ca pradhānasyārkamevoktaṃ homakarma nivedayet

'''54.52''' sarvadravyāvasāne tu sarvakuṇḍeṣu devapa ṣaḍvarṇena ca gāyatryā juhuyātsarpiṣā tadā

'''54.53''' dravyānte vyāhṛtiṃ hutvā pratidravyaṃ samāhitaḥ tattadaṅgaṃ samuccārya tattadaṅgeṣu saṃspṛśet

'''54.54''' deśikenaiva hotāraḥ spṛśeyuste ca pūrvakam sādhakābhāvataḥ proktā aṣṭau catvāra eva ca

'''54.55''' homakāle caturdikṣu kuryādadhyayanaṃ dvijaiḥ ṛgyajussāmātharvaistu prāgādiṣu yathākramam

'''54.56''' aghorāstraṃ japedekaḥ śāṃkaraṃ deśamāśritaḥ adhivāsakriyāmevaṃ rātrau kṛtvā samāhitaḥ

'''54.57''' ācāryo mūrtipaiḥ sārdhaṃ prātarutthāya śāntadhīḥ nityakarma samāpyātha maṇṭapaṃ saṃpraviśya ca

'''54.58''' kṛtamantratanuḥ paścāt sūryasyārghyaṃ pradāpayet arghyadānamatho vakṣye tacchṛṇu tvaṃ samāhitaḥ

'''54.59''' prāsādāgre’thavā tasya pārśvayorubhayorapi gomayenopalipyātha suvṛttaṃ sthaṇḍilaṃ kramāt

'''54.60''' ṣaḍakṣareṇa mantreṇa prokṣayetsthaṇḍilaṃ tataḥ tatra tāmramayaṃ pātraṃ dvitraikaprasthapūritam

'''54.61''' śreṣṭhamadhyakaniṣṭhaṃ tu gandhodenābhipūrayet tataśca yavasiddhārthaṃ sākṣataṃ raktacandanam

'''54.62''' tatra mūlena vinyasya pātre padmaṃ ca vinyaset taduddhṛtyātra pādyāṃ tu vinyasyāthābhimantrayet

'''54.63''' sāṅgena mūlamantreṇa surabhiṃ tatra darśayet tataścodayamāyāntaṃ sākṣāddevaṃ divākaram

'''54.64''' gandhapuṣpādibhiḥ pūjya ṣaḍvarṇena tataḥ sudhīḥ jānubhyāmavanau sthitvā pūrvābhimukha eva ca

'''54.65''' arghyapātraṃ taduddhṛtya mastakopari hetinā praṇavaṃ mūlamantraṃ ca ṣaḍakṣaramanukramāt

'''54.66''' uccārya dadyātsūryāya dattvā pādyaṃ bhuvi kṣipet adhomukhaṃ tato devaṃ praṇamya prārthayedravim

'''54.67''' devadeva tridhāmeśa jagatprathamamaṅgala tiṣṭhātra sthāpite bhaktyā mayā sūrya jagatpate

'''54.68''' iti saṃprārthya deveśaṃ paramānnaṃ ghṛtaplutam madhumaṇḍaghṛtopetaṃ sūryāyātha nivedayet

'''54.69''' tataśca dhautapādassansamācamya yathāvidhi praviśya maṇḍape devānsamabhyarcya ghaṭasthitān

'''54.70''' pūrṇāhutiṃ ca sarvatra mūlamantreṇa dāpayet sumuhūrte sulagne’tha devamuddhṛtya bhāskaram

'''54.71''' vastrakūrcādikaṃ tyaktvā gāyatrīmantramuccaran rathādiṣu samāropya kṛtvā dhāmni pradakṣiṇam

'''54.72''' praviśya bhavanaṃ tatra śilpinā saha deśikaḥ sthāpayedvidhivannyasya ratnānyevāvaṭe tataḥ

'''54.73''' spṛśanmūlaṃ samuccārya pratimāyāḥ śirastathā garbhe brahmapade proktaṃ sthāpanaṃ madhyame’thavā

'''54.74''' daivamānuṣayorvāpi sarvasiddhikaraṃ nṛṇām śliṣṭaṃ dṛḍhataraṃ ramyaṃ niścalaṃ sthāpya devatām

'''54.75''' śilpikarmaṇi nirvṛtte satkāreṇa visarjayet snātvācamya vasanvāso navaratnaṃ tathaiva ca

'''54.76''' uṣṇīṣaṃ cottarīyaṃ ca kṛtvā pañcāṅgabhūṣaṇaiḥ bhūṣitaśca tathā garbhe kṛtvā puṇyāhamuttamam

'''54.77''' pañcamṛtpañcagavyaiśca śuddhiṃ deve samācaret gāyatrīmantramuccārya gandhodenābhiṣecayet

'''54.78''' tato maṇṭapamāviśya ghaṭānuddhṛtya mūrtipaiḥ sarvātodyasamāyuktaṃ gītanṛttasamanvitam

'''54.79''' kṛtvā pradakṣiṇaṃ dhāmni praviśya bhavanaṃ tataḥ devāgre sthaṇḍile kumbhānvinyasetpūrvavatsudhīḥ

'''54.80''' tatrābhyarcya ghaṭe bhānuṃ madhye’nyeṣu grahānapi dhyātvā padmasthitaṃ devaṃ pūrvavatpratimāhṛdi

'''54.81''' mūlamantraṃ samuccārya nyasetkūrcasrutāmbhasā tataśca grahakumbhasthasomādīṃśca tathā grahān

'''54.82''' agrādārabhya vinyasya tatastairabhiṣecayet praṇavaṃ mūrdhni vinyasya mūlamantraṃ hṛdi nyaset

'''54.83''' ṣaḍvarṇaṃ nābhideśe tu gāyatrīṃ pādayornyaset aṅgeṣvaṅgāni vinyasya kavacaṃ vakṣasi nyaset

'''54.84''' astraṃ hastapradeśe tu mātṛkāśca yathā purā vinyasyātha ca gāyatryā gandhodenābhiṣecayet

'''54.85''' dattvā pādyaṃ tato mantrī dattvā cācamanīyakam hṛdayenaiva mantreṇa tato’rghyaṃ cāpi mūrdhani

'''54.86''' mūlena dattvā mārtāṇḍaṃ raktacandanavāriṇā kāśmīrarocanāyuktaṃ samālipyāṃśukena ca

'''54.87''' raktena raktapadmaiśca samalaṃkṛtya taijasam saṃpūjya gandhapuṣpādyairmūlamantraṃ samuccaran

'''54.88''' somādīṃśca yajettadvaddevāgrātparitaḥ sthitān pāyasaṃ ca tato dadyāttāmbūlaṃ ca nivedayet

'''54.89''' evaṃ karma samākhyātaṃ svatantraparatantrayoḥ yathākramamatho vakṣye svatantrasyādhikaṃ vidhim

'''54.90''' dakṣiṇetarayostasya pārśvayostu janārdana uṣāṃ ca pratyuṣāṃ caiva kṛtvā caikāsanasthitām

'''54.91''' karaṇḍamakuṭopetāṃ sarvābharaṇabhūṣitām dvinetrāṃ dvibhujāṃ caiva hemavarṇāṃ dhṛtāmbujām

'''54.92''' netronmīlanakarmādi sarvakāryaṃ sahaiva tu adhivāse tayoḥ kumbhau pārśvayorapi vinyaset

'''54.93''' pradhānakuṇḍe homaṃ ca tayordravyaiśca tairapi svanāmapadamantrābhyāṃ kuryādatroktasaṃkhyayā

'''54.94''' mantranyāsaṃ ca tābhyāṃ tu devasyānu prakalpayet evaṃ vai śaktikā vāpi sthāpayetsvasvamantrakaiḥ

'''54.95''' dvārādhyakṣau ca kartavyau dakṣiṇetarayorapi ugrapraśāntanāmānau dvārasya parikalpayet

'''54.96''' tayoḥ kumbhau tathā sthāne vedikāpārśvayornyaset agre’ruṇaṃ tathā sthāpya vājinaṃ tadbahiḥ kramāt

'''54.97''' lokapālānyathāsthānaṃ kumbhasthānvinyasetkramāt parivārāṃśca sarvāṃstānadhivāse sahaiva tu

'''54.98''' mantranyāsāvasāne tu yathāsthānaṃ prayojayet iti yaḥ kārayenmartyaḥ savituḥ sthāpanaṃ param

'''54.99''' āyurārogyamāpnoti putrāniṣṭāṃstathaiva ca kāmānkāmayate yo vai sa tānsarvānavāpya ca

'''54.100''' dehatyāgottare kāle bhāsate cāpi sūryavat

===Kapitel 55===

''pañcapañcāśaḥ paṭalaḥ · ṣoḍaśagaṇapatisthāpanavidhiḥ''

'''55.1''' gajānanakaṭadvaṃdvaniḥsṛtā madanirjharī prakṣālayatu naḥ kṣipraṃ vighnasaṅghātakardamam

'''55.2''' dharmaścārthaśca kāmaśca narāṇāṃ yena vidyate stotraṃ tadvighnarājasya kathyate ṣoḍaśātmanaḥ

'''55.3''' karasthakadalīcūtapanasekṣukamodakam bālasūryaprabhaṃ vande devaṃ bālagaṇādhipam

'''55.4''' nālikerāmrakadalīgulapāyasadhāriṇam bhaje śaśāṅkasaṅkāśaṃ devaṃ bhaktagaṇādhipam

'''55.5''' vetālaśaktiśarakārmukaśaṅkhacakra- khaṭvāṅgamudgaragadāṅkuśanāgapāśaiḥ śūlaṃ ca kuntaparaśudhvajamudvahantaṃ vīraṃ gaṇeśamaruṇaṃ satataṃ smarāmi

'''55.6''' āliṅgya devīṃ haritāṃ niṣaṇṇāṃ parasparaspṛṣṭakaṭīniveśām saṃdhyāruṇaṃ pāśasṛṇī vahantaṃ bhayāpahaṃ śaktigaṇeśamīḍe

'''55.7''' yaḥ pustakākṣaguṇadaṇḍakamaṇḍaluśrīvidyotamānakarabhūṣaṇaminduvarṇam stamberamānanacatuṣṭayaśobhamānamaṅgaṃ smaredvidhigaṇādhipateḥ sa dhanyaḥ

'''55.8''' pakvacūtaphalakalpamañjarīmikṣudaṇḍatilamodakaṃ vahan rājate paraśuhasta te namaḥ śrīsamṛddhisahitaśca piṅgalaḥ

'''55.9''' nīlābjaṃ dāḍimaṃ vīṇāśālipuñjākṣasūtrakam dadhaducchiṣṭanāmā tu gaṇeśaḥ pātu saṃnataḥ

'''55.10''' pāśāṅkuśasvadantāmraphalavānākhuvāhanaḥ vighnaṃ nihantu naḥ sarvaṃ raktavarṇo vināyakaḥ

'''55.11''' dantakalpalatāpāśaratnakumbhāṅkuśojjvalam bandhūkakamanīyāṅgaṃ dhyāyetkṣipravināyakam

'''55.12''' abhayavaradahastaḥ pāśadantākṣamālāparaśusṛṇitriśīrṣaṃ mudgaraṃ modakaṃ ca dadhadadhigatasiṃhaḥ pañcamātaṅgavaktro gaṇapatiratha gauraḥ pātu herambanāmā

'''55.13''' bibhrāṇaḥ śukabījapūrakamalamāṇikyakumbhāṅkuśān pāśaṃ kalpalatāṃ ca pāṇikalaśaṃ srotaḥ sudhānirjharam śyāmenāttasaroruheṇa sahito devīdvayenāntike gaurāṅgo varadānahastakamalo lakṣmīgaṇeśo’vatāt

'''55.14''' śaṅkhekṣucāpakusumeṣukuṭhārapāśacakrāṅkuśaiḥ kalamamañjarikāsanāthaiḥ pāṇisthitaiḥ parisamāhitabhūṣaṇaśrīrvighneśvaro vijayate tapanīyagauraḥ

'''55.15''' pāśāṅkuśāpūpakuṭhāradantacañcatkaraṃ klṛptavarāṅgulīyakam pītaprabhaṃ kalpataroradhaḥsthaṃ bhajāmi nṛttaikapadaṃ gaṇeśam

'''55.16''' kalhārāmbujabījapūrakagadādantekṣubāṇaiḥ samaṃ bibhrāṇo maṇikumbhaśālikaṇiśau pāśaṃ ca cakrānvitam gaurāṅgyā rucirāravindayutayā devyā samāliṅgitaḥ śoṇāṅgaḥ śubhamātanotu bhavatāṃ nityaṃ gaṇeśo mahān

'''55.17''' kalhāraśālikaṇiśeṣuparaśvadhāstradantaprarohaphalabhṛtkanakojjvalāṅgaḥ āliṅganodyatakaro haritāṅgayaṣṭyā devyā diśatvabhayamūrdhvagaṇeśvaraste

'''55.18''' pāśāṅkuśokṣucaṣakeṣusarojadantaśālyagraratnakalaśābharaṇābhirāmam pārśve sadārayugalaṃ kanakābhamīḍe hāridrakuñjaranibhaṃ karuṇānivāsam

'''55.19''' iti viracitamimaṃ gaṇādhirājastavamanuttamamādareṇa nityam smarati paṭhati yaḥ śṛṇoti vāpi jagati tasya na kiñcidapyavaśyam

===Kapitel 56===

''ṣaṭpañcāśaḥ paṭalaḥ · kṣetrapālasthāpanavidhiḥ''

'''56.1''' pratiṣṭhāṃ kṣetrapālasya tadutpattipuraḥsaram mantreṇa saha vakṣyāmi samāsācchṛṇu devapa

'''56.2''' purā kṣetrāṇi loke’smindivi nāgāspade’pi ca duṣṭagrahaiḥ pīḍitāni brahmā tatkṣemakāmyayā

'''56.3''' bhavaṃ vīkṣyāha te yuktaṃ kṣetrāṇāṃ pālako bhava śrutvā vākyamidaṃ tasya kṣetrāṇāṃ pālako’bhavat

'''56.4''' bālarūpaṃ samāsthāya nagnamaṣṭabhujānvitam śvānavāhaṃ sudaṃṣṭraṃ ca trinetraṃ kuṭilānanam

'''56.5''' yogakṣemastu sarveṣāṃ kṣetrāṇāṃ mayi pālake sarvadā vartate tasmātkṣetrapālo’hameva tu

'''56.6''' idaṃ rūpaṃ tadīyaṃ tu dṛṣṭvā duṣṭagrahāstu ye pradudruvuśca kṣetrebhyo bhayabhītāḥ samantataḥ

'''56.7''' mantrasya bījaṃ tvaṃ viddhi kūṭamāyābalānvitam bindunādasamāyuktaṃ mantrāṇāmuttamottamam

'''56.8''' mūlamaṅgāni capyasya kṣakāreṇaiva kalpayet kṣakāraḥ kaṣayoryogātkūṭākṣaramiti smṛtam

'''56.9''' śvānavāhāya vidmahe tīkṣṇadaṃṣṭrāya dhīmahi tanno rudraḥ pracodayāditi paścādvadetsudhīḥ

'''56.10''' gāyatrī ceyamasya syātpratiṣṭhāvidhirucyate liṅgasthāpanayogyeṣu sthāpayedenamacyuta

'''56.11''' grāmādiṣu caturdikṣu grāmābhimukhameva vā udagdvāre tu dhāmnastannairṛte kṣetrapālakaḥ

'''56.12''' dakṣiṇadvārake vāyau mukhamaṇṭapasaṃyute sthāpayetkṣetrapālaṃ taddhāmno’gre vātha pārśvayoḥ

'''56.13''' īśapāvakayorvāpi kṛtvā deśe’tha maṇṭapam tatra vedyāstu paritaḥ kuṇḍāni parikalpayet

'''56.14''' āśāsu caturaśrāṇi vṛttāni syurvidikṣu ca padmaṃ pradhānakuṇḍaṃ syātpañcahomavidhāvapi

'''56.15''' vṛttaṃ hitvā ca padmaṃ syāttaddiśānyattu kalpayet saṃskārādīni sarvāṇi kṛtvā tatraiva maṇṭape

'''56.16''' pratimāṃ lakṣaṇopetāṃ snānamaṇṭapamadhyamam netronmīlanakarmāṇi kārayecchilpinā budhaḥ

'''56.17''' hemasūcyā tataścāpi devāgre sthaṇḍile kṛte madhvājyapayasāṃ pātraṃ pṛthageva samācaret

'''56.18''' pātraṃ tu tāmrajaṃ śastaṃ teṣu triṣvapi hemajam kamalaṃ vinyasedastramantramuccārya deśikaḥ

'''56.19''' prokṣayitvā hṛdā tāni mudrayeddhenumudrayā kṛtvā yavanikāṃ tatra haimayā dūrvayā tataḥ

'''56.20''' dakṣiṇetarayoścaiva netrayormadhusarpiṣī netramantraṃ samuccārya tarpayedūrdhvalocane

'''56.21''' payasā tarpayettadvat tato haimanakhānvitaiḥ tarjanyāditribhiḥ paścādaṅgulairvinyasedatha

'''56.22''' nayanākhyaṃ tatastāṃ ca pañcamṛtpañcagavyakaiḥ śodhayitvā hṛdāstreṇa gandhatoyena secayet

'''56.23''' tato yavanikāpāye brāhmaṇān gāṃ ca darśayet pratimāṃ bhūṣitāṃ sarvai rathādyenāthavā nayet

'''56.24''' jalatīre tatastatra pratimāṃ sthāpya mantravit puṇyāhaṃ vācayitvā tu prokṣya ca brahmapañcakaiḥ

'''56.25''' tato’bhiṣicya kūrcena vastreṇāpi ca veṣṭayet jalamadhye tatastāṃ ca phalakāyāṃ ca śāyayet

'''56.26''' prākśiraścordhvavaktraṃ ca parito dikpatīnnyaset tato nītvā ca tatrāpi kālaṃ pūrvoktamānayet

'''56.27''' jalādutthāpya taṃ devaṃ snānamaṇṭapamadhyamam tatra saṃsthāpya vastrādīnapanīyātha mantravit

'''56.28''' arghyaṃ dattvā hṛdā mūrdhni kṛtvā śuddhiṃ punaḥ punaḥ gandhatoyena tanmūlamuccarannabhiṣecayet

'''56.29''' tataḥ puṇyāhamapyatra vācayitvā samāhitaḥ sarvātmanātha samprokṣya bandhayetkautukaṃ budhaḥ

'''56.30''' tataḥ kūrcena vastreṇa sitenāpi ca veṣṭayet arghyaṃ dattvā tataścāpi mūrdhni devasya mantravit

'''56.31''' maṇḍape vedikāyāṃ ca sthaṇḍile vidhivatkṛte śayane mantrayanmūlaṃ beramānīya śāyayet

'''56.32''' prākśiraścordhvavaktraṃ taṃ raktavastreṇa veṣṭayet tataḥ pradhānaṃ kalaśaṃ sarvalakṣaṇalakṣitam

'''56.33''' gandhodapūritaṃ hemaśūlaratnasamanvitam vastrakūrcasamāyuktaṃ pidhānena pidhāya ca

'''56.34''' sthāpayeddhetimuccārya śaṅkhadundubhinisvanaiḥ sarvātodyasamayuktaṃ pratimāyāḥ śiro’ntike

'''56.35''' parito’ṣṭau nyasenmantrī kalaśā narcayetkramāt aṅganyāsādikaṃ sarvaṃ pūrvavatparikalpayet

'''56.36''' kṣetrapālaṃ tato dhyāyecchyāmavarṇaṃ trilocanam ūrdhvakeśaṃ sudaṃṣṭraṃ ca bhrukuṭīkuṭilānanam

'''56.37''' padmapīṭhe sthitāṅghriṃ ca sarpamekhalayā yutam kṣepottuṅgamatikruddhaṃ kṣudraghaṇṭāmayīṃ tathā

'''56.38''' karoṭikāmayīṃ cāpi mālāmāgulphalambinīm dadhānamuragaṃ baddhaṃ bhūṣitaṃ candrarekhayā

'''56.39''' dakṣiṇe śūlaḍamarukhaḍganāgeṣu saṃyutaiḥ vāme kapālaṃ ghaṇṭāstracarmacāpasamāyutaiḥ

'''56.40''' aṣṭābhiśca karairyuktaṃ nīlameghasamadyutim caturbhujaṃ vā taṃ dhyāyeddakṣiṇetarayorapi

'''56.41''' śūlaṃ ḍamarukaṃ caiva kapālaṃ pāśameva ca dadhānaṃ bhūṣaṇairanyaiḥ pūrvavattaṃ prakalpayet

'''56.42''' yathā bahiḥ sthitaṃ rūpamevaṃ kumbhe tu bhāvayet tato mūlaṃ samuccārya kṛtvā puṣpāñjaliṃ sudhīḥ

'''56.43''' āvāhanādikaṃ kṛtvā gandhādyaiḥ pūjayeddhṛdā paritaḥ sthāpite cātha pūjārthaṃ kalaśāṣṭake

'''56.44''' bhavādīnarcayetsarvān svanāmapadamantrakaiḥ tato homaṃ prakurvīta kuṇḍeṣu paritaḥ kramāt

'''56.45''' kuṇḍasaṃskārapūrvaṃ tu vahnisaṃsthāpanaṃ tathā kuṇḍeṣu pūrvavaddevānsaṃsthāpya cārcayettataḥ

'''56.46''' yukto vāhādibhirmantrī homaṃ sarvatra kārayet samidājyacarūṇāṃ tu tilasarṣapayostathā

'''56.47''' mudgamāṣayavānāṃ ca pratyekaṃ tu śatāhutīḥ tadardhaṃ vā kramānmūlamantrāṅgaiśca yathākramam

'''56.48''' gāyatryā saha kuryāttu pratidravyaṃ tu sarpiṣā hutvā vyāhṛtimantreṇa deśiko hotṛbhiḥ saha

'''56.49''' tattadaṅgaṃ spṛśenmantrī berasya puṣpapāṇinā sarvadravyāvasāne tu kuṇḍeśānāṃ daśāhutīḥ

'''56.50''' sarpiṣā juhuyātpaścātpariṣicya samāpayet tato haviśca devānāṃ kumbhasthānāṃ pradāpayet

'''56.51''' tāmbūlaṃ ca tato dattvā nītvā rātriṃ tu deśikaḥ prabhāte kṛtanityastu maṇḍapaṃ saṃpraviśya ca

'''56.52''' mantrātmikāṃ tanuṃ kṛtvā yaṣṭvā devāṃśca pūrvavat sarvakuṇḍeṣu saṃpūjya devān vyāhṛtipūrvakam

'''56.53''' srucā pūrṇāhutiṃ dadyānmūlavidyāṃ samuccaran pariṣicya tato devānkuṇḍe’bhyarcya visarjayet

'''56.54''' paridhīnviṣṭarāṃścaiva saṃprokṣyāgnau tu nikṣipet tato garbhagṛhaṃ gatvā brāhme divye’thavā pade

'''56.55''' sthāpyā dhāraśilāṃ tatra ratnādi vidhivannyaset tato maṇḍapamāsādya beramuddhṛtya mūlataḥ

'''56.56''' vastrādikaṃ samutsṛjya dattvārghyaṃ śirasi kramāt rathādiṣu samāropya kṛtvā dhāmni pradakṣiṇam

'''56.57''' nītvā garbhagṛhaṃ tatra sthāpayetsaṃspṛśaṅśiraḥ mūlavidyāṃ gṛṇanmantrī śilpinā saha daivate

'''56.58''' viśeṣatastu pīṭhasya kuryātsandhānamuttamam śilpikarmaṇi nirvṛtte tamudvāsya sasatkṛtim

'''56.59''' snātvā vidyātmakaṃ dehaṃ kṛtvā puṇyāhamatra tu garbhagehe tato devaṃ pañcamṛtpañcagavyakaiḥ

'''56.60''' śodhayitvā hṛdā mantrī gandhodenābhiṣecayet tatastānmaṇḍapāt kumbhānyathāpūrvaṃ samānayet

'''56.61''' berāgre sthaṇḍile tāṃśca yathāpūrvaṃ tu vinyaset tatodaṅmukhamāviśya pūrvavatsakalīkṛtaḥ

'''56.62''' soṣṇīṣaḥ sottarīyaśca baddhapañcāṅgabhūṣaṇaḥ dhyātvā devaṃ tu kumbhasthaṃ yathāpūrvaṃ tu deśikaḥ

'''56.63''' mūlamantraṃ samuccārya tataḥ kūrcasṛtāmbhasā pratimāhṛdi kumbhasthadevaṃ vinyasya pūjayet

'''56.64''' yojayitvā kṣakāreṇa viniyogeṣu yojayet abhiṣekaṃ tataḥ kṛtvā brāhmaṇān bhojayettataḥ

'''56.65''' ācāryaṃ pūjayeccaiva dakṣiṇāṃ dāpayettataḥ evaṃ yaḥ kurute caiva sa rājā vijayī bhavet

===Kapitel 57===

''saptapañcāśaḥ paṭalaḥ · parivārasthāpanavidhiḥ''

'''57.1''' athānyaparivārāṇāṃ dvāravaktrājjanārdana pūjārthaṃ sthāpanaṃ yatsyāttadviśiṣya vadāmi te

'''57.2''' tattaddhāmāgradeśe tu pārśvayorubhayostu vā pañcahastaṃ caturgātraṃ kṛtvā maṇḍapamatra vai

'''57.3''' madhye ca vedikāṃ tatra kārayetṣoḍaśāṃśakaiḥ tālamātrasamutsedhāṃ darpaṇodarasaṃnibhām

'''57.4''' gomayenopalipyātha vitānaṃ pratanettataḥ darbhamālā dhvajāṃścāpi muktādāmasamanvitam

'''57.5''' toraṇaṃ ca caturdikṣu nyastvā puṇyāhamācaret tato berasya kurvīta netronmīlanakarma ca

'''57.6''' tattannetraṃ samunmīlya beraṃ gavyādibhistataḥ śuddhiṃ kṛtvā jale cāpi tattaddhṛdayamuccaran

'''57.7''' adhivāsya yathāpūrvaṃ tato beraṃ samānayet maṇḍapasyottare bhāge phalakopari vinyaset

'''57.8''' tato’bhiṣicya gandhodaiḥ kṛtvā kautukabandhanam tattanmūlena mantreṇa tato vastrādinā punaḥ

'''57.9''' āveṣṭya pratimāṃ paścādvedikopari nirmite sthaṇḍile pūrvavatkṛtvā śayanaṃ tatra śāyayet

'''57.10''' tattaddhṛdayamuccārya pratimāṃ tāṃ yathā purā tattacchiro’ntike tasyāḥ kumbhaṃ pūrvoktalakṣaṇam

'''57.11''' gandhodapūritaṃ hemapadmayuktaṃ sakūrcakam sāpidhānaṃ savastraṃ ca nyastvā mūlena pūjayet

'''57.12''' yathā rūpaṃ tathā dhyāyetpratimāyāstu kumbhake tathāṣṭau kalaśāndikṣu nyastvā pūrvoktalakṣaṇān

'''57.13''' dharmādīnapyadharmādīn digvidikṣu samarcayet pādyānnaivedyaparyantaiḥ tato homaṃ samācaret

'''57.14''' caturaśreṣu kuṇḍeṣu caturdikṣu vidikṣvapi śāṅkare tu pradhānaṃ syādvṛttakuṇḍaṃ tathaiva hi

'''57.15''' vidikkuṇḍaparityāge pañcahomavidhirbhavet ekahoma vidhāne tu prācyāmeva prakalpayet

'''57.16''' sarvatra sthaṇḍile vāpi saikate homamācaret kuṇḍasaṃskārapūrvāṇi yathāpūrvaṃ prakalpayet

'''57.17''' yathoktavidhinā cāgniṃ saṃpādya pūjayetkramāt pradhānadevatāstasminsthāpya tāstu samarcayet

'''57.18''' dharmādharmādidevāṃśca vidhinā pūjayetkramāt samidājyacarūṇāṃ tu tilasarṣapayostathā

'''57.19''' yavaveṇvośca hotavyā pratyekaṃ tu śatāhutiḥ plakṣodumbarakāśvatthavaṭajā brahmavṛkṣajāḥ

'''57.20''' aṅgairmūlādibhirmantraiḥ samidādi yathākramam deśiko hotṛbhiḥ sārdhaṃ homayed dravyasaṃcayam

'''57.21''' pratidravyāvasāne tu hṛdayādīni saṃspṛśet mūlenāpi ca hṛddeśaṃ dharmādīnāṃ tataḥ sudhīḥ

'''57.22''' sarpiṣaivāhutīḥ sapta pratyekaṃ juhuyāttataḥ adharmādicaturṇāṃ tu pradhāne tatra homayet

'''57.23''' evaṃ kṛtvā niśāyāṃ tu deśiko mūrtipaiḥ saha prabhāte kṛtanityastu maṇḍapaṃ saṃpraviśya ca

'''57.24''' kṛtvā mantramayaṃ dehaṃ tattanmūlāṅgamantrakaiḥ beraṃ ca pūjayitvā tu teṣu kumbheṣu pūjayet

'''57.25''' pūrṇāhutiṃ tu sarvatra tattanmūlena dāpayet tato beraṃ samāhṛtya tyaktvā kūrcaṃ savastrakam

'''57.26''' rathādiṣu samāropya kṛtvā dhāmni pradakṣiṇam praviśya dhāma tatraiva ratnahemādisaṃyute

'''57.27''' sthāpayedavaṭe beraṃ śilpinā mūlamuccaran tataḥ snātvā samācāntaḥ kṛtvā nityakriyaḥ sudhīḥ

'''57.28''' pañcagavyena tadberamabhiṣicyāstramantrataḥ gandhatoyena gāyatryā tataścāpyabhiṣecayet

'''57.29''' puṇyāhaṃ tatra kṛtvā ca prokṣayitvāstramuccaran tataḥ kumbhānsamuddhṛtya kṛtvā dhāmapradakṣiṇam

'''57.30''' praviśya garbhagehaṃ tu devāgre sthaṇḍile kṛte yathāsthānaṃ tu vinyasya pūjayitvā ca pūrvavat

'''57.31''' devatāṃ mantrarūpāṃ tāṃ kumbhasthāṃ mūlamantrataḥ kūrcāgrayoḥ sṛtenaiva toyena pratimāhṛdi

'''57.32''' vinyasettena toyena tattadastraṃ samuccaran abhiṣicya tato’nyāṃśca dharmādīnparitastathā

'''57.33''' nyastvā taiśca tato beramabhiṣicya yathākramam tattadaṅgāni cāṅgeṣu nyastvā mūlaṃ hṛdi nyaset

'''57.34''' avargaṃ mūrdhni vinyasya kavargaṃ ca mukhe nyaset cavargaṃ vakṣasi nyastvā kukṣau cāpi ṭavargakam

'''57.35''' tavargaṃ ca pavargaṃ ca hastayorubhayornyaset yavargaṃ ca śavargaṃ ca pādayorubhayostathā

'''57.36''' havargaṃ pṛṣṭhadeśe tu vinyasyaivaṃ tu mātṛkāḥ abhiṣicya tato beraṃ gandhapuṣpādibhiryajet

'''57.37''' prabhūtaṃ ca havirdadyāttāmbūlaṃ ca pradāpayet evaṃ saṃsthāpanaṃ proktaṃ sādhāraṇamidaṃ bhavet

'''57.38''' anuktānāṃ tu sarveṣāṃ pīṭhākārastu kathyate devatāsthāpanaṃ caiva samāsācchṛṇu devapa

'''57.39''' yasya devasya yatpīṭhaṃ kalpitaṃ vidhinā bhavet śilādibhistu tatpārśve pūrve vāpyuttare’pi vā

'''57.40''' śilpikarmaṇi nirvṛtte śilpinaṃ tu visarjayet prapāṃ tatra vitānaṃ ca kṛtvā taddeśamapyatha

'''57.41''' gomayenopalipyātra puṇyāhaṃ vācayettataḥ sthaṇḍilaṃ śālibhiḥ kṛtvā tatra padmaṃ samālikhet

'''57.42''' karṇikāyāṃ tataḥ kumbhaṃ gandhodaparipūritam pūrvoktalakṣaṇopetaṃ vinyasedvastraveṣṭitam

'''57.43''' tatra kumbhe tu taddevaṃ dhyātvāvāhya samarcayet tato homaṃ prakurvīta pīṭhakumbhāntarālake

'''57.44''' kuṇḍe vā sthaṇḍile vāpi vahniṃ saṃpūjya pūrvavat samidājyacarūṇāṃ tu pratyekaṃ ca śatāhutim

'''57.45''' tadardhaṃ vā tadardhaṃ vā tattanmūlena homayet tattadaṅgaistathājyena pratyekaṃ tu daśāhutim

'''57.46''' homayedatha sarvānte pīṭhaṃ sarvātmanā spṛśet evaṃ rātrau kriyāṃ kṛtvā prabhāte hotṛbhiḥ saha

'''57.47''' kṛtanityakriyo mantrī kṛtvā mantrātmikāṃ tanum kumbhasthaṃ devamabhyarcya pūrṇāṃ mūlena homayet

'''57.48''' tataḥ kumbhasthitaṃ devaṃ pūrvavatpīṭhake nyaset kumbhādbhirvedaghoṣādyairmūlamantraṃ samuccaran

'''57.49''' abhiṣicya tataḥ pīṭhe saṃpūjyātraiva devatām havirnivedayitvātha tāmbūlaṃ ca nivedayet

'''57.50''' pratiṣṭhā vidhānaṃ pīṭhānāmevamuktaṃ samāsataḥ mahāpīṭhasya vakṣyāmi pratiṣṭhāṃ tu janārdana

'''57.51''' mahāpīṭhavidhau proktaṃ bāhyamābhyantaraṃ tviti tayoragre prapāṃ kṛtvā pārśvayostatra vedikām

'''57.52''' pañcahastamitāṃ vāpi tatra kuṇḍāni kalpayet caturaśrāṇi sarvatra śāṅkare vṛttameva ca

'''57.53''' ekahomavidhāne tu prācyāṃ kuṇḍaṃ prakalpayet gomayena samālipya puṇyāhaṃ kārayettataḥ

'''57.54''' tato’dhivāsanaṃ kuryādbāhyābhyantarayorapi ubhayorucyate tatra vedikāyāṃ vidhānataḥ

'''57.55''' sthaṇḍilaṃ śālibhiḥ kṛtvā padmamaṣṭadalaṃ likhet tatra madhye nyasetkumbhaṃ sitasūtravicitritam

'''57.56''' gandhodapūritaṃ cāpi sahiraṇyaṃ sakūrcakam sāpidhānaṃ savastraṃ ca pūrvoktalakṣaṇānvitam

'''57.57''' tathāṣṭau parito vīkṣya dṛśā dikṣu ca deśikaḥ pūrvādiṣu daleṣvete sthāpanīyā yathākramam

'''57.58''' pūrvavadgandhatoyādyaistattatkumbhaṃ ca pūrayet tataścāvāhanādyaiśca devāṃsteṣu samarcayet

'''57.59''' ābhyantarasya pīṭhasya madhye tatkarṇikopari saṃsthitaścaṇḍarudrākhyo gaṇeśaḥ paritaḥ kramāt

'''57.60''' pūrvādiṣu daleṣvenaṃ mūlamantreṇa pūjayet gulānnaṃ paramānnaṃ ca śuddhānnaṃ ca nivedayet tāmbūlaṃ mukhavāsena dadyādvai mūlavidyayā

===Kapitel 58===

''aṣṭapañcāśaḥ paṭalaḥ · viṣṇusthāpanavidhiḥ''

'''58.1''' devadevaṃ praṇamyādau pṛcchati sma janārdanaḥ saṃsthāpanaṃ kathaṃ viṣṇostatsarvaṃ brūhi me prabho

'''58.2''' viṣṇoḥ saṃsthāpanaṃ vakṣye samāsena janārdana viṣṇuṃ caturbhujaṃ śāntaṃ vanamālādharaṃ tathā

'''58.3''' kirīṭamakuṭopetaṃ śyāmavarṇaṃ dvinetrakam śaṅkhacakradharaṃ caiva śrīvatsāṅkitavakṣasam

'''58.4''' daṇḍābhayadharaṃ devaṃ pītāmbarasamanvitam sukhāsīnaṃ sthitaṃ vāpi dharaṇyā ca śriyā yutam

'''58.5''' śayānaṃ vāpi tadrūpaṃ kalpayetkalpavittamaḥ nṛsiṃharūpaṃ vā kuryācchaṅkhacakradharaṃ tathā

'''58.6''' kukkuṭāsanamāsīnamāttaparyaṅkabandhanam jānudvayoparinyastakūrparadvayamujjvalam

'''58.7''' sthāpayettatra devāṃśca sthāpanoktakrameṇa tu netronmīlanapūrvaṃ tu tadīyairaṇubhiḥ kramāt

'''58.8''' nṛsiṃharūpasyāpyevaṃ sthāpanaṃ parikīrtitam evaṃ yaḥ kārayenmartyo viṣṇusaṃsthāpanaṃ param iha loke sukhaṃ prāpya sa yāti paramāṃ gatim

===Kapitel 59===

''ekonaṣaṣṭitamaḥ paṭalaḥ · sarasvatīsthāpanavidhiḥ''

'''59.1''' sthāpanaṃ tu sarasvatyāḥ samāsācchṛṇu sāṃpratam grāmādīnāṃ tu madhye tāṃ pūrvapaścimayostu vā

'''59.2''' grāmādyabhimukhāṃ devīṃ sthāpayejjñānasiddhaye śivālayeṣu saumye vā vāruṇe pāvake’pi vā

'''59.3''' grāmādau prāṅmukhā devī madhyasthā syācchivālaye mūlābhimukhamevoktaṃ nāgaraṃ drāviḍaṃ tu vā

'''59.4''' śvetāṃ śvetāmbujāsīnāmekavaktraṃ caturbhujām saṃdaṃśamakṣamālāṃ ca dakṣiṇe tu tathetare

'''59.5''' dadhatīṃ tāṃ sureśānīṃ pustakaṃ ca kamaṇḍalum śuklāmbaradharāṃ devīṃ śuklamālyānulepanām

'''59.6''' trinetrāṃ cāruvadanāṃ sarvābharaṇabhūṣitām mṛdā vā nirmitāṃ devīṃ sthāpayetsarvasiddhaye

'''59.7''' tasyāḥ saṃsthāpanārthaṃ tu maṇḍapaṃ kārayettataḥ pūrvoktalakṣaṇopetaṃ tatra kuṇḍāni kalpayet

'''59.8''' yonyākārāṇi sarvāṇi catasṛṣvapi deśikaḥ śāṃkare vṛttakuṇḍaṃ tu pradhānaṃ parikalpayet

'''59.9''' gomayenopalipyātha maṇḍapaṃ kuṇḍavediyuk ānīya pratimāṃ tatra kalpite snānamaṇḍape

'''59.10''' unmīlanaṃ tu netrāṇāṃ kuryānmantrī yathā purā pratimāyāstataḥ śuddhirjale cāpyadhivāsanam

'''59.11''' pūrvavatkārayitvātha snānamaṇḍapamadhyame vedikāyāṃ tato’rcāṃ tāmānīya sthāpya mantravit

'''59.12''' vastrakūrcādikaṃ tyaktvā gandhatoyena varmaṇā abhiṣicya tato devīṃ candanenopalipya ca

'''59.13''' kautukaṃ bandhayeddhaste dakṣiṇe hetimuccaran pūrvavadvastrakūrcābhyāṃ veṣṭayitvā ca varmaṇā

'''59.14''' śirasyarghyaṃ tu dattvāsyā vedādīnsamudīrayan maṇḍapasyātha saṃskāramalaṃkārādikaṃ tathā

'''59.15''' yathāpūrvaṃ tu nirvṛtya sthaṇḍile parikalpite śayane vedikāmadhye sarvātodyasamanvitam

'''59.16''' ānīyārcāṃ tataścāpi śāyayenmūlavidyayā prākśiraścordhvavaktrāṃ tāṃ chādayedraktavāsasā

'''59.17''' kavacena tataḥ kumbhānpūrvavatsādhayecchubhān devyāḥ śirontike teṣu pradhānakalaśaṃ nyaset

'''59.18''' paritaḥ kalaśānaṣṭau saṃsthāpya cārcayetsudhīḥ madhye sarasvatīṃ dhyātvā kṛtvā vidyātanuṃ tadā

'''59.19''' āvāhanādibhirdevīṃ mūlamantraṃ samuccaran yathoktavidhinābhyarcya paritaḥ kalaśeṣvapi

'''59.20''' śriyaṃ śaśīmuṣendrāṇyau mahādikṣu samarcayet nivṛttiṃ ca pratiṣṭhāṃ ca vidyāṃ śāntiṃ tathaiva ca

'''59.21''' vidikṣu ca sa māvāhya praṇavena samarcayet tataśca homaṃ kurvīta sādhakaiḥ saha deśikaḥ

'''59.22''' vidhināgniṃ samādhāya kuṇḍeṣvapi ca pañcasu pradhāne devīmabhyarcya śeṣeṣvapi yathākramam

'''59.23''' kamalādīḥ samārādhya homayeddravyasaṃcayam samidājyacarūm̐llājānyavaveṇutilānkramāt

'''59.24''' plakṣodumbarakāśvatthavaṭāḥ pūrvādiṣu kramāt palāśastu pradhāne syātsamiddhomaṃ samācaret

'''59.25''' adhipānāṃ ca sarveṣāṃ pratyekaṃ tu śatāhutīḥ homayetsarpiṣā tena sāmamantreṇa sādhakaiḥ

'''59.26''' pūrvavadāhutīrhutvā pariṣicya samāpayet tasminkāle caturdikṣu ṛgādyadhyayanaṃ bhavet

'''59.27''' śāṃkare’strajapaṃ kuryātsarvātodyasamanvitam tataḥ kumbhasthadevīnāṃ havirdadyādyathākramam

'''59.28''' evaṃ kṛtvā niśāyāṃ tu prabhāte sumuhūrtake kṛtanityakriyo gatvā maṇḍapaṃ hotṛbhiḥ saha

'''59.29''' devīnāmarcanaṃ kṛtvā pūrṇāṃ mūlena dāpayet tato devīṃ samuddhṛtya kūrcavastraṃ vyapohya ca

'''59.30''' rathādiṣu samāropya kṛtvā dhāmapradakṣiṇam antaḥ praviśya garbhasthe daivike mānuṣe’pi vā

'''59.31''' pade saṃsthāpayedvidvānavaṭe ratnasaṃyute pūrvavatkalpite mantrī mūlavidyāṃ samuccaran

'''59.32''' sthāpayedvā pīṭhamapi kṛtvā saṃdhiṃ vidhānataḥ udvāsya śilpinaṃ paścātsnātvācamya yathāvidhi

'''59.33''' praviśya garbhagehāntaḥ pratimāśuddhimācaret puṇyāhaṃ ca tataḥ kṛtvā kumbhānuddhṛtya vāhakaiḥ

'''59.34''' deśiko hotṛbhiḥ sārdhaṃ kṛtvā dhāmapradakṣiṇam antaḥ praviśya devyagre sthaṇḍile vinyasetsudhīḥ

'''59.35''' suprasannaḥ praśāntātmā kṛtavidyātanustadā mantranyāsaṃ tu kurvīta pūrvavanmūlavidyayā

'''59.36''' abhiṣekaṃ tataḥ kuryātprāgādikumbhatoyakaiḥ mūlāṅgamātṛkānyāsaṃ pūrvavatsarvamācaret

'''59.37''' mālābharaṇavastrādyaiḥ kṛtvālaṃkāramuttamam abhyarcya devīṃ gandhādyaiḥ paramānnaṃ nivedayet

'''59.38''' prabhūtavyañjanopetaṃ phalabhakṣyaṃ nivedayet tāmbūlaṃ mukhavāsaṃ ca tato dadyādatandritaḥ

'''59.39''' tataḥ pustakarūpeṇa likhitaṃ tu śivāgamam purāṇādyaṃ ca vedāṅgaṃ paṭṭavastraiḥ samāvṛtam

'''59.40''' devyāstu vāmapārśve tu vidyāpīṭhe ca vinyaset pratyahaṃ pūjayeddevīṃ pustakaṃ cāpi mantravit

'''59.41''' guṇapradhānayorevaṃ samānaṃ sarvathoditam pradhāne tu viśeṣo’yaṃ kathyate madhusūdana

'''59.42''' paśyantī madhyamā caiva pratīhārasya devate śvetavarṇe dvinetre ca dvibhuje vā caturbhuje

'''59.43''' vāhanaṃ tu bhaveddhaṃsaḥ parivāratathocyate kamalādayaḥ śaktayo’syāḥ pūrvādiṣu ca saṃsthitāḥ

'''59.44''' pūrvoditā devatāstu saṃsthāpya pūjayetsudhīḥ adhivāsādikaṃ tāsāṃ pūrvavatkārayedguruḥ

'''59.45''' nṛttagītādivādyaiśca sarvavedasvanairyutam evaṃ yaḥ kurute martyo devyāḥ sthāpanamuttamam

'''59.46''' vidyārthī labhate vidyāṃ bhogārthī bhogamāpnuyāt mokṣārthī labhate muktiṃ nātra kāryā vicāraṇā

===Kapitel 60===

''ṣaṣṭitamaḥ paṭalaḥ · triśūlādisthāpanavidhiḥ''

<poem>
triśūlalakṣaṇam
</poem>

'''60.1''' tanmadhye padmamaṃśābhyāṃ sāṣṭapatraṃ sakarṇikam savṛttaṃ tatprakartavyaṃ śeṣaṃ yuktyā prakalpayet

'''60.2''' yathāvidhi triśūlasya daṇḍaṃ samyak prakalpayet tattārādadhike tāre yugāṃśe’gnyaṃśato bhavet

'''60.3''' ūrdhvaṃ vāyupraveśāya dārudaṇḍasya kalpanam pañcāṅgulapramāṇena vivaraṃ golake bhavet

'''60.4''' sāmbikā vā sthitā ramyā sarvābharaṇabhūṣitā pālikopari koṇeṣu kārayedvā vṛṣeśvaram

'''60.5''' kuryācchūlamukhe kumbhe ṭaṅkāsyaṃ saṃprayojayet evaṃ lakṣaṇamuddiṣṭaṃ pratiṣṭhāvidhirucyate

'''60.6''' harmyāgre maṇḍapaṃ kṛtvā pūrvavallakṣaṇānvitam kuṇḍāni paritastasya prāgādiṣu yathākramam

'''60.7''' caturaśraṃ dhanurvṛttaṃ trikoṇaṃ śāṅkare tathā padmakuṇḍaṃ tatra madhye vedīkalpanapūrvakam

'''60.8''' sthaṇḍilaṃ ca tataḥ kṛtvā snānamaṇḍapamatra ca tatra śūlaṃ samānīya netronmīlanamācaret

'''60.9''' saberaṃ cetpuroktena vidhinā deśikottamaḥ sthaṇḍile ca likhenmadhye padmamaṣṭadalānvitam

'''60.10''' tatra madhvādi vidhivadberanetreṣu tarpayet śūlānvitaṃ tu tatkṛtvā pañcamṛtpañcagavyakaiḥ

'''60.11''' grāmapradakṣiṇaṃ cādau kṛtvālaṃ kārasaṃyutam jalatīraṃ samānīya puṇyāhaṃ tatra kārayet

'''60.12''' tatrābhiṣicya śūlāgraṃ sakūrcaṃ veṣṭayettataḥ vāsasā ca navenaiva prākśiroścordhvavaktrakam

'''60.13''' śāyayetphalakāyāṃ tu parito’strāṇi cārcayet vajrādīni tato mantrī nītvā kālaṃ tu pūrvavat

'''60.14''' uddhṛtyātha jalāttasmāt snānamaṇḍapamānayet tanmadhye vedikāyāṃ tu śūlaṃ tu prāṅmukhaṃ nyaset

'''60.15''' tataḥ kūrcaṃ savastraṃ ca vyapohya pariśodhayet pañcamṛdbhistataḥ pañcagavyenāpyabhiṣecayet

'''60.16''' brahmapañcakamuccārya gandhodenaiva deśikaḥ tataḥ pratisaraṃ baddhvā pūrvavatkūrcasaṃyutam

'''60.17''' āveṣṭyāhatavastreṇa sadaṇḍaṃ hetimuccaran maṇḍape vedikāmadhye sthaṇḍile parikalpite

'''60.18''' śayane pūrvavat klṛpte sarvātodyasamanvitam śāyayetprākchiraścordhvavaktramastraṃ vicakṣaṇaḥ

'''60.19''' tadūrdhve puṣpamādāya chādayitvātha vāsasā raktenāstraṃ samuccārya tataḥ kumbhāṃstu vinyaset

'''60.20''' pūrvoktalakṣaṇopetāngandhavārisupūritān sakūrcānsā pidhānāṃśca vastreṇa pariveṣṭayet

'''60.21''' vastrāgreṣu triśūlasya nāmoṅkāreṇa kārayet sauvarṇaṃ madhyame śūlaṃ dakṣiṇe kanakāmbujam

'''60.22''' vāme cāpi tathaivābjaṃ vinyaset kalaśatraye tādṛśānkalaśānaṣṭau parito dikṣu vinyaset

'''60.23''' puṇyāhaṃ vācayitvā tu pūjayeddevatāḥ kramāt madhye maheśvaraṃ devaṃ dakṣiṇetarapārśvayoḥ

'''60.24''' brahmaviṣṇū ca saṃpūjya kalaśeṣu tataḥ kramāt lokapālānyathāsthānaṃ gandhādyairarcayetkramāt

'''60.25''' tato homaṃ prakurvīta tadvidhānamathocyate ādhāya vidhinaivāgniṃ sarvakuṇḍeṣu mantravit

'''60.26''' brahmaviṣṇumaheśāṃstu pradhāne’sminsamarcayet prākkuṇḍe tu bhavānīṃ ca dakṣiṇe vighnanāyakam

'''60.27''' paścime ṣaṇmukhaṃ bhānumuttare ca yajetkramāt samidājyacarūm̐llājāṃstilasarṣapakānyavān

'''60.28''' pratikuṇḍaṃ tu hotavyaṃ mūlāṅgaiśca yathākramāt pratyekaṃ śatamardhaṃ vā tadardhaṃ vāhutirbhavet

'''60.29''' homakāle caturdikṣu ṛgādyadhyayanaṃ bhavet brahmaviṣṇvośca sarvatra ghṛtenaiva śatāhutim

'''60.30''' hutvā gauryāśca paścāttu gajāsyaguhayorapi bhāskarasya ca caṇḍasya dikpālanāṃ tathaiva ca

'''60.31''' pañcapañcāhutīrhutvā sarveṣāṃ ca pṛthak pṛthak sarvakuṇḍeṣu mantrajño homakāle spṛśetkramāt

'''60.32''' sarvadravyāvasāne tu madhyame caiva dakṣiṇe vāme caiva kramānmantraistattatpatraparātmakaiḥ

'''60.33''' pālikāṃ ca tataḥ kumbhaṃ daṇḍāgraṃ daṇḍamadhyamam daṇḍamūlaṃ tataḥ pīṭhakarṇikādidaleṣu ca

'''60.34''' sarvatrāpi triśūlasya krameṇaivātha saṃspṛśet sarvakuṇḍeṣu tāṃ mūrtimarcayitvā ca pāvakam

'''60.35''' pariṣicyātha homaṃ tu samāpyaiva haviḥ kramāt kumbhasthānāṃ tu devānāṃ dadyāttattaddhṛdā sudhīḥ

'''60.36''' nītvā śeṣaṃ tato rātreḥ prabhāte hotṛbhiḥ saha kṛtakṛtyakriyo mantrī maṇḍapaṃ saṃpraviśya ca

'''60.37''' devaṃ pūrvavadabhyarcya sumuhūrte sulagnake pūrṇāhutiṃ pradattvā tu hyaghorāstraṃ samuccaran

'''60.38''' sarveṣvapi ca kuṇḍeṣu vyāhṛtyante tu deśikaḥ tataḥ śūlaṃ samuddhṛtya śivāstreṇa samāhitaḥ

'''60.39''' snānavedyāṃ tu vinyasya vastrakūrcādikaṃ tyajet pañcagavyena saṃsnāpya gandhodena susecayet

'''60.40''' kumbhānuddhṛtya tānsarvāṅśūlāgre tu yathāpurā vinyasya sthaṇḍile dhīmānkṛtavidyātanustataḥ

'''60.41''' madhyakumbhe maheśaṃ tu dhyātvā mantratanustadā tasya mūlaṃ samuccārya toyena pratimāhṛdi

'''60.42''' madhyapatrasya madhye ca pūrvavadvinyasetsudhīḥ brahmāṇaṃ dakṣiṇe patre vāmapatre ca keśavam

'''60.43''' tattatkumbhānkramānnyasya taiḥ kramādabhiṣecayet kumbhaiḥ praṇavamuccārya śeṣaistu kalaśaistataḥ

'''60.44''' abhiṣicya tathā śūle mūlamantraṃ tu vinyaset īśaviṣṇuviriñcānāṃ mantraṃ patreṣu vinyaset

'''60.45''' pālikāyāṃ nyasedgauryāḥ kumbhe hastimukhasya ca daṇḍāgre ṣaṇmukhasyāpi daṇḍamadhye ravestathā

'''60.46''' daṇḍamūle śaśāṅkasya caṇḍasya tadadhaḥkramāt pīṭhādiṣu digīśānāṃ daleṣvatha ca vinyaset

'''60.47''' tattaddevayutaṃ śūlaṃ brahmapañcakamuccaran gandhāmbunābhiṣicyātha gandhapuṣpādibhiryajet

'''60.48''' tasyāpi sarvadevānāṃ havirdadyātkrameṇa tu trimūrtīnāṃ tato dadyāttāmbūlaṃ mukhavāsayuk

'''60.49''' tattaddhṛdayamantreṇa tataścābharaṇādibhiḥ puṣpaiḥ śūlamalaṅkṛtya sarvadevamayaṃ tataḥ

'''60.50''' grāmādāvutsavaṃ kuryātsarvātodyasamanvitam acalasya pratiṣṭhāyāṃ ratnanyāsaṃ ca kārayet

'''60.51''' vajrādīnāmathānyeṣāmāyudhānāṃ janārdana svarṇādinirmitānāṃ tu pratiṣṭhā vakṣyate’dhunā

'''60.52''' vedyāṃ tu sthaṇḍilaṃ kṛtvā padmamālikhya tatra vai madhyame karṇikāyāṃ tu vinyasetkumbhamekakam

'''60.53''' sasūtraṃ vastrasaṃyuktaṃ gandhodaparipūritam sahiraṇyaṃ sakūrcaṃ ca pidhānena pidhāya ca

'''60.54''' vajrādipadmaparyantānyāyudhāni daśa kramāt evaṃ sthāne tu vinyasya prāgādi paritaḥ kramāt

'''60.55''' kṣālitāni tataḥ paścādgandhena prokṣitāni ca astrādīnyatha sarvāṇi svasvamantreṇa pūjayet

'''60.56''' tattatkumbheṣu puṣpādyairvidhivacca yathākramāt tato homaṃ tu kurvīta prācyāṃ diśi samāhitaḥ

'''60.57''' kuṇḍe vā sthaṇḍile vāpi vidhināgniṃ niveśya ca samidājyacarūṇāṃ tu vajrādiṣu daśasvapi

'''60.58''' vidhānenāhutīnāṃ tu pratidravyaṃ daśārdhakam hutvāghorāstramantreṇa dattvā pūrṇāhutiṃ tataḥ

'''60.59''' kumbhasthakūrcatoyena mantrānvinyasya teṣu ca sarvāṇyastrāṇi vai tattatkumbhenaivābhiṣecayet

'''60.60''' evamastrāṇi sarvāṇi yaḥ samyaksthāpayennaraḥ virodhinaḥ sarvaśatrūñjitvānte gaṇapo bhavet

===Kapitel 61===

''ekaṣaṣṭitamaḥ paṭalaḥ · vimānapratiṣṭhāvidhiḥ''

'''61.1''' atha vakṣye vimānasya pratiṣṭhāṃ tāmimāṃ śṛṇu ye devāḥ syurvimānasthāsteṣāṃ tu kriyate’dhunā

'''61.2''' sā vimānapratiṣṭhā syāttadvidhānamathocyate prāsādasya caturdikṣu śāṃkare vāpi maṇḍapān

'''61.3''' saptapañcatribhirhastaiḥ kuryācchreṣṭhādikāṃstu tān vikāracaraṇopetāṃścaturgātrayutāṃstu vā

'''61.4''' paṅkitrayasamopetāṃstanmadhye vedikā bhavet sā vikārāṅgulotsedhā darpaṇodarasannibhā

'''61.5''' navabhāgaikabhāgā ca maṇḍapeṣu pṛthak pṛthak pūrve tu caturaśrāṇi caturdikṣu prakalpayet

'''61.6''' dakṣiṇe maṇḍape cāpi caturdikṣu samantataḥ cāpākārāṇi kurvīta vṛttakuṇḍāni paścime

'''61.7''' ṣaḍaśrāṇyuttare cāpi tathā kuṇḍāni kalpayet sarveṣāṃ śāṃkare deśe pradhānaṃ padmakuṇḍakam

'''61.8''' gomayenopalipyātha bhojayitvā dvijāṃstataḥ śuddhiṃ kṛtvātha puṇyāhaṃ kṛtvā sarvānyathāvidhi

'''61.9''' kuṇḍavedisamāyuktānsarvāṃstānmaṇḍapāṃstataḥ vitānādyairalaṃkṛtya vedikāsu prakalpayet

'''61.10''' sthaṇḍilaṃ vidhivatteṣu padmamālikhya teṣu ca śakticakraṃ samabhyarcya vedikādikṣu pūrvavat

'''61.11''' devānsarvānsamabhyarcya kumbhānatha samāharet droṇapūrṇānghaṭānpañca pūrvavallakṣaṇānvitān

'''61.12''' gandhodapūritānsarvān svarṇapuṣpasamanvitān sakūrcānsāpidhānāṃśca navavastreṇa veṣṭitān

'''61.13''' pañcasaṃsthāpayenmadhye vedikāsu samāhitaḥ pratyekamaṣṭau paritastadardhaparimāṇakān

'''61.14''' tādṛśānatha kumbhāṃstu vinyaseddigdaleṣu vā evaṃ vinyasya kumbhāṃstu puṇyāhaṃ vācayettataḥ

'''61.15''' tataḥ prāsādamadhye tu prokṣayitvā tadambhasā pañcagavyena saṃprokṣya brahmapañcakamuccaran

'''61.16''' puṇyāhaṃ vācayitvānte kautukaṃ bandhayetsudhīḥ sthūpyāṃ pūrvaṃ śivāstreṇa tataścāgrasthitasya tu

'''61.17''' devasya taddhṛdā baddhvā tato’nyeṣāmapi kramāt galasthitānāṃ devānāṃ prādakṣiṇyakrameṇa tu

'''61.18''' svasvahetiṃ samuccārya vṛṣāṇāmapi bandhayet dakṣiṇe śṛṅgamūle tu tataḥ sarvānnavāmbaraiḥ

'''61.19''' sthūpyādīnveṣṭayenmantrī tattatkavacamuccaran sarveṣu kuśakūrcaṃ tu mālayā saha bandhayet

'''61.20''' praṇavaṃ susamuccārya tataḥ śikharamaṃśukaiḥ kaṇṭhaṃ ca prastaraṃ pādamadhiṣṭhānaṃ tathaiva ca

'''61.21''' vastrairāveṣṭya mantrajñaḥ sadyādi brahmabhiḥ kramāt tataścāntaḥ praviśyaivamabhiṣicya samāhitaḥ

'''61.22''' pañcagavyena sarvatra prokṣayedastramantrataḥ tataḥ pādyādibhirdevaṃ havirantaiḥ kramādyajet

'''61.23''' tato bahirviniṣkramya śāṃkare maṇḍape guruḥ hotṛbhiḥ saha mantrajñaiścaturbhiḥ saha maṇṭapam

'''61.24''' śivāstreṇa tu saṃprokṣya kṛtavidyātanurguruḥ pūjayetkumbhagāndevāṃstadvidhānamathocyate

'''61.25''' skandasya maṇṭape vedyāṃ śivakumbhaṃ tu madhyame vinyasya tasya madhye tu pañcaratnaṃ viśeṣataḥ

'''61.26''' dhyātvā sadāśivaṃ tasmiṅśivakumbhe tu vinyaset vardhanīṃ tasya vāme tu tasyāṃ haimaṃ vinikṣipet

'''61.27''' dhyātvā manonmanīṃ tasyāṃ tanmūlena tu vinyaset skandakumbhaṃ nyaseddhīmāṅśivakumbhasya dakṣiṇe

'''61.28''' pañcaratnaṃ kṣipettasmindhyātvā skandasya rūpakam tanmūlaṃ tu nyasettasmingandhapuṣpādikaṃ kramāt

'''61.29''' tattadīśānamantraiśca pūjayettu viśeṣataḥ liṅgamudrāṃ ca padmākhyāṃ śaktimudrāṃ pradarśayet

'''61.30''' abhitastu ghaṭānaṣṭau pūrvāśādiṣu vinyaset kumāraṃ ṣaṇmukhaṃ caiva subrahmaṇyaṃ surāṣṭrakam

'''61.31''' senāpatiṃ sureśaṃ ca kārtikeyaṃ guhaṃ kramāt pūrvādiṣu ghaṭeṣvetānnyasettadbījamantrakaiḥ

'''61.32''' tattadīśānamantreṇa gandhapuṣpādibhiryajet īśasya maṇṭape vedyāṃ sthaṇḍilopari madhyame

'''61.33''' pradhānakumbhaṃ nyastvā tu dakṣiṇāmūrtirūpakam dhyātvā maheśabījaṃ tu vinyasedghaṭamadhyame

'''61.34''' parito’ṣṭaghaṭeṣvetānbhavādīnpūrvato yajet bhavaṃ śarvaṃ tathaiśānaṃ paśupatiṃ rudrameva ca

'''61.35''' ugraṃ bhīmaṃ mahādevaṃ yajetpūrvāditaḥ kramāt viṣṇumaṇṭapavedyāṃ tu sthaṇḍilopari madhyame

'''61.36''' pradhānakumbhaṃ nyastvā tu tanmadhye viṣṇurūpakam dhyātvā bījaṃ ca vinyasya gandhādibhiryajeddhṛdā

'''61.37''' saṃkarṣaṇaśca pradyumno vāsudevo’niruddhakaḥ rāmaścaivācyutaścaiva nārasiṃhaśca vāmanaḥ

'''61.38''' krameṇaitāṃstathā sarvānaṣṭakumbheṣu pūjayet brahmamaṇṭapake vedyāṃ sthaṇḍilopari madhyame

'''61.39''' pradhānakumbhaṃ vinyasya tanmadhye brahmarūpakam dhyātvā bījaṃ tu vinyasya pūjayetpuruṣeṇa tu

'''61.40''' trayīmayaṃ ca mūrtiṃ ca padmākṣaṃ padmayonikam caturmukhaṃ ca dhātāraṃ pitāmahamajaṃ tathā

'''61.41''' tattanmantraṃ kramānnyastvā īśānenābhito yajet evaṃ saṃpūjya devāṃstāngandhādyaiḥ svasvanāmabhiḥ

'''61.42''' ṛgādyadhyayanaṃ kuryāccaturdikṣu krameṇa tu deśiko mūrtipaiḥ sārdhaṃ homakarma samārabhet

'''61.43''' catvārastu pradhānāste hotāro naiva putrakāḥ maṇṭapaṃ prati catvārastaiḥ taiḥ pūjāṃ samārabhet

'''61.44''' galasthitāṃstu tāndevān madhyakumbheṣu yojayet agre’nyeṣu ca kumbheṣu prāgādiṣu yathākramam

'''61.45''' tataḥ pradhānakuṇḍeṣu pradhānaghaṭasaṃsthitān devānabhyarcya sarvatra homayetsamidādibhiḥ

'''61.46''' plakṣodumbarakāśvatthavaṭāḥ pūrvāditaḥ kramāt palāśastu pradhāne syātsarvatra samiducyate

'''61.47''' homakāleṣu sarveṣu maṇṭapeṣu ṛgādibhiḥ caturbhiśca caturdikṣu vedairadhyayanaṃ bhavet

'''61.48''' sarvatra śāṃkare deśe bhavedastrajapastadā gururvṛṣendramūlāṅgaiḥ pratyekaṃ tu śatāhutiḥ

'''61.49''' ājyena homayedante vidyāṅgaiśca tato guruḥ

===Kapitel 62===

''dviṣaṣṭitamaḥ paṭalaḥ · golakādisthāpanavidhiḥ''

'''62.1''' ---  pṛthakpṛthak mūlamantreṇa hutvātha pariṣicya ca pūrvavat

'''62.2''' udvāsyoddhṛtya paścāttu vinyasetpūrvavatkramāt tayoragre ghaṭānsamyaksthāpya pūrvavadeva tu

'''62.3''' pūjayitvā nyasenmantraṃ pūrvavaccābhiṣecayet lokapālātmakaiḥ paścādabhiṣeko ghaṭairbhavet

'''62.4''' tataśca dharmayajñābhyāṃ havirdadyātsvanāmataḥ sarvātodyasamāyuktaṃ pāduke sthaṇḍilopari

'''62.5''' nyasyoddhṛtya vahanmūrdhnā dhāmni kṛtvā pradakṣiṇam antaḥpraviśya devāgre vinyasette samāhitaḥ

'''62.6''' pādukāsthāpanaṃ proktaṃ prokṣaṇaṃ makuṭādiṣu hemaratnādisiddheṣu procyate devasattama

'''62.7''' devāgre maṇḍapaṃ kṛtvā gomayenopalipya tu sthaṇḍilaṃ vidhivatkṛtvā madhyame vinyasettataḥ

'''62.8''' prokṣayedbahurūpeṇa tataḥ saṃvatsarātmanā saṃspṛśenmantravaryeṇa tataḥ prācyāṃ tu homayet

'''62.9''' saikatasthaṇḍile vahniṃ vidhinādhāya deśikaḥ samidājyacarūṇāṃ tu pratyekaṃ tu śatāhutiḥ

'''62.10''' śivāstraṃ kṣurikāstraṃ ca tathā pāśupatāstrakam mantratrayaṃ samuddiṣṭaṃ vedeṣu saṃhitādiṣu

'''62.11''' vihitena ca mantreṇa vyāhṛtyante spṛśecca tam pūrṇāṃ sarvātmanā hutvā homakarma samāpya ca

'''62.12''' sarvātodyasamāyuktaṃ dāpayettu śivasya tu gāyatri yā bhūṣaṇāni tathā sarvātmanā yajet

===Kapitel 63===

''triṣaṣṭitamaḥ paṭalaḥ · bhaktapratiṣṭhāvidhiḥ''

'''63.1''' acyuta uvāca nikhilāgamasamañcārikāruṇyāmṛtasāgara pratiṣṭhādikramaścaiva samyaguktastvayānagha

'''63.2''' jñātvā tataḥ prahṛṣṭo’smi sandehaḥ kaścidasti me madbhaktiṃ kurute yastu so’hameva na saṃśayaḥ

'''63.3''' vaseyaṃ hṛdaye tasya nityaṃ santuṣṭamānasaḥ madīyānāṃ pratiṣṭhādīnye kurvantyatibhaktitaḥ

'''63.4''' madīyāste’pi kathyante brahmādyairnikhilaiḥ suraiḥ āgasteṣāṃ prakuryurye hṛdā vācā tathaiva ca

'''63.5''' teṣāṃ prasādaleśo’pi jāyate nātra saṃśayaḥ teṣāṃ pratiṣṭhā kartavyā pūjanīyāsta eva me

'''63.6''' evamuktaṃ tvayā pūrvaṃ bhaktānāmiṣṭadāyaka kathaṃ tarhi prakartavyā pratiṣṭhā ca mahātmanām

'''63.7''' maheśvara uvāca sādhu sādhu mahāprājña yadyaduktaṃ tvayādhunā tatsarvaṃ kathayāmyadya gopanīyaṃ janārdana

'''63.8''' anādiśaivabhedena śaivāḥ saptetyudāhṛtāḥ śivo hyanādiśaivaḥ syādādiśaivaḥ śivadvijaḥ

'''63.9''' mahāśaivo dvijaḥ proktaḥ sarvaśāstreṣu saṃmataḥ anuśaivo bāhujaḥ syādāryāḥ proktāstathaiva ca

'''63.10''' avāntarā jaghanyāḥ syuḥ pravarāḥ pāraśaivakāḥ āntarālikaśaivāstu tadanye mānavāḥ smṛtāḥ

'''63.11''' anādityaṃ kathaṃ tasyetyucyate ced bravīmi te ādyantarahitatvācca anādiḥ śiva ucyate

'''63.12''' anādiḥ śiva eva syātsarvadā sarvathā nṛṇām śivadvijānāmāditvaṃ tasmātsaṃbhavati dhruvam

'''63.13''' śivasṛṣṭeḥ saṃbhavatvādādipūrvaḥ śivadvijaḥ sṛṣṭyārambhe śivasyāsya jananādādiśaivakaḥ

'''63.14''' mahāpūrvaśivatvaṃ hi kathaṃ syācca dvijanmanām brahmaṇaḥ sṛṣṭijātatvānmahāśaivaḥ prakīrtitaḥ

'''63.15''' kṣatriyāṇāṃ ca vaiśyānāmānuśaivaṃ kathaṃ smṛtam bhūsurācārakalpatvādanuśaivā iti smṛtāḥ

'''63.16''' virājaścātha vaiśyāḥ syuranuśaivāḥ prabhedataḥ avāntaratvaṃ śūdrāṇāmuktaṃ syātkramaśo hare

'''63.17''' dīkṣābhiṣekayogyatvācchaivāvāntarasaṃjñakāḥ pravarāṇāṃ kathaṃ teṣāṃ pāraśaivatvamucyate

'''63.18''' vijātiyonibhedatvātpāraśaivā iti smṛtāḥ tadanyānāṃ narāṇāṃ cāpyantarālatvamucyate

'''63.19''' vijātīyānuyonitvāttannāma samudāhṛtam pravarāḥ pāraśaivāḥ syustadanye cāntarālikāḥ

'''63.20''' brāhmaṇāḥ kṣatriyā vaiśyāḥ sacchūdrā bhaktisaṃyutāḥ vaidikaistāntrikaiścātha pūjanīyā mahātmabhiḥ

'''63.21''' ādiśaivamahāśaivāḥ ṣaṭkarmasu niyantritāḥ dīkṣābhiṣekapūjāsu adhikāro viśeṣataḥ

'''63.22''' parārthayajane kiṃtvadhikārī syācchivadvijaḥ brahmacārī gṛhasthaśca vānaprastho’tha bhikṣukaḥ

'''63.23''' catvāraścāśramāsteṣāṃ puruṣārthapradāyakāḥ adhikāro’nuśaivānāmāśramāṇāṃ traye’pi ca

'''63.24''' sacchūdrāṇāṃ tu sarveṣāmāśramadvitaye’pi ca avāntarāṇāṃ śaivānāṃ sacchūdratvamudāhṛtam

'''63.25''' āntarālikaśaivānāṃ pārāṇāṃ kramato hare sacchūdratvaṃ dhruvaṃ teṣāṃ na bhavettu kadācana

'''63.26''' pravarāḥ pāraśaivāśca āntarālikaśaivakāḥ teṣāmāgamasiddhānte sacchūdratvaṃ na dṛśyate

'''63.27''' anusaṃjñikaśaivāstu sacchūdrāvāntarāśca te anuṣṭhānaviśeṣeṇa bhikṣutvaṃ yānti śaivakam

'''63.28''' anyeṣu ca pramāṇeṣu bhikṣutvamabhidṛśyate bhavānurāgahīnānāṃ śaivācārapravartinām

'''63.29''' yogābhyāsaparāṇāṃ tu samayācāravartinām brāhmaṇāḥ kṣatriyā vaiśyāḥ sacchūdrāvāntarāśca ye

'''63.30''' naiṣṭhikā yatinaścaiva gṛhasthā vanacāriṇaḥ dīkṣābhiṣekayuktāśca deśikājñānusāriṇaḥ

'''63.31''' śivālayapratiṣṭhāyāṃ śivadharmaviśeṣataḥ śivaśuśrūṣaṇaṃ caiva dvijānāṃ paripālanam

'''63.32''' taṭākādiprakhananaṃ grāmāṇāmabhirakṣaṇam puṣkalaṃ cānnadānaṃ ca śivarātrivratādikam

'''63.33''' kurvanti manasā bhaktyā kathyante te mahātmanaḥ te madīyā iti jñātvā dhīmānniścitamānasaḥ

'''63.34''' kurute pūjanaṃ yastu gandhapuṣpādisaṃyutam sa eva matkṛpāpātraṃ bhavatīti na saṃśayaḥ

'''63.35''' madīyānāṃ mṛtānāṃ ca jīvitānāṃ mahātmanām ācāryasekayuktānāṃ samayācāravartinām

'''63.36''' jñānināṃ yogināṃ teṣāṃ siddhamārgapravartinām teṣāṃ pratikṛtiṃ cātha divyalakṣaṇasaṃyutām

'''63.37''' dṛṣadā tāmralohaiśca suvarṇarajataiḥ śubhaiḥ paṭīradārubhiścaiva kṛtvā sarvārthasiddhaye

'''63.38''' araṇye ca nadītīre puṇyakṣetre suśobhane āgamoktavidhānena pratiṣṭhāṃ kārayedbudhaḥ

'''63.39''' nityapūjādikaṃ kṛtvā cotsavādikamācaret śivālaye viśeṣeṇa śivabhaktānkṛtāñjalīn

'''63.40''' savālacāmarakarām̐lliṅgahastānsalakṣaṇān bimbarūpānvidhāyātha mahāmaṇṭapadeśataḥ

'''63.41''' maṇimaṇṭapadeśe vā prākārābhyantareṣu vā tasmātsarvaprayatnena pratiṣṭhāpya yathāvidhi

'''63.42''' śivāgamavidhānena nityapūjāṃ samācaret pratiṣṭhitānāṃ bhaktānāmālaye bimbarūpiṇām

'''63.43''' nityaṃ naimittikaṃ kāmyamutsavaṃ ca samācaret mohādajñānato vāpi utsavādīnna kārayet

'''63.44''' sa naro nirayaṃ yāti yāvadācandratārakam samādhibhūmau liṅgaṃ ca manojñaṃ ca sulakṣaṇam

'''63.45''' pratiṣṭhāpya yathānyāyaṃ nityapūjādikaṃ caret śaivānāṃ pārapūrvāṇāmāntarālikasaṃjñinām

'''63.46''' pūrvoktavidhinā teṣāṃ pratiṣṭhādīnna kārayet jātisaṃkarato yānti pūjārhatvaṃ na te punaḥ

'''63.47''' bhaktiśuśrūṣaṇenaiva cāpnuvanti parāṃ gatim janmāntare mṛtāste’pi sacchūdratvaṃ vrajanti hi

'''63.48''' madbhaktapūjanenaiva pratiṣṭhā pūrvakeṇa tu atyantānandasaṃyuktastathā tṛptiṃ vrajāmyaham

'''63.49''' anekaśivarātrau tu bhogyaiḥ śuddhodakairapi elālavaṅgasaṃyuktaiścandracandanavāsitaiḥ

'''63.50''' bilvapuṣpākṣataiścaiva jātīpunnāgacampakaiḥ mandārapārijātaiścāpyannaiḥ ṣaḍrasasaṃyutaiḥ

'''63.51''' aṣṭāṅganatibhiścāpi stotraiḥ śrutyādisaṃyutaiḥ tattadīśaiḥ pūjanaiśca yathā tṛptiḥ prajāyate

'''63.52''' madbhaktapūjanaṃ yastu kurute mānavottamaḥ aṇimādyaṣṭasiddhiṃ ca putrapautradhanādikam

'''63.53''' sa eva sarvānāpnoti mama loke mahīyate bahunoktena kiṃ deva sa evāhaṃ na saṃśayaḥ

===Kapitel 64===

''catuṣṣaṣṭitamaḥ paṭalaḥ · narapratiṣṭhāvidhiḥ''

'''64.1''' narapratiṣṭhāṃ vakṣyāmi samāsācchṛṇu sāṃpratam madbhaktāstu narā loke pūrvoktāśca nijairgaṇaiḥ

'''64.2''' teṣāṃ tu karaṇāpāye kṛtvā pratikṛtiṃ budhaḥ pūrvoktalakṣaṇopetāṃ tatpratiṣṭhāṃ samārabhet

'''64.3''' śreṣṭhamadhyakaniṣṭhāṃstu munibhūtāgnihastakaiḥ adhivāsāya kurvīta maṇḍapaṃ kuṇḍavediyuk

'''64.4''' vikārastambhasaṃyuktaṃ maṇḍapaṃ navapadaṃ bhavet tatra madhyapade vediṃ vistārārdhasamucchritām

'''64.5''' tasyāśca parito dikṣu kuṇḍāni vidhinā tataḥ catvāri kārayitvā tu muṣṭimātrapramāṇataḥ

'''64.6''' caturaśrāṇi sarvāṇi vṛttamekaṃ tu śāṅkare gomayenopalipyātha maṇḍapaṃ kuṇḍavediyuk

'''64.7''' puṇyāhaṃ vācayitvā tu vitānādīṃstu bandhayet tataḥ pratikṛtiṃ tatra samānīya tu maṇḍape

'''64.8''' prāṅmukhaṃ sthaṇḍile sthāpya netronmīlanamārabhet pakṣmādirekhāḥ sūcyā tu haimayā śilpinā tataḥ

'''64.9''' kārayitvā dṛśoḥ paścādvinyasedamṛtākṣaram suvarṇanakhayuktābhyāmaṅgulibhyāṃ tu deśikaḥ

'''64.10''' tarjanyanāmikābhyāṃ tu dakṣiṇetarayoḥ kramāt tato gavāṃ ca dhānyānāṃ darśanaṃ viprakanyayoḥ

'''64.11''' tataḥ śuddhiṃ tu kurvīta sthaṇḍilaṃ vidhinā tataḥ tatra padmaṃ samālikhya sāṣṭapatraṃ sakarṇikam

'''64.12''' tanmadhye śayanaṃ cāpi pūrvavatparikalpayet śāyayetpratimāṃ mantrī prākśiraścordhvavaktrakam

'''64.13''' vastraṃ cāstreṇa saṃchādya tasya mūrdhani cottare pradhānaghaṭamekaṃ tu droṇapūrṇaṃ manoharam

'''64.14''' sitasūtravicitraṃ ca gandhodaparipūritam sahiraṇyaṃ savastraṃ ca sakūrcaṃ sāpidhānakam

'''64.15''' vinyasya parito dikṣu caturastādṛśānghaṭān vinyasya pūjayenmadhye gandhādyaistatra cetanam

'''64.16''' praṇavaṃ pūrvamuccārya cātmatattvapadaṃ tataḥ caturthyantaṃ samāyojya tataścāpi namaskṛtim

'''64.17''' cetanasya tu mantro’yaṃ sthāpanārthamudīritaḥ anena mantravaryeṇa pūjayitvā tataḥ kramāt

'''64.18''' prāgādiṣu mano buddhimahaṅkāraṃ krameṇa tu cittaṃ cāpi yajeddhīmānnamaskārāntasaṃyutam

'''64.19''' caturthyantaistu tanmantraistārapūrvaistato haviḥ sarveṣāṃ ca kramāddatvā homakarma samārabhet

'''64.20''' kuṇḍeṣu vahnimādhāya vidhinā hotṛbhiḥ saha prākkuṇḍe deśiko dhīmāndravyairetaiḥ krameṇa tu

'''64.21''' samidājyacarūm̐llājāṃstilāṃścāpyātmapūrvakaiḥ mantraistu pañcabhiḥ sarvakuṇḍeṣvapi ca homayet

'''64.22''' pratyekaṃ śatamardhaṃ vā prāgādiṣu samidbhavet plakṣodumbarakāśvatthavaṭajā ca tataḥ kramāt

'''64.23''' vidyāṅgaiḥ ṣaḍbhirājyena pratyekaṃ tu daśāhutīḥ juhuyātsarvakuṇḍeṣu hṛdādīni ca saṃspṛśet

'''64.24''' pratimāyāḥ kramānmantraṃ prativyāhṛtyanantaram pariṣicya tato vahniṃ sarvakuṇḍeṣu rakṣayet

'''64.25''' prabhāte kṛtanityastu hotṛbhiḥ saha deśikaḥ praviśya maṇḍapaṃ tatra ghaṭānarcāṃ ca pūjayet

'''64.26''' tataḥ sarveṣu kuṇḍeṣu samiddhe pāvake tataḥ sarvātmahṛdayenaiva kṛtvā pūrṇāhutiṃ tataḥ

'''64.27''' pratimāṃ tata utthāpya tyaktvā kūrcaṃ savastrakam snānavedyāṃ tu vinyasya gandhodenābhiṣicya ca

'''64.28''' pañcabrahma samuccārya tatastaṃ ghaṭapañcakam pratimādikrameṇaiva samuddhṛtya pradakṣiṇam

'''64.29''' pratimāṃ tāmupāvṛtya ghaṭānvai sthaṇḍile tathā yathāpūrvaṃ tu vinyasya kṛtavidyātanurguruḥ

'''64.30''' śivāṅgairbrahmabhiścaiva tataḥ kumbheṣu pūjayet ātmatattvādicittāntāngandhapuṣpādibhiḥ kramāt

'''64.31''' tataḥ kūrcasṛtenaiva mantrāṃstoyena deśikaḥ pratimāhṛdi vinyasya pañcakātsusamāhitaḥ

'''64.32''' taistoyairabhiṣekaṃ ca tairmantraiḥ parikalpayet tasya mūrdhni tato dhīmānīśānaṃ mudrayā nyaset

'''64.33''' mukhe tatpuruṣaṃ caiva hṛdaye’ghorameva ca guhye vāmaṃ tataḥ sadyaṃ pādayorubhayorapi

'''64.34''' praṇavena śirasyarghyaṃ dattvāṅgāni yathākramam hṛtpūrvāṇi nyaseddhīmānpūrvoktāni samāhitaḥ

'''64.35''' tatastāṃ vastramālyādyairalaṅkṛtya viśeṣataḥ sarvātodyasamāyuktaṃ kṛtvā dhāmapradakṣiṇam

'''64.36''' śivāgre sthāpya tanmūrdhni bhasma mūlena dāpayet bhaktapratikṛtiryā tu saṃsthitā devapārśvataḥ

'''64.37''' tasyāstu sthāpane kuryānnayanonmīlanādikam sarvaṃ sahaiva home tu devahomādanantaram

'''64.38''' tasminkuṇḍe ghṛtenaiva pratyekaṃ tu daśāhutīḥ pūrvoktaiḥ pañcabhirmantrairjuhuyāccheṣaṃ samaṃ bhavet

'''64.39''' evaṃ yaḥ kurute kartā sarvānkāmānavāpya saḥ modate rudrasāmīpyaṃ labdhvānte rudrasadmani

===Kapitel 65===

''pañcaṣaṣṭitamaḥ paṭalaḥ · harmyasamprokṣaṇavidhiḥ''

'''65.1''' ataḥ paraṃ pravakṣyāmi harmyasamprokṣaṇaṃ param āvartaṃ cetyanāvartaṃ punarāvartanaṃ tathā

'''65.2''' antaritaṃ hi vijñeyaṃ prokṣaṇaṃ tu caturvidham sarvapāpavināśena sarvaprāṇisukhāvaham

'''65.3''' na tithirna ca nakṣatraṃ kālāpanayanaṃ vinā caturmūrtyaṣṭamūrtyorvā nāsikāyāstathaiva ca

'''65.4''' varṇabhede’nyabhede vā cūlikāyāstathaiva ca tatra yogyāni karmāṇi kārayettu vicakṣaṇaḥ

'''65.5''' śilpisparśe tu ṣaṇmāse sandhānaṃ caiva kārayet ata ūrdhvaṃ na kartavyaṃ tadante prokṣaṇaṃ guruḥ

'''65.6''' mūrtiḥ sandhānayogyā cettaruṇālayamuttamam āvāhanakrameṇaiva bālasthānaṃ praveśayet

'''65.7''' yathā sampūjayeddevaṃ tathā kumbhaṃ supūjayet vinā nityāgnikāryeṇa naivedyaṃ dāpayedbudhaḥ

'''65.8''' caṇḍarudro mahāvego vibudho’vihvalottamaḥ viśvarūpo viśālākṣo bhūdharo meghavāhanaḥ

'''65.9''' etānvimānapālāṃśca pūrvādiṣu kramānnyaset digīśapratimāḥ kṛtvā niṣkārdhārdhatadardhakaiḥ

'''65.10''' umayā sahitaṃ pūrve dakṣiṇe lakulīśvaram paścime tu gajārūḍhaṃ kaṅgālaṃ cottare tathā

'''65.11''' pūrvādiṣu kramānnyasya arcayetsvasvanāmataḥ harmyabereṇa taddevānnetronmīlanakarmaṇi

'''65.12''' jalādhivāsaṃ śayanaṃ rakṣāsūtraṃ vinā bhavet tanmāse caiva kartavyamuttamaṃ tu vidhīyate

'''65.13''' ata ūrdhvaṃ ca karmāṇi punarāvāhanaṃ kuru śreṣṭhaṃ ca sauramāse tu cāndramāse tu madhyamam

'''65.14''' māsadvayaṃ vimāne na māsaṣaṭkaṃ vidhīyate ṣaṇmāsānte ca kartavyaṃ samprokṣaṇamathācaret

'''65.15''' prāsādasya caturdikṣu athavāpyagrake’pi vā maṇṭapaṃ kalpayeddhīmānpūrvoktavidhinā saha

'''65.16''' pañcāgniṃ vātha ekāgniṃ kuṇḍe vā sthaṇḍile’pi vā paryagnikaraṇaṃ kṛtvā vāstupūjāṃ vicakṣaṇaḥ

'''65.17''' umayā sahitaṃ caiva śavargāntaṃ samuccaran abhitaḥ kalaśānaṣṭau vidyeśānāṃ svanāmataḥ

'''65.18''' lakulīśena saṃyuktaṃ saptavargatṛtīyakam kalaśānaṣṭa vinyasya pūrvoktavidhinā saha

'''65.19''' purandarasya devasya prathamasya tṛtīyakam tattakumbhāṣṭakaṃ nyasya tattanmantreṇa pūjayet

'''65.20''' kaṅkālamūrterevaṃ tu prathamaṃ svarasaṃyutam aṣṭavidyeśvarān kumbhe svasvanāmnā tu pūjayet

'''65.21''' vedikāpañcakuṇḍeṣu pūrvoktavidhinā saha samidhā hṛdayenaiva ājyaṃ ghoreṇa homayet

'''65.22''' caruṃ hutvā viśeṣeṇa bahurūpeṇa mantrataḥ tilamīśānamantreṇa hutvā mudgaṃ tu netrataḥ

'''65.23''' palāśasamidhā caiva dravyānte vyāhṛtīrhunet caturdikṣu caturvedaiḥ kuryādadhyayanaṃ tataḥ

'''65.24''' veṣṭanaṃ raktavastreṇa sthūpyantaṃ kalpayedbudhaḥ pūrvedyuradhivāsaḥ syātprabhāte prokṣaṇaṃ kuru

'''65.25''' pañcakumbhānsamādāya dhāmapradakṣiṇaṃ guruḥ tattatkumbhodakenaiva tattanmūrtīssuyojayet

'''65.26''' madhyakumbhodakenaiva sthūpyantaṃ prokṣayedbudhaḥ sumuhūrte’pyuktarāśau lagnaśuddhistathā bhavet

'''65.27''' tattatsthāne tu samprokṣya tattatkumbhajalena tu pradhānakumbhodenaiva darpaṇaṃ cābhiṣecayet

'''65.28''' bahurūpeṇa mantreṇa prokṣayeddoṣaśāntaye gandhapuṣpādibhiḥ pūjya dhūpadīpādi dāpayet

'''65.29''' mūlaliṅge ca harmye ca naivedyaṃ dāpayedbudhaḥ upacārāṇi sarvāṇi tāmbūlādīni dāpayet

'''65.30''' ācāryadakṣiṇāṃ dadyādvastrahemāṅgulīyakaiḥ śaktyā dānādikaṃ kṛtvā brāhmaṇānbhojayettataḥ ihaiva dhanavān śrīmāndehānte mokṣamāpnuyāt

===Kapitel 66===

''ṣaṭṣaṣṭitamaḥ paṭalaḥ · vṛṣadānavidhiḥ''

'''66.1''' vṛṣadānamatho vakṣye sarvakāmārthasādhanam dattvā vṛṣaṃ kakudmantaṃ śivasya paramātmanaḥ

'''66.2''' sarvayajñaphalaṃ prāpya śivaloke mahīyate brāhmaṇaḥ kāpilaṃ dadyādvṛṣaṃ śvetamathāpi vā

'''66.3''' kṣatriyo raktavarṇaṃ tu dhūmravarṇaṃ vaṇik tathā śūdrastu kṛṣṇaṃ sarveṣāṃ kṛṣṇavarṇaḥ śubhapradaḥ

'''66.4''' arogī hṛṣṭapuṣṭāṅgaḥ pīnonnatakakuttamaḥ nāṅgahīnaṃ na caivograṃ dadyād devāya prītaye

'''66.5''' uttarāyaṇakāle tu māghamāsavivarjite śubhavārasamāyukte śuklapakṣe dadedvṛṣam

'''66.6''' divase puṇyalagne tu tadvidhānamathocyate śivakṣetrasamīpe tu snāpayitvā vṛṣaṃ tataḥ

'''66.7''' sitena vāsasā kaṇṭhe baddhvānīya śivāstrataḥ śivagāyatrimantreṇa prokṣayitvā vṛṣaṃ tataḥ

'''66.8''' yajñavṛkṣasamudbhūte stambhe taṃ bandhayeddhṛdā catustālasamutsedhe ṣoḍaśāṅgulanāhake

'''66.9''' devāgre dakṣiṇe vātha sthāpite sudṛḍhaṃ yathā tasya tatrāmitā dūrvā dadyādgāyatriyā tadā

'''66.10''' tatastasya khurau śṛṅge kalpayetsvarṇaveṣṭitau lambayecca tato’streṇa ghaṇṭāṃ kaṇṭhe ca cāmaram

'''66.11''' pṛṣṭhe ca kuthamādhāya tanutrāṇena vastrajam taṃ baddhvā vastrayugmena sitenāstraṃ samuccaran

'''66.12''' vṛṣendramūrdhni tanmūlamantreṇārghyaṃ tu vinyaset caturaśre tu devāgre kuṇḍe vā sthaṇḍile’pi vā

'''66.13''' vidhināgniṃ samādhāya samidājyacarūnkramāt māṣaṃmudgakulutthāṃśca dūrvāścāpi samūlakaiḥ

'''66.14''' aṅgaiḥ ṣaḍbhirvṛṣendrasya juhuyāttadanantaram tataśca vṛṣagāyatryā taṃ spṛṣṭvā tu daśāhutīḥ

'''66.15''' vṛṣendraṃ juhuyātpaścātpūrṇāṃ mūlena homayet tato devaṃ tu saṃsnāpya sahasrādiṣu sambhavaiḥ

'''66.16''' kalaśairatha sampūjya viśeṣādarcayecchivam tato vṛṣapradāne tu kārayitvā pradakṣiṇam

'''66.17''' vṛṣeṇa saha devāgre sthāpayitvā ca tau tadā japenmantramimaṃ mantrī devasya purataḥ sthitaḥ

'''66.18''' kakudmantamamuṃ devaṃ samutsṛṣṭamanena tu tvadarthaṃ pratigṛhyainamanugṛhṇīṣu sarvadā

'''66.19''' evamuccārya mantrajño’pyutsṛjeti pradāpayet utsṛṣṭe tu vṛṣe tasmindeśikaṃ vṛṣado’rcayet

===Kapitel 67===

''saptaṣaṣṭitamaḥ paṭalaḥ · pradakṣiṇanamaskāravidhiḥ''

'''67.1''' pradakṣiṇanamaskāravidhiṃ vakṣye samāsataḥ tayoḥ pradakṣiṇaṃ tāvattrividhaṃ parikīrtitam

'''67.2''' ādyaṃ pradakṣiṇākhyaṃ syāddevāya parikalpitam savyāpasavyamanyacca sarvāṅgaiḥ syāttṛtīyakam

'''67.3''' teṣu pradakṣiṇaṃ tvādyaṃ prādakṣiṇyena kalpitam savyāpasavyataḥ somasūtrālaṅghanataḥ kṛtam

'''67.4''' savyāpasavyamityuktaṃ dīkṣitānāṃ tu tadbhavet aṅgapradakṣiṇaṃ yattatsarvāṅgaiḥ parikalpitam

'''67.5''' ekatripañcasaptādyaiḥ kārayedojasaṃkhyayā ekaviṃśatisaṃkhyābhiruttamaṃ tu pradakṣiṇam

'''67.6''' tithisaṃkhyākṛtaṃ madhyamadhamaṃ munisaṃkhyayā pañcasaṃkhyākṛtaṃ yattadadhame madhyamaṃ bhavet

'''67.7''' adhamādhamamevoktaṃ guṇasaṃkhyākṛtaṃ tu yat tasmādapyavaraṃ proktaṃ kṛtamekaṃ pradakṣiṇam

'''67.8''' pradakṣiṇaprayoge tu mṛdugatyā samāhitaḥ dṛṣṭvā pūrvaṃ padaṃ nyasya hitvā cānyābhibhāṣaṇam

'''67.9''' vedamantraṃ stvaṃ vāpi gṛṇanneva samācaret sarveṣāṃ yogyamādyaṃ syācchivāya parikalpitam

'''67.10''' savyāpasavyamārgeṇa pūjānte tu pradakṣiṇam garbhe gehe’rcakasyoktaṃ dīkṣitasyaiva bāhyake

'''67.11''' pradakṣiṇaṃ nṛṇāṃ noktamantarmaṇḍalake sadā aṅgapradakṣiṇaṃ kurvankṛtvā bhūmau nijāṃ tanum

'''67.12''' daṇḍavadbāhuyugmena saha baddhvā tato’ñjalim kṛtvā daṇḍanamaskāraṃ śivāgre tu sakṛnnaraḥ

'''67.13''' pradakṣiṇaṃ tathā kuryādekaṃ vā trayameva vā pañca vā sapta vā caiva sarvapāpanivṛttaye

'''67.14''' kṛtvā punastathāgre tu namaskāraṃ ca bhaktitaḥ utthāya praṇatiṃ bhūyo bhūyaḥ kṛtvā samāpayet

'''67.15''' kṛtvā pradakṣiṇaṃ bhaktyā śivasyaikaṃ samāhitaḥ aśvamedhasya yajñasya sukhena labhate phalam

'''67.16''' antarhārakṛte proktaṃ phalametatpradakṣiṇe triguṇaṃ madhyahāre tu maryādāyāṃ caturguṇam

'''67.17''' mahāmaryādike caiva kṛtaṃ pañcaguṇaṃ bhavet kṣetrāvadhikṛtaṃ bāhye bhavecchataguṇaṃ nṛṇām

'''67.18''' evaṃ pradakṣiṇaṃ kuryāt namaskāramathocyate aṣṭāṅgamatha pañcāṅgamekāṅgaṃ trividhaṃ bhavet

'''67.19''' teṣvaṣṭāṅgamidaṃ viddhi bhūpṛṣṭhe daṇḍavattanum kṛtvā baddhvāñjaliṃ tatra karābhyāṃ praṇametpurā

'''67.20''' śirasā ca tataḥ śrotranetrabhrūhanuyugmakaiḥ dorbhyāṃ hṛddeśataścāpi bhavedaṣṭāṅgamuttamam

'''67.21''' pañcāṅgamucyate tatrāpyañjaliṃ prathamaṃ tataḥ dvitīyaṃ śirasā proktaṃ tṛtīyaṃ śrotrayugmakam

'''67.22''' caturthaṃ cāṅgayugmena hṛddeśenāpi pañcamam evaṃ pañcāṅgamuddiṣṭamatha caikāṅgamucyate

'''67.23''' ekāṅgaṃ tu namaskāraṃ śirasaiva kṛtaṃ bhavet bhaktyā kṛtvā namaskāraṃ śivasyāgre sakṛnnaraḥ

'''67.24''' aśvamedhasya yajñasya labhate phalamuttamam pañcāṅge triguṇaṃ proktamaṣṭāṅge’ṣṭaguṇaṃ bhavet

'''67.25''' śivamuddiśya yaddattaṃ kṛtaṃ vā karma yadbhavet bhaktyā kṛtaṃ ca tatsarvamanantaguṇamucyate

'''67.26''' bhaktihīnairnaraiḥ śāṭhyādapi vā yā śive kṛtā namaskriyā sakṛdvāpi sarvapāpaharī bhavet

'''67.27''' tasmānnityaṃ sakṛdbhaktyā yo liṅgaṃ praṇamennaraḥ sarvānkāmānavāpyāsau śivena saha modate

'''67.28''' aṣṭamyāṃ ca caturdaśyāṃ pañcadaśyāṃ trijanmani ārdrāyāmarkavāre ca karaṇe viṣṭisaṃjñake

'''67.29''' ayane viṣuve caiva grahaṇe candrasūryayoḥ saṃkrame cotsave caiva snātvā kṛtvā pradakṣiṇam

'''67.30''' praṇamedyaḥ śivaṃ bhaktyā sarvakāmānavāpya saḥ labhecchataguṇaṃ puṇyaṃ kevalaṃ nātra saṃśayaḥ

'''67.31''' mānuṣasya tu liṅgasya phalamuktaṃ pradakṣiṇe namaskāreṇa tasmādvai dviguṇaṃ cārṣake bhavet

'''67.32''' triguṇaṃ daivike liṅge phalaṃ gāṇeśvare ca tat caturguṇaṃ samuddiṣṭaṃ phalaṃ pañcaguṇaṃ bhavet

'''67.33''' svayaṃbhūtasya liṅgasya tathā saṃsparśane śatam pravāsī pathi kṛtvā tu śivaliṅgaṃ pradakṣiṇam

'''67.34''' namaskṛtvā ca pūrvoktātphalaṃ pañcaguṇaṃ labhet pradakṣiṇanamaskārau puṇyakīrtiṣu kalpitau

'''67.35''' kṣetreṣu vāṅchitāṃ tasya ṛddhimāśu prayacchataḥ āyurārogyamaiśvaryaṃ vittaṃ kāmāṃśca puṣkalān

'''67.36''' labhate nātra saṃdehaḥ pradakṣiṇarato naraḥ śataṃ sahasramayutaṃ niyutaṃ prayutaṃ tathā

'''67.37''' koṭiṃ vā kārayediṣṭasiddhyarthaṃ tu pradakṣiṇam sūryodayaṃ samārabhya yāvadastaṃ raverbhavet

'''67.38''' tāvatpradakṣiṇaṃ kṛtvā sarvānkāmānavāpnuyāt athāhorātrakaṃ vāpi kāleṣveteṣu yo naraḥ

'''67.39''' pradakṣiṇaṃ prakurvīta so’nantaphalamaśnute savyāpasavyaṃ kurvīta saṃkalpasya tu siddhaye

'''67.40''' phalaṃ savyāpasavye tu kevalādvai śatottaram tasmāccāpi tathā proktaṃ phalamaṅgapradakṣiṇe

'''67.41''' dūramārgātsamāgamya phalaśāntiyuto’pi vā kṛtvā pradakṣiṇaṃ bhaktyā praṇamecchivamavyayam

'''67.42''' tasya mārgasamudbhūtā yāgatiścāpi keśava pradakṣiṇaphalaṃ nṝṇāṃ dadātyeva na saṃśayaḥ

'''67.43''' dattamiṣṭamadhītaṃ ca yajñāśca bahudakṣiṇāḥ śivaliṅgapraṇāmasya śatāṃśenāpi no samāḥ

'''67.44''' saṃparkādarthalobhādvā bhayātsaṃgena vā tathā mūrkho vātha śaṭho vāpi nīco vā sarvapāpakṛt

'''67.45''' namaskṛtvā sakṛlliṅgaṃ sarvapāpaiḥ pramucyate tasmātsarvaṃ samutsṛjya sarvayatnena buddhimān

'''67.46''' namaskuryātsakṛdvāpi liṅgaṃ tribhuvaneśvaram agrādārabhya kurvīta sarvaṃ cāpi pradakṣiṇam dhāmni ca somadikchāyāṃ siddhikāmo na laṅghayet

===Kapitel 68===

''aṣṭaṣaṣṭitamaḥ paṭalaḥ · vasantotsavavidhiḥ''

'''68.1''' vasantotsavaṃ pravakṣyāmi samāsena janārdana madhumādhavayormāsi pūrṇāyāmahani smṛtam

'''68.2''' tasminkāle śubhe lagne kārayedvidhirucyate tatpūrvaniśi dāntaṃ tu gandhapuṣpaiḥ samanvitam

'''68.3''' gandhatoyena mantreṇa prokṣitaṃ hṛdayena tu mālāmābadhya pātre’tha nikṣipya kavacena tu

'''68.4''' prāsādasyaiśadigbhāge saumye vā parikalpite maṇṭape pūrvavattatra vedimadhye tu kārayet

'''68.5''' vidhinā sthaṇḍilaṃ tatra padmamaṣṭadalaṃ likhet tanmadhye vinyasenmantrī dāntaṃ taṃ baddhamālikam

'''68.6''' tasyeśāne’thavā pūrve sthaṇḍile parikalpite hemarūpyādi saṃsiddhaṃ kumbhaṃ cātimanoharam

'''68.7''' sitasūtravicitraṃ ca gandhatoyena pūritam sakūrcaṃ sahiraṇyaṃ ca sāpidhānaṃ savastrakam

'''68.8''' vinyasyoṅkāramuccārya vardhanīṃ tasya cottare tādṛśīṃ vinyasenmantrī tadardhaparimāṇakām

'''68.9''' puṇyāhaṃ vācayitvātha devaṃ devīṃ tato yajet dāntaṃ cāpi tato mantrī mantrasaṃhitayā yajet

'''68.10''' tato homaṃ prakurvīta kuṇḍe vā sthaṇḍile’pi vā tatpūrve vātha vaiśānyāṃ paścime cottare’pi vā

'''68.11''' vidhināgniṃ samādhāya samiddhe’tha hutāśane samidājyacarūṃllājāṃstilāṃśca brahmapañcakaiḥ

'''68.12''' sadyādibhiḥ kramādyaṣṭvā kṛtvā pūrṇāhutiṃ tataḥ sarvātmahṛdayenaiva tadantarīśadeśake

'''68.13''' sthaṇḍilaṃ vidhinā kṛtvā tatra kūrcaṃ tu vinyaset tanmadhye kāmamāvāhya gandhapuṣpaiḥ samarcayet

'''68.14''' tatastu kāmamūlena dāntenaiva śatāhutīḥ hutvā ṣaḍbhistadaṅgaistu śivāgnau juhuyāttataḥ

'''68.15''' candanāgarukarpūrakuṣṭhaṃ kuṅkumameva ca kastūrīṃ ca krameṇaiva mūlamantreṇa homayet

'''68.16''' tataḥ sviṣṭakṛtaṃ hutvā vyāhṛtyante samāhitaḥ pariṣicyāgnimudvāsya kāmamudvāsayettataḥ

'''68.17''' evaṃ rātrau vidhiṃ kṛtvā prabhāte deśikaḥ sudhīḥ kṛtanityaḥ praviśyātha maṇḍapaṃ tatra pūjayet

'''68.18''' kumbhayorgandhapuṣpādyairdevaṃ devīṃ samāhitaḥ dāntaṃ cāpi yathāpūrvaṃ brahmabhiḥ saṃspṛśettadā

'''68.19''' tato nityāvasāne tu śaṅkhadundubhinisvanaiḥ liṅgamūrdhni nyasenmantrī sarvātmānaṃ samuccaran

'''68.20''' tāmbūlaṃ mukhavāsena dattvā paścātsa deśikaḥ vyaktaliṅgeṣu taddāntaṃ tanmūlena tu dāpayet

'''68.21''' utsavaṃ ca tataḥ kuryāddāntādyairgandhapuṣpakaiḥ vastrairābharaṇairanyairutsavārcāmatandritaḥ

'''68.22''' alaṅkṛtya tataḥ prokṣya gandhodena samantataḥ gītanṛttasamāyuktaṃ śaṅkhadundubhinisvanaiḥ

'''68.23''' dhūpāmodasamāyuktaṃ saṃgame rajanīmukhe tataśca gītanṛttādyaiḥ kuryādāsthānamaṇḍape

'''68.24''' vinodaṃ ca viśeṣārcāmutsavānte prakalpayet prativarṣamidaṃ yastu kārayedutsavaṃ tataḥ aśvamedhaphalaṃ bhuktvā śivalokaṃ tato vrajet

===Kapitel 69===

''ekonasaptatitamaḥ paṭalaḥ · navanaivedyavidhiḥ''

'''69.1''' naivedyasya vidhiṃ vakṣye nūtanasya surottama pūrvapakvaṃ tu yaddhānyaṃ phalapuṣpādikaṃ bhuvi

'''69.2''' tacchivāya tato dadyādbhaktyā tasmai ca dehi tat tasya dāne phalaṃ cāpi kevalasya śatottaram

'''69.3''' tasmātsarvaprayatnena pūrvapakvaṃ nivedayet navanaivedyakālastu bhavenmāsatraye’pi ca

'''69.4''' na ca māghe tu ceṣṭaṃ syādaste ca guruśukrayoḥ caitraphālgunayoścāpi pūrvapakṣe śubhe dine

'''69.5''' śubharkṣe śubhayoge ca śubhalagne surottama tasyārambhe puro gatvā devakṣetraṃ suvṛddhimat

'''69.6''' pakvavrīhisamopetaṃ caṇḍeśena vṛṣeṇa ca tasya saumye’thavaiśānye deśe tatkṣetratīrake

'''69.7''' gandhapuṣpādisaṃyuktaṃ pāyasaṃ tu baliṃ kṣipet kṣetrādhipataye svāhetyatha tatsasyamūlake

'''69.8''' sarvasasyādhipataye somāyeti baliṃ kṣipet tato hetiṃ samuccārya dātraṃ saṃprokṣya deśikaḥ

'''69.9''' sasyaṃ vāmena saṃprokṣya sasyamūle nikṛntanam hetināthāvatāryaitadvinyasetpraṇavena tu

'''69.10''' hemādinirmite pātre tatastacchirasā tadā vāhayitvātha tatkṣetrātsarvātodyasamanvitam

'''69.11''' sarvālaṅkārasaṃyuktaṃ caṇḍeśavṛṣasaṃyutam pratimāsahitaṃ vāpi bahudhānyaphalādibhiḥ

'''69.12''' sarvopadaṃśairanyaiśca yuktaṃ dadhyājyabhāṇḍakaiḥ śanaiḥ pradakṣiṇaṃ kṛtvā grāmādau tu śivālayam

'''69.13''' praviśya mantralūnaṃ tu dhānyaṃ saṃśodya taṇḍulam kṛtvā tattaṇḍulaṃ paścātpāṣāṇādivivarjitam

'''69.14''' ṣaṭkṛtvaḥ kṣālayitvātha ṣaḍaṅgaistānsamāhitaḥ ṣaṭtriṃśatprasthamātraṃ syāttaṇḍulaṃ cottamaṃ bhavet

'''69.15''' adhamādadhamaṃ cāpi bhavedāḍhakasammitam āḍhakāḍhakahānyā tu madhye saptavidhaṃ bhavet

'''69.16''' marīcajīrakaṃ caiva cūrṇayitvā tathaiva ca khaṇḍena saha cāloḍya nālikeraphalena ca

'''69.17''' gulena vātha tatpātre hemādau sannidhāya ca nivedayeddhṛdā mantrī sarvātodyasamanvitam

'''69.18''' tato baliṃ tato homaṃ taṇḍulaistatra kārayet berāṇāmapi sarveṣāṃ taṇḍulaṃ hṛdayena tu

'''69.19''' dattvā dattvā ca tāmbūlaṃ mukhavāsasamanvitam tataśca navanaivedyaṃ vṛttaṃ tadvyañjanairyutam

'''69.20''' nivedayīta devāya khaṇḍājyadadhisaṃyutam pratisaṃvatsaraṃ hyevaṃ kuryātsasyasya vṛddhaye

===Kapitel 70===

''saptatitamaḥ paṭalaḥ · kṛttikādīpavidhiḥ''

'''70.1''' atha vakṣye suraśreṣṭha kṛttikādīpamuttamam ūrje māsi sarākāyāṃ nakṣatre vahnidaivate

'''70.2''' asminpradoṣakāle tu kṛttikādīpamācaret kevalaṃ pūrṇamāsyāṃ vā pradoṣe tu samācaret

'''70.3''' tadarthamaṅkuraṃ pūrvamuktakāle samarpayet pūrvedyuradhivāsaṃ ca rātrāvevaṃ prakalpayet

'''70.4''' prāsādāgre’thavaiśānyāmāgneyyāṃ vāpi maṇṭape sarvālaṅkārasaṃyuktaṃ gomayenānulepite

'''70.5''' sthaṇḍilaṃ śālibhiḥ kṛtvā padmamaṣṭadalaṃ likhet taṇḍulaiḥ satilai rekhāṃ pūrayitvā samantataḥ

'''70.6''' paristīrya tato lājānvikīrya kusumāni ca puṇyāhaṃ vācayitvādau prokṣayitvā śivāmbhasā

'''70.7''' dīpādhārāṇi tatraiva pañca trīṇyekameva vā madhye pūrve tataścāpi dakṣiṇe paścimottare

'''70.8''' madhye pūrve pratīcyāṃ tu madhyapūrve janārdana vinyasya prokṣayettāni bahurūpaṃ samuccaran

'''70.9''' tatpūrve paścime vāpi kuṇḍe vā sthaṇḍile’pi vā śivāgniṃ janayitvātra homayeddeśikottamaḥ

'''70.10''' samidājyacarūm̐llājānyavasarṣapaveṇujān vrīhiṃ ca śatamardhaṃ vā tadardhaṃ vā yathecchayā

'''70.11''' sarvātmahṛdayādyaistu ṣaḍaṅgairatha ca kramāt sadyo jātādibhiścaiva homayeddravyasaṃcayam

'''70.12''' tataḥ sarvātmanā tatra dīpādhāreṣu goghṛtam prakṣipya pātre vā vartiṃ ghṛtaṃ tasminvinikṣipet

'''70.13''' tato’gnau jvalite tatra vahnibījena homayet tasmādagneraghoreṇa gṛhītvā cātha vartinā

'''70.14''' dīpaṃ pravartayenmadhyāddīpādhāreṣu deśikaḥ sarvatrāgniṃ tato dīpānāprāsādācca lakṣayet

'''70.15''' āropaṇāya dīpānāmālayāgre ca pṛṣṭhataḥ pārśvayorapi kūṭāṃstu kṛtvā dhāmāṅghrimānataḥ

'''70.16''' dīpādhārāṅśarāvāṃstu parjanyādi niveśayet dīpastambhāṃstu caturaścaturdvāreṣu sadmanaḥ

'''70.17''' sthāpayeccakrasaṃyuktau dvau vā dhāmāgrapṛṣṭhayoḥ ekamagre’thavā stambhaṃ stambhavṛkṣā bhavantyamī

'''70.18''' campakāśokapunnāgā vakulo’rjuna eva ca tālaḥ sanālikereṇa kramuko vaṃśa eva ca

'''70.19''' stambhaḥ prāsādadairghyaḥ syācchikhareṇa samo’thavā navāṣṭasaptahastairvā śreṣṭhādikramayogataḥ

'''70.20''' stambhe cakrāṇi vinyasyedrudranandābdhisaṃkhyayā śreṣṭhamadhyakaniṣṭhāni teṣāṃ vistāra ucyate

'''70.21''' vikāratālamutkṛṣṭaṃ ravitālaṃ tu madhyamam kanyasaṃ vasutālaṃ syātstambhacakreṣu vistaram

'''70.22''' ekatālaṃ ca hitvātha tathā stambhāgramūlayoḥ tulyāntarāṇi cakrāṇi stambheṣu parikalpayet

'''70.23''' cakrārdhādaramākṛṣya praticakraṃ catuṣṭayam tataḥ stambhaṃ tu saṃsthāpya vṛttaṃ kuryāttadagrake

'''70.24''' tasyordhve vinyaseddīpapātramāḍhakapūritam tatra puttalikāṃ baddhvā kārpāsasyūtakena ca

'''70.25''' sitavastreṇa tāṃ tatra nikṣipettailamadhyame cakre tu parito vṛtte dīpādhārāṅśarāvakān

'''70.26''' pratyekaṃ rudranandābdhisaṃkhyātānvinyasetsudhīḥ śreṣṭhamadhyakaniṣṭhāṃstāṃsteṣu puttalikāṃ tataḥ

'''70.27''' nikṣipya tailayukteṣu tataḥ puṇyāhamācaret stambhamūlaṃ tu vastreṇa navena pariveṣṭayet

'''70.28''' tasyāsanārthaṃ tanmūle sthaṇḍilaṃ śālibhirbhavet paristīrya kuśaiḥ paścāddīpastambhe’gnimarcayet

'''70.29''' dikṣu koṇeṣu vā tasya kuryāddhomacatuṣṭayam samidājyacarūṇāṃ tu pratyekaṃ viṃśasaṃkhyayā

'''70.30''' śivapāśupatāstrābhyāṃ vahnibījena caiva hi hutvā sarvatra pūrṇāṃ tu vahnibījena sarvataḥ

'''70.31''' praviśya devadeveśaṃ natvā tānadhivāsitān dīpāṅśirasi haste vā dhārayitvā pradakṣiṇam

'''70.32''' kṛtvā dhāmani devāgre praviśyāntarniveśitān hṛdayena tu mantreṇa śivasyaitānpradāpayet

'''70.33''' teṣu madhyādgṛhītvātha dīpena karavartinā antabarhiśca taddhāmno dīpamālāṃ pravartayet

'''70.34''' teṣu teṣu ca sarveṣu prākāreṣu ca dīpayet prāsādopari sarvatra dīpayeddīpamālayā

'''70.35''' utsavaṃ ca tataḥ kuryātpradīpairujjvalaiḥ saha nṛttagītasamāyuktaṃ sarvātodyasamanvitam

'''70.36''' tasminnutsavakāle tu stambhamūlasamīpake devatāgre tu stambhāgramāruhya paricārakaḥ

'''70.37''' pravartitena dīpena dīpikā adhivāsitāḥ dīpayetkramaśaścordhvāccakreṣu paritaḥ kramāt

'''70.38''' adhaḥ sthitvāthavā dīpānvartayeddaṇḍavartinā viśeṣādarcanaṃ kuryādrātrau snapanapūrvakam

'''70.39''' candanāgarudhūpaiśca bhakṣyabhojyādibhiḥ śubhaiḥ śivasyātha śivāgnau ca viśeṣāddhomamācaret

'''70.40''' utsavapratimāṃ cāpi viśeṣeṇa samarcayet pratisaṃvatsaraṃ hyevaṃ yaḥ kuryāddīpamuttamam sarvānkāmān sa saṃprāpya paramaṃ tu śivaṃ vrajet

===Kapitel 71===

''ekasaptatitamaḥ paṭalaḥ · tulādipratyayavidhiḥ''

'''71.1''' pratyayānāṃ tulādīnāṃ vidhiṃ vakṣye samāsataḥ asminvivādamātre’sya kartākarteti vā tathā

'''71.2''' vādeṣu saṃśaye jāte jijñāsūnāṃ ca bhūbhujām niścayārthamidaṃ proktaṃ divyānāmaṣṭakaṃ kramāt

'''71.3''' tulāgnyāpo viṣaṃ kośastaptamāṣastathāparaḥ taṇḍulāḥ śapathaśceti tatkarmasthānamucyate

'''71.4''' śivālayeṣu sarveṣu durgāsūryālayeṣu ca vināyakaguhasthāne nadīmadhye ca tīrayoḥ

'''71.5''' taṭākatīre vā kuryānnṛpabrāhmaṇasaṃnidhau sarveṣāmapi kālaḥ syādvāraḥ sūryādhirājayoḥ

'''71.6''' tulā sarveṣu yogyā syātpravāte sati varjayet śaradvasantayoścāpi nidāghe’gniṃ vivarjayet

'''71.7''' nidāghe salilaṃ kāryaṃ śiśire viṣamucyate hemante’pi ca kurvīta viṣamanyeṣu varjayet

'''71.8''' śeṣāṇāmiha divyānāṃ sarvakālo vidhīyate teṣu divyeṣu sarveṣu tulādau samyagucyate

'''71.9''' aśvattha nṛpavṛkṣau ca bilvaḥ kiṃśuka eva ca śiṃśapākhadirau caiva śamī grāhyāstulāvidhau

'''71.10''' madhuyuktakuṭhāreṇa tasya cchedo’stramantrataḥ tenaiva taruṇā kāryastulādhārastu toraṇaḥ

'''71.11''' stambhayorucchrayaṃ tatra ravitālena kalpayet viṃśāṅgulaṃ tayornāhaṃ toraṇaṃ ca tathā bhavet

'''71.12''' tulārdhe tu tulākumbhamāyasaṃ parikalpayet tulāyāmaṃ bhavettatra munitālena sammitam

'''71.13''' caturaśrā tulā sā syādāyāmāgnyaṃśanāhataḥ tanmadhye jalamārgaḥ syātkhātamaṅgulamānataḥ

'''71.14''' tasya dvyaṅgulavistāraṃ susamaṃ parikalpayet ayomayīṃ tu lambārthaṃ tulāmadhye tu śṛṅkhalām

'''71.15''' ābadhyordhvamukhīṃ tasyāḥ śirasorapyadhomukhīm śṛṅkhalāṃ tādṛśīṃ taddhvā dvayoḥ śikyaṃ niveśayet

'''71.16''' toraṇe’tha tulāṃ samyaglambayitvā yathāsamam astramantreṇa saṃprokṣya toraṇaṃ ca tulāṃ tataḥ

'''71.17''' kṛtopavāsaṃ samyaktu snātaṃ śuddhāmbaraṃ tathā āhūyābhyukṣitaṃ cāpi tato mantraṃ samuccaran

'''71.18''' kṛtāñjalipuṭaṃ tatra prāṅmukhaṃ tatra vedayet tasya mūrdhni śiraḥpatraṃ likhitaṃ svapratijñayā ślokenānena saṃyuktaṃ bandhayeddhetimuccaran

'''71.19''' candrādityau dahanapavanau bhūmirāpo’mbaraṃ ca kṣetrajño’yaṃ yadiha sakalaṃ karma jānantyamuṣya kālaḥ kartā sa ca sakalaviddevanātho yamaśca devāḥ sarve satatamapi nu saṃsthitāścātra dehe

'''71.20''' tatastattoraṇasthānamaṣṭahastena sammitam gomayenopalipyātha kuṭṭime paritaḥ surān

'''71.21''' toraṇaṃ cārcayenmantrī tadvidhānamathocyate indrādīnāṃ digīśānāmaṣṭānāṃ ca yathāsthiti

'''71.22''' maṇḍalaṃ ratnimātreṇa likhitvā teṣu deśikaḥ vrīhibhiḥ piṅgalaiḥ sarvāṇyantarālāni pūrayet

'''71.23''' padmamaṣṭadalaṃ teṣu karṇikākesarairyutam vartayedathavā tāni vālukairvā prapūrayet

'''71.24''' indrapāvakayormadhye vasūnāṃ sthānamucyate agnināśanayormadhye rudrāṇāṃ sthānamucyate

'''71.25''' mātṝṇāṃ yajanasthānaṃ madhye syādyamarakṣasoḥ rakṣovaruṇayormadhye sthānaṃ gāṇeśvaraṃ bhavet

'''71.26''' varuṇānilayormadhye marutāṃ sthānamucyate vāyucandramasormadhye durgāsthānamathocyate

'''71.27''' īśānasomayormadhye sthānaṃ vidyādguhasya ca deveśeśānayormadhye ravīṇāṃ sthānamucyate

'''71.28''' eteṣāmapi sarveṣāṃ maṇḍalaṃ tu pṛthakpṛthak kauśikāṅgulamānena kalpayetkalpavittamaḥ

'''71.29''' puṇyāhaṃ vācayitvātha prādakṣiṇyakrameṇa tu indrādīnparito yaṣṭvā deśikaḥ śāntamānasaḥ

'''71.30''' arghyādihavirantaistu dravyaiḥ paścādyajetkramāt vasvādīnparito devānpūrvavaddeśikottamaḥ

'''71.31''' dharmayajñau tato dhīmāṃstoraṇastambhayoryajet toraṇe ca caturvaktraṃ tulāyāṃ viṣṇuvarcayet

'''71.32''' tulāyantre tulāmadhye jalamāvarjayettataḥ jalenottānasamatāmanvīkṣyātha parīkṣakaiḥ

'''71.33''' dharmavidbhirdvijendraistu vaṇigbhirdeśikaistadā tulāmāropayettaṃ hi naraṃ mṛttikayā tadā

'''71.34''' tulitaṃ tu tato martyamavatāryātha homayet tadāsyāpi caturdikṣu sthaṇḍile saikataiḥ kṛte

'''71.35''' śivāgniṃ vidhinādhāya samidājyacarūnkramāt mantraistu homeyeddhīmānātmavidyāśivātmakaiḥ

'''71.36''' sarvatra praṇavenātha dadyātpūrṇahutiṃ srucā punastaṃ dhaṭamāropya paṭhenmantravaraṃ guruḥ

'''71.37''' bhagavandevadeveśa sarvabhūtahṛdi sthita sarvajñāsya narasyāśu brūhi vṛttaṃ sureśvara

'''71.38''' iti devaṃ tato mantrī prārthayitvā parīkṣayet pūrvavattulitaḥ so’yamatikrānto viśudhyati

'''71.39''' dharmagauravamāhātmyādbhavettasyātmagauravam athāgneśca vidhiṃ vakṣye kṛtvā sthānaṃ yathā purā

'''71.40''' devatāvaraṇairyuktaṃ madhye tasyātha deśikaḥ navakaṃ maṇḍalānāṃ tu kuryātpūrvaparāyatam

'''71.41''' maṇḍalānāṃ pramāṇaṃ syātpratyekaṃ tu daśāṅgulam antarālaṃ tu teṣāṃ ca tāvadeva prakīrtitam

'''71.42''' maṇḍaleṣu ca sarveṣu pūrayedantarālakam vālukena tato rekhāprāntāṃstāṃścāpi pūrayet

'''71.43''' pakveṣṭakāsamudbhūtaiścūrṇaiḥ sarvānsamantataḥ āgneyamaṇḍalaṃ cādyaṃ dvitīyaṃ vāruṇaṃ smṛtam

'''71.44''' tṛtīyaṃ vāyudaivatyaṃ caturthaṃ yamadaivatam pañcamaṃ tvindradaivatyaṃ ṣaṣṭhaṃ kauberamucyate

'''71.45''' saptamaṃ somadaivatyamaṣṭamaṃ sūryadaivatam navamaṃ vaiśvadaivatyaṃ maṇḍalaṃ parikīrtitam

'''71.46''' bāhyasthā devatāḥ sarvāḥ pūrvavatpūjayetkramāt homaṃ cāpi yathāpūrvaṃ tatrāpi parikalpayet

'''71.47''' pañcāśatpalikaṃ kuryādāyasaṃ khaṇḍamuttamam tasyāyāmassamuddiṣṭaḥ kauśikāṅgulameva hi

'''71.48''' tadrūpaṃ vartulaṃ vā syātsarvadoṣavivarjitam devatāvaraṇādbāhye kṛtvāyaskāragartakam

'''71.49''' vahnibījaṃ samuccārya ṭaṅkamabhyarcayettataḥ pradakṣiṇakrameṇaiva kṛtvā garte kṣipettataḥ

'''71.50''' ayaskāreṇa piṇḍaṃ tad dhmāpayettatra bhastrayā agnivarṇaṃ tu santāpya sthāpayitvā tvanantaram

'''71.51''' upoṣitaṃ kṛtasnānamārdrāmbaramanākulam ādye maṇḍalake tasya baddhvā śirasi patrakam

'''71.52''' sūryasyābhimukhaṃ mantrī sthitastasyāñjalau tataḥ saptapippalapatrāṇi nyastvā sūtreṇa veṣṭayet

'''71.53''' tadūrdhve cākṣatānmantrī śamīpatraṃ ca vinyaset tato mantrī paṭhenmantraṃ tasyāgre susthitaḥ sudhīḥ

'''71.54''' tvamagne sarvabhūtānāmantaścarasi pāvaka sākṣivatpuṇyapāpebhyo brūhi satyaṃ kave mama

'''71.55''' tato’yaskāragartāttadagnivarṇamayomayam ayaskāreṇa piṇḍaṃ taddāpayedañjalau tataḥ

'''71.56''' so’pi saptapadaṃ gacchenmaṇḍalānmaṇḍalaṃ kramāt navame maṇḍale paścāttṛṇe śuṣke’pi taṃ nyaset

'''71.57''' tataḥ ṣaṭ pañca vā nītvā nāḍikāstatkaradvayam tatparīkṣya tadācāryo dagdhaṃ vādagdhamityatha

'''71.58''' dagdhaṃ cetsa naraḥ pāpī bhavatyeva na saṃśayaḥ toyasyātha vidhiṃ vakṣye śuddhyaśuddhivinirṇayam

'''71.59''' hradeṣu ca taṭākeṣu jalūkājhaṣakīṭakaiḥ varjiteṣu manojñeṣu svacchatoyeṣu deśikaḥ

'''71.60''' śaivālādivihīneṣu nottaraṅgeṣu kārayet pūrvavaddevatārcāṃ tāṃ homaṃ cāpi prakalpayet

'''71.61''' madhye cāpi tato dhīmānmaṇḍale hastamātrake dharmadevaṃ samabhyarcya tatra satyamanuṃ nyaset

'''71.62''' śanaiḥ śanaistamabhyarcya hetinā deśikaḥ sudhīḥ tato naraṃ samāhūya śiraḥpatraṃ tu bandhayet

'''71.63''' sapatraṃ taṃ jale sthāpya prāṅmukhaṃ tasya cāgrataḥ sthāpayenmartyamanyaṃ ca cāpavidyākṛtaśramaḥ

'''71.64''' dhanustatra samuddhṛtya trīṅśarānprāṅmukhaḥ sthitaḥ prakṣipetteṣu madhyastho gacchedūrdhvaṃ tu madhyataḥ

'''71.65''' tasminnudyogakāle tu majjataḥ snānavat tridhā urodaghne jale tatra gṛhītvā grasthajānunī

'''71.66''' yathā dehaṃ na paśyettu tīrasthā janatā tadā yāvaccharaṃ gṛhītvāśu nāntikaṃ ca na dūrakam

'''71.67''' āyāti sa dhanuṣmāṃstu na tūrṇaṃ na vilambitam tāvannimajjataḥ śuddhirnānyasya parikīrtitā

'''71.68''' viṣasyātha vidhiṃ vakṣye pūrvavaddevatārcanam pūjane ca kṛte home tatra madhye viṣaṃ sudhīḥ

'''71.69''' maṇḍale vinyasetpātre pūjite tu ghṛtaplutam astramantreṇa saṃprokṣya tāni vakṣye samāsataḥ

'''71.70''' lāṅgalī hayamāraṃ ca kāraskaramataḥ param dhuttūrabījaṃ caitāni viṣāṇi syuḥ surottama

'''71.71''' eteṣvekatamaṃ grāhyaṃ niṣkadvayasamaṃ tataḥ tasya haste tato dadyātsaṃsthitasya narasya tu

'''71.72''' so’pi tadbhakṣayetsadyaḥ sūryasyābhimukhasthitaḥ parīkṣākālastasyāpi yāyamātramiti smṛtam

'''71.73''' nirvikāro yadi bhavecchuddho bhavati mānavaḥ anyathā cedaśuddhaḥ syātpāpe tasminprakāśite

'''71.74''' pratyauṣadhaistataścāpi rakṣayedviṣapīḍitam śuṇṭhī lāṅgalikāyai syātpathyā tu karavīrake

'''71.75''' kāraskare bhavejjambu pravālaṃ ca tato’mbujam dhuttūrasyāmbupiṣṭaṃ tacchamanāya pradāpayet

'''71.76''' kośasyātha vidhiṃ vakṣye devārcāhomapūrvake kṛte karmaṇi sarvasmiṃstasya kośaṃ pradāpayet

'''71.77''' trividhasyāpi liṅgasya brahmaviṣṇvorguhendrayoḥ vināyakasya durgāyāḥ sūryasyāpyāyudhasya ca

'''71.78''' mātṝṇāmapi rūpāṇi sarpiṣā payasāthavā jalena vābhiṣicyātha tattadddravyaṃ vigṛhya ca

'''71.79''' prasṛtitrayamātraṃ tu pūrvavatsaṃsthitasya tu narasya dāpayetso’pi prāṅmukhastatpibet tridhā

'''71.80''' so’pi śuddho bhavedyasya vikṛtirnopajāyate arvāk caturdaśāhāttu tato’nyaḥ pāpabhāgbhavet

'''71.81''' taptamāṣavidhiṃ vakṣye śuddhyaśuddhivinirṇaye vrīhīṇāṃ taṇḍulānāṃ vā pratyekaṃ daśabhiḥ samam

'''71.82''' tulitaṃ māṣamityuktaṃ tattu sauvarṇamucyate cakrikāmūrmikāṃ vāpi tena svarṇena kārayet

'''71.83''' pañcagavyena tanmantrī hetinā kṣālayettataḥ ṣoḍaśāṅgulavistāraṃ tārārdhārdhāntarālakam

'''71.84''' yavamātraghanopetaṃ caṣakaṃ parikalpayet tacca tāmramayaṃ proktaṃ paścāddevānsamarcayet

'''71.85''' homayecca tato martyaṃ saṃdigdhaṃ pūrvavatsthitam āhūya tasya cāgre tu caṣake’tha vinikṣipet

'''71.86''' tailasya viṃśatipalaṃ ghṛtasya ca tathā bhavet madhye maṇḍalamekaṃ tu kṛtvātra saktunottamam

'''71.87''' tatra dhāma samāpādya saṃpūjya vidhinā tataḥ tatra nyastvā tato mantrī tripādīṃ ca yathākramam

'''71.88''' saṃprokṣyāstreṇa tasyordhve ropayeccaṣakaṃ tataḥ agnibījena tasyādho vahniṃ prajvālayettataḥ

'''71.89''' indhanena suśuṣkeṇa pācayeccaṣake hitam ghṛtatailaṃ viśeṣeṇa vahnivattadyathā bhavet

'''71.90''' svarṇamāṣaṃ kṣipenmantrī vahnibījamanusmaran bhāryāsutānāṃ vāpyenaṃ śirāṃsi sparśayetpṛthak

'''71.91''' pratyarthinaṃ tataścāpi parīkṣā samudāhṛtā rājadevakṛtā pīḍā yadi syādācaturdaśāt

'''71.92''' dināntasya mṛṣā proktaḥ śapathastena pāpabhāk bālavṛddhāturānmartyāndhaṭādiṣu na yojayet

'''71.93''' teṣāmanyo’pi kartavyo gātrasyāpagatirbhavet yatra deśe gṛhe kuryātpratyayaṃ vidhinā naraḥ

'''71.94''' tatra devasya pūjārthaṃ dravyaṃ śaktyā pradāpayet dakṣiṇāṃ deśikādināṃ yathoktaṃ dāpayettadā

===Kapitel 72===

''dvisaptatitamaḥ paṭalaḥ · adbhutaśāntividhiḥ''

'''72.1''' adbhutānāmatho vakṣye śāntiṃ doṣanivṛttaye utpāto vikṛtirdoṣasūcako’dbhuta ityapi

'''72.2''' paryāyavācakaiḥ śabdairadbhuto’trābhidhīyate divyāntarikṣabhaumāste trividhāḥ parikīrtitāḥ

'''72.3''' divyāstu śivaliṅgeṣu saṃbhūtāstrividheṣvapi antarikṣodbhavāḥ sarve dṛṣṭā ye te nabhaḥsthale

'''72.4''' jyotiścakre’thavā dṛṣṭā bhaumāstu pṛthivītale carasthirabhavāḥ sarve śāntiṃ sarveṣu kārayet

'''72.5''' divye mahāphalā proktā nādhamā madhyamā matā kanyase tu bhavantyete homāsteṣu yathākramam

'''72.6''' śreṣṭhamadhyakaniṣṭhāni śāntikarmāṇi kārayet vinā nimittaṃ yadrāṣṭre liṅgasya calanaṃ bhavet

'''72.7''' khaṇḍasphoṭau tu vā samyaksthāpya śantimathācaret trisaptāhaṃ tu kurvīta mūrtihomasamanvitam

'''72.8''' snapanaṃ cottamāṃ pūjāṃ viśeṣeṇa ca pūjayet madhyāhne tatsamāptau tu śeṣamutsavamārabhet

'''72.9''' yadi na kriyate śāntiḥ vināśo rājarāṣṭrayoḥ jāyate sarvathā tasmācchāntimāśu prayojayet

'''72.10''' saptāhaṃ mūrtihomena snapanaṃ nityamācaret viśeṣādarcanaṃ cāpi śaiveṣu parikalpayet

'''72.11''' śākteṣvatha ca pañcāhaṃ diśāhomasamanvitam snapanaṃ kārayitvātha viśeṣādyajanaṃ bhavet

'''72.12''' anyeṣvapi ca bereṣu śāntihomasamanvitam snapanaṃ kārayennityaṃ yāvatsaptadināntakam

'''72.13''' eteṣāṃ śāntikāle tu puṇyāhaṃ pūrvamācaret homakāle prayuñjīta diśāsvadhyayanaṃ mahat

'''72.14''' stotraṃ mantrajapaṃ caiva gītanṛttaṃ tathaiva ca karakāvṛṣṭisaṃbhūtau vaivarṇye jyotiṣāmapi

'''72.15''' chāyāpradīpagamane śāntiṃ samyaksamācaret śivālayeṣu sarveṣu kṛtvā gehaṃ samāhitaḥ

'''72.16''' āśāhomasamāyuktaṃ snapanaṃ kārayecchive tasmāttatparihārāya śive śāntiṃ prayojayet

===Kapitel 73===

''trisaptatitamaḥ paṭalaḥ · jīrṇoddhāravidhiḥ''

'''73.1''' uddhāre tu vimānānāṃ kartavyā yā kṛtirbhavet sedānīṃ kathyate tasya vimānasya caturdiśi

'''73.2''' śāṅkare cāpi saṃsthāpya maṇṭapaṃ vedikāyutam vālukena tataḥ pañca vidhivaddeśikottamaḥ

'''73.3''' sthaṇḍilāni samāpādya teṣu homaṃ prakalpayet vedikāyāṃ sthāpayettu ghaṭānpañca samāhitaḥ

'''73.4''' teṣu kumbheṣu tāndevāngalasthāṃścaturo yajet īśānakoṇasaṃsthe tu sthūpisthaṃ śivamarcayet

'''73.5''' khaḍgaṃ tatpārśvake nyasya dakṣiṇe muṣṭisaṃyutam hetinā taṃ samabhyarcya homaṃ paścātsamācaret

'''73.6''' tattaddevāṅgamūlaiśca vidhivatsthāpite’nale samidājyacarūṇāṃ tu pratyekaṃ tu daśāhutim

'''73.7''' rātriśeṣaṃ tato nītvā prabhāte deśikottamaḥ kṛtanityaḥ samabhyarcya kalaśeṣu ca devatāḥ

'''73.8''' pūrṇāhutiṃ tu sarvatra śivāstreṇa pradāpayet tataścaiśānakoṇe tu kumbhe tvāvāhitaṃ śivam

'''73.9''' khaḍgordhve vinyasenmūlamuccaransusamāhitaḥ tatastenābhiṣicyāsiṃ tato’grādikrameṇa ca

'''73.10''' kumbhasthānvinyaseddevāṃścaturaḥ pūrvavatsudhīḥ atho’taḥ kramataḥ sarvānkalaśaiścābhiṣecayet

'''73.11''' tatastaṃ khaḍgamekatra suguptaṃ sannidhāpayet evaṃ kṛtvā kriyāṃ paścātprāsādaṃ sumuhūrtake

'''73.12''' uddhṛtya kārayetpaścātprāsādaṃ vidhinā sudhīḥ jīrṇoddhāre tu liṅgānāṃ tadvidhānamathocyate

'''73.13''' bhūtavedāgnihastaistu śreṣṭhamadhyakaniṣṭhakaiḥ vistṛtaṃ kalpayeddravyaṃ śailaṃ pakveṣṭakāmayam

'''73.14''' āmeṣṭakāmayaṃ vāpi mukhamaṇḍapasaṃyutam kauśikāṃśe yugāṃśaistu garbhaṃ tasya prakalpayet

'''73.15''' tatra tāre’gnibhāge tu vyomāṃśaṃ syānmasūrakam masūradviguṇāṃ bhittimucchrāyeṇa prakalpayet

'''73.16''' tadūrdhve dārubhiḥ kūṭaṃ kalpayetkalpavittamaḥ liṅgagehaṃ samāpādyaṃ mūlagarbhārdhamānataḥ

'''73.17''' triyaṃśaṃ vā caturthāṃśaṃ proktaṃ bālagṛhaṃ tviha bālālayasya purato dakṣiṇottarayostu vā

'''73.18''' vahniśāṃkarayorvāpi deśe kuryācca maṇṭapam saptapañcatribhirhastaiḥ śreṣṭhamadhyakanīyasam

'''73.19''' tanmadhye vedikāṃ kuryānnavabhāgaikabhāgataḥ kuṇḍāni paritaḥ kuryātpūrvavanmantravittamaḥ

'''73.20''' athavā pañcapakṣe tu prāgādiṣu yathākramam caturaśraṃ dhanurvṛttaṃ trikoṇaṃ ca supadmakam

'''73.21''' gomayenopalipyātha brāhmaṇānbhojayetsudhīḥ tato mārjanadravyaistu śuddhiṃ kṛtvā samāhitaḥ

'''73.22''' adhivāsanakāle tu viśeṣo’yaṃ pradarśyate jīrṇaliṅgāntike’gre vā sthaṇḍile coktalakṣaṇe

'''73.23''' vinyasetkalaśau mantrī śivaśaktisusaṅgatau yātrāhomaṃ tu tatraiva kṛtvādau vidhinā tataḥ

'''73.24''' bhojayitvātha viprendrāndharmavrataparāyaṇān bālasthānasthite liṅge devamāvāhya mantravit

'''73.25''' arcanoktaṃ samabhyarcya prabhūtaṃ ca havirdadet nityotsavādikaṃ sarvaṃ bālasthāne ca kārayet

'''73.26''' pañcahomavidhāne tu puruṣaṃ pūrvakuṇḍake dakṣiṇe bahurūpaṃ tu paścime sadya eva ca

'''73.27''' utare vāmadevākhyamīśāne tu prakīrtitam utsavaṃ tu yathāśaktyā dvitīye taruṇālaye

'''73.28''' mārttikaṃ śailajaṃ liṅgamuddhṛtya prakṣipejjale vāmadevena mantreṇāghoreṇātha ca dārujam

'''73.29''' agnau dahettanmantreṇa tattantrātsthāpayetpunaḥ piṇḍikāliṅgayoryatra khaṇḍasphoṭādisaṃbhavaḥ

'''73.30''' tyājyaṃ tadantare tasmājjīrṇameva samuddharet bālaliṅge vijīrṇe tu tatraivotpādya tādṛśam

'''73.31''' sthāpayedvidhinā dhīmānbālasthānaṃ na kārayet yavatrayapramāṇordhvaṃ khaṇḍitaṃ khaṇḍitaṃ bhavet

'''73.32''' sphuṭitaṃ tu bhavettatra govālāgrapraveśane dagdhaṃ tu tadbhavedyatra vaivarṇyamupalakṣyate

'''73.33''' khaṇḍanaṃ sphoṭanaṃ caiva svāyaṃbhuve na doṣadam ratnajeṣvatha liṅgeṣu khaṇḍādau samupasthite

'''73.34''' tadevānyena mānena kṛtahastena śilpinā kārayellohaje liṅge khaṇḍasphoṭādisambhave

'''73.35''' tanmānenāparaṃ liṅgaṃ tena dravyeṇa kārayet anayoścātra kurvīta homaṃ brāhmaṇabhojanam

'''73.36''' tasmācca śatahastordhve netaratsthāpayetsudhīḥ pūrvavaddhāma saṅkalpya pūrvavatsthāpayetsudhīḥ

'''73.37''' ratnalohajaliṅgānāmuddhāre pūrvavadyadi kartuṃ na śakyate tatra bāṇaliṅgasthitirmatā

'''73.38''' bāṇaliṅgapratiṣṭhāyāṃ jale naivādhivāsayet śeṣaṃ karma samaṃ sarvaṃ tatrādau piṇḍikāṃ hare

'''73.39''' acalāṃ sthāpya tasyāṃ tu liṅgaṃ saṃsthāpayettataḥ śilpikarmaṇi sañjāte prāsādābhyantare tale

'''73.40''' bhittau vā liṅgamāveṣṭya vāsasā tu sapīṭhakam śilpisparśo yathā na syāttathā kṛtvākhilāṃ kriyām

'''73.41''' śilpikarma samākhyātaṃ nityapūjāvirodhataḥ pañcagavyena saṃprokṣya brahmapañcakamuccaran

'''73.42''' snapanaṃ śāntihomaṃ ca kuryāttadvidhipūrvakam nityāgnikuṇḍe jīrṇe tu tatpūrve vā tathottare

'''73.43''' saikataṃ sthaṇḍilaṃ kṛtvā tatrāgniṃ kuṇḍato nyaset yātrāhomaṃ tu kṛtvādau tatra homaṃ prakalpayet

'''73.44''' yāvatkuṇḍasamāptiḥ syātpaścādagniniketane sthāpayitvā tataścāpi yātrāhomaṃ tu kārayet

'''73.45''' tataścāpi prakurvīta nityahomaṃ vidhānataḥ balipīṭheṣu jīrṇeṣu tāni kṛtvā tu pūrvavat

'''73.46''' prokṣayedvidhinā mantrī baliṃ pārśve tu nikṣipet yātrāhomavidhiṃ vakṣye saikate sthaṇḍile śubhe

'''73.47''' vidhināgniṃ samādhāya samidājyacarūnkramāt yavasarṣapalājāṃśca tilāṃśca śatasaṃkhyayā

'''73.48''' pratyekaṃ tu tadardhaṃ vā tattanmūlāṅgakaiḥ kramāt homayecca tadante tu bījamukhyena sarpiṣā

'''73.49''' homayeddeśiko dhīmānsaṃkhyayāpi puroktayā pūrṇāṃ sarvātmanā tatra juhuyāddeśikottamaḥ

'''73.50''' jīrṇaliṅgaṃ tu beraṃ vā yatra deśe tu pūjyate tatrānāvṛṣṭijā bhītirvartate nātra saṃśayaḥ tasmātsarvaprayatnena jīrṇamuddhṛtya kārayet

===Kapitel 74===

''catuḥsaptatitamaḥ paṭalaḥ · saṃprokṣaṇavidhiḥ''

'''74.1''' saṃprokṣaṇavidhiṃ vakṣye sarvadoṣanikṛntanam ṣaṇmāsādūrdhvaṃ liṅgasya pūjākarmavihīnake

'''74.2''' caṇḍālasparśane caiva pulindairdhīvaraistathā corakaiśca tathā viṣṇo brahmaghnairvāpi madyapaiḥ

'''74.3''' pātakairgurunārīgaistattatsaṃsargibhistu vā jīrṇoddhāravidhau vāpi prāyaścittavidhau tu vā

'''74.4''' prokteṣvapi ca sarveṣu saṃprokṣaṇamidaṃ bhavet māghabhādrapadau tyaktvā prokṣaṇaṃ sārvakālikam

'''74.5''' tadarthaṃ maṇḍapaṃ kuryāddhāmno’gre śāṅkare’pi vā pārśvayorubhayorvāpi ṣaḍbhiḥ saptāṣṭabhiḥ kramāt

'''74.6''' hastaiḥ karakasaṃpūrṇaṃ vikārastambhasaṃyutam navabhāgaikabhāgena madhye vedikayā yutam

'''74.7''' caturdvārasamāyuktaṃ pratidvāraṃ satoraṇam vitānadhvajasaṃyuktaṃ darbhamālāsamāyutam

'''74.8''' caturaśraiścaturdikṣu kuṇḍairvṛttairvidikṣu ca īśānaśakrayormadhye padmakuṇḍaṃ prakalpayet

'''74.9''' pañcahomavidhāne tu koṇakuṇḍāni varjayet aiśānyāṃ kalpayetkuṇḍaṃ pradhānaṃ padmameva tat

'''74.10''' gomayenopalipyātha maṇṭapaṃ kuṇḍavediyuk brāhmaṇānbhojayitvātra gomayenānulepayet

'''74.11''' puṇyāhaṃ vācayitvātha vāstuhomaṃ ca kalpayet tatra vedyāṃ ca kuṇḍeṣu jīvajaptena vāriṇā

'''74.12''' saṃprokṣya vikirettatra sitapuṣpākṣataiḥ kramāt tataścāntaḥ praviśyātha pañcamṛtpañcagavyakaiḥ

'''74.13''' śivāstreṇa viśuddhyarthamupalipyābhiṣicya ca bahuśaḥ śuddhatoyena śuddhyarthamabhiṣecayet

'''74.14''' tataśca piṇḍikāyāṃ ca śuddhiṃ tadvatprakalpayet tataśca kuśamiśreṇa bilvapatreṇa gharṣayet

'''74.15''' pūrvavatpunareveśaṃ piṇḍikāṃ ca krameṇa vai sarvātmanābhiṣicyātha sthalaṃ prakṣālya hetinā

'''74.16''' tato liṅgaṃ ca devīṃ ca candranenānulipya ca arghyaṃ cāpi hṛdā dattvā mālābhiḥ saha deśikaḥ

'''74.17''' veṣṭayennavavastreṇa liṅgaṃ vediṃ ca varmaṇā tataśca garbhagehaṃ tadbrahmapañcakamuccaran

'''74.18''' prokṣayedastrajaptena vāriṇā deśikaḥ svayam nirgamya maṇḍapaṃ tasmātprāpya vedyāṃ tu śālibhiḥ

'''74.19''' sthaṇḍilaṃ pūrvavatkṛtvā tatra kumbhaṃ dṛḍhaṃ śubham droṇapūraṃ supakvaṃ ca sitasūtravicitritam

'''74.20''' gandhodapūritaṃ hemapadmayuktaṃ sakūrcakam sāpidhānaṃ savastraṃ ca nyasenmadhye śivāṇunā

'''74.21''' tatastasyottare bhāge tādṛgbhūtāṃ tu vardhanīm tadardhavāriṇāpūrya nyastvā sarvāsu dikṣu ca

'''74.22''' tādṛśānkalaśānaṣṭau vinyased vardhanīsamān hemaśastrasamāyuktānsarvalakṣaṇalakṣitān

'''74.23''' tatasteṣu śivaṃ madhye vardhanyāṃ śaktimeva ca vidyeśvarāṃśca deśeṣu gandhapuṣpādibhiḥ kramāt

'''74.24''' saṃpūjya ca havirdadyāttato homaṃ prakalpayet agnikuṇḍeṣu sarveṣu vidhinā sthāpya pāvakam

'''74.25''' teṣu sarveṣu vidyeśānpradhāne ca śivaṃ yajet samidājyacarūṇāṃ tu yavasarṣapayostathā

'''74.26''' lājasyāpi tilasyātha pratyekaṃ śatasaṃkhyayā juhuyānmūlamantreṇa ṣaḍaṅgaiśca yathākramam

'''74.27''' plakṣodumbarakāśvatthavaṭāḥ pūrvāditaḥ kramāt śamīkhādirabilvārkāḥ pāvakādiṣu ca kramāt

'''74.28''' pālāśī syātpradhānasya samidevaṃ prakīrtitā pañcahomavidhāne tu kuṇḍeṣu brahmapañcakam

'''74.29''' sadyādīśānaparyantaṃ yathāsthānaṃ samarcayet pratidravyāvasāne tu vyāhṛtyante spṛśedghaṭam

'''74.30''' homakāle prayuñjīta caturdikṣu ṛgādibhiḥ viprairadhyayanaṃ tatra śāṅkare’strajapānvitam

'''74.31''' pradhāne deśiko dhīmāṅśaktermūlaṃ samuccaran sarpiṣaikena hutvātha tadaṅgaiśca yathākramam

'''74.32''' vidyeśānāṃ gaṇeśānāṃ dikpālānāṃ tathaiva ca tadastrāṇāṃ ca sarveṣāṃ daśapañcakameva ca

'''74.33''' krameṇa saṃkhyayā hutvā spṛṣṭvā liṅgaṃ sapiṇḍikam mantrasaṃhitayā dhīmāṃstataḥ sviṣṭakṛdāhutim

'''74.34''' hutvātha pariṣicyātha homakarma samāpayet tataḥ prabhāte vimale hotṛbhiḥ saha deśikaḥ

'''74.35''' kṛtanityakriyo gatvā maṇḍapābhyantaraṃ tataḥ kumbheṣu devānsaṃpūjya kuṇḍeṣvapi yathākramam

'''74.36''' vahniṃ prajvālya pūrṇāṃ tu sarvātmahṛdayena ca srucā sarvatra dadyācca śaṅkhadundubhinisvanaiḥ

'''74.37''' pariṣicyāgnimudvāsya garbhagehaṃ praviśya ca vastramālyādikaṃ sarvaṃ hetinātha visarjayet

'''74.38''' tato liṅgaṃ sapīṭhaṃ tu sarvātmānaṃ samuccaran gandhāmbunābhiṣicyātha dattvārghyaṃ praṇavena ca

'''74.39''' tataḥ kumbhānsamuddhṛtya sarvātodyasamanvitaḥ pradakṣiṇakramādantaḥ praviśyāgre śivasya ca

'''74.40''' sthāpya kumbhānyathāpūrvaṃ kṛtamantratanurguruḥ gandhapuṣpādibhiḥ pūjya liṅgamūle tadāsanam

'''74.41''' kumbhātkūrcāmbhasā mūlamantramuccārya mantravit liṅge devaṃ samāvāhya devyāṃ śaktiṃ ca mantravit

'''74.42''' vidyeśānparitaḥ pīṭhaṃ tattanmantraṃ samuccaran vinyasya pūrvavanmantrī tatastairabhiṣecayet

'''74.43''' śivakumbhāmbhasā devaṃ vardhanyātha ca piṇḍikām śeṣaiśca liṅgaṃ mantraṃ tu kālātmānaṃ samuccaran

'''74.44''' tataścābhyarcya deveśamarcanoktaprakārataḥ dattvā havīṃṣi pañcāpi śuddhānnādīni deśikaḥ

'''74.45''' mukhavāsasamāyuktaṃ tāmbūlaṃ ca nivedayet tataśca deśikādīnāṃ dadyāduktāṃ tu dakṣiṇām

'''74.46''' mṛṣṭānnaṃ brāhmaṇānāṃ tu dadyāttatra dinatrayam vyaktānāmatha liṅgānāmacalānāṃ janārdana

'''74.47''' pañcahomavidhānena kuryātsaṃprokṣaṇaṃ sudhīḥ calānāṃ vyaktaliṅgānāṃ śāntihomasamanvitam

'''74.48''' snapanaṃ vā yathāśaktyā prayuñjīta viśuddhaye prāsādaprokṣaṇe cāpi pūrvādicatasṛṣvapi

'''74.49''' dikṣu śāṅkaradeśe’pi gomayenopalepite kuṭṭimaṃ vidhivatkṛtvā sthaṇḍilaṃ tatra vinyaset

'''74.50''' sasūtrāṃstoyasaṃpūrṇānvastrakūrcasamāyutān kumbhānpañca tatasteṣu diksthāndikstheṣu pūjayet

'''74.51''' devāṅśivaṃ yajedīśe teṣāmagre ca homayet samidājyacarūṇāṃ tu pratyekaṃ tu śatārdhayā

'''74.52''' saṃkhyayā mūlanetrāstrairdevānāṃ tu yathākramam hutvā pūrṇāhutiṃ cāpi dadyātpraṇavamuccaran

'''74.53''' evaṃ hutvā tataḥ kuryātpuṇyāhaṃ vidhivaddhare prokṣye dhāmni tataḥ kumbhairīśānādi yathākramam

'''74.54''' prokṣayettattadastreṇa heyamuddhṛtya deśikaḥ vṛṣādīnāṃ tu devānāṃ pīṭhasthāne tathaiva ca

'''74.55''' śāntihomasamāyuktaṃ snapanaṃ vidhinā bhavet agnikāryeṣu saṃspṛṣṭe vahnimudvāsya tatra vai

'''74.56''' pañcagavyena saṃprokṣya kuṇḍe vāgniṃ vidhānataḥ sthaṇḍile vā samādhāya śāntihomaṃ vidhānataḥ

'''74.57''' evaṃ dhiṣṇye samuddiṣṭaṃ proktaṃ saṃprokṣaṇaṃ tataḥ maṇḍapaṃ gopuraṃ vāpi prākāraṃ vā sabhāṃ maṭham

'''74.58''' gṛhaṃ vā vidhivatkṛtvā prokṣaṇaṃ tasya śuddhaye kuryādevaṃ vidhānena tadvidhānamathocyate

'''74.59''' tasya pūrve tathā bhaume madhye vā kuṭṭime kṛte gomayenopalipyātra sthaṇḍile vidhinā kṛte

'''74.60''' madhye kumbhaṃ nyasettatra gandhodaparipūritam sahiraṇyaṃ savastraṃ ca sakūrcaṃ sāpidhānakam

'''74.61''' puṇyāhaṃ tatra kurvīta kumbhe brahmāṇamarcayet vāstoṣpatiṃ tato homaṃ tatpūrve vāstusaṃjñitam

'''74.62''' kṛtvā pūrvoktavidhinā tatpūrve vātha cottare ekāśītipadaṃ kṛtvā pūjayedvāstudevatāḥ

'''74.63''' pūrvavatsthāpanaṃ kṛtvā tāśca kumbhe samarcayet vāstoṣpatiṃ ca gandhādyairhavirantaiḥ krameṇa vai

'''74.64''' sarvātodyasamāyuktamuddhṛtya kalaśaṃ tataḥ tenāmbhasā sakūrcena prokṣayecca samantataḥ

'''74.65''' pradakṣiṇakrameṇaiva pavitrairmantravittamaḥ sarvātmanā tataścāpi prokṣayenmaṇḍapādikam brāhmaṇānbhojayedatra śivavrataparāyaṇān

===Kapitel 75===

''pañcasaptatitamaḥ paṭalaḥ · piṇḍikāsthāpanavidhiḥ''

'''75.1''' piṇḍikāsthāpanaṃ vakṣye bhogamokṣaikasādhanam yatra yā piṇḍikā jīrṇā tatra tāṃ kārayetpunaḥ

'''75.2''' uddhṛtya tattadākārāṃ piṇḍikāṃ tāṃ viśeṣataḥ anyathāpi ca kartavyā caturaśrā tu vartulā

'''75.3''' caturaśrāṃ na kurvīta vartulāṃ pūrvavatsthitām aiṣṭikāṃ śilayā kuryājjīrṇāmapi ca piṇḍikām

'''75.4''' taduddhāre purā kṛtvā bhojanaṃ śivayoginām liṅgāgre sthaṇḍilaṃ kṛtvā śālibhirvidhinā sudhīḥ

'''75.5''' tatra padmaṃ samālikhya sāṣṭapatraṃ sakarṇikam tanmadhye śivakumbhaṃ tu sitasūtravicitritam

'''75.6''' gandhodapūritaṃ hemapadmayuktaṃ sakūrcakam sāpidhānaṃ savastraṃ ca vinyasyāsyātha cottare

'''75.7''' śaktikumbhaṃ tathābhūtaṃ vinyasyāvāhayettadā liṅgātkumbhe śivaṃ pīṭhācchaktiṃ caiva manonmanīm

'''75.8''' āvāhanādibhistatra gandhapuṣpādibhiḥ kramāt saṃpūjyātha tadagre tu sthaṇḍile saikate kṛte

'''75.9''' yātrāhomavidhānena kṛtvā homamatandritaḥ prāsādasyeśadigbhāge saumye vā sthaṇḍile kṛte

'''75.10''' saṃsthāpyābhyarcayettatra naivedyāntaṃ vicakṣaṇaḥ tato liṅgaṃ samabhyarcya candanena ca mālayā

'''75.11''' vastreṇa veṣṭayitvātha tanutrāṇaṃ samuccaran uddhṛtya pīṭhakānsarvānmagnāmbhasi vinikṣipet

'''75.12''' aiṣṭikā yadi sāmeti pakvābhistāṃ prakalpayet iṣṭakābhiḥ sacūrṇena lolitena kuśāmbhasā

'''75.13''' tāṃ kṛtvā lakṣaṇopetāṃ piṇḍikāṃ sumanoramām niṣpādyānantaraṃ tasyāḥ pratiṣṭhāṃ kārayetsudhīḥ

'''75.14''' tadarthaṃ maṇḍapaṃ kuryālliṅgāgre pārśvayostu vā īśapāvakayorvāpi nirdiṣṭaṃ munihastakaiḥ

'''75.15''' śreṣṭhamadhyakaniṣṭhaṃ tu paṅkitrayasamanvitam paṅkimānasamutsedhaṃ madhye vedikayā yutam

'''75.16''' yonyākārāṇi kuṇḍāni tasya dikṣu prakalpayet caturaśrāṇi koṇeṣu pradhānaṃ vṛttameva ca

'''75.17''' pañcahomavidhāne ca koṇakuṇḍāni varjayet pradhānaṃ śāṅkare kṛtvā vṛttakuṇḍaṃ sulakṣaṇam

'''75.18''' maṇḍapottaradigbhāge kalpayetsnānamaṇḍapam snānavedisamāyuktaṃ vitānādyaistu pūrvavat

'''75.19''' maṇḍapaṃ samalaṅkṛtya gomayenopalipya ca brāhmaṇānbhojayitvātra śuddhiṃ kṛtvā sudhīstataḥ

'''75.20''' kārayedvāstuhomaṃ tu devānabhyarcya pūjayet śailāṃ kṛtvā vidhānena sarvalakṣaṇalakṣitām

'''75.21''' maṇḍapaṃ tu samānīya tatastatraiva piṇḍikām vedyāṃ saṃsthāpya cādbhistu pañcamṛtpañcagavyakaiḥ

'''75.22''' brahmapañcakamuccārya śodhayitvā samantataḥ paścācca śaktigāyatryā gandhodenābhiṣicya ca

'''75.23''' vastreṇa veṣṭayitvādha sukūrcenāpi piṇḍikām navena pariśuddhena veṣṭayedvai samantataḥ

'''75.24''' sthaṇḍilaṃ vedikāyāṃ ca kṛtvā śayyāṃ ca pūrvavat puṇyāhaṃ vācayitvātha saṃprokṣya brahmapañcakaiḥ

'''75.25''' sarvātodyasamāyuktaṃ gītanṛttasamanvitam tatra tāṃ piṇḍikāṃ vedyāṃ samānīyādhivāsayet

'''75.26''' śayane śaktigāyatryā yathā liṅge tu saṃsthitā tatastau sthāpitau kumbhau śivaśaktyātmakau tadā

'''75.27''' uddhṛtya vedikāmadhye piṇḍikāyāstu pūrvataḥ vinyasya pūrvavastraṃ ca tyaktvā vastraṃ punastayoḥ

'''75.28''' kūrcādikaṃ ca vinyasya vidhinābhyarcya deśikaḥ paritaśca tato’ṣṭau tu ghaṭāngandhodapūritān

'''75.29''' vastrakūrcādisaṃyuktānprāgādiṣvatha vinyaset puṇyāhaṃ tatra kurvīta śivaśaktyoranantaram

'''75.30''' vidyeśānpūjayenmantrī gandhapuṣpādibhiḥ kramāt tato homaṃ prakurvīta tadvidhānamathocyate

'''75.31''' prāgādimūrtayasteṣu vāmādyāḥ parikīrtitāḥ kuṇḍeṣu tatpradhāne tu śaktiḥ syātsā manonmanī

'''75.32''' pañcahome nivṛttyādyāścaturdikṣu ca saṃsthitāḥ tatra tāstu samabhyarcya vidhinādhāya pāvakam

'''75.33''' homayetkramato mantrī samidājyacarūṃstataḥ tilamāṣayavāṃścaiva sarṣapāṃśca samantataḥ

'''75.34''' śaktyaṅgairmūlapūrvaistu pratyekaṃ tu śatāhutim tadardhaṃ vā pratidravyaṃ spṛśedvyāhṛtipūrvakam

'''75.35''' piṇḍikāṃ deśikaḥ paścātpūrvādikramayogataḥ mūrtipaiśca tadā sparśaṃ kārayettaistu sādhakaiḥ

'''75.36''' sarvatrātha ca mantreṇa prāsādena śatāhutim juhuyānmūrtipaiḥ sārdhaṃ gurustatra samāhitaḥ

'''75.37''' vidyeśānāṃ gaṇeśānāṃ dikpatīnāṃ tathaiva ca astrāṇāṃ ca tadīyānāṃ kramādekaikamāhutim

'''75.38''' pradhāne deśiko hutvā śaktīnāṃ tadanantaram juhuyātsarvakuṇḍeṣu pratyekaṃ tu daśāhutim

'''75.39''' tataḥ sarvatra saṃpūjya pāvakaṃ pariṣicya ca homakarma samāpyaivaṃ śivādīnāmanantaram

'''75.40''' kumbhasthānāṃ havirdadyāttāmbūlaṃ ca nivedayet homakāle caturdiksu ṛgādyadhyayanaṃ bhavet

'''75.41''' śāṅkare’strajapaṃ kuryātsarvavighnanivṛttaye samitsarvatra pālāśī bhavedaudumbarī tu vā

'''75.42''' rātriśeṣaṃ tato nītvā prabhāte mūrtipaiḥ saha kṛtanityo guruḥ pūjāṃ kṛtvā kumbheṣu pūrvavat

'''75.43''' prajvālyāgniṃ ca kuṇḍeṣu dadyātpūrṇāhutiṃ srucā śaktimūlena sarvatra tataścoddhṛtya piṇḍikām

'''75.44''' vastrakūrcādikaṃ tyaktvā hetinābhyutthitāṃ tataḥ pradakṣiṇamupāvṛtya prāsādāntaḥ praviśya ca

'''75.45''' śilpinā deśikastatra sthāpayenmūlamuccaran tadgarte parito dhīmān ratnāni vidhivannyaset

'''75.46''' śakraśāṃkarayormadhye māṇikyaṃ cāpi vinyaset tato randhre’ṣṭabandhaṃ tu tribandhaṃ vā parikṣipet

'''75.47''' tena kurvīta nīrandhraṃ viśleṣaṃ liṅgapīṭhayoḥ tataḥ snātvā gurustatra kṛtavidyātanuḥ sudhīḥ

'''75.48''' soṣṇīṣaḥ sottarīyaśca dhṛtapañcāṅgabhūṣaṇaḥ antaḥ praviśya puṇyāhaṃ kṛtvā liṅgasamīpataḥ

'''75.49''' viśodhya liṅgaṃ pīṭhaṃ ca pañcamṛtpañcagavyakaiḥ abhiṣicya ca mantraistu brahmabhiḥ pañcabhiḥ kramāt

'''75.50''' gandhatoyena paścāttu kumbhāṃstānādhivāsitān uddhṛtya vāhayitvāṃse kṛtvā dhāmni pradakṣiṇam

'''75.51''' antaḥ praviśya devāgre kalpite sthaṇḍile tataḥ śivādīnpūrvavatsthāpya ghaṭāṃstatropaviśya ca

'''75.52''' udaṅmukho guruḥ kuryāttattanmantrātmikāṃ nijām tato’rghyagandhapuṣpādyaiḥ pūjayetpūrvavadguruḥ

'''75.53''' śivaliṅge śivaṃ devaṃ mūlamantramanusmaran kumbhātkūrcaṃ samāyojya liṅgaṃ tenābhiṣecayet

'''75.54''' sarvātmahṛdayenātha śaktikumbhānmanonmanīm tathā pīṭhe samāveśya śaktigāyatrimuccaran

'''75.55''' tenābhiṣecayetpīṭhaṃ tataścāṣṭau ghaṭānapi vidyeśvarātmakaṃ mantraṃ yathāsthānaṃ tu vinyaset

'''75.56''' taiścābhiṣicya deveśaṃ sāṅgamūlena pūjayet piṇḍikāyāṃ tataścāpi tasyā mūlaṃ tu vinyaset

'''75.57''' ṣaḍaṅgāni hṛdādīni pūrvādikramato nyaset netramīśānadeśe syādastramāgneyagocare

'''75.58''' tato gandhodakenaiva liṅgaṃ pīṭhaṃ ca mantravit ābhiṣicya patitraistu tataḥ saṃvatsarātmanā

'''75.59''' candanena tato liṅgaṃ pīṭhaṃ cābhyarcya pūjayet mālābharaṇavastrādyairdeśikaṃ ca yathākramam

'''75.60''' prabhūtaṃ ca havirdadyāttāmbūlaṃ ca pradāpayet evaṃ yaḥ kārayenmartyaḥ piṇḍikāsthāpanaṃ param iha loke sukhaṃ prāpya sa yāti paramāṃ gatim

===Kapitel 76===

''ṣaṭsaptatitamaḥ paṭalaḥ · prāyaścittavidhiḥ''

'''76.1''' utsavādiṣu yāgeṣu prāyaścittaṃ vadāmi te pramādaḥ prāya ityuktaḥ kṛtyakarmasu mantrataḥ

'''76.2''' kriyayā dravyato vāpi kṛtastasya pratikriyā cittamityucyate tasmātprāyaścittamiti smṛtam

'''76.3''' mantrāṇāṃ tu pramādaḥ syādapaśabdo’nyatheraṇam svarahāniśca varṇānāṃ vṛddhirhrāsaśca dūṣitān

'''76.4''' mantrāṃstānsamyaguccārya karma kṛvā yathā punaḥ sarvātmānaṃ śataṃ tatra japeddoṣanivṛttaye

'''76.5''' vyatyāsaśca vināśaśca paunaḥpunyaṃ ca karmasu pramādāsteṣu jāteṣu yathāvatkramataḥ punaḥ

'''76.6''' kṛtvā taddoṣaśāntyarthaṃ piṅgalākhyaṃ śataṃ japet buddhipūrvapramādaścedanayormantrakarmaṇoḥ

'''76.7''' dviguṇastu prayoktavyo mantrayoranayorjapaḥ dravyāṇāṃ tu pramādo yaḥ sa idānīṃ nigadyate

'''76.8''' pālikāghaṭikādīnāṃ somakumbhavyaye tathā aṅkurasya vidhau dṛṣṭvā patanaṃ bhedanādikam

'''76.9''' kevale patane jāte sthāpya taṃ tu yathā purā dhenumudrāṃ tu saṃyojya praṇavaṃ samudāharan

'''76.10''' saṃpūjya gandhapuṣpādyairbahurūpaṃ śataṃ japet bhede jāte tathā tyaktvā sthāpya taṃ pūrvavatsudhīḥ

'''76.11''' saṃpūjya ca samāpyaitacchāntihomaṃ ca kārayet aṅkurāṇāṃ vināśe’pi śāntihomaṃ ca kārayet

'''76.12''' uktakāle’ṅkuraścaiva yatra vā na hi kalpitaḥ sāṅkuraṃ tattu tatraiva kṛtvāghoraṃ śataṃ japet

'''76.13''' sadyo’ṅkurāya cokte syātsadyaḥ kṛtā tu mañjarī sitavarṇā susaṃśliṣṭā vinyastā pālikādiṣu

'''76.14''' vṛṣayāge ghaṭādīnāṃ patane bhedane’pi ca japayāgau prayoktavyau yathāpūrvaṃ vicakṣaṇaiḥ

'''76.15''' devāgre sa vṛṣaṃ tatra bhede jāte’rcayetsudhīḥ viśeṣādgandhapuṣpādyairmudgānnaṃ ca nivedayet

'''76.16''' dhvajotsave tu saṃprāpte dhvajādīnāṃ nipātane ārabdhakarmanirvṛttau praviśya bhavanaṃ tataḥ

'''76.17''' akṣataṃ cettathā beraṃ japedaṣṭottaraṃ śatam chedanādanyamāpādya kṛtvā sadyo’dhivāsanam

'''76.18''' āropayettato dhāmni pradakṣiṇaṃ samācaret śāntihomaṃ vṛṣāgre tu kṛtvā karma samāpayet

'''76.19''' tatra ca pratimādīnāṃ patane bhedavarjite snapanaṃ vidhivatkṛtvā tasyāgre homamācaret

'''76.20''' vaikalye sati tasyāśu kṛtvā saṃdhānamuttamam vidhinā sthāpayeddhīmānjīrṇoddhāroditena tu

'''76.21''' dhvajārohaṇakāle tu nipāte dhvajadaṇḍayoḥ akṣataṃ cetpunardaṇḍaṃ sthāpayitvā tameva tu

'''76.22''' dhvajaṃ cāpi tathābhūtaṃ sarvātmajapapūrvakam āropaṇe tayorjṛmbhe chede vā samupasthite

'''76.23''' daṇḍamanyaṃ samāpādya kṛtvā taṃ cāpi pūrvavat dhvajasyāpyadhivāsādi kṛtvā dhāmni pradakṣiṇam

'''76.24''' āropayitvā tatrāhni rātrau vāpi vidhānavit śāntihomasamāyuktaṃ vṛṣaṃ devaṃ ca pūjayet

'''76.25''' rajjuyantrādibhedena dhvajasya patane sati vidhivatpīṭhamatrāśu kṛtvā puṇyāhapūrvakam

'''76.26''' tadagre śāntihomaṃ tu caṇḍapūjāsamanvitam kuryāddvārādibhistasmindhvaje’pyevaṃ hṛte sati

'''76.27''' dhvajamanyaṃ samāpādya kṛtvā sadyodhivāsanam dhāmni pradakṣiṇaṃ cāpi sarvātmajapapūrvakam

'''76.28''' dhvajamāropayitvāśu taddine vā dvitīyake devasya snapanaṃ kāryaṃ śāntihomasamanvitam

'''76.29''' dhvajasyāropitasyāpi bhedādau samupasthite vidhivatkalpayeddhīmānsamutsṛjya dhvajaṃ tathā

'''76.30''' bheryāstāḍanakāle tu śūlāstrapatanaṃ yadi bahurūpajapaṃ kṛtvā śūlaṃ vidhivadarcayet

'''76.31''' śeṣakarmasamāptau tu śāntihomasamanvitam śūlasya snapanaṃ kuryātpatane’tha ca bhaṅgake

'''76.32''' tadā tatraiva vinyasya sthaṇḍilaṃ sthalikopari aṣṭabandhanahīne ca pārthivaṃ jalavarjitam

'''76.33''' tato’ṣṭabandhanaṃ kuryātsudṛḍhaṃ kārayedbudhaḥ lākṣā sarjarasaḥ sikthaṃ kuruvindaśca gugguluḥ

'''76.34''' gairikaṃ gulatailaṃ ca aṣṭabandhaḥ sa ucyate tāmrapātre tu nikṣipya pākaścikkaṇavadbhavet

'''76.35''' pakvāṣṭabandhanaṃ hyevamapakvaṃ cādhunocyate triphalaṃ śaṅkhacūrṇaṃ ca gulaṃ ca kadalīphalam

'''76.36''' dadhi ghṛtaṃ dugdhasikthaṃ peṣayedaṣṭabandhanam śarkarāṃ kunduruṣkaṃ ca māhiṣaṃ navanītakam

'''76.37''' ulūkhale tu saṃsthāpya musalenaiva mardayet cikkaṇasya tu bhāgena saṃbandhaṃ sudṛḍhaṃ kuru

'''76.38''' śarkarāsaṃjñacūrṇaṃ ca māhiṣaṃ navanītakam śaṅkhacūrṇaṃ tato gṛhya dviguṇāṃ sikatāṃ tathā

'''76.39''' gulena peṣayettatra randhre tu sthāpayetsthale pūrvavatsnapanaṃ kuryācchāntihomaṃ tu kārayet

'''76.40''' sudhākarmavihīne ca sthalakarmavihīnake pravartate mahāmārī punaḥ saṃdhānamācaret

'''76.41''' puṇyāhaṃ vācayeddevaṃ gavyairevābhiṣecayet śūle ca patite caiva calite cāṅgahīnake

'''76.42''' dagdhe ca varṇahīne ca carmacchede tathaiva ca pīṭhe bandhavihīne ca grāmanāśaṃ vinirdiśet

'''76.43''' patite calite caiva bālasthānaṃ tu kārayet śūlaṃ tu sthāpayetpaścātpūrvoktavidhinā saha

'''76.44''' beraṃ tu vidhivatkṛtvā saṃprokṣaṇamathācaret aṅgopāṅgapratyaṅgaṃ ca śarīrasyāṅgamucyate

'''76.45''' aṅgaṃ pradhānaśūlaṃ syādbrahmadaṇḍamihocyate vakṣodaṇḍaṃ kaṭīdaṇḍaṃ bahukūrparakoṣṭhakam

'''76.46''' ūrū jānū ca jaṅghe ca upāṅgaṃ ceti kīrtitam śeṣāṇi ca vijānīyātpratyaṅgamiti buddhimān

'''76.47''' brahmadaṇḍavihīne ca śūlasthāpanamārabhet pratyaṅgopāṅgahīne ca punaḥ saṃdhānakaṃ kuru

'''76.48''' svadāruśca tadā grāhyo yojayetsthāpane kramāt bhinnādau ca samutpanne punaḥ saṃdhānamācaret

'''76.49''' āsaptadivasātpūrve kriyate cedghaṭasthitiḥ tadūrdhve bālaharmyaṃ tu kṛtvā saṃprokṣaṇaṃ kuru

'''76.50''' bhavane cāgnidagdhe ca vahninā tu bhayaṃ bhavet vyapohyāṅgārakānsarvānpaścātsaṃdhānamācaret

'''76.51''' puṇyāhaṃ vācayitvātha diśāhomaṃ tu kārayet dagdhe ca pratime liṅge rājā maraṇamāpnuyāt

'''76.52''' vahninā sphuṭite bhinne liṅge vā pratime tu vā jīrṇoddhāravidhānoktamārgeṇaiva samuddharet

'''76.53''' vahninā drutabimbaṃ cetkuryāttenaiva vastunā tatpramāṇena tadrūpaṃ kārayettu viśeṣataḥ

'''76.54''' pūrvoktavidhinā dhīmānpratiṣṭhāṃ kārayettataḥ pratyaṅgopāṅgahīne ca vastrābharaṇahīnake

'''76.55''' punaḥ saṃdhānakaṃ kṛtvā pūrvoktenaiva mārgataḥ saṃprokṣaṇaṃ tataḥ kṛtvā cotsavaṃ kārayettataḥ

'''76.56''' corādyaiścalite liṅge nadīsrotaḥpracālite sthāpayennirvraṇaṃ cettu corādāhṛtya pūrvavat

'''76.57''' coraiḥ saṃgṛhyate devaśaktiścetkṣayakāriṇī tacchaktimuddharedanyāṃ navaśaktiṃ kramātkuru

'''76.58''' deve cāvāhayecchaktiṃ navalohaṃ tu saṃgrahet pūrvaśaktiṃ vyapohyātha samudre daśayojane

'''76.59''' devaṃ devīṃ ca saṃgṛhya pratiṣṭhāṃ kārayedbudhaḥ sthāpanānte tu berādyamānītaṃ cettadantike

'''76.60''' deśe saṃsthāpya vidhinā pūjayennityamādarāt pīṭhaṃ cetsaṃtyajelliṅgenāthavānyena kārayet

'''76.61''' parivāravihīne ca dāsīdāsavināśanam kṛtvā tu pūrvavatpaścātsthāpayetsthāpakottamaḥ

'''76.62''' parivārāṅgavaikalye punaḥ sandhānamācaret tattanmantreṇa matimānsamidbhiḥ sarpiṣā tathā

'''76.63''' caruṇā juhuyāddhīmānpratyekaṃ tu śataṃ kramāt saṃprokṣyābhyarcya gandhādyaiḥ puṇyāhaṃ vācayettataḥ

'''76.64''' balipīṭhavihīne tu gavāṃ vai nāśanaṃ bhavet pūrvavatkalpayetpīṭhaṃ sthāpayedvidhinā budhaḥ

'''76.65''' tadbhinne patite dagdhe punaḥ sandhānamācaret puṇyāhaṃ vācayitvā tu śāntihomaṃ tu kārayet

'''76.66''' snapanaṃ kārayecchambhoḥ pūjayecca viśeṣataḥ kukkuraiḥ kukkuṭaiścaiva kharasūkaravānaraiḥ

'''76.67''' sparśite liṅgabimbe ca praviṣṭe garbhagehake pravartate mahāmārī tadgrāmaśca vinaśyati

'''76.68''' mṛdbhāṇḍāni visṛjyātha sthānaśuddhiṃ tataḥ kuru gomayālepanaṃ kṛtvā prokṣayetpañcagavyakaiḥ

'''76.69''' snapanaṃ kārayettatra śāntihomaṃ tataḥ kuru liṅge rajasvalāspṛṣṭe pratime vā viśeṣataḥ

'''76.70''' garbhagehe praviṣṭe vā jāyāvannāśanaṃ bhavet mṛdbhāṇḍāni visṛjyātha gomayenopalipya ca

'''76.71''' paryagnikaraṇaṃ kṛtvā puṇyāhaṃ vācayettathā snapanaṃ kārayeddevaṃ bilvapatreṇa gharṣayet

'''76.72''' mūrtihomaṃ tataḥ kṛtvā brāhmaṇānbhojayettataḥ antarmaṇḍalasālādau tathā spṛṣṭe viśeṣataḥ

'''76.73''' saṃprokṣya pañcagavyena puṇyāhaṃ vācayettataḥ spṛṣṭe sūtikayā bimbe praviṣṭe garbhagehake

'''76.74''' durbhikṣaṃ jāyate loke bālānāṃ nāśanaṃ bhavet mṛdbhāṇḍāni visṛjyātha gomayenopalepayet

'''76.75''' paryagnikaraṇaṃ kṛtvā puṇyāhaṃ vācayettataḥ pañcaśuddhikramaṃ kṛtvā snapanaṃ kārayettataḥ

'''76.76''' mūrtihomaṃ tataḥ kṛtvā cāstreṇaiva śataṃ hunet brāhmaṇānbhojayettatra puṇyāhaṃ vācayettataḥ

'''76.77''' pretakaiḥ sparśane caiva praviṣṭe garbhagehake putrapautravināśaḥ syāttatra grāmaśca naśyati

'''76.78''' visṛjenmṛṇmayaṃ pātraṃ gomayenopalepayet pañcagavyena saṃprokṣya pavamānamudīrayan

'''76.79''' pañcaśuddhikramaṃ kṛtvā puṇyāhaṃ vācayettataḥ śāntihomaṃ tataḥ kṛtvā mūlenaiva śataṃ hunet

'''76.80''' brāhmaṇānbhojayitvātha vidhivaddeśikottamaḥ nityapūjāvihīne tu sthānabhraṃśo bhavetsadā

'''76.81''' ekasaṃdhivihīne tu cānyatra dviguṇaṃ bhavet saṃdhidvayārcane hīne śāntihomaṃ tu kārayet

'''76.82''' guṇasaṃdhivihīne ca pañcagavyena secayet ekāhe’tra vihīne tu snapanaṃ kārayettataḥ

'''76.83''' ahorātrādipañcāhe snapanaṃ śāntihomakam pakṣahīne diśāhomaṃ snapanaṃ cātra kārayet

'''76.84''' māsādūrdhvaṃ vihīne tu jalasaṃprokṣaṇaṃ kuru nityahomavihīne cedanāvṛṣṭirbhaviṣyati

'''76.85''' ekasaṃdhivihīne tu hunetpāśupataṃ śatam saṃdhidvayavihīne tu mūlenaiva śataṃ hunet

'''76.86''' tathā triyambakenaiva homaṃ pūrvavadācaret ekāhe tu vihīne ca pañcabrahmaṣaḍaṅgakaiḥ

'''76.87''' aṣṭottaraśataṃ hunenmantrairetaiḥ pṛthak pṛthak pañcāhe tu vihīne tu snapanaṃ kārayettataḥ

'''76.88''' mūlenaiva śataṃ hutvā snapanaṃ śāntihomakam hutvā pāśupatenaiva japetpañcaśataṃ punaḥ

'''76.89''' sāyarakṣāvihīne tu yajamānāya nāśanam snāpayetpañcagavyaiśca cārcanoktaṃ samarcayet

'''76.90''' sāyarakṣāvidhānoktaṃ kṛtvā mūlaṃ śataṃ hunet nīrājanavihīne ca durbhikṣaṃ grāmavāsinām

'''76.91''' liṅgaṃ vā kautukaṃ vāpi snāpayetpañcagavyakaiḥ arcanoktaṃ samabhyarcya puṇyāhaṃ vācayettataḥ

'''76.92''' śivamantraṃ śataṃ japtvā nīrājanamataḥ param dvārapūjāvihīne ca sasyānāṃ nāśanaṃ bhavet

'''76.93''' dvārasthadevatānāṃ ca mantraireva pṛthak pṛthak gandhapuṣpādibhiścaiva pūrvavatsaṃprapūjayet

'''76.94''' nityotsavavihīne tu dhānyanāśaṃ vinirdiśet sandhyaikena vihīne tu snāpayetpañcagavyakaiḥ

'''76.95''' mūlamantraṃ śataṃ japtvā cotsavaṃ pūrvavatkuru sandhidvayavihīne tu śāntihomaṃ tu kārayet

'''76.96''' ekāhe cotsave hīne snapanaṃ kārayetprabhoḥ pañcāhe cotsave hīne mūlenaiva śataṃ hunet

'''76.97''' snapanaṃ kārayecchambhoḥ pūjayedvidhipūrvakam daśāhe snapanaṃ kṛtvā śāntihomaṃ tu kārayet

'''76.98''' pakṣe cotsavahīne ca mūrtihomaṃ tu kārayet snapanaṃ kārayecchambhoḥ pūjayettu viśeṣataḥ

'''76.99''' māse nityotsave hīne vidyāṅgairbrahmapañcakaiḥ ṣaḍaṅgairbījamukhyaiśca mantraiścaiva daśākṣaraiḥ

'''76.100''' pratyekaṃ tu śataṃ hutvā mūlenaiva śataṃ hunet tatsaṅkhyākaṃ japaṃ kuryātsnapanaṃ kārayettataḥ

'''76.101''' māsādūrdhvavihīne tu diśāhomaṃ tu kārayet snapanaṃ kārayecchambhoḥ pūjayedvidhipūrvakam

'''76.102''' saukhyahīne viśeṣeṇa mahāmārī pravartate sandhyaike saukhyahīne cetpañcagavyābhiṣecanam

'''76.103''' kṛtvā saṃpūjya deveśaṃ mūlenaiva śataṃ japet sandhidvayavihīne tu śāntihomaṃ tu kārayet

<poem>
ardhamāse
</poem>

===Kapitel 77===

''saptasaptatitamaḥ paṭalaḥ · sakalārcanavidhiḥ''

'''77.1''' vakṣye’haṃ sakalārcāṃ tu sarvābhiṣṭaphalapradām śaucamācamanaṃ snānaṃ sandhyāvandanatarpaṇe

'''77.2''' kṛtvā praviśya harmyaṃ tu pādaśaucaṃ vidhāya ca samyagācamya saṅgṛhya bhasitaṃ vāriṇā saha

'''77.3''' tripuṇḍraṃ vidhinā kṛtvā karanyāsaṃ vidhāya ca tatkareṇa ca saṃyojya śive hyātmānamādarāt

'''77.4''' bhūtaśuddhiṃ sudhāplāvamātmāvāhanameva ca karanyāse ca vinyāso brahmaṇāmīśapūrvakam

'''77.5''' svavigrahakalānyāse tvīśānaṃ mūrdhni vinyaset puruṣaṃ vadane sarvaṃ mālāmantramanusmaran

'''77.6''' anyatpūrvasamānaṃ syādekatriṃśatkalā nyaset antaryāgaṃ tataḥ kṛtvā sthānaśuddhiṃ tato nayet

'''77.7''' viśeṣārghyaṃ ca saṅkalpya gandhapuṣpākṣatairyutam īkṣaṇādyaiścaturbhistu dravyaśuddhiṃ tu pūrvavat

'''77.8''' kṛtvātmānaṃ samabhyarcya mantraśuddhiṃ samācaret dvāraṃ saṃprokṣya cāstreṇa vṛṣamagre samarcayet

'''77.9''' dvārapārśvobhayatrāpi gaṇapaṃ ca sarasvatīm nandinaṃ ca mahākālaṃ gaṅgāhvāṃ yamunāmapi

'''77.10''' saṃpūjyodumbare śastraṃ praviśyāntaḥpuṭaṃ punaḥ dattvā puṣpaṃ ca vāstvīśe dattvārghyodaṃ śirasyatha

'''77.11''' śivasyeśānamantreṇa mālādyamapanīya ca śuddhiṃ kṛtvā vidhānena paṭādyairvodakena vā

'''77.12''' ādhārākhyamanantaṃ ca dharmādharmādyameva ca adhaścordhvacchade padmakarṇike śaktipuñjakam

'''77.13''' vāmādyaṃ hṛdayopetaṃ śivāsanamanusmaran tasminmūrtiṃ samāvāhya vidyādehaṃ prakalpayet

'''77.14''' sadāśivo maheśaśca rudraśceti tridhā mataḥ śivadeha iti prokto vidyādehaḥ sa ucyate

'''77.15''' yā tasya vimalā śaktiḥ śivasya samavāyinī saiva mūrtiḥ kriyābhedātsadāśivatanurmatā

'''77.16''' tathā māheśvarī mūrtiḥ kiṃ tu saumyasvarūpiṇī tadvadraudrī samākhyātā kiṃ tu sograsvarūpiṇī

'''77.17''' āsāṃ kuṇḍalinī śaktiḥ kriyākhyānāṃ tu kāraṇam brahmā viṣṇuśca rudraśca maheśaśca sadāśivaḥ

'''77.18''' ete kāraṇadevāḥ syuḥ kṣetrajñāḥ parikīrtitāḥ brahmaviṣṇvośca mūrtestu māyā kāraṇamiṣyate

'''77.19''' rudreśvarasadeśānāṃ kriyākhyā tanukāriṇī ityevaṃ trividhāḥ proktā rudreśvarasadāśivāḥ

'''77.20''' tasmājjñānamayo dehaḥ śivasya parikīrtitaḥ taddehatrayasiddhyarthaṃ mūrtimādau prakalpayet

'''77.21''' hṛtsaṃpuṭena saṃyojya tasyāṃ brahmāṇi kalpayet kalānyāsaṃ tataḥ kuryāttadvidhānamihocyate

'''77.22''' sadeśe dehasiddhyarthamaṣṭatriṃśatkalā matāḥ rudreśayoḥ śarīrārthamekatriṃśatkalā matāḥ

'''77.23''' aṣṭatriṃśatkalānyāsaḥ prāgeva pratipāditaḥ ekatriṃśatkalānyāse viśeṣaḥ kaścidiṣyate

'''77.24''' ekameva śiro vaktraṃ maheśe rudravigrahe tatreśānena vaktreṇa manunā sakalena ca

'''77.25''' kalātmanā viśiṣṭaṃ tu pūrvavatparikalpayet dhyātvā sadāśivaṃ rūpaṃ taccaturdaśasaṃyutam

'''77.26''' ṣaṣṭhasvarasamopetaṃ bindunādavibhūṣitam sāntaṃ hṛtsaṃpuṭaṃ kṛtvā vidyādehaṃ prakalpayet

'''77.27''' bere sadāśive vāpi liṅge’pyevaṃ samācaret maheśanṛttamūrtyādidhyānaṃ śāntamanusmaran

'''77.28''' pratimālakṣaṇoktaṃ ca maheśamanunā yutam kālāntakagajaghnādirūpaṃ raudramanusmaran

'''77.29''' tanmantreṇa samopetaṃ vidyādehaṃ prakalpayet maheśarudramūrtau ca mantraḥ sadāśive’pi ca

'''77.30''' vidyādehārthamuddiṣṭaḥ sarvatra śiva eva ca āvāhyaḥ sa manurmantroddhāre prāgeva kīrtitaḥ

'''77.31''' tenāvāhya śivaṃ dehatritaye pūrvavartmanā sthāpanādyaṃ tataḥ kuryātpādyādyaṃ ca maheśvare

'''77.32''' gandhaṃ puṣpaṃ ca dhūpaṃ ca dīpaṃ naivedyamapyatha tāmbūlasahitaṃ sarvaṃ niṣkalārcanavannayet

'''77.33''' pañcāvaraṇasaṃyuktaṃ catustridvyekasaṃvṛtau iṣṭāvaraṇasaṃyuktaṃ prāguktavidhinā guruḥ

'''77.34''' parivārayutaṃ cettu baliṃ tasminsamācaret homaṃ nityotsavaṃ cāpi svapradhāne samācaret

'''77.35''' śuddhanṛttaṃ ca yatproktaṃ sarvaṃ prakṛtivannayet dvārapālārcanopetaṃ balihomasamanvitam

'''77.36''' śuddhanṛttaṃ ca hitvānyatkarma vā sarvamācaret pradoṣādau naṭeśasya kuryānnīrājanakriyām

'''77.37''' utsavaṃ snapanaṃ caiva damanārohaṇakriyām pavitrārohaṇaṃ samyakkṛttikādīpameva ca

'''77.38''' saṃvatsarādikhelāṃ ca vasantākhyaṃ tadutsavam māsotsavaṃ tathā māse navanaivedyakarma ca

'''77.39''' prāyaścittaṃ ca jīrṇānāmuddhāraṃ ca gurūttamaḥ devoktamakhilaṃ sarvaṃ devyāścapi samācaret

'''77.40''' kiṃ cāṣāḍhe’śvinīmāse pūrvaphalgunisaṃyute pūrakarmādi kartavyamādiśakterdvijottama

'''77.41''' gaurī māheśvarī mūrtiḥ sadeśe tu manonmanī manonmanyaṇunā mūrtiṃ manonmanyāḥ prakalpayet

'''77.42''' gaurīmantreṇa gauryāstu ṣaḍviṃśatikalānvitām ādiśaktyaṇunā tasyāmādiśaktiṃ prapūjayet

'''77.43''' viśeṣapūjā tenaiva vartanīyeṣṭasiddhaye dinamekaṃ samārabhya saptāhāntaṃ samācaret

'''77.44''' dviguṇaṃ triguṇaṃ vāpi catuḥpañcaguṇaṃ tathā ṣaṭsaptaguṇasaṅkhyātaṃ karmasiddhyantameva ca

'''77.45''' pūjā vaiśeṣikī khyātā pūrvoktaphaladāyinī naimittikaṃ tu nityānte kartavyaṃ cāvirodhataḥ nitye pravartamāne tu yadā naimittikaṃ bhavet

===Kapitel 78===

''aṣṭasaptatitamaḥ paṭalaḥ · viśeṣotsavavidhiḥ''

'''78.1''' athavānyaprakāreṇa utsavaṃ tu vidhīyate dhvajamekaṃ samāropya dhvajārohaṇapūrvakam

'''78.2''' tasminneva dine viprā mandībhūte divākare śrāvayettīrthadivasaṃ gajādyārohitena ca

'''78.3''' caṇḍālena sadāreṇa kuryādghoṣayutena ca tadrātrāveva kartavyaṃ bherītāḍanapūrvakam

'''78.4''' berāgre śūlasaṃyukte devānāvāhya pūrvavat āśrāvya tīrthadivasaṃ grāmādibalivarjitam

'''78.5''' dhāmanyeva vidhāyaivaṃ tasmādgatvā jalāśayam sthaṇḍiladvitayaṃ kṛtvā jalatīre gurūttamaḥ

'''78.6''' ekatra sthāpayecchūlamanyatra kalaśānnyaset navakaiḥ snāpayecchūlaṃ tacchūlamavagāhayet

'''78.7''' praviśya devatāsthānaṃ taddināddvādaśāhake yāgārambhaṃ punaḥ kuryādaṅkurārpaṇapūrvakam

'''78.8''' ekahomasamāyuktaṃ grāmādibalimācaret berayātrāsamāyuktaṃ divasaṃ pratyaharniśam

'''78.9''' pañcame divase tatra sikatā astramantritāḥ vikiretsadanaṃ sarvamantarbāhyavikalpitam

'''78.10''' aṣṭādaśadine prāpte bījanirvāpamācaret tīrthārthaṃ tanniśāyāṃ tu dhāmnastvaṣṭadiśāsvapi

'''78.11''' dhvajānaṣṭau samāropyāṅkitām̐llokeśavāhanaiḥ tadastrāṅkānvṛṣāṅkānvā mūrtipaiśca samanvitam

'''78.12''' tataḥ prabhṛti kartavyaṃ homakarma viśeṣataḥ tadante balidānaṃ syād berayātrāsamanvitam

'''78.13''' evaṃ navadinaṃ kṛtvā daśame tīrthamācaret dhvajānāmaṣṭasaṅkhyānāṃ tadrātrāvavarohaṇam

'''78.14''' kṛtvā taddinamārabhya nānāvādyasamanvitam nānāgānasamāyuktaṃ nānānṛttasamanvitam

'''78.15''' grāmapradakṣiṇaṃ kṛtvā pariveṣaṃ nayetkramāt saptāhamevaṃ kṛtvānte sarvārambhaṃ vivarjya ca

'''78.16''' snāpayenmaunamāsthāya saptāhaṃ tadanantaram caṇḍeśvaraṃ paro nītvā berayātrāmanantaram

'''78.17''' balihomavihīnaṃ tu nayetsaptāhamādarāt caṇḍapūjāsamāyuktaṃ homasnapanasaṃyutam

'''78.18''' tadante kārayettīrthaṃ triśūlena samanvitam dhvajāvarohaṇaṃ kuryāttadrātrau pūrvavartmanā

'''78.19''' berayātrāvihīnaṃ vā vidhimenaṃ samācaret navānnaliṅgaṃ vā kṛtvā dikpālāstrārthameva vā

'''78.20''' taistriśūlena vā kuryādgrāmādau tu balikriyām nityotsavānnaliṅgādidaśa vā parikalpayet

'''78.21''' dvādaśābdāvasānānte dhvajasthāpanameva vā jīrṇādi doṣe taṃ tyaktvā dhvajamanyaṃ niveśayet

===Kapitel 79===

''ekonāśītitamaḥ paṭalaḥ · damanapūjāvidhiḥ''

'''79.1''' caitramāse vidheyā syāddamanārohaṇakriyā pavitraṃ prakṛtiryā syāttadanantaramucyate

'''79.2''' saptamyāṃ vā caturdaśyāṃ gatvā damanakāntikam śodhayitvāstramantreṇa pūjayetsaṃhitāṇubhiḥ

'''79.3''' atha saṃbodhayeddāmaṃ bhavavākyena mantravit haraprasādasaṃbhūta tvamantra saṃnidhībhava

'''79.4''' śivakāryaṃ samuddiśya netavyo’si śivājñayā evaṃ damanamāmantrya saṃrakṣya bhavanaṃ vrajet

'''79.5''' yadi dūraṃ samānīya samūlaṃ mṛttikānvitam punarāropya mṛtpūrṇe pātre saṃsicya vāriṇā

'''79.6''' gṛhe’pyāmantraṇaṃ kāryaṃ pūrvoktavidhinā budhaḥ sāyāhnasamaye prāpte vidadhyādadhivāsanam

'''79.7''' āhṛtya yāgavastūni kṛtasnānādisatkriyaḥ yathāvidhi samabhyarcya bhānuśaṅkarapāvakān

'''79.8''' paścime devadevasya tasya mūlaṃ mṛdā yutam sadyojātena mantreṇa dīpitaṃ hṛdayena vā

'''79.9''' vāmena śirasā vāpi nālaṃ dhātrīmathottare dakṣiṇe bhasma patraṃ ca rūpiṇā śikhayāthavā

'''79.10''' puṃsā vā varmaṇā prācyāṃ sapuṣpaṃ dantadhāvanam phalaṃ mūlena gāyatryā vaiśānyāṃ gandhasaṃyutam pañcāṅgamañjalau kṛtvā dāmaṃ puṣpākṣatānvitam

===Kapitel 80===

''aśītitamaḥ paṭalaḥ · dīkṣāvidhiḥ''

'''80.1''' jvalito hi yathā vahniḥ śuṣkamārdraṃ ca nirdahet tathā śubhāśubhaṃ karma jñānānalena dagdhavat

'''80.2''' cākṣuṣī sparśadīkṣā ca vācikī mānasī tathā śāstrī ca yogadīkṣā ca hautrītyādiranekadhā

'''80.3''' cakṣurunmīlya yattattvaṃ dhyātvā śiṣyaḥ samīkṣyate pāśabandhavimokṣāya dīkṣeyaṃ cākṣuṣī bhavet

'''80.4''' nidhāya dakṣiṇe haste śivaṃ brahmāṅgasaṃyutam saṃspṛśecchiṣyamūrdhādi sparśadīkṣā bhavediha

'''80.5''' tattve cittaṃ samādhāya bṛhyitāntaratejasā uccaretsaṃhitāmantrānvāgdīkṣā ceyamiṣyate

'''80.6''' mānasaṃ vidhimāśritya mānasītyabhidhīyate śāstrasya saṃpradānena śāstradīkṣā samīritā

'''80.7''' yogena yogadīkṣā syācchivatve sā hyavasthitā rajaḥkuṇḍavatī hautrī sā dvibhedā kiloditā

'''80.8''' samāsācca dvidhaiveyaṃ dīkṣā tajjairiheṣyate jñānavatī bhavatyekā kriyāvatyaparā smṛtā

'''80.9''' vinejyānalakarmādi manovyāpāramātrataḥ dīkṣā jñānavatī proktā sadyastattvāvabodhajā

'''80.10''' ijyānalavatī yā tu kriyākauśalasaṃbhavā kriyāvatyatha sānekā nirbījātha sabījakā

'''80.11''' nirbījā tu bhaveddīkṣā samayiputrayoḥ param sabījā tu bhaveddīkṣā sādhakācāryayorapi

'''80.12''' atha nirbījikā dīkṣā proktā sā dviprakārikā ekā nirvāṇadā sadyo dvitīyā dehapātataḥ

'''80.13''' bālabāliśavṛddhastrī bhogabhugvyādhitātmanām bhavennirbījikā dīkṣā samayācāravarjitā

'''80.14''' viduṣāṃ ca samarthānāṃ sabījā parikīrtitā sabījā ca dvidhā bhinnā prathamā śivadharmiṇī

'''80.15''' sādhakācāryayoḥ proktā deśakālādibhedataḥ dharmādharmātmakaṃ karma prāgāgāmi vicitrakam

'''80.16''' saṃcintya śodhyate yatra saivoktā śivadharmiṇī adharmamātrasaṃśuddhau dvitīyā lokadharmiṇī

'''80.17''' nityamātrādhikāraścetsamayinyatha putrake dīkṣā niradhikāraiva naimittikānadhikāriṇī

'''80.18''' sādhakācāryayornityanaimittakāmyakarmasu sarvatraivādhikāritvātsādhikāraiva sā tayoḥ

'''80.19''' yatra rudrapade yogo yogo yatraiśvare pade śikhācchodo na yatrāsti dīkṣā sā samayī dvidhā

'''80.20''' yatra pāśaśikhācchedo yogaḥ śivapade bhavet nirvāṇākhyā tu sā saiva putrake nābhiṣekataḥ

'''80.21''' sādhyamantrābhiṣekācca sādhake sā prakīrtitā sarvavidyābhiṣekeṇa bhavedācāryagocare

'''80.22''' śivasaṃskārasaṃyuktaṃ bhāvayitvā samarpaṇam kriyayā vātha śaktyā vā dīkṣā sā sarvakāmadā

'''80.23''' dīkṣayā mucyate dehī trividhād bhavabandhanāt kuṇḍamaṇḍalasaṃyuktā kriyādīkṣā nikathyate

===Kapitel 81===

''ekāśītitamaḥ paṭalaḥ · bhogāṅgārcanavidhiḥ''

'''81.1''' tanmaṇṭapamalaṅkṛtya vitānaiścaiva darpaṇaiḥ nānāpiṅchasamāyuktaṃ nānādīpasamanvitam

'''81.2''' jātinīlotpalaṃ caiva mallikā kanakāstathā kalhārāmbujadāntaṃ ca hrīberaṃ ca tathaiva ca

'''81.3''' etānyuktāni puṣpāṇi maṇṭapaṃ bhūṣayettataḥ tanmaṇṭapasya madhye tu śayyāmevaṃ prakalpayet

'''81.4''' tatastāmarcayedvidvānyathāvidhipuraḥ saram dharmaṃ jñānaṃ ca vairāgyamaiśvaryaṃ cārcayedguruḥ

'''81.5''' pinākaṃ viṣṭare’bhyarcya valaye kuṇḍalīṃ tathā jñānaśaktiṃ kriyāśaktimicchāśaktiṃ tathaiva ca

'''81.6''' ḍolāyāṃ valaye caiva kuṇḍalyādyarcanaṃ tathā śṛṅkhalāyāṃ vṛṣaṃ caiva binduṃ tadvalaye nyaset

'''81.7''' śuddhavidyāṃ manonmanyā phalakāyāṃ nyasetkramāt bhogaśaktiṃ samabhyarcya pūrvoktavidhinā saha

'''81.8''' vāmādibhiśca saṃpūjya dhūpadīpaṃ samarpayet candanaṃ kuṅkumaṃ caiva rocanāṃ śaśimiśritām

'''81.9''' sarvagandhasamāyuktaṃ vāmapārśve tu vinyaset tāmbūlaṃ mukhavāsaṃ ca himatoyaṃ ca dakṣiṇe

'''81.10''' sarvābharaṇamālyādi vinyasetpuratastathā deveśaṃ pūjayitvā tu pūrvoktavidhinā saha

'''81.11''' dhāmapradakṣiṇaṃ kṛtvā praviśedbhogamandiram pādyamācamanaṃ cārghyaṃ karpūraṃ dīpavad bhramet

'''81.12''' śayyāmañce samāropya devaṃ devīṃ samarcayet tacchaktyā parayā pūjya deveśaṃ paramaṃ śivam

'''81.13''' evaṃ saṃpūjya vidhivatpaścādācamanārghyakam śarkarānnaṃ ca dugdhānnaṃ phalāpūpaṃ tathaiva ca

'''81.14''' pānīyādisamāyuktaṃ naivedyaṃ ca samācaret ācāmārghyaṃ tato dattvā tāmbūlaṃ tu nivedayet

'''81.15''' punarācamya vidhivad dhūpadīpaṃ viśeṣataḥ ārātrikaṃ tato dattvā nīrājanamataḥ param

'''81.16''' bhasmāditālavṛntāntamupacārānpradāpayet vedadhvanisamāyuktaṃ stotradhvanisamanvitam

'''81.17''' śaṅkhadhvanisamāyuktaṃ kāhalaistu samanvitam dīpaṃ saṅkalayeddhīmānnikṣipedyavanikāṃ tadā

'''81.18''' madhyarātre tu śayane śaktiṃ devena yojayet tathānte kṣetrapālaṃ cāpyarcayitvā viśeṣataḥ

'''81.19''' ante śāstāraṃ saṃpūjya janānsvagṛhamāviśet rātryantake viśeṣeṇa śaṅkhasaṃghoṣapūrvakam

'''81.20''' bhogāṅgodvāsanaṃ kṛtvā garbhagahe sadāśivam bhāskarasyodayātpūrve tripādena trināḍikāḥ pūrvavatparisaṃkalpya śivaśāstravidhānataḥ

===Kapitel 82===

''dvyaśītitamaḥ paṭalaḥ · arcakasyāśaucavidhiḥ''

'''82.1''' ārabdhe varaṇe yajñe śrāddhe pākaparikrame tanmadhye sūtakaprāptau sūtadoṣo na vidyate

'''82.2''' utsave homakāle ca pratiṣṭhārcanayostathā nāśaucaṃ madhyame caiva karmāntāśaucamācaret

'''82.3''' rakṣābaddhastu ācāryo hyutsave rogasaṃbhave putraṃ vā śiṣyamanyaṃ vā kārayedyāgakarmaṇi

'''82.4''' dvau tālau kathito hastastaccaturdhanurucyate pañcāśaddhanuḥsīmānte caikavīthyāṃ mṛtau yadi

'''82.5''' tacchavaṃ śīghramuddhṛtya pūjayetpuruṣottama dhvajarohaṇabandhe tu ācāryamaraṇe sati

'''82.6''' anyena deśikenaiva dhvajārohaṇakaṃ kuru dhvajārohaṇamadhye tu āśaucaṃ saṃbhavedyadi

'''82.7''' lokapālānvisṛjyānte āśaucaṃ tu samācaret ekaputrapitṛmātrornāśaśceddhvajabandhane

'''82.8''' dagdhakarmasamāptau tu rakṣāsūtreṇa deśikaḥ avarohādikaṃ kṛtvā yāgānte karma kārayet

'''82.9''' dīkṣito hyekaputrastu mātāpitrormṛtiryadi saṃskārameva kurvīta yajñānte sūtakaṃ bhavet

'''82.10''' śivena dīkṣitasyaivaṃ sūtakapretakaṃ na hi na lipyate malenaiva padmapatramivāmbhasā

'''82.11''' gurustu bandhormaraṇaṃ śrutvā gacchettu tadgṛham putrādikamṛtiṃ dṛṣṭvā snātvā śuddhiṃ śivārcanam

'''82.12''' śivavratadharasyāsya na mṛtaṃ na ca sūtakam kriyānte vidyate kiṃ tu śeṣamante viśudhyati

===Kapitel 83===

''tryaśītitamaḥ paṭalaḥ · śāstṛpratiṣṭhotsavavidhipaṭalaḥ''

'''83.1''' evaṃ lakṣaṇamākhyātaṃ saṃkṣepānmunisattama pratiṣṭhādivasātpūrvaṃ kārayedaṅkurārpaṇam

'''83.2''' maṇḍape sthaṇḍilaṃ kṛtvā bimbāṃstasyopari nyaset ratnanyāsaṃ ca saṃśleṣamoṃkārāddhṛdayena tu

'''83.3''' madhu sarpirdṛśordadyānmadhuvāteti mantrataḥ asunīteti mantreṇa vaiśyavyūhaṃ tu darśayet

'''83.4''' paśūnāmiti mantreṇa savatsāṃ gāṃ pradarśayet bimbaśuddhiṃ tataḥ kṛtvā jale caivādhivāsayet

'''83.5''' prāsādasyāgrataḥ kuryānmaṇḍapaṃ lakṣaṇānvitam vedirmadhye tu kartavyā kuṇḍāni paritaḥ kramāt

'''83.6''' pūrvādiṣu caturdikṣu caturaśraṃ tu kārayet śāṃkare vṛttakuṇḍaṃ tu pūrvavallakṣaṇānvitam

'''83.7''' sarvalakṣaṇasaṃyuktaṃ maṇḍapaṃ tu prapūjayet sthaṇḍilaṃ kārayedvedyāṃ kalpayecchayanaṃ hṛdā

'''83.8''' jalāduttīrya bimbāni śuddhiṃ kṛtvāstramantrataḥ kautukaṃ bandhayeddhīmānpūrvoktavidhinā saha

'''83.9''' kṛṣṇavastreṇa saṃveṣṭya śāyayecchayanopari kumbhaṃ sthāpya śirodeśe vardhanyau dve ca vinyaset

'''83.10''' tatpurastānmahāpīṭhe kumbhaṃ nyasya svamantrataḥ parivāraghaṭānaṣṭau vedibāhye tu vinyaset

'''83.11''' sasūtrānsāpidhānāṃśca savastrānhemasaṃyutān sakūrcāngandhasaṃyuktāṅśuddhatoyena pūritān

'''83.12''' tattanmantraiḥ samāyuktān naivedyāntaṃ pṛthak pṛthak tato homaṃ samārabhya kuṇḍe vā sthaṇḍile’pi vā

'''83.13''' ādhānādivisargāntamagnikāryoktamācaret agnimadhye tu taṃ dhyātvā āsanāvaraṇānvitam

'''83.14''' śāstrutsavavidhiṃ vakṣye śṛṇu samyagjanārdana āyurārogyadhanadaṃ rājarāṣṭravivardhanam

'''83.15''' grāmaśāntikaraṃ puṇyaṃ sarvasaṃpatkaraṃ śubham parasaṃharaṇakaraṃ svarakṣaṇakaraṃ param

'''83.16''' svasenārakṣaṇakaraṃ parasenāpalāyanam māghamāse tu kartavyaṃ somavāradine śubhe

'''83.17''' sarvamāseṣu kartavyaṃ śāstuḥ prārthanamutsavam pakṣāhe vā navāhe vā ekāhe vā samācaret

'''83.18''' ekāhaṃ kautukapūrvaṃ navapakṣāhamutsavam svatantre cālaye kuryādutsavaṃ navakarmaṇi

'''83.19''' ādiśaivena kartavyaṃ vakṣyāmi śṛṇu sāmpratam nityaṃ naimittikaṃ kāmyaṃ svatantrālaya ācaret

'''83.20''' mūlādipañca berāṇāṃ śāsturutsavakarmavit tasmātsarvaprayatnena śasturutsavamārabhet

'''83.21''' ekatripañcasaptāhanavāheti prabhedakam ekāhaṃ śaivamityuktaṃ triyahaṃ gauṇamucyate

'''83.22''' pañcāhaṃ bhautikaṃ nāma saptāhaṃ bhauvanaṃ smṛtam navāhaṃ śāntikaṃ nāma pañcadhā parikalpyate

'''83.23''' tattanmāsadine vāpi pakṣe navadine’pi vā ādau tīrthaṃ viniścitya adhivāsanamārabhet

'''83.24''' utsavaṃ trividhaṃ proktaṃ dhvajārohaṇapūrvakam bherītāḍanapūrvaṃ ca aṅkurārpaṇapūrvakam

'''83.25''' bho śāstṛdeva deveśa samastaphalasādhaka śāstāramitthaṃ saṃbodhya vijñāpanamathācaret

'''83.26''' mahotsavaṃ kariṣye’haṃ tatra saṃnihito bhava iti vijñāpya deveśaṃ labdhānujñastato guruḥ

'''83.27''' bhūtacaṇḍamalaṃkṛtya gṛhṇīyātkarālāstrakam mṛdāṃ sthānaṃ ca saṃprāpya pūrvavanmṛdamāharet

'''83.28''' maṇḍapeśānadeśe tu śālitaṇḍulameva ca vikīrya pālikābhiśca āvṛtaṃ somakumbhakam

'''83.29''' pratiṣṭhāpya tu tatpārśve nyasedrohiṇikumbhakam mudgamāṣakulutthāṃśca tilasarṣapamāḍhakam

'''83.30''' yavagodhūmaśālīṃśca gṛhṇīyānnavabījakam śivamantreṇa kṣīreṇāplāvayedabhimaṃtrya ca

'''83.31''' bhūtāṣṭakaṃ ca daivatyaṃ bhavādayaśca devatāḥ pālikādevatāḥ proktā arcayettu viśeṣataḥ

'''83.32''' pūjayenmūlamantreṇa madhyamaṃ somakumbhakam aṅkuraṃ pūrvavatproktaṃ dhvajādhivāsamācaret

'''83.33''' tatpaṭaṃ ṣoḍaśahastamathavā tu caturdaśa dhvajadaṇḍasamaṃ dīrghaṃ dviguṇaṃ dhvajarajjukam

'''83.34''' vistāreṇa samaṃ pucchaṃ tadardhaṃ śikharaṃ tataḥ tatpaṭaṃ pañcadhā bhajyaṃ madhye tu gajavāhanam

'''83.35''' lekhayettatra daṇḍe tu bandhayecca viśeṣataḥ bhūtāṃśca turagāṃścaiva chatracāmarasvastikam

'''83.36''' dhūpadīpaṃ ca mālyaṃ ca tatpaṭe pañcadhā kṛte kramukaṃ veṇudaṇḍaṃ vā skandhatrayasamanvitam

'''83.37''' yaṣṭinā saṃghaṭitvā tu valaye madhyake nyaset śatadarbhakṛtaṃ kūrcaṃ yaṣṭyagre viniveśayet

'''83.38''' darbhamālāsamāyuktaṃ kiṅkiṇīmālayā yutam evaṃ paṭaṃ samāpādya netronmīlanamācaret

'''83.39''' evaṃ dhāmni samāpādyamadhivāsavidhiṃ śṛṇu tasyaiva purataḥ sthāpya gajayāgādhivāsanam

'''83.40''' maṇḍapādi yathāpūrvaṃ kiṃcidbhedaṃ viśeṣataḥ gajavāhaṃ pratiṣṭhāpya śāstraṣṭaparivārakam

'''83.41''' śaktyā ca saṃhitaṃ beraṃ kumbhaṃ saṃsthāpya pūrvataḥ dhvajadaṇḍaṃ dīpadaṇḍaṃ saṃnidhau purataḥ sthitau

'''83.42''' yāgaśālābalisthānapūrvasthāneṣu pūjayet caturdhā sthaṇḍilaṃ samyak śāstroktamatha kalpayet

'''83.43''' nyastvā kārakabhūtāstraṃ tadagre tatpaṭaṃ nyaset tadagre vinyasetkumbhaṃ śāstre’ṣṭaparikumbhakān

'''83.44''' tadagre vinyasedbherīṃ sarvalakṣaṇasaṃyutām krameṇaiva samabhyarcya gandhapuṣpādibhistataḥ

'''83.45''' bherīkumbhāntare homaṃ kuṇḍe vā sthaṇḍile’thavā prāguktavidhinā kuryāccoṣṇīṣādīnniveśayet

'''83.46''' astraṃ tu devatāmānaṃ kṛtvā prāguktavartmanā bherīṃ saṃtāḍya saṃgṛhya tribhirmantraistu tāḍayet

'''83.47''' āhūya divyagān paścācchuddhapāraśivastataḥ puṣpāñjaliṃ samabhyarcya bherīṃ niṣpīḍya pūjayet

'''83.48''' uddhṛtya bherīṃ ghoṣeṇa devatāhvānataḥ kramāt grāmapradakṣiṇaṃ kṛtvā saṃdhyāhvānaṃ tataḥ param

'''83.49''' devatāvāhanaṃ kṛtvā saṃdhyāvāhanamācaret saṃdhidevānsamāvāhya brahmādīśāntamarcayet

'''83.50''' svasvanāmnā tu pūjāyāmāsanārcanakarmaṇi saṃdhopacāraḥ kartavyaḥ pratisaṃdhyaṃ prapūjayet

'''83.51''' tālo rāgaśca nṛttaṃ ca gītaṃ vādyaṃ ca pañcadhā etaiḥ pañcopacāraiśca sandhidevānprapūjayet

'''83.52''' saikate sthaṇḍile vāpi homaṃ kuryādvicakṣaṇaḥ homopakaraṇadravyaṃ samidannājyameva ca

'''83.53''' palāśakhadirāśvatthavaṭodumbarabilvakam arkaḥ śamī ca plakṣaśca ājyena samabhiplutam

'''83.54''' śatairvātha tadardhairvā pañcaviṃśatikena vā ṣoḍaśabhirathavā kuryātsaṃkhyayā deśikottamaḥ

'''83.55''' vedādimantramuccārya śāstṛgāyatrimantrataḥ brahmaṣaḍaṅgamantreṇa pratyekaṃ juhuyātkramāt

'''83.56''' ādhānādivisargāntamagnikāryoktamācaret agnimadhye tu taṃ dhyātvā āsanāvāhanārcanam

'''83.57''' samidājyacarūm̐llājām̐llājacūrṇaṃ yavaṃ tilam apūpaṃ pippalīpatraṃ veṇujaṃ tvatha māṣakam

'''83.58''' sadyādīśānaparyantaistanmantraiścaiva homayet pratyekaṃ śatamardhaṃ vā hutvā sviṣṭāntamācaret

'''83.59''' athavā mūrtimantreṇa māṃsahomaṃ samācaret māṃsaṃ pratyāmadravyeṇa śuddhānnaṃ homayecchatam

'''83.60''' athavā mūlamantreṇa sahasraṃ vā śatāṣṭakam tattatsvanāmamantreṇa homayenmantrapūrvakam

'''83.61''' pūrvadravyasamāyuktaṃ homaṃ mantrī samācaret vahnerbījaṃ samādāya kumbhamadhye tu yojayet

'''83.62''' saurādigajapūjāntaṃ pūrvavatpūjayedbudhaḥ viśeṣamiha kartavyaṃ gajayāgavaśānnayet

'''83.63''' dhvajadaṇḍādikaṃ kṛtvā yātrābere samācaret daṇḍārcanakramaṃ vakṣye śṛṇu samyagjanārdana

'''83.64''' āhūya sarvadevāṃśca tattatsvanāmamantrakaiḥ vighneśvarasya pūjāṃ ca sakalasya viśeṣataḥ

'''83.65''' puṇyāhaṃ caiva kartavyaṃ mantraiḥ prokṣya śivāmbhasā karaśuddhiṃ karanyāsamaṅganyāsamataḥ param

'''83.66''' prokṣayeddaṇḍamabhyarcya arcayenmantrapūrvakam pūrvāhṇe vā parāhṇe vā rātrau vāropayettataḥ

'''83.67''' naivedyaṃ dāpayitvā  tu dhūpadīpasamāyutam āsthānamaṇḍapaṃ tattu yātrāberaṃ nayettataḥ

'''83.68''' naivedyaṃ dāpayetpaścādārātrikamathācaret yāgasya maṇḍapaṃ kṛtvā caiśānye vāgnigocare

'''83.69''' vāruṇyāṃ saṃnidhau vāpi kartavyo yāgamaṇḍapaḥ pañcaṣaṭsaptahastairvā ṣoḍaśastambhasaṃyutaḥ

'''83.70''' madhye vediṃ tataḥ kuryātsamyag dvitricatuṣkarām upavedi tataḥ kuryāddvitriyaṅgulakāśrayām

'''83.71''' vedibāhye tu paritaḥ pañca kuṇḍāni kārayet ekāgnirvātha kartavyo vṛttakuṇḍaṃ mahāgnaye

'''83.72''' vedimadhye viśeṣeṇa bhārapañcakaśālibhiḥ tadardhaistaṇḍulaiścaiva tadardhaiśca tilairapi

'''83.73''' lājaistadardhaiḥ saṃyuktaṃ darbhaiḥ puṣpaiḥ paristaret tanmadhye nalinaṃ likhya sāṣṭapatraṃ sakarṇikam

'''83.74''' arcayedgandhapuṣpaiśca śrīṃ klīṃ bījena saṃyutam dhūpadīpaṃ dadetpaścādyāgeśārādhanaṃ kramāt

'''83.75''' śṛṇu kuṇḍasamīpasthaṃ homopakaraṇāni ca kuṇḍasya kṛtvā saṃskārān vīkṣaṇādyānvidhīritān

'''83.76''' aṣṭādaśa ca saṃskārānāsanaṃ tatra vinyaset vāgīśīvākpatī pyarcya āvāhya śāstṛmūrtivat

'''83.77''' agnimadhye samāvāhya tatparīvārakaiḥ saha samidājyacarūm̐llājānsarṣapaṃ ca yavaṃ tilam

'''83.78''' madgaṃ māṣaṃ kulutthaṃ ca mūlamantreṇa homayet aṣṭottaraśataṃ vātha tadardhaṃ vā tadardhakam

'''83.79''' meṣakukkuṭamāṃsaṃ vā homakarma samācaret pratyāmnātahaviṣyaṃ vā ājyamiśreṇa homayet

'''83.80''' pañcabrahma ca mūlaṃ ca ṣaḍaṅgaṃ ca hunetkramāt homānte pratisaraṃ baddhvā śāstāraṃ saśaktiṃ nyaset

'''83.81''' astramūrtiṃ nyasettatra pratisaraṃ bandhayettataḥ taṇḍulaṃ kautukaṃ caiva nālikeraṃ tathaiva ca

'''83.82''' sthalikopari tāmbūlaṃ savastrācchādanaṃ nyaset paricāramūrdhanyādāya prākāraṃ saṃparikramet

'''83.83''' śāstuḥ saṃnidhimāgatya tripādyupari vinyaset vighneśaṃ pūjayettatra saṃkalpya ca sa buddhimān

'''83.84''' puṇyāhaṃ vācayettatra prokṣayecchāstṛmūrtiṣu prāṇānāyamya mūlena karāṅganyāsamārabhet

'''83.85''' kautukaṃ brahmamantreṇābhyarcya śāstṛmantravit nirīkṣaṇāvakuṇṭhane padmadhenū pradarśayet

'''83.86''' dhūpadīpaṃ dadetpaścācchāstṛmūrtiṃ samarcayet layabhogāṅgaṃ sāṅgaṃ ca arcayenmūrtibimbavat

'''83.87''' śāstṛbrahmāṅgaṃ vinyasya mūrdhādipadāntaṃ nyaset āvāhanādiṣaṇmudrāstataḥ saṃdarśayetsudhīḥ

'''83.88''' dattvā dhūpaṃ ca dīpaṃ ca kautukaṃ bandhayettataḥ triyambakena mantreṇa bṛhatsāmeti mantrataḥ

'''83.89''' viśvettāte ṛcā caiva kautukaṃ bandhayetkramāt arghyaṃ dadyādviśeṣeṇa naivedyaṃ dāpayettataḥ

'''83.90''' ārātrikaṃ tataḥ kuryātṣoḍaśairupacārakaiḥ śuddhaṃ bhasma tato dattvā bhaktebhyo dāpayettataḥ

'''83.91''' bandhanānte baliṃ dadyātpratimābalimeva ca meṣakukkuṭamahiṣamadhumatsyāṃstathaiva ca

'''83.92''' athavānyaprakāreṇa apūpaṃ tilacūrṇayuk rātricūrṇaṃ ca kūśmāṇḍaṃ balidāne viśeṣataḥ

'''83.93''' candanaṃ raktapuṣpaṃ ca dhūpadīpaṃ pradāpayet mūlamantreṇa tṛptyarthaṃ dineśānāṃ yathāvidhiḥ

'''83.94''' yakṣeśaṃ pūrvataḥ sthāpya rākṣasaṃ vahnigocare yāmye paiśācakaṃ sthāpya bhūtaṃ nyasya tu nairṛte

'''83.95''' gandharvaṃ paścime sthāpya vāyavye kinnaraṃ tathā daityeśaṃ kalpayetsome vidyādharaṃ tu śāṅkare

'''83.96''' puruṣo vāthavā strī vā tailaṃ rātrau tu dāpayet tatkāle sarvalīlāśca janaiḥ sarvaiḥ sahaiva tu

'''83.97''' avabhṛthasnānaṃ kartavyaṃ janānāṃ pāpaśāntaye praviśya bhavanaṃ paścāttato yāgagṛhe guruḥ

'''83.98''' yāgeśvaraṃ samabhyarcya yāgahomaṃ samācaret prāyaścitte viśeṣeṇa homaṃ kuryādvicakṣaṇaḥ

'''83.99''' aṣṭottaraśataṃ vāpi pañcāśatpañcaviṃśatīḥ dravyānte vyāhṛtīrhutvā sarvadravyasamāyutam

'''83.100''' cittādiṃ ca yajādiṃ ca homayettu viśeṣataḥ sviṣṭamagneti mantreṇa hunetpūrṇāhutiṃ tadā

'''83.101''' abhyukṣya srucamastreṇa sarpiṣāpūrya tadbilam praṇavena tataḥ puṣpaṃ sākṣataṃ sakuśaṃ sruci

'''83.102''' vinyasya sruvamāropya tanmadhye cāpyadhomukham daṇḍamūlāgrayoḥ paścādgṛhītvā sruksruvau tu tau

'''83.103''' savyetarābhyāṃ pāṇibhyāṃ vinyasyāsyaṃ tu śaṅkhavat ṛjukāyaḥ samutthāya sthitaḥ samapadānvitaḥ

'''83.104''' nābhidaghnaṃ tayoḥ kṛtvā mūlaṃ tu karayostataḥ dakṣiṇetarayoḥ kuryādunnatyavanatiṃ tayoḥ

'''83.105''' yathā dhārāgnimadhye tu patatītyekadhā sudhīḥ pūrṇāṃ devāṇunā hutvā mantrī samyaksamāpayet

'''83.106''' bhasmābhivandanaṃ kṛtvā nāḍīsaṃdhānamārgataḥ vahnidevasya mantrāṃśca kumbhasthāndevaśūlayoḥ

'''83.107''' śivāgniṃ ca visṛjyātha kumbhamapyastravardhanīm lokeśadvārapālādīnvisṛjetsakalānapi

'''83.108''' pūrṇāhutiriti proktā dakṣiṇādānapūrvikā dakṣiṇā trividhā proktā pañcaniṣkādhamā bhavet

'''83.109''' triguṇā daśaniṣkā vā triguṇā deśikasya tu vittānusāraṇaṃ kṛtvā vastrahemāṅgulīyakaiḥ

'''83.110''' ācāryaṃ mūrtipāṃścaiva saṃpūjya paritoṣayet kumbhābhiṣekakāle tu mūlaberābhiṣecanam

'''83.111''' atha yāgeśakumbhaṃ ca paritaḥsthāṃśca kumbhakān utthāpya mūladevāgre sthāpayitvā yathā talam

'''83.112''' kumbhamādāya bere tu yojayeddeśikottamaḥ parivāraghaṭānpīṭhe pādasthāne’bhiṣecayet

'''83.113''' kumbhābhiṣecanaṃ proktaṃ śuddhasnānārcanaṃ śṛṇu kuryādekonapañcāśatpañcapañcaghaṭāṃstu vā

'''83.114''' ṣoḍaśasnapanaṃ vātha navapañcaikameva vā pañcāmṛtādibhirgavyaiḥ pūjā vaiśeṣikī tathā

'''83.115''' gandhaṃ puṣpaṃ ca dhūpaṃ ca dīpaṃ dadyādyathākramam naivedyaṃ bahudhā kṛtvā upadaṃśasamanvitam

'''83.116''' tāmbūlaṃ dāpayetpaścāccheṣaṃ pūrvavadācaret vijñāpanaṃ tathā kṛtvā  tvatprasādātkṛtastvayam

'''83.117''' nirastākhilavighnastu mayā nirvartitotsavaḥ samāhitākhilābhīṣṭaphalado bhavatu dhruvam

'''83.118''' prārthayedabhisaṃpūjya śāstāraṃ svasti nāthakam bhavedabhīṣṭaphaladam evaṃ vaiśeṣikārcanam

'''83.119''' dhvajāvarohaṇaṃ kuryāccaṇḍayāgamataḥ param lokeśānāṃ tataḥ paścādaktasthāne baliṃ kṣipet

'''83.120''' visṛjya dikpatīnante mahāpīṭhe baliṃ kṣipet pādaprakṣālanaṃ kṛtvā praviśedbhavanaṃ tataḥ

'''83.121''' iti yaḥ kārayedbhaktyā śāstrutsavamanuttamam pratyabdaṃ ca viśeṣeṇa śāsturutsavamācaret

'''83.122''' brahmakṣatriyaviṭśūdrāḥ pūjayettu viśeṣataḥ viṣvādimakarāntaṃ vai pūjayetsarvamācaret

'''83.123''' saṃvatsarotsavaṃ kuryānmāsi māsotsavaṃ kramāt induvāraṃ samārabhya saṃprārthyotsavamācaret

'''83.124''' sarvalokahitaṃ puṇyaṃ sarvadevapriyārthakam sarvaśatrukṣayakaraṃ sarvopadravanāśakam

'''83.125''' bhūtebhyaśca piśācebhyo rākṣasebhyaśca nirbhayam mucyate sarvapāpebhya ihaiva dhanavānbhavet sarvānkāmānsa bhuktvānte śivaloke ciraṃ vaset

===Kapitel 84===

''caturaśītitamaḥ paṭalaḥ · ācāryalakṣaṇavidhiḥ''

'''84.1''' ācāryalakṣaṇaṃ vakṣye dvividhaṃ cocyate kramāt sthūlasūkṣmaprabhedena kathayāmi samāsataḥ

'''84.2''' sthūlaṃ dehādikaṃ proktaṃ sūkṣmamātmādikaṃ tathā ātmanā yajanaṃ yattanmuktidaṃ caiva suvrata

'''84.3''' viditvā tu mahāprājñamācāryaṃ pūjayetsadā jñānaṃ dhyānaṃ ca svādhyāyastapaḥ karma tathaiva ca

'''84.4''' eta pañca mahāyajñā mayā proktā yathākramam pañcānāmapi yajñānāṃ mayādau paribhāṣitau

'''84.5''' dvau caivamuktau tau jñeyau guṇāvātmasamudbhavau śeṣāḥ kṣudraphalā jñeyā yatnajāste śarīriṇām

'''84.6''' sthūlaṃ tasmāccharīraṃ syātsūkṣmamātmeti kīrtitam tasmātprājñena samyaktu nāvekṣyaṃ sthūlalakṣaṇam

'''84.7''' sūkṣmalakṣaṇamevātra hyupādeyaṃ sudurlabham kāśmīraḥ kausalaḥ kāñcīkāverīkoṅkaṇodbhavāḥ

'''84.8''' kāliṅgaḥ kāmarūpaśca kāśīdeśasamudbhavaḥ kunakhī vāmanaḥ kubjaḥ śipiviṣṭaśca kāṇakaḥ

'''84.9''' akālapalito yastu kharvāṅgo danturastathā aṅgahīnaśca dīrghaśca sthūlo hrasvastathaiva ca

'''84.10''' ahaṃkārasamopetaḥ krodhena ca samānvitaḥ agnido garadaścaiva bhūmihartā tathaiva ca

'''84.11''' lubdhaśca kanyāhārī ca mṛṣāvādī tathaiva ca garvī ca śastrapāṇiśca dhanuḥśāstrarato naraḥ

'''84.12''' atyāśī vyādhakarmā ca māṃsabhakṣaṇatatparaḥ madyādisevakaścaiva mānī tārkita eva ca

'''84.13''' kāvyeṣvatirataścaiva dīnātmā vipranindakaḥ kramadīkṣāvihīnaśca yuddhakārī tathaiva ca

'''84.14''' apūjyo nirdayaścaiva dehapoṣaṇatatparaḥ āgamācārarahito rāgī vārdhuṣikastathā

'''84.15''' gaṇakaḥ sāhasī caiva dyūtakārī tathaiva ca bhiṣaktantropajīvī ca bhūtatantropajīvakaḥ

'''84.16''' piśunaśca kṛtaghnaśca gurudrohī samatsarī krūraḥ parasvahārī ca pāpakarmarato naraḥ

'''84.17''' eṣu sarve’pi na tyājyā ete doṣasamanvitāḥ deśajairapi yuktā ye śubhalakṣaṇasaṃyutāḥ

'''84.18''' ātmadoṣasamopetā hyanye tyājyāstu sarvathā kāśmīrādyāstu ye doṣāḥ kunakhādyāstathaiva hi

'''84.19''' na tyājyā guṇasaṃpannairgurubhistattvavidvaraiḥ ahaṃkārādayo doṣā vartante yasya cātmanaḥ

'''84.20''' sa eva ninditaḥ prokto gururdeśikakarmaṇi karmavāndeśakālajñaḥ kṛpālustantrapāragaḥ

'''84.21''' kulīnaḥ satyavādī ca śivabhakto jitendriyaḥ sarvabhūtahitaḥ śānto yatātmā satyasaṃyutaḥ

'''84.22''' dambhalobhavinirmuktaḥ śaucācārasamanvitaḥ adrohī sarvabhūteṣu putravānmohavarjitaḥ

'''84.23''' yadṛcchālābhasaṃtuṣṭo nipuṇo lekhyakarmaṇi aśaṭhaḥ priyavādī ca kṛtajñaḥ prītamānasaḥ

'''84.24''' guṇatrayavibhāgajñaḥ sarvabhūtahite rataḥ śrīmānagarvī nipuṇaḥ śivabhaktajanapriyaḥ

'''84.25''' alolupaḥ śucirchīmānprītiprabhṛtisaṃyutaḥ tattvajño jñānavitprājño hyadhvalakṣaṇasaṃyutaḥ

'''84.26''' kālajñānī kriyāyukto vedavedāṅgapāragaḥ pratiṣṭhātantratattvajño vāstukarmakṛtaśramaḥ

'''84.27''' gurubhakto dṛḍhaḥ śūro jñānacaryākriyāyutaḥ adṛṣṭārthī bahujñānaścānasūyo dṛḍhavrataḥ

'''84.28''' evaṃvidho mahāprājño deśikaḥ śreṣṭha ucyate aviśeṣeṇa yaccittaṃ sarvajantuṣu sadravam

'''84.29''' sa eva deśikaḥ prokto mayā tattvārthavedakaḥ ācāryaṃ śivamevāhuḥ śivastvācārya ucyate

'''84.30''' abhedaṃ yo vijānīyātsa vai vedaviducyate sthāvaraṃ jaṅgamaṃ caiva dvividhaṃ śivamucyate

'''84.31''' śivaṃ tu sthāvaraṃ proktamācāryaṃ jaṅgamaṃ viduḥ pratiṣṭhādyarcanāntaṃ tu jaṅgamenaiva kārayet

'''84.32''' ācāryaputraḥ pautro vā dauhitro vā viśeṣataḥ liṅgasthāpanamukhyatvāttenaiva sthāpya pūjayet

'''84.33''' niṣkalātsakalo jātastathācāryāttu putrakaḥ sa putro jñānayuktaścedaṅgadoṣaṃ na lakṣayet

'''84.34''' anācāryakule jātām̐llakṣayettantravittamaḥ aṅgadoṣeṇa yuktāścedvarjayettān prayatnataḥ

'''84.35''' kuryādācāryaputraścedrājarāṣṭrasukhāya ca yajamānābhivṛddhyarthaṃ taddeśasyābhivṛddhaye

'''84.36''' aṅgadoṣo na doṣaḥ syāddoṣaḥ syādātmadoṣakaḥ ahaṅkārādayo doṣā vartante yasya cātmanaḥ

'''84.37''' taddoṣāṃstu parīkṣyaiva varjayettaṃ prayatnataḥ ācāryaputrakasyaivamanyeṣāṃ na vidhīyate

'''84.38''' śarīralakṣaṇaṃ tatra nāvekṣyaṃ hṛdayasya tu bhūtānāṃ tu vikāreṇa hyaṅgavaikalyatāyayau

'''84.39''' devānāmapi sarveṣāṃ prasiddhā tvaṅgahīnatā devatānāṃ niyogena ṛṣīṇāṃ tu bhavediha

'''84.40''' ekapādo’bhavalloke hyajākhyo nāma śāṅkaraḥ so’pi vai dīkṣitaḥ pūrvamācāryatvamupāgataḥ

'''84.41''' sūryayantā ca saṃpannaḥ pādahīno mahābalaḥ aṣṭaiśvaryasamopeto dīkṣāyuktaḥ purātanaḥ

'''84.42''' so’pi saṃtānasaṃpanno madbhaktaḥ kāśyapātmajaḥ vainateyo mahābhaktaḥ pāṇihīno na kutsitaḥ

'''84.43''' maddīkṣayā ca saṃpanno deśiko deśikottama ahalyājāradoṣeṇa vṛtrahāpi virūpavān

'''84.44''' mayā ca dīkṣitaḥ so’pi ācāryatvamupāgataḥ rājayakṣmagṛhītaḥ saṅśaśī pūrvayuge tathā

'''84.45''' matpriyatvānmahābhāgo dīkṣāsaṃpannatāṃ yayau pitāmaho mahāprājño mayā chinnaśirāḥ purā

'''84.46''' tasyāpi karuṇārdreṇa mayā dīkṣā prayojitā saṃpannāśca tayā devā vedyāḥ sarve purātanāḥ

'''84.47''' atha kiṃ bahunoktena purā śakrapurogamāḥ hiraṇyakaśiporvegādvikalāṅgā mahābalāḥ

'''84.48''' bhūmiṃ gatā mahāvīryāḥ pracchannākṛtayastadā kāle mahati nīte ca madbhaktatvamupāgatāḥ

'''84.49''' teṣāmanugrahārthaṃ ca ācāryatvamupāgataḥ ācāryamūrtimāsthāya teṣāṃ pāśaṃ vyadārayam

'''84.50''' tena muktā mahāghorān divi daityānvyadārayan iyaṃ tu devatāvasthā munīnāmapi bodhata

'''84.51''' aṣṭāvakro mahāprājño hyātmasaṃpatsamanvitaḥ bhaktiśraddhāsamopetaḥ sarvabhūtahite rataḥ

'''84.52''' taṃ vīkṣya kṛpayā samyagdīkṣāṃ tasmai hyadāmaham so’pi saṃpattiyuktaśca śiṣyavargamathākarot

'''84.53''' paitāmaho mahātejā agastyo munisattamaḥ aṅguṣṭhamātrakāyo’pi cetaḥsaṃpatsamṛddhimān

'''84.54''' ācāryakaraṇe dakṣo dīkṣayā ca samanvitaḥ pratiṣṭhātantratattvajño macchiṣyaḥ śīlavānsvayam

'''84.55''' anye ca bahavo mukhyāḥ vālakhilyo mahātapāḥ dīkṣāsaṃpannamānī ca deśikatvamupāgataḥ

'''84.56''' atha kiṃ bahunoktena nāpekṣyaṃ kāyalakṣaṇam ātmalakṣaṇamevātra saṃgrāhyaṃ tattvakovidaiḥ

'''84.57''' tasmātsarvaprayatnena ātmasaṃpatsamanvitam ācāryaṃ pūjayennityaṃ śāstradṛṣṭena buddhimān

===Kapitel 85===

''pañcāśītitamaḥ paṭalaḥ · śraddhotsavavidhiḥ''

'''85.1''' utsavasya vidhiṃ vakṣye śṛṇuṣvaikāgramānasaḥ sāyujyaṃ caiva saubhāgyaṃ saukhyaṃ maṅgalameva ca

'''85.2''' yajamānecchayā kāle utsavaṃ tu samācaret etatsāyujyamityuktaṃ saubhāgyaṃ ca tataḥ śṛṇu

'''85.3''' dhvajahomabalīnkṛtvā berayānaṃ samācaret saubhāgyaṃ tviti vikhyātamadhunā saukhyakaṃ śṛṇu

'''85.4''' balihomena saṃyuktaṃ berayānaṃ samācaret saukhyametatsamuddiṣṭaṃ maṅgalaṃ tvadhunā śṛṇu

'''85.5''' dhvajahomau baliryānaṃ yuktaṃ maṅgalamucyate ārdrāpuṣyamaghāścaiva uttarā caitrameva ca

'''85.6''' viśākhā mūlamāṣāḍhaṃ śravaṇaṃ pūrvabhādrakam aśvinī cāgninakṣatramārdramāsāditaḥ kramāt

'''85.7''' tīrthāhaṃ parvasaṃyuktamayuktaṃ vā samācaret dvivāre tvekanakṣatre bhāskarasyodaye sati

'''85.8''' tannakṣatramahorātraṃ tīrthakāryaṃ samācaret yāmahīnaṃ yathā ṛkṣaṃ pūrvarkṣe tīrthamācaret

'''85.9''' ārdrāntaṃ sarvamāseṣu viṣuve grahaṇāntake anyapuṇyadinānte ca utsavaṃ kārayedbudhaḥ

'''85.10''' navāhamuttamaṃ proktaṃ saptāhaṃ madhyamaṃ smṛtam pañcāhamadhamaṃ proktamutsavaṃ saṃprakīrtitam

'''85.11''' pañcasaptanavāhe tu saubhāgyaṃ saukhyamācaret saptāhe ca navāhe ca maṅgalaṃ tu samācaret

'''85.12''' viśeṣātpūjanaṃ kṛtvā berayānaṃ samācaret yātrārthasnapanaṃ kuryātsaṃdhyaikayā samācaret

'''85.13''' tadante śāntihomaṃ ca bhūri cānnaṃ nivedayet sāyujyakamiti proktaṃ pañcāṅgamiti kīrtitam

'''85.14''' tato’ṅkurārpaṇaṃ kuryādrakṣābandhamataḥ param vāstuśuddhiṃ tṛtīyāṃ tu berayānaṃ caturthakam

'''85.15''' pañcamaṃ pariveṣaṃ tu ṣaṣṭhaṃ nṛttāvalokanam yātrārthaṃ snapanaṃ paścādviśeṣayajanāṣṭamam

'''85.16''' navamaṃ śāntihomaṃ ca tīrthādhivāsanaṃ param ekādaśaṃ cūrṇakarma dvādaśaṃ tīrthakarmakam

'''85.17''' ācāryapūjanaṃ paścāddakṣiṇāṃ ca tataḥ param prāyaścittābhiṣekaṃ ca bhūri cānnaṃ ca ṣoḍaśam

'''85.18''' evaṃ ṣoḍaśakāṅgaṃ tu saubhāgyamiti kīrtitam bījanirvāpaṇaṃ pūrvaṃ rakṣābandho dvitīyakaḥ

'''85.19''' tṛtīyo bherīghoṣaśca caturthaṃ vāstuśuddhikam pañcamaścāstrayāgaśca ṣaṣṭhaṃ vai balidānakam

'''85.20''' triyaṃśaṃ balidānaṃ syātsaukhye vijayapuṣkale saptamaṃ berayānaṃ ca pariveṣastathāṣṭamaḥ

'''85.21''' nṛttāvalokanaṃ paścādyānārthasnapanaṃ param viśeṣapūjanaṃ paścāddvādaśaṃ mṛgayānakam

'''85.22''' tīrthādhivāsanaṃ paścāccūrṇakarma tataḥ param pañcadaśaṃ tīrthakarma ṣoḍaśo maunayāgakaḥ

'''85.23''' yāgakumbhābhiṣekaśca dakṣiṇādānakaṃ param saukhyaṃ viṃśatikāṅgaṃ ca utsavaṃ parikīrtitam

'''85.24''' dhvajabheryaṅkurapūrvānmaṅgalaṃ trividhaṃ smṛtam pūrvoktena vidhānena maṅgalaṃ tu samācaret

'''85.25''' caturviṃśatyutsavordhve saubhāgyaṃ vakṣyate kramāt berayātrādinātpūrve saptapañcatriyāhake

'''85.26''' aṅkurāṇyarpayeddhīmānpūrvoktavidhinā saha aṅkurārpaṇakāryaṃ ca varjayetkārayettu vā

'''85.27''' yāgārambhadinātpūrvaniśāyāmadhivāsayet viśeṣeṇa ca yātrārthaṃ kuryātpratisarakriyām

'''85.28''' sauvarṇaṃ rājataṃ vāpi kṣaumaṃ kārpāsakaṃ tu vā sthālīṃ tu taṇḍulaiḥ pūrya tāmbūlaṃ sopadaṃśakam

'''85.29''' tanmadhye vinyasetsūtraṃ bhasmādhārasamanvitam śvetatāmbūlasaṃyuktaṃ pūgabījasamanvitam

'''85.30''' nālikeraphalopetaṃ sthalikordhve tu vinyaset puṇyāhaṃ vācayitvātha prokṣayeddhṛdayena tu

'''85.31''' ātmatattvaṃ nyasetpātre vidyātattvamathākṣate bhasmādhāre tu māyākhyaṃ bhasite lakulīśvaram

'''85.32''' anantaṃ sūtrake nyastvā gandhādyairarcayetkramāt pātramācchādya vastreṇa mālāṃ tadupari nyaset

'''85.33''' paryaṣṭiṃ ca samāhūya soṣṇīṣaṃ sottarīyakam śirasā vāhayitvā tu sarvālaṃkārasaṃyutam

'''85.34''' grāmapradakṣiṇaṃ kṛtvā prāsādasya pradakṣiṇam kārayedvarjayedvātha maheśaṃ pūjayettataḥ

'''85.35''' puṇyāhaṃ vācayedvidvān rakṣāsūtramanuṃ japan triyambakena mantreṇa kautukaṃ bandhayettataḥ

'''85.36''' bhasitaṃ vinyasettatra janebhyo bhasitaṃ dadet tāmbūlaṃ ca pūgaphalaṃ dāpayettu sabhāsadām

'''85.37''' utsavoddiṣṭadevānāṃ kautukaṃ bandhayedbudhaḥ sarvavādyasamāyuktaṃ sarvālaṃkārasaṃyutam

'''85.38''' navavastrairalaṃkṛtya gandhamālyādibhūṣaṇaiḥ harmyapradakṣiṇaṃ kṛtvā viśedāsthānamaṇḍapam

'''85.39''' nīrājanaṃ tato dadyādbhasmāni dāpayettataḥ pariveṣaṃ vinodaṃ ca nṛttādyālokanaṃ kuru

'''85.40''' tatsthāneṣu taraṅgeṇa veṣṭayeddeśikottamaḥ apare divase dhīmānprātaḥ saṃdhyārcanātpurā

'''85.41''' maheśvaraṃ samānīya pūrvasthānaṃ praveśayet vāstuhomaṃ tataḥ kṛtvā paryagnikaraṇaṃ kuru

'''85.42''' tadvāstuśobhanārthāya bhaktānāmutsavaṃ kuru tadrātrāveva kartavyaṃ yānamekaṃ samācaret

'''85.43''' prathame somadhārī ca umārdhaṃ ca dvitīyake tṛtīye vṛṣabhārūḍhaṃ saṃvādaṃ ca caturthake

'''85.44''' pañcame gajahārī ca ṣaṣṭhe śāmbhavameva ca saptame caiva vaivāhyaṃ tripuraghnamathāṣṭame

'''85.45''' navame kālahārī ca prathamādidinaṃ prati devānāmapyalābhe tu somāskandeśvaraṃ nayet

'''85.46''' anyeṣāmapi devānāṃ bhaktānāmutsavaṃ kuru tattaddeveṣu yogyānāṃ vāhanaṃ saṃprakīrtitam

'''85.47''' kalpakuṇḍodarau caiva vṛṣabho mauktikaprabhā gajaśca puṣpadhāmaṃ ca syandanasturagastathā

'''85.48''' śibikā ca tathā proktā vāhanāni dinaṃ prati vāhanānāmabhāve tu śibikāyānamācaret

'''85.49''' mauktikaṃ ca pravālaṃ ca indranīlaṃ tathaiva ca saṃkīrṇaṃ puṣparāgaṃ ca rudrākṣaṃ svarṇameva ca

'''85.50''' māṇikyabhūṣaṇaṃ caiva marakatābharaṇaṃ tathā tadvarṇābhāni puṣpāṇi vastrāṇi tu niyojayet

'''85.51''' tattadvarṇavibhedena gandhādigrahaṇaṃ ca vā kṛṣṇagandhaṃ viśeṣeṇa aṣṭame’hni pradāpayet

'''85.52''' tattadvarṇābhanaivedyaṃ dinaṃ prati dinaṃ prati saptapañcatryahe vāpi ekāhe vā viśeṣataḥ

'''85.53''' pūrve tyaktvā pare proktaṃ devatāvāhanādikam bhūṣaṇānāmabhāve tu svarṇenaiva samācaret

'''85.54''' puṣpāṇāmapyabhāve tu karavīramiti smṛtam vastrāṇāmapyabhāve tu śvetavastramiti smṛtam

'''85.55''' tattadvarṇābhanaivedyābhāve tu śuddhamodanam maheśvaraṃ samabhyarcya vāhanasyopari nyaset

'''85.56''' calāsanaṃ tu saṃkalpya dhūpadīpādikaṃ dadet vīthīsaṃmārjanopetaṃ jalasekasamanvitam

'''85.57''' nānāgānasvaropetaṃ nānānṛttasamanvitam nānādhvajasamopetaṃ piṅchacāmarasaṃyutam

'''85.58''' nānādīpasamāyuktaṃ gaṇikādibhirāvṛtam nānābhaktajanaiḥ sārdhaṃ yānamevaṃ samācaret

'''85.59''' yānakāle tu tāmbūlaṃ dadennānāphalāni ca bhakṣyāpūpādikaṃ dadyātpādyādikavivarjitam

'''85.60''' śanaiḥ pradakṣiṇaṃ kṛtvā sabhāsthānaṃ praviśya ca sthirāsanaṃ tu saṃkalpya bhakṣyādīni nivedayet

'''85.61''' nīrājanaṃ tato dadyāttāmbūlaṃ ca nivedayet pariveṣakramaṃ caiva nṛttāvalokanaṃ kramāt

'''85.62''' yānaṃ pratidinaṃ kuryādaharniśaṃ mahotsave pratisaṃdhyārdanaṃ nityamutsaveśvarapūjanam

'''85.63''' tatparaṃ śāntihomaṃ ca nityotsavamataḥ param tato yānakramaṃ caiva pariveṣakramaṃ tathā

'''85.64''' nṛttāvalokanaṃ paścādyātrārthaṃ snapanaṃ param viśeṣayajanaṃ paścāttato madhyāhnapūjanam

'''85.65''' paścātpradoṣayajanamalaṃkāramataḥ param utsaveśvarapūjāṃ ca tatparaṃ śāntihomakam

'''85.66''' paścānnityotsavaṃ kuryāttato grāmapradakṣiṇam śaktisthāne nivedyaṃ ca rātryāṃ tu yānamācaret

'''85.67''' tripādena trināḍī ca kriyāṃ prati kriyāṃ prati niśi yānāvasāne tu snānavarjitapūjanam

'''85.68''' gandhamālyaṃ visṛjyātha pādyamācamanaṃ dadet gandhamālyaiśca saṃtoṣya pūrvayānakrameṇa tu

'''85.69''' rātryante yāni karmāṇi dinaṃ prati dinaṃ prati tīrthādhivāsanaṃ kuryāccūrṇotsavamataḥ param

'''85.70''' devāgre ca sabhāsthāne tīrthatīre manorame cūrṇotsavaṃ tu kartavyaṃ jalakrīḍāṃ samācaret

'''85.71''' prāyaścittārthahomaṃ ca snapanairabhiṣecayet ācāryaṃ pūjayetpaścādbhaktāṃścaiva prapūjayet

'''85.72''' prāyaścittārthakalaśairbhūri cānnaṃ nivedayet evaṃ yaḥ kurute martyaḥ sa puṇyāṃ gatimāpnuyāt

===Kapitel 86===

''ṣaḍaśītitamaḥ paṭalaḥ · pañcagavyavidhiḥ''

'''86.1''' ataḥ paraṃ pravakṣyāmi pañcagavyavidhikramam pakāraḥ pāpanāśaḥ syād ñcakāraḥ putravardhanaḥ

'''86.2''' gakāro mokṣadaḥ prokto vyakāro vyādhināśanaḥ sarvasiddhikaraṃ puṇyaṃ pañcagavyamiti smṛtam

'''86.3''' śivāgre maṇḍape śuddhe gomayālepanaṃ kuru paristarettu śālīṃśca dvātriṃśatprasthapūritān

'''86.4''' prāksūtraṃ yugasūtraṃ syādudaksūtraṃ tathaiva ca sūtrātsūtrāntaraṃ tālaṃ navakoṣṭhaṃ prakalpayet

'''86.5''' caturaśraṃ tataḥ kṛtvā sāṣṭapatraṃ sakarṇikam caturvedāśca dikpātre vidikpātre kṛtādayaḥ

'''86.6''' akṣataistilalājaiśca darbhaiḥ puṣpaiḥ paristaret puṇyāhaṃ vācayettatra koṣṭhaṃ tatra kramādyajet

'''86.7''' madhyame śivatattvaṃ tu pūrvakoṣṭhe sadāśivam īśvaraṃ tu tathāgneyyāṃ vidyātattvaṃ tu dakṣiṇe

'''86.8''' māyātattvaṃ tu nairṛtyāṃ paścime kālatattvakam vāyau niyatitattvaṃ ca some puruṣatattvakam

'''86.9''' īśe prakṛtitattvaṃ tu koṣṭhapūjā vidhīyate supratiṣṭhaṃ tu tanmadhye suśāntaṃ pūrvapātrake

'''86.10''' tejaḥpātraṃ tato yāmye pratīcyāmamṛtaṃ tathā saumye ratnodakaṃ caiva avyaktaṃ caiśapātrakam

'''86.11''' āgnau suvyaktapātraṃ ca nairṛtyāṃ sūryapātrake vāyau saṃyuktapātraṃ syādityetatpātrapūjanam

'''86.12''' kṣīraṃ kumbhe tu tanmadhye dadhi pūrve tu vinyaset dakṣiṇe tu ghṛtaṃ nyasya gomūtraṃ cottare nyaset

'''86.13''' paścime gomayaṃ caiva āgneyyāṃ piṣṭacūrṇakam nairṛtyāṃ rajanīṃ sthāpya vāyau cāmalakaṃ tathā

'''86.14''' aiśānyāṃ darbhatoyaṃ ca kuryāttatpañcagavyakaiḥ kauśikaḥ kṣīramityuktaḥ kāśyapo dadhi cocyate

'''86.15''' bhāradvājo ghṛtaṃ caiva gautamo gomayaṃ tathā ātreyaścaiva gomūtramṛṣayaśca prakīrtitāḥ

'''86.16''' kṣīraṃ tu śukradaivatyaṃ dadhi vai somadaivatam ghṛtaṃ vai rudradaivatyaṃ gomayaṃ cārkadaivatam

'''86.17''' gomūtramagnidaivatyaṃ pañcagavyādhidevatāḥ śālipiṣṭa umādevī rajanyāṃ ca sarasvatī

'''86.18''' śrīdevyāmalake caiva pārvatī darbhatoyake āpyāyasva same kṣīraṃ dadhikrāvṇo hi vai dadhi

'''86.19''' śukramasi ghṛtaṃ caiva gandhadvāreti gomayam gāyatryā caiva gomūtramabhimantrya yathākramam

'''86.20''' īśānādi ca sadyāntaṃ pūjayettu yathākramam madhye krameṇa saṃyojyaṃ mūlamantraṃ samuccaran

'''86.21''' uttamaṃ droṇamityuktaṃ madhyamaṃ tu tadardhakam tadardhamadhamaṃ jñeyaṃ trividhaṃ parikalpayet

'''86.22''' triprasthaṃ kṣīramityuktaṃ dviprasthaṃ dadhi cocyate ghṛtaṃ vai prasthamekaṃ tu catuṣprasthaṃ tu gomayam

'''86.23''' ṣaṭprasthaṃ caiva gomūtramuttamaṃ tu vidhīyate prasthārdhaṃ kṣīramityuktaṃ prasthaṃ vai dadhi cocyate

'''86.24''' prasthārdhaṃ ghṛtamityuktaṃ dviprasthaṃ caiva gomayam triprasthaṃ caiva gomūtramityetanmadhyamaṃ tathā

'''86.25''' prasthapādaṃ ghṛtaṃ proktaṃ dvipādaṃ dadhi cocyate tripādaṃ kṣīramityuktaṃ catuṣpādaṃ tu gomayam

'''86.26''' ṣaṭpādaṃ caiva gomūtramityetatkanyasaṃ tathā kapilāyāstu gomūtraṃ raktāyā gomayaṃ bhavet

'''86.27''' kṛṣṇāyāḥ kṣīramityuktaṃ sitāyāṃ dadhi cocyate dhūmrāyā ghṛtamityuktaṃ pañcagavyaṃ tu saṃgrahet

'''86.28''' sarvaṃ vai kapilāyāstu nānāvarṇayujo’thavā gomūtraṃ śrīpadaṃ jñeyaṃ gomayaṃ roganāśanam

'''86.29''' kṣīreṇa sarvasiddhiḥ syāddadhnā putravivardhanam ghṛtena vyādhināśaḥ syātpañcagavyaphalaṃ bhavet

'''86.30''' prātaḥkāle’bhiṣeke tu sarvarogavināśanam daśāparādhāstoyena kṣīreṇa śatasaṃkhyakam

'''86.31''' sahasraṃ kṣamyate dadhnā ghṛtenāpyayutaṃ tathā lakṣamikṣurasenaiva madhunā daśalakṣakam

'''86.32''' nālikerāmbhasā koṭirgandhatoyamanantakam gavyena pāpanāśaḥ syātsarvāriṣṭavināśanam

'''86.33''' prāyaścitte’dbhute śuddhyai pañcagavyaṃ viśiṣyate brahmahatyā surāpānaṃ steyaṃ ca gurutalpakam

'''86.34''' mahānti pātakānyatre tatsaṃyogaśca pañcakam pañcapātakaśuddhiśca pañcagavyaphalaṃ bhavet

'''86.35''' agre tu pañcagavyaṃ syāttadanantaramāmṛtam tatastu snapanaṃ kuryātphalavargairgurūttamaḥ

'''86.36''' sauvarṇaṃ rājataṃ vāpi tāmrapātramathāpi vā athavā mṛṇmayaṃ vāpi pātraṃ cāpi pṛthakpṛthak

===Kapitel 87===

''saptāśītitamaḥ paṭalaḥ · pañcāmṛtavidhiḥ''

'''87.1''' ataḥ paraṃ pravakṣyāmi pañcāmṛtavidhiṃ śṛṇu koṣṭhaṃ pātraṃ tathā mantraṃ pūrvavatparikalpayet

'''87.2''' śivāgre sthaṇḍilaṃ kuryātsthaṇḍilaṃ pañcakoṣṭhakam koṣṭhe sarvāṇi pātrāṇi pūrvavatparikalpayet

'''87.3''' madhye kṣīraṃ tu saṃsthāpyaṃ tatpūrve dadhi cocyate dakṣiṇe ghṛtamevaṃ tu uttare madhu vinyaset

'''87.4''' paścime śarkarā nyasyā pañcāmṛtamihocyate kadalīpanasāmrāṇi agnirākṣasamārute

'''87.5''' aiśānyāṃ nālikeraṃ tu sthāpayettu yathākramam madhye dadhyādi saṃyojya mūlamantraṃ samuccaran

'''87.6''' amṛtīkṛtya saṃpūjya dhūpadīpaṃ tu yojayet kṣīraṃ dadhi ghṛtaṃ kṣaudraṃ gulaṃ caiva tu pañcakam

'''87.7''' pañcāmṛtamiti khyātaṃ pratiprasthaṃ pṛthaṅnyaset pādahīnaṃ tu madhyaṃ syādardhahīnaṃ kanīyasam

'''87.8''' madhyādi pūrvavannyasya pūrvavatparikalpayet nālikerasya cūrṇaṃ ca kadalīśatasaṃyutam

'''87.9''' pādaprasthaghṛtaṃ caiva pādaprasthamadhu nyaset prasthamātrā śarkarā syātphalapañcāmṛtaṃ bhavet

'''87.10''' kadalīphalaśataiśca miśritaṃ nārikelaphalacūrṇamiśritam daśavṛttagulacūrṇasaṃyutaṃ madhu pādakuḍupaṃ ghṛtaṃ tathā

'''87.11''' prasthatailābhiṣeke tu kadalīśatasaṃkhyakam nālikerasya cūrṇaṃ ca pādaprasthaghṛtaṃ tathā

'''87.12''' pādaprasthaṃ madhūni syuḥ prasthamātrā tu śarkarā phalapañcāmṛtaṃ jñeyaṃ pañcāmṛtamathocyate

'''87.13''' kṣīraṃ dadhi ghṛtaṃ caiva madhu cekṣurasastathā pañcāmṛtamiti khyātaṃ pādaprasthaṃ ca kārayet

'''87.14''' dviprasthaṃ kṣīramevoktaṃ dviprasthaṃ dadhi cocyate ardhaprasthaghṛtaṃ caiva prasthamevaṃ tu śarkarā

'''87.15''' haridrāmalakaṃ piṣṭaṃ pādaprasthaṃ prakīrtitam likucā daśasaṃkhyāśca nāraṅgadvayameva ca

'''87.16''' cūtaṃ pañcadaśaṃ jñeyaṃ dāḍimatrayameva ca mātuluṅgāni ca trīṇi gulo rasaphalairyutaḥ

'''87.17''' tāmaratrayamevoktamekaṃ tu panasaṃ bhavet devatāmraphalatrīṇi śivaprītikaraṃ bhavet

'''87.18''' nālikerodakaṃ caiva daśasaṃkhyāḥ prakīrtitāḥ gandho mṛgamadaścaiva karpūraṃ kuṅkumaṃ tathā

'''87.19''' kastūrī rocanā caiva ṣaḍgandhaṃ caiva kīrtitam himasecanasaṃmiśraṃ yathālābhena vāharet

'''87.20''' annābhiṣeke mantrānnaṃ pratiprasthaṃ ca kārayet pratidravyaṃ viśeṣeṇa aṣṭapuṣpaṃ samarcayet

'''87.21''' yaddravyamabhiṣektavyaṃ taddravyaṃ tu nivedayet pratidravyāvasāne tu upasnānaṃ ca dhūpakam

'''87.22''' paścādācamanārghyaṃ ca dhūpadīpaṃ tu darśayet dhārāsahasrakumbhaṃ ca śṛṅgaśaṅkhābhiṣecanam

'''87.23''' sūkṣmavastreṇa saṃmṛjya gandhapuṣpaiḥ samarcayet dviprasthataṇḍulaiḥ paktvā śuddhānnaṃ tu nivedayet

'''87.24''' dhūpadīpaṃ dadecchambhordivyagandhaṃ ca lepayet sarvairābharaṇaiścāpi puṣpamālyādibhistataḥ

'''87.25''' dukūlapaṭṭavastrādyairalaṃkuryānmaheśvaram yajñasūtrādibhiḥ sarvaiḥ svapramāṇena dhārayet

'''87.26''' bhāreṇa taṇḍulānāṃ vai mahānaivedyamācaret pratiprasthaṃ viśeṣeṇa vyañjanaṃ phalameva hi

'''87.27''' kramukaṃ caikamevoktaṃ nāgavallīcaturdalam cūrṇaṃ niṣpāvamātraṃ ca lavaṅgadvayameva ca

'''87.28''' elātaṇḍulasaptabhirjātipatrīphalaṃ truṭiḥ karpūraṃ truṭimātraṃ ca tāmbūle dāpayecchive

'''87.29''' mukhavāsamiti khyātaṃ pānīyaṃ prasthameva ca pādyamācamanaṃ cārghyaṃ dhūpadīpaṃ bhramecchive

'''87.30''' ārātriṃ darśayecchambhoḥ sāyarakṣāṃ bhramettribhiḥ bhasma pradāpayeddhīmāndarpaṇaṃ chatracāmaram

'''87.31''' vyajanaṃ tālavṛntaṃ vā darśayeddeśikottamaḥ pādyamācamanīyārghyamantarāntarameva ca

'''87.32''' vedoktenaiva mantreṇa mantrapuṣpaṃ pradāpayet culukodakamevaṃ syātsvātmano’rpaṇameva ca

'''87.33''' śivamantraṃ japetpaścādyathāśaktyā viśeṣataḥ stotraṃ gītaṃ ca nṛttaṃ ca yathālābhena vā bhavet

'''87.34''' ukteṣu vastukeṣveṣu nyūne vāpyadhike’pi vā na tyajennānyathā kuryādyathāsaṃbhavamācaret

===Kapitel 88===

''aṣṭāśītitamaḥ paṭalaḥ · snapanavidhiḥ''

'''88.1''' nitye naimittike kāmye maṅgale mantrasādhane rājñāṃ trijanmanakṣatre jvarakleśādipīḍane

'''88.2''' rājapatnītrijanmarkṣe rājñāṃ maraṇakālake rājñāṃ vijayanakṣatre abhiṣeke’sukhe’pi vā

'''88.3''' taccandrāṣṭamanakṣatre rājavaināśikoḍupe dīkṣānte ca pratiṣṭhānte prokṣaṇe puradāhake

'''88.4''' ativṛṣṭyāmanāvṛṣṭau durbhikṣe durnimittake bhūmikampe mahāroge śatrubhiḥ pīḍane’pi ca

'''88.5''' yāgānte sauravāre ca kujaputradine’pi ca utpāte ca mahotpāte svanakṣatre mahotsave

'''88.6''' ayane viṣuve caiva grahaṇe sthāpanādike utsave ca pavitrākhye damanāropaṇe’pi ca

'''88.7''' kṛttikādīpanakṣatre anyasminmāsaṛkṣake aṣṭamyāṃ vā caturdaśyāṃ pañcadaśyāṃ ca pakṣayoḥ

'''88.8''' saṃkrāntau puṇyadivase ṣaḍaśītimukhe’pi ca sinīvālyāṃ kuhau caiva ghṛtasnānottare tathā

'''88.9''' ghṛtakambalalepānte jīrṇoddhārāvasānake paracakrabhayotpanne kṛṣivāṇijyayostathā

'''88.10''' vidyārambhe vivāhe ca yuddhārambhe tvavagrahe śatābhiṣekakāle ca gavāṃ rogapradarśane

'''88.11''' gajāśvarogasaṃbhūte purārambhe ca janmani yajñārambhe suyoge ca tathā yātrāvasānake

'''88.12''' navatoyāgamane ca naṭeśabhramaṇāntake mārgaśīrṣe ca māse tu ārdrāyāṃ tu viśeṣataḥ

'''88.13''' prāyaścitteṣu kāryeṣu navanaivedyakarmaṇi janakalyāṇakāle ca narāṇāṃ maraṇarkṣake

'''88.14''' viśeṣapūjākāle ca bhaktānāmutsave’pi ca devabhramaṇakālānte mṛgayātrāvasānake

'''88.15''' evamādiṣu kāleṣu snāpayetsnapanoktavat kuryātpratidinaṃ vāpi trisaṃdhyāyāṃ gurūttamaḥ

'''88.16''' saṃdhyādvaye vā caikasyāṃ snapanaṃ kārayecchive prāguktavartmanā kaścidviśeṣastatra kathyate

'''88.17''' aṣṭottaraśatairvāpi ekāśītighaṭaistu vā pañcāśatpañcaviṃśaiśca ṣoḍaśairnavabhistathā

'''88.18''' navakādiśatāṣṭāntaiḥ snāpayetpratisaṃdhiṣu kumbhenaikena vā vyomasaṃkhyena kalaśena vā

'''88.19''' prāguktadravyasaṃyuktaṃ vardhanīsahitena ca kālaṃ bhinnaṃ ca suṣiraṃ bhedaiśchedaiśca līnakam

'''88.20''' nirdagdhaṃ ca purāṇaṃ ca varjayettānprayatnataḥ pakvabimbopamāḥ sarve kṣālayettānviśeṣataḥ

'''88.21''' kalaśānveṣṭayed dvitrivyomasūtraiḥ krameṇa tu athavā vyomasūtreṇa tritayaṃ pariveṣṭayet

'''88.22''' śivakumbhe ca vardhanyāmekadvitriyavāntaram anyeṣu kalaśeṣvevaṃ gavākṣasadṛśāntaram

'''88.23''' tataḥ sarvātmanāveṣṭya sūtreṇa svastike’pi ca sūtrairāveṣṭitānkumbhānsthāpayecchatrubandhane

'''88.24''' tathaivāveṣṭitānsvalpatantunā niṣkṛtau mṛtau maṇḍapasyottare dhīmāndarbhaiścaiva paristaret

'''88.25''' sūtreṇa veṣṭayitvā tu kṣālayitvādhivāsayet adhomukhāṃstu kalaśānsthāpayettu kuśopari

'''88.26''' prokṣayeddhṛdayenaiva kalaśonmīlanaṃ kuru sarvālaṃkārasaṃyuktaṃ tataḥ snapanamārabhet

'''88.27''' prathamaṃ śodhayedbhūmiṃ dvitīyamanulepanam tṛtīyaḥ sūtravinyāsaścaturthaṃ sthaṇḍilaṃ bhavet

'''88.28''' pañcamaḥ kalaśanyāsaḥ kūrcanyāsastu ṣaṣṭhakaḥ saptamo dravyavinyāso devanyāsastathāṣṭamaḥ

'''88.29''' pidhānaṃ navamaṃ proktaṃ daśamaṃ vastraveṣṭanam ekādaśaṃ gandhapuṣpaṃ dvādaśaṃ dhūpadīpakam

'''88.30''' mudrādānaṃ tataḥ proktaṃ puṇyāhaṃ tu caturdaśam ghaṭoddhāraḥ pañcadaśaḥ ṣoḍaśe snāpayecchivam

'''88.31''' astreṇa śodhayedbhūmiṃ vāmadevena lepayet sūtranyāsamaghoreṇa sthaṇḍilaṃ puruṣeṇa tu

'''88.32''' hṛdayena nyasetkumbhamīśānena kuśaṃ nyaset mūlena vinyaseddravyānvāmenāvāhayetsurān

'''88.33''' śarāvānbījamukhyena vastrāṇi hṛdayena tu īśānenaiva gandhādīndhūpādīnkavacena tu

'''88.34''' dadyānmudrāmaghoreṇa vācayetpavamānakam prokṣayettu viśeṣeṇa puṇyāhaṃ tu yathāvidhi

'''88.35''' praṇavena ghaṭoddhāraṃ mahāvyometi mantrataḥ pañcabrahmaṣaḍaṅgaiśca snāpayetparameśvaram

'''88.36''' navasaṃkhyaghaṭasnānamādau vakṣye guro śṛṇu prāgagramudagagraṃ ca yugasūtraṃ pradāpayet

'''88.37''' sthaṇḍilaṃ kalpayettasmiṅśālibhirvimalaiḥ śubhaiḥ tilataṇḍulalājāṃśca tiryagdarbhānparistaret

'''88.38''' kalaśāni tato grāhya sthāpayedādiśaivakaḥ sauvarṇaṃ rājataṃ vāpi tathā tāmramayaṃ tu vā

'''88.39''' śaṅkhairvā śuktikairvāpi gavāṃ śṛṅgaistathāpi vā athavā mṛṇmayairvāpi sarvalakṣaṇasaṃyutaiḥ

'''88.40''' supakvaiḥ susvaraiḥ snigdhairbimbaprabhāsamanvitaiḥ etairlakṣaṇasaṃyuktaiḥ snāpayetparameśvaram

'''88.41''' uttamaṃ droṇasaṃpūrṇaṃ madhyamaṃ tu tadardhakam adhamaṃ tvāḍhakaṃ proktaṃ sarveṣāmāḍhakaṃ tu vā

'''88.42''' śaṅkhaśuktikaśṛṅgāṇāṃ svapramāṇena pūrayet tato majjanaśālāyāṃ jaladroṇīṣvanekaśaḥ

'''88.43''' vastrapūtaṃ suśuddhāmbu nītvā nadyā gṛhītakam varālatruṭikarpūrośīrādicūrṇamiśritam

'''88.44''' pañcabrahmaśivāṅgaiśca mūlamantrābhimantritam śivatoyamiti khyātaṃ sugandhikusumānvitam

'''88.45''' sādhayitvā purā śītaṃ kalaśān sādhayettataḥ śreṣṭhāntarādhamām̐llohairmṛdbhirvā kalaśān kuru

'''88.46''' vedāgnipakṣaprasthaiste pūrṇāḥ śreṣṭhāntarādhamāḥ śivakumbhaṃ tathoddhṛtya pūrayettu śivāmbhasā

'''88.47''' karṇikāyāṃ nyasetkumbhaṃ pañcaratnasamanvitam hiraṇyaṃ vāpi nikṣipya navavastreṇa veṣṭayet

'''88.48''' kūrcaṃ nyastvāntare tasya nyastvā kūṭākṣaraṃ tataḥ vardhanīmuttare sthāpya vastrahemādisaṃyutam

'''88.49''' parito’ṣṭaghaṭān sthāpya vidyeśānabhimantrayet pādyamācamanaṃ cārghyaṃ gandhaṃ puṣpaṃ ca gavyakam

'''88.50''' lājān saktuṃ krameṇaiva śakrādyaṣṭaghaṭe nyaset āsanaṃ saṃprakalpyāsmin kumbhe mūrtimanuṃ nyaset

'''88.51''' brahmabhiḥ sakalīkṛtya tatkalāstatra vinyaset nyastvā vidyātanuṃ mūrtau rūpaṃ dhyātvā śivaṃ nyaset

'''88.52''' caturbhujaṃ trinetraṃ ca candrārdhakṛtaśekharam jaṭāmakuṭasaṃyuktaṃ bhasmorddhūlitavigraham

'''88.53''' kṛṣṇāparaśusaṃyuktaṃ padmapīṭhopari sthitam dhyātvā hṛdā śivaṃ devaṃ śivakumbhe tu pūjayet

'''88.54''' sthāpanādīṃśca pādyādi kṛtvā dadyāddhṛdā guruḥ gandhaṃ puṣpaṃ ca dhūpaṃ ca dīpamardhaṃ vidhāya ca

'''88.55''' pradarśya liṅgamudrāṃ ca kavacenāvakuṇṭhayet tasyāṃ manonmanīṃ dhyāyed dvibhujāṃ ca dvilocanām nīlālakasamāyuktāṃ dukūlavasanānvitām

'''88.56''' utpalaṃ dakṣiṇe haste dhṛtvā vāme prasāritam

'''88.57''' karaṇḍamakuṭopetāṃ kiṃcitprahasitānanām susthitaṃ devapārśve tu anyatkuñcitamambuje

'''88.58''' gaṇāmbiketi mantreṇa dhyātvā gandhādibhiryajet yaṣṭvā gaurīṃ ca vardhanyāṃ yonimudrāṃ pradarśayet

'''88.59''' varmaṇaivāvakuṇṭhyātha rudrānāvaraṇasthitān pūrvoktavidhinā vāpi krameṇāvāhya pūjayet anantādiśikhaṇḍyantaṃ teṣu gandhādibhiryajet

===Kapitel 89===

''ekonanavatitamaḥ paṭalaḥ · kalāsūtrayāgaśālākuṇḍavidhiḥ''

'''89.1''' kalāsūtraṃ pravakṣyāmi pañcadaśapadakramam pūrvāsyaiścāpi saumyāsyaiḥ kalāsūtraiḥ prakalpitam

'''89.2''' pañcaviṃśatyuttaraiśca maṇḍitaṃ dviśataiḥ padaiḥ madhye śivaṃ padaṃ proktaṃ śakteścāpi tathopari

'''89.3''' nādaṃ tadbāhyakaṃ proktaṃ tadūrdhvaṃ bindusaṃjñakam sādāśivaṃ tataḥ proktaṃ māheśvaramataḥ param

'''89.4''' raudraṃ tasyordhvake caiva bāhye viṣṇupadaṃ kramāt madhye navapadāṃ vedīṃ catuṣkoṇeṣu vai tathā

'''89.5''' nikhaneccaturaḥ stambhān pradhānaṃ ca śive nyaset sāṣṭavidyeśvarānkumbhānnyasecchaktipade tathā

'''89.6''' sāṣṭamaṅgalakānnāde binduprānte ca saṃnyaset pūjādravyāṇi sarvāṇi sadāśivapade nyaset

'''89.7''' kuṇḍāṇi paritaḥ kuryānmaheśasya pade kramāt bahiḥ saṃcaraṇaṃ proktaṃ rudrasyāpi pade tathā

'''89.8''' viṣṇoḥ pade tathā bhittiṃ padārdhena prakalpayet nandyādīnāṃ ca kumbhāṃstu parito bhittimastake

'''89.9''' dvārārthaṃ tripadaṃ tyaktvā parito digvidikṣu ca yāgaśālā tviyaṃ proktā kuṇḍalakṣaṇakaṃ śṛṇu

'''89.10''' uttamaṃ saptaviṃśatyā caturviṃśati madhyamam adhamaṃ ṣoḍaśāṅgalyaṃ pratiṣṭhādau prakalpayet

'''89.11''' ṣoḍaśāṅgulakānnyūnaṃ pratiṣṭhādau vivarjayet ṣoḍaśāṅgulamārabhyāpyaṣṭahastāvadhi kramāt

'''89.12''' aṣṭahastātparaṃ caiva na kartavyaṃ gurūttama ṣoḍaśāṅgulakanyūnaṃ prāyaścitteṣu kalpayet

'''89.13''' hastādi ṣoḍaśāntaṃ ca mekhalā ca navāṅgulā prāgudak tritrisūtraṃ ca samantāccaturaśrakam

'''89.14''' caturaśraṃ pūrvabhāge āgneyyāṃ tu bhagākṛti kṣetre pañcavibhāge ca ekabhāgaṃ bahirnyaset

'''89.15''' koṇārdhārdhasya madhye ca kṣetrārdhād bhrāmayettataḥ kṣetrārdhādadhikaṃ yāvad bhrāmayecca dvipārśvayoḥ

'''89.16''' pañcamāntaṃ bahirnyastvā bhavedaśvatthapatravat uttarāgramiti khyātaṃ yonimāgneyakoṇake

'''89.17''' bhūtabhāgakṛte kṣetre pārśve caikaikabhāgakam vṛddhiṃ kṛtvā viśeṣeṇa kṣetramadhyaṃ samācaret

'''89.18''' pārśvasūtrāntake caiva bhrāmayedardhacandrakam khaṇḍaṃ dakṣiṇabhāge cāpyakhaṇḍamuttarāgrakam

'''89.19''' pratiṣṭhādau prakartavyaṃ dīkṣāyāṃ ca sukarmaṇi dakṣiṇāgraṃ prakartavyaṃ pādamuttarato nyaset

'''89.20''' mohena nānyathā kāryaṃ rāṣṭrakṣobho na saṃśayaḥ kṣetraṃ ca saptadhā bhajya caikaikaṃ pārśvake nyaset

'''89.21''' kṣetrasya saumyabāhye tu ekabhāgaṃ ca vinyaset pārśvayordvikayoścāpi rekhayormelanaṃ tu yat

'''89.22''' trikoṇamiti vikhyātamuttarāgraṃ prakalpayet pratiṣṭhādau prakartavyaṃ naiva pūrvāgrameva ca

'''89.23''' kṣetraṃ tu vasudhā bhajya karṇānte tvekabhāgakam tyaktvā kṣetrasya madhye tu karṇāntaṃ bhrāmayetkramāt

'''89.24''' vartulaṃ ceti vikhyātaṃ kṣetraṃ vedāṃśakaṃ kuru ekāṃśaṃ ca dvipārśve tu lāṅchitaṃ tadviśeṣataḥ

'''89.25''' rekhādvayaṃ samālikhya bhāgārdhaṃ kṣetramadhyake ṣaḍrekhāmelanaṃ kuryātṣaḍaśraṃ ceti kīrtitam

'''89.26''' pūrvapaścimakāgraṃ ca kalpayetkalpavittamaḥ vṛttaṃ pūrvoktavatkṛtvā karṇikāṃ ca triyaṅgulām

'''89.27''' karṇikāyā adhobhāge tathādhomekhalopari rasāṅgulaṃ dīrghamagre tathā caikāṅgulaṃ matam

'''89.28''' unnataṃ ceti vikhyātaṃ pañcāṅgulamathāpi vā dalāṣṭaṣoḍaśaṃ tatra padmakuṇḍamiti smṛtam

'''89.29''' kṣetraṃ ca vasudhā bhajya ekaikaṃ pārśvayornyaset caturaśraṃ prakalpyātha kṣetrabāhyaikabhāgakam

'''89.30''' kṣetramadhye samantāttu catuścihnaṃ vidhāya ca catuṣṭayaṃ tathā rekhāmelanaṃ nyasya cāśrakam

'''89.31''' aṣṭāśramiti vikhyātamaṣṭakoṇaṃ ca kīrtitam indraīśānayormadhye vṛttakuṇḍaṃ pradhānakam

'''89.32''' ardhacandraṃ trikoṇaṃ ca māraṇe dveṣaṇe bhavet pradhānavarjitaṃ caiva mohenāpi kṛtaṃ tu cet

'''89.33''' rājarāṣṭravināśaśca kartā bhoktā vinaśyati tasmātsarvaprayatnena uktavatparikalpayet

===Kapitel 90===

''navatitamaḥ paṭalaḥ · sthānaśuddhiḥ''

'''90.1''' sthānaśuddhiṃ tato vakṣye śṛṇuṣva kamalāpate udakyā sūtakī kuṇḍo vrātyaśca pulkaso’pi ca

'''90.2''' nāpito rajakaścaiva śunako rāsabhastathā kukkuṭaḥ śyenapakṣī ca gṛdhraścaite ca mandiram

'''90.3''' praviṣṭāścetpramādāttu sthānaśuddhiṃ parā caret prāgudīritamārgeṇa saṃprokṣaṇamathācaret

'''90.4''' ālayasya navīnasya śuddhyarthaṃ ca yathāvidhi khananoddhāradahanaṃ pūraṇaṃ gonivāsanam

'''90.5''' viprocchiṣṭaṃ ca gavyaṃ ca veda ityaṣṭa śuddhayaḥ pratikarmaṇāmeteṣāṃ vidhirevādhunocyate

'''90.6''' khātānkhanettanmantreṇa khananaṃ tālamātrataḥ prāsādasya caturdikṣu kṛtvā tatratyamṛttikām

'''90.7''' mṛttikehana mantreṇa grāhayedavaṭāttataḥ sākṣātpavitramantreṇa darbhānnyastvā dahettataḥ

'''90.8''' puruṣeṇa tu mantreṇa mṛdā valmīkajena ca āpūryamāṇaṃ rajasā gartaṃ ca pūrayedguruḥ

'''90.9''' goṣpadeṣu savatsāṃ gāṃ gopatiṃ cānayedguruḥ tadgāyatryā vidhānena pūjāṃ kuryādanantaram

'''90.10''' kārayedaṅgapūjāṃ tu jñātvā cāṅgādhidevatāḥ śṛṅgāgrayoḥ sarvatīrthaṃ jaṅgamasthāvarāṇi ca

'''90.11''' śiromadhye mahādevo lalāṭe gaṇanāyakaḥ kaṇṭhe cātmā nāsikāyāṃ bhūruhāśca sarīsṛpāḥ

'''90.12''' aśvinīdevate śrutyornetrayorindra eva ca maruto dantadeśeṣu jihvāyāṃ varuṇaḥ smṛtaḥ

'''90.13''' huṃkāre bhāratī caiva gaṇḍayoryamarākṣasau saṃdhye coṣṭhadvayoścaiva grīvāyāṃ tārakādhipaḥ

'''90.14''' khuramadhye ca gandharvāḥ khurāgre pannagāstataḥ tasya paścādapsaraśca daśanāḍīṣu rudrakāḥ

'''90.15''' saṃdhau prāṇādi vāyuśca śroṇyāṃ ca pitṛdevatāḥ urasyumā ramāpāne yamunā gomaye tataḥ

'''90.16''' ādityaraśmayo vāle mūtre devataraṅgiṇī romāgre ṛṣayaścaiva tunde viśvaṃbharā tataḥ

'''90.17''' payodhare catuḥsiṃdhustenaiva manunā tataḥ abhimaṃtrya tṛṇānyannaṃ dattvātha gokulaṃ hare

'''90.18''' trirātramekarātraṃ vā vāsaṃ kṛtvā tataḥ param viprocchiṣṭaṃ ca vakṣyāmi śṛṇuṣva kamalāpate

'''90.19''' śivabhaktāndayāsaktān dvijānāhūya paṇḍitān snāpayitvā gandhatailaiḥ paścādvastrādikaṃ dadet

'''90.20''' śivāgre maṇḍapaṃ gatvā bhūsuraiḥ saha deśikaḥ sakalīkṛtya matimān vighneśaṃ pūjayettataḥ

'''90.21''' puṇyāhaṃ vācayitvātha tilataṇḍulaśālibhiḥ sthaṇḍilaṃ kalpayitvā ca nalinaṃ tatra saṃlikhet

'''90.22''' sadāśivaṃ samabhyarcya sāṅgaṃ sāvaraṇaṃ hare śivamantraṃ śataṃ japtvā sakṛcca saṃhitāṃ japet

'''90.23''' brahmasūktaṃ viṣṇusūktaṃ rudrasūktamataḥ param ghṛtasūktaṃ pāvamānaṃ śrīsūktaṃ narasūktakam

'''90.24''' bhūsūktaṃ pañcaśāntiṃ ca ghoṣaśāntimataḥ param evaṃ kramātsakṛjjaptvā paścāddhomaṃ samācaret

'''90.25''' maṇḍapasya purobhāge kārayellakṣaṇānvitam kuṇḍaṃ vā sthaṇḍilaṃ vāpi tatrāgniṃ janayedguruḥ

'''90.26''' tatra devaṃ samabhyarcya tanmantreṇa hunecchatam daśāṃśaṃ saṃhitāṃ hutvā hunedekādimantrataḥ

'''90.27''' sarvasmetyantakairhutvā homaśeṣaṃ samāpayet tato viprānmahābhāgāṅśivanāmasahasrakaiḥ

'''90.28''' akhaṇḍitairbilvapatraiḥ pūjayeddeśikottamaḥ sājyaṃ hi vyañjanādyuktamodanaṃ dāpayettataḥ

'''90.29''' tadante dakṣiṇāṃ dadyāttāmbūlaiḥ saha paṇḍitaḥ viprocchiṣṭamiti proktaṃ gavyaśuddhimatha śṛṇu

'''90.30''' pañcagavyaṃ ca saṃsthāpya yathoktavidhinā tathā śuddhairuktheti mantreṇa ālayaṃ prokṣayedguruḥ

'''90.31''' vedaśuddhimatho vakṣye śṛṇuśca garuḍādhipa brahmasthānādiṣaṣṭhāṅghrimaṇṭape vedamantrataḥ

'''90.32''' ṛgvedādi caturdikṣu japeyurbrāhmaṇāḥ kramāt tadante gandhapuṣpādīn brāhmaṇānāṃ pradāpayet

'''90.33''' evaṃ caturvidhāṃ śuddhiṃ tridinaṃ kārayedbudhaḥ athavā vāramekaṃ vā kartavyaṃ kamalāpate

===Kapitel 91===

''ekanavatitamaḥ paṭalaḥ · tīrthotsavaḥ''

'''91.1''' ataḥ paraṃ pravakṣyāmi tīrthotsavavidhikramam sarvalokopakārārthaṃ sārūpyapadadāyakam

'''91.2''' nṛparāṣṭrādirakṣārthaṃ sarveṣāṃ kāmasiddhidam brahmahatyādipāpaghnaṃ sarvadoṣanibarhaṇam

'''91.3''' āyurārogyamaiśvaryaputrarājyapradāyakam ayane viṣuve krāntau grahaṇe candrasūryayoḥ

'''91.4''' amāyāṃ paurṇimāyāṃ ca varṣamāsāntyake’pi ca vāre tithau ca nakṣatre cānyakāle śubhe dine

'''91.5''' ṣaṣṭyaṣṭamyoścaturdaśyāmārdrāyāṃ puṣyaṛkṣake ayanādiṣu kāleṣu śivasyotsavamācaret

'''91.6''' navāhe vātha saptāhe pañcāhe tridine’pi vā ekāhe vātha kartavyaṃ tīrthotsavaṃ susaṃjñakam

'''91.7''' ārohādyavarohāntamuttamaṃ ceti kīrtitam ārohaṇaṃ vinā yattu madhyamaṃ ceti kīrtitam

'''91.8''' tīrthaṃ vātha prakurvīta kanyasaṃ tatprakīrtitam sarvamāseṣu cārdrāyāmutsavaṃ tu vidhīyate

'''91.9''' mṛgarkṣe puṣyanakṣatre paurṇamāsyāṃ viśeṣataḥ puṣyarkṣe kevalaṃ śambhoḥ snapanaṃ samyagācaret

'''91.10''' parvayukte viyukte vā puṣye tīrthaṃ vidhānataḥ tīrthaṃ pūrvoktavatkṛtvā mantrānnaṃ tu nivedayet

'''91.11''' alaṃkṛtyātha saṃpūjya prabhūtaṃ haviṣaṃ dadet vṛṣayāne samāropya nānāvādyasamanvitam

'''91.12''' chatracāmarasaṃyuktaṃ gānanāṭyasamanvitam grāmapradakṣiṇaṃ kṛtvā praviśedālayaṃ guruḥ

'''91.13''' avaropya vṛṣādyānātsnapanaṃ samyagācaret mūla bere viśeṣeṇa snapanaṃ śāntihomakam

===Kapitel 92===

''dvinavatitamaḥ paṭalaḥ · saptakanyāsthāpanam''

'''92.1''' prathamā devakanyā ca dvitīyā nāgakanyakā tṛtīyakanyā gandharvā caturthī brāhmakanyakā

'''92.2''' pañcamī rājakanyā ca ṣaṣṭhī tu vaiśyakanyakā saptamī śūdrakanyā ca saptakanyāḥ prakīrtitāḥ

'''92.3''' bhūloke saptakanyānāmanyonyaṃ snehasaṃbhavāt vanamadhye jale tīre ārāme vṛkṣamūlake

'''92.4''' vāsayanti vilāsārthaṃ yakṣādiparicārakaiḥ ālaye tu pratiṣṭhāpya pūjayettu vidhānataḥ

'''92.5''' brāhmaṇādikavarṇānāṃ vāṅchitārthaṃ phalaṃ daduḥ kanyāsmaraṇamātreṇa graharoganivāraṇam

'''92.6''' kanyakāsthāpanaṃ vakṣye āgamoktavidhānataḥ maṇḍapaṃ pūrvavatkṛtvā vedikuṇḍasamanvitam

'''92.7''' aṅkurārpaṇapūrvaṃ cābhiṣekāntaṃ yathākramam sarvaṃ ca pūrvavatkuryādviśeṣastvadhunocyate

'''92.8''' vedimadhye devakanyāṃ nāgakanyāṃ ca pūrvake pratyaggandharvakanyāṃ ca brāhmakanyāṃ ca dakṣiṇe

'''92.9''' uttare rājakanyāṃ ca nairṛtyāṃ vaiśyakanyakām vāyavyāṃ śūdrakanyāṃ ca aiśānyāṃ tu gaṇeśvaram

'''92.10''' āgneyyāmeva śāstāraṃ pūjayetpūrvamārgataḥ trikhaṇḍaṃ kalpayettattvamātmavidyāśivātmakam

'''92.11''' ātmānamantarātmānaṃ paramātmānameva hi tattvānāmadhipānnyastvā mūrtimūrtīśvarānnyaset

'''92.12''' kṣmādimūrtīrnyasetpūrvamindrādimūrtipāṃstathā pañcapakṣe nyasedvidvānpṛthivyādikamūrtikāḥ

'''92.13''' nivṛttyādyāḥ pañcakalā mūrtipāstatra vinyaset sarvaṃ pūrvoktavatkuryādagnau saṃtarpya pūrvavat

<poem>
saptakanyakādhyānam
</poem>

'''92.14''' pītābhāṃ pītavastrāṃ ca pītābharaṇabhūṣitām padmalambitahastāṃ ca tāṃ dhyāyeddevakanyakām

'''92.15''' śvetābhāṃ śvetavastrāṃ ca śvetābharaṇabhūṣitām kirīṭamakuṭopetāṃ nāgakanyāṃ ca bhāvayet

'''92.16''' śyāmābhāṃ śyāmavastrāṃ ca śyāmābharaṇabhūṣitām padmāsanasthitāṃ dhyāyedevaṃ gandharvakanyakām

'''92.17''' śuklavarṇāṃ śuklavastrāṃ śuklābharaṇabhūṣitām tuṅgastanāṃ padmapīṭhāṃ tāṃ dhyāyedbrāhmakanyakām

'''92.18''' raktavarṇāṃ raktavastrāṃ ratnābharaṇabhūṣitām karaṇḍamakuṭopetāṃ dhyāyedvai rājakanyakām

'''92.19''' svarṇābhāṃ svarṇavastrāṃ ca svarṇābharaṇabhūṣitām svarṇakuṇḍaladhāriṇīṃ vaiśyakanyāṃ ca bhāvayet

'''92.20''' nīlābhāṃ nīlavastrāṃ ca nīlābharaṇabhūṣitām nīlālakasuveṇyābhāṃ śūdrakanyāṃ ca bhāvayet

===Kapitel 93===

''trinavatitamaḥ paṭalaḥ · kanyakāparameśvarīsthāpanam''

'''93.1''' pratimālakṣaṇaṃ vakṣye samāhitamanāḥ śṛṇu kanyakāparameśvaryā mahitāyā mahātmabhiḥ

'''93.2''' raktāṃ padmasudhāriṇīṃ śaśimukhīṃ divyāmbarālaṃkṛtāṃ vāme lambakarāṃ jaṭāmakuṭakāṃ sarvāṅgabhūṣojjvalām vidyutkoṭisamaprabhāṃ samapadāṃ padmāsane saṃsthitāṃ dhyāyecchaṃbhvapadānasaktamanasāṃ kanyāṃ parāmīśvarīm

'''93.3''' yadvā dvinetrāṃ dvibhujāṃ caiva dvipādāñcitanūpurām dāḍimīpuṣpasaṃkāśāṃ padmapīṭhe sthirāsanām

'''93.4''' pādukālaktasaṃyuktāṃ vidyutkoṭisamaprabhām śiraścakrajaṭācūḍāṃ sarvalakṣaṇasaṃyutām

'''93.5''' divyābharaṇabhūṣāḍhyāṃ divyagandhānulepanām divyamālyāmbarayutāṃ sarvāvayavaśobhinīm

'''93.6''' candrakāntismitāṃ dāntāṃ pūrṇacandranibhānanām tattvatrayasuvijñānāṃ sarvaśāstrārthasaṃvidām

'''93.7''' dvātriṃśallakṣaṇairyuktāṃ ṣaṭtriṃśattattvasaṃyutām aṣṭāṅgayogasaṃyuktāṃ trailokyasamadarśinīm

'''93.8''' vāṅchitārthānprasīdantīṃ vaiśyānāṃ kuladevatām trimūrtibhirdattavarāṃ sarvasiddhipradāyikām

'''93.9''' kanyakāparameśvaryā nāma loke prasiddhitam savyahaste padmadharā vāmahaste ca lambanam

'''93.10''' sarvalokeṣviti khyātā kanyakāparameśvarī aṣṭakanyāsamāyuktā tattannāma tu kathyate

'''93.11''' gaganī ghānanī vaiśvī sajīvī pitṛrūpiṇī somasūryavatī hṛṣṭiraṣṭaśaktiryathākramam

'''93.12''' aṣṭakanyāḥ samarūpā dvibhujāśca dvinetrakāḥ abhayālambitahastāḥ pūrvādiparitaḥ sthitāḥ

'''93.13''' sarvalakṣaṇasaṃyuktāḥ sarvābharaṇabhūṣitāḥ vicitravarṇaśobhāḍhyāḥ kanyakāḥ paricārikāḥ

'''93.14''' etādṛksamarūpā ca kanyakāparameśvarī kanyakāparameśvaryāḥ sthāpanaṃ vakṣyate’dhunā

'''93.15''' sarvamāseṣu kartavyaṃ śuklapakṣe śubhe dine aṅkurārpaṇapūrvaṃ tu pālikā nava pañca vā

'''93.16''' ratnanyāsaṃ tataḥ kuryānnavakoṣṭheṣu vinyaset koṣṭhapūjāsamāyuktaṃ vairḍūryādi kramādbudhaḥ

'''93.17''' sauvarṇaṃ rajataṃ tāmraṃ sthāpayennavakoṣṭhake āvāhādyupacāraistu pāyasādīnbaliṃ dadet

'''93.18''' nayanonmīlanaṃ kṛtvā puṇyāhaṃ vācayedguruḥ kāṃsyatāmrādipātreṣu ghṛtakṣaudraṃ nyasetkramāt

'''93.19''' hemasūcīhemacūrvāḥ koṭṭalāyudhanirmitāḥ kalaśasthāpanaṃ kṛtvā pūrvoktavidhinā saha

'''93.20''' pracchannapaṭamāhṛtya digdarśanaṃ yathākramam darpaṇaṃ darśanaṃ kṛtvā kanyādarśanameva ca

'''93.21''' gobrāhmaṇajanāṃścāpi darśayeddhomakarmaṇi netramantraṃ samuccārya śatamaṣṭottaraṃ hunet

'''93.22''' agnimantreṇa saṃyuktaṃ sūryasomābhimantrayet pratimāṃ śuddhatoyena pañcagavyaiśca secayet

'''93.23''' kāṣāyaphalapuṣpaiśca ratnasvarṇodakaiḥ kuśaiḥ gandhatoyābhiṣekena śuddhatoyābhiṣecanam

'''93.24''' sarvālaṃkārasaṃyuktaṃ grāmapradakṣiṇaṃ kuru jalādhivāsanaṃ kuryādyāmaṃ yāmardhameva vā

'''93.25''' gaṅgādisarvanadyādiviniyogaṃ viśeṣataḥ guḍalavaṇatīrthe ca vāsayedavabhṛthaṃ kuru

'''93.26''' uddhṛtya yāgāśālāṃ ca praviśetsnānamācaret ṣoḍaśastambhasaṃyuktaṃ madhyavediṃ prakalpayet

'''93.27''' caturdvārasamāyuktaṃ catustoraṇabhūṣitam yonikuṇḍamathaiśānyaṃ pūrvoktavidhinā kuru

'''93.28''' saurapūjāṃ samārabhya pūrvoktavidhipūrvakam dvāraśaktervardhanīṣu aṣṭaśaktīstu pūjayet

'''93.29''' jayā ca vijayā caiva yoginī mohinī tathā mādhavī mālinī caiva bhogī bhogavatī tathā

'''93.30''' dvāraśaktīstu saṃpūjya gandhapuṣpākṣatādibhiḥ nairṛte vāstupūjāṃ ca lakṣmyāḥ paścimapūjanam

'''93.31''' vāyavye vighnarājaṃ ca aiśānyāṃ gurupūjanam daśāyudhāni saṃpādya tattatsthāneṣu pūjayet

'''93.32''' astravardhanīṃ saṃpūjya īśāne sthirapūjanam yavataṇḍuladarbhaiśca aṣṭadroṇaiśca śālibhiḥ

'''93.33''' vedimadhye tu saṃsthāpya aṇḍajādyupari nyaset aṇḍajaṃ muṇḍajaṃ carma raktavastraṃ ca kambalam

'''93.34''' tadūrdhve prākśiraḥ sthāpya vaktreṇa śāyayettu tām śiraḥsthāne pūrṇakumbhaṃ sthāpayedvardhanīṃ ghaṭān

'''93.35''' śaktyaṣṭakaparivṛtān vedikopari saṃsthitān āvāhanādi saṃpūjya dhūpadīpopacārakaiḥ

'''93.36''' gajaṃ kumbhaṃ dhvajaṃ dīpaṃ cāmaraṃ śaṅkhapadmakam svastikaṃ ca samāyuktamaṣṭamaṅgalamarcayet

'''93.37''' hemapratisaraṃ baddhvā rakṣāmantrapuraḥsaram śāntikumbhāmbhasā prokṣya bimbarakṣāvakuṇṭhanam

'''93.38''' trikhaṇḍaṃ pūjayettatra ātmavidyāśivātmakam ātmānamantarātmānaṃ paramātmānaṃ vinyaset

'''93.39''' caturviṃśatitattvāni vinyasedbimbamadhyame khaṇḍaṃ prati viśeṣeṇa mūrtimūrtīśvarīryajet

'''93.40''' mūrtimūrtīśvarīrnyastvā homayettu viśeṣataḥ agnikāryoktamārgeṇa dīpanāntaṃ samācaret

'''93.41''' tilataṇḍulamudgaṃ ca lājaṃ māṣaṃ ca homayet godhūmasarṣapaṃ kṣīraṃ gulaṃ kṣaudraṃ phalaṃ tathā

'''93.42''' nārikelaṃ ghṛtaṃ caiva mūlamantraiśca homayet śataṃ vātha sahasraṃ va homayed deśikottamaḥ

'''93.43''' prāyaścittaṃ tato hutvā pūrṇāhutimathācaret rātrau jāgaraṇaṃ kṛtvā prabhāte snānamācaret

'''93.44''' maṇḍapaṃ pūrvavatpūjya homayettu yathākramam navagrahādihomaṃ ca prāyaścittaṃ viśeṣataḥ

'''93.45''' bimbamuddhṛtya saṃpūjya gandhapuṣpādyalaṃkṛtam grāmapradakṣiṇaṃ kṛtvā yajamānaparaḥsaram

'''93.46''' sumuhūrte sulagne ca sthāpayedāsanopari mantranyāsādikaṃ kṛtvā jīvanyāsamathācaret

'''93.47''' spṛṣṭvā japtvā ca hutvā ca  pūrṇāhutimathācaret kumbhānuddhṛtya śirasā vādyaghoṣasamanvitam

'''93.48''' ālayapradakṣiṇaṃ kṛtvā garbhagehaṃ praviśya ca akārādikṣakārāntamakṣaraṃ vinyasetkramāt

'''93.49''' āvāhanādi saṃpūjya abhiṣekaṃ yathākramam tilatailābhiṣekaṃ ca pañcagavyābhiṣecanam

'''93.50''' kṣīradadhiphalakṣaudraiḥ sugandhādibhiḥ pūjayet vastrābharaṇagandhaiśca puṣpadāmairalaṃkuru

'''93.51''' dhūpadīpaṃ dadetpaścānnaivedyaṃ bhakṣyabhojyakaiḥ ācāryaṃ pūjayetkartā vastrahemāṅgulīyakaiḥ

'''93.52''' gāśca dadyādviśeṣeṇa dakṣiṇāṃ dāpayetsudhīḥ yajamāno’bhiṣiktastu gandhapuṣpādyalaṃkṛtaḥ

'''93.53''' dīnāndhakṛpaṇādīnāṃ dānaṃ vittānusārataḥ evaṃ yaḥ kurute bhaktyā iṣṭakāmārthasiddhaye so’bhīṣṭasiddhiṃ saṃprāpya cirakālaṃ pramodate

===Kapitel 94===

''caturnavatitamaḥ paṭalaḥ · jīrṇoddhāravidhiḥ''

'''94.1''' jīrṇoddhāravidhiṃ vakṣye sarvasaṃpatkaraṃ nṛṇām prāsādaliṅgapīṭhānāṃ jīrṇakāle samuddharet

'''94.2''' grāme vā nagare vāpi araṇye parvate’pi vā śivaliṅgaṃ vinā yatra tatra juṣṭaṃ ca śatruṇā

'''94.3''' tasmātsarvaprayatnena śivadhāmasamanvitam kālakṣepeṇa jīrṇaṃ hi bhinnaṃ sphuṭitaṃ pātitam

'''94.4''' purākṛtaṃ parityajya liṅgaṃ pīṭhaṃ niketanam prāsāde gopure caiva ālaye dhvajadaṇḍake

'''94.5''' śikhare citrakūṭe ca nṛttamaṇṭapasālake citraśālāsabhāsthāne āsthānamaṇṭape tathā

'''94.6''' jīrṇakāle tu tadbhede mahājīrṇaiḥ sarandhrakaiḥ śailajairlohajaiścaiva dārumṛṇmayakeṣṭakaiḥ

'''94.7''' śikhare gatamāne ca āyatastambhaśobhite citraśāle sarandhre ca makuṭakarṇe connate

'''94.8''' padmakarṇe gate caiva kumbhakarṇe ca kubjake pratimāśobhake caiva siṃhakandarapaṭṭike

'''94.9''' gajāṣṭake ca nāgeṣu karṇakūṭakaśālake caturdvārasamāyukte caturdevasamāvṛte

'''94.10''' pūrvadakṣiṇaśālāyāṃ paścimottaraśālayoḥ indre ca dakṣiṇāmūrtau viṣṇubrahmavṛṣeṣu ca

'''94.11''' īśādisthūpiparyante jagatīkaṇṭhapaṭṭike madhyastambhasamāyukte śṛṅgārabhṛtaśālake

'''94.12''' siṃhaśāle prabhāśāle dikśāle dvāraśālake upaśāle ca karṇe ca madhyame mūlapādake

'''94.13''' eteṣu bhede jīrṇe ca punaḥ kalpanamācaret pūrvavatkalpane śilpaśāstramārgeṇa nirmitiḥ

'''94.14''' yathāpūrvaṃ ca tadrūpaṃ tathaiva kalpayetpunaḥ mūlaliṅge ca bere ca bhitticitre ca pīṭhake

'''94.15''' iṣṭikācūrṇasaṃyukte bimbarūpeṇa kalpite garbhālaye ca bhittau tu pāṣāṇe chinnabhinnake

'''94.16''' eteṣu bhede jīrṇe ca pūrvavatkalpayetpunaḥ mūlaliṅgasya mūrtiṃ ca dāruliṅge tu yojayet

'''94.17''' maṇṭape pūjayettatra sthāpanāvāhanapūrvakam aṣṭavidyeśvarakumbhānvardhanīmūlakumbhakau

'''94.18''' mūrtihomaṃ tataḥ kuryātṣaḍadhvāṅgārcanaṃ kramāt jīvanyāsasamāyuktaṃ śivamantreṇa yojayet

'''94.19''' ācāryaṃ pūjayettatra vastrahemāṅgulīyakaiḥ pañcaśuddhisamopetaṃ pañcāvaraṇaṃ pūjayet

'''94.20''' āvāhanaṃ sthāpanaṃ syādarcanāṅgaṃ vidhīyate dāruliṅge pratiṣṭhāpya abhiṣekamathācaret

'''94.21''' yathāpūrvoktamārgeṇa pūjayeddāruliṅgakam maṇḍalānte tu liṅge ca punaḥ prokṣaṇamācaret

'''94.22''' yathāśāstroktamārgeṇa saṃprokṣaṇamathācaret garbhālaye ceduddhāraḥ punarnirmāya maṇṭapam

'''94.23''' maṇḍalātpūrvaṃ saṃsthāpyaṃ rājarāṣṭrābhivṛddhaye ṣaṇmāse cedvatsarānte rājarāṣṭraṃ vinaśyati

'''94.24''' maṇḍalānte pratiṣṭhāpyaṃ yathāpūrvavidhikramāt yāgaśālāṃ samāpādya pañcāgniṃ sthāpayedguruḥ

'''94.25''' yathāpūrvaṃ tu nityaṃ syāttathā naimittikaṃ tathā dviguṇaṃ pūjayettatra dviguṇaṃ homamācaret

'''94.26''' brāhmaṇānbhojayettatra japahomau vidhikramāt liṅge ca pratimāyāṃ ca bimbabāhukirīṭayoḥ

'''94.27''' kaṇṭhe śrotre ca jānvośca pādasthale dvihastayoḥ hastamūle ca aṅgulyau nāsyāmoṣṭhe ca netrayoḥ

'''94.28''' kaṇṭhasya pṛṣṭhabhāge tu stanamadhye ca guhyake eteṣu jīrṇe bhede ca punarnirmāya kārayet

'''94.29''' evaṃ maheśabimbeṣūtsavoddharaṇakālake vāhaneṣu caiva tathā dārupīṭhe vimānake

'''94.30''' sūtrabandhe ca nārāce ūrdhvabimbe ca bhinnake mahotsavasya kāle vai bimboddhāraṇapūrvakam

'''94.31''' trirātre pañcarātre vā athavā saptarātrake nirmāya pūrvavad bimbaṃ saṃprokṣaṇamathācaret

'''94.32''' dhvajārohāditīrthāntadinakarma samācaret ratnaje hemaje vāpi rājate tāmra eva ca

'''94.33''' lohaje dāruje caiva iṣṭake bimbarūpake prāyaścittoktamārgeṇa yathāpūrvaṃ tathā nayet

'''94.34''' śailajastambhakaiścaiva dārujastambhakaistathā iṣṭikācūrṇasaṃyuktacitraśālābhiśobhite

'''94.35''' caturvedacatuḥstambhaiḥ ṣaṭśāstroparistambhakaiḥ śivatattvasvarūpakaśivarūpakakūṭakaiḥ

'''94.36''' varṇapadādhvatattvādhvamantrādhvapariveṣṭite kalābhuvanarūpaiśca madhyanṛttasuśobhite

'''94.37''' yakṣagandharvasiddhādyaiḥ kinnarairmunisevite trayastriṃśatkoṭidevaiḥ sevyabhaktaiḥ parivṛte

'''94.38''' tattatsthānasthitairdaivaistattaddevaiḥ pṛthak pṛthak bhitticitreṇa likhitaiḥ śilpaśāstroktamārgataḥ

'''94.39''' devadundibhighoṣaiśca haribrahmasutālakaiḥ śaṅkhakāhalajhallarīvādyaghoṣasamanvite

'''94.40''' bhūtavaitālapaiśācayakṣarakṣaḥparivṛte sabhāsthāne ca bāhye ca vicitraiśca samāvṛte

'''94.41''' devaghoṣabrahmaghoṣavādyaghoṣaiśca śobhite hemavarṣapuṣpavarṣairdevāsuranamaskṛte

'''94.42''' dvāraśālādvāradevanandikeśvarasevite vighneśaskandadeveśavṛṣabhabalipīṭhake

'''94.43''' dhvajadaṇḍādidikpīṭhe mahotsavasabhāpatim sabhākūṭe sthitaṃ nṛttaṃ ratnasiṃhāsanasthitam

'''94.44''' vāmabhāgasthitadevīsamālokanatatparam kuñcitapādasaṃkāśakiṅkiṇījālasaṃnibham

'''94.45''' ānandatāṇḍavaṃ pūrvaṃ saṃdhyātāṇḍavaṃ tatparam gaurītāṇḍavamevaṃ tu tathā tripuratāṇḍavam

'''94.46''' kālītāṇḍavamevaṃ tu munīnāṃ tāṇḍavaṃ tathā sabhātāṇḍavamevoktamityetatsaptatāṇḍavaiḥ

'''94.47''' saṃyukte ca sabhāmadhye devānāṃ mokṣadāyakam sakṛddarśanamātreṇa śivasāyujyadāyakam

'''94.48''' sabhākūṭe ca śikhare daṇḍapaṭṭikākaṇṭhake citraśāle ca pratimābhitticitrakadaivate

'''94.49''' eteṣu bhede jīrṇe ca punaḥ kalpanamācaret jīrṇoddhāre ca pūrvaṃ yattadrūpaṃ pratibimbake

'''94.50''' pūrvasthāne ca īśāne dakṣiṇottarapaścime bālālayaṃ ca kartavyaṃ pūrvavatkārayetkramāt

'''94.51''' bālālaye ca śālāyāṃ dārumṛṇmayanirmitān bhitticitrādideveśāṃstattatsthāneṣu nikṣipet

'''94.52''' devānāvāhya tatpūrve kumbhamadhye niyojayet mūrtihomaṃ tataḥ kuryādyātrāhomamamataḥ param

'''94.53''' maṇṭape sthalaśuddhiḥ syādvāstupūjāvidhikramāt puṇyāhaṃ vācayeddhīmānpañcagavyaṃ tataḥ param

'''94.54''' ācāryaṃ pūjayetpaścādvastrahemāṅgulīyakaiḥ kaṭakaṃ hemasūtraṃ ca karṇabhūṣaṇaṃ dhārayet

'''94.55''' ātmaśuddhistataḥ pūrvā sthānaśuddhirdvitīyikā tṛtīyā dravyaśuddhiḥ syāccaturthaṃ mantraśodhanam

'''94.56''' pañcamī kumbhaśuddhiḥ syātṣaṣṭakaṃ kumbhapūjanam saptamo devatāvāho hyaṣṭamaścārcanāvidhiḥ

'''94.57''' navamamagnikāryaṃ syāddaśamaṃ darpaṇārcanam ekādaśaścābhiṣeko dvādaśaṃ pratimārcanam

'''94.58''' trayodaśī sabhāpūjā caturdaśo nyāsa eva ca pañcaśaṃ tu naivedyaṃ ṣoḍaśaścopacārakaḥ

'''94.59''' naṭeśaśālāmadhye tu rakṣābandhanapūrvakam punaḥprokṣaṇaparyantaṃ nityāgnihavanaṃ tathā

'''94.60''' prāyaścittādihomaśca balidānaṃ viśeṣataḥ ācāryo dīkṣitaistatra nityapūjāṃ vidhāya tu

'''94.61''' punaḥprokṣaṇaparyantaṃ japaṃ pūjāṃ ca homayet brāhmaṇānbhojayettatra dakṣiṇābhyaṅgapūrvakam

'''94.62''' uttamaṃ maṇḍalāntaṃ syānmadhyamaṃ vatsarārdhakam adhamaṃ vatsarāntaṃ syāttrividhaṃ parikīrtitam

'''94.63''' jīrṇanimittakumbhaṃ ca pūrvavatkalpayetprabhoḥ bhitticitrādideveśānyathāpūrvaṃ prakalpayet

'''94.64''' punaḥprokṣaṇakālaśca muhūrte sthiralagnake saptāhe vā tryahe vāpi pañcāhe vā vidhīyate

'''94.65''' mṛtsaṃgrahaṇamārabhya dvitīyamaṅkurārpaṇam tṛtīyā vāstupūjā ca caturthaṃ nayanamocanam

'''94.66''' pañcamī pratimāśuddhiḥ ṣaṣṭhakaṃ maṇṭapārcanam saptamagnikāryaṃ ca aṣṭamaṃ mantrapūjanam

'''94.67''' navamī darpaṇapūjā daśamaṃ cābhiṣecanam ekādaśo jīvanyāso dvādaśaṃ mūrtipūjanam

'''94.68''' trayodaśaṃ ṣaḍadhvāṅgaṃ naivedyakaṃ caturdaśam pañcadaśe parīvāramarcayeddeśikottamaḥ

'''94.69''' upacāraḥ ṣoḍaśaḥ syātprokṣaṇe vidhirucyate yathāśāstroktamārgeṇa punarāvartanaṃ prabhoḥ

'''94.70''' ācāryaṃ pūjayettatra sarvālaṃkāraśobhitam daśaniṣkeṇa hemnā ca tāmbūlaṃ dāpayedguroḥ

'''94.71''' ācāryamanasastṛptirdevasānnidhyakāraṇam citrakūṭaṃ pratiṣṭhāpya śivaloke mahīyate

'''94.72''' sabhāpatiṃ pratiṣṭhāpya sa puṇyāṃ gatimāpnuyāt sajīvaḥ sansa dhanyaśca mokṣapadaṃ sa vīkṣate

'''94.73''' tṛṇakoṭiśatairvāpi mṛṇmayadaśakoṭikaiḥ iṣṭikāśatakoṭyā vā śilayā dāruṇāthavā

'''94.74''' citrakūṭasya nirmāṇaṃ yuktyā bhaktyā ca kalpayet śivālayasahasre ca muktikṣetre pratiṣṭhite

'''94.75''' yatphalaṃ tatkoṭiguṇitaṃ citrakūṭasya nirmitau tasya darśanamātreṇa śivaloke mahīyate

'''94.76''' sabhāpatau pratiṣṭhite sarve devāḥ pratiṣṭhitāḥ sakṛddarśanamātreṇa koṭiyajñaphalaṃ labhet

'''94.77''' naṭeśāya ca tāmbūlaṃ yo dadyānnṛttamūrtaye kalpakoṭisahasraṃ syācchivaloke mahīyate

===Kapitel 95===

''pañcanavatitamaḥ paṭalaḥ · kalākarṣaṇavidhiḥ''

'''95.1''' athātaḥ saṃpravakṣyāmi vidhānaṃ gurupuṅgava kalākarṣaṇake samyak śṛṇu śraddhāpuraḥsaram

'''95.2''' kalākarṣaṇametattu śāktaṃ śaivamiti dvidhā dūtikā ca tathā prāṇapratiṣṭhādyaiśca śāktake

'''95.3''' dūtikāprakṛtiśaktitvāt prāṇasya jaḍadharmataḥ cidātmani pareśe tu kalpanā nopapadyate

'''95.4''' akāraṃ ca ukāraṃ ca makāraṃ bindumeva ca ardhacandranirodhī ca nādaṃ ceti trayaṃ guro

'''95.5''' nādanāmakalāyāṃ tu saṃmitaṃ nādamucyate kalāpañcakamityuktametadākarṣayedguro

'''95.6''' evamāhuḥ kalākarṣaṃ śaivasya gurusattama kalātītaṃ śivaṃ sākṣādāvāhanavidhānataḥ

'''95.7''' āvāhayedviśeṣeṇa kalākarṣa udīritaḥ śāktaṃ śāktena kartavyaṃ śaivaṃ śaivena kārayet

'''95.8''' anyathā kurute mohādyadi tatkarma niṣphalam śivasya navadhā mūrtirbhāvyate gurusattama

'''95.9''' brahmā viṣṇuśca rudraśca īśvaraśca sadāśivaḥ bindurnādaśca śaktiśca śivaśceti prakīrtitā

'''95.10''' eṣā navavidhā mūrtistridhā bhogādikairmatā brahmā viṣṇuśca rudraśca bhogāṅgatvena kīrtitā

'''95.11''' abhikārāṅgakāvetau maheśvarasadāśivau bindurnādaḥ śaktiśivau layāṅgatvena kīrtitau

'''95.12''' kumbhe cāvāhayecchambhostanuṃ bhogalayāhvayām āvāhayettathā vahnau tanuṃ caivādhikārikām

'''95.13''' kalākarṣaṇametattu niśīthe cottamaṃ smṛtam daśanāḍyāṃ madhyamaṃ syādadhamaṃ pañcanāḍike divā cāpararātre vākarṣaṇaṃ naiva kārayet

===Kapitel 96===

''ṣaṇṇavatitamaḥ paṭalaḥ · śaktikalākarṣaṇavidhiḥ''

'''96.1''' śaktiścaturvidhā jñeyā tāsāṃ bhedaṃ śṛṇuśva vai svatantrā kevalā śaktiḥ sahajā gurupuṅgava

'''96.2''' miśrā ceti maheśasya śaktirbhinnā caturvidhā parameśvarasya yā śaktirdvidhā saṃparikīrtitā

'''96.3''' svaśaktiḥ prathamā proktā dvitīyā tu parigrahā śivādabhinnā yā śaktiḥ sā svaśaktiḥ prakīrtitā

'''96.4''' kāryamātre praklṛptā yā sā śaktirvai parigrahā śivālayeṣu sarvatra śivaliṅgena vai saha

'''96.5''' pratiṣṭhitā parāśaktiḥ svaśaktiriti saṃmatā śivālaye pradhānāyāḥ śakteranyatra vai guro

'''96.6''' sā parigrahaśaktiḥ syādāvṛtau sthāpitā guro svatantrā kevalā caiva sahajeti prakīrtitā

'''96.7''' śaktayastisra ākhyātāḥ svaśakterbhedato guro miśreti kathitā śaktiḥ parigraha itīritā

'''96.8''' svatantrākhyā tu yā śaktirdvidhā  sā parikīrtitā svapradhānaṃ tathā svāṅgamiti deśikasattama

'''96.9''' prākārasya tṛtīyasya dvitīyasyāthavā guro prākāragopurairyuktaṃ divyamaṇṭapasaṃvṛtam

'''96.10''' śikhareṇa dhvajenāpi balipīṭhena saṃyutam vṛṣeṇa sahitaṃ ramyaṃ devyāgāraṃ salakṣaṇam

'''96.11''' tasminpratiṣṭhitā śaktiḥ svapradhānā bhavedguro śivāgārapuradvāraṃ yasyāṃ diśi prakalpitam

'''96.12''' tādṛk caiva bhavettatra devyāgārasya saṃnidhiḥ pūrvābhimukhamīśasya saṃnidhānaṃ bhavedyadi

'''96.13''' saṃnidhiḥ paścime vā syād vāme dakṣiṇato’pi vā svapradhānaparāśakterniyamo nāsti saṃnidhau

'''96.14''' paścimābhimukhamīśasya saṃnidhiryadi deśika svapradhānaparāśakteḥ saṃnidhiḥ pūrvake bhavet

'''96.15''' svapradhānamiva svāṅgamīśāgāre viśeṣataḥ svāṅgasyāpi tathā śakteḥ pradhānasyeva deśika

'''96.16''' pṛthagālayasaṃyuktaṃ vṛṣabhadhvajasaṃyutam parivāravihīnaṃ ca bhavetprāsādamuttamam

'''96.17''' sahajāyāḥ parāśaktergarbhāvaraṇato’thavā antarhāre maheśasya saṃnidhau purato diśi

'''96.18''' dakṣiṇābhimukhasānnidhyamunmukhīkṛtya deśikaḥ śivāgāre vāmapārśve puro’gāraṃ prakalpayet

'''96.19''' kevalāyāstathā śakteḥ śivāgārātpṛthak sthale prākārād bāhyadeśe tu kalpayedālayaṃ śubham

'''96.20''' gopuradhvajasaṃyuktaṃ prāsādāvaraṇairyutam miśrāyāstu parāśakteḥ śivāgāre gurūttama

'''96.21''' svaśakteranyato’gāraṃ prāvṛtau kārayedvaram parigrahaśaktireṣā syādīśasya gurusattama

'''96.22''' śivālayādanyadeśe pṛthakprāsādasaṃyutam gopuradhvajasaṃyuktaṃ prākārairmaṇṭapairvṛtam

'''96.23''' siṃhena vātha haṃsena yutaṃ lakṣaṇasaṃyutam balipīṭhena sahitaṃ kārayedālayaṃ śubham

'''96.24''' śivālayasthāpitāyāḥ śakterna pṛthagutsavaḥ svapradhānaṃ tathā svāṅgaṃ pṛthagutsavamarhati

'''96.25''' etāsāṃ śivaśaktīnāmāvṛteḥ pūjanaṃ śṛṇu svapradhānā tathā svāṅgā sahajā kevalā tathā

'''96.26''' etāsāṃ śivaśaktīnāṃ prathamāvaraṇe guro parāmādiṃ tathaivecchāṃ kriyāṃ jñānābhidhāṃ tathā

'''96.27''' pañcaśaktīḥ samāvāhya pūjāṃ kuryādviśeṣataḥ hṛdayādiṣaḍaṅgāni vidyādehaṃ ca deśika

'''96.28''' netranyāsaṃ ca vinyasya pūjayed gurupuṅgava dhārikādyāstathā śaktīrdvitīyāvaraṇe tathā

'''96.29''' dhyātvāvāhya tato pūjāṃ kārayed gurupuṅgava tṛtīyāvaraṇe pūjāṃ kuryādvāmādikā anu

'''96.30''' śacīmukhyāstathā śaktīḥ samāvāhya yathāvidhi caturthāvaraṇe pūjāṃ kārayedgurusattama

'''96.31''' śacīmukhānāṃ śaktīnāmāyudhāni yathāvidhi pañcamāvaraṇe dhyātvā pūjāṃ kuryād gurūttama

'''96.32''' miśrā śaktiryadi bhavetprathamāvaraṇe tadā umāmbikāmukhāḥ śaktīrhṛdayādīni sādaram

'''96.33''' vidyādehaṃ ca netraṃ ca nyasanpūjāṃ samācaret vāmādikāstathā śaktīḥ pūjayed dvitayāvṛtau

'''96.34''' kṣobhiṇyādīstathā śaktīḥ samāvāhya yathāvidhi tṛtīyāvaraṇe pūjāṃ kārayed gurusattama

'''96.35''' śacīmukhyāstathāvāhya śaktīścaiva yathāvidhi caturthāvaraṇe hyarcāṃ kārayed guruvallabha

'''96.36''' śacīmukhānāṃ śaktīnāmāyudhāni krameṇa ca pañcamāvaraṇe dhyātvā pūjāṃ vai parikalpayet

===Kapitel 97===

''saptanavatitamaḥ paṭalaḥ · gauryutsavavidhiḥ''

'''97.1''' gauryutsavavidhiṃ vakṣye nṛparāṣṭravivardhanam sarvasaṃpatsamṛddhyarthaṃ yaśovṛddhikaraṃ śubham

'''97.2''' savo duḥkha iti khyātaḥ sarvasaṃpannivārakaḥ udgatastu savo yasmāttasmādutsava ucyate

'''97.3''' utsavastrividhaḥ proktaḥ sa nityādisamanvitaḥ eteṣāṃ śaivavatkālaḥ ketutāḍanamaṅkuram

'''97.4''' dhvajadaṇḍapramāṇaṃ ca śikharādipramāṇakam ādiśaktiradhobhāgaṃ tattrikoṇasamanvitam

'''97.5''' rasakoṇasamāyuktamādiśakterataḥ param caturaśrasamāyuktamūrdhvaṃ tacchaktirūpakam

'''97.6''' skandhatrayasamāyuktaṃ copadaṇḍasamanvitam pramāṇamuktavatkuryāddaṇḍabhāge ca śaivavat

'''97.7''' aṇuśaktiḥ paṭaḥ proktaḥ saromadarbhamālyakaḥ paṭasya dīrghatāraṃ ca śaivavatsamudāhṛtam

'''97.8''' ekaikāṅgulahīnaṃ tu kuryāttacchilpavittamaḥ tatpaṭe madhyabhāge tu kṛṣṇasāraṃ likhetkramāt

'''97.9''' itaraṃ śaivavallikhya cotpalaṃ tu samālikhet kṛṣṇasāraḥ śaktirādyā śāntā ceti varā śubhā

<poem>
tigmaśṛṅgāya vidmahe vedapādāya dhīmahi
tannaḥ sāraḥ pracodayāt
tīkṣṇakarṇāya vidmahe vedapādāya dhīmahi
tannaḥ eṇaḥ pracodayāt
</poem>

'''97.10''' tatpaṭe madhyabhāge tu vṛṣabhaṃ vā samālikhet śāntaśca satkalaścaiva sāraśca taruṇastathā

'''97.11''' sākṣī ca samidhaścaiva sadgimiśca tato varaḥ lokeśāṃstānviśeṣeṇa parivārakamucyate

'''97.12''' kāmī gamīkā mohī ca nīlī bālā vicāriṇī dāmī caiva tathā cetā parivārakamucyate

'''97.13''' kṛṣṇasāraśca vṛṣabho viṣṇumūrtī prakīrtite mokṣāvatāre kṛṣṇastu vṛṣaḥ sukhāvatārake

'''97.14''' śambhuvāstupradeśe cecchaktyutsavaṃ kṛtaṃ yadi vṛṣabhaṃ caiva siṃhaṃ ca matimānvilikhetpaṭe

'''97.15''' śaktyagre saṃsthitamukṣaṃ vilikhettadā mantravit susnigdhaṃ kṛṣṇasāraṃ ca likhettu deśikājñayā

'''97.16''' śaktervāstupradeśe cettacchakterutsave kṛte vṛṣabhaṃ vātha siṃhaṃ vā paṭe samyaglikhedbudhaḥ

<poem>
tīkṣṇaśṛṅgāya vidmahe vedapādāya dhīmahi
tanno vṛṣaḥ pracodayāt
</poem>

'''97.17''' vṛṣasya śaktirākhyātā vṛṣāṇī ceti nirmalā vīrokṣo nirmalokṣaśca vijayokṣastathaiva ca

'''97.18''' śūrokṣako drutokṣaśca sarokṣaḥ samyagukṣakaḥ nayokṣo hyevaṃ nāmāni vṛṣasya parivārakāḥ

<poem>
śāntikarṇāyai vidmahe vedapādāyai dhīmahi
tanno vṛṣāṇī pracodayāt
</poem>

'''97.19''' dugdhā sārā rasā kāmā dātrī dāmā sukhāvahā tathaiva vijayī caiva vṛṣāṇyāḥ parivārikāḥ

<poem>
tīvrakarṇāya vidmahe dharmapiṇḍāya dhīmahi
tannaḥ siṃhaḥ pracodayāt
</poem>

'''97.20''' hāsyasiṃhīti vikhyātā siṃhasya śaktiruttamā kvaṇatsiṃho lasatsiṃho nārasiṃhastathaiva ca

'''97.21''' nadatsiṃho nādasiṃho drutasiṃho’rasiṃhakaḥ kāmasiṃhastu vai hyete siṃhasya parivārakāḥ

<poem>
vastrotrāyai vidmahe dharmapuṣṭyai ca dhīmahi
tannaḥ siṃhī pracodayāt
</poem>

'''97.22''' kopā ca mārutā martyā tārakī sarvamohinī kruddhī kuhū valī vakrī siṃhyaṣṭaparivārikāḥ

'''97.23''' vārā ca vakulī mālī māyī somī vilāsinī mudatī kundadantī ca siṃhyaṣṭaparivārakāḥ

'''97.24''' grahāhe dhātvahe vātha bāṇāhe tridine’thavā mokṣāhe vātha kartavyamutsavaṃ vidhipūrvakam

'''97.25''' manvahe vātha randhrāhe dhvajārohaṇamārabhet campakaṃ candanaṃ caiva khadiraṃ saralaṃ tu vā

'''97.26''' asanaṃ vaiṇavaṃ caiva madhūkaṃ kramukaṃ tathā aśokaṃ caiva bilvaṃ ca kīrtitāḥ ketudāravaḥ

'''97.27''' sthānāni śaivavatproktamevaṃ vai ketudāruṇām tatpaṭaṃ rajjunā yuktaṃ ropayecchaivakarmavit

'''97.28''' bheryutsavaṃ tataḥ kṛtvā utsavaṃ punarārabhet yonikuṇḍaṃ caturdikṣu turyāśraṃ tvīśagocare

'''97.29''' yogeśasthāpanaṃ kṛtvā svasvamantraiśca homayet sāyaṃ prātarbaliṃ dattvā antye cotsavamārabhet

'''97.30''' annaśaktisamāyuktaṃ śaktimūrtisamāyutam rudrāṅgulasamāyuktamuttamaṃ tatprakīrtitam

'''97.31''' akṣyaṅgulavihīnaṃ tu madhyamasyādhamasya tu pratimālakṣaṇoktena kārayecchaktirūpakam

'''97.32''' etadutsedhamānena cānnaśaktisvarūpakam balirūpaṃ tato dhyātvā yajecchaktiṃ tu madhyame

'''97.33''' dvinetraṃ dvibhujaṃ śāntaṃ koṭikoṭisamujjvalam brahmādīśānaparyantaṃ brahmadevyādidevatāḥ

'''97.34''' kṣīrānnamājyasaṃyuktamāvāhanabaliṃ dadet pūrve gaṇeśaśaktiḥ syātpiśācī syādidvatīyake

'''97.35''' tṛtīye vahnidevī syāccharvaśaktiścaturthake pañcame bhūtaśaktiḥ syādvallīrātraṃ tu ṣaṣṭhakam

'''97.36''' saptame ṛṣidevaḥ syānnāgeśī vasurātrake indrāṇirātraṃ navamaṃ bhūmidevī tataḥ param

'''97.37''' ekādaśe ca rudrāṇī tatpare tu parāniśā mudgānnaṃ panasaṃ caiva dāḍimaṃ ghṛtasaṃyutam

'''97.38''' prathame’hani dadyācca tacchaktimantramuccaran sarṣapānnaṃ ghṛtopetaṃ kadalīphalasaṃyutam

'''97.39''' dvitīye’hani dadyācca tacchaktimantramuccaran pāyasānnaṃ gulopetaṃ saghṛtaṃ lājasaṃyutam

'''97.40''' tṛtīye’hani dadyācca tacchaktimantramuccaran tilānnaṃ ghṛtasaṃyuktaṃ godadhnā tu samanvitam

'''97.41''' caturthe’hani dadyācca tacchaktimantramuccaran haridrānnaṃ ghṛtopetaṃ piśācaphalasaṃyutam

'''97.42''' pañcame’hani dadyācca tacchaktimantramuccaran gulodanaṃ ghṛtopetaṃ nālikerasamanvitam

'''97.43''' ṣaṣṭhe cāhani dadyācca vallīmantramanusmaran gulodanaṃ ghṛtopetaṃ payasā ca pariplutam

'''97.44''' saptame’hani dadyācca tacchaktimantramuccaran śuddhānnamājyasaṃyuktamikṣudaṇḍasamanvitam

'''97.45''' aṣṭame’hani dadyācca tacchaktimantramuccaran raktānnaṃ madhusaṃyuktamapūpaṃ ghṛtasaṃyutam

'''97.46''' navame’hani dadyācca tacchaktimantramuccaran ghṛtānnaṃ gulasaṃyuktaṃ kadalīphalasaṃyutam

'''97.47''' daśame’hani dadyācca tacchaktimantramuccaran madhvannamājyasaṃyuktaṃ kṛsarāpūpasaṃyutam

'''97.48''' ekādaśāhe dadyācca tacchaktimantramuccaran śālyannaṃ ca ghṛtopetaṃ tilacūrṇasamanvitam

'''97.49''' dvādaśe’hani dadyācca tacchaktimantramuccaran praṇavādi caturthyantaṃ svanāmapadamadhyamam

'''97.50''' svāhāntaṃ balinirdeśe sarvebhya iti nirdiśet śreṣṭhaṃ karatalaṃ proktaṃ madhyamaṃ muṣṭimātrakam

'''97.51''' kanyasamakṣamātraṃ syādevamevaṃ baliṃ kṣipet karavīraṃ padmapuṣpaṃ punnāgaṃ pāṭalī tathā

'''97.52''' droṇapuṣpaṃ ca mandāraṃ naṃdyāvartaṃ ca paṭṭikā mālatī mallikā caivamutpalaṃ ketakī tathā

'''97.53''' evamevaṃ viśeṣeṇa dvādaśe dvādaśaṃ tathā prathame cārkapatraṃ ca kolake haṃsavāhanam

'''97.54''' śūle hariṇavāhaṃ ca caturthe kṛṣṇasārakam pañcame syātpuṣpadhāma gavayo rasa eva ca

'''97.55''' pātāle śeṣamadhye tu lokeśe vyāghravāhanam graha eva rathaḥ prokto daśāhe tīrthamācaret

'''97.56''' bhogaśaktyā virodhaśca caturthadivase tataḥ pravṛtto bahuvidhaḥ kāryaṃ saṃdhānadravyahetunā

'''97.57''' saṃdhikarma ca kartavyaṃ tato bhūtadine kramāt devadāsyeti tatproktaṃ bhogaśaktyanusāriṇā

'''97.58''' tairvirodhaḥ prakartavyaścāru bhaktasamanvitam vyañjanaṃ bhojanaṃ bhajya bhaktadravyaṃ kramāddadet

'''97.59''' ṣaṣṭhe kṣapaṇasaṃhāraṃ parameśvaravatkṛtam sarvabhaktajanairyuktaṃ mukulāñjalibhistataḥ

'''97.60''' garukardamajaṃ kāryaṃ māraśatruṃ bhajedvaram mukulāñjalibhiścaiva sarvabhaktajanaistataḥ

'''97.61''' māsarkṣāṇi ca sarvāṇi śaṃkaroktavadācaret yatrāsti mantrabhedaśca kriyābhedo na vidyate

'''97.62''' baliṃ dadyātkrameṇaiva śaṃkarasya ca vāstuni athavā vidhivaddhīmānna tu grāmādibhedataḥ

'''97.63''' anuktaṃ cedbhavetkiṃcicchaṃkaroktavadācaret viparītaṃ na kartavyaṃ kṛtaṃ cetkartṛnāśanam

'''97.64''' taddoṣaśamanārthāya mahāśāntiṃ samācaret evamuktakrameṇaiva punarutsavamācaret

===Kapitel 98===

''aṣṭanavatitamaḥ paṭalaḥ · yāgaśālālakṣaṇavidhiḥ''

'''98.1''' athātaḥ saṃpravakṣyāmi yāgaśālāvidhiṃ śṛṇu yakāro yajanārthaśca gamanārtho gakārakaḥ

'''98.2''' śakāraśca sukhārthaḥ syāllakāro laya ityapi sukhārthaṃ ca layasthāne gamanārthaṃ suyāgakaḥ

'''98.3''' yānayāgamayī yāgaśāleti parigīyate yāgārthaṃ maṇṭapaṃ kuryāddharmyāgre vātha pārśvayoḥ

'''98.4''' pañcaprākārasaṃyukte cālaye ca makhālayam garbhāvaraṇake cāpi antarhāre’thavācaret

'''98.5''' athavā madhyahāre cāpyagrayoḥ pārśvayorapi yāgaśālāṃ prakalpeta tadbāhyaṃ parivarjayet

'''98.6''' vyāmohātkurute puṃsāṃ rājarāṣṭrasya doṣṛkṛt tasmātsarvaprayatnena uktamārgeṇa kārayet

'''98.7''' catuḥprākārake cāpi triprākāre tvathāpi vā dviprākārake tvathavāpyekaprākārake’pi ca

'''98.8''' prākārābhyantare caiva yāgaśālāṃ prakalpayet prākārabāhyadeśe tu yāgaśālāṃ na kārayet

'''98.9''' īśāne caindradeśe ca kubere ca makhālayaḥ uttamaśceti vikhyāto vāruṇo  madhyamo bhavet

'''98.10''' āgneye nairṛte vāyāvadhamaśca prakīrtitaḥ adhamācādhamaḥ prokto dakṣiṇe tu pradeśake

'''98.11''' athavā ramyadeśe tu yāgaśālāṃ prakalpayet uttamaṃ pīṭhamānaṃ cāpyācāryahastamānakam

'''98.12''' madhyamaṃ ceti vikhyātaṃ hastamānaṃ dvidhā matam mānaṃ mātrāṅgulaṃ caiva dehalabdhaṃ tridhā bhavet

'''98.13''' aṅgulatritayaṃ proktaṃ mānāyāmaṃ yavāṣṭakam yavodareṇa guṇitaṃ mānāṅgulamiti smṛtam

'''98.14''' ācāryadakṣiṇe haste kaniṣṭhāṅgulimadhyake parvādūrdhvaṃ samārabhya tatparvāgrāntakaṃ kramāt

'''98.15''' āyāmaṃ ca yathāproktaṃ mātrāṅgulamiti smṛtam madhyamāṅgulimadhye tu parvadīrghasya tārakam

'''98.16''' āyāmaṃ ca yathāproktaṃ mātrāṅgulamathāpi vā yallabdhotsedhamānaṃ tu caturviṃśacchataṃ kuru

'''98.17''' teṣvekabhāgamaṅgulyaṃ dehalabdhamiti smṛtam prāsādaṃ maṇḍapaṃ caiva vimānaṃ gopurādikam

'''98.18''' prākārastambhaśālāṃ ca nadīṃ cādhvānadurgakam grāmādīnāṃ taṭākaṃ ca mānāṅgulena kārayet

'''98.19''' yāgopakaraṇaṃ caiva yāgaśālādikaṃ kramāt mātrāṅgulena kartavyaṃ mānāṅgulaṃ na kārayet

'''98.20''' mātrāṅgulacaturviṃśatyaṅgulaṃ hastamānakam tena hastena kartavyaṃ yāgaśālādikaṃ caret

'''98.21''' mūlapīṭhasya nāhaṃ ca trividhaṃ ca vibhājitam teṣvekabhāgahastaṃ ca uttamaṃ ceti kīrtitam

'''98.22''' ācāryahastamānaṃ ca madhyamaṃ samudāhṛtam ācāryadakṣiṇe haste madhyāṅgulisamāgrake

'''98.23''' saptaviṃśatyaṅgulaṃ ca madhyamaṃ hastamānakam ācāryadakṣiṇe haste madhyamāṅgulimadhyame

'''98.24''' parvadīrghāyataṃ cāthāpyadhamaṃ hastamānakam caturviṃśatyaṅgulācca nyūnahastaṃ na kārayet

'''98.25''' sakalādīni berāṇi bālaliṅgāni vai śṛṇu dehalabdhena kartavyamanyathā rāṣṭranāśanam

'''98.26''' tasmātsarvaprayatnena uktamārgeṇa kārayet yāgaśālāṃ pravakṣyāmi āyāmaṃ ca śṛṇuṣva vai

'''98.27''' pañcāśaddhastamānaṃ ca uttamaṃ ceti kīrtitam catvāriṃśanmadhyamaṃ ca adhamaṃ triṃśatistathā

'''98.28''' adhamāccādhamaṃ proktaṃ pañcādaśakaraṃ tathā athavā dvādaśaṃ hastaṃ tasmānnyūnaṃ na kārayet

'''98.29''' ekādaśatrihastāntaṃ prāyaścitte ca saṃgrahet hastamātraṃ khanedbhūmiṃ vīkṣeta deśikottamaḥ

'''98.30''' suvarṇaṃ rajataṃ tāmraratnādyādi ca dravyakam vāpīkūpataṭākaṃ cāpīṣṭikā śailameva ca

'''98.31''' dṛśyaṃ cecchubhadaṃ proktamaśubhaṃ ca tataḥ śṛṇu vṛścikaṃ sarpamarṇḍūkaṃ valmīkaṃ tu pipīlikā

'''98.32''' aṅgāranakhabhasmāni romāsthicarmakaṃ tathā anyeṣāṃ viṣajantūnāṃ darśanaṃ cāśubhāvaham

'''98.33''' vṛścikādīnparityajya punarvāstuṃ samācaret anyathā śivatulyo’pi vighnairevābhibhūyate

'''98.34''' mṛttikāṃ pūrayetpaścānnava ratnāni vinyaset tadvedyāścāpyadhobhāge ratnanyāsaṃ ca kārayet

'''98.35''' samīkṛtyopalipyātha darpaṇodarasaṃnibham tasyordhve sūtravinyāsamuttamādikrameṇa tu

'''98.36''' śālāpañcavidhaṃ sūtraṃ rudraṃ viṣṇuṃ ca brahmakam manuṃ raviṃ ca pañcaitatsūtrabhedāḥ prakīrtitāḥ

'''98.37''' catuścatvāriṃśatiśca rudrasūtramiti smṛtam catustriṃśatisūtraṃ ca viṣṇusūtraṃ prakīrtitam

'''98.38''' caturviṃśatisūtraṃ ca brahmasūtramudāhṛtam caturdaśaṃ ca sūtraṃ ca manusūtraṃ prakīrtitam

'''98.39''' dvādaśaṃ ravisūtraṃ ca pañcasūtraṃ kramātkuru athātaḥ saṃpravakṣyāmi rudrasūtrapadakramam

'''98.40''' madhye śivapadaṃ proktamekaṃ vai caturaśrakam paritastasya cāṣṭāsu padānyaṣṭau prakalpayet

'''98.41''' etacchaktipadaṃ nāma samadīrghāyataṃ śubham paritastasya vai kuryātpadānāṃ ṣoḍaśaṃ guro

'''98.43''' etadbindupadaṃ nāmnā proktaṃ deśikasattama paritaśca tataḥ kuryātpadānāṃ ca caturvasu

'''98.44''' sadāśivapadaṃ proktaṃ śṛṇu tatparitastathā catvāriṃśatpadenaiva māheśvaramudāhṛtam

'''98.45''' aṣṭācatvāriṃśakaiśca pūrvavatparitaḥ kṛtaiḥ aṣṭavidyeśvarāṇāṃ ca padaṃ proktaṃ gurūttama

'''98.46''' ṣaṭpañcāśatpadaṃ proktamaiśaṃ vai parikīrtitam catuṣṣaṣṭipadaistadvacchuddhamāyāpadaṃ smṛtam

'''98.47''' dvisaptatipadaiścaiva māntraṃ padamudāhṛtam tathāśītyā padenaiva varṇapadamudīritam

'''98.48''' aṣṭāśītipadenaiva padaṃ gaṇapadaṃ smṛtam ṣaṇṇavatyā padaiḥ kuryātprakṛteḥ padamuttamam

'''98.49''' tathā kālapadaṃ proktaṃ caturbhiḥ sahitaṃ śatam kalāpadaṃ tataḥ kuryācchataṃ dvādaśasaṃyutam

'''98.50''' vidyāpadaṃ tataḥ kuryācchataṃ viṃśatimiśritam padaṃ ca vaiṣṇavaṃ proktamaṣṭāviṃśatikaiḥ śatam

'''98.51''' vidyāpadaṃ tataḥ kuryācchataṃ viṃśati miśritam padaṃ ca vaiṣṇavaṃ proktamaṣṭā viṃśatikaiḥ śatam

'''98.51a''' tato’vidyāpadaṃ proktaṃ padaiḥ ṣaṭtriṃśakaiḥ śatam catuścatvāriṃśakaiśca śataṃ ca vikṛtirbhavet

'''98.52''' dvipañcāśaiḥ śataṃ brāhmaṃ padaṃ proktaṃ gurūttama ṣaṣṭyā śataiḥ padaiḥ kuryād daivaṃ deśikasattama

'''98.53''' aṣṭaṣaṣṭyā śataṃ proktaṃ rākṣasaṃ gurusattama pradhānakumbhasthānaṃ hi padaṃ śaivaṃ samīritam

'''98.54''' śakteḥ pade nyasetpadmaṃ nādasya paritaḥ pade catuṣkoṇe catustambhān nikhaneccheṣamadhyake

'''98.55''' aṣṭamaṅgalakānyantaḥsaṃcāraṃ dvādaśe pade bindoḥ sadāśivasyāpi padayorantare guro

'''98.56''' kuṇḍaṃ kuryād vidhānena rudiraṃ paritaḥ kramāt māheśvarapade caiva bahiḥsaṃcāramīritam

'''98.57''' aṣṭavidyeśvarasyātha padeṣu parito guro padamātrapramāṇena padārdhamitito’thavā

'''98.58''' bhittiṃ prakalpayetsamyagutsedhād dvādaśāṅgulam pūrvādiṣu dikṣu madhye padaṃ ca dvipadaṃ kramāt

'''98.59''' dvārārthaṃ kalpayettatra catuṣkoṇeṣu deśika nikhaneccaturaḥ stambhān tathā dvāreṣu pārśvataḥ

'''98.60''' dvidvi sthūṇāṃśca nikhanet sudṛḍhaṃ ca manoharam dvādaśānāmadhasteṣāṃ stambhānāṃ ca tataḥ śṛṇu

'''98.61''' daśahastasamutsedhamuttamaṃ parikīrtitam saptahastaṃ madhyamaṃ syādadhamaṃ pañcahastakam

'''98.62''' saptahastamitotsedhaṃ tadardhāyāmasaṃyutam dvāramuttamametadvai ruciraṃ sādhu kalpitam

'''98.63''' pañcahastamitotsedhaṃ tadardhāyāmasaṃmitam dvāreṣu madhyamaṃ dvāraṃ tadanyadadhamaṃ bhavet

'''98.64''' dvārasyordhve dvipārśve’pi dviśūlaṃ parikalpayet dvārasyordhve tathā madhye śūlamekaṃ prakalpayet

'''98.65''' aṣṭavidyeśvarānkumbhānsthāpayed bhittimastake bhittau ca paritaścāṣṭavidyeśvaraghaṭānnyaset

'''98.66''' tathā caiśaṃ padaṃ cāntaḥsaṃcārapadamīritam śuddhamāyāpadasyāpi tathā mantrapadasya ca

'''98.67''' madhye kuṇḍaṃ vidhānena kārayed gurupuṅgava tato varṇapadaṃ proktaṃ bahiḥsaṃcārasaṃjñikam

'''98.68''' tṛtīyāvṛtike bhittiṃ padaṃ gaṇamudāhṛtam padamātraṃ padārdhaṃ vā bhittiṃ samyakprakalpayet

'''98.69''' dvādaśāṅgulakotsedhāṃ rucirāṃ dṛḍhasaṃdhikam pūrvādiṣu caturdikṣu madhye ca dvipadaṃ kramāt

'''98.70''' dvārārthaṃ kalpayedvātha catuṣkoṇeṣu deśika nikhaneccaturaḥ stambhān dvāreṣu ca dvipārśvayoḥ

'''98.71''' dvidvistambhāṃśca nikhaned dṛḍhaṃ ca ruciraṃ guro dvitīyāvṛtikoṇasthastambhe rekhāśrake pade

'''98.72''' sthāpayetstambhamekaikaṃ kramādaṣṭau gurūttama tṛtīyāvaraṇe cetthaṃ stambhānāṃ viṃśatirmatā

'''98.73''' bhittau ca paritaścāṣṭaghaṭān saṃsthāpayedguro naṃdyādīnaṣṭakān sthāpya bhittiṃ ca paritaḥ kramāt

'''98.74''' prakṛteḥ padamantasthasaṃcārapadamīritam kālākhyasya padasyāpi kalāyāścaiva madhyataḥ

'''98.75''' yathāvidhi samuddiṣṭaṃ kuṇḍaṃ sādhu prakalpayet vidyāpadaṃ tataścaiva bahiḥsaṃcāramīritam

'''98.76''' tato viṣṇupadaṃ proktaṃ caturthāvṛtibhittikam pūrvavaccaturaḥ stambhān catuṣkoṇeṣu kārayet

'''98.77''' pūrvavad dvārarekhāyāṃ kuryāttu dvipadaṃ tathā tṛtīyāvaraṇasthānaṃ koṇamadhyamavartinām

'''98.78''' stambhāṃśca nikhanetstambhāṃstathā rekhāpade dṛḍham indrādīśāntakalaśān parito bhittimastake

'''98.79''' tattaddikṣu nyasedevaṃ krameṇa gurusattama īśānadakṣiṇastambhapārśve brahmaghaṭaṃ nyaset

'''98.80''' nirṛtyuttarataḥ stambhapārśve viṣṇughaṭaṃ nyaset tato’vidyāpadaṃ proktamantaḥsaṃcārasaṃjñayā

'''98.81''' vikṛterbrahmaṇaścaiva madhye kuṇḍaṃ prakalpayet tato daivaṃ padaṃ proktaṃ bahiḥsaṃcāramānataḥ

'''98.82''' tato vai rākṣasaṃ proktaṃ pañcamāvṛtibhittikam pūrvavad dvārarekhāyāṃ dvāradeśaṃ prakalpayet

'''98.83''' catuḥkoṇe catuḥstambhānnikhaned dṛḍhameva hi pūrvoktavaccaturdvāri dvirdviḥstambhaṃ prakalpayet

'''98.84''' caturthāvaraṇe khātaḥ stambharekhānusārataḥ ṣaṭṣaṭstambhān catuḥpārśve nikhanedgurupuṅgava

'''98.85''' purandarādiviṣṇvantadevānāmāyudhāni hi tattadrekhānusāreṇa pañcamāvṛtibhittike

'''98.86''' stambhapārśve sthāpayet sādaraṃ gurusattama prathamāvaraṇe proktaṃ stambhānāṃ tu catuṣṭayam

'''98.87''' dvitīyāvaraṇaṃ caiva dvādaśastambhamaṇḍitam tṛtīyāvaraṇaṃ caiva viṃśatistambhasaṃkulam

'''98.88''' caturthāvaraṇasthānāmaṣṭāviṃśatirīritā pañcamāvaraṇaṃ proktaṃ ṣaṭtriṃśatstambhamaṇḍitam

'''98.89''' pade caikonapañcāśadaṣṭaśatasahasrake pañcāvaraṇasaṃyuktaṃ stambhānāṃ śatamīritam

'''98.90''' rudrasūtrakramaṃ proktaṃ viṣṇusūtraṃ tataḥ śṛṇu viṣṇusūtre kramātproktaṃ padānāṃ tu vasudvayam

'''98.91''' śaivaṃ padaṃ samārabhya sarvaṃ viṣṇupadāntataḥ pūrvoktavat prakartavyaṃ padāvaraṇapūrvakam

'''98.92''' rudrasūtrād viṣṇusūtre bhedametad nibodhatām avidyādirākṣasāntaiḥ pañcamāvaraṇaṃ purā

'''98.93''' rudrasūtre kila proktaṃ viṣṇusūtre na kalpayet catuṣṭayairāvaraṇaiḥ kalpitaṃ vaiṣṇavaṃ guro

'''98.94''' pañcamāvṛtike proktānyāyudhāni krameṇa hi tattaddevaghaṭāṃścaiva yuktyā sthāne prakalpayet

'''98.95''' catuṣṣaṣṭiḥ samākhyātāḥ stambhānāmatra deśika trayastriṃśatpadaṃ proktaṃ daśasaptāvṛtau pade

'''98.96''' navāśītisahasraṃ ca padamatra samīritam viṣṇusūtrakramaṃ proktaṃ brahmasūtraṃ tataḥ śṛṇu

'''98.97''' brahmasūtre kila proktaṃ padamekādaśaṃ guro śaivaṃ padaṃ samārabhya sarvaṃ gaṇapadāvadhi

'''98.98''' pūrvoktavidhinā kuryāt padāvaraṇapūrvakam viṣṇusūtrād brahmasūtre bhedaṃ śṛṇu gurūttama

'''98.99''' prakṛteḥ padamārabhya tato viṣṇupadāntakam caturthāvaraṇaṃ proktaṃ brahmasūtre na kārayet

'''98.100''' āvṛtitritayādbrahmasūtrametatprakīrtitam pūrvavatkalpite cātrāvaraṇe’tha tṛtīyake

'''98.101''' viṣṇusūtrāntime nyastaṃ sarvamāvaraṇe guro tṛtīyāvaraṇe hyevaṃ tattaddeśānusārataḥ

'''98.102''' stambhapārśve bhittiśīrṣe sthāpayeddharimīśvaram navaviṃśatibhiścaiva tathā pañcaśataiḥ padaiḥ

'''98.103''' trayastriṃśatstambhakaiśca trayoviṃśatibhiḥ padaiḥ dvādaśāvṛtipādaiśca brahmasūtraṃ prakīrtitam

'''98.104''' manusūtravidhiṃ vakṣye sādaraṃ śṛṇu deśika mānave hi kila proktaṃ padānāṃ saptakaṃ kramāt

'''98.105''' śaivaṃ padaṃ samārabhya vidyeśvarapadāvadhi sarvaṃ pūrvoktavidhinā kāryaṃ deśikasattama

'''98.106''' āvṛterdvitayaṃ proktaṃ madhye śaivapade tathā pradhānakumbhaṃ vinyasya tasya vāme tu vardhanīm

'''98.107''' bāhye śaktipade caiva vidyeśvaraghaṭānapi brahmasūtroktavidhinā tṛtīye’tha niveśayet

'''98.108''' śastrendranandikumbhādisthāpanaṃ kārayediha tattaddeśe krameṇaiva tattaddakṣiṇapārśvataḥ

'''98.109''' athavānyaprakāreṇa manusūtravidhiṃ śṛṇu caturdaśasamaṃ sūtraṃ prāgudakca vilekhayet

'''98.110''' madhye navapadāṃ vedīṃ tadbāhye ṣoḍaśaṃ padam

'''98.111''' tadbāhye ca caturviṃśatpadaṃ ceti prakīrtitam dvātriṃśacca padaṃ proktaṃ vedikāyāstṛtīyake

'''98.112''' catvāriṃśatpadaṃ proktaṃ vedikāyāścaturthake aṣṭācatvāriṃśatiśca pañcamāvaraṇe padam

'''98.113''' pañcamāvaraṇasthānaṃ parito bhittikaṃ kuru dvārārthaṃ tripadaṃ tyajya caturdikṣu viśeṣataḥ

'''98.114''' caturdikṣu caturdvāraṃ kalpayettādṛśaṃ guro śeṣaṃ bhittyākṛtiḥ proktaṃ padāyāmaṃ prakalpayet

'''98.115''' padārdhamathavā kuryād vastrāṅgulasamunnatim vedibhittyantarāle tu turīyapadamadhyake

'''98.116''' kuṇḍāni paritaḥ kuryātpūrvoktavidhimārgataḥ kiṃcidīśānamāśritya pradhānaṃ ca viśeṣataḥ

'''98.117''' vāmabhāge navāṅgulyaṃ tyaktvā kuṇḍasya kalpanam aṣṭāśraṃ ca tathā proktamīśānāśritadṛṣṭikam

'''98.118''' īśānadṛṣṭihīnaṃ cetkartā karma ca naśyati tasmātsarvaprayatnena uktamārgeṇa kārayet

'''98.119''' madhye śivapadaṃ vidyād vidyeśādīn tataḥ param tadbāhye caiśakaṃ proktaṃ śuddhamāyāpadaṃ tataḥ

'''98.120''' tadbāhye ca gaṇaṃ vidyāttato daivapadaṃ kramāt aśuddhākhye tathā māyāpade bāhye prakīrtitam

'''98.121''' madhye ca śivakumbhaṃ ca vardhanīṃ tasya vāmake tadbāhye cāṣṭavidyeśān sthāpayed gurusattama

'''98.122''' tataścaiśe pade kuryāccatuṣkoṇeṣu sādaram catuḥstambhamidaṃ hyantaḥsaṃcārapadanāmakam

'''98.123''' śuddhamāyāpadasyāpi tathā gaṇapadasya ca madhye kuṇḍāni vai kuryādāgamoddiṣṭamārgataḥ

'''98.124''' tadbāhye bāhyasaṃcārapadaṃ ceti prakīrtitam aśuddhe dvādaśastambhaṃ toraṇaṃ ca ghaṭasthitiḥ

'''98.125''' manusūtramidaṃ proktaṃ ravisūtraṃ tataḥ śṛṇu athātaḥ saṃpravakṣyāmi ravisūtraṃ vidhānataḥ

'''98.126''' vidhānaṃ yāgaśālāyāḥ śṛṇu deśikapuṅgava prāgudaksamarekhāṃ vai kuryād dvādaśasūtrakam

'''98.127''' ekaviṃśādhikaśataṃ padamatra samīhitam madhye brahmapadaṃ caikaṃ proktaṃ tatparito hyatha

'''98.128''' aṣṭavidyeśvarasthānaṃ padānyaṣṭau hi daivikam paiśācaṃ ca tataḥ proktaṃ padaṃ ṣoḍaśasaṃmitam

'''98.129''' tato mānuṣamākhyātaṃ caturviṃśatikaiḥ padaiḥ tato’śuddhaṃ māyikaṃ ca dvātriṃśatpadamaṇḍitam

'''98.130''' catvāriṃśatpadaṃ proktaṃ rākṣase tu pade guro brāhme tu kalpayetkumbhaṃ pradhānaṃ vardhanīṃ tathā

'''98.131''' tadbāhye cāṣṭavidyeśānsthāpayeddaivike pade paiśāce tu tato bāhye cāntaḥsaṃcārasaṃjñake

'''98.132''' catuḥstambhāṃścatuṣkoṇe kārayeccāṣṭamaṅgalam tato mānuṣyake caiva pade kuṇḍāni kalpayet

'''98.133''' pratiṣṭhādau kriyākāle mānuṣaṃ ca parityajet tato’śuddhaṃ padaṃ proktaṃ bahiḥsaṃcāranāmataḥ

'''98.134''' rākṣase tu pade kuryātparito bhittimaṇḍalam padasyārdhapramāṇena paritaḥ sādareṇa hi

'''98.135''' saptāṅgulasamutsedhāṃ bhittiṃ sādhu niveśayet pūrvādiṣu caturdikṣu madhye sārdhadvayaṃ padam

'''98.136''' dvārārthaṃ kalpayettatra catuṣkoṇeṣu sādaram nikhaneccaturaḥ stambhāṃstathā dvāreṣu pārśvataḥ

'''98.137''' dvidvistambhāṃśca nikhaneddṛḍhaṃ deśikapuṅgava naṃdyādīnyaṣṭakumbhāṃśca indrādīni tathaiva ca

'''98.138''' vajrādyāyudhajālāni bhittyūrdhve paritaḥ kramāt sthāpayettu viśeṣeṇa pūjayitvā yathāvidhi

'''98.139''' ṣoḍaśastambhasaṃyuktaṃ ṣaḍbhāgasahitaṃ tathā ravisūtraṃ samākhyātaṃ kalpayeddeśikottama

'''98.140''' sthāpane śāntihome ca prāyaścitte tathaiva ca dīkṣāyāmutsave caiva ravisūtraṃ prakīrtitam

'''98.141''' pratiṣṭhādiṣu kāleṣu ravisūtraṃ vivarjayet anyathā kurute mohādrājā rāṣṭrasya doṣakṛt

'''98.142''' tasmātsarvaprayatnena uktamārgeṇa kārayet trayastriṃśatikuṇḍāni cottamaṃ ceti kīrtitam

'''98.143''' pañcaviṃśatikuṇḍāni madhyamaṃ ca prakīrtitam daśasapta ca kuṇḍānyapyadhamaṃ ca prakīrtitam

'''98.144''' adhamādhamamevoktaṃ navakuṇḍasya kalpane trayastriṃśatikuṇḍāni rudrasūtre prakalpayet

'''98.145''' pañcaviṃśatikuṇḍāni viṣṇusūtre suyojayet daśasaptakakuṇḍāni brahmasūtre prakalpayet

'''98.146''' navakuṇḍaṃ manoḥsūtre kalpayed deśikottama dīkṣāyāmutsave caiva prāyaścittādikarmaṇi

'''98.147''' ravisūtraṃ prakartavyaṃ pratiṣṭhādau na kārayet pañcāgnyāyatanaṃ kuṇḍamekāgnyātanaṃ tu vā

'''98.148''' prāyaścitteṣu kartavyaṃ pratiṣṭhādau vivarjayet anāvarte tathāvarte punarāvartake’pi ca

'''98.149''' uttamaṃ madhyamaṃ caivāpyadhamaṃ cādhamādhamam caturbhedayutānkuṇḍānkalpayetkalpavittamaḥ

'''98.150''' vedikāṅgaṃ prakalpyātha samāyatasamucchrayam

'''98.151''' pratiṣṭhādau prakalpeta dīkṣādyutsavakarmaṇi vistārārdhasamotsedhaṃ vedikāṅgaṃ sunirmitam

'''98.152''' prāyaścittādike caiva vāstuśāntau kramācchṛṇu utsedhavedabhāgaṃ cāpyekabhāgena kalpitam

'''98.153''' tasmātsarvaprayatnenāpyuktamārgeṇa kārayet anyathā kurute mohātkartā karma ca naśyati

'''98.154''' vedyāśca paritaścāpi turīyapadamadhyame pūrvādīśānaparyantamaṣṭau kuṇḍān kramādguro

'''98.155''' padaikāṃśe madhyame ca kalpayedgurupuṅgava indraīśānayormadhye vṛttakuṇḍaṃ pradhānakam

'''98.156''' catuṣpadānāṃ bāhye tu padaike bhittikaṃ kuru padārdhe cāthavā kuryād bhittiṃ caiva viśeṣataḥ

'''98.157''' tadbāhye tu turīye ca padamadhye tathā punaḥ kuṇḍānyaṣṭau prakalpyātha tadbāhye bhittikaṃ kramāt

'''98.158''' tadbāhye cāṣṭakuṇḍaṃ ca bāhye bhittyāvṛtaṃ kuru tadbāhye cāṣṭakuṇḍāni bāhye bhittiṃ prakalpayet

'''98.159''' vedyādibāhyabhittyantaṃ pañcāvaraṇakalpitam bhitteśca madhyabhāge tu caturdvāraṃ pṛthak pṛthak

'''98.160''' pañcamāvaraṇasyāntaścaturthāvaraṇasthalam utsedhaṃ dvādaśāṅgulyaṃ tasyānte ca tṛtīyake

'''98.161''' usedhaṃ ca tathā proktaṃ dvitīyāvaraṇe tathā prathamāvaraṇe tadvadaunnatyaṃ ca prakalpayet

'''98.162''' athātaḥ saṃpravakṣyāmi vedikālakṣaṇaṃ śṛṇu aśraṃ vā vṛttamevātha vasvaśraṃ ca ṣaḍaśrakam

'''98.163''' caturbhedaiśca vidhivadvedikāṅgaṃ prakalpayet aṣṭāśraṃ śayanaṃ proktamaśravedisthitirbhavet

'''98.164''' ṣaḍaśraṃ yānamevoktamāsanaṃ vartulaṃ smṛtam aśrapīṭhe’śravediśca vartule vartulaṃ śubham

'''98.165''' aṣṭāśre padmapīṭhaṃ ca tryaśre caiva ṣaḍaśrakam piṇḍikāṅgaṃ prakalpeta nānyathā parikalpayet

'''98.166''' adhaḥpaṭṭe kurmamūrtiṃ madhyapaṭṭe tu dhārikām bhujāṣṭakamato vāpi śuddhamāyāsvarūpakam

'''98.167''' tasyordhve cāṣṭanāgaṃ cāpyūrdhvapaṭṭe tu kesarī kārayetkumbhakaṇṭhe ca dharmādīnāṃ prakalpayet

'''98.168''' yugānāmūrdhvapaṭṭe ca tadūrdhve jaghanatrayam tathordhve paṅkajaṃ kalpyaṃ madhyadeśe śivāsanam

'''98.169''' vedikotsedhasūtraṃ cāpyaṣṭācatvāri saṃkhyayā vibhajedvedikāvargāṃstattadbhāgānkramācchṛṇu

'''98.170''' dvayāṃśamadhaḥpaṭṭī ca dalavedī ṣaḍaṃśakam ekāṃśamūrdhvapaṭṭī ca anukaṇṭhaṃ trayāṃśakam

'''98.171''' ityevaṃ vedikāvargāḥ karṇavargākṛtiṃ śṛṇu karṇāvistārasūtraṃ ca caturbhāgaṃ prakalpayet

'''98.172''' ekāṃśaṃ vedasaṃkhyāṃ ca vibhajetkarṇakalpane dvikarṇaṃ madhyadeśe tu dvikarṇaṃ koṇadeśayoḥ

'''98.173''' anyāṃśamantarāle ca kārayetkalpavittamaḥ evaṃ karṇākṛtiḥ proktāḥ kapotāṅgaṃ tataḥ śṛṇu

'''98.174''' tatkṣetre karṇavatkṛtvā nāsikāṅgāni kārayet karṇordhve nāsikāṃ kṛtvā hyanyānyuktyā prakalpayet

'''98.175''' ityevaṃ vedikāvargamaśraṃ vā vṛttameva vā anyacca vedikārūpaṃ kalpayetkalpavittamaḥ

'''98.176''' athavānyaprakāreṇa vedikāṅgaṃ śṛṇuṣva hi vistārasya samotsedhaṃ kalpayettu viśeṣataḥ

'''98.177''' vedikāmadhyabhāge tu ratnimātraṃ samaṃ bhavet vistāramiti vijñeyamutsedhaṃ ca ṣaḍaṅgulam

'''98.178''' darpaṇodarasaṃkāśamupavedīṃ prakalpayet pūrve tu caturaśraṃ syādāgneyyāṃ vai bhagākṛti

'''98.179''' dakṣiṇe cārdhacandraṃ ca nairṛte tu trikoṇakam paścime vṛttakuṇḍaṃ ca vāyudeśe ṣaḍaśrakam

'''98.180''' uttare padmakuṇḍaṃ ca īśāne cāṣṭakoṇakam indraīśānayormadhye vṛttakuṇḍaṃ pradhānakam

'''98.181''' caturaśracatuṣkaṃ ca catuṣṭayabhagākṛti ardhacandracatuṣkaṃ ca trikoṇacatuṣkaṃ bhavet

'''98.182''' caturvṛttaṃ samālikhya ṣaḍaśrasya catuṣṭayam padmakuṇḍacatuṣkaṃ ca aṣṭāśrasya catuṣṭayam

'''98.183''' evaṃvidhaṃ trayastriṃśatkuṇḍāni parikalpayet caturaśratrayaṃ caiva trayaṃ pippalapatravat

'''98.184''' ardhacandratrayaṃ caiva trikoṇaṃ ca tathā bhavet vṛttatrayaṃ trayaṃ cāpi ṣaḍaśrasya prakalpayet

'''98.185''' padmakuṇḍatrayaṃ proktamaṣṭāśraṃ ca tathā bhavet pradhānakuṇḍasahitaṃ pañcaviṃśatikuṇḍakam

'''98.186''' dvidvikuṇḍaṃ prakalpyātha pradhānakuṇḍasaṃyutam daśa sapta ca kuṇḍāni kalpayeddeśikottamaḥ

'''98.187''' pṛthivī caturaśraṃ ca yajamānaṃ bhagākṛti āpyasthānaṃ cārdhacandraṃ tejaḥsthānaṃ trikoṇakam

'''98.188''' vṛttākāraṃ tathākāśaṃ vāyutattvaṃ ṣaḍaśrakam sauraṃ padmākṛti proktaṃ saumyamaṣṭāśrakaṃ tathā

'''98.189''' pradhānaṃ ca cidākāśaṃ śivasthānaṃ prakīrtitam tanvaṣṭakaṃ cāṣṭakuṇḍamaṅgarūpeṇa kīrtitam

'''98.190''' cidākāśasvarūpaṃ ca kuṇḍamaṅgīti kathyate aṅgāṅgibhāvabhedena kuṇḍaṃ tannavadhocyate

'''98.191''' mūrtiṃ mūrtīśvaraṃ caiva hyaṣṭakuṇḍeṣu homayet pradhāne tu śivaṃ dhyātvā parāśaktyādibhiḥ kramāt

'''98.192''' vidyādehaṃ ca netraṃ ca astraṃ caiva pradhānake tadbāhye cāṣṭakuṇḍeṣu tathā mūrtīśvarīṃ kramāt

'''98.193''' tattvaṃ tattveśvaraṃ caiva tadbāhye vinyasetkramāt tattveśvarīṃ tato bāhye vinyasettu viśeṣataḥ

'''98.194''' trayastriṃśatkuṇḍakeṣu tattanmūrtiṃ hunetkramāt mūrtīśvaraṃ ca mūrtiṃ ca prathamāvaraṇe nyaset

'''98.195''' mūrtīśvarīṃ tathā bāhye tadbāhye tattvakaṃ tathā tattveśvaraṃ ca tattveśīṃ vinyasettu viśeṣataḥ

'''98.196''' pañcaviṃśatikuṇḍeṣu tattanmūrtiṃ ca vinyaset mūrtīśvarīṃ ca mūrtīśaṃ mūrtiṃ caiva kramānnyaset

'''98.197''' prathamāvaraṇe nyastvā tattvādīṃśca dvitīyake kuṇḍeṣu saptadaśasu tattanmūrtiṃ vibhāvayet

'''98.198''' mūrtīśvarīṃ ca mūrtīśaṃ mūrtitattvaṃ tathaiśakam tattveśvarīṃ ṣaḍetāni navakuṇḍeṣu homayet

'''98.199''' pṛthivyādi yajamānāntaṃ tattvaṃ ceti prakīrtitam bhavādi ca maheśāntaṃ tattveśvaramudāhṛtam

'''98.200''' vāmādi ca damanyantaṃ tattveśvaryā udāhṛtam pṛthivīmūrtimārabhya yajamānāntato guro

'''98.201''' mūrtyaṣṭakamiti khyātaṃ mūrtīśaṃ ca tataḥ śṛṇu puruṣādi samārabhya kavacāntaṃ kramācchṛṇu

'''98.202''' mūrtīśamiti vikhyātaṃ tato mūrtīśvarīṃ śṛṇu dhārikādi samārabhya vibhvyantaṃ ca tatheśvarīm

'''98.203''' pūrve tu pṛthivīsthānamāgneyyāṃ yajamānakam jīvasthānamiti khyātaṃ tadūrdhve cāmbutattvakam

'''98.204''' trikoṇe cāgnitattvaṃ ca tatparaṃ vāyutattvakam jaḍākāśaṃ ca tatpaścāt sauratattvaṃ tataḥ param

'''98.205''' tatparaṃ saumyamityuktaṃ cidākāśaṃ pradhānakam śivatattvamiti khyātamīśānādīnkramāddhunet

'''98.206''' śivatattvaṃ mahādevaṃ tattveśīṃ ca manonmanīm cidākāśaṃ ca mūrtiṃ ca īśānaṃ mūrtimīśakam

'''98.207''' vidyādehaṃ ca netraṃ cāpyastraṃ śaktiḥ śivastathā tattvaṃ tattveśatattveśīṃ mūrtimūrtīśakaṃ bhavet

'''98.208''' mūrtīśāṃśca parāśaktiṃ sarvavyāpakamīśvaram vidyādehaṃ ca netraṃ ca pradhāne vinyasetkramāt

'''98.209''' pṛthivīṃ puruṣaṃ caiva ambusthānamaghorakam tejaḥsthāne śikhāṃ caiva kavacaṃ vāyutattvake

'''98.210''' sadyojātaṃ tathākāśe saure vai vāmadevakam śiraścaiva tathā saumye hṛdayaṃ yajamānake

'''98.211''' īśānaṃ ca cidākāśe navāgniṃ ca vibhājitam pṛthivī vai samārabhya saumyāntaṃ vyāpakaṃ tathā

'''98.212''' vyāpyavyāpakabhedena yajamānamiti smṛtam śirordhve hṛdayaṃ nyastvā hṛdayordhve śivaṃ nyaset

'''98.213''' sparśāhutividhānena tattanmūrtiṃ ca vinyaset pṛthivīṃ vai samārabhya agnyantaṃ piṇḍavattathā

'''98.214''' ākāśaṃ vyāpakaṃ proktaṃ tasyordhve sarvavyāpakam sarvabhūtasya cākāśamādhāramiti kīrtitam

'''98.215''' ākāśasyāśritaṃ proktaṃ vāyutattvaṃ prakīrtitam evameva prakāreṇa kuṇḍasaṃyojanaṃ param

'''98.216''' padmakuṇḍaṃ dvidhā proktaṃ bāhyābhyantarabhedataḥ bahirbisanikaṃ kuṇḍaṃ pratiṣṭhādau prakalpayet

'''98.217''' antarbisinikaṃ kuṇḍaṃ kṣudrakarmasu yojayet pañcāśraṃ caiva saptāśraṃ navāśraṃ ca daśāśrakam

'''98.218''' ekādaśāśrakaṃ caiva dvādaśāśrādikaṃ kramāt pratiṣṭhādau varjanīyaṃ kṛtaṃ cedaśubhāvaham

'''98.219''' kṣudrakarmasu kartavyamanyasminna kadācana aṣṭāśraṃ ca ṣaḍaśraṃ ca trikoṇaṃ ca kramācchṛṇu

'''98.220''' koṇaṃ bāhye prakartavyamante ca parivarjayet prāyaścitte tathā dīkṣāpavitrārohaṇe’pi ca

'''98.221''' antaḥkoṇaṃ prakartavyaṃ pratiṣṭhādau vivarjayet vyāmohātkurute martyo rājarāṣṭraṃ vinaśyati

'''98.222''' tasmātsarvaprayatnena coktamārgeṇa kārayet śirohṛdayaṃ nābhiśca kaṇṭhayonitrimekhalāḥ

'''98.223''' aṣṭau kuṇḍākṛtiḥ sā tu aṣṭamūrtisvarūpakam ekabhāgavihīnaṃ cet tatkuṇḍaṃ parivarjayet

'''98.224''' yāvadvistārakaṃ kuṇḍaṃ tāvatkhātaṃ prakīrtitam kuṇḍakhātaṃ dvidhā proktaṃ bhūmeradhaḥpradeśake

'''98.225''' caturaśraṃ samaṃ khātaṃ tasyordhve ca navāṃśakam mekhalātritayaṃ kṛtvā hyadhastāccaturaṅgulam

'''98.226''' madhye ca tryaṅgulaṃ proktamagre caiva dvayāṅgulam pratiṣṭhādau prakartavyaṃ dīkṣāyāmutsave’pi ca

'''98.227''' prāyaścittādikārye ca pavitrārohaṇe’pi ca khātaṃ pakṣāṅgulaṃ proktaṃ mekhalā ca navāṃśakam

'''98.228''' caturviṃśatyaṅgulaṃ ca kuṇḍakhātaṃ prakalpayet ūrdhve ca caturaṅgulyaṃ madhye caiva trayāṅgulam

'''98.229''' adhastād dvyaṅgulaṃ proktaṃ mekhalāṅgaṃ sunirmitam dīkṣādau ca prakartavyaṃ pratiṣṭhādau na kārayet

'''98.230''' kuṇḍasyābhyantare deśe kuṇḍārdhaṃ ca pramāṇataḥ tadbhāgaṃ bhūtasaṃkhyābhiḥ kalpayetkalpavittamaḥ

'''98.231''' sārdhaikaṃ kuṇḍamadhye ca karṇikākārakalpanam bhūtāṅgulasamotsedhaṃ karṇikāṃ ca prakalpayet

'''98.232''' sārdhadvayaṃ dalaṃ caiva vedāṅgulasamonnatam dalāṣṭakaṃ prakalpyātha karṇikāṃ ca samāyatam

'''98.233''' hṛdayaṃ ceti vikhyātaṃ tadbāhye paritaḥ kramāt śeṣamekāṅgulaṃ vṛttaṃ trayāṅgulasamonnatam

'''98.234''' nābhirevaṃ samākhyātā pratiṣṭhādau sunirmitam caturviṃśatibhāgaṃ ca kuṇḍagartaṃ vibhajya ca

'''98.235''' trayoviṃśatyaṅgulordhve caikabhāgaṃ ca karṇakam kaṅkaṇākārakaṃ proktaṃ kuṇḍakarṇaṃ prakalpayet

'''98.236''' karṇasyordhve prakartavyaṃ mekhalāṃ ca viśeṣataḥ ūrdhve ca mekhalādūrdhve pṛṣṭhabhāgaṃ prakalpitam

'''98.237''' karṇasyādhaḥpradeśāntaṃ dvayāṅgulasamaśrakam navāṅgulasuvistāraṃ dvayāṅgulasamonnatam

'''98.238''' trayodaśasamāṅgulyaṃ dīrghaṃ ceti prakīrtitam aśvatthapatrasadṛśaṃ yoniṃ caiva prakalpayet

'''98.239''' evameva krameṇātha pratiṣṭhādau sunirmitam dīkṣāyāṃ kāmyakarmādau pakṣāṅgulamathordhvake

'''98.240''' karṇākṛtiṃ prakalpyātha tasyordhve ca trimekhalām kuṇḍasyābhyantare deśe kuṇḍārdhaṃ ca pramāṇataḥ

'''98.241''' padmākāraṃ yathā nābhiṃ kuryātkuṇḍasya madhyame dvibhāgaṃ dalamānaṃ syādekabhāgaṃ tu karṇikām

'''98.242''' trayāṅgulasamonnatyaṃ karṇikāṅgaṃ sunirmitam unnataṃ ca dvayāṅgulyaṃ dalāni parikalpayet

'''98.243''' hṛdayaṃ ceti vikhyātaṃ śeṣaṃ vṛttākṛtirbhavet nābhiśceti samākhyātaḥ kuṇḍasyābhyantare tathā

'''98.244''' ūrdhve ca mekhalādūrdhve pṛṣṭhabhāgaṃ prakalpitam karṇasyābhyantare deśe caikāṃśamagrasaṃyutam

'''98.245''' karṇāntamathavā kāryaṃ pṛṣṭhaṃ vasvaṅgulāyatam dvādaśāṅguladīrghaṃ cāpyekāṅgulasamonnatam

'''98.246''' aśvatthapatrasadṛśaṃ yoniṃ caiva prakalpayet caturaśraṃ samārabhya vṛttakuṇḍasamāvadhi

'''98.247''' saumyābhimukhamagraṃ ca yoniṃ ca parikalpayet ṣaḍaśraṃ ca samārabhya cidākāśāntameva ca

'''98.148a''' yoniṃ pūrvāgragāṃ kuryādanyathā karmanāśanam yonau yonirna kartavyā padme padmaṃ na kārayet

'''98.249''' caturaśrāṃ dharitrīṃ vai sarvātmāntaragarbhitām caturaśrā bhavedyoniryonikuṇḍe prakalpayet

'''98.250''' vṛttākāraṃ viśeṣeṇa padmakuṇḍe prakalpayet padme ca hṛdayaṃ tyaktvā yonau yoniṃ parityajet

'''98.251''' yonirnābhiriti khyātā kuṇḍayordvitayorapi dīkṣāyāṃ kāmyakarmādau vinā nābhiṃ prakalpayet

'''98.252''' hṛdayaṃ ca tadetaddhi upacāraprabhedataḥ nābhiśceti samākhyātaḥ mukhyatā ca na nābhike

'''98.253''' yonau yonirnakartavyā padme nābhiṃ na kārayet caturaśrā bhavedyoniryonikuṇḍe prakalpayet

'''98.254''' vṛttākāro bhavennābhiḥ padmakuṇḍe prakalpitaḥ padme ca hṛdayaṃ tyaktvā yonau yoniṃ parityajet

'''98.255''' yonirnābhiriti khyātaḥ kuṇḍayordvitayorapi hastamātrasya kuṇḍasya hṛdayādiprakalpanam

'''98.256''' hastādūrdhvasya kuṇḍasya tattadākāravṛddhidam hastādi aṣṭahastāntaṃ kuṇḍamānaṃ prakīrtitam

'''98.257''' aṣṭahastātparaṃ nāsti kṛtaṃ cedaśubhāvaham śivāgniṃ ca samārabhya paristaraṇakāvadhi

'''98.258''' pañcāvaraṇakaṃ proktaṃ tattatsthānaṃ kramācchṛṇu prathamaṃ tu śivāgniṃ ca dvitīyaṃ cordhvamekhalā

'''98.259''' tṛtīyāvaraṇaṃ cātha madhyamā mekhalā bhavet adhasthamekhalāyāstu turīyamiti kīrtitam

'''98.260''' parito mekhalāyāstu pañcamāvaraṇaṃ smṛtam agniṃ ca viṣṭaraṃ caiva paridhiṃ kūrcakaṃ tathā

'''98.261''' paristaraṇakaṃ cātha pañcasthānaṃ prakīrtitam sāṅgopāṅgaṃ ca pratyaṅgaṃ tridhā bhinnaṃ śivāgnikam

'''98.262''' śivāgni sāṅgamityuktaṃ vidyeśādi gaṇāntakam upāṅgamiti vikhyātaṃ lokapālāstrakāvadhi

'''98.263''' pratyaṅgaṃ ca tathā proktaṃ tridhā cāṅgamiti smṛtam śivāgnestrividho bhedo bālyayauvanavṛddhataḥ

'''98.264''' nāmāntaṃ bālamanalaṃ vratāntaṃ yauvanānalam vivāhāntaṃ tu vṛddhāgnimagnimāhustribhedataḥ

'''98.265''' eka eva śivāgnistu tattatsaṃskārabhedataḥ bālyayauvanavārdhakyasaṃskārasyānusārataḥ

'''98.266''' tretāgnīnāṃ śivāgnīti nāma vai sāmudāyikam śivāgneḥ paritaścāpi aṅgarūpaprakalpanam

'''98.267''' āhavanīyaṃ ca vṛddhāgniṃ dakṣiṇaṃ yauvanaṃ tathā gārhapatyaṃ ca bālāgniṃ kevalaṃ cāṣṭasaṃkhyakam

'''98.268''' aṅgabhāva iti proktaḥ śivastvaṅgīti kathyate aṅgāṅgibhāvasaṃyogādagniśca navadhā bhavet

'''98.269''' vṛddharūpaṃ pratiṣṭhāgniṃ nityāgniṃ ca tathā bhavet yauvanaṃ cotsavāgniṃ ca dīkṣāyāṃ vāstukarmaṇi

'''98.270''' prāyaścittādikāryeṣu bālāgnimiti kathyate anyathā kurute mohād rāṣṭranāśo bhaved dhruvam

'''98.271''' tasmātsarvaprayatnenāpyuktamārgeṇa kārayet aturaśre tathā kuṇḍe vahniṃ cāhavanīyakam

'''98.272''' ardhacandre dakṣiṇāgniṃ padme kevalanāmakam gārhapatyaṃ vṛttakuṇḍe yonau vṛddhāgnimuttamam

'''98.273''' sāmānyāgniṃ cāṣṭakoṇe trikoṇe yauvanānalam bālāgniṃ ca ṣaḍaśre tu cidākāśe śivāgnikam

'''98.274''' evamuktakrameṇātha navāgnīnsthāpayed guro caturviṃśatimānena vibhajetkuṇḍamaṇḍalam

'''98.275''' caturviṃśatyaṅgulāttu nyūnaṃ cedvarjayetsadā prāyaśiścittādikāryeṣu nyūnahastaṃ na bādhikam

'''98.276''' tena mānena kartavyaṃ samantāccaturaśrakam caturaśrodbhavaṃ sarvaṃ kuṇḍaṃ samyakprakalpayet

'''98.277''' pañcabhāgakṛtaṃ kṣetraṃ bhāgaikaṃ bahirnyaset koṇasūtraṃ caturbhāgaṃ caikaikaṃ pārśvakoṇayoḥ

'''98.278''' kṣetrārdhakoṇaṃ saṃgṛhya kṣetrārdhād bhrāmayettataḥ kṣetrārdhāvadhikaṃ yāvattathānyad bhrāmayetpunaḥ

'''98.279''' sūtre saṃyojite yonirbhavet pippalapatravat uttarābhimukhāgraṃ ca yonimāgneyakoṇake

'''98.280''' pañcabhāgakṛtaṃ kṣetraṃ bhāgaikaṃ pārśvayoḥ kramāt kṣetraṃ ca navadhā bhajya kṣetrānte caikabhāgakam

'''98.281''' āyāmottarakaṃ tyaktvā śeṣabhāge tathā punaḥ saptāṃśaṃ samasūtreṇa bhramaṇādardhacandrakam

'''98.282''' khaṇḍaṃ dakṣiṇabhāge tu akhaṇḍaṃ cottarāgrakam ardhacandramiti khyātaṃ dakṣiṇe ca prakalpayet

'''98.283''' dīkṣāyāṃ kāmyakarmādau khaṇḍamuttarato nyaset akhaṇḍaṃ dakṣiṇāgraṃ ca bhrāmayedardhacandrakam

'''98.284''' khaṇḍaminduriti khyātamakhaṇḍaṃ sūtranāmakam pratiṣṭhādiṣu kāryeṣu hyuttare sūtrapātanam

'''98.285''' saptabhāgakṛtaṃ kṣetraṃ caikaikapārśvayornyaset kṣetrasyottarabāhye vāpyekabhāgaṃ bahirnyaset

'''98.286''' pārśvayordvikayoścāpi rekhāsaṃyojitaṃ tu yat trikoṇamiti vikhyātamuttarāgraṃ prakalpitam

'''98.287''' kuṇḍaṃ nairṛtideśe tu kalpayetkalpavittamaḥ saptabhāgakṛtaṃ kṣetraṃ caikabhāgaṃ bahirnyaset

'''98.288''' kuṇḍamadhyaṃ samārabhya antasūtrāntataḥ kramāt bhrāmayedvartulākāraṃ vāruṇe ca prakalpayet

'''98.289''' kṣetraṃ ca saptadhā kṛtvā cānte caikaikabhāgakam rekhādvitayamālikhya kṣetrabāhyaikabhāgakam

'''98.290''' dvidvirekhāmelanaṃ yat ṣaḍaśramiti kīrtitam pūrvāgraṃ paścimāgraṃ ca ṣaḍaśraṃ vāyudeśake

'''98.291''' dīkṣāyāṃ kāmyakarmādāvuttarāgraṃ prakalpayet pratiṣṭhādiṣu kāryeṣu pūrvāgramiti kīrtitam

'''98.292''' vṛttakuṇḍaṃ purā kṛtvā karṇikāṃ ca dvayāṅgulām karṇikāyā hyadhobhāge tathādho mekhalopari

'''98.293''' ṣaḍaṅgulasamaṃ dīrghamagre caikāṅgulonnatam athavā hyaṅgulaṃ proktaṃ kalpayeddalamaṣṭakam

'''98.294''' uttare padmakuṇḍaṃ ca kalpayetkalpavittamaḥ dīkṣāyāṃ kāmyakarmādau karṇikā caturaṅgulā

'''98.295''' śeṣamaṃśena kartavyaṃ dalāṣṭakamiti smṛtam kṣetraṃ ṣoḍaśadhā bhajya kṣetrānte caikabhāgakam

'''98.296''' caturaśraṃ pṛthak kalpya tatkṣetraṃ vasudhā bhajet saptabhāgaṃ parityajya bhāgamekaṃ ca saṃgrahet

'''98.297''' bāhyakṣetrasya bāhye tu ekabhāgaṃ ca vinyaset caturdikṣu catuścihnaṃ sūtrasaṃyojitaṃ tu yat

'''98.298''' aṣṭakoṇamiti khyātaṃ pratiṣṭhādau prakalpayet dīkṣāyāṃ kāmyakarmādāvaṣṭakoṇaṃ prakalpayet

'''98.299''' aṣṭāśramīśakoṇe tu kalpayettu viśeṣataḥ indraīśānayormadhye pūrvavadvṛttamālikhet

'''98.300''' pradhānakuṇḍamākhyātaṃ cidākāśamiti smṛtam evameva prakāreṇa tattatkuṇḍāni kalpayet

'''98.301''' caturaśrāvṛtaṃ sūtraṃ sarvakuṇḍasamāvṛtam sūtranyūnādhikaṃ cettu tatkuṇḍaṃ parivarjayet

'''98.302''' aṣṭāśraṃ caturaśraṃ ca vṛttaṃ caiva ṣaḍaśrakam pum̐lliṅgamiti vikhyātaṃ yoniḥ padmaṃ ca deśika

'''98.303''' strīliṅgamiti saṃproktaṃ napuṃsakamataḥ śṛṇu trikoṇaṃ cārdhacandraṃ ca napuṃsakamitīritam

'''98.304''' caturaśre tathā yonāvardhacandre trikoṇake jaḍākāśasvarūpe ca vṛtte caiva kramācchṛṇu

'''98.305''' kuṇḍasthānordhvake caiva mekhalordhve viśeṣataḥ yonau saumyāgrakaṃ kṛtvā hyanye pūrvāgrakaṃ bhavet

'''98.306''' ṣaḍaśre ca viśeṣeṇa kiṃcidbhedaṃ śṛṇuṣva hi dīkṣāyāṃ kāmyakarmādāvuttarāgraṃ prakalpayet

'''98.307''' pratiṣṭhādiṣu kāryeṣu yoniḥ pūrvāgrakā bhavet caturaśrādivṛttāntamuttarābhimukhaṃ matam

'''98.308''' ṣaḍaśraṃ ca samārabhya cidākāśāntakaṃ kramāt pūrvābhimukhamākalpya homayettu viśeṣataḥ

'''98.309''' dīkṣāyāṃ kāmyakarmādau ṣaḍaśre cottarāsyakam athātaḥ saṃpravakṣyāmi śaktīnāṃ kuṇḍalakṣaṇam

'''98.310''' svatantrā sahajā miśrā kevalā ca caturbhavet pañcaprākārasaṃyukte maryādābhyantare’pi ca

'''98.311''' pūrvābhimukhamāśritya dvārādīni prakalpayet vṛṣādiparivāraiśca uktamārgapratiṣṭhitā

'''98.312''' adhiṣṭhānasya saumye vā dakṣiṇe vā prakalpitā svatantrā ceti vikhyātā sahajāṃ ca tataḥ śṛṇu

'''98.313''' parivāravihīne ca svatantrokte pratiṣṭhitā sahajā ceti vikhyātā miśrāṃ caiva tataḥ śṛṇu

'''98.314''' dakṣiṇābhimukhaṃ dvāramadhiṣṭhānasya saṃnidhau garbhāvaraṇake cāpi antarhāre’thavā guro

'''98.315''' ālayaṃ saṃprakalpyātha miśrā ceti prakīrtitā adhiṣṭhānaṃ vinā śaktiḥ kevalā ca pratiṣṭhitā

'''98.316''' yatra dvāramukhaṃ liṅgaṃ tadvaddvāraṃ ca śaktikam athavā siṃhaṃ haṃsaṃ ca dvārāgre tu pratiṣṭhitam

'''98.317''' pūrvoktavidhimārgeṇa rudrasūtrādikaṃ kramāt dikṣu yoniḥ prakartavyā vidikṣvabjaṃ prakalpayet

'''98.318''' īśānaśakrayormadhye vṛttaṃ caiva pradhānakam trayastriṃśatpañcaviṃśad daśasaptanavādikam

'''98.319''' pūrvoktavidhimārgeṇa kuṇḍaṃ sarvaṃ prakalpayet svatantrāyāstathā śakteḥ kuṇḍāni parikalpayet

'''98.320''' pūrve tu caturaśraṃ syād dakṣiṇe cārdhacandrakam paścime vṛttakuṇḍaṃ ca uttare padmakuṇḍakam

'''98.321''' āgneyādīśakoṇāntaṃ yonyākārāṇi kalpayet īśānaśakrayormadhye padmaṃ caiva pradhānakam

'''98.322''' sahajāyāḥ prakartavyaṃ miśraśaktestataḥ śṛṇu pūrve tu caturaśraṃ syādāgneyyāṃ tu bhagākṛti

'''98.323''' dakṣiṇe cārdhacandraṃ ca nairṛte tu trikoṇakam paścime vṛttakuṇḍaṃ ca vāyudeśe ṣaḍaśrakam

'''98.324''' uttare padmakuṇḍaṃ ca īśāne cāṣṭakoṇakam īśānaśakrayormadhye cābjaṃ caiva pradhānakam

'''98.325''' miśraśakteḥ prakartavyā kevalāyāstataḥ śṛṇu caturdikṣu tathā yoniṃ vidikṣvabjaṃ prakalpayet

'''98.326''' īśānaśakrayormadhye yonikuṇḍaṃ pradhānakam kevalāyāstathā śakteḥ kuṇḍānyevaṃ prakārayet

'''98.327''' tattacchaktikrameṇaiva kuṇḍāni racayettathā anyathā kurute mohāt karma kartā ca naśyati

'''98.328''' tasmātsarvaprayatnenāpyuktamārgeṇa kārayet māraṇādipratiṣṭhārthakuṇḍāni ca śṛṇuṣva hi

'''98.329''' pañcāśrādi prakartavyaṃ tattallakṣaṇakaṃ śṛṇu rasabhāgakṛtaṃ kṣetraṃ kṣetrānte caikabhāgakam

'''98.330''' vṛttākāraṃ vilikhyātha tadvṛttaṃ pañcabhāgakam vṛttaṃ dvādaśadhā bhajya sārdhaikaṃ bhāgamadhyame

'''98.331''' parito tuṅgacihnaṃ ca sūtrasaṃyojitaṃ tu yat pañcāśramiti vikhyātaṃ māraṇe tu prakalpayet

'''98.332''' caturbhāgakṛtaṃ kṣetraṃ kṣetrānte caikabhāgakam vṛttākāraṃ prakalpyātha paritaḥ saptabhāgakam

'''98.333''' vṛttaṃ dvādaśadhā bhajya tripādaikena saṃyutam tanmānaṃ bhāgamadhye tu paritastuṅgalāṅchitam

'''98.334''' sūtre saṃyojitaṃ yattu saptāśramiti kīrtitam kṣetre catuṣṭayaṃ bhāgaṃ kṣetrānte caikabhāgakam

'''98.335''' vṛttākāraṃ ca vilikhetparito navabhāgakam vṛttaṃ dvādaśadhā bhajya sārdhaikaṃ bhāgamadhyame

'''98.336''' paritastuṅgacihnaṃ ca sūtre saṃyojitaṃ kramāt navāśramiti vikhyātaṃ kṣudrakarmasu yojayet

'''98.337''' caturbhāgakṛtaṃ kṣetraṃ kṣetrānte caikabhāgakam pūrvavadvṛttamālikhya tadvṛttaṃ daśabhāgakam

'''98.338''' vṛttaṃ dvādaśadhā bhajya pādārdhenaikabhāgakam bhāgamadhye tuṅgacihnaṃ sūtre saṃyojitaṃ tu yat

'''98.339''' daśāśramiti vikhyātaṃ sthāpane ca vivarjayet kṣetrāṃśena samaṃ vṛttaṃ vasubhāgaṃ kramāt kuru

'''98.340''' kṣetre turīyabhāgaikaṃ vṛtte vṛttaṃ samālikhet tadvṛttamaṣṭabhāgaṃ ca bāhyabhāgaṃ bahirnyaset

'''98.341''' dalāṣṭakaṃ prakalpyātha karṇikayā vihīnakam antarbisinikaṃ kuṇḍaṃ pratiṣṭhādau vivarjayet

'''98.342''' anyathā kurute mohādrājarāṣṭrasya doṣakṛt tasmātsarvaprayatnena uktamārgeṇa kārayet

===Kapitel 99===

''ekonaśatatamaḥ paṭalaḥ · rathoddhāralakṣaṇavidhiḥ''

'''99.1''' devālayasya vīthī sā rathavīthīti kathyate saptakoṭimahāmantramantrarājopaśobhitaḥ

'''99.2''' rathāṅgamekavistāramūrdhvādhoyogasaṃpuṭaḥ brahmāsanasamāyukto hyanantāsanasaṃyutaḥ

'''99.3''' yogāsanasamāyuktaḥ padmāsanasamanvitaḥ mantrasiṃhāsane mūrtirvimalāsanasaṃyutaḥ

'''99.4''' cicchaktyāsanasaṃyuktaḥ somāskandamayaḥ śivaḥ mantraprāsādamerośca dehamadhye maheśvaraḥ

'''99.5''' daharākārahṛdaye bhūpurākāramaṇḍale meruśaktimaye dehe citraśaktyā pariṣkṛtaḥ

'''99.6''' astrarajjusamāyuktavedavājisamanvitaḥ brahmasārathisaṃyukto vādyatālasamanvitaḥ

'''99.7''' jhallarīdundubhīvādyaśaṅkhakāhalanisvanaiḥ ḍhakkāḍamarunādaiśca nalikāyantraghoṣakaiḥ

'''99.8''' gopālakṛtarajjvaṅgo hyakṣāntarbahirarcitaḥ caṇḍālagaṇasaṃkīrṇaśṛṅgavādyasamanvitaḥ

'''99.9''' paṭahadhvanisaṃghaiśca kṣudraghaṇṭāravairyutaḥ rājavīthyāṃ paribhrāmya rudrakoṇe rathe sthite

'''99.10''' ṛgyajuḥsāmagānaiśca pṛthagvandanakāribhiḥ śaivavaiṣṇavasaṃghaiśca brāhmaṇairvedapāragaiḥ

'''99.11''' svastivācanasaṃyuktaṃ rathavīthyāṃ janārdana rathāsīnasya deveśa somāskandavibhoḥ prabhoḥ

'''99.12''' rathākarṣaṇacaṇḍālasparśadoṣanivṛttaye mahāsaṃprokṣaṇaṃ kṛtvā tadrītyā snānamācaret

===Kapitel 100===

''śatatamaḥ paṭalaḥ · bhairavīpūjā''

'''100.1''' aghoracakramūrdhnī ca pītavaktrā caturbhujā koladvīpā bhagavatī kuṭaje sarvakāmadā

'''100.2''' pītavastrā trinayanā cārdhacandrāṅkamālinī evaṃ lakṣaṇamākhyātaṃ bhairavīlakṣaṇaṃ śṛṇu

'''100.3''' udvīkṣaṇā raktadaṃṣṭrā svadantairdaṃśitādharā raktāmbaradharā raktā viśuddhā sāmbujā śivā

'''100.4''' sahasrasarpābharaṇā raktapuṣpānulepanā atiriktakeśanetrajihvā sā cāṭikāsanā

'''100.5''' jvalatsaṃhārakālāgnimūrtirbhairavarūpiṇī siṃhatārkṣyāhimahiṣasālāvṛkādivāhinī

'''100.6''' cakraṃ śaṅkhaṃ śaraṃ cāpaṃ vajrāgniṃ musalaṃ halam alasāṃ khaḍgakheṭau ca chatrapāśakapālakam

'''100.7''' nāganārācaparaśurathastambhābhayaṃ varam sadā hi dakṣiṇairvāmairdharantī karapaṅkajaiḥ

'''100.8''' ūrdhvānanā bhinnakarā cānantādyadhikā kramāt saṃhāracakramadhyasthā sāyātu pradhane dviṣām

'''100.9''' sahasrakoṭisandohasenāstambhanakāriṇī pṛthak pṛthak koṭikoṭibhairavībhairavāvṛtā

'''100.10''' sevyā sadā vasāpūrṇakapāladharapāṇibhiḥ bhairavyevaṃ samākhyātā kālarudrākhyabhairavī

'''100.11''' pañcavaktrā pratimukhaṃ tryakṣā daṃṣṭrāsamanvitā raktāsṛkcarmamedo’sthijanaprāṇaratāniśam

'''100.12''' daśāyudhāvaraṇena digdevāvaraṇena ca sadā samanvitā bhīmarūpiṇī parameśvarī

'''100.13''' āpadi smaraṇīyā ca kālarudrākhyabhairavī sadbhaktasya sadā śīghraṃ sarvakāmaphalapradā

'''100.14''' dveṣiṇāṃ tu śiromajjāḥ śoṣayitrī nikṛttvacā ekānte sahajāyātā varṇāvarṇasvarūpiṇī

'''100.15''' svabhaktānāṃ sapakṣasthā sandehanidhanāya ca arghyairniṣevitā sāye svadantairmanujaṃ bhujet

'''100.16''' lambamānadviradā ca sāṭṭahāsā ca sarvadā sarpairupāvṛtā devī pretāsanasamanvitā

<poem>
laṃ indrāgnibhairavāya nandāya svāhā  |  aghorāgnibhairavi cāpyante
kālāgnibhairavī kālabhairavo mahāśvānaḥ sarvasaṃhārabhairavaḥ  |
pracaṇḍabhairavi ānandacaṇḍabhairavogracaṇḍabhairava krūracaṇḍabhairava
sarvavāhanebhyaḥ svāhā  |  sarvāyudhebhyaḥ svāhā  |  devīputra
koṭibhaṭṭāraka bhairavanātha pañcānana kapilajaṭābhāsura trinetra
jvālāmālin imaṃ baliṃ gṛhṇīṣva svāhā  |
caṇḍikāyai namaḥ  |  vasupiśācasarvaprāṇipriyāya sarvajanamohāya
jvala jvala prajvala prajvala sarvajanasya hṛdayaṃ mama vaśaṃ kuru kuru
svāhā  |  īṃ ṣaiṃ raiṃ kṣyoṃ īṃ hrīṃ īṃ hauṃ gaṃ gīṃ raṃ syāṃ raṃ raṃ vauṃ raṃ hauṃ raṃ kṣauṃ
kṣyāṃ īṃ bhūṃ iṃ īṃ hvāṃ raṃ bhraṃ vyāṃ caṃ bhrāṃ oṃ namo bhagavati vāṃ kāli
rudrāgnibhairavi sarvasaṃhārarūpiṇi bhṛtyaṃ sarvaśatrukṣayakāri īṃ bhroṃ
sarvabhūtapiśācini rudri jvālāmālini īṃ ruṃ astrairāvṛte īṃ ruṃ ghuṃ īṃ
ghuṃ ucchre bṛhadavatāre soṃ vārtāli astre raṃ hrīṃ īṃ raṃ oṃ namaḥ  |
tripurabhairavyāḥ sarvamantrān japet  |
śrīmantraḥ -- īṃ troṃ īṃ hauṃ raṃ troṃ raṃ troṃ khaṃ  ||
raṃ laṃ raṃ gandharaṃ gaṇḍakyaṃ raṃ ātvaṣṭiraṃ kara iṣiraṃ vidveṣiraṃ kṣauṃ groṃ īṃ groṃ
klīṃ bhraṃ raṃ kṣāṃ haiṃ sarvaduṣṭānāṃ sarvasya tatcittacakṣumukhagatajihvā
stambhanaṃ kuru kuru grīṃ śrīṃ klīṃ īṃ bhraiṃ raṃ graiṃ kuru kuru kṣaṃ raṃ laṃ yaṃ raṃ ptāṃ
īṃ ṭhaṃ raṃ vaṃ kṣuṃ raṃ haṃ riṃ noṃ rauṃ kṣauṃ raṃ syoṃ raṃ svāhā raṃ sveṃ raṃ riṃ raṃ śrīṃ
namaḥ  ||
</poem>

'''100.17''' aṣṭatriṃśatkalānyāse pañcamūrdhasu pañca ca pañcavaktreṣu ca nyāso hṛdgrīvāṃsanābhikukṣiṣu

'''100.18''' pṛṣṭhe pārśve kare liṅge vakṣoguhyorunitambake jānujaṅghāsphigghrāṇaśiraḥpāde’ṣṭatriṃśake

===Kapitel 101===

''ekādhikaśatatamaḥ paṭalaḥ · muhūrtanirṇayavidhiḥ''

'''101.1''' athātaste guruśreṣṭha devatāsthāpane nave muhūrtanirṇayaṃ vakṣye sāvadhānamanāḥ śṛṇu

'''101.2''' uttarāyaṇakāle tu liṅgasaṃsthāpanaṃ varam dakṣiṇāyanakāle tu varjayettu viśeṣataḥ

'''101.3''' meṣe ca vṛṣabhe caiva mithune siṃhamāsake caturmāseṣu kartavyā pratiṣṭhā cottamā bhavet

'''101.4''' madhyamā ceti vikhyātā puṣyaphālgunamāsayoḥ tulākanyāvṛścikeṣu māseṣvadhama īritaḥ

'''101.5''' cāpaṃ kumbhaṃ ca kaṭakaṃ trimāsaṃ parivarjayet śuklapakṣeṣu kartavyaṃ kṛṣṇapakṣaṃ parityajet

'''101.6''' kṛṣṇapakṣe viśeṣeṇa pañcamyantaṃ śubhāvaham pañcamyāścāpi parataḥ kṛtaṃ cedaśubhāvaham

'''101.7''' trayodaśī dvādaśī ca daśamī ca caturdaśī uttamā ceti vikhyātā madhyamāṃ tu tataḥ śṛṇu

'''101.8''' ekādaśī dvitīyā ca pratipatpañcamī tathā madhyamatvena saṃproktā pratiṣṭhāyāṃ gurūttama

'''101.9''' tṛtīyā ca caturthī ca ṣaṣṭhī caiva tu saptamī etāścaivādhamāḥ proktā hyaṣṭamī tvadhamādhamā

'''101.10''' navamī sarvathā varjyā pratiṣṭhāyāṃ viśeṣataḥ somaḥ śukro budho jīvaḥ pratiṣṭhāvāra uttamaḥ

'''101.11''' bhānuvāraśca bhaumaśca mandavāro’śubho bhavet bhānau kartṛvināśaḥ syād bhaume karmavināśanam

'''101.12''' mande bhoktṛvināśaśca trivāraṃ parivarjayet aśvinī rohiṇī cārdrā puṣyā caiva punarvasūḥ

'''101.13''' tārāścaivottamāḥ proktā madhyamaṃ tu tataḥ śṛṇu mṛgaśīrṣastathā hastaścitrā caivānurādhikā

'''101.14''' uttarāṣāḍhā caitāni madhyamāni bhavanti hi proṣṭhapadyuttarādyā ca tathaivottaraphalgunī

'''101.15''' śravaṇā revatī caiva hyadhamatvena kīrtitāḥ adhamādhamā śraviṣṭhā ca proktā śatabhiṣaktathā

'''101.16''' uttamāstu sthirāḥ proktā madhyamāścobhayātmakāḥ sthire tu vṛścikaṃ kumbhamubhaye cāpameva ca

'''101.17''' rāśīnetānvivarjeta pratiṣṭhāyāṃ gurūttama uccasthānagataścandro yajamānasukhapradaḥ

'''101.18''' candrastu nīcarāśistho dāridryaṃ saṃprayacchati mitrasthānagataścandro dhanamitrapravṛddhikṛt

'''101.19''' śatrukṣetragate candre śatruvṛddhirbhaviṣyati sūrarāhvindusaurāścet sthāpane lagnasaṃsthitāḥ

'''101.20''' nāśayantyacirādeva grāmāñjanapadāṃstathā śubhāstūdayasaṃsthāścet sarvasaukhyadhanapradāḥ

'''101.21''' dhanasthānagatāḥ pāpāḥ kurvanti dhananāśanam śubhāstu candrasaṃyuktā dhanadāstatra saṃsthitāḥ

'''101.22''' bhrātṛsthānagataścandro bhrātṛvṛddhikaro bhavet industhānagatāḥ pāpāḥ kurvanti sukhanāśanam

'''101.23''' tadeva vardhayiṣyanti saumyāścandravivarjitāḥ sukhasthānagatāḥ krūrāḥ kurvanti sukhanāśanam

'''101.24''' tatra sthitāḥ śubhāḥ sarve putrakarmasukhapradāḥ putrasthānagataḥ kuryāt saukhyanāśaṃ niśākaraḥ

'''101.25''' nāśayanti ripūn krūrāḥ śatrukṣetraṃ samāśritāḥ śatrusthānagate jīve śatruvṛddhirbhaviṣyati

'''101.26''' sthānabhraṃśakarau tatra saṃsthitau candrabhārgavau kuryājjāmitragaḥ sūryo yajamānavimocanam

'''101.27''' kujastvagnibhayaṃ kuryāt piśācabhavanaṃ bhṛguḥ jīvendū saptamasthau ced dhanadhānyāgamo bhavet

'''101.28''' aṣṭamasthā grahāḥ sarve kurvanti kulanāśanam dharmasthānagatāḥ saumyāḥ kuryurdharmavivardhanam

'''101.29''' pāpāścandrayutāḥ kuryuḥ saukhyadharmadhanakṣayam karmasthānagatāḥ krūrāḥ kurvanti sthānanāśanam

'''101.30''' candreṇa saṃyutāḥ saumyāḥ putramitrasukhapradāḥ lābhasthānagatāḥ sarve putrāyuḥśrīsukhapradāḥ

'''101.31''' dvādaśasthā grahāḥ sarve hyatra dāridryadāḥ smṛtāḥ nakṣatrānte ca tithyante varṣānte ca dhanakṣayaḥ

'''101.32''' vyatirikte vyatīpāte grahadoṣasamanvite māsaśūnyadine rāśau pariveṣe ca durdine

'''101.33''' ṣaḍaśītimukhe caiva sthāpanaṃ varjayetsudhīḥ budhaḥ śukro guruścaivāpyudaye deśikottama

'''101.34''' vaināśe tvaṣṭame rāśāvayane dakṣiṇe tathā vipatpratyagvadharkṣe ca pratiṣṭhā māraṇāvahā

'''101.35''' kulakṣayaḥ syād grahaṇe tvayane maraṇapradam viṣuve vittahīnatvaṃ saṃkrāntau mūlanāśanam

'''101.36''' ṛkṣānte sukhahīnatvamayane dharmanāśanam māsānte bimbanāśaḥ syād vatsarānte’śubhapradam

'''101.37''' viṣkambhe tu na sānnidhyaṃ vyāghāte kartṛnāśanam śūle śriyo vihīnatvaṃ vajre vajreṇa bādhanam

'''101.38''' paridhe kartṛnāśaḥ syāt kālakaṇṭhe ripukṣayaḥ śakunādau ca vṛṣṭiḥ syād varjayetkaraṇādi ca

'''101.39''' vaiṣṇave candrasūryau ca vāyavye cātha maitrake siddhayoge pratiṣṭhā ceduttameti prakīrtitā

'''101.40''' madhyamastvamṛto yogaḥ pratiṣṭhāyāṃ gurūttama yogeṣu pratirāyuṣmānsaubhāgyaṃ ca śubhapradam

'''101.41''' sukarmā ca dhṛtiḥ prītirdhruvo vṛddhiḥ sukhapradaḥ meṣavṛścikayorbhaumaḥ kanyāmithunayorbudhaḥ

'''101.42''' dhanurmīnadvayormantrī tulāvṛṣabhayoḥ kaviḥ makarakumbhayoḥ sauriḥ kaṭakasya ca śītaguḥ

'''101.43''' mṛgendrasya tathādityo rāśīnāmadhipāḥ smṛtāḥ nakṣatradoṣasaṃyuktaṃ tithidoṣasamanvitam

'''101.44''' vāradoṣasamāyuktaṃ gaṇḍadoṣasamanvitam muhūrtadoṣasaṃyuktaṃ lagnaṃ pañcāṅgadoṣakam

'''101.45''' divāsūrye niśācandre lagnādekādaśasthite

'''101.46''' koṭidoṣā vinaśyanti śivena parikīrtitam vāreśvare balopete yogadoṣo na vidyate

'''101.47''' vāreśvaro durbalaśced yogadoṣo balo bhavet nīcasthāḥ śatrugehasthā vṛddhabālagrahāḥ punaḥ

'''101.48''' krūrāḥ śīghrāḥ śubhā vakrā jñeyā balavivarjitāḥ rāhudoṣaṃ budho hanti ubhaye saṃsthite caran

'''101.49''' trayāṇāṃ bhūmijo hanti caturṇāṃ bhṛgupuṅgavaḥ pañcānāṃ devamantrī ca ṣaṇṇāṃ doṣaṃ ca candramāḥ

'''101.50''' saptadoṣān ravirhanti viśeṣāddakṣiṇāyane ravirmeṣe tulāyāṃ ca candrastu vṛṣavṛścike

'''101.51''' kujaśca makarakarke kanyāmīne budhasya ca gurośca karkimakarau mīnakanye bhṛgustathā

'''101.52''' tulāmeṣau ca mandasya uccanīcamudāhṛtam parvadvayamatikramya yadā saṃkramaṇaṃ raveḥ

'''101.53''' adhimāsaḥ sa vijñeyaḥ śubhakarma vivarjayet yasminmāsi na saṃkrāntiḥ saṃkrāntidvayameva vā

'''101.54''' saṃsarpakaḥ sa vijñeyaḥ sarvakarmasu garhitaḥ ahaspatiravantyāṃ ca saṃsarpaḥ keraleṣu ca

'''101.55''' malamāsastu pāñcāle coladeśe ca vidyate sauraṃ cāndraṃ ca bhedena bārhaspatyamiti tridhā

'''101.56''' kāraṇaṃ sauramānaṃ syāt cāndramānaṃ tu sūkṣmakam bārhaspatyaṃ tathā sthūlaṃ māsatrayamudāhṛtam

'''101.57''' sthūlaṃ sūkṣmaṃ parityajya kāraṇaṃ saṃgrahedguruḥ sauramāne prakartavyaṃ sarvaṃ karma sukhāvaham

'''101.58''' dehaṃ tu prathamaṃ vidyād dvitīyaṃ dhanameva ca bhrātṛsthānaṃ tṛtīyaṃ tu mātṛsthānaṃ caturthakam

'''101.59''' pañcamaṃ tu sutasthānaṃ ṣaṣṭhaṃ vai ṛṇamucyate jāmitraṃ saptamaṃ proktamāyuḥsthānaṃ tathāṣṭamam

'''101.60''' dharmasthānaṃ tu navamaṃ karma vai daśamaṃ smṛtam lābhamekādaśaṃ vidyād dvādaśaṃ vrayameva ca

'''101.61''' praveśe dvādaśe śuddhirekādaśe tu paitṛke daśame bhojane śuddhirnavame caulakarmaṇi

'''101.62''' upanītāvaṣṭame ca vivāhasya tu saptame ṣaṣṭhe tu navavastrāṇāṃ prayāṇe pañcame tathā

'''101.63''' vidyārambhe catuḥśuddhirauṣadhe ca tṛtīyake dvaye dhānyasaṃgrahaṇe lagnaśuddhiśca saṃgame

'''101.64''' dvādaśe tu pratiṣṭhāyāmuttamā parikīrtitā madhyamā tvaṣṭame śuddhiḥ pañcame tvadhamā bhavet

'''101.65''' kalāsaṃgrahaṇe kāle daśame śuddhiriṣyate aṣṭame cāṣṭabandhasya saptame ca mṛdo grahe

'''101.66''' bījāvāpanake yugmasthānānāṃ śuddhiriṣyate rakṣābandhe ca navamaṃ śuddhamiṣṭaṃ gurūttama

'''101.67''' kumbhādbhirabhiṣeke ca dvādaśe śuddhiriṣyate śubhena vīkṣito yukto lagno vai śubhadaḥ smṛtaḥ

'''101.68''' aśubhairvīkṣito yukto lagnaścāśubha īritaḥ lagnasya horā drekkāṇaṃ navāṃśaṃ dvādaśāṃśakam

'''101.69''' triṃśāṃśaścāpi vijayaḥ ṣaḍvargāścaivamīritāḥ ojabhāścaiva pūrvārdhe sūryahorāḥ prakīrtitāḥ

'''101.70''' caturthaṃ saptamaṃ lagnaṃ daśamaṃ kendrasaṃjñitam navamaṃ pañcamaṃ cāpi trikoṇaṃ samudāhṛtam

'''101.71''' dagdhayoge ṣaḍghaṭikāmaṣṭau jvālāmukhe tathā utpāte mṛtyuyoge ca ghaṭikātrayapañcakam

'''101.72''' yamagaṇḍe tu navamīṃ ghaṭikāṃ tu parityajet grahaṇe varjanīyāni dināni pravadāmyaham

'''101.73''' pūrṇagrāse tu saptāhamardhagrāse dinatrayam tribhāge tu sati graste dvidinaṃ parivarjayet

'''101.74''' pādonamaṇḍale graste tvekarātryā śubhaṃ bhavet ghaṭikādvayaṃ tu ṛkṣānte māsānte tu dinatrayam

'''101.75''' varṣānte varjayetpakṣaṃ sarvasminnapi karmaṇi lagnaśuddhiṃ pravakṣyāmi samāsācchṛṇu sāṃpratam

'''101.76''' śatadoṣaiśca duṣṭe ca lagne cāpi viśeṣataḥ candrātmaje lagnage cet kendrasthānaṃ gate’pi vā

'''101.77''' śataṃ lagnagataṃ doṣaṃ hanti bhānustamo yathā bhārgave lagnasaṃsthe ca lagnadoṣo vinaśyati

'''101.78''' vākpatirdviguṇaṃ hanti lagnadoṣāṃstathāmitān dineśe kendrage caiva deveḍye kendrage tathā

'''101.79''' lagnadoṣaśataṃ hanti dviguṇaṃ triguṇaṃ tu vā snāne dāne jape home svādhyāye pitṛkarmaṇi

'''101.80''' devatārādhane caiva tyājyadoṣo na vidyate caturbhīravimuktābhirandhaṃ nakṣatramucyate

'''101.81''' ṣaḍbhiścāpi dvinetraṃ tu navabhistvekalocanam pañcabhiryugmanetraṃ syāt tribhirandhaṃ bhavettataḥ

'''101.82''' ravimukte sthitā tārā mṛtāstisro grahe tathā saptasthāstvardhajīvāśca eke’pi ca tathā mṛtāḥ

'''101.83''' pūrṇajīvāstvaṣṭame ca pādajīvāstu saptame triguṇye sūryavārādīnaśvinyādiṣu saṃtyajet

'''101.84''' śiṣṭe navasu sūryaścet ṣaṭkoṇeṣu dvayāndhakaḥ pādaikadṛṣṭirnavame daśame ca tṛtīyake

'''101.85''' dvipādadṛṣṭirnavake pañcake tu tripādadṛk caturthe vāṣṭame cāpi pūrṇā dṛṣṭiśca saptame

'''101.86''' pādadṛṣṭirbalī mandaścārdhadṛṣṭirbalī guruḥ tripāddṛṣṭirbalī bhaumaḥ pūrṇaḥ saptamakena tu

'''101.87''' andhaśca badhiraḥ paṅgurevaṃ rāśistridhā matā meṣavṛścikakumbhāśca divāndhāste prakīrtitāḥ

'''101.88''' divā tulālī badhirau rātrau makaradhanvinau mithunaṃ kaṭakakanye ca rātryandhatvena kīrtitāḥ

'''101.89''' divākumbho niśāmīnaḥ paṅguścāpi prakīrtitaḥ andhaśca niṣphalaṃ yatra badhiro maraṇapradaḥ

'''101.90''' paṅgunā kāryahāniḥ syātsarvakarmāṇi varjayet meṣo mīno dhanuścaia gamanaṃ ceti kīrtitā

'''101.91''' karkivṛścikasiṃhāśca sthānaṃ cāpi prakīrtitam kumbhaṃ mithunataulī cāpyāsīnaṃ ceti kīrtitam

'''101.92''' kanyāvṛṣabhanakrāśca śayanaṃ ceti bhāṣitam gacchatā kalahaṃ ghoraṃ sthitā lābhaṃ viśeṣataḥ

'''101.93''' āsīnātkāryasiddhiḥ syācchayanānmṛtyureva ca ataḥ paraṃ pravakṣyāmi āsāṃ cāmṛtakālakam

'''101.94''' meṣavṛścikayoḥ prātaḥ strīkarkī dvaṃdvasaṃgame siṃhakumbhadhanurmadhye tvaparāhne tulāvṛṣau

'''101.95''' sāyāhne mīnamakarau mṛtavelā samīritā sarvakāryeṣu hāniśca prāṇahānirbhaviṣyati

'''101.96''' kṛte caivāgninakṣatre agnibādhā bhaviṣyati ayanaṃ māsamevaṃ ca pakṣarkṣatithayo’pi ca

'''101.97''' lagnadrekkāṇahorāśca velā dṛṣṭiśca jīvitam yogaśca karaṇaṃ caiva śubhāścaiva viśeṣataḥ

'''101.98''' uttamaṃ cāpyanāvarte tvāvarte madhyamaṃ smṛtam adhamaṃ punarāvarte kanyasaṃ tvantarīyake

'''101.99''' punarāvartakasyāpyantarīyasya vai tathā anayostu vinā kālaṃ vinā pakṣaṃ dinaṃ vinā

'''101.100''' sarvakāleṣu kartavyaṃ vidhidṛṣṭena karmaṇā anyathā kurute puṃsāmāyuḥśrīputranāśanam

<poem>
evaṃ yaḥ kurute martyaḥ sa puṇyāṃ gatimāpnuyāt
</poem>

===Kapitel 102===

''dvyadhikaśatatamaḥ paṭalaḥ · ṣaḍadhvanyāsavidhiḥ''

'''102.1''' athātaḥ saṃpravakṣyāmi ṣaḍadhvanyāsakaṃ vidhim ṣaḍadhvā tu pareśasya sthānāgamanayoḥ sṛtiḥ

'''102.2''' sarveṣāṃ vyāpakasyāsya vyāpyavyāpakabhedataḥ ṣaḍadhvāṅgaṃ tathāṅgī syādadhvātītaḥ paraḥ śivaḥ

'''102.3''' brahmā viṣṇuśca rudraśca maheśaśca sadāśivaḥ nādo bindustathā śaktiḥ śivaśceti vibhāgataḥ

'''102.4''' navadhā mūrtibhedena proktaḥ sarveśvaro haraḥ tathā ca trividhaṃ proktamaṅgaṃ sarveśvarasya tu

'''102.5''' bhogāṅgamadhikārāṅgaṃ layāṅgamiti sattama brahmā viṣṇuśca rudraśca bhogāṅgatvena kīrtitāḥ

'''102.6''' adhikārāṅgakau proktau maheśānasadāśivau nādo bindustathā śaktiḥ śivaśceti layāṅgakam

'''102.7''' ṣaḍadhvā caiva bhogāṅgādyadhikārāntamiṣyate adhvātīto layāṅgaṃ syāttasya nyāso hi niṣkale

'''102.8''' kalā tattvaṃ ca bhuvanaṃ varṇāḥ padamanantaram mantraśceti samākhyāto nyāsastasya ṣaḍadhvanaḥ

'''102.9''' śīrṣaṃ vaktraṃ ca hṛdayaṃ guhyaṃ ca caraṇaṃ tathā kalpayecca kalānyāsāditi deśikasattama

'''102.10''' bhuvanena śarīraṃ ca kalpayeccinmayaṃ tathā varṇādhvanā tvacaṃ caiva cinmayīṃ parikalpayet

'''102.11''' mantrādhvanā ca rudhiraṃ cinmayaṃ ca prakalpayet tattvapadādhvanā majjāśuklādīnyapi kalpayet

'''102.12''' tvagraktamāṃsamajjādi nāsti vai parameśvare mantrātmanaścidghanasya tvagādi hyupacaryate

'''102.13''' kriyate no ṣaḍadhvā cecchivastvavyāpako bhavet tasmātsarvaprayatnena ṣaḍadhvanyāsamācaret

'''102.14''' kumbhaṃ vā bimbamevātha ṣaḍadhvakavihīnakam

'''102.15''' mūrterāvāhanātpūrvaṃ ṣaḍadhvānaṃ prakalpayet ṣaḍadhvānastridhā bhinnāścaiṣāṃ lakṣaṇamucyate

'''102.16''' niṣkalaṃ sakalaṃ caiva tathā sakalaniṣkalam kalādhvānaṃ samārabhya mantrāntaṃ sakalaṃ bhavet

'''102.17''' mantrādhvānaṃ samārabhya kalāntaṃ niṣkalaṃ smṛtam varṇaṃ ca bhuvanaṃ caiva tattvaṃ caiva kalāṃ tathā

'''102.18''' padaṃ mantraṃ ca vinyasyametatsakalaniṣkalam kumbhe bhogāṅgamūrtestvākarṣaṇe sakalaṃ smṛtam

'''102.19''' adhikārāṅgamūrtestvākarṣaṇe sakalaniṣkalam layāṅgamūrteḥ saṃdhāne niṣkalaṃ samudīritam

'''102.20''' ataḥ kumbhe tathā bimbe tattadāvāhanādike pūrvoktavidhinānena ṣaḍadhvānaṃ prakalpayet

===Kapitel 103===

''tryadhikaśatatamaḥ paṭalaḥ · śaivaśrāddhavidhiḥ''

'''103.1''' athātaḥ saṃpravakṣyāmi śaivaśrāddhavidhiṃ śṛṇu śaivaśrāddhavidhirmukhyo hyādiśaivairanuṣṭhitaḥ

'''103.2''' anyaiśca kathitaṃ śrāddhamasadbhāvavidhānakam śaivaśrāddhamakṛtvā yo vaidikaśrāddhamācaret

'''103.3''' dīkṣitaśca mṛtaścaitāvubhau nirayagāminau muktātmā ca śive līnaḥ kāle pratyābdikaṃ kramāt

'''103.4''' tasminmāse ca tattithyāṃ śaivaśrāddhaṃ kramāccaret taddine tu pitṛśrāddhaṃ kulakoṭiṃ samuddharet

'''103.5''' udayādyastamanāntaṃ pañcabhāgaṃ vibhāvayet prātaḥ saṃgavamadhyāhnāvaparāhnastathaiva ca

'''103.6''' sāyāhna iti saṃjñeyaḥ sāyāhnavyāpinī yadi pare’hani tattithyāstu yatrādhikyaṃ dine bhavet

'''103.7''' taddine ca pitṛśrāddhaṃ tathābhāve tilodakam nityaṃ naimittikaṃ kāmyaṃ vṛddhiḥ pārvaṇameva ca

'''103.8''' evaṃ pañcavidhaṃ śrāddhaṃ jñātvā ca gurupuṅgavaḥ pārvaṇaṃ sṛṣṭirityuktaṃ vṛddhiḥ sthitirudāhṛtā

'''103.9''' kāmyaṃ saṃhāra ityuktaṃ naimittaṃ ca tirohitam nityamanugrahaḥ proktaṃ śrāddhaṃ pañcaprakārataḥ

'''103.10''' divase divase kuryādetannityamitīritam divasaṃ prati yatkarma pitṝnuddiśya deśikaḥ

'''103.11''' tarpaṇādi kṛtaṃ kāryaṃ nityaśrāddhamudīritam mṛte’hani tithau kāryaṃ naimittikamudāhṛtam

'''103.12''' ayane viṣuve caiva grahaṇe candrasūryayoḥ puṇyakṣetrāṭanādau ca śrāddhaṃ kāmyamudīritam

'''103.13''' pratidarśaṃ kṛtaṃ śrāddhaṃ pārvaṇaṃ samudīritam vṛddhiśrāddhaṃ vivāhādau pañcadhā śrāddhamucyate

'''103.14''' ādiśaivo mahāśaivo hyanuśaivastrayaṃ guro homaṃ ca carubhuktaṃ ca āvāhanaṃ vidhānataḥ

'''103.15''' śaivaśrāddhe prakuryāttu āmarūpaṃ na kārayet āmarūpakṛtaṃ śrāddhamantyaśaivairanuṣṭhitam

'''103.16''' caturvedārthaviduṣāṃ brāhmaṇānāṃ mahātmanām ācāryaikaikabhuktena koṭiṃ bhuñjīta yo naraḥ

'''103.17''' lakṣaṃ tu sādhake bhukte putre daśasahasrakam samayasthe sahasraṃ syādbhukte caivaṃ phalapradam

'''103.18''' śaivāḥ saptavidhā madhye ādiśaivo viśeṣataḥ śivadvijādayaḥ sarve praśastāḥ śrāddhasaṃpadi

'''103.19''' svajātyutkarṣato grāhyāḥ svasvajātyudbhavāśca vā tadalābhe mahāśaivastathā dānapratigrahe

'''103.20''' dānapratigrahādīnāṃ sacchūdraṃ parivarjayet sarveṣāṃ jātibhedānāmādiśaivo viśeṣataḥ

'''103.21''' śrotriyo vedaviduṣāṃ śāstrajño jñānavāṃstathā śivapūjāparo vipraḥ śivadvijakulodbhavaḥ

'''103.22''' śivadīkṣāyutaścaiva uttamaḥ parikīrtitaḥ apatnīko vanasthaśca pāṇḍityajñānahīnakaḥ

'''103.23''' adīkṣitaścāṅgahīnaḥ kāṇaḥ piśunaśuṇḍakau golako dattaputraśca ṛtupatnīkavarjitau

'''103.24''' dantahīno durācāro loke bhavati ninditaḥ dhūrto bahvagnisaṃtaptaḥ krūro vāpyanyajātikaḥ

'''103.25''' dīkṣāvihīnaviprādyaḥ pāñcarātrāditantrakaḥ bauddhaḥ pāṣaṇḍakaḥ sarvāṅśaivaśrāddhe parityajet

'''103.26''' anyathā kurute mohāttatkarma niṣphalaṃ bhavet abhāve brahmacārī ca deśikaḥ patnihīnakaḥ

'''103.27''' tasmātsarvaprayatnena ādiśaivaṃ tu kārayet ācāryāṇāṃ kṛte śrāddhe ācāryaṃ varayedguruḥ

'''103.28''' anācāryaṃ varayeccedāyuḥśrīputranāśanam nirvāṇadīkṣitaḥ śrāddhe viśeṣaṃ samayaṃ tyajet

'''103.29''' samayī ca viśeṣī ca nirvāṇī ca tridhā bhavet tattatsaṃskārabhedaiśca bhuvane tāratamyataḥ

'''103.30''' padaprāptikramātsamyak tattadbhedavidhānataḥ āvāhayetpitṝndevāṅśrāddhe’tvaro vicakṣaṇaḥ

'''103.31''' ācāryārthaṃ kṛte śrāddhe śiva īśasadāśivau śāntaḥ skandagaṇādhīśau caṇḍikeśaśca sapta ca

'''103.32''' śivaḥ prathamataḥ pūjyaḥ īśaḥ śāntasadāśivau dvitīye ca samāvāhyāḥ skandaśca gaṇacaṇḍakau

'''103.33''' tṛtīye ca samāvāhyā evamācāryasaṃskṛte varayeddeśikānsapta alābhe syāttu pañcakam

'''103.34''' sādhakadvitayaṃ deve pitrarthaṃ deśikatrayam tasyālābhe dvayaṃ proktaṃ devapitrośca pūjane

'''103.35''' rudro’nantaśca kathitau viśvedevā iti dvijāḥ īśaḥ sadāśivaḥ śāntaḥ śivaśrāddhe prakīrtitāḥ

'''103.36''' pūjane ca samāvāhyā evaṃ nirvāṇasaṃskṛte samayiviśeṣiṇośca viśve devānpuro yajet

'''103.37''' tatra nandimahākālau dvau gaṇadvitayasthitau skandacaṇḍagaṇeśānāstrayaḥ pitrarthamīritāḥ

'''103.38''' naimittikavidhānena śrāddhaṃ samyak śṛṇuśva vai brāhmaṇāngrāhayedbhaktyā snānānuṣṭhānapūrvakam

'''103.39''' nityakarma prakurvīta tadaiva brāhmaṇānvaret nimantritānvaretpūrvaṃ pavitraṃ dhārayettataḥ

'''103.40''' pradakṣiṇatrayaṃ paścātkṛsarābhyañjanaṃ param vighneśayajanaṃ caiva puṇyāhaṃ pañcagavyakam

'''103.41''' śivasya prāṅmukhaṃ sthānamanyeṣāṃ ca udagdiśi kūrmāsane tu saṃsthāpya triḥpradakṣiṇamācaret

'''103.42''' devatābhyaḥ pitṛbhyaśca mahāyogibhya eva ca namaḥ svadhāyai svāhāyai nityameva namo namaḥ

'''103.43''' sāyujyādipadaprāptamīśādipitṛdaivatam vaṃśavṛddhikaraṃ devaṃ nityameva namo namaḥ

'''103.44''' śivajñānapratīkāśaṃ śivaṃ saptagurūnsadā ahaṃ vande mahādevaṃ nityameva namo namaḥ

'''103.45''' devānāṃ ca pitṝṇāṃ ca gurūṇāṃ śivayoginām pradakṣiṇatrayaṃ kurve nityameva namo namaḥ

'''103.46''' iti mantrānsamuccārya pradakṣiṇatrayaṃ kuru vijñāpya deśikānpaścācchrāddhabhūmiṃ viśeṣataḥ

'''103.47''' kailāsavatkramāddhyātvā dhyātvā devaṃ maheśvaram īśādīṃśca pitṝndhyātvā tataḥ śrāddhaṃ pravartaye

'''103.48''' anujñānantaraṃ paścātsakalīkaraṇaṃ tathā vighneśaṃ prārthayeccaiva saṃkalpaṃ tu tataḥ param

'''103.49''' sāmānyārghyaṃ tataḥ paścādyāgeśvarasya pūjanam prokṣaṇaṃ ca tataḥ paścāccaruśuddhiṃ tathaiva ca

'''103.50''' kalpayeddevapitrarthamarghyaṃ pātreṣu pañcasu devārthaṃ yavasaṃyuktaiḥ pitrarthaṃ tilasaṃyutaiḥ

'''103.51''' arghye cāpyamṛtaṃ yojya sthalaśuddhiṃ ca kārayet jñātyādigotrasaṃjñāśca dīkṣānāmapuraḥsaram

'''103.52''' purataḥ śivamāvāhya yajñasūtraṃ ca savyakam prācīnāvītakaṃ kṛtvā īśādigaṇapāntakam

'''103.53''' āvāhayetkramātsamyak pūrvoktavidhimārgataḥ pādyārthaṃ śuddhadeśe tu uttare caturaśrakam

'''103.54''' vṛttāni dakṣiṇe kṛtvā pūjayecca pṛthak pṛthak pādyaṃ ca vidhivatsamyagalaṃkāraṃ tataḥ param

'''103.55''' vastrayajñopavītaṃ ca bhūṣaṇādīni dāpayet pitṛkārye vidhānena vahnikāryaṃ purā kuru

'''103.56''' agnisaṃdhānaviṣaye kiṃcidbhedaḥ pracakṣyate nirvāṇinaḥ samārabhya ācāryāntaṃ kramācchṛṇu

'''103.57''' śivāgnimukhaṃ saṃkalpya homayettu viśeṣataḥ samayyādiviśeṣyantaṃ bālāgnau homayettataḥ

'''103.58''' sarvapākaviśuddhyarthaṃ śivāgnyāhutipūrvataḥ śivānale kariṣye’haṃ tasmāddhomamiti dvijāḥ

'''103.59''' kuruṣvetyabhyanujñāto vahnau homaṃ samācaret caruṃ samidhamājyaṃ ca viśeṣapitṛdaivete

'''103.60''' somaśca pitṛmāṃścaiva aṅgiro yama eva ca agniśca kavyavāhādyaḥ aryamṇe’gniṣvāttāya ca

'''103.61''' barhiṣibhya ājyapāya pitaraḥ somapāya ca somāya pitṛmacchabdaṃ caturthyantaṃ svadhā namaḥ

'''103.62''' tato yamāyetyuccārya aṅgirasvate svadhā namaḥ uktvāgnaye tataḥ kavyavāhanāya svadhā namaḥ

'''103.63''' aryamṇe cāgniṣvāttāya barhiṣibhyaḥ svadhā namaḥ somapāya ca pitṝṇāmājyapāya svadhā namaḥ

'''103.64''' āvāhanādyaiḥ saṃpūjya pratyekaṃ homayettataḥ caturviṃśatipitṝṇāṃ svadhāntaṃ homamācaret

'''103.65''' hutaśeṣaṃ pradadyāttu bhojaneṣu naraṃ smaran pitrathaṃ caiva piṇḍārthaṃ dadyādviśvasya devayoḥ

'''103.66''' arghyaṃ ca sthālīpākaṃ ca brāhmaṇānbhojayettataḥ caturaśraṃ trayaṃ vṛttaṃ gomayenaiva śuddhitam

'''103.67''' kadalīparṇamādāya sāgraṃ vāme tu nikṣipet upapātrasahopetaṃ prokṣayedastramantrataḥ

'''103.68''' annaṃ dāpayeccaiva dadyāllavaṇapūrvakam sarpiṣā payasā caiva dadhi madhu phalatrayam

'''103.69''' vyañjanaṃ pāyasānnaṃ ca paramānnaṃ pṛthak pṛthak dāpayetkadalīparṇe pātraśuddhiṃ ca pūrvataḥ

'''103.70''' astreṇa prokṣayeccaiva pātraṃ vāmena saṃspṛśet apasavyakrameṇaiva ekavāraṃ pradakṣiṇam

'''103.71''' īśānenaiva mantreṇa pariṣicya viśeṣataḥ triyambaketi mantreṇa abhyukṣaṇaṃ ca kārayet

'''103.72''' havyaṃ ca daivamannaṃ ca kavyaṃ ca piturannakam svāhāṃ caiva svadhāṃ caiva śambhorannaṃ ca rakṣayet

'''103.73''' tilākṣataiḥ samopetamudakenaiva pūrvataḥ daivaṃ svarṇamayaṃ pātraṃ rājataṃ pitṛpātrakam

'''103.74''' ekaḥ śambhurmahadbhūtaṃ prīyatāṃ ca maheśvaraḥ dattaṃ dadedviśeṣeṇa udakaṃ prāśya buddhimān

'''103.75''' prāṇāhutiṃ tataḥ kṛtvā sadyaṃ japtvā śrutiṃ japet bhojanānantaraṃ teṣāṃ tṛptyai vikiramācaret

'''103.76''' vāyasaṃ piṇḍamādāya pradadyānmantramuccaran ucchiṣṭakṣālanaṃ paścāttāmbūlaṃ dakṣiṇāṃ tathā

'''103.77''' vardhanīmudakāpūrṇāṃ śrāddhado dakṣiṇānanaḥ dhṛtvā paṭhetsvadhākāraṃ vadeyurvācyatāmiti

'''103.78''' īśāditritayaṃ paścāccaturthyantamudīrayet svadhāntaṃ śrāddhakṛtpaścādīśādyāḥ sarva eva ca

'''103.79''' astu svadheti brūyuste bhūmau siñcettato jalam pradakṣiṇatrayaṃ kṛtvā namaskāraṃ kramādguro

'''103.80''' prārthayeddivase śrāddhaṃ śaivaśrāddhaphalapradam annaśeṣaiḥ kiṃ kriyatāmityukte śrāddhakāriṇā

'''103.81''' iṣṭaiḥ sahaiva bhoktavyamiti te brūyuriṣṭadāḥ dātāro no’bhivardhantāṃ śaivasaṃtatireva ca

'''103.82''' śraddhā ca no mā vyapagādbahu deyaṃ ca no’stviti ityuktvā ca priyā vācaḥ praṇipatya kṣamāpayet

'''103.83''' sarvapāpa kṣayārthaṃ hi sarvaśatruvināśanam pañcapātakanāśārthaṃ paracakrādbhayaṃ vinā

'''103.84''' sarvaduḥkhapraśamanaṃ sarvavyādhinivāraṇam sarvopadravadāridryādyapamṛtyuvināśanam

'''103.85''' āyurārogyakaiśvaryadharmārthakāmamokṣadam putrapautravivardhanaṃ sarvakāmaphalapradam

'''103.86''' āśīrvādaṃ viśeṣeṇa bhasmākṣatapuraḥsaram yasmiṃste saṃsravāḥ pūrvamarghyapātre niveśitāḥ

'''103.87''' pitṛpātraṃ taduttānaṃ kṛtvā paścādvisarjayet gṛhītvā darbhapatraiśca udvāsanaṃ tathaiva ca

'''103.88''' kukkuṭāṇḍapramāṇena caturviṃśatisaṃkhyayā pitṝṇāṃ piṇḍamādāya tasyopari tilodakam

'''103.89''' pitṝṇāṃ balidānaṃ ca piṇḍasaṃyojanātparam piṇḍāṃśca goṣu viprebhyo dadyādagnau jale’pi vā

'''103.90''' prakṣipetkulapatnyā vā bhakṣyaṃ piṇḍaṃ pitāmaham etadagniṃ samabhyarcya karmasiddhyarthahomakam

'''103.91''' tattvāni padamantrādīnsvāhāntaṃ homayedguro bhavādīṅśaktināmāni sutapatnīsamanvitān

'''103.92''' pañcabrahmādināmāntaṃ hutvā pūrṇāṃ samācaret prāyaścittavidhānena aghoreṇa śataṃ hunet

'''103.93''' antarbaliṃ kramāccaiva upasthānaṃ tathaiva ca taddevodvāsanaṃ paścādvahnerudvāsanaṃ caret

'''103.94''' pavitraṃ visṛjyācamya homarakṣāṃ ca dhārayet yatkiṃcitkarma he deva samarpayetsadāśive

'''103.95''' pare’hani viśeṣeṇa tarpaṇaṃ ca samācaret athavā taddine vāpi tarpaṇaṃ ca kramādguro

'''103.96''' savyopavītinaṃ paścādiṣṭaṃ bhuñjīta yo naraḥ agnau hutena devasthāḥ svargasthāḥ śrāddhabhojanāt

'''103.97''' yamasthāḥ piṇḍadānena nārakā vikireṇa tu ucchiṣṭairapi paiśācā asurā bhūribhojanāt

'''103.98''' dakṣiṇābhirmanuṣyāśca śrāddhe saptavidhāstathā śivaśrāddhe yadā bhuṅke doṣastatra na vidyate

'''103.99''' pitṛśeṣa iti proktaḥ pitṛṇāmakṣayo bhavet śrāddhahīnaśca yo martyaḥ aputro vā daridrakaḥ

'''103.100''' evaṃ yaḥ kurute martyaḥ śivasāyujyamāpnuyāt anyathā kurute mohāttatkarma niṣphalaṃ bhavet tasmātsarvaprayatnena āgamoktavidhānataḥ

===Anhang 1===

''anubandha 1 · rakṣābandhanavidhiḥ''

'''A1.1''' atha vakṣye viśeṣeṇa rakṣābandhavidhikramam sthāpane prokṣaṇe caiva ayane viṣuve tathā

'''A1.2''' devasya cotsavārambhe devadevyośca kautukam ācāryo mantrasiddhyarthaṃ rakṣābandhakrameṇa ca

'''A1.3''' kautukaṃ bandhayedrajjuṃ pañcasaptanavatridhā viśvebhya iti mantreṇa bṛhatsāmakṣamantrataḥ

'''A1.4''' putravān roganāśārthamārtaścauṣadhamīpsitam viśvasya parirakṣārthaṃ rakṣābandhaṃ samācaret

<poem>
vighneśvarapūjāsaṃkalpaṃ kṛtvā rakṣābandhakarma kariṣye  |  puṇyāhavācanaṃ
varuṇakumbhasthapanaṃ ca
kariṣye iti saṃkalpya aṣṭadalapadmamālikhya
dhānyataṇḍulatilamāṣalājadarbhānāstīrya teṣūpari kumbhaṃ
nidhāya jalaṃ pūrayitvā kumbhamalaṅkṛtya nālikeraphalena pidhāya
varuṇamāvāhya ṣoḍaśopacārapūjāṃ
kṛtvā svarṇarajatatāmranirmitapātre śuddhataṇḍulamāpūrya aṣṭadalapadmaṃ
vilikhya madhye nālikeratāmbūlaṃ
svarṇakārpāsanirmitanavatantūn krameṇa saṃsthāpya prokṣya hṛdayena
paramīkṛtya saṃrakṣya puṇyāhapañcagavyārghyajalenāstreṇa sthaṇḍile oṃ hāṃ
ādhāraśaktaye namaḥ yantrikāyāṃ triyambakāya namaḥ
sthalikāyāṃ pṛthivītattvāya namaḥ taṇḍule saptakoṭimahāmantrebhyo
namaḥ svarṇarajatakārpāsasūtre ātmatattvāya namaḥ vidyātattvāya namaḥ
śivatattvāya namaḥ nālikere māyāśaktyai namaḥ bhasmani lakulīśvarāya
namaḥ iti gandhapuṣpanaivedyaphalatāmbūladhūpadīpaṃ ghaṇṭāraveṇa dattvā
pratisarajapaṃ kurudhvaṃ iti prārthayet vayaṃ kurmaḥ iti prativacanam  |
pratisarajapaḥ  |  oṃ tatsavitur t  |  oṃ agnimīḷe purohitaṃ sravantu
naḥ  |  kṛṇuṣvapājaḥ prasitinnapṛthvīṃ adevī ityādi japitvā oṃ
namo brahmaṇe karomi  |  iti triḥ  |  praṇavenāsthāpya
surabhimayābliṅgābhiḥ pratisarasūtraṃ kartāraṃ ca prokṣya pratisarasūtramādāya
tryambakaṃ yajāmahe iti bhasmanā trirūrdhvamunmṛjya agnirāyuṣmān iti
nālikeraṃ dakṣiṇahaste nikṣipya bṛhatsāmakṣatrabhṛd rakṣā iti rakṣāṃ
kuryāt  |  yo brahmā brahmaṇa ujjahāra akṣitam  |  ityaṣṭa ṛgbhiḥ
bandhayet  |  rakṣābandhanamuhūrtaḥ sumuhūrto’stu iti prativacanam  |
</poem>

'''A1.5''' liṅgasya rudrabhāge tu pīṭhe ca nālamadhyame devānāṃ dakṣiṇe haste śaktīnāṃ vāmahastake

'''A1.6''' śivāstramadhyame bhāge vṛṣasya dakṣaśṛṅgake dhvajadaṇḍasthite daṇḍe rudrabhāge tu nikṣipet

'''A1.7''' rathe siṃhāsane caiva pūrvastambhe tu bandhayet maṇḍapādiṣu sarveṣu mukhyastambhe tu bandhayet ityevaṃ sarvamāśritya sūtradhāraṃ tu kārayet

===Anhang 2===

''anubandhaḥ  2 · śivamaṇṭapapūjāvidhiḥ''

'''A2.1''' tato maṇṭapapūjāyā vidhānaṃ vakṣyate śṛṇu uttamaṃ madhyamaṃ cātha adhamaṃ cādhamādhamam

'''A2.2''' iti bhedaiścaturbhistu yuktaṃ tatkuṇḍasaṃkhyayā trayastriṃśatkuṇḍayuktaṃ pañcāvaraṇasaṃyutam

'''A2.3''' maṇṭapaṃ yāgaśālāyā uttamaṃ parikīrtitam catuḥprākārasaṃyuktaṃ pañcaviṃśatibhistathā

'''A2.4''' kuṇḍaistu yāgaśālāyā maṇṭapaṃ madhyamaṃ bhavet tathā kuṇḍaiḥ saptadaśaiḥ prākāratrayasaṃyutam

'''A2.5''' ekāvaraṇasaṃyuktaṃ navakuṇḍaiḥ pariṣkṛtam adhamaṃ procyate yāgamaṇṭapaṃ gurusattama

'''A2.6''' pañcakuṇḍaistathaikena kuṇḍenaiva vinirmitam adhamādhamamityuktaṃ yāgamaṇṭapakalpane

'''A2.7''' svārthapratiṣṭhādīkṣādau abhāve gurusattama pañcakuṇḍaikakuṇḍāni gṛhṇīyānna tu śaktimān

'''A2.8''' antarītapratiṣṭhāyāṃ prāyaścittādikarmaṇi adhamādhamamityuktaṃ kṛtsyasaulabhyahetutaḥ

'''A2.9''' maṇṭapasyārcanāpyeṣā tridhā vai parikīrtitā saśaktikā viśaktiśca kevaleti vibhedataḥ

'''A2.10''' maṇṭapārādhanoktānāṃ devatānāṃ gurūttama sarvāsāmapi ca dhvānāvāhanādipuraḥsaram

'''A2.11''' pūjā yā kriyate sā tu saśaktiḥ parikīrtitā āsanairmūrtimūlaiścāvāhya yatpūjanaṃ guro

'''A2.12''' viśaktiḥ kīrtyate cātha kevalā ca namo’ntataḥ saśaktikā hyanāvarte punarāvartake’pi ca

'''A2.13''' āvartādau ca kartavyā hyantarīte’tha deśika dīkṣāyāmutsave caiva prāyaścittādikarmaṇi

'''A2.14''' svārthaliṅgapratiṣṭhādau viśaktiḥ parikīrtyate antyeṣṭau kevalā proktā iti tantraviniścayaḥ

'''A2.15''' uktamārgeṇa sarvatra kuryāddeśikasattama anyathā yadi mohena kuryāccetkartṛnāśanam

'''A2.16''' karmanāśaśca deśasya kṣobhaśceha prajāyate tasmāduktavidhānena kuru sarvaṃ gurūttama

===Anhang 3===

''anubandhaḥ 3 · bhairavapūjāvidhiḥ''

<poem>
asya śrī āpaduddhāraṇabhairavamahāmantrasya bṛhadāraṇyaka ṛṣiḥ  |
anuṣṭup chandaḥ  |  āpaduddhāraṇabhairavo devatā  |  hrāṃ bījam  |  hrīṃ
śaktiḥ  |  bhai hrūṃ kīlakam  |  mama āpaduddhāraṇabhairavaprasādasiddhyarthe
jape viniyogaḥ  |  praṇavena prāṇāyāmaḥ  |  mama āpaduddhāraṇāya hrāṃ
vāṃ aṅguṣṭhābhyāṃ namaḥ  |  hrīṃ vīṃ tarjanībhyāṃ namaḥ  |  hrūṃ vūṃ
madhyamābhyāṃ namaḥ  |  hraiṃ vaiṃ anāmikābhyāṃ namaḥ  |  hrauṃ vauṃ
kaniṣṭhikābhyāṃ namaḥ  |  hraḥ vaḥ karatalakarapṛṣṭhābhyāṃ namaḥ  |  hrāṃ vāṃ
hṛdayāya namaḥ  |  hrīṃ vīṃ śirase svāhā  |  hrūṃ vūṃ śikhāyai vaṣaṭ  |
hraiṃ vaiṃ kavacāya hum  |  hrauṃ vauṃ netratrayāya vauṣaṭ  |  hraḥ vaḥ astrāya
phaṭ  |  bhūrbhuvassuvaromiti digbandhaḥ  |
</poem>

'''A3.1''' raktajvālajaṭādharaṃ śaśidharaṃ raktāṅgatejomayaṃ haste śūlakapālapāśaḍamaruṃ lokasya rakṣākaram nirvāṇaṃ śunavāhanaṃ trinayanamānandakolāhalaṃ vande bhūtapiśācanāthavaṭukaṃ kṣetrasya pālaṃ śivam

'''A3.2''' bindutrikoṇaṣaṭkoṇavasvabjaṃ ṣoḍaśaṃ tathā dvātriṃśaddalasaṃyuktaṃ bhūpuraṃ ca trayaṃ likhet

<poem>
bindumadhye likhedvahniṃ trikoṇe vaṭukaṃ likhet
āpaduddhāraṇaṃ ṣaṭkoṇe ajāmalabaddhāya aṣṭadale mantraśeṣaṃ ṣoḍaśadale
kādisāntaṃ dvātriṃśaddale bhūpure indrādibījamiti yantravidhānam  |
pūjāvidhānamāha--
bindumadhye āpaduddhāraṇāya namaḥ  | trikoṇe kālabhairavāya namaḥ  |
baḍabānalabhairavāya namaḥ  |
raṇaraṅgabhairavāya namaḥ  |
ṣaṭkoṇe--
kālabhairavāya namaḥ  |  vīrabhairavāya namaḥ  |  mahākālabhairavāya namaḥ
|  bhīṣaṇabhairavāya namaḥ  |
śaṃkarabhairavāya namaḥ  |  ugrabhairavāya namaḥ  |
aṣṭadale--
hetughnāya namaḥ  |  tripuraghnāya namaḥ  |  vahnaye namaḥ  |  yamajihvāya
namaḥ  |  kālāya namaḥ  |
karālāya namaḥ  |  ekāṅghraye namaḥ  |  bhīmāya namaḥ  |
ṣoḍaśadale--asitāṅgādi brāhmyādi
dvātriṃśaddale--tattanmātṛkādevatāḥ
bhūpure--indrādi
bahirbhūpure--vajrādi
iti pūjāvidhiḥ
tathā bindubile--vaṃ hrīṃ trikoṇe vaṃ ṭuṃ kaṃ ṣaṭkoṇe--
āpaduddhāraṇāya aṣṭadale--
ajāmalabaddhāya ṣoḍaśadale--yogīśvarāya mama dāridryadveṣiṇe
mahābhairavāya huṃ phaṭ svāhā  |
antyadale--ṣoḍaśākṣaram dvātriṃśaddale--kādisāntam bhūpure--
indrādibījam laṃ raṃ haṃ ṣaṃ vaṃ yaṃ saṃ śaṃ  |
oṃ hrīṃ vaṃ vaṭukāya āpaduddhāraṇāya ajāmalabaddhāya yogīśvarāya mama
dāridryadveṣiṇe mahābhairavāya huṃ phaṭ svāhā  |
oṃ hāṃ bhāṃ mahākālabhairava īśānamūrdhāya namaḥ  |
oṃ hāṃ bhāṃ mahābalabhairava tatpuruṣavaktrāya namaḥ  |
oṃ hāṃ bhāṃ aghorabhairava aghorahṛdayāya namaḥ  |
oṃ hāṃ bhāṃ vajravīrabhairava vāmadevaguhyāya namaḥ  |
oṃ hāṃ bhāṃ krodhakālabhairava sadyojātamūrtaye namaḥ  |
iti mūrdhādipañcavaktreṣu vinyaset  |
oṃ hlāṃ bhāṃ vaṃ namaḥ  |  parāya mahākālabhairava nivṛttikalātmane namaḥ
|
oṃ hvīṃ bhīṃ viṃ namaḥ  |  parāya mahākālabhairava pratiṣṭhākalātmane namaḥ
|  oṃ hrūṃ bhūṃ vuṃ namaḥ parāya
aghorabhairava vidyākalātmane namaḥ  |  oṃ hyaiṃ bhaiṃ vaiṃ namaḥ parāya
vajravīrabhairavaśāntikalātmane namaḥ
oṃ hauṃ bhauṃ vauṃ namaḥ parāya krodhakālabhairavaśāntyatītakalātmane namaḥ
iti jānuguhyahṛdayavaktramūrdhasu kaniṣṭhādikrameṇa vinyaset  |
oṃ hāṃ bhāṃ anantabhairavāya namaḥ
oṃ hāṃ bhāṃ sūkṣmabhairavāya namaḥ
oṃ hāṃ bhāṃ śivottamabhairavāya namaḥ
oṃ hāṃ bhāṃ ekanetrabhairavāya namaḥ
oṃ hāṃ bhāṃ ekarudrabhairavāya namaḥ
oṃ hāṃ bhāṃ trimūrtibhairavāya namaḥ
oṃ hāṃ bhāṃ śrīkaṇṭhabhairavāya namaḥ
oṃ hāṃ bhāṃ śikhaṇḍibhairavāya namaḥ
ityaṣṭavidyeśvarabhairavān vinyaset  |  taduktam--
</poem>

'''A3.3''' pañcamūrtīḥ ṣaḍaṅgaṃ ca prathamāvaraṇe smṛtam

'''A3.4''' aṣṭavidyeśvarāṃścaiva dvitīyāvaraṇe tathā brāhmyādi śaktisahitānasitāṅgāṃstṛtīyake

'''A3.5''' caturindrādikaṃ caiva vajrādīn pañcame tathā pañcāvaraṇasaṃyuktaṃ bhairavaṃ taṃ prapūjayet

'''A3.6''' nīlajīmūtasaṃkāśaṃ nīlāñjanasamaprabham śuddhasphaṭikasaṃkāśamabhiraktaśiroruham

'''A3.7''' daṃṣṭrākarālavadanaṃ kirīṭamakuṭojjvalam bhujaṅgamekhalopetaṃ maṇiratnavibhūṣitam

'''A3.8''' khaḍgaṃ vāme savyapāṇau śūlaṃ caiva tathā punaḥ kapālamabhayaṃ varadaṃ ḍamaruṃ bhujagaṃ tathā daṇḍapāṇiṃ mahābāhuṃ dhyātvā mantraṃ sadā japet

===Anhang 4===

''anubandhaḥ 4 · antarbalibahirbalividhiḥ''

'''A4.1''' balidānaṃ dvidhā proktaṃ bahirantarvibhāgataḥ ādāvantarbaliṃ kuryādbahirbalimataḥ param

'''A4.2''' mekhalāsu prakurvīta kuṇḍasyaiva yathāvidhi kuṇḍahīnapradeśe tu tasya cāgneyakoṇataḥ

'''A4.3''' maṇḍalaṃ parikalpyātha kuryādvai balidānakam pradhānakuṇḍe saṃproktaṃ niyamena balerdvayam

'''A4.4''' aṣṭasvanyeṣu kuṇḍeṣu kuryādekaṃ bahirbalim pañcāvaraṇasaṃyukto vibhāti parameśvaraḥ

'''A4.5''' prathamāvaraṇe brahmapañcakaṃ caiva deśika vidyādehaśca hṛdayaṃ netraṃ mūrdhā śikhā tathā

'''A4.6''' kavacaṃ ca tathaivāstraṃ śivāgnau juhuyādguro anyeṣvāvaraṇeṣvevaṃ sthitānāṃ tu divaukasām

'''A4.7''' balidānaṃ prakurvīta na kuryādāhutiṃ guro dvitīyasminnāvaraṇe sthitānāṃ tu divaukasām

'''A4.8''' vidyeśvarāṇāmaṣṭānāṃ tṛtīyāvaraṇe tathā naṃdyādīnāṃ tathāṣṭānāṃ kuryādantarbaliṃ kramāt

'''A4.9''' caturthāvaraṇasthānāmindrādīnāṃ suparvaṇām bahirbaliṃ prakurvīta vidhivaddeśikottama

'''A4.10''' prathamāvaraṇaṃ śuddhaṃ dvitīyaṃ miśramucyate tṛtīyaṃ ca tathā miśraṃ caturthāvaraṇaṃ punaḥ

'''A4.11''' aśuddhamiti saṃproktaṃ pañcamaṃ ca tathā bhavet dvitīyasya tṛtīyasya miśratvenaikatā kṛtā

'''A4.12''' mekhalāyāṃ tathā cordhve cāṣṭavidyeśvarānsurān mekhalāyāṃ tathā madhye naṃdyādīnvai tathā surān

'''A4.13''' dhyātvāntarbalinā caivaṃ pūjayedgurupuṅgava mekhalāyāṃ tathā cādhaścendrādīnāṃ divaukasām

'''A4.14''' bahirbaliṃ kramātsamyagdāpayedgurusattama caturthāvaraṇasthānāmāyudhānyeva pañcame

'''A4.15''' tadeteṣāṃ na kurvīta pṛthagvai balikalpanam kuṇḍaṃ vinā sthaṇḍilādau kalpitasyāśuśukṣaṇeḥ

'''A4.16''' homādau padapūjāyāṃ balidānavidhikramam vakṣyate śraddhayā sārdhaṃ śṛṇu nānyamanā guro

'''A4.17''' sthaṇḍilādestathāgneyabhāge saṃskṛtabhūtale haridrāreṇubhiḥ samyagvṛttaṃ vā caturaśrakam

'''A4.18''' kārayenmaṇḍalaṃ cāntardvādaśāṅgulavistṛtam caturaṅgulaṃ bāhye tu parito’nyatprakalpayet

'''A4.19''' antarmaṇḍalake kṣipto balirantarbalirbhavet bahirmaṇḍalake kṣipto baliścaiva bahirbaliḥ

'''A4.20''' pūrvato’ntarmaṇḍalasya rudrebhya iti mantrataḥ dakṣiṇe mātṛbhya iti gaṇebhya iti paścime

'''A4.21''' yakṣyebhya ityuttare ca grahebhya iti caiśake vasubhya iti cāgneye rakṣobhya iti nairṛtau

'''A4.22''' nāgebhya iti vāyavyāmṛkṣebhyaścaiśadakṣiṇe nirṛtyuttarataścaiva rāśibhya iti madhyame

'''A4.23''' kṣetrapālāyeti tato oṃ hāṃ pūrvebhya eva ca svāhāntebhyo baliṃ kuryādevamantarbalikramaḥ

'''A4.24''' bāhye tu maṇḍale caivaṃ maghavānaṃ ca pūrvataḥ āgneye’gniṃ yamaṃ caiva dakṣiṇe nairṛtau tathā

'''A4.25''' nirṛtiṃ paścime caiva varuṇaṃ vāyukoṇataḥ vāyuṃ ca uttare somamīśānaṃ caiva taddiśi

'''A4.26''' īśānadigdakṣiṇe ca brahmāṇaṃ ca vibhāvya ca nirṛtyuttarato viṣṇumoṃ hāṃ bījasamanvitam

'''A4.27''' caturthyantānvitaṃ caiva svāhāntaṃ caiva deśika kalpayenmantramuccārya bahirevaṃvidho baliḥ

'''A4.28''' mekhalāyāṃ vinikṣiptau bahirantarbalī guro pratiṣṭhādau śivādīnāṃ kalpayetāṃ vidhānataḥ

'''A4.29''' maṇḍale kalpitāvetau bahirantarbalī kramāt niyamena vidhīyetāṃ vāstuśāntyādikarmaṇi

===Anhang 5===

''anubandhaḥ  5 · prāyaścittavidhiḥ''

'''A5.1''' prāsāde manuje jāte mṛte rājño bhayaṃ bhavet mṛtādi tatpradeśāttu visṛjyātha bahistataḥ

'''A5.2''' prokṣayedgomayāmbhobhiryena deśena te gatāḥ tato viśeṣataḥkuryātpuṇyāhaprokṣaṇaṃ ca vai

'''A5.3''' mṛtaprasūtadeśe tu khānayogyaṃ khanettu vai parityajya mṛdo’śuddhāḥ śuddhābhiḥ pūrayettataḥ

'''A5.4''' prakṣālyāsannakuḍyādyaṃ gomayālepite sthale puṇyāhaṃ tatra gavyena prokṣaṇaṃ ca kramānnayet

'''A5.5''' śaivasaṃbhojanaṃ cānte jalasaṃprokṣaṇaṃ nayet snapanaṃ śāntihomaṃ ca yadi garbhagṛhe bhavet

'''A5.6''' śāntihomādikaṃ kuryādardhamaṇḍapake sati pratimāmaṇḍape śāntihomaṃ ca snapanaṃ vinā

'''A5.7''' antaḥsālāntare ceddhi jalasaṃprokṣaṇaṃ nayet antaḥsālāsthadevānāṃ snapanaṃ śāntihomakam

'''A5.8''' gavyena prokṣayettatsthapīṭhānāmapi śuddhaye tyajenmārttikabhāṇḍāni kṣālayeddārujaṃ jalaiḥ

'''A5.9''' antaḥsālāyā bāhye syātsnapanena diśāhutiḥ pākasthānādideśeṣu maraṇādeśca saṃbhave

'''A5.10''' pūrvavacchuddhimāpādya paryagnikaraṇaṃ nayet diśāhomaṃ tataḥ kuryānmūrtihomamathācaret

'''A5.11''' prākāradvayabāhye tu śāntihomaṃ tu kārayet dhāmno dvādaśadaṇḍānte vāstau martyā mṛtā yadi

'''A5.12''' parityajya tataḥ kuryānnityanaimittikādikam kṛtaṃ cedgrāmanāśaḥ syāttadarthaṃ snapanaṃ caret

==Quelle und weiterführende Lektüre==

N. R. Bhatt (Hrsg.): ''Ajitāgama. Édition critique.'' Drei Bände. Publications de l’Institut Français d’Indologie 24. Pondichéry: Institut Français d’Indologie, 1964, 1967 und 1991.

Die vollständige deutsche Übersetzung sowie Erläuterungen zu Lehre, Aufbau und spiritueller Bedeutung findest du im Hauptartikel '''[[Ajita Agama]]'''. Dort stehen auch weitere [[Ajita Agama#Quellen und Literatur|Literaturangaben]] und [[Ajita Agama#Hinweise zur Textgrundlage|Hinweise zur Textüberlieferung]].

==Siehe auch==

[[Ajita Agama]]
[[Ajita Agama Sanskrit Devanagari]]
[[Ajita Agama 108 Verse und Mantras]]
[[Shaiva Siddhanta]]
[[Shiva]]
[[Mantra]]